Post: #1
Title: والي الخرطوم يمهد لبيع جامعة الخرطوم !!
Author: Faisal Al Zubeir
Date: 01-07-2008, 10:15 AM
| Quote: (الوفاق) : المتعافي : حل الزحام بالخرطوم يكمن في نقل جامعات الخرطوم - السودان والنيلين من مواقعها |
تصوروا!
|
Post: #2
Title: Re: والي الخرطوم يمهد لبيع جامعة الخرطوم !!
Author: اسعد الريفى
Date: 01-07-2008, 11:08 AM
Parent: #1
مسألة تفكيك جامعات الخرطوم - السودان والنيلين
هى دى شغلهم الشاغل الان ..لانو شوف المتر هناك حيكون بكم ..
و بعدين ممكن ينقلوا جامعة الخرطوم الدبيبة .. و جامعة النيلين ام ضوا بان ..
والي الخرطوم يرحب بالاستثمارات الكويتية
|
Post: #3
Title: Re: والي الخرطوم يمهد لبيع جامعة الخرطوم !!
Author: محمد سنى دفع الله
Date: 01-07-2008, 11:22 AM
Parent: #2
والله فكرة مجنونة
تخيل يافيصل ويا اسعد
الناس صحت الصباح
ولقت الحته بتاعة جامعة الخرطوم ولفة النيل
اتباعت وفي باقي موية وتراب
وناس بتشيل وهاك يانقل
بصلحوا في الأرض وبقوها دلجة
والجرس شغال والسعر عالي
وناس بتسأل وين الجامعة ؟؟
واحد شلاقة وشفت برد على الناس
ومعاهو مطويات واوراق وخرط
بوري الناس المكان الجديد التم نقل الجامعة بي نفس بيوته ومبانيها
وشجرة وشوارعها والناس جواها شغالة
وبنفس تاريخها وماضيها وحاضرها ومستقبلها
شوفتا الحرفنة دي مش فكرة
مسرحية ابو استك
|
Post: #4
Title: Re: والي الخرطوم يمهد لبيع جامعة الخرطوم !!
Author: Faisal Al Zubeir
Date: 01-07-2008, 11:24 AM
Parent: #3
وبعدين يرحيوا دماغهم من تظاهرات الجامعات !!!!
|
Post: #6
Title: Re: والي الخرطوم يمهد لبيع جامعة الخرطوم !!
Author: عاطف عمر
Date: 01-07-2008, 11:50 AM
Parent: #4
| Quote: وبعدين يرحيوا دماغهم من تظاهرات الجامعات !!!! |
هذه هي النقطة الأهم
فأياً كان الرقم المتوقع الحصول عليه من بيع أراضي هاتين الجامعتين ، فإن إعادة بناؤهما وتأثيثهما بنفس المكونات الحالية ( غض النظر عن الموقع المقترح ) سوف يكلف أضعاف المبلغ الذي تم الحصول عليه من بيع الأراضي .
هذا إن إعتبرنا أن التاريخ والوجدان والذكريات لا قيمة لها في عالم البيع المسعور هذا
تحياتنا فيصل
|
Post: #5
Title: Re: والي الخرطوم يمهد لبيع جامعة الخرطوم !!
Author: اسعد الريفى
Date: 01-07-2008, 11:33 AM
Parent: #1
ود السنى يا خطير
اديك انا فكرة للمسرح بس (بانتوميم) حصلت بالجد و ابو استكين كمان ..
مسرحية حديقة الحيوانات ؟؟
.. و كمل انت
لك تحياتى
|
Post: #7
Title: Re: والي الخرطوم يمهد لبيع جامعة الخرطوم !!
Author: محمد سنى دفع الله
Date: 01-07-2008, 11:52 AM
Parent: #5
والله فكرة مجنونة جن يا صديقي اسعد
عارف تؤام روحي مصطفى احمد الخليفة اخر ايام الحديقة
راح ودا اولادوا الحديقة زيارة قبل ما يشيلوها
لقى ليك السد عيان عندو اسهال
وما قادر اقيف
وبقى في ورطة كبيرة جدا هو اصلا كان بحكي لي الادوا عن ملك الغابة
وكيف الأسد ينتر وبهز بي زئيرو الغابة وقاعة الصداقة وناس توتي برجفوا في جزيرتهم
اها قدر ما حنس الحارس اكلكل السد او اتكلو على السياج الحديدي
الأسد حلف بي راس ابوه ما يقيف
هسي انت بتقول حديقة الحيوان
صحي تخيل الفيل لمن وصل حديقة القرشبي ولقى روحو براه والحزن لفاه
والقرنتية الطفشوها في بلدا مافيهو بحر والثعالب القلبومن الفراخ بقوا بضربو جزر
الحكاية فتحت البسكتني شنو ؟؟؟
يا اسعد الجامعة لو باعوها او ودوها بعيد العندهم مظاهرة
بشيلو لت بيرمشن بتاع مظاهرة في الخرتوم ؟؟؟
|
Post: #8
Title: Re: والي الخرطوم يمهد لبيع جامعة الخرطوم !!
