|
المجانين في نعيم !!!!
|
أعزائي في كل مكان جمعتكم مباركة و ليحفظكم الله من كل شر ,,,
عام ينقضي ويجيء آحر وجميع الأعضاء والقراء بخير وعافية ..
خلال وجودي في هذا المنبر لاحظت أشياء كثيرة أهمها أن للناس فيما يعشقون مذاهب أوكل يغني على ليلاه فهناك
من هم مهوسون لدرجة الجنون بمواضيع معينة والبعض الآخر لا يقل هوسا في الدخول على البوستات بطريقتة
الخاصة لذلك وجب تصنيف أتواع الجنون والجنون كما يقولون فنون لذلك ارجو من بعض المجانين الذين تتشابه
شحصياتهم مع بعض مجانين هذا البوست خصوصا مجانين الشكل أن لا يسيئوا الظن فقد تكون الشحصية إفتراضية ولا
وجود لها ومن ثم يجب عليهم عدم الاقتراب والتصوير ..
* مجانين الكي بورد : هؤلاء يجلسون أمام الكمبيوتر لأكثر من أربعة وعشرين ساعة ويمكنك المراهنة على
وجودهم لا يقومون من أمام الكمبيوتر إلا للشديد القوي الحمام أو عمل ساندوتش سريع والعودة مرة ثاتيا
وهم أكثر نشاطا وحيوية .
مجانين الأعضاء الجدد * هؤلاء أناس طيبون يرشحون .. يرحبون طيلة العام ومن ثم يتركون العضو الجديد لايص
في البورد .
مجانين المناسيات السعيدة * هؤلاء لهم علاقات مباشرة مع متعهدي الحفلات ومكاتب التزويج والخاطبات والفنانات
يأتونك بالأخبار الجميلة جمال روحهم وبعد إنتهاء المناسبة لا يعرفون ماذا حدث للعروسين هل هم سعداء فعلا
ولا راحوا لآخر عبس ,
مجانين الأمراض والمستشفيات : هؤلاء أناس في قلوبهم رحمة ومودة يهتمون بأخبار المرضى وكأن لهم صلة مباشرة
بكاونترات المستشفيات وموظفي تسجيل المرضى .
مجانين الوفيات * هؤلاء استطاعوا بقدرة قادر أن يحولوا المنبر إلى مقابر أحمد شرفي والبوستات إلى حمد وخوجلي
والمداخلات إلى حمد النيل ربنا يكفيكم شر أيام في حياتنا !!!
مجانين : الكورة * هؤلاء المهوسون بكرة القدم جعلوا من المنبر مربع أخضر له حراس مرمى ولاعبون وحكام و
رجال خط ومحللون ومشجعون لدرجة الهوس ,, هلال مريخ وما عداه باطل .
مجانين الشعر : أناس حالمون يعيشون في عالمهم الخاص يتنفسون شعرا يأكلون شعرا ويحلمون شعرا ولا علاقة لهم
بما يحدث في البورد لم يسمعوا بالمشاكل في المنبر ولا الضرابات كما يقول أهل الخليج لا يهمهم إذا تداخل
الأعضاء معهم أو لم يتداخلوا ,, الشعر واحتهم وما عداه أضغاث أحلام.
مجانين المواضيع السياسية * هؤلاء يعيشون على السياسة ويموتون عليها وأي موضوع آخر غير السياسة يعتبرونه
باطل ولا يحرك في ر أسهم شعرة .
مجانين المواضيع الاجتماعية * زي حالاتي ,, هؤولاء يحبون مجتمعهم لدرجة الجنون يتابعون أخباره وشماراته
يطرحون موضوعاتهم من وجهة نظرهم الخاصة لذلك يكونون أكثر عرضة لسهام حزب المعارضة المرابط في المنبر
ويا ويلهم ولو جابوا موضوع لا يتناسب وهوى الجندريات !!
مجانين المواضيع الجنسية والمشاهد العاطفية * ديل لو شافوا كلب وكديسة واقفين وقفة حميمة جاد لهم خيالهم
الخصب بخلق مشهد عاطفي ساخن أو قصة حب عاصفة بين الاثنين وأي موضوع آخر يخرج عن هذا السياق لا يهمهم.
مجانين الشكل * يقميون عدوات اسفيرية مع بعض أو كل الأعضاء بلا سبب , نادرا ما يكتبون وكثيرا ما
يتداخلون ليخلقوا مشكلة من العدم لهم أساليبهم الخاصة في الرد على الخصم من منطلق العيار الما بيصيب
بيدوش لذا تلاحخظ أن عيارهم الناري نت النوع الثقيل ,, يفترون على الخصم ويشككونه في نفسه وفي قدراته
دون سابق معرفة وبا ويلك لو حاولت الدفاع عن نفسك .
