هنأوني، فقد أصبحت بالوثائق صاحب أغرب مهنة من نوعها.. توجد صورة للمستند الرسمي

من منكم يستطيع أن يتوقع الوظيفة التي امتهنها ومنها أقتات وأعيش
طبعاً .. أعطيكم وبكل راحة ضمير حرية التخمين ..
ولا تثريب عليكم أن تتوقعوا لي أي نوعٍ من الوطائف أو المهن تتخيلون
فمهما ذهبتم بخيالكم لن تصلوا إلى هذه البدعة الكيزانية الجديدة لنج
ولست أدري إن مر أحدكم بالمعاناة التي مررت بها الأيام الماضية
عموماً ... لا أطيلن عليكم
ذهبت إلى وزارة الداخلية وإلى شرطة الجوازات تحديداً
عليّ أحظى بذلك الذي يسمونه جواز سفر
وبعد لأيٍ وعنت مما أنتم به عالمون وعارفون
تعطلت إجراءاتي أياماً متتالية..
أتدرون لماذا .....!!!!!!!!!!!!!!؟؟؟؟؟؟؟؟؟؟؟؟؟
السبب خانة المهنة ..
طبعاً لكوني انتهيت من دراستي الجامعية
كان من الإستحالة أن أكتب المهنة طالب
وبما أني حائز على إجازة علمية من جامعة معترف بها (على الأقل في السودان)
وبموجب هذه الشهادة توظفت عدة مرات
لكن ولسوء حظي العاثر دخلت في دوامة العطالة طويلة الأمد
وشاءت الظروف أن احتاج إلى استخراج الجواز في هذا التوقيت الحرج
لتتأبى شرطة الجوازات أن تكتب لي المهنة التي أرغب والتي يمكن ان أزاولها في أي وقت كان
ليكتبوا لي في خانة المهنة مهنة لم أسمع بها من قبل
ولا أعتقد أن الله أنزل بها من سلطان في سائر بلاده خلا هذا السودان
أتدرون ما هي ..............؟؟؟؟؟؟؟؟؟

المهنة خريج

وهذا هو المستند الرسمي الذي يثبت ذلك....


ألم أقل لكم أني صاحب المهنة الأغرب من نوعها...

كلمة خريج الانجليزية ناقصة حرف D برضو

يعني اكلوك حرف ..... اصلو جنهم لحس

Quote: كلمة خريج الانجليزية ناقصة حرف D برضو

تصحيح للمعلومة

Graduate كلمة صحيحة معناها خريج

graduate: n. (-ĭt): One who has received an academic degree or diploma.

ورغم أنها تكتب مثل الفعل graduate إلا أن اللفظ مختلف

خريج: تلفظ قراديوِت (بكسر الواو)

يتخرج: تلفظ قراديويت (بمد الياء بعد الواو)

graduated هي فعل ماضي past tense

أ. أيمن شكرا على المرور ...
لا أدري ماذا تقصد بالتصحيح الذي ذكرت ...
لو دققت جيدا في صورة الجوزا لوجدتها فعلا تنقص حرف D
- ماذا تعني هذه الكلمة وهي ناقصة حرف D

الأخ نور الدين

يبدو أنك لم تفهم مداخلتي

ببساطة.. الكلمة بدون حرف D هي الصحيحة

بحرف D تتحول إلى فعل

خريج = Graduate

بدون D

أنظر الدكشناري..

الأخ أيمن جبارة الله..
ياخوي الغلاط شنو؟؟ الحكاية موش في كلمة Graduate أو حتى الفعل Graduated...الحكاية بس الكلمة في الجواز مكتوبة Grauate..
يعني إنت مفروض تشوف كويس..وبعدين تقوم على جنس الغلاط بتاعك دا..
القصة يابا ما محتاجة ديكشنري...
ركز شوية

Quote: تصحيح للمعلومة Graduate كلمة صحيحة معناها خريج graduate: n. (-ĭt): One who has received an academic degree or diploma. ورغم أنها تكتب مثل الفعل graduate إلا أن اللفظ مختلف خريج: تلفظ قراديوِت (بكسر الواو) يتخرج: تلفظ قراديويت (بمد الياء بعد الواو) graduated هي فعل ماضي past tense

ديشاااااااااااااااااااك على الفذلكة اللغوية دي والله رجعتنا لايام علي هلال في معهد غريب مقلد في ارقو


ولكن بعد دا كلو انت برضك ما صححت لان الكلمة كلمة ناقصة اكيد...
كدي اقرا الكلمة من الاول يعني حرف ال_ D موش في نهاية الكلمة وانما الحرف الرابع GRAUTAE المفروض تكون GRADUATE لاحظ شديد حتلقى الكلمة اساسا غلط.

