سماحة جمل الطين ..... (توجد نماذج )...

عبارة شعبية متداولة مثلها ومثل (من برا هلا هلا ومن جوة يعلم الله )..
مثل بعض مقدمات ومذيعات فضائياتنا السودانية ( اكثر من نموذج ) ..
مثل الهلال اسم ولكن بلا القاب وبطولات خارجية ..
الامثلة قابلة للزيادة ..

أكثر من 32 دخلوا يشوفوا سماحة جمل الطين وما جابوا لينا حتى إنشالله (سخل صغير) كنموذج لهذا الجمل السمح .. ربنا يديهم العافية ..
اهانواصل :
بعض مقدمات ومذيعات فضائياتنا السودانية يعتقدن ان مجرد الظهور بمظهر لامع البودرة والمكياج مع التكلف والتقنزح في الكلمات ومخارج الحروف هي مشغلات الصاروخ الذي ينطلقن به إلى فضاء الشهرة الإعلامية ولذلك يكتفين فقط ببهرجة الملبس حتى لو كان يتنافي وعاداتنا وتقاليدنا ويحشدن حقائبهن بالكثير المثير ( الخطر ) من المكياجات والمساحيق ولا ينسين أن يحفظن بعض العبارات والمفردات الطنانة ( حفظ بلا فهم ) ليفاجئن المشاهدين بما لا (أذن سمعت) و(لا عين رأت ) معتقدات جهلا أنهن خرقن شاشة التلفزيون طولا وبلغن الشهرة الإعلامية من بابها الوسيع وما درين انهن إنما يقفزن بالزانة نحو هوة سحيقة من الضياع والتخلف .
يتبع ....

لماذا فشلت الجميلة هبة المهندس في الإستمرار عندما خاضت التجربة الإحترافية بالفضائيات الخارجية وتحديدا بالإمارات ..؟
ولماذا إنتكست جهود (الاجمل) نسرين سوركتي عندما حاولت من قبل الإلتحاق باحدي القنوات الفضائية العربية ..؟ ان مقدمة البرنامج السابقة هبة المهندس لا ينقصها الوجه التلفزيوني الباهي وقد وجدت رواجا عظيما أبان ثنائيتها مع المقدم الطيب عبد الماجد بل ونصبها بعض النقاد الإنطباعيين الأفضل والاميز تلفزيونيا وهو ما عرف بالخدعة الكبيرة التى تعرضت لها هبة المهندس والتى ساقتها لتلقي حتفها تلفزيونيا في بلاد المهجر كونها لم تستطع مجاراة الإيقاع السريع والثقافة العالية لمقدمات أجمل كثيرا كن ينافسنها خلال تلك الفضائية ولهذا تراجعت أسهمها بسرعة البرق قبل أن تسقط تماما في هوة الفشل والضياع ولم يعدأحد يذكرها أو يتذكرها إلا لماما وفي اوقات نادرة ..
صحيح ان الوجه الجميل مطلوب ومن مقومات العمل التلفزيوني ولكنه ليس كل شىء خاصة إذا تعرض للمنافسة من وجوه أجمل وتمتلك مقومات اخري مهمة مثل الحضور الذهني والثقافة الواسعة والتلقائية والبديهة الحاضرة فضلا عن الحضور الأليف والمحبوب لدي المشاهد .
يتبع ..

سلام عليكو ..

وعليكم السلام ياطلحة... لماذا لايعجبكم العجب والصيام في رجب!!! اتركوا جميلات بلادي يغردن

البـابـا ..

الحكيم ..

قاهـر الظـلام ..

الأربـاب ..

الكاردينـال ..


عبارة عن ألقـاب فشـخرة !!!!