مجانين تشتيت البوستات* لا هم لهم سوى تشتيت المواضيع , لا تعرف دوافعهم ولا أجندتهم الخفية ولكن لا يصمد
أي بوست أمامهم سوى لحظات ويكون في خبر كان .
مجانين قولة الحق * لا هم لهم سوى فض النزاعات الإسفيرية ولا يخشون في الحق لومة لائم وهم اشجع الناس في هذا
المنبر .
وأخيرا مجانين المجاملات * هؤولاء أناس أخلاقهم عالية .. طيبون لدرجة الجنون يدخلون في كل المواضيع يمدحون
كاتب البوست ويشدون من أزره ولكنه لو وقع في زنقة ولا مصيبة يقفون بعيدا لكي لا يزعل منهم أحد الطرفين
ومع ذلك وجودهم ضروريا في المنبر.
خارج النص ) أطلب من الله عز وجل الرجمة والمغفرة للسيدة بنايز بوتو بقدر محبتي لها . وفتكم بعافية بس
عايزة رايكم وكل عام والمجانين في نعيم .
(عدل بواسطة عواطف ادريس اسماعيل on 12-28-2007, 04:20 PM)
|
|
|
|
|
|
|
|
Re: المجانين في نعيم !!!! (Re: عبدالكريم الامين احمد)
|
سلام يا عطوفة مرحب بيك فى آخرجمعة فى 2007 نتمنى ليك عبور ساخن كما يقول الألمان للسنة الجديدة
كان إستشرتبنى فى إسم البوست دة كنت إقترحت ليك تسميه "كل زول بى جنو"
وى فيها طرفة حقيقية فى "إحدى الدول العربية"
ودى داخلة فى كلام النسوان
قالوا فى سودانيتين واحدة زوجها بتاع كشتينة والتانى بتاع ذكر .. الإتنبن برجعوا البيت مع هبايب الصباح .. زولة الكشتينة بدت تتزمر وتشتكى .. بتاعة الذكر ما بتقدر تنتقد يعنى .. فإكتفت بقولا "يختى الحال من بعضو .. وكل زول بى جنو"
وإنتى الله يستر عليكى بعد ما هابشتى المجانين ديل كلهم
مودتى
| |
|
|
|
|
|
|
Re: المجانين في نعيم !!!! (Re: saif massad ali)
|
اختنا عواطف ... كل سنة وانت طيبة وربنا يديك الفي مرادك
ياخى الرسالة دى جاتنى قبل العيد باسبوع من قارئ وفى تقديرى انها تصلح للنشر تحت عنوان بوستك ده
( مجانين في نعيم )
نص الرسالة ( طبعا حذفت منها الاسم وارقام الهواتف ) ... الاخ الاستاذ الطاهر ساتى تحية طيبة وبعد بدون مقدمات اشرح لك مشكلتى الخاصة جدا واسف جدا على طرحى عبركم ولكننى تاذيت منها ولولا ذلك ما كان طرحتها انا شاب في العقد الثالث من عمري ( 35 سنة ) والحمد لله ميسور الحال واعمل في شركة خاصة محترمة براتب محترم تزوجت قبل سنتين ولكن لسوء تفاهم بينى وبينها طلقتها باحسان والان بينى وبينها احترام وتقدير التكافؤ الاجتماعى والثقافي ماكان متوفر بيننا وزواجنا تم بالطريقة بالبلدية ( غطى قدحك ) بناء على رغبة الاهل والاسرة وتم الطلاق قبل سنة تقريبا والحمد لله على حال ( كل شي قسمة ونصيب ) الان فكرت في الزواج ولكن فشلت في الاختيار ولم اجد التي تناسبنى حتى الان علاقاتى محدودة جدا و عندى نوع من الخجل واحتمال هذا سبب مشكلتى في عدم العثور على بنت الحلال المناسبة ساعدنى يا اخى بالبحث والاختيار وانا اؤمن بنظرية تزوج من يحبك ولا تتزوج من تحبه ويا ريت تتقدم لى واحدة بتحبنى لكن المجتمع لايرحم وبيفتكر ان الشاب هو من يتقدم للشابة وليس العكس انا اثق ان في بلدنا شابات متفهمات وفاهمات وعلى قدر كبير من العلم والمعرفة وعشان كدة طرحت مشكلتى والمواصفات التي اتمناها في صاحبة القسمة هى ان تكون جميلة وبيضاء او قمحية ان يكون لها قوام متناسق طويل ومقسم ورياضي وياريت لو بتمارس الرياضة بانتظام التنس او الطاولة او السباحة شعرها طويل وناعم