Post: #55 Title: Re: عامي الأول في السودان.. عام الرمادة Author: hammama Date: 01-22-2008, 07:48 PM Parent: #4
يمكن باكر......
تعرف انا بالطريقه دي تميت ثلاثة سنوات ولا انا قدرت اتغير ولا السودان اتغير (للاحسن طبعا) اخير ليك اسمع كلام جني وامرق بدري بدري
ياسر حنا ياخ على الاقل كان تقول مع السلامة والله ما كنت حاحنسك أصلو... ًلك التحيات
الفساد وما ادراك ما الفساد أخطر ما في الفساد انو كلنا بندفع ُثمنه......
Post: #6 Title: Re: عامي الأول في السودان.. عام الرمادة Author: عاطف عمر Date: 01-21-2008, 01:09 PM Parent: #1
تقييمك مهم للغاية نتوقعه شاملاً وليت الأخ ود قاسم يكون حاضراً ويخط كمان معك بعضاً من تجربته
هدي قعدة بى قهوتنا
سلامات الحبيب ود عقيد
Post: #7 Title: Re: عامي الأول في السودان.. عام الرمادة Author: ابو جهينة Date: 01-21-2008, 01:23 PM Parent: #6
ود العقيد
سلام كبير و شوق لرؤياك
Quote: ولكن ما شهدته في السودان خلال هذا العام الذي انقضى قبل يومين لا يوصف
خيبة أمل على كل المستويات
ولكن يظل الإصرار.. ويظل العشم..
يمكن باكر......
ود عقيد من فحول طلائع العائدين ... ماذا نقول ؟ إحباط ؟ أم لا زلتَ تتوقع يمكن يوم باكر؟
عندنا واحد هنا قال لي :
أنا رحلت قريب من مقابر الحي الساكن فيهو ... ما حأكلفكم عناء الشيل
شايف الإقتناع بالموت هنا؟
ربنا يوفق
Post: #10 Title: Re: عامي الأول في السودان.. عام الرمادة Author: عبد الله عقيد Date: 01-21-2008, 02:15 PM Parent: #7
أخي الكبير أبو جهينة لك التحايا والأشواق
Quote: شايف الإقتناع بالموت هنا؟
على الأقل البيموت هناك دا بيموت وفي ذهنه صورة كويسة عن السودان لكين البيجي هنا بموت بالمغسة.. قبال يومو
يوم داك كان صديقي المتعافي (أول من كرّهني في السودان وجعلني أفقد الأمل فيه) كان بيتكلم في التلفزيون كلام زي السجم.. قام واحد مغترب اتصل وراح يشكّر في منظر الخرطوم والتطورات الحصلت.. أنا ارتفع جواي تيار المغص لحدي الطيش.. واتذكرت ما كنت أراه من هناك.. أتاريها قشور التطور البنشوفا من بعيد دي قايمة على أجساد وأشلاء أسر كلما طرقت بابا تتعيش منه قفلته الحكومة بحجة التطوير.. انا كنت شايف من بعيد ملامح تطور.. وقلت كدي جيت شفتو من جوة.. لقيت ليك (العفنة) شديدة خلاص.. أتاريهو الزول من بعيد بيشوف بس.. ما بيشم..
بس بعد دا كلو ما تموتو لينا هناك تعالوا
Post: #8 Title: Re: عامي الأول في السودان.. عام الرمادة Author: jini Date: 01-21-2008, 01:25 PM Parent: #6
Quote: ولكن ما شهدته في السودان خلال هذا العام الذي انقضى قبل يومين لا يوصف
خيبة أمل على كل المستويات
ولكن يظل الإصرار.. ويظل العشم..
يمكن باكر......
دى تبقى حماقة جعليين ساكت وستلتهم كل مدخراتك! السودان داير ليهو ناس ذمتهم من مطاط! نوعك البتكلم عن الدين دا حيفلس لمن البتاع يطلع ويبقى زيهم! الحق نفسك لانك لن تكون انت المحبط فقط فستوكن المدام ايضا وسيتبعها العيال! يا ود عقيد خلى السودان سفارة السودان دى عندى بقت زى سفارة بوركينا فاسو! نهائى بتاتا ما بجى بى عندها! بلدا فيها ابعصاية والبشير دا طرفى منها! دبر ليك اقامة والا ستدفع كل ماتملك للاطباء! جنى
Post: #11 Title: Re: عامي الأول في السودان.. عام الرمادة Author: عبد الله عقيد Date: 01-21-2008, 02:23 PM Parent: #8
لك التحايا أخي حيدر
Quote: السودان داير ليهو ناس ذمتهم من مطاط! نوعك البتكلم عن الدين دا حيفلس لمن البتاع يطلع ويبقى زيهم!
والله خايف خوفة من حكاية (يبقى زيهم) دي..
المشكلة هي إنو الناس الما عندها ذمة بقت كتيرة خلاص.. وعلى كافة المستويات.. بدءا بي مكنيكي الأمجاد وبتاع الاسبيرات.. لحدي..... لحدي وين يا ربي!!؟؟
مودتي
Post: #36 Title: Re: عامي الأول في السودان.. عام الرمادة Author: عادل فضل المولى Date: 01-22-2008, 12:21 PM Parent: #11
الحبيب ود عقيد سلااااااامات
Quote: عام الرمادة
معقولة يا راجل عام الرمادة مرة وحداة..دي كتيرة يأأأأأأأخ خففها شوية قووول عام الفطام، عام البناء، عام التأسيس..ألخ ألخ يعني انت كنت دايرة باااااااااااردة كدة من الفيصلية لي المنشية مثلا..؟ كان تجي مستشاااار ..!
Quote: مكنيكي الأمجاد وبتاع الاسبيرات
اذا عرف السبب بطل العجب..! يعني شوية(امجاد) عملت فيك كدا أُمال لو بقت بيجو كنت سويت شنو...؟ على كل معليش حقك علينا تعيش وتاخد غير
Post: #39 Title: Re: عامي الأول في السودان.. عام الرمادة Author: عبد الله عقيد Date: 01-22-2008, 01:44 PM Parent: #36
الحبيب عادل فضل المولى لك ما تعلم من مودة.. وازيد
Quote: يعني انت كنت دايرة باااااااااااردة كدة من الفيصلية لي المنشية مثلا..؟ كان تجي مستشاااار ..!
المنشية ما بنانباها.. لكين الفي سودانكم اتعرفت.
Post: #9 Title: Re: عامي الأول في السودان.. عام الرمادة Author: عبد الله عقيد Date: 01-21-2008, 01:33 PM Parent: #6
أخي الحبيب عاطف عمر لك التحايا والمودات .. سبقني بعض الزملاء من سودانيز كنت آمل التعزي بتجربتهم.. منهم الاستاذة سلمى الشيخ سلامة وهي كما تعلم ملء السمع والبصر.. كنت أنوي أن اتقرب إليها بعلاقة أونلاين وبالآخرى: (أجارتنا إنا جديدان هاهنا وكل جديد للجديد نسيب) لكين لقيتا زهجت وفاتت.. وصبقني خضر حسين خليل.. وهو يعرفني وأعرفه وكانت تجربته ستمدني ببعض الزاد.. ولكنه الآخر (فرتك).. وهناك من حضروا من أوروبا وأمريكا منهم من رأيته مرة.. ولم أستطع تكرارها ومنهم من لا زلت أشتهي رؤيته.. وهو ينأى..
أما ود قاسم.. فهو (خلا لي الرياض مخضّرة زي ما بقولو الجماعة) لذا آثرت عدم مطاردته هنا
جاييك لي التجربة إن الله مد في الأيام
لك المودة
Post: #12 Title: Re: عامي الأول في السودان.. عام الرمادة Author: Mohamed Abdelgaleel Date: 01-21-2008, 02:34 PM Parent: #9
Quote: على الأقل البيموت هناك دا بيموت وفي ذهنه صورة كويسة عن السودان لكين البيجي هنا بموت بالمغسة.. قبال يومو
الأخ العزيز ودعقيد تحياتي لك وللأهل عموما وللوطن بي حالو
ونحنا قبيل شن قلنا ..
و
(كنت أظن أن لسعة الزنبور كلسعة العقرب فإذا هو إياها)
وبي ده وطن .. وبنجيهو وبندفأ بنارو
يالله يا عبدالله ورينا غلتك وغلت السودان وغلت من لوحو وجهه الجميل بهذا الشكل
وفي إنتظار وفي إنتظار وفي إنتظارك
Post: #13 Title: Re: عامي الأول في السودان.. عام الرمادة Author: البحيراوي Date: 01-21-2008, 02:50 PM Parent: #1
الأخ ود عقيد تحياتي ويا رب يسلمك ويوفقك محل ما تقبل
ذهبت لزيارة السودان في عيد الأضحي وأول حاجة قابلتني خرفانا الواحدة دي شبكونا الناس حمي نزفية ورقدوها لينا سلطة بس كل يوم تاكيين خروف والنار ما بعقبها شر . والله ما جانا شي واحد بس فقط بهمنا رجع من التصدير والواطاة بقت محل . المهم نمرة إتنين كانت محطة جهاز الغتربين ، والله كأننا غير سودانيين . مهانة وبطء إجراءات وزله حتى يأتيك إحساس بأنك غير سوداني . وبعد داك الخطوط السودانية يقولوا ليك الحضور الخامسة صباحاً وتودع الناس وينزلوك علي عجل عشان راجعه لي أشغالها تجي ف يالباب يقولوا ليك الطيارة دي إتأجلت لي الساعة الواحدة ظهراً. يلم فيك بتاع أمجاد يا الله ويامين حتى يوصلك بي حق رسوم المطار . عشان لمن ترجع تشحد ناي البيت حق رسوم المغادرة تاني. والله يا ود عقيد في صورة وردية جداً عن البلد من الخارج . وتعال قرب قريب والله تقول إنت في حلم متعشي قبلية بي لحم كدايس .
تحياتي
بحيراوي
Post: #14 Title: Re: عامي الأول في السودان.. عام الرمادة Author: Elawad Date: 01-21-2008, 04:08 PM Parent: #1
Quote: واتذكرت ما كنت أراه من هناك.. أتاريها قشور التطور البنشوفا من بعيد دي قايمة على أجساد وأشلاء أسر كلما طرقت بابا تتعيش منه قفلته الحكومة بحجة التطوير..
هذه هي المأساة يا أخي الكريم. و ما فائدة الشوارع المسفلتة و القصور المشيدة إن لم تكن لأجل أهلنا البسطاء و إن لم تنعكس عليهم في صينية طعامهم و صحتهم و تعليم أبنائهم و بناتهم. الأدهى و الأمر أن تكون كل هذه القشور قد أرسيت دعائمها على حساب عز و شرف و أخلاق و كرامة أهلنا. غايتو ربنا يعين الجميع لكن كلام جني دا أديهو نظرة تاني.
Post: #15 Title: Re: عامي الأول في السودان.. عام الرمادة Author: Yassir7anna Date: 01-21-2008, 04:13 PM Parent: #1
يا اخوي دي بلد غير صالحة للأستخدام الآدمي، لازم يتعمل ليها عملية تطهير طويلة المدى ثلاثية الابعاد. فانت دحين يا اخوي يا تتلوث يا تشوف طريقة تتخارج ما عندك حل تالت، وكان الله في عونك، وما نملك الا الدعاء بالتوفيق والسداد وان ينجيك الله من القوم الظالمين فحسبك الله ونعم الوكيل
تحياتي
Post: #16 Title: Re: عامي الأول في السودان.. عام الرمادة Author: الطيب بشير Date: 01-21-2008, 04:27 PM Parent: #1
.ود عقيد كيف حالك و الله كلامك يخوف أنا لسة في النصف الأول من العام و شكلي مرطـّــب... أيكون هو النصف المملوء من كوب البلد؟ كلامك عن ذاتية التجربة واقعي لأن ما رأيته في السودان يرجح بكفة البقاء به فمخاطر أمريكا بدت لي أكثر.. تقديري لك و بيناتنا تلفون ع شان أديك رقمي الجديد
تحياتي
Post: #17 Title: Re: عامي الأول في السودان.. عام الرمادة Author: الزوول Date: 01-21-2008, 04:54 PM Parent: #1
السلام عليكم
Quote: انت عارف يا محمد انا عايز اكتب عن التجربة بتفاصيلها لكين.. متخوف من تأثير تجربتي (وهي فردة في النهاية) على آخرين يخططون للعودة والاستقرار..
ود عقيد سلامات لا أتفق معك في ما ورد أعلاه شخصياً في هذا المنبر أركز على التجارب الإنسانية وأحاول أن استفيد من أخواني أعضاء المنبر أكثر من الانغماس في حديث ممجوج ومكرر وسقيم ولا نهائي عن السياسة وأكاذيبها مثل هذه التجارب والتي أرجو أن تكون صريحة وبدون مجاملة هي في رأيي فاكهة هذا المنبر وبدلاً من أن تتخوف تأثيرها السلبي على الناس يمكن أن تساعد أشخاصا كثيرين على اتخاذ قرار صائب بخصوص العودة للوطن أو على الأقل إعطاء الوجه الحقيقي لمن يريد الرجوع سؤال تخريمي لو وجدت من يحكي لك نفس ما مر بك من تجربة في السودان أكنت حقاً سترجع للسودان؟ ............................. وما الناس إلا هالك وأبن هالك *** وذو نسب في الهالكين عريق
Post: #18 Title: Re: عامي الأول في السودان.. عام الرمادة Author: Deng Date: 01-21-2008, 05:44 PM Parent: #1
Quote: انت عارف يا محمد انا عايز اكتب عن التجربة بتفاصيلها لكين.. متخوف من تأثير تجربتي (وهي فردة في النهاية) على آخرين يخططون للعودة والاستقرار..
يمكن انا ما اتعاملت مع الوضع صاح.. يعني يمكن انا الغلط مش السودان..
أعتقد أنه من الضروري جدا أن تحكي لنا عن تجربتك في السودان، ولا أعتقد بأنك سوف تكون لك تجربة شاذة أو تختلف كثيرا عن تجارب بعض الاخوة الذين قررو العودة والاستقرار في السودان.
دينق.
Post: #19 Title: Re: عامي الأول في السودان.. عام الرمادة Author: Tragie Mustafa Date: 01-21-2008, 06:32 PM Parent: #18
ود عقيد رغم سلاطنك ولائمتك معاي لكني بدخل البوست ما عشانك ولكن عشان اسم السودان وتجربة سوداني عائد. وخدها من اختك المتصهينه كما توصفها.
اولا العودة للسودان لها علاقة بواقعنا هنالك فمثلا عل عدت بعد ان كبر عيالك وتخرجوا فخلصت الي حد ما من محن الطفولة وبقيت في محن الكبار من توظيف وغيره.
ثانيا هل رجعت بمؤهل اكاديمي مختلف؟؟؟ فربما يكون الحلم بوظيفة مختلف زي ناس اخونا الطيب بشير البقول لسه غرقان في نصف عسل الكوب الاول!!
ثالثا بيعتمد على اسرتك هناك عل انت راجع لناس مسنودين؟؟فيسندوك مثلا ام راجع لغلابه شقيانين مع لقمة العيش البطلعوها من فم الاسد الانقاذي؟؟؟؟ فاذاكان اهلك مسنودين وطبعا ابهج لو كانوا انقاذيين فيا بختك و الا فعلى الدنيا السلام.
اها اخونا ناس الطيب بشير ابناء شيوخ الخلاوي وناس الحواشات و الاملاك الممتدة و العماله المجانيه فطبيعي الا يتطعوا على مدى وحشيية الانقاذ وفظاعتها.
