أسدها بجاى تنقد بجاى....

والله مانى ماعارف.مكتوب على شقى ومجنون. اسدها بجاى تنقد بجاى. خلاص قلبى طم.يا شعراء المنبر ، يا كتبا ، يا مبدعون ، يا متخصصون فى تنزيل الصور ....عاوزكم تعبروا لى عن حالى ....أها أسدها بجاى تنقد بجاى

كفانى سديد. انشا لله تنقد . والمثل بقول كان قلبك سدها وسع قدها. فى مسرحية بيت الدمية للكاتب النرويجى جوهانك هنرك أبسن ظلت شخصية نورا عمرها العامر ، تسد سد فيها...تسدها بجاى تنقد ليها بجاى، كان خوفها اجتماعى كبير، خوف من الحقيقة. لقايت ما الفاس وقعت فى الراس. زولتكم نورا طبقت المث كان قلبك سدها وسع قدها . مرقت ست من البيت وقفلت الباب رووو، فزت عديل وقفلت الباب خلفها ، لحد اليوم دا نورا تجرى وتنجم تانى مارجعت، ارتاحت من الحكاية . كمان فى مسرحية خطوبة سهير للكاتب السودانى حمدنا الله عبد القادر ، سكينة والدة سهير كانت طيلة الوقت تسدسد فى الأمور ، ما عاوزه الناس تعرف حكاية زوجها السكير ، أملها لما الخطيب يجيى ومعاه أهلو يلقو خليل زوجها راجل سودانى ضكر من البيت الى المسجد ومن المسجد للبيت . الحكاية طلعت كربجه جوه وكربجه بره ( على حد قول خليل) فى الخطوبها طينها وسكر سكرة التابانى، وجاء البيت عند المساء لط ...وقال الرهيفه التنقد.دا كلو كوم ...أنا أحسن من نورا ولا أشرف من خليل ...اسدها بجاى تنقد لى بجاى

Abuelgassim Gor
والله الحال من بعضو لكن مرات بتكون فاقد ليك زول ولا حاجة
سيبها علي الله بكرة تفرج إنشاء الله

الصديق المبدع هاشم
كتر خيرك على المرور والموساة. يا خوى دى 30 سنة بحالها. بقيت زى تور الساقيه...يعنى مش التور بجر الساقيه ؟أنا العكس ، أنا ساقيه بتجر ليها تور ، سمكة بلا زيل ، بحر بلاساحل ، شيئئ بلا شيئ خلاص يا أخوى فترت.... زى سيزيف وصخرتو....وكمان بدل سيزيف بيدفر الصخرة ، أنا العكس الصخرة بقت بتدفر سيزيف.... أنا مكنكيش فى البلد دى تقول سأعيش الى الابد. أسدسد وأسدسد لقايت ما قلبى طم. كل المطارات يا خوى مفتوحه.

UP

الكذب...الكذب...يا كضبىىىىىىىىىى
الكضب بحاصرك. يحاصرك الكضب فار شنباتو زى عنتر. الكضب خلف صناديق الكنتين. الكضب على رفوف البقالات . الكضب على الجرايد، والاذاعات ، والشاشات ، والتلفزيونات البتلعلع ليل نهار..شعراء كذابون.كتاب كضابون. الكضب العنيف .. العنف الكضبى ، الكضب الاقتصادى ، الكضب السياسى ، الكضب يا جماعة. نفتح علبة الساردين نجد الكضب ، الكضب خلف الحمام ، خلف النوافذ ، والابواب ، يبسم الكضب بهدوء عندما نغفو فى النوم ... زى الشيطان الرجيم يبسم بهدوء وسخرية ..يانىىىىىى الكضب ، الكضب يبسم بسمه صفراء ....لا حولة ولا قوة الا بالله الكضب الاكاديمى ، البحث الكضبى ، الكضب البحثى. الكضب ياجماعة فى السودان ما عندو عضم بخنق...والله لو كان الكضب عندو عضم كان تلقونا مخنوقين ....عوع كضب

جاتنى رسالة على الموبايل بتقول ( استقبالك ل 100 عام) معقوله بس؟؟ . هو لما الاستقبال بقى بقروش كمان فقط مائة عام

Iam because I lie
أنا أكذّب أذا أنا موجود

بقيت زى السباكى.اسده بجاى تنقد بجاى

UP