وهنا تحضرني ذاكرة
في مرة من المراريت
استحضرت خطاطا ليكتب لي لوحة في محل استأجرته في نشاط جامعة النيلين
وبخط جميل كتب ARIF SENTER والطلاب الفضوليون يشاهون جمال الخط ولم يفكر احدهم في الخطأ الفادح SENTER وبعد ان انتهى جاء ليتسلم الحساب فقلت له شغلك غلط فاستعجب ليه!!!؟؟؟
فقلت له ان الكلمة يجب ان تكتب CENTER فقال ليه ما قلت لي من الاول العموم الحساب. فقلت معاذ الله.

العزيز زمراوي ...
تشكر على هذه التوضيحات بخصوص الكلمة إياها وإنت كنت لا أريد الاحتفاظ بها كمهنة لي ...
لكن برضو على هامش الإشكاليات اللغوية دي ممكن تسمح لي بالسؤال دا ....

Quote: في مرة من المراريت

إنت مراريت الي أنا فهمت من سياق الكلام إنها جمع مرة جبتها من وين ...؟؟؟؟

ياهندسه انت كويس مكتوب ليك خريج اخت لينا دكتورة السعودين كاتبين ليها (بنت) في خانه المهنه

أقسمت لهم أني غير ذلك ..
وأحضرت لهم شهادتي الجامعية الموثقة من الجامعة ومن وزارة التعليم العالي
والتي تقول أنني :
حائز على بكالريوس الهندسة مرتبة الشرف من جامعة السودان كلية الهندسة قسم الهندسة الإلكترونية
وجئت ببعض من شهادات الخبرة من الشركات التي كنت أعمل فيها أو تلقيت فيها تدريباً
ولكن هيهات هيهات..
فأنت خريج ...
طيب ياجماعة الخير تكرموا علي بـــ " خريج هندسة " ، الجماعة برضوا أبوا ..
طبعاً أصبت بــــــ
وأصابتني حالة ولكن طبعاً تحت تحت ما قدامهم
ولم أجد في النهاية غير أن أندب حظي لوجودي في مثل هذه دولة





عموماً .. قد لا أكون الوحيد الذي أمتهن هذه الوظيفة ..
وعلية أوجه الدعوة لكل زملاء المهنة ...
أن يتنادوا إلىّ لأنني بصدد تكوين نقابة مهنة الخريجين
وطبعاً أنا متأكد من الإكتساح والفوز بالإنتخابات...
حتى وإن جرت في ظروف غير نزيهة
فمهما كان لا يوجد بالتأكيد كوز عاطل عن العمل
ولا إنتو رأيكم شنو .....؟؟

العزيز حيدر ...

Quote: كلمة خريج الانجليزية ناقصة حرف D برضو يعني اكلوك حرف ..... اصلو جنهم لحس

والله زي ما قلت .. الجماعة جنهم لحس ..
سألتهم : طيب بعدين يا جماعة لو الظروف تغيرت واشتغلت اعمل شنو بخصوص المهنة ؟؟
قالوا لي ترجع نعمل " تغيير مهنة " ونديك دفتر جديد ،
- الطيب المسألة دي فيها رسوم ...؟
ردوا علي نعم، وهي نفس رسوم استخراج جواز جديد

رايك شنو يافردة نضمك لمؤتمر { الخريجين }
يعني تجي عديل ومامحتاج اي إثبتات غير صورة الجواز اعلاه

لكن ياخي أحمد ربك ماكتبوا ليك حاجة تانية
عندنا صديقنا كان عاوز يشتغل مترجم في المستشفى
والراجل ماشاء الله منجض الترجمة دي يمين وشمال
أها ناس المستشفى ماوجدوا وظيفة شاغرة بمسمى { مترجم }
وفي نفس الوقت محتاجين للراجل حوجة شديدة جداً
واخيراً وجدوا الحل
عندهم وظيفة شاغرة بمسمى { قابلة } داية يعني
اها تم توظيف صاحبنا عليها
الراجل ماشاء الله ماحرق اعصابو ولازعلان زيك
مرتب وبدل سكن وكمان بدل طبيعة عمل
لأنو الداية بتتعرض مرات لأشياء كثيرة قد تصيبها بالعدوى

لدي أحد الأصدقاء هذا لايخرج دفتر اقامته لأي انسان
رابط الدفتر ولافيهو بعشرة أكياس نايلون
عارف ليه ؟؟
مكتوب في الاقامة التالي :
المهنة : راعي
الجنسية : راعي !!!!!