Post: #20 Title: Re: عامي الأول في السودان.. عام الرمادة Author: Khalid Saeed Date: 01-21-2008, 07:36 PM Parent: #19
الأرباب عقيد الخيل حبابك ود عمي .. الشوق ماليه حد .. ربنا يقويك .. الغربة صعبة .. خصوصـاً داخل الوطن .. كلنا في الهم شرق .. نجلس على مضض نرقب الأفق في يأس .. نحلم بالأهل والبلد .. ولكن يبدوا أن غدرنا أن نظل مهجرون .. وأن تكون غربتنا دون حسابات كما عودتنا دوماً تكون دون حسابات .. يبدوا أن غربتنا مأمورة .. لذا فقد تركناها تسير هكـــذا .. أما العـــــودة .. فهي حلم بعيد المنال .. فيبدوا أننا جميعاً قد سكنـــا قرب المقابر .. لعلنا نضمن نومتنا الأبدية . _____ ذات يوم خيل ألي أنه حان موعد العودة .. فإتصلت بالأهــل في السودان فسألتهم .. هـل مازال الحراميــة يتسلقون الجدران في أواخر الليل ليسرقوا ماخف حمله وغلا ثمنه .. ضحكوا .. وقالوا لي لقد تغير الحال .. وأصبحـو يأتوننا في يأتوك في محلك في كل مكان تطلب فيه الرزق الحلال .. ويأخذوا مالك .. بل يعطوك دليل سرقتهم .. إيصالاً مكتوب عليه ضرائب وعوائد ومحليات ونفيات ....والخ ... فمنذ ذلك اليوم وأنا أجلس أترقب أن يعود الحرامية إلى عادتهم القديمـة ويأتون ليلاً لعلي أتمكن من العودة النهائية .
السودان .. جميل ومستحيل .. تم تفصيل المحن على مقاسه بالضبط .. وتم تهيئته لكل آفات الزمن .. حافات الفقُر وحش المقادير النهِم سيل المباهاة المدْلَهِم نبَرُو المواعيظ الجهِم من ناس كُتر عن قصة النار والقبر في وضع أضيق من جُحُر
تحياتي، أخوك/ خالد الأرباب
Post: #21 Title: Re: عامي الأول في السودان.. عام الرمادة Author: بهاء بكري Date: 01-21-2008, 10:48 PM Parent: #1
ود عقيدجيت اسلم عليك ياراجل يااصيل
Post: #63 Title: Re: عامي الأول في السودان.. عام الرمادة Author: عبد الله عقيد Date: 01-25-2008, 11:35 AM Parent: #21
سلامات يا بهاء وأسأل الله أن تكون استعدت عافيتك أشكرك على الإطراء الشديد إنت الأصيل والله يا بهاء
مودتي
Post: #22 Title: Re: عامي الأول في السودان.. عام الرمادة Author: Ashraf el-Halabi Date: 01-22-2008, 04:43 AM Parent: #1
ود عقيد سلامات قبل سنتين وشوية بعد ما زهجت من بلد الكفار العاملة زي ساقية جحا دي (المرتب من الصراف للفواتير) خضت نفس تجربتك ورجعت وفي نيتي الاستقرار، لكن خلال أكتر من شهرين في السودان اكتشف إنو ساقية جحا أرحم من بلد المفاجآت دي!! يعني فكرة تستثمر قروشك في مشروع في السودان دي مغامرة محفوفة بالمخاطر، لأنو من الممكن الحكومة الصدقت ليك بالمشروع دا نفسها (أياً كان المشروع، إن شاء الله ركشة) تطلع قرار في جهة تانية يقلب ليك مشروعك دا أب سايد داون باختصار السودان فيه مشكلتين كبيرات سوء التخطيط، أو بالأصح انعدام التخطيط وانعدام الأمان (قروشك في جيبك وخايف من مفاجآت بكرة) أها الخواجة الما عندو دين دا كمان ما عندو مفاجآت، ولو اضطر يعمل أي تغيير بيخطر الناس قبل فترة كافية عشان مشاريعهم ما تتأثر يعني مثلاً لو حا يعمل تصليح في شارع بخت إعلان قبلها بكم يوم إنو اليوم الفلاني الشارع دا حا يكون أندر كونستركشن من الساعة كذا للساعة كذا، فإنت لو بتمشي شغلك بالشارع دا تعمل حسابك تمشي بشارع تاني ممكن يكون أطول ويستهلك منك عشرة دقائق زيادة عشان كدا تخطط تطلع أبدر من مواعيدك العادية عشرة دقايق حتى تكون في شغلك في ميعاد كل يوم وهكذا. أها دا واحد من صنوف الأمان المفقود في السودان (أحترام المواطن).
يا عقيد أهلنا قالو "البتبلبل يعوم" وإنت اتبلبلت كدي حاول باصرا وعوم
Post: #23 Title: Re: عامي الأول في السودان.. عام الرمادة Author: زول ساكت Date: 01-22-2008, 05:31 AM
Quote: عام الرمادة
ماقلتو.............
افو افو الجعلي بقضي سنتو خنق اركز
باختصار كدا كنت اتكلم مع اخوي قبل ايام عن موضوع العودة قالي اذا خلاص قررت ترجع جيب معاك جلد تمساح او ماتجي
Post: #24 Title: Re: عامي الأول في السودان.. عام الرمادة Author: محمد سنى دفع الله Date: 01-22-2008, 05:33 AM
عقيد الخيل الفارس الجحجاح الأسد النتر أركز واقيف نحن جاينك نسندك ياوقفنا ياوقعنا اقيف يازول وخلي املك كبير في بكرة ايه رايك في كلامي ده ما شرطتك من الضحك ؟؟
Post: #25 Title: Re: عامي الأول في السودان.. عام الرمادة Author: فارس موسى Date: 01-22-2008, 05:40 AM Parent: #1
ود عقيد سلامات وما عارف اقول ليك كفاره ولا حمدا للسلامه !! يا راجل ليك وحشه وفاقدنك كيمينى متنور مش مستنير ! الإجابه على اسئلة تراجى مربط القعاد هناك
Post: #26 Title: Re: عامي الأول في السودان.. عام الرمادة Author: saadeldin abdelrahman Date: 01-22-2008, 05:48 AM Parent: #1
سلام ود عقيد
الشوق كتر
اكتب يا أخوي ورينا الحاصل.. اخوانك طالبنك علم ما نبقى زي الجماعة الدخلوا حواشة و قددوا عيونهم كلهم لانو مافي زول بقول (حي ولا واي) ينبه الوراهو.. اكتب ..حتحت الاحباط و الهم معانا اشركنا يا ابا مشعل و لا تخشى شيئ ، لن يكون هناك احباط قومي او ارهاق غربة اكثر مما حدث قد اثرت فضول المهاجرين.. أكتب ابا مشعل لنفسك و اخوانك و الوطن و المهجر.
مودتي
Post: #27 Title: Re: عامي الأول في السودان.. عام الرمادة Author: Elmoiz Abunura Date: 01-22-2008, 05:49 AM Parent: #1
Dear Abdallah Quote انت عارف يا محمد انا عايز اكتب عن التجربة بتفاصيلها لكين.. متخوف من تأثير تجربتي (وهي فردة في النهاية) على آخرين يخططون للعودة والاستقرار[
/B] Welcome back. I appreciate if you can tell us about your experience in Sudan Regards
Post: #29 Title: Re: عامي الأول في السودان.. عام الرمادة Author: ابوحراز Date: 01-22-2008, 06:40 AM Parent: #27
السودان هذا البلد العجيب الغريب المليء بالأنهار والموارد أرضه خصبة وحبلى في كل المواسم وياتيها الطمث والطلق بلا حدود لكنه للأسف مليء بالفساد الإداري وهذا الفساد هو الخلية السرطانية التي تنتشر كل يوم في جسده فتحيله الى وطن ميت ومقعد العمارات الشاهقة في الخرطوم لاتعني ان البلد قد تطورت جميل أن تكون عاصمتنا جميلة ورائعة ولكن الناس في وطني لايحتاجون لإصلاح صواني المرور بل يحتاجون لإصلاح صواني الطعام والله السودان لاتنقصه موارد بل ينقصه تخطيط وضمائر غير مليئة بالصدا وأكبر مشكلة لدينا أن 90% من القرارات التي تصدر لاتتجه الى مصلحة المواطن بل الى إذلاله وتركيعه والطامة الكبرى أن كل ولاية حكومة قائمة بذاتها وكل والي يصدر مايروق له من قرارات اما الله أكبر فهي القاسم المشترك بين كل هؤلاء يقولونها بمناسبة وبدون مناسبة نريد أن يقف هذا الوطن على قدميه لا أن يتوكأ كل يوم ولكن هذا لايتم الا بالتصالح مع النفس وبمحاسبة المفسدين وبتوجيه موارد الوطن للفقراء والمعدمين والمهمشين تكاد اغلب الضمائر في ثلاجة بدرجة حرارة تحت الصفر وكثيرون بلا ذمم وكل واحد منهم يريد أن يستغفلك يعني يصعب ان تخرج من بيتك بسيارة وترجع وضغطك بحالته الطبيعية فالكل يريد أن يطبق فيه قانونه المعتوه اقولها أمامكم وعلى مسئوليتي الكاملة امنحوني رئاسة السودان لمدة اسبوع وحينها سترون كم سأغير هذا البلد ولكن للأسف كثيرون ساحملهم ببلدوز ضخم وارمي بهم في البحر الأحمر هذا سيكون أول قرار ومن بعدها سانظف كل الشوارع والمكاتب والوزارات ليس من النفايات بل من العقول المتحجرة التي تقف في طريق تقدم هذا الوطن سؤال بريء جداً قبل يومين اتصل أحد الصدقاء وقال لي لقد تم حجز سيارته الافراج في سواكن بحجة أنه أتى المرة الفائتة بسيارة ودفع جماركها ولهذا لابد أن يعاقب بهذا القرار لو هذا الكلام صحيحاً فهذه واحدة من الكوارث سأسافر بعد ايام باذن الله وبنفس الطريقة وارسلت ابنائي الذين كانوا معي هنا من أجل أن يتسودنوا من أجل أن يحمل أبنائي الصغار اباريق الماء للضيوف في مناسبات العزاء من أجل ان يحمل ابني عمود غدائه ويذهب به الى حيث يوجد الضيوف وقبل هذا وذاك من أجل أن يعرف الألوان التي يحملها { علم } بلده السودان يشهد الله أنهم يصرفون في السودان اضعاف اضعاف ماكانوا يصرفونه هنا ولكن لابد أن تضحي بنفسك وبابنائك من أجل الوطن ثم تأتي بعض القرارات لتحرمك من اسرتك وتجعلك أنت في وادي وهم في وادي آخر السودان بلد القرارات المتخبطة وهذه حقيقة ولابد أن نقولها من أجل أن نعالج كل السلبيات في هذا الوطن المجروح !!!!
Post: #28 Title: Re: عامي الأول في السودان.. عام الرمادة Author: هشام المجمر Date: 01-22-2008, 06:23 AM Parent: #1
ألاخ عقيد
تحياتى
امس كان معى مجموعة من الاصدقاء و المناسبة حضور صديقين عزيزين فى مهمة عمل من السودان
تركز النقاش فى موضوع الفساد فى السودان
اتفق الجميع أن السودان دولة فقدت النظام لصالح الفساد
وانك لا تجد اثرا واضحا للحكومة فى الشارع و تستطيع بالمال انجاز كل شئ
وهنا مربط الفرس
و يبدو انك لم تستطع الجوط مع الجائطين
اضف الى ذلك التضخم الفالت
و التكلفة العالية للمعيشة فى السودان
لذلك احبطت تماما
سوف نكون مهتمين جدا لسماع قصتك
لا تتورع عن حكايتها فقصص الافراد هى التى تصنع التاريخ
Post: #30 Title: Re: عامي الأول في السودان.. عام الرمادة Author: ابو جهينة Date: 01-22-2008, 07:28 AM Parent: #28
قال خالد سعيد الأرباب
Quote: ذات يوم خيل ألي أنه حان موعد العودة .. فإتصلت بالأهــل في السودان فسألتهم .. هـل مازال الحراميــة يتسلقون الجدران في أواخر الليل ليسرقوا ماخف حمله وغلا ثمنه .. ضحكوا .. وقالوا لي لقد تغير الحال .. وأصبحـو يأتوننا في يأتوك في محلك في كل مكان تطلب فيه الرزق الحلال .. ويأخذوا مالك .. بل يعطوك دليل سرقتهم .. إيصالاً مكتوب عليه ضرائب وعوائد ومحليات ونفيات ....والخ ... فمنذ ذلك اليوم وأنا أجلس أترقب أن يعود الحرامية إلى عادتهم القديمـة ويأتون ليلاً لعلي أتمكن من العودة النهائية
كلام مليان زمان ال بيسرق كان فعلا محتاج... و الآن ال بيسرق ما محتاج .. و دة الشي الغريب في الموضوع
Post: #31 Title: Re: عامي الأول في السودان.. عام الرمادة Author: doma Date: 01-22-2008, 07:54 AM Parent: #30
Quote: انت عارف يا محمد انا عايز اكتب عن التجربة بتفاصيلها لكين.. متخوف من تأثير تجربتي (وهي فردة في النهاية) على آخرين يخططون للعودة والاستقرار..
يا سيدي احكي ياما قبلك ناس رجعت وسفت التراف واتوشحت بالندم ما في فائده . وبعدين لاحظ في كارثه اقتصاديه عالميه علي الابواب لن تبقي ولن تذر.
Post: #32 Title: Re: عامي الأول في السودان.. عام الرمادة Author: shammashi Date: 01-22-2008, 08:07 AM Parent: #31
الأخ عبد الله
لمن غادرت السودان أول مرة كان عندنا مخزن في البيت ساكنات فيهو ست كدايس. بالليل بعد ما يشبعن تلقاهن حايمات فوق الحيط وآخر مواء وغنج وكل ما يخطر على بالك. الليل كلو تلقاني ساكيهن بالسفنجات من حيطة لي حيطة عشان ننوم. لمن رجعت بعد ثلاث سنين لقيت كديسة واحدة مافي وكنت أنوم ملأ جفوني. قمت سألت أمي وقلت ليها إنتي وين كدايسك ديك ياحاجة الكانن مكملات سفنجاتنا. ردت علي وقالت لي يا ولدي الكدايس طفشن من الجوع زي ما إنتو طفشتوا من الفلس.
Post: #33 Title: Re: عامي الأول في السودان.. عام الرمادة Author: Ahmed Yousif Abu Harira Date: 01-22-2008, 08:12 AM Parent: #31
ود عقيد سلامات كلنا على اعتاب التجربة..علنا نستفيد مما تكتب.. الناس السبقوك خلوها زي عقرب جراب الزاكياب..كل زول نام بي لدغتو..
اكتب ياخ عل الناسي يبقى فهيم..
Post: #34 Title: Re: عامي الأول في السودان.. عام الرمادة Author: nadus2000 Date: 01-22-2008, 08:27 AM Parent: #30
كيفك ود عقيد ان شاء الله أنت والعيال طيبين
أعتقد أنه من المهم جداً، عرض هذه التجربة ومشاركتنا فيها، وذلك لعدة أسباب: = أهمها صدق وموضوعية قلمك، والذي رغم انطلاقه من وإلى "اتجاه معاكس"، لكنه استطاع أن يكسب احترام الآخرين. = قدراتك الصحفية، وأهمها "الشوف"، ودي خاصية نادرة في الأقلام التي تسود صحافة الخرطوم، بعبارات مرصوصة خالية من أية رؤية. = أما خوفك على الآخرين، دي ما تشيل همها، لأنو ليس في ثقافتنا ما يعصمنا من تكرار أخطاء بعضنا، بل اعتدنا ان نكابر ونصر للذهاب في طريق حتفنا، رغم صياح كثير من الحادبين.
أما السبب الأهم في تقديري، وهي أن أحكامك تنطلق من عين الرضا-على الاقل قبل أن تشوف براه- وتميزك في سيرك عكس السائد، بالتأكيد على أنها عيون غير كليلة.
ننتظر...
Post: #35 Title: Re: عامي الأول في السودان.. عام الرمادة Author: مهدى الصادق السيد Date: 01-22-2008, 08:37 AM Parent: #1
ودعقيد كيف اخبارك والله شوقنا ليك كثير اتمنى ان تكون اتخارجت بى جلدك .... تعال لكى تشيل معاك كم نفر من الاهل المحتاجين . تحياتى مرة اخرى واشواقى
Post: #37 Title: Re: عامي الأول في السودان.. عام الرمادة Author: عبد الله عقيد Date: 01-22-2008, 12:37 PM Parent: #1
سلام يسعكم كلكم أحبائي وإخواني
ح أرد على الناس بالدور إن شاء الله..