عمرها يكون بين 20 و 27 سنة مثقفة وواعية ومحافظة و زولة حبوبة بتاعت فرفشة وضحك انا جني وجن المرة المكرضمة البتصحى مادة بوظا مترين لازم تكون رومانسية و لطيفة تحب الناس والاهل و ماتتزهج فينا بدون سبب تكون كريمة ومضيافة لى ضيوفها وضيوفى البخيلة بتقطع الرزق شغالة ولا ماشغالة ما مشكلة وما بنختلف لو شغالة زيادة الخير خيرين حتى لو طالبة انا مستعد اصبر عليها بعد الزواج حتى تتخرج ولا امنعها من مواصلة الدراسة لحد الدكتوراة لو هى عايزة تقدس الحياة الزوجية وترضى بالمقسوم وماتملانا ديون وهموم واشكركم كتيروعليك الله بعد ماتنشر احتفظ برقمى وبريدى عندك أى بنت حلال فيها المواصفات القلتها وعندها ارغبة خليها طوالى ترسل ليها عنوانها وتلفونها اهم شئ يا استاذ انا اشوفها - ولو في صورة - وهى تشوفنى عشان نقتنع ببعض ولو حصل النصيب اتصل بى وانا جادى جدا ولو ربنا سهل ممكن شهرين تلاتة بالكتير نكمل مراسم زواجنا انا جاهز و زول سترة عليك الله يا استاذ اهتم بموضوعى ده والله شاغلنى شديد خالص وما تنسانى من دعواتكم
...................( انتهت )
أها ... فى جن أكتر من كدة ..؟؟؟؟
| |
|
|
|
|
|
|
Re: المجانين في نعيم !!!! (Re: الطاهر ساتي)
|
الطاهر أنداندي
Quote: ان تكون جميلة وبيضاء او قمحية ان يكون لها قوام متناسق طويل ومقسم ورياضي وياريت لو بتمارس الرياضة بانتظام التنس او الطاولة او السباحة شعرها طويل وناعم عمرها يكون بين 20 و 27 سنة مثقفة وواعية ومحافظة و زولة حبوبة بتاعت فرفشة وضحك انا جني وجن المرة المكرضمة البتصحى مادة بوظا مترين لازم تكون رومانسية و لطيفة تحب الناس والاهل و ماتتزهج فينا بدون سبب تكون كريمة ومضيافة لى ضيوفها وضيوفى البخيلة بتقطع الرزق شغالة ولا ماشغالة ما مشكلة وما بنختلف لو شغالة زيادة الخير خيرين حتى لو طالبة انا مستعد اصبر عليها بعد الزواج حتى تتخرج ولا امنعها من مواصلة الدراسة لحد الدكتوراة لو هى عايزة تقدس الحياة الزوجية وترضى بالمقسوم وماتملانا ديون وهموم |
بالله خليهم اتنين ..
| |
|
|
|
|
|
|
Re: المجانين في نعيم !!!! (Re: رأفت ميلاد)
|
ريري !!!
سلامات يا سيد الكل ,,,
غايتو عندك جتس نكات لو كنت قاعد في السودان ما عارفين حيحصل أيه ؟
طبعا أنا قلت أكتب البوست دة الحي الله والكاتل الله وطبعا ما خفت عشات وراي رجالة بس أو تطلعوا زي
مجانين المجاملات ,,!!!
| |
|
|
|
|
|
|
Re: المجانين في نعيم !!!! (Re: doma)
|
يا دومة يا بت أمي أنا بمزح معاك مالك مسحتي المداخلات !!!
والله إنت حساسة لدرجة الجنون !!!
ليه كدا يا بت أمي ؟؟؟
آسفة ما بقص حاجة والله ...
| |
|
|
|
|
|
|
Re: المجانين في نعيم !!!! (Re: عواطف ادريس اسماعيل)
|
عطووووف.. كل سنة وانتى طيبة وأسرتك الكريمة كمان.
أسلوبك فى الكتابة هو السهل الممتنع نفسه.. وصفك صادق ..وفعلا الجنون فنون.
انا غايتو جنى مركب ...وشفت نفسى فى مجانينك ديل كللللهم.. ما عدا ناس الكورة.
| |
|
|
|
|
|
|
Re: المجانين في نعيم !!!! (Re: AMNA MUKHTAR)
|
أمون !!!
الدر المكنون ,,,
صباحاتك سعيدة !!!
وكل سنة وأنت أكثر تألقا..
والله يا ريت لو كل المجانين زيك كان البوست دة بقى في غاية العقلانية ,,
شكرا على هذا الشعر أقصد الكلام الغجري المجنون !!! طبعا دا مدح على قولة نزار قباني !!