اعطوني قبل فترة عقد عمل لتدقيقه والتوقيع عليه يخص طبيب مصري يعمل معنا
وجدت أحد الفقرات مكتوب عليها { يعطى المذكور إجازة وضع مدتها 45 يوم مع كامل المستحقات }
وعندما دخل المصري على مكتبي أول شيء كنت أعاين في بطنه حتى استغرب
وقال لي : ياخبر ايش في ؟؟
فقلت له نقول ليك مبرووووووووووك لديك اجازة وضع مدتها 45 يوم
فرد لي سريعاَ : يا لهوي !!!

قال خريج قال

Quote: طبيب سوداني يطلب تأشيرة دخول الى اسرائيل لعلاج شارون 2-10-1428 هـ الموضوع: النيلين ذكرت مصادر صحفية مصرية اليوم ان نيابة امن الدولة بالجيزة بدأت التحقيقات مع طبيب سوداني توجه الى مقر السفارة الاسرائيلية بالقاهرة وطلب الحصول على تاشيرة لدخول تل ابيب لعلاج رئيس الوزراء الاسرائيلي السابق ارئيل شارون . وكانت الاجهزة الامنية بالجيزة تلقت اخطارا من ضباط تامين سفارة اسرائيل بانه اثناء تفقد الحالة الامنية بنطاق مقر السفارة والمناطق المحيطة بها حضر الطبيب السوداني، سامي فضل الله الجمال 39 عاما، كان طبيبا بالمركز الايطالي للقلب بالسودان ويقيم بفندق ايزيس بالعتبة الى الضباط وطلب السماح له الصعود لمقابلة شالوم كوهين سفير اسرائيل للحصول على تاشيرة دخول لاسرائيل، وزعم انه توصل لعلاج جديد يساعد في علاج شارون من امراض القلب وباعادة مناقشتة تبين انه حضر لمصر بتاريخ 26 سبتمبر الماضي ،وانه يريد العمل باسرائيل بعد ان فشل في الحصول على فرصة عمل في بلاده ..

قريتو الزول دا كانت مبرراته شنو ...؟؟؟

Quote: وانه يريد العمل باسرائيل بعد ان فشل في الحصول على فرصة عمل في بلاده ..

ياربي تكون خانة المهنة في الجواز المشى بيه القاهرة برضو خريج !!؟؟

تحياتى ابو صلاح

يلا يا حبيبنا غيّر المهنة فى البروفايل سريع
موش حكومة بلادك قالت انو مهنتك خريج بدل مهندس

حال يحزّن!! انتا يا صلاح ما كان عندك خمسة الف
بالقديم ممكن تشترى بيها الجميع عالم رخاس خلاس.

الله يكون فى عونك يا صديق

عزيزي أبو حراز ...
شكراً على المرور
إنت عارف أنا محتاج مساعدة مهنية كدا من ذوي الخبرة
حسى أنا لو تخارجت من البلد دي ( تخارجت جاية من خريج )
ومشيت بلاد برا دي ..
وقاموا سألوني مهنتك شنو ؟؟؟
أرد عليهم بقول خريج
لكن لو سألوني اسم الشركة أو مقر وين .. أقول شنو ...؟
أقول شنو ....؟؟؟؟

Quote: رايك شنو يافردة نضمك لمؤتمر { الخريجين }

والله يانور الدين صلاح ضحتنا غايتوا انته معارض ولا شنو

يعنى هسى تجى مسافر بالجوز دة اى دولة موظف الجوزات فى المطار يكتب شنوا فى خانة المهنه ولا يتصل بوزارة الداخلية السودانيه يعرف انته شغال شنوا والله دى محنه دى يعنى الناس ديل ما محترفين بى شهادتك الحاصل علية من جامعتم ولا ما محترفين بيك مهندس ولا شكلك ما مهندس ؟؟؟ ولا الحاصل شنوا

____________________________________________

تخريمة انته عامل فيه بتفهم احسن من حكومة البشير يا زول

عزيزي أيو بكر

Quote: الله يكون فى عونك يا صديق

وكان الله في عون هذه البلد
" بلاد كلما ابتسمت ...
حط على شفتيها الذباب "
بعدين كان حكومة جمهورية السودان أبت
إنتو ما تابوا عليّ
والله أنا ذاكرت وتعبت وسهرت لغاية ما أدوني شهادة الهندسة دي

عزيزي امير جابر ...

