دينــــــــــا عجاج...رحل الخال...بعد غياب طال......

دينــــــــــا عجاج...رحل الخال...بعد غياب طال......


01-08-2008, 10:04 PM


  » http://sudaneseonline.com/cgi-bin/sdb/2bb.cgi?seq=msg&board=150&msg=1199826286&rn=14


Post: #1
Title: دينــــــــــا عجاج...رحل الخال...بعد غياب طال......
Author: Mohamed Ahmaed Olyesh
Date: 01-08-2008, 10:04 PM
Parent: #0

انا لله وانا اليه راجعون
دينا....
ياحليلو الباسم الضاحك....
قبل الرحيل بيومين فقط اتصلت البيت ومن دون سب سألتني امي
ياولدي خالك بدر الدين جاء من الغربه دحين اضرب حمدل ليهو السلامه
جدا يا امي...بالله هو كيف؟
والله ياولدي مااتغير كلو كلو....ياهو لاقيتو بي ضحكتو العريضه ديك...وسالمتو وسعلني منكم كلكن.....
يا سلام يا امي بتذكر زمان لما كنا صغار..وكنت دايما بتمشي يوم الجمعه الثورة الحارة الرابعه..تسلمي علي بنات ست النفور..وانت راجعه تغشي ناس نوال وبدر الدين في الرابعه وتجي مغبرة بالفرحه وتحكي لينا لاقيتيهم كيف؟؟
فجاة..رحلو من الرابعه ومشوا الفتيحاب...وكانت نانسي اكبرهن وتليها نسرين ونهي ...غابو جميعا لفترة ثم الي هجرة طويله المدي...
انقطعت اخبارهم مع السنون والغربه...ولكن لم ينقطعوا يا دينا من السؤال علي الاهل الطيبين...
كنت فرحا بقدومهم للسودان...وكنت فرحا..عندما سمعت نانسي تغني وبعض الاصدقاء بالمنبر يمدحونها بجماليات صوتها العذب..وان لها مستقبل مشرق...
كنت فرحا اكثر وفخورا بابنة الخال وفرحا بانه علمها درب لفن الشائك وقد اجتازته بصوتها...
كانت امي يا دينا...كلما تسمع مسيقي الاورغ القديم والمعروف لديها تذكرنا بانه بدرالدين عجاج...وكانت في كل مرة تسال الله له بالعودة غانما ومتماسكا وقويا بصحه وعافيه...
الجميع يبكي بدر الدين لانه لم يجلس طويلا بعد ان فرح الجميع بعودته...
سمعت اصوات المناحه...
حسيت الحزن...من بكاء ونحيب امي وتخيلت المشهد...
البكه فينا جميعا دينا
البركه في الجميع
وانه لفقد عظيم

محمد عليش

Post: #2
Title: Re: دينــــــــــا عجاج...رحل الخال...بعد غياب طال......
Author: Haydar Badawi Sadig
Date: 01-08-2008, 10:17 PM
Parent: #1

البركه في الجميع
وانه لفقد عظيم

Post: #3
Title: Re: دينــــــــــا عجاج...رحل الخال...بعد غياب طال......
Author: Mohamed Ahmaed Olyesh
Date: 01-08-2008, 10:29 PM
Parent: #2

شكرا جزيلا اخي حيدر
لاتدري كيف احزنني موت هذا الرجل الطيب
وبقدر حزني عليه حزنت لحال بلدي الذي اصبح فيه القتل من الاساسيات لمواكبه عصر العولمه..
باي ذنب قتل؟؟؟
ولماذا هو بالذات؟؟
لم يكن من اصحاب الاموال الطائله ولا الغني المترف....
رجل كل همه ان يعيش في فنه وان يعيش متواضعا باسرته الجميله...فقتلوة...
قتلوة...
شكرا
حيدر

Post: #4
Title: Re: دينــــــــــا عجاج...رحل الخال...بعد غياب طال......
Author: Muna Khugali
Date: 01-08-2008, 10:36 PM
Parent: #3

Quote: البركه فينا جميعا دينا
البركه في الجميع
وانه لفقد عظيم



ايوه والله يا عليش..
بجانب فنه..
كان زول مهذب ولطيف جدا..