| |
|
|
|
|
|
|
Re: المجانين في نعيم !!!! (Re: عواطف ادريس اسماعيل)
|
سلامات أستاذة عواطف أزيدك في الجنون صنف مجانين الـ(أنا) ديل كمان ممكن يركبوا أي من أصناف الجنون التانية وبقدرة قادر يحول الموضوع لـ(أنا) يعني مع مجانين الكورة يقول ليهم زمان لما كنت باك لفت في المنتخب ومع ناس السياسة يجيب ليك تاريخه في المعتقل و الأركان و المناظرات وهكذا دلاليك وفي صنف آخر هو مجانين الصفحة الأولى دا أحد أعراض جنون الأنا, اليوم كلو شغال يجيب عناوين ما انزل الله بها من سلطان ولا بتشبه متن المقال المهم تجيب الزوار و الردود وبلا خجلة يرفع فيها كل ما تقع بالنقطة و الـ(UP)
حتما جاي راجع مواضيع شيل الحال دي بتكيفني جدا
| |
|
|
|
|
|
|
Re: المجانين في نعيم !!!! (Re: عواطف ادريس اسماعيل)
|
اكعب حاجة جنون البقر !! انتى مش قلتى لى بهاء صالح دا براهو وبهاء عيسى براهو ؟؟؟؟ طلعو شخصية واااااااااااحدة وياهو ذاتو الباسويردو كان رايح !! ياقول عثمان محمد صالح (الله يطراهو بالخير) متى ينضج عقلك ؟؟؟؟؟؟
| |
|
|
|
|
|
|
Re: المجانين في نعيم !!!! (Re: محمد البشرى الخضر)
|
حمودي !!!
سلام ليك وللواد العسل دة ,,
وكل سنة و إنتو طيبين ..
مجانين الأنا ديل لو شفت بعضهم يقرب يقول ليك أنا ربكم الأعلى غايتو بعرف لي واحد كدا كرهني أبوظبي
كل ساعة يقول لي أنا لمن كنت في المعتقل الفلاني ولمن كنت بدرس وين وين ولمن كنت بمثل ولمن كنت
برسم ولمن كنت بعزف ولمن كنت بلعب كورة ولمن ولمن وآخرتها يرجع يقول سبعة صنايع والبخت ضايع
في إنتظارك !!!
| |
|
|
|
|
|
|
Re: المجانين في نعيم !!!! (Re: عواطف ادريس اسماعيل)
|
عواطف العطوفة اول حاجة دى فرصة نقول ليكى كل سنة و انتى طيبة .. تانى حاجة .. مرات الجن رحمة .. و لحظات الجنون .. هروب مريح .. و فيها سعادة ما بعدها سعادة .. عليك الله شفتى ليكى مجنون (تعيس و لا صارى وشو) ..!!
| |
|
|
|
|
|
|
Re: المجانين في نعيم !!!! (Re: اسعد الريفى)
|
Quote: مجانين المواضيع السياسية * هؤلاء يعيشون على السياسة ويموتون عليها وأي موضوع آخر غير السياسة يعتبرونه
باطل ولا يحرك في ر أسهم شعرة |
ست اللهيج السكرى ، زى ما بتقول اختنا بيان
اها نوع الناس الفوق دييل رايحة ليهم كل حاجة
وسنة حلوة وجديدة
| |
|
|
|
|
|
|
Re: المجانين في نعيم !!!! (Re: ترهاقا)
|
ترهاقا !!!
محبتي وكل عام وأنت بخير وصحة وعافية ,,,
ديل يا عزيزي مش رايحة ليهم حاجة وبس ديل حيروحونا معاهم وربنا يستر !!!
وسنة حلوة يا جميل ...
| |
|
|
|
|
|
|
Re: المجانين في نعيم !!!! (Re: EMU إيمو)
|
إيمو !!!
عيدك سعيد زكل عام وأنت بخير ,,,
شكلك كدا كلك أنصاص يعني حتى الكباية بتاعتك الفي بروفايل نص ما يؤكد إنك نصف مجنون ونصف عاقل
وبرضك في نعيم !!!
| |
|
|
|
|
|
|
Re: المجانين في نعيم !!!! (Re: عواطف ادريس اسماعيل)
|
في مجاني غبد القادر
وفي مجانين امجانين
وبالمناسبة
المجانين احدى قبائل السودان باقليم كردفان الغرة الكان خيرها جوة وبرة
في مجانين الصور بالبدا والمكاتب الفخمة الفاتوا ناس شوفوني بي هناااااااااااااك
| |
|
|
|
|
|
|
Re: المجانين في نعيم !!!! (Re: maia)
|
عواطف / سلامات.. وتحيه والله بوست المجانين ده جاب ليه إعلانات زواج وإن شاء الله يتطور لعرس جماعى .. مالو ، برضو فكره .. جن وزواج !!! لكن بعد قراءتى للأنواع قلت هذا ( قلق ) وليس جنون .. لذلك أقترح تعديل المسمى الى ( القلقين فى نعيم ) فهناك ممن ذكرت بأن جنونهم حميد فلا يمكن وصفهم بمجانين فهم قلقين لكل ماهو سلبى فى المنبر وغير سار بالنسبة لهم ، لكن معظم ما تقدم فى طرحك فهم مجانين تربيع .. لك التحية وأنت داخل الشبكة ..