بس قبل ما أرد سأبدأ في سرد التجربة وسأبدأ بعناوين عريضة للتجربة أحاول فيها تلخيص ما خرجت به من نتائج لتجربة هذا العام..
نمرة واحد: انا قسمت العام دا نصين.. نصف قضيتو سايق عربيتي الأمجاد وراكب الشارع.. فلسفتي كانت في غاية البساطة.. وهي أن أبدأ من (قريب للصِفر).. إضافة إلى أني (قطعت) القريشات الجبتهن في بناء المنزل (جزء منه بالأصح)، والباقي اشتريت بيهو الأمجاد.. الغرض هو العمل على العربة والبحث عن وظيفة.. بالنسبة للوظيفة عندي ما يكفي لنيل وظيفة وهو يتكون من: 1- مؤهلات أكاديمية وشهادات خبرة وتجارب امتدت لـ 17 سنة في العمل الصحفي أو الإعلامي بشكل عام. 2- أصدقاء ومعارف وزملاء يعرفون قدراتي ويعرفون مؤهلاتي في جميع المستويات. 3- إجادة تامة لاستخدام الكمبيوتر بنوعيه الماك وال بي سي، زيادة على شوية ترجمة. 4- توفر بيئة ضخمة جدا للعمل في السودان.. صحف كثيرة، إذاعات، تلفزيونات.. وخلافه.. (خلافه دي تشمل المؤسسات الحكومية) 5- شلت معاي من السعودية البناطلين والقمصان والبِدل والجِزم الإيطالي.. لزوم المظهر..
بناء على ذلك كنت أتوقع أن أجد وظيفة ما بين محرر إلى رئيس تحرير في الصحف بمجميع أنواعها، أو ما يوازي هذه أو تلك أو ما بينهما في الأجهزرة الإعلامية الأخرى. (رئيس تحرير دي طبعا حسب الورق بس الكفاءة ما للدرجة دي)
ستة أشهر.. ولم يحدث شيء.. ستة أشهر، (أمرُق النجمة وأجي الهجمة).. وبعدها.. وجدت الوظيفة.. وهي في مستوى المُتاح.. من ادنى السلّم تقريبا..
نواصل..
وأعدكم باصطحاب مداخلاتكم التي اختصرت علي الكثير من المشوار ضمن السرد..
محبتي لكم جميعا
Post: #38 Title: Re: عامي الأول في السودان.. عام الرمادة Author: عبد الله عقيد Date: 01-22-2008, 01:34 PM Parent: #37
نمرة اتنين: فترة الأمجاد.. أول حاجة اكتشفتها إني اشتريت عربية تعبانة (غشوك)، وتاني حاجة اكتشفتها إنو الحكاية مش بالسهولة دي، تشتري عربي وتكون عندك رخصة وهي مرخصة وتركب الشارع تشتغل.. أبدا.. ناس المرور قالوا لي لازم تعمل رخصة عامة، لأنو عربيتي بالصدفة طلعت مرخصة تجاري، وبدأت رحلتي مع الإيصالات (30) جنيه.. ولأعطيكم ملمح من ملامح فساد شرطة المرور سأحكي تجربة واحدة، وهي أنني اكتشفت أن بإمكاني الوقوف بالقرب من الميناء البري لحمل الركاب بعد نزولهم من البصات.. وجدت التكاسة وبتاعين الأمجاد عاملين (كشِف) لي ناس المرور، النفر يدفع 1000 جينه، يعني جنيه بالجديد، وإلا فسيأخذ منك رجل المرور 30000 يعني 30 جنيه لأن الوقوف ممنوع..!! شفتو كيف. (دا غير البيقول ليك جيب رُقعة.. بالواضح كِدا).
نجي لي فساد المكنيكية وبتاعين الإسبيرات.. باختصار، جرّبت الغرباء وناس المعرفة والواسطات (للمكنيكية) وحتى الآن ما قابلت مكنيكي بيعرف يصلح العربية.. وإذا بيعرف ما بيلتزم بي مواعيدو، وإذا التزم بيطلب منك مبالغ خرافية، أما الإسبيرات فقد جربت شراء إسبير بي 50 جنيه ثم عدت واشتريته هو نفسه بـ 25 جنيه.. وكلو (مضروب)..
ودا كلو ما مهم..
الغريق قِدام.
Post: #41 Title: Re: عامي الأول في السودان.. عام الرمادة Author: عبد الله عقيد Date: 01-22-2008, 02:12 PM Parent: #38
قضيت الفترة الأولى مقيما مع أسرتي في منزل أهداني إياه أحد الإخوة ريثما يكتمل منزلي بعد ذلك رحلت بأسرتي إلى منزلي الجديد وهو في منطقة لم تصلها خدمات الماء والكهرباء حتى الآن. بذلك بدأت معاناة الأسرة.. خاصة أن سكنهم في البيت الجديد صادف الخريف والبيت لم يكتمل.. ومن تجاربي (الطريفة) أنني قضيت إحدى الليالي (بايت) في العربية على بُعد كيلومترين من المنزل بعد أن (اتوكرت) في ترعة ماء..
أخي أبو محمود
Quote: معقولة يا راجل عام الرمادة مرة وحداة..دي كتيرة يأأأأأأأخ
مش الحمد لله ما سميتو عام السجم والرمادة..!!؟؟
أخي الجليل محمد عبد الجليل
Quote: يالله يا عبدالله ورينا غلتك وغلت السودان وغلت من لوحو وجهه الجميل بهذا الشكل
وفي إنتظار وفي إنتظار وفي إنتظارك
أكبر غلت لاقاني في السودان حتى الآن هو الجشع. المجتمع، ضربه فيروس الجشع بدرجة رهيبة، حتى أصبح (بعضه ياكل بعضه) وتجربة (النزفية) خير مثال، فأسعار بدائل اللحوم (بما فيها العدس) ارتفعت بسرعة شديدة وبمعدل كبير. ولبن البودرة كذلك.. ياخي حتى الطعمية سعرها ارتفع. أي مواطن (إلا من رحم ربي) تتوقع منه خدمة يتوقع منك هو المقابِل.. وهذا قد يكون (مقبولا) ولكن غير المقبول هو أن المقابل في الغالب يكون أكبر مما تتصور.. أي زول شغال في موقع (إلا من رحم ربي برضو)، بيتعامل مع عمله بمعيارين فقط هما، أولا عدم تأثر وظيفته أو موقعه سلبا وثانيا ماذا يستفيد الآن؟
مثال: صديق يعرفه عدد كبير من الزملاء في المنبر أخبرني أنه أعد خطة لإنجاز عمل يتعلق بجهة حكومية، ووضع تكلفته التي بلغت 250 مليون (بالقديم)، الموظف الكبير الذي استلم منه التكلفة قال له بالحرف الواحد (يا اخوي دا شنو دا، نحن حقنا بس 250 مليون، أمشي عدِّل التكلفة دي وجيب مبلغ زي الناس).. الصديق ترك الفكرة من أصلها، ودار به الزمن، وقدم عرضا في جهة أخرى بعيدة عن العاصمة لعمل يكلف 25 فطالبه الموظف الكبير بأن يرفع التكلفة إلى 100، رفض الرجل، فأحاله الموظف إلى شركة (وسيطة) يقدم لها العمل بتكلفته الحالية، لتقدمه الشركة للحكومة بتكلفة الـ 100؟؟
نواصل:
Post: #40 Title: Re: عامي الأول في السودان.. عام الرمادة Author: ابو عثمان Date: 01-22-2008, 02:09 PM Parent: #1
واصل يا عقيد
انه بحق بوست ممتع وصادق رغم مافيه من مواجع !!!!
لن ينصلح حال السودان بدون انصلاح الأخلاق !!!
والتي لا ادري الي اين ذهبت ؟
احكي ....
Post: #42 Title: Re: عامي الأول في السودان.. عام الرمادة Author: عبد الله عقيد Date: 01-22-2008, 02:44 PM Parent: #1
الأخ البحيراوي
Quote: والله يا ود عقيد في صورة وردية جداً عن البلد من الخارج . وتعال قرب قريب والله تقول إنت في حلم متعشي قبلية بي لحم كدايس .
أقول ليك حاجة، البلد فيها حاجات كويسة كتيرة جدا، وفيها ناس كويسين ومصرين إنهم يغيروا ويضيفوا جديد، بس المشكلة إنو قدام كل باب يوجد (غفير أو كلب كبير) يمنع أو يعُض..
الأخ العوض
Quote: الأدهى و الأمر أن تكون كل هذه القشور قد أرسيت دعائمها على حساب عز و شرف و أخلاق و كرامة أهلنا.
أنا ح أحكي تفاصيل يندى لها الجبين والله.. صبرحك معاي بس..
أخي ياسر حنا
Quote: يا اخوي دي بلد غير صالحة للأستخدام الآدمي، لازم يتعمل ليها عملية تطهير طويلة المدى ثلاثية الابعاد. فانت دحين يا اخوي يا تتلوث يا تشوف طريقة تتخارج ما عندك حل تالت
أنا معاك في عملية التطهير دي، وعندي اقتراح وهو أن يرجع أكبر عدد ممكن من المهاجرين دُفعة واحدة ويشتغلو تطهير.. أما بالنسبة للخيارات.. فأظنني سأتمسك بالخيار الثالث (الغائب) وهو البقاء ومحاولة القفز فوق الحواجز.. وانتظرالباقين.. لحدي ما يجو. علّ وعسى
تحياتي للجميع
Post: #44 Title: Re: عامي الأول في السودان.. عام الرمادة Author: عبد الله عقيد Date: 01-22-2008, 03:10 PM Parent: #42
الطيب بشير ازيك يا حبوب انت عارف من أسباب كونه (عام الرمادة) أنني لم ألتقيك فيه رغم تواجدنا معا في الخرطوم طيلة هذه الفترة..
Quote: كلامك عن ذاتية التجربة واقعي لأن ما رأيته في السودان يرجح بكفة البقاء به فمخاطر أمريكا بدت لي أكثر..
أنا ما قلت ليك ما أستبعد أن أكون أنا السجمان ورمدان.. بالجد يعني. أو زي ما قال عادل فضل المولى أكون عايز (أقفز بالزانة) طوالي..؟؟ بس دا كلو كوم.. والوضع العام كوم تاني يا ابو بشير. انا كتبت قبل فترة عن الأيدز.. بعدها حدثني أحد الأصدقاء بالأرقام والبيّنات عن حجم انتشار الأيدز وسط طلاب الجامعات.. وحتى الآن أصبح مصدقا لحديثه ذاك وأمسي مكذبا (وناعل ابليس) متمنيا ألا يكون صحيحا. نرجع للوضع الخاص.. المربوط بالعام.. أحكي ليك قصتي مع والي الخرطوم مثلا.. بحكم أنني أصبحت أعتمد في جزء من دخلي اليومي على عربة الأمجاد فقد تأثرت بصفة مباشرة بقرارات الوالي، وتبنيت في الصحيفة مع آخرين قضية المتأثرين من أصحاب المركبات الصغيرة وكتبت عنها عدة مرات، آخرها يوم الأحد الماضي.. بعض الجهات (المقرّبة) اتصلت بإدارة الصحيفة التي أعمل بها وخيرتهم بين أمرين، أن أوقف هجومي على والي الخرطوم أو توقف هذه الجهات (المقرّبة) إعلاناتها من الصحيفة.. الصحيفة أصحابها أيتام.. فهل أواصل نقدي للوالي وأجر الظلم على الأيتام أيضا؟ أم (أنطم) وأسكت، أم أتخارج وأشوف لي جريدة (ما بتخاف) أو أصحابها ما أيتام؟؟؟؟
بجي صاد.
Post: #47 Title: Re: عامي الأول في السودان.. عام الرمادة Author: عثمان حسن الزبير Date: 01-22-2008, 04:16 PM Parent: #44
سلام عقيد
أنت عارف المشكلة إنو أي واحد في أي مجال عاوز يسرقك ... عرفت ليه خلينا الفن وقلبنا سياسة ورجعنا خلينا أي حاجة؟؟؟ واصل لينا في التجربة وأكيد حا تصل لي قناعة بالعودة لأنو الزول النضيف ما بقدر يقعد هناك ويتفرج في الحاصل ....
Post: #43 Title: Re: عامي الأول في السودان.. عام الرمادة Author: انعام عبد الحفيظ Date: 01-22-2008, 03:04 PM Parent: #1
Quote: عامي الأول في السودان.. عام الرمادة
Quote: أقول ليك حاجة، البلد فيها حاجات كويسة كتيرة جدا، وفيها ناس كويسين ومصرين إنهم يغيروا ويضيفوا جديد،
ود عقيد
سلامات والكلام كتيييييييير
بجيك راجعة أكيد بس حبيت أسلم
Post: #45 Title: Re: عامي الأول في السودان.. عام الرمادة Author: عبد الله عقيد Date: 01-22-2008, 03:28 PM Parent: #1
جيتك صاد يا ابو بشر
Quote: والله كلامك يخوف
في مؤشرات قوية بتقول إنو الأمور تسير إلى الأحسن.. وأهم هذه المؤشرات، وجود من يتململون من هذه الأوضاع، ووجود من يعملون بصمت وبلا كلل لتحسينها ما استطاعوا.. لو جيتني ح أوريك أمثلة لهذا النموذج من الناس الذي يؤكد أن البلد لا زالت حبلى
الأخ الزول تحياتي
Quote: لو وجدت من يحكي لك نفس ما مر بك من تجربة في السودان أكنت حقاً سترجع للسودان؟
أيوة كنت ح أرجع. وهذا ما حدث بالضبط وجدت من أخبروني بما يحدث في السودان.. ولكني كنت مصرا على العودة ولا زلت.
حتى الآن أنا لم أقل إني نادم على عودتي ولم أقل إني أريد أن أتخارج مرة أخرى.. ولكني أحكي عن ما وجدته وما واجهته.
Post: #49 Title: Re: عامي الأول في السودان.. عام الرمادة Author: عبد الله عقيد Date: 01-22-2008, 04:37 PM Parent: #45
الأخ دينق تحية
Quote: ولا أعتقد بأنك سوف تكون لك تجربة شاذة أو تختلف كثيرا عن تجارب بعض الاخوة الذين قررو العودة والاستقرار في السودان.
هي التجربة ليست شاذة ولكنها بلا شك مختلفة عن ظروف ومزاج الآخرين بدرجة ما. أنا تجربتي كانت سيئة خلال العام الماضي. ولكن لا أخفيك أني خرجت منها بالكثير من الفوائد، على الأقل في ما يتعلق بالاعتماد على الآخرين. ستجد التفاصيل فيما سيأتي.. بإذن الله.
الأخت (المتصهينة) تراجي لك التحية
Quote: فمثلا عل عدت بعد ان كبر عيالك وتخرجوا فخلصت الي حد ما من محن الطفولة وبقيت في محن الكبار من توظيف وغيره.
أولادي لسة ما دخلو المدرسة، ودا واحد من أسباب إصراري على العودة، عايزم يدخلوا المدرسة هنا عشان ما يكبروا ويقولوا لي ما راجعين..
Quote: ثانيا هل رجعت بمؤهل اكاديمي مختلف؟؟؟ فربما يكون الحلم بوظيفة مختلف زي ناس اخونا الطيب بشير البقول لسه غرقان في نصف عسل الكوب الاول!!
من ناحية المؤهل الأكاديمي، ياهو البكلاريوس المرقت بيهو زمان، بس أضفت عليهو سنوات خبرة أعتبرها متميزة أضافت لي الكثير.. وهنا لا مجال للمقارنة بيني والطيب بشير الذي عاد بدكتوراه وقد كان موقعه هنا قبل الهجرة أفضل مني كثيرا. بعدين بالمناسبة دي يا تراجي، في معايير تانية هنا غير الخبرات والمؤهلات.. ومنها حكاية (أسرتك ناس مسنودين) الإنتي سألتي منها دي.. بالنسبة لي ما عندي زول مسنود، وإن كان هناك استثناء فهو رجل لا يجامل ولا يحابي وقد بذل وسعه وعذرته..
