مــاذا اضاف لكم البورد؟؟!؟

..
.
يا جماعه نحن في مكان بنحتفل بي منسابات اعيادنا و اعياد اولادنا و حفلاتنا و زواجنا و خطوباتنا و عزانا و كلو زوول بمشي بواجب التاني يا ببارك يا بعزي...والعلاقات امتدت لحد كبير
المغزي انو نحن في مكان بنحتفل فيهو من غير ما نعرف هو تاسس متين..لذلك قبل الخوض في الموضوع مسابقه عامه لكل الاعضاء الا ماا تحت ال 15 سنه.....
البورد متي تاسس؟ومن هم اول الاعضاء...
نستعين في الموضوع ده ببعض الاداريين الموجودين و لو جاء الريس زاتو اكون تمام التمام.........
طبعا الرابح ليهو هديه قيمه جدا جدا جدا...لكن حنخليها سر...
الى ان يظهر الجواب الصحيح.......

..
.
ماذا اضاف لكم البورد.....
من صفات سلبيه او ايجابيه,من قناعات و اراء سياسيه و فنيه ,من النواحي الاجتماعيه والعاطفيه...
.....
يا جماعه المصداقيه و الواحد اقول جميع الصفات اذا عايزين تردو يعني في حاله سؤال المسابقه ما عرفتو
يعني مثلا..
الغرور , الصداقه , الكذب , الشمشره و و و و الجراه
مع توضيح النسب........
ولكم اطيب التحيات من برنامج حوار صريح جدا جدا...

عرفنى بيكم
سندنى بريحة التراب الحاملينه فى قلوبكم
لمن اكون تعبت وتعبت خطاوى روحى بلجأ ليكم
بفتش عن ابنوسة
عن عزة
عن تماضر
عن بت قضيم
عن شيرى وعن الجندرية وعنك
بحس بعدها بروحى تدثرت من قسوة ايامنا الرتيبه المعلبة كالساردين
وبحس بالكلمات ما واقفه فى عصب حلقى لمن اكون محموقة وعاوزه ابكى
بقيتوا اهلى ودفىء غربتى ونار المولعة المابتموت

برجع ليك تانى
ام مرافىء وواصل

سولارا


تحياتى


علمنا البورد ان الحب لا يزال موجودآ
و كائنآ يمشى بين الناس فى الارض
و ان الايثار بضاعة مازالت تفترش العيون
و ان اجمل ايامنا سيفاجئنا غدآ

..
.
يا جمااااعه ما في زووول عارف عن تاريخ الموقع ده...
ما كان العشم..
:P

Ishrag....
الواحد ممكن القي اصدقاء و القي ناس و رب اخ لم تلده امك.....
الواحد اتعرف على افكار و على حاجات كتيره...
انا ممكن اقول ليك اني اكتر وحده بمثل علبه السردين و لو في اضيق منا قولي لي....تحياتي يا ام واصل و واصلي

Kosta....
..لا تعليق يا كوستا....فهذا ما يسعي له البعض وغيره من الصفات الجميله......
طبعا بحكم مدتي لم اتعرف على ناس كتيرين و ان تعرفت اتمني يكونو كده

تحياتي و بتباااالغووو هسه ان شاءالله بعد 5 سنوات و الاجيال الجديده جات تقول لينا البورد اسسو منو و كان فييهو من و تاثيرو عليكم كان شنو نفضل ساكتين كده....؟؟
اها يا جماعه الجائزه احتمال ...ماديه..


Solara...