محمد مختار جعفر
| |
|
|
|
|
|
|
Re: المجانين في نعيم !!!! (Re: محمد مختار جعفر)
|
الأخت الحبيبة عواطف سلامٌ على روحك الطيبة
يكفيك هذا النوع من الجنون ( الإجتماعي) فهو سام على صدرك فأنت دائماً هناك بين السطور تحركين الحروف بخفة نارية فوق أوتار نخجل من عزفها، تكهربين الكلمات و تُُفعلين كيمياء اللغة بكفاءة عالية و بين تضاريس الأبجدية الوعرة كنت تشعلين الماء تارة و تسيلين النار و تحرثين الهواء و تنفخين الطين ، فتدب الحياة حتى لنظن أن حروفك من لحم و دم. بين كلمة و أخرى نعايش خفوت الهمس في قلمك ، كما نعايش تمرد البراكين فيها ، تلامسين ألسنة النار و أنت تشرئبين في رقصاتك المتحدية حتى أقاصي الكبرياء ، وحتى حين تتطرقين لموضوعات بعينها وحين تلامسين نسائم الأنوثة الناعسة و الرومانسية الحالمة تمايلتِ خجلا و انحنيت رقة في حضرة الهدف النبيل..فإن هاجمك البعض فقولي لهم سلاما!!
| |
|
|
|
|
|
|
Re: المجانين في نعيم !!!! (Re: ابوبكر يوسف إبراهيم)
|
أخي الحبيب د. أبوبكر !!!
سلام عليك يوم ولدت ويوم أتيت إلى هذا المنبر بوهج الشعر ورهافة الحس وشفافية الروح .. وسلام عليك يوم
أمتحنك الله ثم عافاك برحمة منه ولا يبتلي الله من عباده سوى الصالحين الطيبيبن فما أسعدنا بعودتك ووجودك
بيننا مع أنك لم تغب يوما عن فكرنا ولا منبرنا ,, ألف حمد لله على السلامة ونحنا مشتاقين وحاتك نحنا مشتافين
كتير وما تشوف شر بإذن الواحد الأحد ...
| |
|
|
|
|
|
|
Re: المجانين في نعيم !!!! (Re: maia)
|
ماية الحلوة ضحكتيني بالجد عشان كدا بجيك راجعة في واحد مجنون إسمه إيهاب عايزني في الإرشيف عليكم
الله انتظروني لامن أجيكم راجعة .. ما تمشوا سمح ؟
| |
|
|
|
|
|
|
Re: المجانين في نعيم !!!! (Re: maia)
|
ميوية !!!
سلام يا ست الكل ,,,
إنت في المصطلحات البتجيب الجلطة ولا الناس البجيبوا الجلطة ؟ ديل ربنا خلقهم عشان يجننوا خلق الله ويجيبوا
ليهم الضغط والسكري فعلا عالم مجنون وينزف ليل نهار بأشياء أسوأ من الحمى النزفية زاتها ..
تسلمي من كل جلطة ويكفيك شر خلقه !!!
| |
|
|
|
|
|
|
مجانين ساس (Re: عواطف ادريس اسماعيل)
|
سلامات حبيبة مجانين السياسة الزي حلاتنا أسغل نوع كلامهم كلو أثبت لي و برهن لي أما المفردات ففي الغالب لابسة بدلة و كرفتة و معسمة جنس تعسّم هذه الفئة من المجانين تنتهي بهم الامور غالبا ل: خمسمية تجعيدة على الوش و نضارة قعر كباية و بضعة شعرات على الرأس و مخ طارت معظم أبراجه
| |
|
|
|
|
|
|
Re: مجانين ساس (Re: lana mahdi)
|
مساء الخير يا أحلى سياسية !!!
كنت حأصدقك لو ماشفتك ولكن عندما رأيتك غيرت رأي في السياسة والساسة أيتها اللطيفة العفيفة صاحبة
الفكر الثاقب والقلم الرصين .. جنونك من النوع الهاديء هدوء نفسك وروحك الطيبة يا ريت لو كل
السياسيين زي حضرتك كان السودان بقى الفاتيكان !!!
| |
|
|
|
|
|
|
Re: المجانين في نعيم !!!! (Re: عواطف ادريس اسماعيل)
|
سلامات استاذة عواطف
نسيت اهم نوع من المجانين
مجانين اللغة العربية البعرفوها براهم- المثقفاتية و ناس شوفو لغتى خطيرة كيف
الواحد تقرى مداخلتو 7 مرات و ما بتطلعى منها بى اى معلومة مفيدة غير وجع القلب
| |
|
|
|
|
|
|
Re: المجانين في نعيم !!!! (Re: نهلة عمر)
|
نهولة !!!