Quote: والله دى محنه دى يعنى الناس ديل ما محترفين بى شهادتك الحاصل علية من جامعتم ولا ما محترفين بيك مهندس ولا شكلك ما مهندس ؟؟؟ ولا الحاصل شنوا

الحاصل أنو أنا ممحن.. وبس

تعرف و الله ناس الجوازات ديل ناس ظريفين جدا... ذهبت قبل عدة سنوات لتجديد جوازي و أستبدال الدفتر بأخر و في ذلك الوقت كان جوازي منتهي منذ سنوات عديدة ومضي علي تخرجي حوالي 9 سنوات فطلبت كتابة مهنتي الأصليةو التي أمارسها.... وكانت رخصة ممارسة المهنة و بعض الشهادات بالأنجليزي فرفضوا رفض بات و طلبوا أشياء خرافية,, فما كان مني الأ ان قلت لهم أكتبو المهنة التي تعجبكم... فقالو نكتب طالب كما في جوازك السابق, ضحكت وقلت لهم بس انا لا أستطيع أن أثبت لكم اني طالب الي الآن... فقالوا مافي مشكلة طالما هي في الدفتر القديم فهذا يعتبر نقل بيانات.... أخبرتهم بانهم يخسرون فرق الرسوم حيث رسوم الطالب أقل واصروا وأستكبروا أستكبارا... فكان أن أصدروا دفتر جديد بمهنة طالب .... وظني أن هذا منهجهم....

Quote: وكانت رخصة ممارسة المهنة و بعض الشهادات بالأنجليزي فرفضوا رفض بات و طلبوا أشياء خرافية,,

لكن إنت عارف يا أ. مرتضى الناس ديل شكلهم انكليزهم كعب شديد ..
دي الـ D الشالوها دي ..
لكن برضو الناس ديل فش شنو مصرين على مسألة طالب وخريج دي ..
يكون في حاجة لسه ما علموها لينا وأدبة ما أدبوها لينا

لاخ نور الدين......سلامات والجات فى جوازك سامحتك ....

الكلام الفي بروفايلك دة ما عرفتو

Quote: الأمين التنظيمي لحزب المؤتمر السوداني - ولاية الخرطوم السكرتير السياسي لتحالف شباب قوى السودان الجديد

دي تنظيمات واحزاب معارضة ولا شنو? ..التنظيمات دى شايتة وين? والحزب دة والله اول مرة فى حياتى اسمع بيهو..دة جا مع السلام ولا شنو?
احترامى

اخوناالباشمهندس نور الدين صلاح الدين

سلام الرب، و حميم التحايا

Quote: والله أنا ذاكرت وتعبت وسهرت لغاية ما أدوني شهادة الهندسة دي

افو افو ايا اخوى الهندسة تتشرف بيك، و بى ابناء الوطن الصالحين
هو العنصرى البغيض الطيب مصطفى بقولوا ليهو مهندس، معقول نبخل بيها علي شباب السودان الجديد؟

الاخ بدر الدين محمود

Quote: دي تنظيمات واحزاب معارضة ولا شنو? ..التنظيمات دى شايتة وين? والحزب دة والله اول مرة فى حياتى اسمع بيهو..دة جا مع السلام ولا شنو?

حزب المؤتمر السودانى حزب موجود فى الساحة السياسية السودانية بهذا الاسم منذ ثمانيات القرن الماضى ان لم تخنى الذاكرة صححنى يا صلاح لو اخطأت. من مؤسسى الحزب الاستاذ الراحل عبد المجيد امام احد المحامين السودانيين النزيهين و من الذى ساهموا فى النضال ابان دكتاتورية عبود الى ان انتصرت الجماهير فى اكتوبر. و كعادة الجبهة الاسلامية فى التهرب من تاريخها المشين بتغير اسم الحزب عدة مرات فقد قاموا فى نهاية التسعينات بسرقة اسم المؤتمر و جعلوا منه اسم لحزب السارقين و البلطجية. هنالك جناح طلابى لحزب المؤتمر السودانى ناشط فى الجامعات السودانية باسم مؤتمر الطلاب المستلقين. الامين السياسى حزب المؤتمر السودانى حاليا هو الباشمهندس خالد عمر يوسف الذى عاصرته فى الجامعة و تشارك فى كثير من العمل المشترك بين القوى الوطنية و الجبهة الديمقراطية
انا تبرعت باجابة قد حسب معلومات القديمة نسبيا اتمنى من اخونا الباشمهندس نور الدين صلاح تصحيح اى خطاء محتمل.