اضاف لي الكثير
اهم حاجتين
اولا ان السودان ما زال و سيظل بخير
اذا كانت هذه البقعه الالكترونيه الصغيره عامره بكل هولاء المبدعين
فحتما هناك امل كبير لغد مشرق و سودان جديد

ثانيا
علمني دروسا كثيره في ديمقراطيه الحوار
و زاد ابعادها رسوخا في داخلي

سولارا وكل الممتعين في هذا البورد
او أي مكان يجمع شتات السودانيين
يكفي يا سولارا أن هذا البورد أصبح مندى يجمع شتات السودانيين في أقاصي الدنيا
يكفي أننا نلتقي بكل المبدعين والشمشارين وكل صنوف البشر
دون ضجر من أحد
يكفي ان ترفنا من خلاله على أناس طيبين وأمتدت جسور المحبة والتآلف بينااونشأت علاقات شخصية وأسرية بين العديد من أعضاء البورد
ويكفي أننا نقرأ سطورك أفكارك وأفكار غيرك يا سولارا
أما متى تم تدشين هذا الموقع لا أدري بالزبط ولكن بدأت علاقتي به منذ عامين تقريبا
يعني بعد تدشين الموقع بفترة بسيطة

علمني المنبر أن أحزن لأحزان الوطن ، أن أحب الوطن أكثر وأكثر وأنا الذي لم أعرف لحظة مرت على دون شعوري بحب الوطن ، أن أحترم الرأي الآخر وإن إختلفت معه ، علمني أن الحوار البناء يوصل للأهداف والغايات وفيه حل جميع مشاكلنا. عرفني بكم جميعاً أعزائي وبالضرورة تعلمت منكم جميعاً وما زلت أنهل من معينكم الذي لا ينضب ولن ينضب بإذن الله إنّه لا مال أعود من العقل ، و لا فقر أشدّ من الجهل ، و لا واعظ أبلغ من النصح ، و لا عقل كالتدبّر ، و لا علم كالتفكّر ، و لا مظاهرة أوثق من المشاورة.
دمتم جميعاً ودام صفاؤكم وألقكم ومنتداكم الفكري الرائع.

العزيزة الغالية سولارا

يكفى ان اضاف لنا هذا البورد كم من الاخوان والاخوات لا يستهان به وسوف نفاخر به وحقيقة انه رب اخ لك لم تلده امك ..

وحقيقة ان معرفة الاوفياء كنز لا يفنى والله

..
.
ايهاب
ان شاء الله ديما السودان من احسن لي احسن....
وان شاءالله ديما مبدعينا ازيدو...
اما بالنسبه لديمقراطيهالحوار....اكتر شي حيستو انو الواحد بدلي برايو مع العلم بحس انو احسن راي....وشويه كده..يغير رايو
شكرا ليك يا ايهاب
اها المسابقه ....ما حاولت؟؟

Habib_baldo
فعلا البورد فتح لينا...(شباك)وليس نافذه خلتنا نتعرف على جميع الناس من كل نواحيهم
الا انو الواحد مرات بنخدع بالكتابه و بفتكر الشخص البكتب ده قمه في الابداع و و و..........
لكن برضو ادانا فرصه للحوار للتعرف بالاهل كم شخص انا لقيتو عن طريق المصادفه انو من اهلي...
الشمشره...ودي فعلا حااااصله
حبيب السودان........شكرا و معليش يعني مكافاتنا كانت ((بالزولار))وليس الدولار

..
.
الملا..كلام جميل جدا جدا.....بالذات اخر سطرين...
انشاءالله البورد ديما افضل مغرف لينا سياسيا و فنيا و تعليميا...

العمده...
هدفي الاساسي للانضمام قبل اي شي التعرف على شخص ممكن تحصل بينا صداقه...وفعلا الاخ الذي لم تلده امك صعب ايجادو الايام دي...
اتذكر اول شخص اتعرفت بيهو قامت بينا شكله كبيره

والسلبيات يا جماعه؟؟؟

الأخت سولارا الســـــــلام


البورد أصبح لينا ملاذ نتواصل فيه مع الشباب و نعرف لينا ناس من جميع بقاع الأرض
نعرف أراء الناس في كل الأمور ثقافية و سياسية و رياضية و حتى الهترشة
بنتابع من خلاله كل الأحداث و بسرعة و كمان ما ننسى ناس الشمارات و الله كمان ديل
ما قصرو

