مرثية للراحل المبدع الرائع (بدر الدين عجاج)

روحك الطاهره النقية
ما بحق ليها الزوال
كن عاوز اقول
كلام
لكنو اه ضاع في الخيال
بين سكة الشوق والشوف
الصبح من بعك محال
وانكشح الحزن في القلب
ودار
اسود بياض نهارنا حداد
وبرضو كنت عاوزك تجاوب
عن سؤال؟
مين غيبك غدر ؟
واتزكرنا وكان مالينا
حزن
رنة الوتر بين دقة اصابعك
وكيف كانت الالحان بين ايديك
اورقن صدح طرب
ودوزن علي الخماسي
وانبت نها وناسي
شائلين حس جمال سيرة
فنك
بنات عجاج..
ومين عجاج ؟
هو من ناضل يالاصابع
نغم
وانحاز بي فنو لي هم
الغبش
وتاته بالغناء احلام
الصغار
وهدهد بالموسيقى جرح
الوطن
الاتشرد منو كم زمن
وصادم فيهو رياح الظلم
محاصر بالقواسي
لمن انشرخ صوت موسيقة
غناه شجن
وقاسيت في البعاد
ليل الغربة محن
وجيت راجع فارد جناحك
للوطن
لكن غدروك الكلاب
في وحدتك
ومشيت للموت مطعون في
الضهر
ولسه ما كمل مشوار
سكتك
وبس ارقد بي سلام
في حضرة الملكوت
هناك
وجاينا حس اورقنك
من البعاد
ومسكونة بيك دواخلنا
فن
ودمك النقي مابروح هدر
وبرضؤ برجع تاني للسؤال
مين غيبك ؟
غير عدو الفن والوطن

9/1/2008
متاوقة
مناسبة القصيدة امبارح بالليل
كنا في جلسة ونسة في ركن الشارع
وجات سيرة الراحل الرائع في الونسة
وقام الصديق بدوي مهدي اتكلم عن الراحل
وختم كلامو باول القصيدة ( روحك الطاهرة
النقية ما بحق ليها الزوال كنت عاوز اقول
كلام لكنو اه ضاع في الخيال )
والصباح كملت باقي القصيدة

*

*

*

*