Quote: وطبعا ابهج لو كانوا انقاذيين فيا بختك و الا فعلى الدنيا السلام
حسب كلامكم هنا المفروض أنا ذااااتي إنقاذي.. وأنا بيني وبينك قرررررربت أقتنع بالحكاية دي.. بس البيقنع الإنقاذيين شنو؟ أنا مهمش يا تراجي مهمش ولابد أن تقفي بجانبي.. وأعدك لو السنة التانية برضو بقت (عام رمادة) بفكر معاك في حكاية الصهينة دي.. بس ما تقومي تصهيني مني..
بعيدا عن السياسة:
مودتي لك وللمارينز دينق
Post: #108 Title: Re: عامي الأول في السودان.. عام الرمادة Author: امنة عبد الكريم Date: 02-12-2008, 05:41 PM Parent: #49
Quote: ومنها حكاية (أسرتك ناس مسنودين) الإنتي سألتي منها دي.. بالنسبة لي ما عندي زول مسنود، وإن كان هناك استثناء فهو رجل لا يجامل ولا يحابي وقد بذل وسعه وعذ
انت عوض السيد ما قريبك
Post: #46 Title: Re: عامي الأول في السودان.. عام الرمادة Author: kamalabas Date: 01-22-2008, 03:51 PM Parent: #1
Quote: قام واحد مغترب اتصل وراح يشكّر في منظر الخرطوم والتطورات الحصلت.. أنا ارتفع جواي تيار المغص لحدي الطيش.. واتذكرت ما كنت أراه من هناك.. أتاريها قشور التطور البنشوفا من بعيد دي قايمة على أجساد وأشلاء أسر كلما طرقت بابا تتعيش منه قفلته الحكومة بحجة التطوير.. انا كنت شايف من بعيد ملامح تطور.. وقلت كدي جيت شفتو من جوة.. لقيت ليك (العفنة) شديدة خلاص.. أتاريهو الزول من بعيد بيشوف بس.. ما بيشم..
Post: #48 Title: Re: عامي الأول في السودان.. عام الرمادة Author: kamalabas Date: 01-22-2008, 04:19 PM Parent: #1
شكرا يا ود عقيد أعتقد أنك بهذا تقدم خدمة جليلة لمن هم بالخارج... بجانب المظهر المجوف الذي تناولته-قشرة تطور خارجي وعمق غارق في الفقر والإدقاع والتخلف....أعلام دعائي زائف يغفل حقيقة أن عماد أي خطة تنمية هو الانسان فأذا تدهورت صحته وفقد نعمة التعليم والصحة المجانية -للمحتاج- ومجانية السكن الطلابي ولقمة العيش بداخليته-أذا فقد هذا سوف ينعكس علي قيم ومثل كانت راسخة لقرون.... ......دعني أتجاوز جانب كارثة الحكومة في هذا المضمار لأنفذ لجانب أهم- فاالحكومة مصيرها لزوال- هو القيم والمثل والامانة ومنظومة الاخلاق الاخري- التي كانت ركيزة ومكون أساسي لشخصيتنا ومميز أيجابي نسبي.....أين وجدت هذه المنظومة وأين وجدت الانسان السوداني? كم نموذج قدمر عليك لمغترب عاد بحصيلة عمره-وعاد ليستثمرها في بلاده ويستقر ويعلم أولاده ثم" لغفته" تماسيح السوق في شهور وربما ساهم في ذلك قريب أو صديق? فقد ذلك لحسن ظنه بالناس ولعدم معرفته بقوانين اللعبة وصار هو كضحية ينعت بالمغفل وصار ناهبه يوصف بأنه أبن سوق وملحلح? ولعلك لاحظت كم شخص غامض لا يعرف له مصدر دخل تعالي بنيانه وصار من الاعيان-والغرابة هنا ليس في الظاهرة وأنما في تعامل المجتمع معها- أصبح مثل هذا الشخص يجد تقبلاوأندماجافي المجتمع بل صار من المعدودين بالنباهة وأنه "مفتح" ولم يعد ينظر اليه بريبة وتوجس... كمال
Post: #51 Title: Re: عامي الأول في السودان.. عام الرمادة Author: د.أحمد الحسين Date: 01-22-2008, 05:03 PM Parent: #48
الاخ ود عقيد تحيتي ومحبتي حقيقة أنا مستمتع بتجربتك...سؤال شخصي يمكن ألا تجيب عليه هل انت كنت مع جماعة الانقاذ؟ أسلوبك ممتع في السرد...خفف الله عنك ألامك مع تحيتي لأسرتك وأطفالك
Post: #50 Title: Re: عامي الأول في السودان.. عام الرمادة Author: عبد الله عقيد Date: 01-22-2008, 04:51 PM Parent: #1
ابني عامي خالد تحياتي
Quote: فسألتهم .. هـل مازال الحراميــة يتسلقون الجدران في أواخر الليل ليسرقوا ماخف حمله وغلا ثمنه .. ضحكوا .. وقالوا لي لقد تغير الحال .. وأصبحـو يأتوننا في يأتوك في محلك في كل مكان تطلب فيه الرزق الحلال .. ويأخذوا مالك .. بل يعطوك دليل سرقتهم .. إيصالاً مكتوب عليه ضرائب وعوائد ومحليات ونفيات ....والخ ...
أحكي ليك حكاية تبين لك ما دهمني به هذا النوع من السرقة، حدثت في ثاني يوم لدخولي السودان، يوم 17 يناير الماضي، وأنا ماشي على الخرطوم من بورتسودان أوقفتني إحدى النقاط قبل كبري حنتوب، وأخذوا مني رسوم العبور، وعندما عبرت الكبري أوقفتني النقطة التالية وطلبوا مني رسوم العبور، جاتني الحركة ديك البتعرفا، قمت حلفت طلاق ما أدفع ليهم تاني، حاولوا إقناعي بالتي هي أحسن فأبيت ورفضوا إزالة الحاجز من أمام السيارة ورفضت الوقوف جانبا وازدحم الطريق وكبرت المشكلة. بعدها بفترة كنت ذاهبا لعزاء في كوستي على عربة هايس وبدأنا مسلسل الجبايات من القِطينة حتى كوستي وبالعكس.. أحد الذين معي في الميني باص صاح بأعلى صوته أمام إحدى النقاط.. (يارب تحتلانا أمريكا يا رب).. فأضحك الجميع.
Post: #52 Title: Re: عامي الأول في السودان.. عام الرمادة Author: البحيراوي Date: 01-22-2008, 05:26 PM Parent: #1
Quote: أقول ليك حاجة، البلد فيها حاجات كويسة كتيرة جدا، وفيها ناس كويسين ومصرين إنهم يغيروا ويضيفوا جديد، بس المشكلة إنو قدام كل باب يوجد (غفير أو كلب كبير) يمنع أو يعُض..
الأخ عبد الله عقيد تحياتي
وبالفعل حاجات كتيرة كويسة . صدقت إنة السودان وكفي بيد أن ما سوي ذلك كم هم ناس ود عقيد ممن لم تتاح لهم علي أقل تقدير أن يتحدثوا عن تجربتهم في المليون ميل مربع بشفافية تامة مثل المساحة التي نتبادلها هنا في هذا المقام الطيب أخي ود عقيد. ولعل تجربتك هذه سوف تكون إضافة لآخريات من التجارب الكثيرة التي يحياها الإنسان هنا في هذاالوطن ومن غير إقتراب من حوش السياسة المشلع فإن بنية الدولة السودانية الآن تحتاج لوقفة وكذلك الأخلاق والقيم السودانية التي تاهت في دهاليز يصعب الخروج منها . وللقياس أكثر فإن الجبايات التي تتحدث عنها هنا أخي ود عقيد تتمدد علي نطاق المليون ميل مربع وحتى صدر قرار رئاسي يمنع الجبايات علي الطرق يُصر موظف الخدمة أن يأخذ منك الرسوم وكأني به يقول لك . قول لي الرئيس بل قرارك وأشرب مويته . وعند السؤال للجهة التي تذهب لها هذه الجبايات تتوه في الإجابة . وإذا لقيت إجابة عليك الله يا ود عقيد كلمنا هنا في هذاالمنبر!!!!!!!!!
تحياتي
بحيراوي
Post: #53 Title: Re: عامي الأول في السودان.. عام الرمادة Author: Mohamed Suleiman Date: 01-22-2008, 05:44 PM Parent: #52
ود عقيد ..... من زمان أنا قلت ليك شنو ؟؟؟
السودان ده ما في حل غير ...
نشكّو .... و نوزعو من جديد .....
Post: #54 Title: Re: عامي الأول في السودان.. عام الرمادة Author: معتصم دفع الله Date: 01-22-2008, 06:15 PM Parent: #1
سلام يا حبيب .. ليك وحشة شديدة يعلم الله ..
أحكي يا عبدالله .. أحكي عن الممغوصين والمحرومين .. أحكي عن الفساد ومعذبي العباد .. أحكي عن الملاريا التي تحصد الأرواح والأيدز الذي أصبح مخيفاً .. أحكي .. فالتجربة منك ستكون مفيدة ..
لك ودي ..
Post: #56 Title: Re: عامي الأول في السودان.. عام الرمادة Author: jini Date: 01-22-2008, 10:05 PM Parent: #54
Quote: ود عقيد ..... من زمان أنا قلت ليك شنو ؟؟؟
السودان ده ما في حل غير ...
نشكّو .... و نوزعو من جديد .....
انت بردعتك دى اصلو ما بتفرط فيها! ود عقيد دا جلابى على السكين وبشتكى تشكها معا هو منو الحيستفيد! باقى لى قنعان من دولارات امريكا! قلنا ليك السودان كلو مهمش معدا ناس المؤتمر والحركة وناس مناوى! جنى
Post: #57 Title: Re: عامي الأول في السودان.. عام الرمادة Author: Mohamed Suleiman Date: 01-22-2008, 10:48 PM Parent: #56
Quote: ود عقيد دا جلابى على السكين وبشتكى تشكها معا هو منو الحيستفيد!
يا البليد ... الأحداث التي تعصف بالسودان هي التي ستشك السودان .... كل العوامل بما فيهم الأمريكان .... زي شكة آل تكريت ....
ود عقيد إنو جلابي و إنو جلابي جعلي و عينو مكسورة دي حاجات موثقة في المنبر دة .... ود عقيد كان رافع شعار : لا لدخول القوات الاجنبية .... و صدق حليفة قريبو البشير ..... هو إختفي من يوم ما البشير بلع قسمو و عنترياتو و إنبطح يوم جاهو ني قر بونتي و و راهو عينة من طرف الشئ جوة الشنطة الصغيرة التي كان يحملها .... و إنبرش البشير بلا شروط .. ود عقيد هو زيك ..... فاكر إنو الظالم مادام قريبو ... هو خلاس في أمان .... كونو يجي هنا و يدلق دموعو في بوست مناحة زي ده و يصرخ زي أرخميدس وجدتها و يحكي عن الفساد و الظلم و و و ..... الجديد شنو ؟؟؟ سبب الفساد منو ؟؟ الظالم منو ؟؟؟
ما ياهو نفس الفئة الإحتكرت الحكم و كتلت الناس جماعات في الجنوب و دارفور و جبال النوبة .... داك كان شنو ؟؟ ما ظلم ؟؟ .. ما فساد ؟؟.... ما دكتاتورية ؟؟؟ ...
خلاس ... ياداب الليلة أعوامكم بقت عام الرمادة ؟؟؟
أم دة وجع القرض ؟؟؟
و جني و جن جني الجلابي لما يعمل فيها الود شيطان !!
Post: #58 Title: Re: عامي الأول في السودان.. عام الرمادة Author: Tragie Mustafa Date: 01-23-2008, 01:09 AM Parent: #57
ود عقيد ما قلنا لكم اسمعوا الكلام من الاول وانضموا لثورة المهمشين عملتوا لينا فيها صفوة واضرب واطرح...
Quote: حسب كلامكم هنا المفروض أنا ذااااتي إنقاذي.. وأنا بيني وبينك قرررررربت أقتنع بالحكاية دي.. بس البيقنع الإنقاذيين شنو؟ : أنا مهمش يا تراجي مهمش ولابد أن تقفي بجانبي..
لوووووووووول مهمشي الانقاذ ثاروا آخيرا!! يا ود عقيد الانقاذ دي همشت فاطمة خالد يا اخوي داخل القصر الجمهوري لما انت امانة ما تهمشك وتهمش مليون زيك D
Post: #59 Title: Re: عامي الأول في السودان.. عام الرمادة Author: ahmed haneen Date: 01-23-2008, 07:02 AM Parent: #1
ود عقيد
يعني ما نرجع كلو كلو
Quote: (يارب تحتلانا أمريكا يا رب).. فأضحك الجميع.
قول آمين يا ود عقيد
Post: #60 Title: Re: عامي الأول في السودان.. عام الرمادة Author: حمزاوي Date: 01-23-2008, 09:07 AM Parent: #1
الاخ ودعقيد مسكاقمي مشتاقين يا اخوي الرياض بعدك خلا مازلت اتذكر مشيتك وانت جاي على الصالحية شافي الملعب وخاتي السفة وانا متأكد انك حتكون صادق في كل ما تكتبه عشان كدا واصل ووثق ونحن متابعين لك ودي
Post: #61 Title: Re: عامي الأول في السودان.. عام الرمادة Author: Yassir7anna Date: 01-24-2008, 12:17 PM Parent: #1
حمامة
كيفك ياخي ان شاء الله كلكم طيبين ولامين
Quote: ياسر حنا ياخ على الاقل كان تقول مع السلامة والله ما كنت حاحنسك أصلو... ًلك التحيات
مع السلامة وين؟!!! والله انا اتهشتكت جنس هشتكة في المغتربين، انا مصدقت ركبت الطيارة، ناس البيت زاتهم نسيت ا ودعهم واقول ليك شي، انا ابوي ودعته بالتلفون بعد ما دخلت الصالة جوة ماشي على الطيارة، ياخي دي كانت تجربة الله لا وراك ليها
وبالله ما تقطع ايملاتك وبنكون على اتصال ان شاء الله
Post: #62 Title: Re: عامي الأول في السودان.. عام الرمادة Author: عبد الله عقيد Date: 01-25-2008, 11:33 AM Parent: #1
اعتذاري الشديد لكم أحبتي عن تأخري مع حرصي الشديد على مواصلة الردود وسرد تفاصيل التجربة.
ولكم مودتي..
الأخ حمامة
Quote: تعرف انا بالطريقه دي تميت ثلاثة سنوات ولا انا قدرت اتغير ولا السودان اتغير (للاحسن طبعا)
وجدت مداخلتك اليوم وأعتذر إن كنت تجاوزت الرد عليك.. ما دمت هنا.. فلماذا لا نلتقي.. وتروي لي ما وصلت إليه خلال الثلاث سنوات.. أنا في صحيفة الوفاق (والوصف ما يتوهش)..
الأخ الزول تحياتي.. من ديك وعيك؟؟
Quote: مثل هذه التجارب والتي أرجو أن تكون صريحة وبدون مجاملة هي في رأيي فاكهة هذا المنبر
من ناحية صريحة وبدون مجاملة دي.. ما توصي حريص بس إن شاء الله تكون مفيدة أو ممتعة على الأقل. سأواصل في السرد إن شاء الله
Post: #64 Title: Re: عامي الأول في السودان.. عام الرمادة Author: عبد الله عقيد Date: 01-25-2008, 11:41 AM Parent: #1
الأخ أشرف الحلبي تحية
Quote: باختصار السودان فيه مشكلتين كبيرات سوء التخطيط، أو بالأصح انعدام التخطيط وانعدام الأمان (قروشك في جيبك وخايف من مفاجآت بكرة)
كلامك مية المية، ولو عايز مثال أديك من أقرب مثال عايشتو أنا وكنت مشغول بيه الفترة الفاتت.. لمن سألوا والي الخرطوم عن موضوع المركبات الصغيرة 18 راكب فما دون ولماذا تم الترخيص لها أصلا مادامت تسبب الزحمة والمشاكل وما إلى ذلك.. رد بأنها كانت موقوفة من الترخيص حتى عام 2003 (أظن) وبعد داك الناس طالبت ومش عارف ايه وفتحنا الترخيص.. والآن يأتي القرار الجديد بمنعها من دخول وسط الخرطوم، ووسط مدينتي بحري وأمدرمان.. بدون إعادة النظر في مسألة الترخيص دي.. الغريبة إنو رد على أحد المتصلين بأنه (يجتهد)..!! شفن عليك الله؟؟؟؟ في دليل على انعدام التخطيط أكبر من الكلمة دي؟ الحاكم يجتهد.. أها نحن لو ما جانا حاكِم ما بيجتهد ما بتقوم لينا قايمة.