و حقيقة البورد فيه ناس فعلا بتشرف بي معرفتهم

و تحياتي للجميع

البورد

الحوش الكبير ، بيتنا التانى

بدينا شرف العيش تحت سقف واحد مع صناع الحدث فى الادب والسياسة والشعر والكتابة لمبدعة
بدينا شرف التعرف على ملامح الناس الغربتنا منهم السبل وباعدتنا منهم المقادير
لاقت خطانا باجيال جديدة وقديمة

عصانا النبتوكأ عليها لما نتعثر فى الغربة وعطش الرجوع للوطن رواه


باب السنط
ودرب مغبر شاقى حلتنا الزمان
واحة امان


الصاحب البتديهو سرك وبتطمن عليه

سبورة بنشخبت عليها همومنا ونمسحها
نسب جديد

اقول شنو؟؟

واتعرفنا بيكم زى ما قالت اشراقة وعرفناكم من قريب

اتحولت افكارنا وهمومنا اليومية لمشروع ابداعى ، يتكتب فى بوست
نقدمو ليكم ، ونترقب تفاعلكم معاه ، ومنو البدورو ون البياباه

اتاصلت فينا معاكم معانى متفاءلة وقيم نبيلة وخوة وعرفة وقرب وتمازج وانسجام و.... حياة

الغالية سولارا:

البورد كان بالنسبة لي نافذة أطل من خلالها على السودان بكل ما فيه من روعة …
من خلال البورد أصبحت أقرب فهما للعقل السوداني ..
رغم قلة مشاركاتي إلا أن مجرد الدخول وقراءة البوستات هو متعة يومية أمارسها رغم كل ضغوط العمل ومشاغل الحياة.
ربما حرمت من متعة العيش والحياة في السودان منذ الطفولة ولكن أستطيع الجزم بأن من فاته الكثير من متعة الحياة في السودان فإنه لا شك واجد بين طيات هذا البورد روح السودان و روح أهله الذين يوجد لهم ممثلين في هذا البورد بشتى اتجاهاتهم الفكرية والسياسية و الفنية والأدبية و الاجتماعية .
وأستطيع الجزم أيضاً بأن - خوة البورد فاتت حد الكيبورد-
أدعو الله أن يديم الأخوة و المحبة بين الجميع ، ويجزي القائمين على تنظيم أمر البورد وإدارته عنا كل الخير
وتسلمي يا سولارا واتمنى أشوفك قريب ، للمرة الثانية ، شايفه ؟ دي واحدة من إضافات البورد ، التواصل خارج البورد .

تحياتي

البورد
فتح لي طاقة بتجيب همبريب بارد
وشعرني انو معاي ناس ما براي
اضاف لي معرفة مدي اختلاف السودانيين ومدي اتفاقهم
وعلمني السهر لي انصاص الليول - جمع ليلة - ومرات للصباح

وبالنسبة لي تاريخ بداية البورد اعتقد انو 4/2/2002 مع انو في ناس بقولوا البورد التاني وشنو لكن انا شايف انو تاريخ تسجيل الاعضاء كلو بعد التاريخ ده .. حتي بكري ذاتو

شكرا يا سولارا علي السؤال

العزيزة سولارا

لعل البورد كالحياة نجد فيها ما يعجبنا وما لا يعجبنا
وكم هو مؤسف ان يكون اول من تعرفتى به قد اصطدم بك ويقينى انك انسانة رقيقة لا تسعين الا للخير كله ولكن دعينى اتراجع واقول ان هنالك مثل قديم يقول "ما فى محبة الا بعد عداوة" واسأل الله ان يكون ذلك المصادم صديقا صدوقا لك وان يتراجع عن اخاءه نحوك وتصفو الحياة بينكما فالحياة عزيزتى لا تستحق ان نعادى فيها انسان مهما كان شأنه قليلا او وضيعا فهى الى زوال وتبقى منها الكلمة والذكرى ولا تنسى ان الكلمة الطيبة لها الاثر الفعال وان الاعتذار يحبب النفوس الى بعضها ويقوى اواصر الود بين الناس..