أ. بدرين محمود ...
إما وإنك لم تعرف فقد عرفت ..
وجزاني الله خيرا في إني كنت السبب ..
وسأعود إليك لاحقا لتصيب علما بعد معرفة


عزيزي أبو بكر صالح ..
شكرا لك المداخلة التي نعتز بها ..
ومعلوماتك صحيحة ...
وسأعود في وقت لاحق لأضفي عليها بعد التفاصيل
وشكرا جزيلا لك كرة أخرى

اها والله اليله ياشباب حصل لى شى انتوا عارفين طبعا انا كنته طالب فى جامعة جوبا فى السودان المهم كلية تربية شعبة جغرافيا وتاريخ المهم تم فصلى من الجامعة فى السنة الرابعة اخر سمستر دة كلوا ما مهم المهم انوا اليلة مشيت اقدم لتكملة الجامعة فى تركيا هنا فى جامعة اتوا يعنى الجامعة الاولة هنا وترتبيها العالمى كويس جدا جدا جدا .. ومعترف بيها عالميا عموما وطبعا تكاليف الدراسة انشاء الله انا ما خسران فوقا اى شى يعنى المنظمة انا شغال فيها بتدفع عموما مشيت وعامل ليك الود خطر وسالته الاول امكانية تكملة الدراسة هنا وكذا والعلاقة مابين خط الاستواء والشمس وووووو المهم الموظف قالت لى بكل هدوء نحنا ما بتقبل اى شهادة من جامعات سودانية وادتنى ظهر بكل بساطة ... اخوكم قرب يطير كيف الكلام دة قلت ليها طيب انا عايز احضر قالت لى امشى مركز الدراسة العليا بس لكن نصيحة ليك ابدى من سنه اولى احسن لانك ما حتكون مواكب ... ونحنا بنقبل شهادات جامعية من لبنان ايران سوريا لانوا فى الدول دى نفس النظام بتاع الجامعات العالمية ... المهم يا جماعة يعنى الواحد ضيع من حياتوا اربعة سنه فى الفاضى وبدون اى فايدة.....

..................................

ماعارف الواحد يقول لى بتاع الزبالة الاسمواء النور محمد خير الكان عميد شئون الطلاب فى عهدنا فى جامعة جوبا شكرا لانك منحتنا فرصة ولا يقول شنوا غايتوا يا حكومة السودان ..

Quote: ذهبت إلى وزارة الداخلية وإلى شرطة الجوازات تحديداً عليّ أحظى بذلك الذي يسمونه جواز سفر وبعد لأيٍ وعنت مما أنتم به عالمون وعارفون تعطلت إجراءاتي أياماً متتالية.. أتدرون لماذا .....!!!!!!!!!!!!!!؟؟؟؟؟؟؟؟؟؟؟؟؟ السبب خانة المهنة .. طبعاً لكوني انتهيت

الاخ العزيز... وابننا نورالدين...اغلب الدول المتقدمة لا توجد ما يسمى بالمهنة على جواز السفر.... فقط فى الدول المتخلفة.... فجواز السفر وثيقة للسفر.. فقط

خالص ودى وتحياتى لكل الاهل
سيف

Quote: ياهندسه انت كويس مكتوب ليك خريج اخت لينا دكتورة السعودين كاتبين ليها (بنت) في خانه المهنه

يعني يا هندسة كويسة ما كتبوا ليك ولد

تقول ليهو أيها الماجد أمير ..
سيأتي يوم نقتص فيه منكم ..
ليس لأجلنا فقط .. بل لأجل سوداننا
سيأتي يوم نحاسبكم فيه على كل الدمار الذي سببتموه لنا
على كل الضياع وعلى كل السنين العجاف


وسيأتي يوم يا أمير ، نكرمك فيه ..
لأنك كنت شجاعا قويا ..
وقلت لا في وجه من قالوا نعم

عزيزي سيف الدين ..
إنها بلاد كلما ابتسمت
حط على شفتيها الذباب

- بالمناسبة بخصوص موضوع الجريف
أنا رديت عليك في بوست الترحيب
إن شاء تكون عرفت جماعتي

حاج حامد...

Quote: يعني يا هندسة كويسة ما كتبوا ليك ولد

الحمد لله إنها جات على كدا ...
لكن برضو الظروف لقدام ما معروف شنو ..!!!!؟؟؟؟

سلام يا نورالدين،

كفّارة وكده ...