Post: #65 Title: Re: عامي الأول في السودان.. عام الرمادة Author: ناذر محمد الخليفة Date: 01-25-2008, 11:43 AM Parent: #1
واصل يا ود عقيد ..
كلامك هنا مشروع مذكرات ضخمة تطبع وتوزع لجميع المغتربين الذين يودون العودة للسودان للإستفادة من تجربتك لما فيها من صدقية وشفافية خاصة وأنت تحسب بأنك من مؤيدي النظام الحاكم في السودان ,,
Post: #66 Title: Re: عامي الأول في السودان.. عام الرمادة Author: عبد الله عقيد Date: 01-25-2008, 12:26 PM Parent: #1
أبو النيز أنت مطالب بسرد جزء من (تجربتي) لأنك عايشتها معي.. قول انطباعاتك بصرااااااحة عن منظري وأنا (مبركن) في سوق السجانة
مولانا عباس (زول ساكت) مشتاقين
Quote: اذا خلاص قررت ترجع جيب معاك جلد تمساح او ماتجي
انا المشكلة جلد ورل ما جبتو.. جيت لابس جلد رهيف خلاص.. ولقيت ليك الجماعة هنا لابسين جلد نمر.. وواحدين لابسين جلد الحوت.. لا ينخرِم لا... حاجة.
Post: #68 Title: Re: عامي الأول في السودان.. عام الرمادة Author: حسن البشاري Date: 01-25-2008, 12:58 PM Parent: #66
الاخ العزيز ود عقيد سلامات ومشتاقين كتير متابعبن انطباعاتك، واحمد لك قدرتك على مواصلة التحدي وعدم الاستسلام.. وهذا ايميلي للتواصل: [email protected]
Post: #67 Title: Re: عامي الأول في السودان.. عام الرمادة Author: عبد الله عقيد Date: 01-25-2008, 12:30 PM Parent: #1
يا يابا يا السني.. السودان دا جنني لحس القروش مني بس لسّة مستني.. مستنيكم تجو عايدين
Quote: أركز واقيف نحن جاينك نسندك ياوقفنا ياوقعنا اقيف يازول وخلي املك كبير في بكرة
جاييكم انا اركزو انتو ما تعملو زي ما قال صاحبك ود المهدي نكورك ليكم ما تجو نجيكم تكوركو
Post: #69 Title: Re: عامي الأول في السودان.. عام الرمادة Author: ناذر محمد الخليفة Date: 01-25-2008, 01:23 PM Parent: #1
كنت معايشاً بصورة يومية لجزء من تجربة عبد الله عقيد بحكم عملي بسوق السجانة ، كان عبد الله يحضر للسوق من الصباح الباكر محاولاً أن يجد له مكان وسط عربات البكاسي والدفارات التي تحمل البضاعة في السوق ، ربما كانت المشكلة الوحيدة أن عربة الأمجاد لا تستطع حمل البضاعة والمواد الطويلة مثل الحديد والسيخ وتلك ميزة في العربات البكاسي والنصف نقل ..
رغماً عن ذلك كان عبد الله يحضر صباحا ويجد له مكاناً بشق الأنفس وسط السوق المائج ، يصارع أعتى العربات بأمجاده الهزيل والذي بالكاد يحمل من الوزن طناً أو يزيد قليلاً ، ثم بعد أن يطمئن لوجوده في مكان أمين نتقابل سوياً ونفطر (فتة فول) أو (قراصة بالتقلية) ونجلس نتحدث عن الاحوال ..
لمست في عبد الله إصراراً شديداً على الإستقرار في السودان مهما كلفه الأمر رغم صعوبة التأقلم والظروف الضاغطة ، وكنت قبلها قد زرته في منزله الذي ذكر أن صديقه قد أعطاه له مؤقتاً ، وأذكر أنني في أحد الأيام قلت لعبد الله ان مثلك من تعود على العيش في السعودية بمكاتبها المكندشة وسياراتها الفارهة وأجواءها الصحية لتعليم الأيناء والإستقرار ، قد لا يجد حياة السودان هي الافضل له مع كثرة الذباب وغلاء المعيشة ومصاريف الدراسة وقطوعات الكهرباء العشوائية والتي قد تداهمك في أي وقت أنت وأولادك ..
إلا أن ود عقيد قال أن حياة السعودية لم تؤثر فيه فهو تربال وإبن تربال وكان يقود التراكتور والجرار للحرث قبل سفره للسعودية وأكد لي أنه سيقهر الظروف مهما كانت للإستقرار وعدم العودة للغربة مرة أخرى ..
كان عبد الله مثله مثل كل خلق الله في السوق .. يأتي صباحاً للإسترزاق .. قد يجد مشواراً يجود صاحبه بعشرة أو سبعة جنيهات له ، أو يظل جالساً في عربته يتصفح جرائد اليوم بصبر وتأني وقد يعود أخر اليوم إلى منزله وجيوبه تشكو (أبو النوم) !!
لا أكذب إذا قلت أنني كنت أشفق من ود عقيد في أن يأتيني ذات يوم ليقول لي أنه باع العربة الأمجاد وإشترى بثمنها تذاكر للعودة للسعودية مرة أخرى ، ولكنه لم يفعل وبدلاً من ذلك جاءني في إحدى الايام ليخبرني أنه وجد عملاً في إحدى الصحف وإن كان أقل من مستوى قدراته وأقل مما كان يتقاضاه في السعودية ، ولكنه على أية حال ضربة بداية ونقطة إنطلاق ..
ولا زال عبد الله عقيد يعمل في الصحيفة وفي ذات الوقت يحتفظ بالأمجاد ، فبعد إنتهاء عمله الرسمي وفي أثناء رجوعه للمنزل ، لا ضرر إن وجد ركاباً في طريقه أو غير طريقه لإيصالهم إلى وجهاتهم وفي ذات الوقت كسب إضافي له ولأولاده .
مرة أخرى أقول أن تجربة عبد الله عقيد في (عامه الرمادة) كما يقول تستحق الدراسة والنقاش حولها من الجميع حتى يقفوا بصورة أوضح وأقرب لكل الإحتمالات إذا ما قرروا العودة للسودان ..
أنا شخصيا معجب بتجربة ود عقيد هذه ..
وفقك الله وسدد خطاك ..
Post: #70 Title: Re: عامي الأول في السودان.. عام الرمادة Author: هضيبي علي سعيد Date: 01-25-2008, 01:26 PM Parent: #1
حذف للتكرار
Post: #71 Title: Re: عامي الأول في السودان.. عام الرمادة Author: هضيبي علي سعيد Date: 01-25-2008, 01:27 PM Parent: #1
الاستاذ و د عقيد اسعد الله أيامك و أعوامك السودان نور بوجودك ...
(خلق الإنسان في كبد) و ما في جنة في الأرض و أظن أن الإنسان و ين ما مشى و توفر ت له أشيا برضو بيظل ناقصهُ شيء و يوم بيضيع على الإنسان بعيد عن الأهل و الأوطان ما بيتعوض تاني.. و وجود الواحد بين أحله قيمة ..
رغم تزامن عودتي مع عوتك إلا أنني أظن حظيت بقدر من التوفيق هنا مقارنة بالوضع هناك لا بل تمنيت لو عدت من زمان ..
أتمنى أن ألتقي بك ....
Post: #72 Title: Re: عامي الأول في السودان.. عام الرمادة Author: abubakr Date: 01-25-2008, 01:59 PM Parent: #1
عزيزي ودعقيد .. خالص التحايا ... لو كتبت تجربتك لفعلت خيرا كثيرا فمن يريد ان يعود اصلا لسبب او اخر سيعود كما فعلت ثم يكتشف الحقيقة سلبا او ايجابا ويبقي او يرد خارجا ...انا بعيد لما تجاوز الثلاث عقود ومتابع بصورة (كما يقال "مملة" ) ما يحدث يوميا ... مهنتي (العمران والتخطيط وادارة المشاريع العمرانية ..الخ) لا تجعلني انبهر باي خبر عن مبني او تخطيط وهذا حال كل شخص في مهنته وحرفته وبالتالي امور طرق وجسور ومباني ليست هي التي تؤثر كثيرا في قرارتي للعودة ان اردت فعندما تركت السودان كنت في ذات المهنة والحرفة وكنت قد رايت العالم الخارجي وما فيه من عمران قبل ذلك بسنوات .. الناس لا تترك بلادها لاجل ذلك اي غياب طرق وجسور وعمارات.. عمارة الانسان هي الاهم .. ما يعمر دواخل البشر من طمانينة في العيش والروح والبدن هي التي تبقي الناس في مكان ما ...بلادنا فقدت ذلك تدريجيا منذ عقود اجبرت بعض الشرائح علي الخروج ثم تفاقمت الاوضاع متردية فاقدة الامن والطمانينة فخرجت شرائح اكثر حتي صار منهم خارج البلاد او هم داخلها وخارجون عن منظومة من آمن نفسه واهله وماله ملايين وربما كل اهل السودان الا من اصطفاه اهل حكم وجاه وسلطان وهؤلاء القلة .... ليس بعودة من هو في اغتراب او هجرة ستصلح الاوضاع فمن بالداخل وهم الحارقون اصابعهم وربما كل اجسادهم وارواحهم بنار تردي في اوضاع مالية واجتماعية هم القادرون باذن المولي علي التغيير ...ما يهم هو ان يتمسك من بالخارج ومن بالداخل علي ضوابط تجعلنا جميعا سودانيون حتي ولو تبدلت اذونات الخروج والدخول وجوازات السفر وحتي اللسان ... قل لنا حقيقة يسالك الباري عنها وتعيينافي حماية تلك الضوابط السودانية نسلمها لاجيال من صلبنا اتت وتعلمت وهي خارج الارض السودانية فالاوطان عند اهلها تتجاوز حيز المكان والزمان الي مكامن في الوجدان ...
لك وللسودان مودتي ابوبكر
Post: #73 Title: Re: عامي الأول في السودان.. عام الرمادة Author: Ahmed Osman Date: 01-26-2008, 04:29 AM Parent: #72
يا زول يا صافى النية شكرا وانت تشرك الاخرين تجربتك الشجاعة بالعودة ومواجهة الواقع -وكلى قناعة يا اخى الكريم ان الله سيرزقك وابناءك فى تلك الارض النائية من حيث لا تحتسب -
ان عودة امثالك لارض الوطن هو خطوة هامة فى محاربة الفساد الذى تتحدث عنه -والا كيف نحارب الفساد ونحن خارج ارض المعركة ولا نواجهه فى المعايش اليومية
وما تمكن الفساد الا بعد هروب معظم المتضررين من المواجهة
-عودا حميدا
Post: #112 Title: Re: عامي الأول في السودان.. عام الرمادة Author: عبد الله عقيد Date: 03-04-2008, 04:16 PM Parent: #73
الله يحييك يا ابو حميد ومعليش
أخي احمد مداخلتك أعطتني طاقة عالية ولا أخفيك أن تغيرا في الأوضاع بدأ يحدث منذ بدأت هذا البوست..
لك المحبة
Post: #101 Title: Re: عامي الأول في السودان.. عام الرمادة Author: عبد الله عقيد Date: 02-05-2008, 02:04 PM Parent: #72
بعض المداخلات أعطت هذا البوست قيمة منها مداخلتك هذه يا باشمهندس
لك التحايا والتقدير أخي المهندس أبوبكر وسأحرص على المواصلة بإذن الله
Post: #74 Title: Re: عامي الأول في السودان.. عام الرمادة Author: عمر الفاروق Date: 01-26-2008, 06:55 AM Parent: #1
ود عقيد تحياتي .. صاحبنا كان شغال في السعودية أستاذ ثانوي ودخله ما بطال خصوصاً من الدروس الخصوصية في السعودية ..فجأة ودون إحم ولا دستور حرق كل المراكب وراهو ومشى السودان نهائي ..كل الناس كانت بتقول ليهو أعمل خروج وعودة وأمشي شوف الظروف ..قال ليهم لاااااااا لا نهي زندقي نهائي بس.. رجع السودان وقعد شهرين لا شغل لا مشغلة ..يوم دقّ الباب بتاعهم ولمن فتح لقا ليهو مرا ومعاها شافعها ...قالت ليهو يا أستاذ خالد عايزاك تقري لي محمد ولدي ده عشان بكرة عندو إمتحان ..وقامت المرا دخلت وقعدت ليك جمبهم في الشرح .. يا زول خالد زولنا طوالي إنفصم ليك في المرا وقال ليها : يا خالة انا أستاذ ولّا حلّاق قعدتي لي مع ولدك كده طرد المرا وولدها وشدّ سلك لي الفرد في السعودية لعمل الشيرنق للفيزا ولو بمهنة راعي ..
Post: #75 Title: Re: عامي الأول في السودان.. عام الرمادة Author: Ahmed Abdallah Date: 01-26-2008, 07:11 AM Parent: #74
العقيد ... اكيد يوم بكرة اجمل يا عبدالله كلما داهمك الملل تيمم شطر الحليلة تزود منها بالامل و عد الى عملك ..
تحياتي للأهل ...
___________________________ عمر الفاروزق ... قميصك البمبي ده بذكرني قميص ناذر الاحمر
Post: #76 Title: Re: عامي الأول في السودان.. عام الرمادة Author: عمر الفاروق Date: 01-26-2008, 07:31 AM Parent: #1
Quote: قميصك البمبي
يا ابو حميد شرطت عينا أمام الجكس ياخ .. ذكرتني بي صاحبي زيّك كده ما بيعرف الألوان قال لي يا عمر ركبنا تكسي أخدر !!! معقولة ده بمبي ؟ الرقص جميل وليهو نميل .. الرقص لطافة ..وفيك قيافة .. يا لابس البمبييييييي.. تخريمة: حقو نعملا مسابقة في بوست ود عقيد اللي زي بيت العزابة ده ونسأل من لون القميص عشان نجيب ليكم الحمام هنا .. وحم حم حم يا حمام شتّت ليك سكّر
Post: #77 Title: Re: عامي الأول في السودان.. عام الرمادة Author: عبد الله عقيد Date: 01-26-2008, 01:49 PM Parent: #1
فارس موسى ازيك يا حبيب
Quote: وما عارف اقول ليك كفاره ولا حمدا للسلامه !!
لو داير الجد.. قول لي حمدا لله على السلامة. لأني ضد فكرة الهروب.. ولا أعني أن الذين اتخذوا خيار البقاء بالخارج هاربين. ولكني أقصد أن المعالجة للأوضاع السيئة تأتي عبر المشاركة الحقيقية من الداخل وإن كانت الأبواب موصدة فريثما تنفتح.. (من سار على الدرب وصل).. وذلك يأتي بدافع واحد فقط يظل يلح على الفرد منا وتختفي أمامه كل الصعاب.. وهو دافع الانتماء لهذه المساحة. ما أفعله الآن مجرد (شكية) وفضفضة، إحساسي الأكيد هو أنها (بتنفع).
أبو السعود لك الود
Quote: قد اثرت فضول المهاجرين.. أكتب ابا مشعل لنفسك و اخوانك و الوطن و المهجر.
في أمراض اجتماعية تفشت بصورة كبيرة داخل الوطن، وقد نجى منها المهاجرون، رغم أنهم معرضون لأمراض اجتماعية أخرى، ولكنهم في عافية من هذه الأمراض التي انتشرت هنا.. وعودتهم ستزيد من معدل المقاومة الاجتماعية لهذه الأمراض.. أصبحت هذه عقيدة راسخة في ذهني أعني المعالجة عبر الذين هاجروا.. من هذه الأرماض.. حتى لا أكون إنشائيا.. مرض خفي وعجيب لاحظته متفشيا هنا، وهو رغبة كل فرد (تقريبا) في الحصول على عائد مادي دون أن يقدم خدمة، أو في الحد الأدنى بتقديم خدمة لا ترقى لمستوى ما ينتظره من عائد.. يعني المجتمع كلو بقا (سماسرة).. أي زول (تقريبا) ينتظر أن تقدم له المقابل حتى إن كان مجرد وعد بخدمة مقابلة. (دائما هناك استثناءات بالطبع)..