اقول عزيزتى دعينا ننظر لنصف الكوب الممتلىء وندع الفارغ وان احصينا فسنجد ان الحسنات اكثر من السئيات فى هذا البورد الجميل ..

ولك كل التحايا

السلام عليكم ورحمة الله وبركاته
ربما ملاحظاتي عن البورد قد تكون غريبة بعض الشي، ولي الآن حوالي السنة وأنا عضو بهذا المنتدى

كون أن يكون البورد يمثل المجتمع السوداني بمختلف قطاعاته فهذه النقطة تحديدا تخالف الحقيقة لأن المجتمع السودان المشارك على المنتديات كمنتدانا هذا هم جزء من المجتمع السوداني الذي يتعامل مع الإنترنت عموما سواء في داخل أو خارج السودان، لذا فلا أعتقد أنه يمثل شريحة كبيرة من المجتمع السوداني، على الأقل هو يمثل شريحة كبيرة من الطبقة القادرة على تحمل تكاليف الإنترنت وهي حسب تقديري الشخصي لا تتجاوز المائة وخمسين ألفا في السودان، أما عن تلك التي هي خارج البلاد، فأهلها هم أدرى بعددهم.

ملاحظة أخرى وهي أن في البورد "شللية" لم يتقبلها البعض وقام بوصفها بأقذع الألفاظ، وفي هذه النقطة بالذات أقول أن هذه الظاهرة ظاهرة طبيعية خاصة إذا كان المنتقد جديدا أو من المقلين في المشاركات، لذا فهو يرى "أن لا حياة لمن تنادي"، ولكن الحقيقي في الأمر أن الصفة المشتركة بين أفراد هذه "الشلة" أنهم من المكثرين من الردود وتعد مشاركاتهم بالآلاف، أو قد يكونون من المشاهير الذين يشار إليهم بالبنان. لذا من الطبيعي أن يجد بعضهم بعضا كلما تصفحوا الصفحة الأولى في المنتدى، وكما يقول المثل "البعيد عن العين بعيد عن القلب" -مع تحفظي على هذا المثل في بعض النواحي-، ولهذا لا منطق -في الأغلب- لما يقوم به البعض لانتقاد هؤلاء ووصفهم بأنهم لا يهتمون بالآخرين.

ومشهد آخر يتكرر في مجتمعنا في الواقع مع مجتمع البورد، وهو تصنيف الأشخاص من خلال نظرية أسميها نظرية "الكومين الكبيرين"، وهي باختصار أن كل من يخالفني الرأي فهو بالتالي فمن تكلم ودافع عن هجمات يظنها ضد الإسلام فهو بالتالي عند البعض تصنيفه "كـــــوز"، دون النظر إلى بقية الكتابات التي من خلالها تتضح طرق تفكير ذلك العضو، وعلى النقيض من ذلك كل من تكلم في اتجاهات الحرية والديمقراطية ووصف العسكر وحكومة "الإنقاذ" بأشنع الألفاظ فهو من كوم "شيـــــوعي" !!!!.

ونتمنى من أعضاء المنتدى أن ينتقوا من الألفاظ ألطفها وأدقها تعبيرا، وأن يبتعدوا عن المهاترات الشخصية في ردودهم، وإن كان لابد فاعلين فلتكن بينهم في مكان آخر حرصا على مشاعرنا ومساحات "الباندويدث"، وأن يقرؤوها مرة واثنتين قبل أن تثبت على المنتدى، ويقومون تجاهها باللازم من تصحيح وتعديل، محافظة على منتدى أصبح واحدا من معالم المجتمع السوداني على الشبكة العالمية -على قلتها- مقارنة بآخرين. فلا تجعلونا أعضاءنا الكرام مثارا لسخرية وتهكم الآخرين وأنتم قادرون –بنوعية المشاركات- على انتقاء الجيد منها، وما مجتمع البال توك عنكم ببعيد!!!!!.

