ســـــــيد احمـد الحردلو

سيد احمد الحردلو شاعر واديب سوادني واحد اوليك العظام الذين صاغوا الحرف واللغة ادبا راقيا ممتعا جيدا للحد الذي يجعلك تعتقد انك تستمع الي موسيقي متناسقة ومتسقة تنساب في هدوء الي دواخلك لتبعث شئ من السرور ولست هنا بصدد تقديم دراسة او نقد بقدر ما انني اعيد كتابة قصائد له مع بعض التعليق الذي ربما يكون معينا لنا في تكوين معرفة جيدة بقصائد شاعرنا
الشعر عند سيد احمد الحردلو هو خالص لوجه الحب والجمال واكثر ما يتجلى ذلك في شعره الوطني والذي صاغ معظمة وهو متنقلا بين اقطار كثيرة جدا مع ذلك ظل شعرة كثير الارتباط بالبيئة والتراث السوداني صاغ الشعر باللغة العربية فابدع واوجد تيارا شعريا جديدا اتسم بالحداثة والتجديد وصاغة اي الشعر عاميا مما اكسبه جمهور عريض ونذكر هنا اشهر قصائدة التي تغني بها بعض المبدعين يا بلدي يا حبوب التي تغني بها وردي وطبل العز ضرب....وبرغم دراسته للغة الانجليزية الا انه لم يتاثر كثير بالشعراء الانجليز
وحتي لا افسد متعة القراء اليكم اولي قصائدة بجانب تعريف بسيط لمسيرة الشاعر وقصدت ان اختار تلك اقصيدة لاني اعني ان الشعر عند الحردلو لوجه الجمال والحب وساحاول قدر استطاعتي عرض عدد من قصائدة في هذا البوست

بعض ملامح السيره الذاتيه للشاعر عن موقع ادب
ولد عام 1940 في قرية ناوا بالولاية الشمالية- السودان.
حاصل على بكالوريوس في اللغة الإنجليزية وآدابها 1965, ودبلوم اللغة الفرنسية 1975/ 74.

عمل مدرساً, ثم انتقل إلى السلك الدبلوماسي فعمل مستشارًا بسفارة السودان في كنشاسا 1975, 1976 فوزيراً مفوضاً 1977- 1979, فسفيراً 1980, فسفيراً فوق العادة 1987- 1989 وتقاعد عام 1989.
عمل محرراً ومراسلاً لبعض الصحف السودانية والعربية.
شارك في العديد من المؤتمرات الرسمية, واللقاءات والمهرجانات الثقافية.

دواوينه الشعرية:
غدا نلتقي 1960- مقدمات 1970- كتاب مفتوح إلى حضرة الإمام 1985-
بكائية على بحر القلزم 1985- خربشات على دفتر الوطن 1997-
الخرطوم... ياحبيبتي 1999- أنتم الناس أيها اليمانون 1999,

إلى جانب الكثير من الأشعار بالعامية السودانية.

أعماله الإبداعية الأخرى:
ملعون أبوكي بلد (مجموعة قصصية)- مسرحية شعرية بالعامية السودانية.

حصل

، يا جَنَا .. أبداً جَرَالَكْ أمرْ مِن هَذَا القبيلْ ،
إنك مسافر فى بلاد بره .. وزول عابر سبيلْ
تلقاك بنية حليوة .. زى موية السبيلْ ،
والدنيا حرْ ..
والجوف عليلْ ،
تنده عليكْ
يا ماشى زى الغابة .. يا زولْ .. يا جميلْ
وَقفْ .. وهاكنى معاكْ .. وسافِرْ .. يا جميلْ ،
- أيوه حَصَلْ ،
بس المطرْ كان قاجى .. والليل كان جميلْ
والبندقية .. جزيرة الطِليان ..
يمين . . مليانة شيلْ
والبحرِ رايقْ .. والمزاجْ . .
والجيب تقيلْ ،
وشربنا . . ناماً شُفنا ايطاليا مدنقرة فى المحيطْ،
وتقول ياليلْ
ويمين – حلفنا – نعومْ .. وكان الكيفْ تقيلْ
وا########## ليلْ
يا زول حَصَلْ .. زى ما حَصَل . .
ما الدنيا ليلْ
والزول مسافرْ
والطلايناتْ ديكْ . . يا ليلْ ،
- أيوه حَصَلْ
. . . بَس المطر كان قاجى .. والليل كان جميلْ
البندقية –مارس –

الاستاذ نيازي
لك التحية
واسمح لي
انت رجل معجزة ان استطعت ادخال فامة مثل قامة سيداحمد الحردلو
في بوست واحد
فهو اديب و شاعر متنوع الرؤي
ثري بالحكاوي و تواريخ الناس و المدن
لك الشكر
و منتظرين

تشكر يا عثمان كثير
صادف بالامس سمعت حوارا مسجلا من اذاعة البيت السوداني مع الشاعر اسهب فيه في مراحل حياته المختلفه والقي عدد من القصائد الجميلة بالعاميه وبالفصحي...وايقنت ان سيد احمد الحردلو موسوعه كبيره تستوجب التوثيق
لك الشكر مره اخري عثمان علي الاطلاله