والله إنت ألذ زولة ,,,
أنا قايلة روحي ما بفهم أتاري في ناس زيي بتصدقي ديل عندهم لغة قاطعنها من راسهم وبعرفوها براهم
أحيانا زي ما قالت مايا بجيبو الجلطة ,, تسلمي يا ست البنات .
| |
|
|
|
|
|
|
Re: المجانين في نعيم !!!! (Re: عواطف ادريس اسماعيل)
|
أختي عواطف... ما عارف أنا مع ياتو مجانين .. لكن لو تركت لي المجال.. أنا مع اللعبة الحلوة.. (مصطلح كورنجي)... بس كورك (من الكورة) كلها حلوة.. لأنها ملعوبة من كل الزوايا الإجتماعية.. ودائما ضربات معلم..بس ما شرط تسجيل الأهداف..وده طبعا مطلب بعض المتفرجين.. وبينسوا إن مرات اللعبة بتكون وسط جمهور غير الجمهور...والحكم بيكون متحيز..وبيكون في أمطار نازلة أثناء المباراة..ويكثر التزلق ويستحيل تسجيل الأهداف..أوع أكون من مجانين كرة القدم مع أنو ما بحبها... عواطف يديك العافية.. ويكملنا وإياك بعقلنا..قولي آمين.. وكل سنة وأنت طيبة
| |
|
|
|
|
|
|
Re: المجانين في نعيم !!!! (Re: خالد علي محجوب المنسي)
|
الأخت عواطف .. كل عام أنت وأسرتك بخير .. فضينا وجينا نشوف تشخيصك ..
اها عنبري مع الغاوون ديل .. كان شعر كان سياسة كان إجتماعيات كان أدب وأي كتابة دمها خفيف .. يعني مش غاوون (أوي كدا ) ذي الجماعة البتوسدو الكي بورد ديلك ..
| |
|
|
|
|
|
|
Re: المجانين في نعيم !!!! (Re: محمد على طه الملك)
|
الملك !!!
كيفك ؟؟؟
ما غويتك إنت الغويتني وما نسيتك أنت النسيتني في جن أكتر من كدة ؟؟ بالمناسبة إنت غاوي لطيف جدا بس
لما تتبع الشعراء أبعد من هاشم خلف الله ود. محمد حسن ديل حيودوك في ستين داهية عشان جنهم من نوع آخر
موديل 2008 و قوة 15 حصان !!!
| |
|
|
|
|
|
|
Re: المجانين في نعيم !!!! (Re: خالد علي محجوب المنسي)
|
خلودي !!!
سلامات ,,,
غايتو الحن دة عرفناه الإندراوة الما بتتداوى دي ما عرفناها شنو ؟؟
وبعدين ما تنسى في ناس جنهم كلكي و لابس ملكي زي ناس حبيب نورة كدا والله ليه وحشة شديدة لكن شايفاه
بدا يظهر من بعيد لبعيد .. إنشاء الله ما في عوجة .!!!
| |
|
|
|
|
|
|
Re: المجانين في نعيم !!!! (Re: Kamal Karrar)
|
كيمو !!!
يسعد مساك ,,,
بتصدق لمن كتبت عن مجانين الكورة طوالي اتذكرتك قلت يا ربي كيمو قاعد في ياتو استاد ؟
شكرا على التعليق الكروي المجنون دي على وزن الشعر الغجري المجنون وسلام للولد الحلو دة شكله كدة ظهير
أيسر ربنا يحفظه !!
| |
|
|
|
|
|
|
Re: المجانين في نعيم !!!! (Re: خالد علي محجوب المنسي)
|
خلودي !!!
شكرا على التوضيح الجميل ,,, الأغنية دي كاسرة فيني ضلعة والله وكمان اسماعين أحد الأصدقاء الأعزاء
الذين أفتقدهم جدا ربنا يرحمه بقدر ما أسعدنا بهذا الشعر الجميل ويحفظ عثمان اليمني بقدر ما
أستطاع أن يوصل إلينا هذا الكلام الحنين الممهور بالعواطف الجياشة ,,, شكرا خالد ربنا يسعدك ,,,
| |
|
|
|
|
|
|
Re: المجانين في نعيم !!!! (Re: عواطف ادريس اسماعيل)
|
عطوفة... أنا شبهت كتاباتك بماتش الكورة.. والذي تلعبين فيه بكل مهارة.. ولم أشترط تسجيل الأهداف.. وعرجت على توقعات القراء وهي غير واقعية في بعض الأحيان..ودائما ما تتوقع أهداف بمعزل عن الظروف المحيطة..
أرجو أن أكون وفقت في ذلك..
| |
|
|
|
|
|
|
Re: المجانين في نعيم !!!! (Re: Kamal Karrar)
|
الاستاذة /عواطف كل سنة وانتي بالف خير
عمنا دخل مسجد لانصار السنة وصلى معهم صلاة الجمعة وعندما سلم الامام مد يده ليصافح الذي بيمينه فرد الجالس بيمينه ان هذه المصافحة ليست من السنة ... فرد عمنا اها مساختك دي من السنة ؟؟؟
دحين في مجانين المساخة والرد الجارح وهذا ما لمسته في رد شهد :
Quote: عُذرا فليس بيننا من الود ما يمنحك حق مناداتي بهكذا القاب عليه الرجاء التكرم بمناداتي بالاسم يمين الشاشة امامك تودد من لا يعرفونك و يدعونه هو احد اسباب قلة مشاركاتي |
وقلت في نفسي الحمد لله انها في سنة كاملة ما كتبت الا 26 مداخلة ...