وربما يتساءل البعض وبعد كل هذا: ما دمت تنظر إلى هذا البورد بكل تلك النظرة المتشائمة، لماذا أنت معنا إلى الآن؟؟

أقول: أنني في هذا البورد أشعر أن هناك آراء يجب الدفاع عنها ومساندتها لأني أرى في مجتمع هذا البورد صفوة ربما سيكونون في يوم من الأيام قادة لهذا البلد، وأرى أن كل من يكتب في هذا البورد لديه -ولو بدرجات متفاوتة- قابلية أن يستمع للآخر -وهذا بحد ذاته خطوة تحسب لهذا المنتدى-، وهذا ما نفتقده حقيقة في السودان كمجتمع وليس كحكومة فقط، فطالما أن هناك محاولة فيجب على البقية أن تشارك ولو بالكتابة والحوار والمناقشة الجادة، كي نتعلم نحن رويدا رويدا هذه الخاصية ثم نعلمها لمن حولنا.

ربما أكون قد أطلت عليكم، ولكن ما دام أن الباب قد فتح لسماع الآراء، فهذا هو رأيي إلى هذه اللحظة في منتدانا.

وسلامات وتشكرات

نتعلم كلنا من بعض

السودان بلد الثقافه
والبورد اعاده هويتنا الثقافيه
ومحل ابداع
كل الناس الفيه فنانيين
لكم محبتى

السودان بلد الثقافه
والبورد اعاده هويتنا الثقافيه
ومحل ابداع
كل الناس الفيه فنانيين
لكم محبتى

السودان بلد الثقافه
والبورد اعاده هويتنا الثقافيه
ومحل ابداع
كل الناس الفيه فنانيين
لكم محبتى

السودان بلد الثقافه
والبورد اعاده هويتنا الثقافيه
ومحل ابداع
كل الناس الفيه فنانيين
لكم محبتى

شباب
تعرفنا على اخوه لنا واخوات لنا ابعتدهم الظروف عن بعض
وتمازجت افكارنا
وزادت ثقافتنا
اصبح المنبر بالنسبه لى امتداد لفتره الجامعه
كنا نحلم بمدائن فيها نرتاح من شقنا
اصبح هو الجمهوريه الديمقراطيه الوحيد الباقيه لنا
السلبيات النقاشات الجانبيه تاخذ حيذ اكبر
حريهالتعبير تفهم غلط فى بعض الاحيان
فى الناهيه اصبحنا جمعا اسره واحده سودانيه ميه الميه
ولك كل التقدير سولارا
ودعقاب

شباب
تعرفنا على اخوه لنا واخوات لنا ابعتدهم الظروف عن بعض
وتمازجت افكارنا
وزادت ثقافتنا
اصبح المنبر بالنسبه لى امتداد لفتره الجامعه
كنا نحلم بمدائن فيها نرتاح من شقنا
اصبح هو الجمهوريه الديمقراطيه الوحيد الباقيه لنا
السلبيات النقاشات الجانبيه تاخذ حيذ اكبر
حريهالتعبير تفهم غلط فى بعض الاحيان
فى الناهيه اصبحنا جمعا اسره واحده سودانيه ميه الميه
ولك كل التقدير سولارا
ودعقاب

solara
لك السلام
البورد اعطاني الصفحة الوطن هو السودان بكل ما فيه من تباين والفة واعطاني ايضا من الاصدقاء الذين لا يربطني بهم الا الحرف الصادق فالتقيتهم دون ان اراهم واحمل ما في هذا المنبر اننيي اقرأ لمن أشاء واكتب ما أشاء مساحة من الحرية هي اقصي مانحتاج
وعلمني المنبر الصبر واحترام الاخرين
ولك الشكر