الموضوع بسيط

أمشي سجّل في الجمعية الهندسيّة كمهندس خريج، وبعدها بيكون من حقّك تسجل في المجلس الهندسي

بعد ده أتخن واحد ما بيقدر يكتب ليك في خانة المهنة حاجة غير مهندس

وفي كل الأحوال، وحتّي لو ما عايز تغيّر المهنة برضو أحسن تسجل في الجمعيّة الهندسيّة والمجلس الهندسي لأنو غير مسموح بمزاولة المهنة بدون كده

مهنة خريج (وناقصة حرف كمان!) ما أنصحك تسافر بيها أي مكان لأنّها ممكن برضو يعمل ليك مشاكل ...

نصيحة:

الدنيا ما مضمونة، عشان كده أحسن تسحب صورة جوازك وتبدلها بواحدة تانية ما فيها أي معلومات شخصيّة عنّك. ممكن بس يكون فيها الجزء بتاع المهنة ده. كلامي ده لأنّو ممكن واحد من المجرمين ولا الإرهابيين يستعمل المعلومات الفي الصورة في إنّو يطلع جواز مزور ويدخّلك في حيص بيص لا قدّر الله ...

Quote: الدنيا ما مضمونة، عشان كده أحسن تسحب صورة جوازك وتبدلها بواحدة تانية ما فيها أي معلومات شخصيّة عنّك. ممكن بس يكون فيها الجزء بتاع المهنة ده. كلامي ده لأنّو ممكن واحد من المجرمين ولا الإرهابيين يستعمل المعلومات الفي الصورة في إنّو يطلع جواز مزور ويدخّلك في حيص بيص لا قدّر الله ...

أ. خالد مالك علينا ...
وقعت لينا قلبنا عديل .. كان تقول الكلام دا من زمان .. من زمن فتحنا البوست
أقول ليك حاجة ..
نحن السفر دا بطلناه .. نتربس في البلد دي ما نمرق منها ..
هو أحمد هارون الوزير بطل السفر


بخصوص موضوع المجلس الهندسي ...
شكرا جزيلا على النصيحة
حاولت عددا من المرات أن أقوم بهذه الخطوة
لكنها وكما جرت العادة تحتاج إلى طولة بال هي زاتها يكون بالها طويل
لأنه مطلوب أولا أسجل في جمعية هندسي معترف بيها المجلس
وبعد داك أجي أسجل في المجلس
وشان أسجل لازم ما عارف توقيع رئيس اتحاد المهندسين
وبين كل خطوة وخطوة أدفع رسوم شنو كدا ما عارف
وبين التقديم الموافقة عليه انتظر كذا يوم
بعدين اقول ليك ..
إنت عارف الاجتماع الدوري للمجلس الهندسي البي بيجزوا فيهو الطلبات بينعقد كل كم
وكم هي احتمالية أن لا ينعقد الاجتماع لأي سبب واهي
المهم أنا حالوت كم مرة وما قدرت اتم الموضوع بسبب الجرجرة الكتيرة بتاعتهم
لكم المرة دي عازم إنو أكون طويل البال
وكتر خيرك مرة أخرى على النصائح الغالية

لحد الليلة انا أسمي رايح!

بينما تُكتب أنور بالانجليزية في كل العالم هكذا Anwar...بتاع جوازاتنا أتفولح وكتبا لي كده Anour

!!!!

ربنا يعينك

أنور

عزيزي أنور يقولون :
من راى مصيبة غيرة هانت عليه مصيبته
فمن ترى يا عزيزي صاحب المصيبة الأهون ...؟؟؟؟

Quote: ماذا تعني هذه الكلمة وهي ناقصة حرف D

لك التحايا اخي نور الدين.. انت لازم تعمل الخدمة الالزامية عشان يكملوا ليك الحرف الناقص D.

تحياتي

امين

وحاتة اسم الله عاملها ...
ولو ما حذروني فوق من الآرهابيين
واحتمال استغلال صور المستندات
كان أنزل صورة منها
شكرا عزيزي الأمين
وما تنسى تدعي لينا مش بحرف D
ولكن بالوظيفة

عزيزي نور الدّين،

يبدو أن الجهبذ الذي أصرَّ على ’خِرِّيج‘ – والحمد لله أنه لم ’يأكل‘منها حرفًا، كما فعل في المُرادِف الإنچليزي – كان قد ’چَوْچَلَ‘ الكلمة التي ظنَّ أنها تعني الخِرِّيج، فوجَد آلافًا منها على الشبكة العنكبوتية 

Results 361 - 380 of about 15,600 for grauate

تحيّة إلى حيْر – عفوًا، حيْدر - الذي لاحظ فقدانَ الدّال الإنچليزية من كلمة ’چْرادْيُوِت‘، وإلى محمود وزُمراوي (رغْم "مراريت" الأخير  )؛ وأسَفي لأنّ أيمن لم يعترف بالخطأ، مع أنّ في ذلك فضيلة.