الأخ المعز أبو نورة تحياتي
Quote: Welcome back. I appreciate if you can tell us about your experience in Sudan
سأحاول جهدي إن شاء الله رغم صعوبة الكتابة للموقع من هنا بسبب المشاغل الكثيرة وضيق الوقت. فهدفي من هذا البوست بالفعل هو عكس تجربتي لأستفيد ويستفيد زملائي في الخارج مما واجهت.
Post: #78 Title: Re: عامي الأول في السودان.. عام الرمادة Author: عبد الله عقيد Date: 01-26-2008, 02:07 PM Parent: #1
أبحراز ينصر دينك يا شيخ اختصرت الكثير مما كنت أقوله، دوافع العودة والمشاكل.
Quote: السودان بلد القرارات المتخبطة وهذه حقيقة ولابد أن نقولها من أجل أن نعالج كل السلبيات في هذا الوطن المجروح !!!!
وهنا وضعت يدك على الجرح بدقة وهو بلد الفردية وبلد الخبراء (المقددنها) في أي مجال، ولا يستفيدون من خبراتهم هذه إلا في تسفيه أي إبداع أو اقتراح جديد.. بلد المومياءات بلد الكباري البشرية التي تجعل أي فكرة وأي رأي مفيد يعبر مقصده ويتوه في البر الآخر.
الأخ هشام المجمر
Quote: اتفق الجميع أن السودان دولة فقدت النظام لصالح الفساد
على كافة المستويات تقريبا
Quote: وانك لا تجد اثرا واضحا للحكومة فى الشارع و تستطيع بالمال انجاز كل شئ
صدقوا وإن وجدت أثرا للحكومة في الشارع فستجده عبارة عن حفرة أو حجر عثرة أو جباية بشتى أنواعها. الحكومات المحلية هي مجموعة جباة يبيعون كل شيء لكل شخص بالطرق الرسمية، وبالطرق غير الرسمية.
مثال من الواقع: أحد الأخوة كلفني بتكملة إجراءات دكان اشتراه في أحد الأسواق بالعاصمة.. ذهبت إلى مكتب المحلية فرأيت التالي.. صبي صغير يتفاوض مع رئيس المكتب وكأنهما في حالة بيع وشراء في قلب السوق.. - تدفع 10 .. لا لا بدفع 5 بس - خلاص تسعة.. تمانية .. خمسة بس - ......... .. - خلاص جيب الخمسة اكتشفت أنه صاحب (بسطة) أو حاجة (فارش في السوق) والمفاوضات دي لتحديد القيمة التي سيدفعها الطفل يوميا مقابل هذه الفرشة..
أما موضوعي أنا، فحدث فيه ما يدعو للاستغراب.. حيث أبلغوني بالمبلغ المطلوب من الرجل وهو مبلغ خرافي بالطبع، وبحثت بعد إخبار صاحب الشأن عن واسطة واتضح أن الواسطة استنفدت فرصها، حضرت اليوم الثاني ووجدت أحدهم قد سبقني لرئيس المكتب، وبدأ يتفاوض معه (الرجل برفقته رُتبة دبابيرها تتلألأ) وحصل على تخفيض كبير جدا.. فقدمت ورقي في حضورهما (صاحب الدكان وواسطته) فلم يكن أمام الرجل حلا غير أن يمنحني تخفيضا بأسلبو يختلف تماما عن أسلوبه القاطع المانع بالأمس..
Post: #79 Title: Re: عامي الأول في السودان.. عام الرمادة Author: عبد الله عقيد Date: 01-27-2008, 11:03 AM Parent: #78
ماما دوما تحايا
Quote: وبعدين لاحظ في كارثه اقتصاديه عالميه علي الابواب لن تبقي ولن تذر.
يا ساتر استُر. على سيرة الكارثة الاقتصادية.. هناك كارثة كبيرة في السودان لم ينتبه لها الناس بعد، أو ربما انتبهوا لها، وهي تمثل قمة التهاون الحكومي في اقتصاد البلد ومقومات الإنتاج فيه وقمة الاستهتار والانتهازية من قبل الذين يمارسون هذه الكارثة.. الكارثة هي استيراد (المستخدم) عربات مستخدمة إسبيرات مستخدمة أجهزة كهربائية مستخدمة ملابس مستعملة كل شيء مستخدم.. يورد إلى السودان
لم أبحث عن المعلمومة بعد، ولكني أعتقد أن ليس هناك بلد في العالم يستورد (أشياء) مستخدمة كما نفعل نحن في السودان.. إذا فالسودان أول حاجة هو (كوشة) نفايات العالم.. بعلم وتصريح بل وبجباية السلطات المختصة.
هل هذا مقصود؟ هل تجهل السلطات آثار هذه الكارثة على البيئة وعلى الاقتصاد؟ هل تعلم ولكنها تتجاهل؟ هل هي مستفيدة؟ بمقارنة بسيطة بيننا وبين السعودية.. بعلاقة معرفتي بالبلدين، فإن جهاز المواصفات هناك لا يسمح باستيراد أجهزة ومعدات (جديدة) إلا بشروط خاصة ومعايير تضعها المملكة ويراعيها المُنتج في أي بلد في العالم.. أما نحن، فمعظم أدواتنا تأتي من (حراج) دبي، ومن حراجات الصين وكوريا واليابان، بدءا بالشاحنات والآليات الثقيلة وانتهاء بالموبايل.
Post: #80 Title: Re: عامي الأول في السودان.. عام الرمادة Author: عبد الله عقيد Date: 01-27-2008, 11:25 AM Parent: #1
شماشي سلامات
Quote: يا ولدي الكدايس طفشن من الجوع زي ما إنتو طفشتوا من الفلس.
طفشتكم دي يا شماشي.. مرقتكم من الفلس ومرقتكم من أن تصبحوا سماسرة.. لكنها دخّلت البلد في حيص بيص.. عدد سكان السودان الآن 35 مليون، 20% منهم في العاصمة، و70 % من الذين في العاصمة بدون عمل رسمي تقريبا، تطلع منهم طلاب مدارس، وجامعات، وربات منازل، وسواقين رقشات.. وجوكيات، والباقي سماسرة. نسبة الحرامية المحترفين قليلة جدا مقارنة بالسابق. فلم يعد هناك حاجة لتسور المنازل وكسر الدكاكين.. حلها بسيط، وهو أن تعمل سمسار أو كسمنجي.. لو ركبت حافلة من المحطة الوسطى (يا حليلة) حتى آخر محطة في سوبا مثلا، فستجد كسمنجي (يصيح) في أربع مواقع تقريبا.. تزيد غالبا وتنقص قليلا.. زمان كان الكمسنجي إما سائق كبير السن وضعيف البنية، أو رجل معاق في أحد أطرافه، أما الآن فهم شباب أقوياء!!
شيخ العرب ود اب حريرة تحايا
Quote: كلنا على اعتاب التجربة..علنا نستفيد مما تكتب.. الناس السبقوك خلوها زي عقرب جراب الزاكياب..كل زول نام بي لدغتو..
اخواننا الخواجات عاجبني في حاجات كتيرة، لكين أكتر حاجة متكيف ليها فيهم هي إنهم ما بيخجلوا من سرد تجاربهم الشخصية سواء في النجاح أو الفشل. لا أستبعد أن أحد أهم أسباب نجاحهم وفشلنا هو أن الواحد منهم (ما بنوم بي لدغتو).. ولكن أهلنا نشأونا على فهم عجيب خلاص.. يقول ليك (إذا ابتليت يا فصيح.. ما تصيح). أنا غايتو فصيح، وابتليت.. وها أنذا أصيح. لكين أعيد وأؤكد أن كل حالة ولها حكمها في شأن العودة.. وعودة الناس في وزنك تعطي مفعولا واضحا في ترجيح الكفّة السمحة يا حبوب.
Post: #81 Title: Re: عامي الأول في السودان.. عام الرمادة Author: قرشـــو Date: 01-27-2008, 01:24 PM Parent: #1
الأخ الحبيب ود عقيد
لك التحية والتقدير
وجدت بوستك هذا وبينى وبين العودة مرمى حجر وقد كنت اظنك من المرتاحين هنالك وكانى متيقن بأنك تملك عملا تجاريا ممتازا وقد سبق ذهابك وانه لن يحوجك للوظيفة حتى ولكنى ذهلت من معلوماتك واعتبرها جديدة تماما .... ترى ماهو حال شخص لا يملك بيت ولا قطعة ارض ولا جلد تمساح ؟؟؟؟؟ بصراحة كلامك هو ما نسمعه دوما عن السودان ولكن فى حالتك فالمصداقية أكبر لاننا على الاقل زملاء غربة معا وزملاء بحث عن حال افضل ولذا لن نكذب على بعضنا وهذا يجعلنى اتشاءم كثيرا وليس من حال البلد بقدر ما يكون تشاؤمى من حال الناس فى البلد وما وصلوا اليه ... ولكن يا زول شد حيلك قريب انا بكون معاك والزارعها الله فى الحجر بتقوم ...
مع امنياتى لك بالتوفيق فى الحصول على وظيفة رئيس تحرير براتب يجعلك تمنح الامجاد لمن يحتاج اليها أكثر لانك ساعتها ستمتطى احدى فارهات الصحيفة من ذوات الموديل الأخير ...
ولك تحياتى ومودتى
Post: #82 Title: Re: عامي الأول في السودان.. عام الرمادة Author: محمد الأمين موسى Date: 01-27-2008, 05:04 PM Parent: #81
Quote: لم أبحث عن المعلمومة بعد، ولكني أعتقد أن ليس هناك بلد في العالم يستورد (أشياء) مستخدمة كما نفعل نحن في السودان.. إذا فالسودان أول حاجة هو (كوشة) نفايات العالم.. بعلم وتصريح بل وبجباية السلطات المختصة.
يا ودعقيد السودان ليس فقط بلد أشياء مستعملة، بل كذلك بلد كفاءات مستوردة مستعملة! سكندهاند! سمعت إنو إخوانا الصينيين الموجودين في السودان العديد منهم أكسل من السودانيين! أسعدتنا كثيرا بهذا البوست.. كامل أمنياتي لك بالتوفيق والسداد وسداد الأقصاد إن وجدت!
Post: #109 Title: Re: عامي الأول في السودان.. عام الرمادة Author: عبد الله عقيد Date: 03-04-2008, 04:01 PM Parent: #82
عزيزي الدكتور محمد الامين موسى لك التحايا الخوالص ومشتاق ليك شديد والله. طبعا بعد كدا العذر ما بينفع.. بس أكيد والله ظروفي الضاغطة هي التي منعتني من مواصلة الردود على المداخلات.. وها أنا (أشد حيلي) لأرد على كل مداخلة قبل أن يداهمني بكري بحركة (ترشيفية)..
لك مودتي.. وتقبل الله دعواتك لي يا حبوب
Post: #83 Title: Re: عامي الأول في السودان.. عام الرمادة Author: عبد الله عقيد Date: 01-28-2008, 10:20 AM Parent: #1
أخي الكريم نادوس لك التحايا أشكرك على ما قلته في حقي، فهو قيّم بحق.
Quote: = أما خوفك على الآخرين، دي ما تشيل همها، لأنو ليس في ثقافتنا ما يعصمنا من تكرار أخطاء بعضنا، بل اعتدنا ان نكابر ونصر للذهاب في طريق حتفنا، رغم صياح كثير من الحادبين.
في أخر مداخلة لي (ضربت المثل) بثقافة المكاشفة وإظهار التجارب الشخصية ونتيائجها عند الخواجات، وقل إنها من الأشياء (العاجباني) عندهم. ذهلت عندما علمت أول مرة أن من يخطط لمشروع ويفشل يمكنه أن يعوض خسارته بطباعة كتاب وإعطاء محاضرات (بالقروش) عن أسباب فشل مشروعه وما هي الأخطاء التي وقع فيها.. تعجبت في هؤلاء الذين يدفعون (من دم قلبهم) ليستمعوا أو يقرأوا عن تجربة رجل فاشل.. ولكن المسألة طبعا بدت لي منطقية بعد زوال الدهشة. هسي بيني وبين نفسي قلت ياخ ما دام المغتربين ديل عايزين يعرفوا الحاصل ما اقوم (أبيع)؟! دي ح تخليني انتقل طوالي لي عبارة كانت متداولة هنا ولكنها أخذت منحى آخر.. وهي عبارة (داقس - دقوس).. تصور أنها أصبحت تطلق على كل من يطالِب بحقه بالطريقة الصحيحة، أو يقدم خدمة بدون مقابل.. مثال.. إصيبت عريبتي في حادث، وبدأت مشوار الجري لاستخراج مطالبة شركة التأمين.. أول حاجة اكتشفت إني (داقس) لأني أحضرت فواتير بالقيمة الحقيقية للإصلاح والإسبيرات. كشف لي ذلك موظفي شركة التأمين حينما وافقوا بسرعة على القيمة التي أحضرتها وهم ينظرون إلي نظرة إشفاق فحواها(شوف الدقوس دا بالله).. اتضح ذلك جليا عندما ذهبت لأصلح الأضرار، فكانت قيمة الإصلاح الحقيقية أكبر مما كتب في الفواتير.. السمكرجية طلعوا لي حاجات لا ترى بالعين المجردة وأقنعوني بأنها هي الأساس في الضرر وأن إصلاحها أهم من إصلاح الواجهة.. قوائم ومش عارف ايه. أتاريها الفرضية الأساسية إنك بتطلب أكثر مما تستحق ومن تطلب منه يعلم ذلك لذا فهو يهيئ نفسه لمراجعتك وتخفيضك حتى النهاية.. والنهاية هي أن (يدقّس) أحدكما الآخر.. حرام، حلال، ضمير، بتاع، هناي.. لا لا. أطيبهم يقول ليك، ما بتقى مغفل ياخي، الناس ديل لو ما رفعت ليهم ح يضربوك، خليك صاحي.
Post: #84 Title: Re: عامي الأول في السودان.. عام الرمادة Author: عبد الله عقيد Date: 01-28-2008, 10:22 AM Parent: #1
أخونانوبي سألني عن الأحوال وعن الأمجاد، قلت ليهو دقسوني فيها وهسي منتظر يجيني مغترب داقس أبيعا ليهو.. قال لي بيعا لي دكين.. دكين البعرفو دا ما بيقع لي بسهولة، بس الله يجيبك السودان يا معتصم دفع الله. وحبذا لو لميت في أحمد حنين.. انتقم منو حقي وحق ابو رزقة.
Post: #85 Title: Re: عامي الأول في السودان.. عام الرمادة Author: عبد الله عقيد Date: 01-28-2008, 10:58 AM Parent: #84
أبو الصادق مهدي الصادق لك التحايا
Quote: اتمنى ان تكون اتخارجت بى جلدك .... تعال لكى تشيل معاك كم نفر من الاهل المحتاجين .
يا اخوي انا اتخارجت من هناك، وبعد دا قرّبت اتخارج من تأثير الصدمة.. البجيبني ليكم تاني شنو. بالفعل هناك الزول بيقدر يشيل معاهو شوية حمول.. لكين يا اخوي ربك كريم، والجماعة ديل رزقهم بيجيهم، إما عبرك انت ذاتك وانت هنا، أو يتحول لي جهة تانية. تتخيل يا ابو الصادق أنا لاحظت حاجات تدعو إلى الإيمان في مسألة الأرزاق دي. والله يا مهدي بعض الناس الكانو معتمدين علي هسي وكت انزنق بنسند عليهم.. ويا ريت ألقى فرصة أشرح الحكاية دي بالتفصيل.
الأخ ابو عثمان تحياتي ولك الشكر
Quote: احكي ....