البورد عباره عن السودان الحديث الذى نعمل من أجله جميعا .. يناقش كل الجوانب الفكرية والسياسية والثقافية ألادب والشعر .. وكوكبة من ألاقلام الصادقة وألامينة فى طرحها الموضوعي لكل القضايا .. وفيه فائده عظمى للاطلاع علي مواضعة .. ويستوعب جميع وجهات النظر المختلفة.. ومزيدا من المساهمات من أجل تعم الفائده للجميع وللوطن الام

..
.
ABUHUSSEIN
..انا كمان استفدت من حكايه متابعه الاخبار الواحد من كل النواحي بستفيد......مهما كان نوع الاستفاده و دي كفايه
تحياتي ليك

..
.
ست تماضر..
انت من اوئل الشخصيات الحبيت اتعرف عليها جدا جدا جدا جدا...
و بتزكر في رسالتي كان اسمك موجود فيها ...
كونو انو لقيتي صحبه طيبه دي كفايه
كونز تنز الواحد القي شخص اعيد اهنيهو ابارك ليهو في اي مناسبه دي كفايه......و كونو انو ادانا امل...دي اهم من المهم
تحياتي

..
.
انا كمان يا عزيزتي نفسي اشوفك مره تانيه و تالته...
والله اقدم الفهو خير
و لوووول@الاخوه الفي البورد
والله التواصل حلو و جميل بس المهم انو اكون مستمر
تحياتي


..
.
بحر
انت وين يا بحر...
كويس السهر لانصاص الليالي دي حاجه ما كويسه و هو ما ينتج عنه الادمان...ودي من اكتر الصفات اللقيتا و العزبتني انا كنت متابعاهو من شهر 5 و ما سجات الا قبل مده لانو المشاغل العانله زي المطر.....
انا طلعت بالادمان غايتو منك ..
اما بالنسبه للاجابه حنعرف

2002\2\4

تحياتي

..
.
العمده
هو صدام و لكن ليس ذلك الصدام العنيف فانا اعرف ان العلاقات يجب ان تكون اسمي من هذا و اعرف ان الكلمه الطيبه و جبر الخواطر كما هو عندنا في لغه السودان لا بديل لها....
و لكن اختلاف و جهات النظر هي مشكله عندنا لذلك ارجع و اقول اختلاف الراي لا يفسد للود قضيه.....؟؟؟وعلامه استفهام بالقلم الشيني
انا انسانه رقيقه؟؟يا عمده كتر الله خيرك....و شكرا على اطرائك لي
ولكني اجد صعوبه في فهم نفسيه البورد و لكن لنقر ان الحسنات اكثر و لو على الصعيد الثقافي.....
تحياتي يا عمدتنا و بما انك من الادارين(تعظيم سلام)...ارجو مساعدتنا في حل المسابقه

..
.
kov_123
من حقك الادلاء برايك..و من حق الاخرين ابداء وجهه النظر..ودون تعصب
بنظري اي مجتمع اي بيئه اي ركن فيهو سلبيات و ابجابيات...
قد تكون الايجابيات واضحه و متككره لذلك اخذت السلبيات..
البورد لا يحوي جميع الطبقات و لكن كل يسعي لجعله كاملا...اما من ناحيه القدره على التكاليف فبالتاكيد ليس الكل قادر على تحمل المصاريف..ولكن اذا حسبته فيهو الموسيقي الممثل الطالب المراهق الاديب الشاعر الهاوي العاشق.......اذا نخبه كبيره

البورد شلليه؟نعم و هذا شي طبيعي كما قلت لان كل شخص يجد من يوفقه في لغه التخاطب و الحديث.و حتى الاراء..كما انا لا اجد من الضروري ان يكون المنتقد مستجد..حتى..اذا كان الموضوع جيد فبعض الاحيان ينجح..واحيانا لا ينجح.....و لا انكر ان اسم الشخص له دور
موضوع الشيعه و الاكواز لم اتعرض لهذا الموقف لذلك لا استطيع الفتوي فيه...
المكان يحتاج لاراء و مدافعين و مناقشات على الاقل للوصول لنتيجه و ليس لي شيء اخر......
تحياتي...وتشكرات افندوم