Post: #5
Title: Re: دينــــــــــا عجاج...رحل الخال...بعد غياب طال......
Author: Mohamed Ahmaed Olyesh
Date: 01-08-2008, 10:54 PM
Parent: #4

شكرا مني خوجلي
بدر الدين كان كن زمن مهموم بالموسيقي وتطويرا
بتذكر لما نمشي ليهم في البيت ونحن صغار
دايما قاعد في الاورغ..واول مايسمع صوت ضيوف يخلي الاورغ فاتح ويقيف لبرهه من الزمن ويرجع يعزف احلي نغمات
البيت ملان موسيقي واحساس فني كبير....بيت مرتب بشكل فني...اسرة متفاهمه باجمل ما تتخيليه...البنات طالعين فن...الله يرحمك خالنا العزيز
الله يرحمك
عليش

Post: #7
Title: Re: دينــــــــــا عجاج...رحل الخال...بعد غياب طال......
Author: مامون أحمد إبراهيم
Date: 01-08-2008, 11:10 PM
Parent: #5

لاحول ولاقوة إلا بإلله ياعليش ,
البركه فينا وفيكم .
بلغ تعازينا لنانسى
وإخوانها ولجميع
الأهل .

الله يجبر كسركم وينزل عليكم سكينه وطمأنينه ويقين ,

ببركة هذا الليل البهيم , ويشيل عنكم كل حزن وكل هم .

آمين يارب العالمين .

Post: #12
Title: Re: دينــــــــــا عجاج...رحل الخال...بعد غياب طال......
Author: Mohamed Ahmaed Olyesh
Date: 01-09-2008, 07:11 PM
Parent: #7

Quote:

ببركة هذا الليل البهيم , ويشيل عنكم كل حزن وكل هم .


وربنا ما يوريكم حزن
اللهم ارحمه واحسن اليه يارب
شكرا صديقي مامون

Post: #6
Title: Re: دينــــــــــا عجاج...رحل الخال...بعد غياب طال......
Author: سمندلاوى
Date: 01-08-2008, 11:08 PM
Parent: #1

والله منذ سماعى الخبر لم ينم لى جفن
هنا ودعته بكلمة حزينة

كـلمة حزينة فى وداع موسيقار كبـير" بدرالدين عجاج"

Post: #13
Title: Re: دينــــــــــا عجاج...رحل الخال...بعد غياب طال......
Author: Mohamed Ahmaed Olyesh
Date: 01-09-2008, 07:16 PM
Parent: #6

Quote: والله منذ سماعى الخبر لم ينم لى جفن

ياسمندلاوي..
البركه فينا وفيكم
واعرف تمام مدي حب الناس لهذا الشخص الغريب...بدرالدين لم يكن عازفا فقط ...كان انسان مغرم بحبو للناس ايضا...
تمنيت ان القاهو في عودته ولكن هاهو الاجل ياخذه بسرعه....
وربنا يصبر بناتو وزوجته الحبوبه
...
شكرا سمندلاوي

Post: #14
Title: Re: دينــــــــــا عجاج...رحل الخال...بعد غياب طال......
Author: Mohamed Ahmaed Olyesh
Date: 01-09-2008, 07:30 PM
Parent: #6

Quote:
يا الله كم نفتقدك ..... مازال صوتك يكلمنى
عندما قلت لى انا خلاص ماشى السودان عشان
استقر بى هناك .....و لكن و و....
ااااه ... ربنا يرحمك وينتقم من الذين ازهقوا
روحك الانسان ..قتلوك وظنوا انهم قتلوك ووهموا
انهم سلبوك فنك وشفافيتك وانسانك ولم يدرو ويعو
ان الانسان يذهب بجسمه وتبق روحه واعماله ابديه
فى ذكرى نفوس وقلوب نقية خالصة ووفية ابدية
ماحييت , اراقوا دمك الطاهر وانت الذى حركت الوجدان
تساميا بفنك وموسيقاك ولكن تبين انهم لم يحسو يوما
ما فى حياتهم ولم يرو شيئا جميلا .