كنت متخوف من إطلاق الأحكام العامة، ومن تعميم التجربة وغيرها من الأشياء التي تقف عقبة في سبيل الحكي، لكن المداخلات السابقة كلها طمأنتني بأن ما أقوله سيؤخذ بطابع التجربة الفردية التي تحكمها ظروف قد لا تتكرر مع الآخرين. أعدك بأن أواصل في الحكي بإذن الله
Post: #86 Title: Re: عامي الأول في السودان.. عام الرمادة Author: عبد الله عقيد Date: 01-29-2008, 04:06 PM Parent: #1
عثمان الفنان ابن الفنان تحياتي
Quote: وأكيد حا تصل لي قناعة بالعودة لأنو الزول النضيف ما بقدر يقعد هناك ويتفرج في الحاصل ....
زي ما قلت لأحد الأخوان هنا من قبل، هناك خيار ثالث، غير الرجعة للغربة أو الفرجة.. وهو محاولة إلقاء حجر في البحيرة.. ووضع اليد في أيدي أخرين ينتظرون من يساندهم للبحث عن معالجات.. بمعزل عن السياسة التي أفسدت وستفسد ما تبقى من مجهودات خيّرة.
انا بحلم بي يوم قريب يجو فيهو الناس مجموعات مجموعات وشعارهم ((جينا نخت إيدينا الخضرا فوقك يا أرض الطيبين)) إحساسي إنو يد نضيفة واحدة هي (أنتي بايوتك) للوساخة الحاصلة دي.. لو ما عالجت بتسبب إزعاج للجراثيم والبكتيريا.. في ناس حلويين هنا يا ابو عفان.
انعام عبد الحفيظ لك التحايا أها ما قلت ليك في ناس حلوين يا عثمان قول واحد..
كل مره أقول على الأقل نعمل المشوار الإتفقنا عليه لزولتنا ديك
كل ما اكون عايزه اتصل عليك الصباح واليوم يكون يا داب إبتدأ
أتذكر انو يوم الصحفيين ببدأ متأخر
انا بقرأ في سطورك ومهتمة بتقييمك للأشياء كتير
وبينا حوار بالسكة مش غير الأسفير
Post: #111 Title: Re: عامي الأول في السودان.. عام الرمادة Author: عبد الله عقيد Date: 03-04-2008, 04:07 PM Parent: #88
Quote: وبينا حوار بالسكة مش عبر الأسفير
وبهذا يا إنعام تكوني قد أعفيتني من الاعتذار.. تحياتي ولك المودة
Post: #87 Title: Re: عامي الأول في السودان.. عام الرمادة Author: عبد الله عقيد Date: 01-29-2008, 04:19 PM Parent: #1
كمال عباس تحياتي وشكري
Quote: دعني أتجاوز جانب كارثة الحكومة في هذا المضمار لأنفذ لجانب أهم- فاالحكومة مصيرها لزوال- هو القيم والمثل والامانة ومنظومة الاخلاق الاخري- التي كانت ركيزة ومكون أساسي لشخصيتنا ومميز أيجابي نسبي.....أين وجدت هذه المنظومة وأين وجدت الانسان السوداني? كم نموذج قدمر عليك لمغترب عاد بحصيلة عمره-وعاد ليستثمرها في بلاده ويستقر ويعلم أولاده ثم" لغفته" تماسيح السوق في شهور وربما ساهم في ذلك قريب أو صديق? فقد ذلك لحسن ظنه بالناس ولعدم معرفته بقوانين اللعبة وصار هو كضحية ينعت بالمغفل وصار ناهبه يوصف بأنه أبن سوق وملحلح?ولعلك لاحظت كم شخص غامض لا يعرف له مصدر دخل تعالي بنيانه وصار من الاعيان-والغرابة هنا ليس في الظاهرة وأنما في تعامل المجتمع معها- أصبح مثل هذا الشخص يجد تقبلاوأندماجافي المجتمع بل صار من المعدودين بالنباهة وأنه "مفتح" ولم يعد ينظر اليه بريبة وتوجس... كمال
وضعتك يدك على مكمن الداء الاجتماعي الفساد الحقيقي الذي يسري في شرايين المجتمع حتى كاد يتلفه جميعه نسأل اخواننا الاقتصاديين.. هل يحتمل أن يكون ارتفاع مستوى المعيشى (النسبي) سببا لهذه الظاهرة؟ دخول وسائل استهلاك جديدة، وأنماط استهلاك جديدة.. وبحث الناس عن مصدر لتغطية استهلاكهم المتزايد في الاتصالات والمواصلات والأثاث وغير ذلك من الأمور.. هل هو السبب الرئيسي لهذه الظاهرة؟ هل هو ضعف الوازع الديني، بل انعدامه أحيانا؟
((عاديتني بالأسئلة يا كمال ))
Post: #89 Title: Re: عامي الأول في السودان.. عام الرمادة Author: معاذ حسن Date: 01-29-2008, 06:55 PM Parent: #87
الاخ ود عقيد سلام يا رجل تاثرت جدا بتجربتك لدرجة انني قررت ان امدد اقامتي هنا لاجل غير مسمى!!
أذكرك بحديث نبوي احبه جدا وهو قوله صلى الله عليه وسلم«المؤمن القوي خير وأحب إلى الله من المؤمن الضعيف وفي كل خير. احرص على ما ينفعك، واستعن بالله ولا تعجز. وإن أصابك شيء فلا تقل: لو أني فعلت كان كذا وكذا، ولكن قل: قدر الله، وما شاء فعل، فإن لو تفتح عمل الشيطان». أمنياتي بالتوفيق والسداد .
Post: #114 Title: Re: عامي الأول في السودان.. عام الرمادة Author: عبد الله عقيد Date: 03-07-2008, 02:20 PM Parent: #89
أخي معاذ حسن لك التحية والإكرام
Quote: تاثرت جدا بتجربتك لدرجة انني قررت ان امدد اقامتي هنا لاجل غير مسمى!!
هذا ما كنت أخشاه يا معاذ أرجو أن يكون مدى إقامتك هناك محددا للعودة إلى البلاد فرغم كل المآسي هي خير من الغربة
لك المودة
Post: #90 Title: Re: عامي الأول في السودان.. عام الرمادة Author: هشام هباني Date: 01-29-2008, 07:43 PM Parent: #87
اخونا ود عقيد
سلامات والف حمدا لله علي سلامة الوصول من الوطن المنفي الي المنفي الوطن! واهديك المفيد المختصر وانت قررت ان تعود للوطن الذي سرقه هؤلاء وذهبت فلم تجد الوطن بل وجدت هؤلاء وعدت اخيرا للمنفي الوطن!
اهديك..هذا العمل مختصرا كل احباطاتك في هذه الكلمات والصور!
Post: #92 Title: Re: عامي الأول في السودان.. عام الرمادة Author: عبد الله عقيد Date: 02-02-2008, 11:41 AM Parent: #1
استاذي الدكتور احمد الحسين لك التحايا والتقدير
Quote: حقيقة أنا مستمتع بتجربتك...سؤال شخصي يمكن ألا تجيب عليه هل انت كنت مع جماعة الانقاذ؟ أسلوبك ممتع في السرد...خفف الله عنك ألامك مع تحيتي لأسرتك وأطفالك
السطرين ديل شايلات كلام كتير خلاص، أشكرك على الدعاء أما على السؤال، فما عارف أعمل معاك شنو يا عمنا.. لو استخدمت خيار (يمكن ألا تجيب عليه) بتبقى المسالة فيها إنّ ولو جاوبت بلا.. بتكون خربت علي.. وإن جاوبت بنعم.. بكون كذبت على نفسي وعلى الناس. فطوال فترة حكم الإنقاذ لم اكن (مع جماعة الإنقاذ).. ولا مع أي جماعة أخرى.. وهذت يعود لقناعة بنيتها بعد تجارب، وكل يوم اكتشف أني خسرت الكثير بسبب هذه القناعة، ولكني في الوقت نفسه ربحت الكثير.. أقله أنني الآن أحمل (أخطائي) فقط على كاهلي، ولا أحمل عبء أخطاء أي جهة.
Post: #93 Title: Re: عامي الأول في السودان.. عام الرمادة Author: عبد الله عقيد Date: 02-02-2008, 12:00 PM Parent: #1
بحيراوي تحياتي
Quote: وإذا لقيت إجابة عليك الله يا ود عقيد كلمنا هنا في هذاالمنبر!!!!!!!!!
ايوة الجبايات دي قاعدة تمشي لأغراض كثيرة، منها دفع رواتب المدرسين في مرحلة التعليم العام، وميزانيتهم عبء محلي رواتب وعلاوات وبدلات ولوزام المعتمد ورؤساء المحليات والتنفيذيين والموظفين. العربات الفي إكس أر وذوات القبينتين وغيرها التنمية.. ؟؟؟ سد الفرقة .. وهذه هي ميزانية معدة سلفا كاحتياطي للفساد والسرقات والنهب والسلب. وميزتها أنها تخفف على الميزانية الحقيقية، وخاصة ميزانية التنمية التي تضيع (كلها) أحيانا..
محمد سليمان مشتاقين يا فردة
Quote: ود عقيد ..... من زمان أنا قلت ليك شنو ؟؟؟ السودان ده ما في حل غير ... نشكّو .... و نوزعو من جديد .....
الدقسة الانت واقع فيها يا معلّم (انت وتراجي واوباما وكلوني وناس المتحف) هي إنو السودان (اولريدي) اتشك واتوزع من جديد.. ولعلمك قيم التعايش والتآخي والسلام (ورقا) طلع أسمح من (ورقكم) والأيام حاتوريك.
Post: #94 Title: Re: عامي الأول في السودان.. عام الرمادة Author: عبد الله عقيد Date: 02-02-2008, 04:37 PM Parent: #1
سلامات يا معتصم دفع الله أشواقي لكم لا توصف والله وحمدا لله على سلامة تامبا الفتاق دا جابو ليهو كرسيكم الكعب داك.. ما غيرتو الكرسي؟!
Quote: أحكي عن الممغوصين والمحرومين .. أحكي عن الفساد ومعذبي العباد .. أحكي عن الملاريا التي تحصد الأرواح والأيدز الذي أصبح مخيفاً ..
أول حاجة لقيتا ليك لمن قعدت شوية، لقيت في حالة عدم اهتمام جمعي، الناس ما مهتمة بأي حاجة الموت ما عندو قيمة، والعرس ما عندو يوم مخصص في الأسبوع ولا في الشهر ولا في السنة.. زمان العقد كان الساعة 5 يوم الجمعة، والحنة يوم الخميس العرس في المولد، العيد، العاشر من شنو ما عارف.. الكلام دا راح، تلقا عرس يوم السبت وعرس يوم التلاتاء وعقد صلاة الضهر وعقد الصباح.. الملاريا، الأيدز الأمراض المشاكل.. شرحو. مافي زول مهتم بي كلام زي دا، الواحد تقول ليهو اعمل حسابك مثلا إنو ياخ نسبة الأيدز في الجامعات قالوا مرتفعة.. كأنك بتتكلم مع حيطة. والناس بتقد تفسد مع بعضها البعض، دا ياكل دا.. حياة حيتانية، وناس تانية عايشة في قوقعة قافلة على نفسها، في عدة قواقع واحدات بلورية تشوف الناس جواها بس ما بتقدر تلمسهم، ديل برضو ما مهتمين، في ناس غرقانة للطيش، في المرض في الفساد في الفقر.. (بالمناسبة الملاريا نسبتها انخفضت بشكل واضح، فيما ارتفعت نسبة الأيدز).
محبتي
Post: #95 Title: Re: عامي الأول في السودان.. عام الرمادة Author: عبد الله عقيد Date: 02-03-2008, 01:20 PM Parent: #1
محمد سليمان
Quote: .... زي شكة آل تكريت .... ود عقيد إنو جلابي و إنو جلابي جعلي و عينو مكسورة دي حاجات موثقة في المنبر دة ....
أسيادك الـ شكّوا آل تكريت بيفتشو لي طريقة يتخارجوا من ورطتم دي ما قادرين، وانت أعلم بعدين العينو مكسورة منو فينا؟ أنا لا زلت أرفض دخول القوات الدولية بأي مسمى كان.. وأكتب ذلك داخل البلد وعلى صحافتها المتداولة بالداخل.. وليس كما كنت أكتب وأنا في الخارج. أما أنت، فاشتهرت بالتراجع والانقلاب بين لحظة وأخرى.. تاريخك محفوظ هنا في المنبر (لو ما مسحتو) خاصة تأييدك وجريك وراء مناوي وموافقتك على اتفاقه مع الحكومة وتبريرك له وشتائمك للحركات غير الموقعة على أبوجا.. ولكنك انقلبت 180 درجة ضد كل هذه القناعات عندما أتتك الأوامر بذلك وسخرت (كيبوردك) لانتقاد مناوي وأبوجا والإشادة بالتمرد الذي عدت إليه مهرولا.
الفرق بيني وبينك يا محمد سليمان هو إنك حاقد.. مليان غل وحقد علي وعلى عشيرتي بمن فيهم جني. لكني أقسم لك أنك ستظل (منحشر) في حفرتك دي تأكل نفسك غيظا لأن أوهامك في (شكة تكريت) لن تحقق بإذن واحد أحد.. وإن تحققت يا محمد سليمان حبابا عشرة.. بس يا ريت تكون انت حاضر وواقف في (الصقيعة) زي ما نحن واقفين، ما تراقب من حفرتك تحت حماية أسياد الأمريكان.
Post: #96 Title: Re: عامي الأول في السودان.. عام الرمادة Author: عبد الله عقيد Date: 02-03-2008, 01:43 PM Parent: #95
احمد حنين سلامات
Quote: ود عقيد يعني ما نرجع كلو كلو
انت بالذات ترجع، لأني عايز انتقم منك حقي وحق عبد الرازق الطالب بما انوي اكتسابه من مهارات (سودانوية جديدة).. بعدين لو انت ما رجعت منو الحيرعى مصالح المهمشين هنا..؟
الخال حمزاوي سلامات ومسكاقمي هسي إنت بي نشاطك الجماهيري دا لو جيت هنا ح تترشح لزعامة الهلال زاتو بدل نجوم كرمة.. تعال انت وانا أضمن ليك مقعد في الاتحاد العام.. سيبك من الصالحية المبنية على أرض ناس تانين.. تتذكر صديق الموج قال الأولاد في افتتاح إحدى الدورات في الصاحلية قالوا النشيد: (هذه الأرض لنا).. قال ليهم والله الجماعة يسمعوكم تقولوا كدي إلا يرحلوكم هسي دي. أنحنا هنا يا حبيب بنقولا بي قلب قوي (هذه الأرض لنا).. بعد داك إن شاء الله (نسف ترابا).. بدل سفة الرياض (بالمناسبة أنا خليتا هناك وجيت الحمد لله).
لك المحبة
Post: #97 Title: Re: عامي الأول في السودان.. عام الرمادة Author: walid taha Date: 02-03-2008, 01:55 PM Parent: #1
ود عقيد.. قلت أسلِّم بس
Post: #115 Title: Re: عامي الأول في السودان.. عام الرمادة Author: عبد الله عقيد Date: 03-07-2008, 03:09 PM Parent: #97
حبابك عشرة يا وليد وتحياتي لاصحابك والمعاك
Post: #98 Title: Re: عامي الأول في السودان.. عام الرمادة Author: عبد الله عقيد Date: 02-04-2008, 06:27 PM Parent: #1
معليش يا اخواننا أتأخرت في الرد على مداخلاتكم والله المواصلة صعبة خلاص..
الحبيب حسن البشاري لك التحايا
Quote: متابعبن انطباعاتك، واحمد لك قدرتك على مواصلة التحدي وعدم الاستسلام..
يتخيل هي مسألة زمن يا ابو علي وطبعا الزمن هنا في السودان بيتمطا شوية عشان كدا لم أستسلم بعد. وإن شاء الله لن أستسلم.. الكتابة دي زاتا أدتني بوش كبير.. كأنها استشارة أو تفكير بصوت عال.