سيدتي ارجو ان تعيدي قراءة ما كتبته مرة أخرى فأنا ذكرت السلبيات بصورة أكبر لأن الأعضاء السابقين قد ذكروا ما يرونه ايجابيا ولم أنوي أن احول البوست إلى بوست للتهنئة والشكر، على الأقل حسب ما فهمت من موضوعك أنك تريدين معرفة "الرأي والرأي الآخر" لذا ركزت عل السلبيات.

أما عن ما لم تعايشيه فذكرت لك ماحدث أن شاهدته خلال عام عشته بين جنبات هذا البورد، وهذه الحالات تأتي كموجات يُصاب فيها البورد بالتوتر والشلل لفترة ثم يعود، وما أحداث مهيرة عنك ببعيدة.

أرجو منك سيدتي أن تعيدي قراءة ردي السابق فأنا لم أذكر السلبيات فقط، وأرجع وأؤكد مرة أخرى أنه يوجد في المنتدى -ولو بدرجات متفاوتة- القابلية للإستماع والمناقشة وهذا بحد ذاتة خطوة تحسب لأعضاء هذا المنتدى.

وسلامات وتشكرات

..
.
استاذ الموصلي و استاذ حمزه...
كفايه بس انو تورونا اخر موسيقاكم و ابدعاتكم....
جدد نشاطات كتيره فينا......
..
.واثبتنا هويتنا...
تحياتي ليكم

..
.
ود عقاب
انت ايضا لك التقدير.......
لن اقول الكثير فما كتب من اخوانك و اخواتك كان كافي....

عزيزتي سولارا

انا اتخيل لي البورد ده جامعـــة عديل

فيه ثقافة ، وعلم ، سياسة ، فن ، رياضة
يعني اكاديميات واجتماعيات وفنون
وكله
وعندنا الدكاترة والاساتذة
والطلاب
اللي ذينا كده
فعشان كده العلاقة متكاملة

..
.
عبدالله& الشريــــــــف
الحريه و الجراه اكتر ميزتين انا اخدتها من البورد.....
احترام الراي..الاطلاع و ما تيقي
..

..

طيب مساعده متي افتتح البورد
1999 2000 2001

__________________________________________________________________________

..
.
Hozy
كيف صحتك ان شاء الله احسن هسه؟؟!؟
هوزي الجامعه دي ان شاءالله تستمر و ماتتاثر باحدات ال 11 من سبتمبر

تحياتي

فقط إثنان وثلاثون عضواً في هذا المنتدى ، والبقية وحتى لو لم يضف لها المنتدى شيئاً ماذا قدمت؟

العزيزة سولارا

لك تحياتى

لقد انزل بوست قبل فترة لا اذكرها تحدث عن نشأة البورد وعن فكرة اقامة مهرجان احتفالا بالعام الرابع للبورد فى يناير 2004 وبدأ النقاش جادا فى الموضوع ثم اختفى ذلك البوست بل غبت انا فترة وعندما عدت وجدته تلاشى ادراج الصفحات واصبح عسيرا الحصول عليه..

لك تحياتى

ما هو لسة الدنيا بخير
..
.
والحلوين كتار

سولارا
..
.
انا بعرف ان العام هو 2001 شهر يناير

تنفع الاجابة دى

..
.
العمده
نعم تصفحت الموضوع سابقا..
كتر الله خيرك

..
.
الملا
شكرا للدفع المعنوي..