كلام معبر سمندلاوي وشكرا تاني
عليش

Post: #8
Title: Re: دينــــــــــا عجاج...رحل الخال...بعد غياب طال......
Author: altahir_2
Date: 01-08-2008, 11:37 PM
Parent: #1

الاخ محمد عليش
والاخت دينا عجاج
لا تحسبوا انكم اكثر حزنا والما على ما اصاب فقيدنا العزيز
بدر الدين عجاج لقد كان اخا وصديقا للجميع
بدر الدين ورغم انه احد ابرز الموسيقيين السودانيين وله
دور كبير فى الموسيقى السودانية كنا نتفق او نختلف لكنه
عاملنا بلطف وتواضع واشركنا فى ادق همومه موسيقا واسريا
ولعب معنا الدافورى وشاركنا مناسباتنا الفنية والاجتماعية
كلما طلبنا منه ذلك .
الجميع فى هولندا ورتودام بشكل خاص متألم بل ومذهول لما حدث
لك ولدينا ولنا الصبر الجميل فى هذا الفقد الجلل
وخالص التعازى لنانسى ونسرين ونهى ومحمد وهشام ونوال
ولكل اسرته
اخوك
ضياء ميرغنى

الاستاذ الموسيقار بدر الدين عجاج يفقد حياته مقتولا فى ش...بالفيتيحاب رحمه الله

Post: #15
Title: Re: دينــــــــــا عجاج...رحل الخال...بعد غياب طال......
Author: Mohamed Ahmaed Olyesh
Date: 01-09-2008, 07:38 PM
Parent: #8

ضياء الدين ميرغني
اولا اعلم تماما ان كل من عرف هذا الفنان حزن عليه وتألم بعد ان انتشر خبر مقتله العجيب
والكل حزين لفقدهم له
والكل فرح بعودته
وسريعا ما انقطعت الفرحه الي زهول ومناحه
الي مت سيموت الناس في السودان بهذه الطريقه الهوجاء
تكررت نفس الواقعه بالفنان (خوجلي عثمان)ومن دون اسباب قتل ...لهما الرحمه
بلغ كل اصدقاء بدر الدين بهولندا الشكر لمواساتهم لنا في شخص بدر الدين عجاج
عليش

Post: #9
Title: Re: دينــــــــــا عجاج...رحل الخال...بعد غياب طال......
Author: Mohamed Elbashir
Date: 01-09-2008, 04:44 AM
Parent: #1


رحمه الله رحمه واسعه بقدر ما أسهم فى وجداننا و ألهمكم أخى محمد و أسرته الكريمه و كل أحبابه الصبر الجميل و حسن العزاء

طاف فى خاطرى أول ما سمعت الخبر المفجع أياما كنا نرجع من مدرسه الحاره الرابعه الأبتدائيه فى طريقنا الى الحاره11 بذلك المنزل المسكون بالطرب ولم نكن ندرى غير أن هذا المنزل للعبقرى عجاج و نتلصص لنرى من أين تخرج هذه النغمات الساحره ليكون ما نراه من أبداع حديثنا طوال فسحه الفطور و تأبى الخطوات الأ التسكع أمام بيته مشدوده بأنغامه الشجيه حتى يوقظنا مرور أحد الأساتذه أو الأستاذات من مدرستنا فنسارع بالفرار على أمل عوده أخرى حتى ولو بمرسال لمواصله لحن أخر.