الأخ نيازى لك التحية والشكر على على هذه الشرفة التى يطل علينا منها الصديق الرائع والشاعر المرهف سيد أحمد الحاردلو . لقد فاتنى هذا اللقاء الإذاعى للأسف ، وأكثر ماأسعدنى إنه فى تمام الصحة والعافية التى اتمناها له دومأ. سيد أحمد شاعر مبدع وفنان وكاتب رصين بالغتين العربية والإنجليزية وكاتب مسرح ودبلوماسى حصيف . اما سيد أحمد الإنسان فذالك أمر آخر أنسان شفيف حلو المعشر حاضر البديهة ولماح وصاحب نكتة شديد الوفاء لإصدقاءه وزملاءه وافر البر بأهله .أما سيد أحمد الوطنى المناضل الجسور فهذا يحتاج الى كتاب ننتظر أن يعده لنا أبو السيد قريباً .له العافية كاملة وله الشوق المعتق والود القديم حتى نلقاه والسمار والأصدقاء يحيطونك حباً ومودة .

الاخ جعفر تحياتي وشكرا لزوقك الرفيع في مقام شاعر كبير وتابع ولك هديه قصيدة هروب

هروب
.........................
كُتْ قايل صحيحْ الهجرة تِرياق للجراحاتْ
ورَاح أرتاح من أحْزانى القديماتْ ،
وقُمْ طشيتَ فى دُنياتْ .. بعيداتْ
برايا جريحْ
أكاتل الريحْ
وأكوس فوق التخاياتْ ،
وأغلب الشوقْ .. ،
وأقول أصبُر خلاس فِضْلن شِوياتْ
عشان ترتاح من أوجاع حُبَك الفاتْ ،
وكم مرات
أحِنْ للارضِ .. والناس الحليوينْ
وادَفْدِف فوق بُلود الغيرْ مِطيراتْ ،
وكم مراتْ ،
... أوَاصلَ الهجرة فى الذاتْ ،
... ورُحتَ بعيدْ
وضيَّعتَ المسافاتْ
وضيّعتَ العناوين والجواباتْ ،
وقُتَ خلاسْ
خلاس الماضِى قد ماتْ ،
وودعتَ الجراحاتْ
.........................
.. ومرت بيّا زى شوبتينْ
وزىْ شِيتاً حميمْ .. ودفينْ
يجيكْ وكتَ الوجع .. والشينْ
يجيكْ زىَّ العديل ... والزينْ
حضرنى شعورْ
شعورْ بحضورْ
حُضور محضورْ
وسادِى الدنيا .. جايى عليّا .. زفة نورْ
.. واتلَفَتَ .. بى هجمة فرحْ .. مسحورْ
وجُوه النورْ
بَشُوفِك نورْ
شَلَح تَالاىْ
تقول مَقطعْ من الدوباىْ
بِفتش ليهو .. لى غناىْ ،
أتاريكْ .. كُتِ دِيمه معاىْ
مهاجرة .. وفى الضُلوع .. جُواىْ ،
.........................
أتاريكْ .. رُحتِ قبلى هناكْ
وشلتِ معاكى كل الفاتْ ،
.........................
لِقيتِك واقفه فى كل المطاراتْ
ومتظرانى بالشوق والبسماتْ
وايدِك راعشة بِتقول لىْ .. سلاماتْ ،
لقيتك فى محطات القطاراتْ
والتُلوج نازلات على وِشيشك وصاباتْ ،
وإنتِ تحاحى بالتوبْ .. الدِميعاتْ
.........................
أتاريكْ رُحتِ قبلى هناكْ
وشلتِ معاكى .. كل الفاتْ ،
.........................
لِقيتِك فى الشوارع والمطوراتْ
وجارية معايا مرات للضُلولاتْ
وواقفه معايا مرات فى الشموساتْ ،
وقاعدة معايا فى قهواية مراتْ
وتحكى لىْ حكاياتْ ،
وأشوف عينيكى ضاواتْ
كما أُمبارحْ ...
ومليانات محناتْ ،
.........................
أتاريكْ رحتِ قبلى هناكْ .
وشلتِ معاكى .. كل الفاتْ
تَّصاويرنا
وغناوينا
وفريحاتنا .. ومشاويرنا ،
وحاجاتنا الصغيرونات
والخليتَه تذكاراتْ
ورايا هناكْ
لِقيتَه معاىْ
بِتمشى معاى
وتقعد جَنْبى تتكلمْ
تعيد ليا جميعَ الفاتْ ،
.........................
أتاريكْ .. رُحتِ قبلى هناكْ
وشلتِ معاكى .. كل الفاتْ ،
.........................
وكُتْ قايل .. صَحيح الهجرة بتداوى
ولقيتَ الهجرة .. بتكاوى ،
وتَفتِحْ لينا ماَضينا
وتخلينا
مساجينُو ،
وكُلْ مادُرنا نَهرُبْ مِنوُ ...
نَلقانا ... مساجينوُ ،
.........................
أتاريكْ . . رُحتِ قبلى هناكْ
وشلتِ معاكى . . كُلَّ الفاتْ