..
.
OmDur
والله يا عزيزتي انا ايضا بعتقد في 2001 ة تسلمي يا عزيزه

..
.
kov_123
بدايه....انا فهمت ما عنيته و استوعبته لذلك قلت بان الايجابيات نوعا ما معروفه لذلك انت اتجهت لشي اخر و انا اشكرك عليه و انا فعلا اريد معرفه الراي و الراي الاخر
كونك انك اكبر مني تسجيلا طبعا لم احاول ان اجادلك في هذه النقطه
لذلك فضلت الصمت اما بعد ذلك فانا عايشته

تحياتي
Solara....

العزيزة سولارا
لك التحية
انا شخصيا يكفيني ويزيد انني التقيتكم ,حاوتكم ,ناقشتكم ,نهلت من علمكم, اختلفت معكم بدون ان نفسد قضية الود,احببتكم جميعا اخوتي واهلي البورداب ,احببتكم حتى من قبل ان اسجل واصبح عضوا , احببتكم بمختلف مشاربكم واهوائكم واتجاهاتكم لاننا اجتمعنا اولا واخيرا تحت علم بلادنا الحبيب.....
ودمتم لنا جميعا
جـــــــــــــتدو

سولارا
انا ماعارف البورد عملوهو متين لكن بتذكر كنت في الراكوبة عضو نشط اها يوم حبيب الكل قال لي ما مسجل في البورد ومشيت سجلت ده زمن كان البورد بيشتغل بالفلوبي دسك ههههههههه يكه
اما ما اضافه البورد ممكن اختصرو ليك في الكلام ده
it's the constant wind that fills my sail

زاتوووووو

العزيزة سولارا
بل قولي ما الذي لم نستفيده من البورد
اشياء كثيرة لا تعد ولا يمكن لاي شخص ان يتخيل مدى الاستفاده الكبيرة بالنسبة لي غير معرفة الكثيرين من اهل البورد
وتظل الفائدة الحقيقية هي الكلمات التي تسطرها انامل اهلي البورداب
فسيروا الى الامام

عيــــكـ ...زمن والله

بكري عاودكـ الحنين ولا شنو يا عمكـ

من زمن الناس بتكتب بالكربون حليلو حمزة سليمان

معلم الله قلبي قال شح
قلت ناس سولارا وباقي الحبان ديل رجعن / وا تاني

محبتي ، وسلامي يغشاهم / ن وين ما كانوا / ن

دهــ شنو يا ناس

البوست ده جا ناطي البحر ولا شنو

__________________

Quote: مــاذا اضاف لكم البورد؟؟!؟

عداوات كنت في غنىً عنها

في أبريل 2003 سألت سولارا

Quote: ماذا اضاف لكم البورد.....

في أول رد قالت إشراقة

Quote: عرفنى بيكم سندنى بريحة التراب الحاملينه فى قلوبكم لمن اكون تعبت وتعبت خطاوى روحى بلجأ ليكم

ردّ كوستا

Quote: علمنا البورد ان الحب لا يزال موجودآ و كائنآ يمشى بين الناس فى الارض و ان الايثار بضاعة مازالت تفترش العيون و ان اجمل ايامنا سيفاجئنا غدآ

وقالت تماضر

Quote: عصانا النبتوكأ عليها لما نتعثر فى الغربة وعطش الرجوع للوطن رواه باب السنط ودرب مغبر شاقى حلتنا الزمان واحة امان الصاحب البتديهو سرك وبتطمن عليه سبورة بنشخبت عليها همومنا ونمسحها نسب جديد

وبرضو في 2003 ـ أبريل ـ معتز قال

Quote: وتظل الفائدة الحقيقية هي الكلمات التي تسطرها انامل اهلي البورداب

.
.
.
.

بعد خمسة سنوات إلا شوية

الأخ هشام آدم قال

Quote: عداوات كنت في غنىً عنها

وأتوقع أن هذا حال الكثيرين في هذا الوقت


ـــــــــــ فهل من وقفة لنعود إلى الزمن الجميل؟؟ ـــــــــــ