تحية أيضًا إلى سيْف، الذي قال مُحِقًّا إنّ "اغلب الدول المتقدمة لا توجد ما يسمى بالمهنة على جواز السفر.... فقط فى الدول المتخلفة.... فجواز السفر وثيقة للسفر.. فقط." ويبدو، كما قالت زوجتي الفنلندية، أن البلدان التي تُتيح المجالَ لوضع المهنة في جواز السفر هي بلدانٌ لا تزال الطَّبقيّةُ فيها قائمة.

بالمناسبة، ضحِكنا كثيرًا عندما قلتُ لها – وهي أستاذةٌ جامعية (Associate Professor) ورئيسةُ قسْم الإنسانيات والعلوم الاجتماعية (Chair, Division of Humanities and Social Sciences) في الجامعة اللبنانية الأميركية (LAU) – تصوَّري أن يَضع لكِ أحدُهم في خانة المهنة: كُرسي !

ألن تكون تلك، يا نور الدّين، أغرب مهنة من نوعها في العالم؟ 

عزيزي غسان ....

Quote: كما قالت زوجتي الفنلندية، أن البلدان التي تُتيح المجالَ لوضع المهنة في جواز السفر هي بلدانٌ لا تزال الطَّبقيّةُ فيها قائمة.

والله نحن آسفين إنو إحنا على الدوام مسببين ليك الخجل مع المدام
مرة في جوازات السفر ..
ومرة في الكورة ...
ومرة بسبب الرئيس والحكومة ...
ومرة بسبب .... وأظن القائمة ستطول

لكن بس ما فهمت حكاية مهنة الكرسي دي شنو .؟؟؟؟؟

سيّد نور الدّين،

Quote: والله نحن آسفين إنو إحنا على الدوام مسببين ليك الخجل مع المدام مرة في جوازات السفر .. ومرة في الكورة ... ومرة بسبب الرئيس والحكومة ... ومرة بسبب .... وأظن القائمة ستطول

عمّا تتحدَّث، وأين، ومتى؟

Quote: لكن بس ما فهمت حكاية مهنة الكرسي دي شنو .؟؟؟؟؟

تعبير أكاديمي، بمعنى مدير أو رئيس.

آسف جدًّا لردِّ فعلك غير المبرَّر إطلاقًا، وآسف للمداخَلة التي لم أظنّ إطلاقًا أنها ستُثير حفيظتك.

عزيزي أ. غسان ...
أنا اعتذر إليك إن فهمتني خطأ
ماكنت أٌقصده عو التعليق على مسألة أن كتابة المهنة على جواز السفر هو إجراء مفترض أن تقوم به مجتمعات اٌقطاعية وفي والقت الذي تطورت فيه البشرية تحصل ممارسة ( تم تسميتها بالاقطاعية ) في دولة مثل السودان
ثم برأيك ....
هل نسبة الفقر المتفشية في السودان بنسب تصل الـ 94% حسب تقديرات النظام نفسه أليست مسألة تدو للخجل
كمية الحروب والاقتتال الدائرة الآن في السودان ثم أسبابها ، أليست مسألة مدعاة للخجل
نوعية الأمراض التي يموت بها الإنسان السوداني وهي في غالبها أمراض متخلفة ، أليس هذا مدعاة للخجل ...
وهناكالكثير الكثير مما يدعو للخجل في السودان




عزيزي أ. غسان
لم يكن هناك إطلاقا شيء يثير حفيظتي .. بل أنني أنا من أخاف بكوني قد أثرت حفيظتك
واسمح لي أن اعتذر لشخصك الكريم مرة أخرى
ولك العتبى حتى ترضى

Quote: عموماً .. قد لا أكون الوحيد الذي أمتهن هذه الوظيفة .. وعلية أوجه الدعوة لكل زملاء المهنة ... أن يتنادوا إلىّ لأنني بصدد تكوين نقابة مهنة الخريجين وطبعاً أنا متأكد من الإكتساح والفوز بالإنتخابات... حتى وإن جرت في ظروف غير نزيهة فمهما كان لا يوجد بالتأكيد كوز عاطل عن العمل ولا إنتو رأيكم شنو .....؟؟