اعتماد بعض مذيعات ومقدمات البرامج التلفزوينة مبدأ سماحة جمل الطين وإمتطاء هذا الجمل (الغشاش ) للولوج إلى عالم النجومية التلفزيونية خطوة واسعة في وحل الفشل .. التسلح بالكريمات والمساحيق التجميلية والتكلف في الكلام وإصطناع الضحكات الرنانة والإبتسامات الرقيقة لا تصنع مقدمة برنامج ناجحة ولا تعدو كونها مقومات ثانوية لا تضارع بأية حال من الأحوال الموهبة والثقافة والذكاء والحضور الذهني وسرعة البديهة وهي الأسلحة المطلوبة التى يفترض أن تحشدها مقدمة البرنامج التلفزيونية في حقيبتها قبل ان تملأها بالكريمات والبودرة والكحل والروج .. مشكلة مقدمات البرنامج في فضائياتنا انهن يصدقن عبارات المدح والتغزل الذي يجدهن من الشارع العام ويتلفظه المشاهد العادي وبعض النقاد الإنطباعيين ويعتبرن ان ذلك هو قمة النجاح والنضج التلفزيوني وبالتالي لا يسعين لتطوير انفسهن وتقنين مظهرهن التلفزيوني بالقراءة والإطلاع ومتابعة القنوات الاخري لمزيد من الثقافة والخبرة التلفزيونية وهو ما يقودهن للوقوع بسرعة في براثن الفشل في أول أختبار حقيقي لهن كما حدث لهبة المهندس وغيرها من اللائي حاولن الإحتراف خارجيا .

الاخ محمد علي حسن ..
كل عام وانت ومن تحب في أمن وأمان وصحتين وعافية .
كتبت :

Quote: لماذا لايعجبكم العجب والصيام في رجب!!! اتركوا جميلات بلادي يغردن .

ليس صحيحا ما قلته يا حبيب فهناك الكثير الذي يعجبنا ويسر بالنا وقد أوضحت ذلك ضمنيا في هذا البوست وقلت :

Quote: بعض مقدمات ومذيعات فضائياتنا السودانية

وبعض هذه عنيت بها الجزء وليس الكل ما يؤكد أن البعض الآخر يعجبني وأطرب لتغريده ..
هذا فيما يتعلق بالمقدمات والمذيعات ..
أما بخصوص ما يعجبني خارج هذا الإطار فهو في هذا البوست :

Quote: الحلقني + ود المك + رماز = النغم الشجون ..

وغيره من البوستات التى ذهبت أدراج الأرشيف ..
أبقي عافية يا حبيب ..

سلام الله عليكم
أعتقدأن من البعض الذي يعجب ، مجموعات المذيعات الجدد في برنامج البيت السعيد الذي يبث من القناة القومية لتلفزيون السودان .
هل توافقوني الرأي ؟

حسين يوسف
كل سنة انت وجميع الاحباب بخير وصحة
كتبت :

Quote: البـابـا .. الحكيم .. قاهـر الظـلام .. الأربـاب .. الكاردينـال .. عبارة عن ألقـاب فشـخرة !!!!

ومال انت قايل شنو يا حبيب ..
جائيك لسماحة جمل الطين الأزرق دي ..
كل العافية .

فوق

نريد ايضا حديثا منصفا عن المميزين من مذيعى السودان(يعنى الرجال)
وبعض الحديث عن اللاتى اختفين بعد نجاح...
واوع تتكلم عن المذيعات بخشن التلفزيون كيف؟ نحن فى بلد ديمقراطى!! انت ما سمعت بالانفتاح؟ يعنى الانفتاح ما ببدى بالفتوحات!!!!!!!!
فتك بى عافيه.

فوق حتى إشعار آخر ..

Quote: وما جابوا لينا حتى إنشالله (سخل صغير) كنموذج لهذا الجمل السمح

هووووي هـــــا ..
يا مسكين إنت ..
إنت لسه مسخنة معاك المسالة بتاعت كرنقــو ..؟ اصلو الدخلت فيك من اليوم داك ما مرقت ..
سخل شنــو ياهداك الله .. الناس يقولو ليك الجمل ما بشوف عوجة رقبتو شابكنا سخل .. وشنو ما عارف ..
وجاي طااخ كمان جايب ريماز مرغني ..
يازول إنت عايز مننا شنـو بالضبط كدا شان نكون واضحين..
ياخي مسكنتك فاتت الحدود .. اصبحت مسكين يشار إليه بالبنان .. البنان الغير مخضب والبنان المخضب ..
بقيت مشهور على مستوى كل البنانات ..
وين صاحبك القال عايز يحنن كدايس كدارة معز محجوب داك ..
ياخي إنتو مووبالغة عديل كدا

رايك شنو نختصرك ..؟
يعني بدل مسكين نسميك ( مسكي ).. وممكن نخليها ( تستطيل ) شوية لتصبح
( مسكول )
تاني كان جبت سيرة زولة كدا ح اقول ليك دا شنــو يا مس كول يا مسكين

العزيز سميح
كل الود وربنا يحقق الاماني ..
قلت :

Quote: نريد ايضا حديثا منصفا عن المميزين من مذيعى السودان(يعنى الرجال) وبعض الحديث عن اللاتى اختفين بعد نجاح... واوع تتكلم عن المذيعات بخشن التلفزيون كيف؟ نحن فى بلد ديمقراطى!! انت ما سمعت بالانفتاح؟ يعنى الانفتاح ما ببدى بالفتوحات!!!!!!!! فتك بى عافيه.