اختنا عطوفة دي بتحب تنادي كل الاخوة والاخوات في هذا المنبر باسماء دلع .. وهي يا شهد ما جاتك في بوست فتحتيه .. انتي الجيتي فدحين لزوم المساخة شنو آخر السنة ؟؟؟
ولا ده جن مساخة ؟
| |
|
|
|
|
|
|
Re: المجانين في نعيم !!!! (Re: علاء الدين حيموره)
|
علاوي !!!
نهارك سعيد ,,,
مجانين المساخة ديل عندهم قصص كتيرة ومسيخة زيهم بتذكر واحد من أجداد أولادي الشوايقة قالو مسيخ
جدا مرة زوجته زعلت منه جنب البحر وقالت ليه ماشة أقع في البحر وارتاح منك وكانت فاكرة حيرجعها
ماشة وتتلفت وما فيش فايدة قامت جات راجعة قالت ليه أمسكلي حجباتي ديل عشان ما أقع بيهن في البحر
طبعا عايزة تحننو ويقوم يحلف عليها قام بكل مساخة قال ليها أقعي بي حجباتك .. أقعي بي حجباتك !!!
تصور كل المجانين ممكن يكونو في نعيم ما عدا مجانين المساخة !!!
| |
|
|
|
|
|
|
Re: المجانين في نعيم !!!! (Re: Kamal Karrar)
|
كيمو !!!
يا سلام عليك ,, كله ساعة بتثبت لي أنه المجانين في نعيم بس جن الكورة من النوع البتحب يعني ممكن
الواحد يقعد جنب مجنون كورة للصباح وما يزهج ,, شكرا ربنا يحفظك ,,,
| |
|
|
|
|
|
|
Re: المجانين في نعيم !!!! (Re: عواطف ادريس اسماعيل)
|
كل عام وانت بخير
استاذه /عواطف
والله ما قلت الا الحق
بس في فئة ماذكرتيها
المجانين البره( الزوار)
والله انا كنت منهم وبديل زماااااااااان سنة2006 اخذت جوالك من البرفايل
واتصل عليك
كنت مفتكرك واحده زميلتنانفس الاسم ثلاثي
والان اشكرك علي الاستقبال وحسن الرد .. ومتاسف اذا كنت ازعجتك
ودمت بود استاذه عواطف
| |
|
|
|
|
|
|
Re: المجانين في نعيم !!!! (Re: emad altaib)
|
عمودي !!!
ألف أهلا بيك ,,,
منور المنبر ,,,
تصور مجانين قراية المنبر ديل لذيذين جدا كلما يقروا موضوع يتصلو بيك إنشاء الله لو كانو في جزر
الواق واق يعني أنا عندي إتنين أشد جنا من غيرهم واحد إسمه عادل في بريطانيا دة بتصل بمعدل مرتين
في الأسبوع ما يؤكد إهتمامه بما يكتب فشكرا له وعندي سعاد من أمريكا دي بتتكلم بالساعات لمن أقول
ليها نعمل ليك عضوية بتقول لا بحب أقرا بس مع إنه في كتير من مجانين القراية اتحولوا إلى أعضاء
شكرا عماد كلك ذوق ,, سعيدة بوجودك بيننا ...
| |
|
|
|
|
|
|
Re: المجانين في نعيم !!!! (Re: ماجدة عوض خوجلى)
|
سيدتى المتجددة،،
بعيدا عن عناوين الجنون التى ذهبتى إليها هناك جنون خطير كم كان ودى ان تناقشيه بلغتك البسيطة (المريحة) لانها مباشرة جدا
هذا الجنون هو :
جنون الشك ، المناهض تماما للثقة , المربك لاى علاقة , ذلك الشك اللاإنسانى ، الذى من خلاله يمكن ان (تنسف) سنوات طويلة من مرارة وآسى وتضحية ,,
هل يمكن أن تحدثينا عن جنون الشك سيدتى؟؟؟
| |
|
|
|
|
|
|
Re: المجانين في نعيم !!!! (Re: مجدي عبدالرحيم فضل)
|
أدوني لي شربه ...
خلوني انقص دربه ...
بريد زولي ...
أبو قصي يا أروع مجانين المنبر كل قصيدة وإنت بألف خير ,,, أنتم تهيمون ونحن نتبعكم .. إلى أين
لا ندري !! ربنا يسهل ,, لا يزال القلم مرفوعا عنك حتى تستفيق !!! جناهنيئا واحلام سعيدة !!!
| |
|
|
|
|
|
|
Re: المجانين في نعيم !!!! (Re: abdelkhalig elgamri)
|
أخي الحبيب الجمري !!!