الا رحم الله الأستاذ بدر الدين عجاج و جعل قبره روضه من رياض الجنان و ألهم اله الصبر و السلوان و أنا لله و أنا اليه راجعون

محمد على

Post: #16
Title: Re: دينــــــــــا عجاج...رحل الخال...بعد غياب طال......
Author: Mohamed Ahmaed Olyesh
Date: 01-09-2008, 07:47 PM
Parent: #9

Quote: المنزل المسكون بالطرب

وهاهو قد رحل تاركا كل الفرح لاولاده وتاركا حب الناس اليه
تاركا ابتسامته معلقه علي يافطه منزله
ونسال الله الرحمه
عليش

Post: #10
Title: Re: دينــــــــــا عجاج...رحل الخال...بعد غياب طال......
Author: ALGARADABI
Date: 01-09-2008, 04:54 AM
Parent: #1

خالص العزاء لكم محمد
والعزاء للأخت دينا عجاج
وكل آل عجاج الكرام

Post: #17
Title: Re: دينــــــــــا عجاج...رحل الخال...بعد غياب طال......
Author: Mohamed Ahmaed Olyesh
Date: 01-09-2008, 07:52 PM
Parent: #10

البركه في الجميع قرضابي
وربنا ما يوريكم مكروه في عزيز لديكم
شكرا ودعوات له بالرحمه
عليش

Post: #11
Title: Re: دينــــــــــا عجاج...رحل الخال...بعد غياب طال......
Author: د.نبراس
Date: 01-09-2008, 05:33 AM
Parent: #1

البركه فيكم يا عليش ,,
والله خبر محزن وفقد جلل ,,
وبلد حالا ما يسر ,,

حسيت بوجعتك , وبفقدك ,,
وبغربتك ,,
الله يصبرك ,,

والبركه في نانسي ,,
تغني ليهو ,, ونسمعو في صوتها ,,


رحم الله بدر الدين عجاج ,,

Post: #18
Title: Re: دينــــــــــا عجاج...رحل الخال...بعد غياب طال......
Author: Mohamed Ahmaed Olyesh
Date: 01-09-2008, 08:03 PM
Parent: #11

Quote: والله خبر محزن وفقد جلل ,,
وبلد حالا ما يسر ,,

حسيت بوجعتك , وبفقدك ,,
وبغربتك ,,
الله يصبرك ,,



تسلمي نبراس حال البلد ياهو نفس الحال
لابنصلح ولا شي..
الواحد خايف زاتو كان رجع يلقي الناس كلها ضبحوها قربانا وابتهالا للملك
غربه...
وحزن...
والم...
والله في وسامع
شكرا نبراس
عليش

Post: #19
Title: Re: دينــــــــــا عجاج...رحل الخال...بعد غياب طال......
Author: غادة عبدالعزيز خالد
Date: 01-09-2008, 08:13 PM
Parent: #18

سلامات يا عليش

البركة فيكم والفقد حقيقة كبير
له الرحمة والمغفرة
ولجميع أهله وأحبابة حسن العزاء

غادة

Post: #20
Title: Re: دينــــــــــا عجاج...رحل الخال...بعد غياب طال......
Author: Mohamed Ahmaed Olyesh
Date: 01-09-2008, 09:03 PM
Parent: #19

غادة
شكرا جزيل الشكر
وربنا يتغمضه بواسع رحمته
والله فقد كبير...
ولو شفت اولادو.......؟
مشهد حزين؟
...
...
...
...
عليش

Post: #21
Title: Re: دينــــــــــا عجاج...رحل الخال...بعد غياب طال......
Author: salah malik
Date: 01-12-2008, 07:26 AM
Parent: #20

بِسْمِ اللهِ الرَّحْمنِ الرَّحِيمِ
وَلَنَبْلُوَنَّكُمْ بِشَيْءٍ مِّنَ الْخَوفْ وَالْجُوعِ وَنَقْصٍ مِّنَ الأَمَوَالِ وَالأنفُسِ وَالثَّمَرَاتِ وَبَشِّرِ الصَّابِرِينَ
الَّذِينَ إِذَا أَصَابَتْهُم مُّصِيبَةٌ قَالُواْ إِنَّا لِلّهِ وَإِنَّـا إِلَيْهِ رَاجِعونَ
أُولَـئِكَ عَلَيْهِمْ صَلَوَاتٌ مِّن رَّبِّهِمْ وَرَحْمَةٌ وَأُولَـئِكَ هُمُ الْمُهْتَدُونَ .