حزب أمة جناح البغلة في الإبريق

التحية للأقلام الصحفية الناقدة لسياسات الحزب من داخله
أخص بالتحية
خالد عويس
لنا مهدي
(ترتيب الأسماء حسب العمق النقدي)
النقد هو الترياق الناجع في محاربة سوسة انهيار أي بناء
هو الفريضة الغائبة في مؤسساتنا السودانية، بل في ثقافتنا عموماً كسودانيين، لذلك معظم مشاريعنا، الشخصية والعامة، تنهار في لحظات.
الكيزان ديل كان عندهم فرصة ذهبية يحكموا السودان ليوم الدين، برضى واستكانة أغلب أهله (القانعين من خيراً في حكومات ديمقراطية خبروها أكثر من مرة) فقط لو احترموا فضيلة النقد، لكنهم فضلوا عليها الغتغتة وسياسة الترهيب والترغيب فوصلوا لما هم فيه الآن من عجز
لن ينصلح حال حزب الأمة لو تراجعتم وآثرتم السلامة واكتفيتم بالصمت والإنصات للخطبة والهتاف حال فراغها "الله أكبر ولله الحمد"
لن يكون الأمر سهلاً لكن دا دوركم كشباب، وفي الآخر ستكسبون أنفسكم واحترام الجميع بما فيهم أعدائكم.
لكما التحية مجدداً

Quote: حزب أمة جناح البغلة في الإبريق

غايتو دي بالغت فيها يا اشرف الحلبي.

أم حازم سلامات
زي ما عارفة فكرة المجتمع الروحي عندنا موجودة في كل المؤسسات، من الأسرة الصغيرة لحد الحزب والحكومة نفسها، عشان كدا لما تظهر أصوات قوية زي لنا وخالد وفي مؤسسة عريقة السلطة الروحية زي حزب الأمة دا دليل عافية يخلينا نحلم إنو بعد كم سنة كدا حزب بثقل الأمة ممكن يكون مؤسسة ديمقراطية
طالما فشل حلمنا (كتقدميين) بانهيار الأحزاب (الرجعية) .
تحياتي لجوز الحلب العندك

الحبيب أشرف

تعرف التنظيم أمانة و الكلمة شرف و أمانة و الحزب و كل الأحزاب وسائل لترقية المجتمع و النهوض بالبلاد و إيجاد حلول لمشكلاتها و ليست غايات نتمترس مبررين اخطاءها و المشكلة أن خالد أخي الحبيب و أنا صحفيون
ولطالما نجاهد لكي لا يطغى الحزبي على الصحفي وأمانة ومهنية العمل الإعلامي
لك التقدير و الشكر على كلماتك الطيبات
وسنظل نقول البغلة في الإبريق
لنا

أستاذة لنا سلامات
يا ريت تواصلوا قول "البغلة في الإبريق" رغم إنها دي مهمة شاقة في مؤسسة لا زالت تتمتع بسلطة روحية
بقول ليك مهمة شاقة لأني كنت قريب من حدث مماثل في القاهرة نهاية الألفية السابقة، أكيد سمعتي بيهو، طرفه شاب من أميز شباب حزبه في الوقت داك، كل جريرته أنه بدأ كتابة مقال من حلقات بجريدة الخرطوم ينتقد فيه –بكل أدب- قيادة الحزب في التجمع وموقفها من مقررات أسمرا، في نهاية الحلقة الأولى والثانية كتب "نواصل" لكنه لم يواصل حيث كان وقتها بسجن الترحيل في طريقه للسودان متهم من القيادة بالتخابر مع سفارة النظام في القاهرة!!. ولو لا تدخل عقلاء ونافذين في الحزب وتحويل الإبعاد لسوريا بدلاً عن السودان لوصل لأيادي الإنقاذ التي كانت في ذلك الوقت في عز شراستها في التعامل مع المعارضين.
بالتوفيق ولك التحية مرة أخرى

عزيزي أشرف
شكرا لك على هذه الكتابة التي والله لا نستحقها.ما نقوم به هو واجب نؤمن به، من أجل غد أفضل، لن يتحقق ما لم نناضل داخل أحزابنا لنغيرها.
ساندونا بأقلامكم الناقدة الموضوعية.ساعدونا بطرح رؤى تعمق رؤانا، لأن الحصيلة كلها ستكون:عافية الوطن.

العزيز اشرف الحلبي

Quote: تحياتي لجوز الحلب العندك

الحب العندي بيسلموا عليك
وقالوا لك تعبنا من تهميش ماما لينا وسكها لقضايا المهمشين تعال نأسس لينا
حزب الحلب جناح البغله في الابريق


التحيله لخالد عويس ولنا مهدي رغم محاولاتها التبريره الاخيره.
قال استخبارات عسكريه قال!!

Quote: التحيله لخالد عويس ولنا مهدي رغم محاولاتها التبريره الاخيره. قال استخبارات عسكريه قال!!

وحات الله لا تبرير لا شي كل ما حصل أن الأمانة الصحفية تقتضي إيراد كل تداعيات الحدث طالما وقعت في يدي و لمن استوثقت من الداخل أنه في الأمن كتبت بدون تردد مكررة إدانتي التي ثبتها في كل البوستات التي سبقت بوستيني الخاص بعمله في الاستخبارات..
تحية للحبيبة تراجي وللحبيب أشرف مثلها

أستاذنا خالد
بل يستحق أكثر من هذه الحروف من اختار حفر الصخر بأظافره لشق طريق.
التحايا مجدداً

الظاهر يا تراجي حكاية حزب الحلب دي بقت لازمة بعد دا!
قبل فترة لمحت لي بوست عنهم يتساءل صاحبه "من أين أتى هؤلاء"!!
فتأملي!!
الزول دا أدوا راسوا وقولوا ليه الحلب ديل لسانهم مسنون أكتر من السكاكين البسنوها ليكم في عيد الضحية!!


معاك أحيي لنا وخالد
تسلمي يا ستي

Quote: الظاهر يا تراجي حكاية حزب الحلب دي بقت لازمة بعد دا! قبل فترة لمحت لي بوست عنهم يتساءل صاحبه "من أين أتى هؤلاء"!! فتأملي!! الزول دا أدوا راسوا وقولوا ليه الحلب ديل لسانهم مسنون أكتر من السكاكين البسنوها ليكم في عيد الضحية!!

يا اشرف
قاسم المهداوي بيهظر معاكم وبينكش في الحلب اصلا شاف الضغط زاد على الآخرين
رغم انه المنشفين ريقهم ما الحلب و لكن المتحولبين



ودي على وزن ما الجلابه ولكن المتجولبين
وما الترك ولكن المتوركين

Quote: رغم انه المنشفين ريقهم ما الحلب و لكن المتحولبين

طيب ياخ ديجانقو دا ما يفرز!!

معليش يا خالد ولنا أنا وتراجي قلبنا البوست بتاعكم محلبة

مجدداً لكما التقدير