لك المودة
Post: #99 Title: Re: عامي الأول في السودان.. عام الرمادة Author: Salah Abdulla Date: 02-04-2008, 07:11 PM Parent: #98
الأخ عبدالله
حمد الله على السلامة كلامك سمح وواقعي جداً ، أنا شخصياً استفدت منو جداً جداً تعرف أنا مقتنع إنو (العرجاء لي مراحها) عشان كده تعودت أن أشد رحالي وأسرتي الى السودان مرتين في العام أندعك ، وانسحق ، واتمرمط ، وأضحك ، وأمشي البكيات والأعراس ، وأزور الناس أعيش تفاصيل حياتي وكأنني مقيما هناك أبدا ثم أتنفّض ، واستغفر ربي ، وأعود من حيث أتيت يشهد الله أن كلامك زاد قناعتي في الرجوع (النهائي) أن تحاول عمل شئ هناك وأنت في هذه السن ، خير من أن تعود اليها وأنت (سقط متاع) حيث لا حول لك ولا قوة على المدافرة والمعافرة ، وقلع حقك وحق عيالك لكن الاشكال بيبقى دايماً في (زاد الرجعة) ومصدر أكل العيش هناك ، وسط الغيلان والتماسح والقلاعين والحبرتجية ، وأهل الايصالات الرسمية والقلع المنظم وشرعي ومختوم لكن في الآخر نقول ، لا بد مما ليس منه بد منتظرين نكمل لياقتنا ونكون جاهزين ، وبعدها نتوكل على الحي الذي لا يموت ثم ، العودة النهائية وحالف وصلتي هناك ما أقول لي زول رسل لي زيارة والا طيارة .. موت موت ،، حياة حياة .. خالص الامنيات لك بالتوفيق وأرجو أن لا تحرمنا من سردك الجميل ، وتبصرتنا بحال البلد ومآله..
Post: #110 Title: Re: عامي الأول في السودان.. عام الرمادة Author: عبد الله عقيد Date: 03-04-2008, 04:05 PM Parent: #99
Quote: وأرجو أن لا تحرمنا من سردك الجميل ، وتبصرتنا بحال البلد ومآله..
صلاح عبد الله وديني وأيماني الجميلة هي مداختلك دي.. لك تحياتي وتقديري ... ما ثبت (شرعا) في هذا البوست من تأخر في الردود وابتعاد لفترات طويلة عن المنبر هو واحدة من (حاجات) السودان.. البتخليك تتحسر على (المهلة) التي كانت متوفرة لك في الخارج.. هنا جري شديد خلاص. (دا اعتذار مغلف طبعا لأني كتّرت الاعتذارات) واعتمادي على جمال تقبلك
ولك المودة
Post: #100 Title: Re: عامي الأول في السودان.. عام الرمادة Author: عبد الله عقيد Date: 02-05-2008, 01:11 PM Parent: #1
هضيبي علي سعيد لك التحايا
Quote: رغم تزامن عودتي مع عوتك إلا أنني أظن حظيت بقدر من التوفيق هنا مقارنة بالوضع هناك لا بل تمنيت لو عدت من زمان ..
زي ما قالوا الجماعة الحكاية نسبية وفردية، دا في المستوى الشخصي، وهو يؤثر كثيرا على النظرة للوضع العام، لكن تظل المعاناة في جوانب الصحة والتعليم وجيوب الفساد التي عمّت بشكل مخيف.. وفقنا الله وإياك
Quote: أتمنى أن ألتقي بك ....
من يوم مداخلتك دي.. أنا أرفع راسي واختو.. منتظر طلتك، ودربي ظااااهر ما بودر يا هضيبي. بس خُت في بالك قصة المعيدي.. (أن تسمع به خير من أن تراه)..
لك مودتي.
Post: #102 Title: Re: عامي الأول في السودان.. عام الرمادة Author: عبد الله عقيد Date: 02-05-2008, 03:50 PM Parent: #100
الحبيب المهندس أبو بكر لك التحايا جيتك صاد
Quote: لو كتبت تجربتك لفعلت خيرا كثيرا
احكيك ليك الحكاية دي.. بعد ما جيت بأيام علمت ان الاتحاد العام للصحفيين أعاد فتح الفرصة للتسجيل في منازل الصحفيين.. والمطلوب هو بطاقة عضوية الاتحاد، قيد صحفي، ومبلغ 6 مليون قسط أول، يتبقى 20 مليون بأقساط مريحة. طلعت البطاقة بي 60 جنيه تقريبا.. وقدمت باقي الأوراق. ومشيت سددت 3 آلاف (3مليون)، على أن اكمل الباقي فيما بعد.. الكلام دا شهر 2 سنة 2007.. قبلي في ناس سددوا 6 مليون عددهم حوالي 500 أو يزيد.. استمرت المماطلة من صندوق الإسكان الشعبي ومعه الاتحاد حتى نهاية العام.. شهر واحد قالوا خلاص يا اخواننا ح نبدأ القرعة.. لتسليم 600 بيت، والناس الدافعين 6 مليون عددهم 551 نفر تقريبا.. وعملوا مؤتمر صحفي.. في المؤتمر الصحفي علمت أن مبلغ الـ 26 مليون لا يشمل الصرف الصحي !!! ولا إدخال الخدمات، كهرباء وموية!!!!؟؟ الجِن ركِب فوق راسي.. وقعدت أضرّب.. تعال نضرّبا مع بعض (وانت سيد العارفين).. المنزل مبني في أرض خلاء أقصى شرق الخرطوم بحري.. مساحته 400 متر مربع.. يعني قيمة القطعة هناك تساوي بين 1 - 2 مليون. المباني من البلوك.. حيشان مشتركة، غرفة واحدة في الوسط وغرفة أخرى مشتركة مع غرفة الجار.. السقف زنك.. وبس من خبرتي في بناء منزلي.. (الطوب الأحمر أغلى من البلوك).. مبلغ 5 ملايين كاف لبناء هذا المنزل.. قول 6 أو 7 على أعلى التقديرات.. يعني المنزل بقطعة أرضه يكلف 7 إلى 9 ملايين.. طيب الناس ديل ماسكين 6 ملايين من حوالي 600 نفر لمدة 12 شهر في المتوسط.. (ضرِّب) 3 مليار وستمائة مليون جنيه (بالقديم) يعني 3 مليون و600 ألف جنيه بالجديد يعني حوالي 1800000 مليون وتمنمية ألف دولار أها يا باش مهندس القروش لمدة سنة قاعدة في خزينة الصندوق.. بتطلع كم لو تم استمثارا.
بعد كدا قالوا الواحد يدفع 6 مليون عشان الصرف الصحي.. مقدم مليون ومائتين ومؤخر يضاف للأقساط. والما عايز صرف صحي (يحفر) ادبخانتو براهو. الأقساط حوالي 200 الف شهري..
أنا لقيت أمامي خيارين.. إما أن أتحامق مع الاتحاد والصندوق (واطلع غلطان) أو أسحب قروشي وأقول (يا حيطة ضاريني).. وفعلت السهلة منهما.. أما بقية الزملاء (المساكين)، فذهبوا متلهفين.. فهم لا يملكون خيارا آخر كما أملك. ولكنهم بدأوا الآن (النقنقة).. في حاجات تاني في موضوع بيوت الصحفيين دا بتكلم عنها بعد اتأكد منها..
هذا مع العلم أن اتحاد الصحفيين يفترض أنه نقابة تمثل الصحفيين وتسهر على خدمتهم..
أها تجي ولّا نجي!!
Post: #103 Title: Re: عامي الأول في السودان.. عام الرمادة Author: tariq Date: 02-05-2008, 04:39 PM Parent: #1
عبدالله ،، اصبر واحتسب ..
Post: #104 Title: Re: عامي الأول في السودان.. عام الرمادة Author: صديق الموج Date: 02-05-2008, 06:19 PM Parent: #1
Quote: عامي الأول في السودان.. عام الرمادة
ود عقيد ود عمى الضو كيف حالك على بالطلاق الكان زمان بشوف دفاعك عن حكومة السجم والرماد فى المنبر ده يقول تكون لامى الليلة استلمت لاندكروزرك وعمارتك ده بالميت كده ، ده اذا ما كان معاهم فيلا رئاسية... هذه يا اخى الكريم مجرد ابتلاءات ،محض امتحانات..لاغير عبد الله اخوى وكتين ناسك البوم ديل كانوا بكتلو فى وليداتنا فى الجنوب وفى العيلفون وبقولو ليهم ربح البيع وابشرى ام الشهيد،ولاحظ ديك فقدو ارواحهم مش اكلو قريشاتهم زيك، وكنا وقتها نحارب هذا الدجل والاستغفال وبيع الدماء رخيصة ،كنتم تنعوتنا بالمعارضين والمندسين والطوابير الخامسة دحين يا ود عمى اركز... اللهم ربى لا شماتة... ابشروا فقد تحول ود عقيد الى صفوف المقاتلين باضعف الايمان وفى كل خير. ابن عمى دحين ماشين على صناديق الانتخابات سويناها ليك فى زمتك توعى الغافلين لى هسع البقولو ليك الانقاذ طلعت البترول وسوت الشوارع ،وناسين انو الانقاذ طلعت .......الشعب،والنقط دى تمها حيث تقف انت الان.. اللهم ارفع المعاناة عن كاهل الشعب السودانى الطيب.. اللهم لاتؤاخذنا بما فعل السفهاء منا يارب العالمين،،،،
Post: #106 Title: Re: عامي الأول في السودان.. عام الرمادة Author: عبد الله عقيد Date: 02-06-2008, 03:14 PM Parent: #104
ابن عمي المعارِض المندس الطابور الخامس ابو حيدر سلامات ومشتاقين
Quote: مش اكلو قريشاتهم زيك،
أول حاجة مافي حكومة اكلت قريشاتي ما تدخلني في مشاكل ساكِت يا زول. انا زعلان عشان ما لقيت اللاندكروزر والعمارة.. بعدين انا عارف انو
Quote: هذه يا اخى الكريم مجرد ابتلاءات ،محض امتحانات..لاغير
ومقتنع تب..
Quote: دحين يا ود عمى اركز... اللهم ربى لا شماتة...
راكز تب.. هسي انا جبت ليكم سيرة (كشف) ولّأ فيزا؟! ابن عمك لمن فارق هيلمانة وراحة وقروش.. وجا يبحت هنا عارف الراجيهو شنو.. (بس ما قايلو للدرجة دي يعني).. المهم هي الحكاية فضفضة مع الحبايب والأصدقاء ومناقشة أنا براي استفدت منها والله.. أما أنتم أيها المعارضون الأوغاد فتريدون الاصطياد في الماء العكر وأن تصنعوا من الحبة قبة.. بالمناسبة.. وهم معارضة وبتاع دا برضو من أوهام ناس برة..
Quote: ابن عمى دحين ماشين على صناديق الانتخابات سويناها ليك فى زمتك توعى الغافلين لى هسع
يا زول اطمنك تب.. مافي غافلين في السودان، الناس دي كلها عرفت ظاهر الأمور وباطنها واتأقلمت مع الأوضاع وبقت ناس معايش.. هسي الانتخابات دي بيتكلموا عنها ناس بالعدد في السودان.. وباقي الناس الواحد تقول ليهو الانتخابات يرفع راسو بي كسل كِدا ويقول ليك (آاااااأ..ا؟)
رديت عليك بسراع لأنو عارف ما عندك صبُر يبل الآبري.. ومعليش يا شباب
Post: #105 Title: Re: عامي الأول في السودان.. عام الرمادة Author: عبد الله عقيد Date: 02-06-2008, 01:15 PM Parent: #1
عمر الفاروق سلامات والله بقيت استحي لمن ارد على مداخلة بعد الفترة دي كلها.. بس العتب مرفوع يا اخواننا
Quote: رجع السودان وقعد شهرين لا شغل لا مشغلة ..
انا طبعا قبل كدا رجعت وقعدت 4 شهور.. لمن بقيت اشوف ليك الخمسة آلاف دي كتيرة كترة!! واتسلفت ورجعت بس عاهدت نفسي إني ما أزيد في سنتين.. وبالفعل أوفيت بوعدي ورجعت بعد سنتين. المرّة دي.. ما بشد السلك.. (ما تخافو) بس لو لا بدّ من الشيرنغ أعملوهو لزوم الـ (سبّورت) على شرط اللجنة بتاعة الدعم تكون برئاسة حميدة.. عشان ما تقوم ليها قايمة زاتو.
ابن عمي الزعيم احمد عبد الله تحياتي
Quote: كلما داهمك الملل تيمم شطر الحليلة تزود منها بالامل و عد الى عملك ..
انت قايل شطر الحليلة دا هيّن.. ؟ حق مواصلات، وحق كرتونة، وحق الغمتة، وحق التلاتاء (السوق) يعني بدل أتزود بالامل ح أتزود بالديون.. خليها على الله يا شيخ
مودتي تربيع
Post: #107 Title: Re: عامي الأول في السودان.. عام الرمادة Author: عبد الله عقيد Date: 02-08-2008, 10:41 AM Parent: #1
أخي العزيز العمدة قرشو لك التحايا
Quote: وجدت بوستك هذا وبينى وبين العودة مرمى حجر وقد كنت اظنك من المرتاحين هنالك وكانى متيقن بأنك تملك عملا تجاريا ممتازا وقد سبق ذهابك وانه لن يحوجك للوظيفة حتى ولكنى ذهلت من معلوماتك واعتبرها جديدة تماما .... ترى ماهو حال شخص لا يملك بيت ولا قطعة ارض ولا جلد تمساح ؟؟؟؟؟
كنت قايل القبة تحتها فكي يا عمدة؟ انا كنت مصرا على العودة بدون (قروش) لأني (ضرّبتها) وشاهدت تجارب من سبقوني وجمعوا أموالا طائلة ثمنها عمر أضاعوه في الغربة.. فانسابت هذه الأموال من بين أيديهم بطريقة (سحرية).. كلهم يقول لك لا أعلم كيف (طارت).. بعضهم طار معها عقله أو طارت معها صحته أو طار هو عائدا من حيث أتى ليقضي بقية عمره في الغربة بين الحسرة على ما فات والبحث عن ما يعوض به.. أحد أقربائي عاد برأس مال يفوق الـ 200 مليون ومنزل فخم، وبدأ عملا تجاريا توفرت له فيه كل المعينات.. وأخذ يؤدي دوره الاجتماعي الذي يطمح له كل مغترب، من إعانة الضعيف والمحتاج وإغاثة للملهوف ومشاركة اجتماعية (فل أوبشنز).. وجد له (الجماعة) مدخلا عبر نقطة ضعفه، وهي البحث عن الولد، فهو لم ينجب بعد، وأخذوا يزينون له الذهاب لفلان وتجريب علان من الدجالين والمشعوذين.. حتى تسربت أمواله واضطر أن يبيع بيته ليسدد ما تبقى له من ديون ويعود أدراجه لغربة قضى فيها من قبل ما يتجاوز العشرين عاما.. هذا واحد من عشرات بل مئات المغتربين الذين ابتعلت هذه (الهوّة) مدخراتهم بلا رحمة. أخوك عرف حلّها.. قلت لي نفسي ما دام السودان دا بيجيك (متشمّر) تعال ليهو (عريان). وبالفعل.. انتهيت من بناء الأجزاء الأساسية في المنزل، وتوكلت على وجه كريم.. وجيبي ما فيهو فرطاقة.
Quote: ولكن يا زول شد حيلك قريب انا بكون معاك والزارعها الله فى الحجر بتقوم ...
تعال زاملني بالقاعدة دي.. الزارعا الله في الحجر بتقوم.. وفي انتظارك يا حبوب ولك تحياتى ومودتى
Post: #113 Title: Re: عامي الأول في السودان.. عام الرمادة Author: ALHALAWI Date: 03-04-2008, 06:17 PM Parent: #1
الأخ عبدالله عقيد تحياتي ، مع دعواتي لك بالتوفيق ... تجربتك ثرة وهي درس لجميع من يسعى في نفس طريقك وأنا منهم... طلبت مشورة الزملاء بخصوص موضوع العودة النهائية ولم يقصروا معي. بعضهم (مشكوراً)احالني عليكم للاستزادة. المسألة تهم شريحة كبيرة منكم، لذلك أطلب منكم النصح والمشورة "عاجلاً" أنا معاك متابع