الذين تعنيهم وبدون تحيز للجنس هم كثر ومنهم مثلا سعد الدين حسن في قناة النيل الأزرق والذي إستفاد كثيرا من النقد ووجهة نظر الآخرين وتخلي عن عادة (التكلف) والتى طالما خصمت كثيرا من مقدراته وإمكاناته المهولة ليعود متألقا وبارعا وأكثر بهاء خاصة في برنامج اغنيات من البرامج ..
وهناك أيضا الاخ حامد الناظر الذي إنتقل للعمل في شروق بعد ان ابدع في النيل الأزرق وغيرهما كثر ..
أما النوع الآخر فعندك مثلا ناجي حسن الذي ظل طوال عمله بالتلفزيون (محلك سرك ) لا يميزه سواء المكياج اللامع ودا علي سبيل المثال ..
وبالنسبة للمذيعات بخشن التلفزيون كيف ..؟ فدا فيهو أقوال وأقوال وخليها مستورة ..
أها سلم علي الجماعة بلاي ..

العزيز ميرغني علي
كل التحايا وأحلي الامنيات وكل سنة وانت طيب ..
كتبت :

Quote: أعتقدأن من البعض الذي يعجب ، مجموعات المذيعات الجدد في برنامج البيت السعيد الذي يبث من القناة القومية لتلفزيون السودا

وأضيف محددا من اللائي يعجبن في فضائياتنا السودانية الأخت سلمي سيد التى ورغم جنوحها للإستعراض بشعرها وجمالها إلا أنها تملك الكثير من مقومات الإعلامية الناجحة وفيها شىء من ليلي المغربي رحمها الله وأحسن اليها ..
وأيضا الأخت هيام بالنيل الأزرق والتى تم ركنها في برنامج جامد (بعض الطبع ) رغم حيويتها ونشاطها وقدراتها الحوارية العالية ..

المسكين الشايل عكاز قناية ماكلا السوس وواقف جنب الشباك تمبس ..
أقتبس مما كتبت تحديدا :

Quote: (1) ياهداك الله .. (2) كمان جايب رماز ميرغني .. (3) يا زول انت عايز مننا شنو بالضبط كدا .. (4) كان جبت سيرة زولة كدا ح ..

(1) مابك ياهذا أية رياح القت بك في مخيمنا يا شخص ..
(2) ومال أجيب ست النفر يعني واللا كيف .. ؟
(3) عايز ليكم الخير لو كنتم تعلمون ..
(4) سيرة زولة كدا ما بجيبا لكن بجيب سيرة رماز ميرغني حتى ولو كره بين قوسين الحاسدون .. (اختر من الوشوش ما تراه مناسبا) .

ما ينطبق علي مقدمات ومذيعات الفضائيات السودانية هو ذاته الذي ينطبق علي المقدمين والمذيعين حيث ان بعضهم يحتاج لدرس عصر وصباح ومساء لترقية ادائه التلفزيوني وإلا لظل من برة هلا هلا ومن جوة يعلم الله ..
وذات الأمر ينطبق علي الكثيرين من مختلف قطاعات المجتمع الثقافية والفنية والرياضية فهم مجرد سماحة لجمل صنعه نحات قدير من الطين والصلصال ..
الهلال العاصمي مثلا وبرغم أسمه الكبير والرنان وجماهيره التى تأتي في المرتبة الثانية بعد المريخ من حيث العددية فانه حتى الآن وياللاسف مجرد فريق في طور المحلية لم يقو علي مبارحة شرنقتها والإنطلاق في فضاء البطولات الخارجية برغم الهيصة والضجة المثارة حوله وبرغم اطنان الكلام التى صرفها رئيسه صلاح أدريس في الصاح والغلط ..
أن الهلال يحتاج لمراجعة دفاتره وترتيب أوراق هذه الدفاتر حتي يستطيع أن يكتب في صفحة جديدة فصل واحد من قصص البطولات والإنجازات العريضة والعديدة التى صاغها شقيقه الأكبر المريخ وقرأها التاريخ بكل الفخر والإعتداد ..