ربنا يحفظك من كل شر ,,,
دائما تقلب المواجع وتتطرق لحالات مستعصية مثل الشك وهو مرض نفسي خطير جدا يوصل صاحبه إلى مرحلة
الجنون المؤذي والمدمر.. لم أتطرق إليه لأن أصحابه ليسوا في نعيم بل في جحيم دائم لأنه يتشككون حتى
في أنفسهم ... كم هدم جنون الشك بيوتا آمنة وكم عصف بنفوس مطمئنة وكم دمر أروحا تهفو وتتوق إلى
غرس الجمال في كل ركن من أرجاء المنبر .. قاتل الله الشك والمتشككين وكل عام وأنت بألف خير أيها
الكاتب الجميل ...
| |
|
|
|
|
|
|
Re: المجانين في نعيم !!!! (Re: ماجدة عوض خوجلى)
|
ماجي !!!
شوقي إليك طال ,,,
بي وشين بس ؟ في واحدين بعشرة وشوش ديل مرة معاك ومرة مع الخصم ومرة ضدك ومرة ضد الخصم ومرة معاك
ومرة مع الخصم في الوقت نفسه يا ربي دة من شنو ؟؟
تلفونك الجديد راح مني أعذريني برضه النسيان أحد مراحل الجنان ,, ممكن أطلبه تاني ؟؟؟
| |
|
|
|
|
|
|
Re: المجانين في نعيم !!!! (Re: عواطف ادريس اسماعيل)
|
عواطف ازيك وكل سنة وانتي طيبة
Quote: مجانين : الكورة * هؤلاء المهوسون بكرة القدم جعلوا من المنبر مربع أخضر |
ديل نحن يا تيفة وبيني بينك الكورة دي جنها لذيذ وما بعوّق وشفتي براك قلتي مربع أخضر يعني منتهى الجمال .. واحسن من الجنون التانية البتجيب الهواء .. Quote: مريخ وما عداه باطل |
شنو ليك اها قلت اخفف عليك وخليتها ليك مريخ بس وما عداه باااااااااااااااااااااطل.
Quote: يتابعون أخباره وشماراته |
ده برضو لذيذ .. وبمناسبة الشمارات ياعواطف عندي بتي عمرها تسعة شهور بس وتحب الشمارات زي عيونها امبارح قاعدة في السرير وتتشمر في عمها داير يولع الشيشة اتفنقلت طقت جبهتها بي طرف السرير.
Quote: مجانين المواضيع الجنسية والمشاهد العاطفية |
ده .. استمارات العضوية خلّصت والصف لسة طويييييييييييييييل وقالوا رسّلوا يجيبوا استمارات جديدة
Quote: أطلب من الله عز وجل الرجمة |
عواطف!!! بالغتي لكن مع بناظير
| |
|
|
|
|
|
|
Re: المجانين في نعيم !!!! (Re: امير عوض الجمري)
|
أمير !!!
ألف أهلا بالأمير ,,,
مشتاقين ليك ولي جنك اللذيذ خصوصا جن الكورة لأنه لا بغلط عليك لا بوسخ إيديك ,,, مربع أخضر وفنايل
حمرا وصفرا وعينك ما تشوف إلا النور ...
شكرا على مريخ وما عداه باطل دة من ذوقك ...
بتك الحلوة بتاعة الشمارات دي تنفع معاي خالص بالله رسلها لي في أقرب طيارة والمهر مدفوع مقدم
باليورو ... عندي أربعة أولاد وجوكر !!!
استمارات العضوية الجديدة في الطريق خلي الأعضاء المعنيين يجهزوا شعورهم ...
أما الأخيرة فدي غلطة مطبعية ما بلاحظها إلا مجنون تدقيق ...
| |
|
|
|
|
|
|
Re: المجانين في نعيم !!!! (Re: عواطف ادريس اسماعيل)
|
Quote: سيدتى المتجددة،،
بعيدا عن عناوين الجنون التى ذهبتى إليها هناك جنون خطير كم كان ودى ان تناقشيه بلغتك البسيطة (المريحة) لانها مباشرة جدا
هذا الجنون هو :
جنون الشك ، المناهض تماما للثقة , المربك لاى علاقة , ذلك الشك اللاإنسانى ، الذى من خلاله يمكن ان (تنسف) سنوات طويلة من مرارة وآسى وتضحية ,,
هل يمكن أن تحدثينا عن جنون الشك سيدتى؟؟؟ |
اهليييييييييييييييييييييييييين
يا جماعة ود عمي لزم عبد الخالق محمد حامد الجمري معانا هنا وانا ما عارف والله لوم العدو
ازيك يا ابن عمي .. والله المنبر منوووووووووور
| |
|
|
|
|
|
|
|