Author: abubakr
Date: 01-07-2008, 11:56 AM
Parent: #1
ايها الافاضل
اتت الانقاذ بشعار وفكر توجه حضاري يبدء من يوم ان استولت علي السلطة وبالتالي تاريخ جديد للسودان مرتبط بهم وبفكرهم وشعاراتهم ... ما حدث في الثمانية عشر الماضية منذ ان اتو من خلخلة في نسيج المجتمع وجعل البلاد طاردة لملايين تتقدمهم الطبقة المتوسطة من خريجيين ومهنيين ومتعلميين وتغيير في ملامح الشخصية السودانية وملامح الارض وتغيير في مفهوم ومعني كثير من الموروثات الصالحة للعام بحيث تناسبهم و الخاص منهم ...ارجو ان ننظر الي امر بيع الجامعة وحديقة الحيوان والمحطة الوسطي وووووو من هذا المنظور وليس المادي فقط فالامر جلل .....
مودتي
|
Post: #9
Title: Re: والي الخرطوم يمهد لبيع جامعة الخرطوم !!
Author: kamal ali
Date: 01-07-2008, 12:09 PM
Parent: #1
ياهو الفضل ..!!!
|
Post: #10
Title: Re: والي الخرطوم يمهد لبيع جامعة الخرطوم !!
Author: اسعد الريفى
Date: 01-07-2008, 12:11 PM
Parent: #1
إحدى الجمل التى صارت كوجيتو فى هذا الزمان :
و دا عمل شنو !!
و أصلها الجامعة عملت شنو!!
هكذا و ببساطة و بفضل هذا الكوجيتو تفقد الاشياء قيمتها .. و تتلاشى
لتتحول بقدرة (والى) إلى مشاريع تضخ المزيد من (اليورو) للحسابات المتخمة ..
يقتلع التاريخ الزاهى اقتلاعا ليصبح .. سيراميك و مدن وهمية ..
إن مجرد التفكير فى هذا الامر اخى ابو بكر لهو (أمر جلل) ..
و يبقى السؤال الخالد ..
ليس من أين اتى هؤلاء .. لكن
من يتصدى لهؤلاء ؟
|
Post: #11
Title: Re: والي الخرطوم يمهد لبيع جامعة الخرطوم !!
Author: العوض المسلمي
Date: 01-07-2008, 02:43 PM
Parent: #1
اخي فيصل
لك تحية وتقدير
كما يعلم الكثيرين ان الحديث في المواضيع المهمه يبدا بطرحه مثل هذه الصوره الخجله
يعني جس نبض اولا
وكمان جعل الحديث في مثل هذا الموضوع طبيعيا مما يجعل قبوله فيما بعد امرا واقعا
يعني دي سياسة الدوله ان تطرح الموضوع وتدرس الفكره وراي الناس شنو
وما دام الموضوع طرح بهذه الصوره فان البيع واقع لامحاله
علينا الوقوف صفا واحدا من اجل مؤسساتنا التعليميه
فالحكومات تذهب اما المؤسسات فباقيه
يعني التوحد من اجل مستقبل ابناءنا اولويه علي كل شئ
واذا اتباعت جامعة الخرطوم كما بيعت البوسته والاسواق الحره فالندامه ستستمر وستدوم
ودمتم بخير
ابوتسابيح
|
Post: #12
Title: Re: والي الخرطوم يمهد لبيع جامعة الخرطوم !!
Author: عمار يس النور
Date: 01-07-2008, 05:03 PM
Parent: #11
سلام للجميع
| Quote: حل الزحام بالخرطوم يكمن في نقل جامعات الخرطوم |
و الله كلام
عارفين دي ذي فكرة الحلفاوي (حاج محمد صالح) ال ساكن في مكة20 سنة و ما بحج ابدا
اهه حاج محمد صالح ده جو جماعة بلدياتوإلى مكة في موسم الحج و حلفوا عليه إلا يحج معاهم
المهم عملوا ليه ساتر من الزحمة عشان ما تكون عندو حجة و يزوق من الحج
حاج محمد صالح في الطواف إتعصر شديد من اخوانا النيجرين و الافقان ديلك ، و فلت من الزحمة وهو يسب:
"إلعن ... عرب ما عندهم مخ ، و الله ده لو كان في امريكا كان عملوا ليهو زمبلك يلف و الناس واقفة في مكانها"
اهه بلدياتنا المتعافي ده فكرتو دي ما بتختلف شديد من فكره حاج محمد صالح
تحياتي
عمار يس النور
عاشق بخت الرضا
|
Post: #13
Title: Re: والي الخرطوم يمهد لبيع جامعة الخرطوم !!
Author: سلمى الشيخ سلامة
Date: 01-07-2008, 05:22 PM
Parent: #12
(والي الخرطوم يمهد لبيع جامعة الخرطوم !!)
دا بكون باعا زمان وقبض التمن
يعنى التصريح دا تحصيل حاصل
المطلوب
كل خريجى الجامعة من انشائها الى الان مطالبين بعمل سلسلة بشرية
تقف ضد هذا المشروع (المقرف)
لاننا تعبنا من بيع هذا الوطن
والسكوت
وهناك ايضا تمهيد لبيع مستشفى الخرطوم التعليمى
وهناك تمهيد لبيع القصر الجمهورى
ياخ ديل ناس عجيبين
ونحنا اعجب منهم لاننا ساكتين ليهم
|
|