كل سنة والسودان وطن الشدو الجميل ..

للتكرار

فوق للجمال .......

والجمل السمح ماشي و.....

يا طلحة

بالله كوثر بيومي مالا؟؟ عيبا لي.


لكن والله في واحدة كدا في النيل الأزرق البتقدم برنامج رحلة داخل عقل إمرأة.

يا زول.....
سماحة
رزانة
أناقة
ثقافة
إلمام بالموضوع البيكون موضوع الحوار
تخلي الضيف ياخد راحتو في الكلام

والله عملت سهرة مع بازرعة وعثمان حسين (في بورتسودان )ما حصلت.


لكن علي اليمين أناكوثر بيومي دي ألقى فيها فرقة أديها سوطين فوق ضهرا وسوطين فوق بطنا وأطردا من أم درمان كلها مش من التلفزيون وبس.

شماشي سلام عليك ..

Quote: لكن والله في واحدة كدا في النيل الأزرق البتقدم برنامج رحلة داخل عقل إمرأة.

غايتو البتقدم البرنامج اللذيذ دا أسمها هيام ..
وهي فعلا كما قلت تماما:

Quote: رزانة أناقة ثقافة إلمام بالموضوع البيكون موضوع الحوار تخلي الضيف ياخد راحتو في الكلام

وبالمناسبة أمس مشت رحلة مع ماما ستنا بابكر بدري وكالعادة كان البرنامج متعة ..

لكن الزولة ال..

Quote: عملت سهرة مع بازرعة وعثمان حسين (في بورتسودان )ما حصلت.

دي سلمي سيد وهي أيضا تملك العديد من مميزات الإعلامية ومقدمة البرامج الناجحة فقط أعيب عليها جنوحها في الفترة الأخيرة للإستعراض بشعرها الطويل وجمالها الواضح برغم أنها لا تحتاج لذلك ..
كوثر بيومي لم أشاهد لها برامج بصراحة ..

الكتابة / الكلام
يعبران عن نفسية صاحبهما
وشكلك اليومين دي فى حالة نفسية بطالة
طلحة يا أخوي
غير النضارة البتشوف بيها العالم
أو أبقي هلالابي
عشان تحس بالجمال الحقيقي والجماليات من حولك
سنة سعيدة عليك

ياخ وحاة الطلاق ليك وحشة كاملة غير منقوصة كل سنة وانت وجميع احبابك بخيرين وزيادة كتير يا فضل يا كرار .
قلت لي :

Quote: غير النضارة البتشوف بيها العالم أو أبقي هلالابي

واكون كما المنتقل حفيانا من الرمضاء للنار عديل كدا ..

Quote: واكون كما المنتقل حفيانا من الرمضاء للنار عديل كدا ..

عليك نووور
وأيوة بالضبط كدا
أصلو نحن الحال المايل ما بيعجبنا
يا كأس عدييييييييييييل يا أخير العدم
مش نا س جماعة مساكين فرناحيين بي أي حاجة
نحن يا عمك كان عشقنا بنعشق قمر وكان سرقنا بنسرق جمل
مش سخيل وللا عمبلوق

سفن أب ....

فضل كرار الحبيب المسكين بهدوء
كتبت :

Quote: مش نا س جماعة مساكين فرناحيين بي أي حاجة

أوع بس تقول لي (أية حاجة) دي من لدن كاس الكوؤس الأفريقية الذي جلبه المريخ القهار وفجر به ينابيع فرح وفخر الشعب السوداني في وقت كان فيه ناس قريعتي راحت يشخرون ..
واللا كاس سيكافا 1و2 والذي حاكي فيهو الهلالاب الكديس الذي لم يطول اللحم فقال عنه عفن ..

قلت لي :

Quote: نحن يا عمك كان عشقنا بنعشق قمر وكان سرقنا بنسرق جمل مش سخيل وللا عمبلوق

لا واضح شديد ياخوي والدليل أنو زريبتكم ملانة بالجمال والنوق ومسرحكم الغنائي تمرح فيه وتسرح الغناية ندي القلعة بتاعت الدقو منو يا ناس ..

سفن up ...

دي سماحة خلقة ومعاها إبداع ..
إستراحة قبل الصراحة ..
وعيشوا معاي الحب ..

http://www.youtube.com/v/63P2BbfszDM&autoplay=1[/flash][/align]

سفن up ...