نور الدين ازيك

وبعد شوية حا تلقى واحد كاتبين ليه المهنة: عاطل

والعاطلين أو الذين يمتهنون مهنةالعاطل يا عزيزي مازن نعمل ليهم نقابة براهم ولا نضمهم في نقابتي بتاعة الخريجين ..
الموضوع دا مهم شان ما نعمل لينا مشامل مع غندور ومع نقابات غدور
وما تقولي علاقتنا احنا شنو بغندور أو العلاقة الموضوع دا شنو يغندور .؟؟؟
حسي غندور دا مادكتور وكان مدير جامعة
وهو حسي رئيس عام نقابات عمال السودان ...!!!!!

أنت يا نور الدين حصل شفت ليك أمير Amir or Ameer بتتكتب بي دبل M يعني زي الاسم بتاعي AMMIR وحصل شفت Mohamed بتتكتب Mohmed ... أها سمبك وركب عشان تاني أمشي أغير الاسم لازم أغير الشهادات كلها ... أتحدى أي واحد في العالم اسمه أمير بالإنجليزي بكتب اسمه AMMIR

ديل كوم وواحد من موظفي السفارة قبل كدة شانق ليه سفة وبقول تحلف يا زول ما في أي طريقة ... لمن شفتو ماسك المصحف بي يدو وشانق ليه سفة قلت ليه بحلف بالقرآن والإنجيل والتوارة والزبور أي كتاب سماوي هنا عندك جيبو بحلف بيه لو أنت الحتحلفني ... دي مآسي يا سيدنا محتاج لي بوست يكون فيه كيفيت شديد!!!!

الواحد اتفش شوية غايتو

شكرا
أمير

أحلى وأجمل ما في هذا البوست عزيزي أمير محمد
أو Ammir Mohamed
أو Ameer Mohamed
( اختار الحاجة النافعة معاك فقد حيرتني )
أنني ساهمت بشكل ما خلق حالة من الارتباح النفسي لديك
وذلك عبر عملية فش الغبينة التي حدثت لك
_ وبالمناسبة بخصوص تغيير الوثائ دي ..!!!
ناس الجوازات ديل لمن سألتهم إنو أنا لو اشتغلت مش حتغيروا لي خانة المهنة
قالوا آي بس تدفع الرسوم
( وروسوم تغيير المهنة هي نفسها رسوم تغيير الجواز )

سلام يا نور الدين و زوار البوست الممغوسين من فلاحة ناس الجوازات في سودانا الحبيب ، تصدق يا نور الدين انا مرت علي نفس حكايتك بس العسكري الطلع لي جوازي دارو معاي شديد لانو لما سألني من المهنة قلت ليه ما شغالة لكن انا خريجة اقتصاد قام دق صدرو كدة و كتب لي خبير اقتصادي !! شفت كيف بين يوم و ليلة بقيت خبير اقتصادي ،و حقيقي حزنت جدا لجهل و قلة فهم من يتحكمون في اشياء جوهرية تمس وتر مهم في حياتنا .
و قد تسببت هذة المهنة في احراجي و انا ماشة زيارة الي سلطنة عمان حيث سألني ضابط الجوازات العماني عند الدخول عما اذا كنت في مهمة رسمية و ساعتها انا استغربت لاني نسيت موضوع الخبير الاقتصادي دي و قلت ليه لا لكن ليه السؤال فقال لي لانك خبير اقتصادي و لو كنت في مهمة رسمية اجراءات دخولك بتختلف ، ساعتها شعرت باحراج حقيقي و قررررربت اقول ليه انا ولا خبير و لاحاجة انا يادوب اتخرجت و لي اقل من سنة بس بقدرة قادر و عدم فهم عسكري الجوازات بقيت خبير اقتصادي

Quote: بين يوم و ليلة بقيت خبير اقتصادي

أ. هبة ...
بالمناسبة أنا حسي بفكر في تغيير اسم البوست
لأنو واضح جدا من خلال المداخلات الي فيهو
أن المصائب يجمعن المصابينا
وعوضنا الله في مصائبنا خيرا
وعوضنا الله في أرضنا وبلادنا خيرا
وحقا ...
يبدو أنها بالفعل
بلاد كلما ابتسمت ... حط على شفتيها الذباب