طلال حلفـا .. لو تعرف معنى الأشواق ( عـيديـة ) ..

العيد وما أجمل اللحظات فيه ..
الحنين ..
الأشواق ..
ولمة الأهل والحبان ..
تمر بنا الأيام ونحن بعيدين عن الوطن وعن ترابه ..
كيف نعزي أنفسنا في لطول هذا الغياب ..
أتكفينا ذكرياتنا أن تحمل كل هذا عنا ..
أم نصبرّها على وعد اللقاء ..
كل عام وكل أهل السودان بخير ..
كل عام والوطن يرفل بثوب الوئام والسلام ..
لكم كل ما نتمناه لنهديه في هذا العيد ..
كل سنة والبورداب جميعاً بألف خير ..
وعيدية خاص للزول الجميل طلال حلفا وهو يحمّلنا هذه الأشواق أمانة ..
ولصاحب النغم الجميل الفنان الهادي الجبل ..

معتصم يا رائع

كل سنة وانت طيب وكل الناس في الغربة يارب ينعموا بدوام الصحة والعافية وانا كان نفسي أقدم لكل الحبايب البعيدين عن الوطن عيدية وانت مشكور رسلت ليهم العيدية نيابة عني ، يارب المشاركة دي تعجب كل متصفحي سودانيزاون لاين .

أحبتي:

ونسجت من طوق الثريا والأزاهر كل غنوات التهاني والمني...
وجدلت من شوقي اليكم اسمي آيات التجلة ما أظنه ممكنا...
فاذا بلغتم الأعياد فتذكروا ان التهاني كلها مني أنا...

كمان لي اخ عزيز جدا" في كارديف بقول ليهو العيد بدونك ما ليهو طعم يا عثمان يا محي الدين يا فنااااااان كل سنة وانت بألف خير.

طلال الجميل ..
لك ولمن تحب كل الأمنيات الطيبة ..
العيد يتبارك عليك والجايي يلقاك بخير ..

طائر الحنين يغرد بنا على شاطئ الذكريات ليصحي فينا حلو ما مضى من أيام ..
هذا هو حالنا التمنى ..
وقتها تطوف بنا لحظات كثيره نقف على محطاتها بصحبة الأهل والأصدقاء والأحباب ..
العيد حالة حضور لمن غاب عنك وإفتقدته في تلك الأيام ..
قد لا تكفي رسالة تحملها الأشواق عبر الأثير أو الهاتف ..
ولكننا نصبر بها أنفسنا وما تحمله من حنين ..

شكراً يا صديق وأنت تحرك فينا صمت الحنين وتهدي لنا كل الأمنيات ..
لك وللفنان عثمان محي الدين أجمل المنى وأسعد اللحظات ..

محبتي ..

الأخ العزيز معتصم


كل سنة و انت طيب و ان شاء الله تتحقق كل أمانيك ..



تشكـر على العيدية الجميلة ..

.
.
.

ألف مرحب بطلال بيننا و عذراً ان جاء الترحيب متأخر ،،،





مع التحية






حسام

الحبيب حسام الصحافة ..
كل سنة وأنت أجمل ..
ربنا يحقق كل أمنياتك ..
شكراً للمعايدة الرقيقة ..
السنة الجايه مع الأهل والأحباب يا رب وجميعكم بخير ..
وتحية عبرك للزول الجميل طلال حلفا وشكراً لترحابك ..

يديك العافية ..

الشاب الوجيه والعريس المرتقب معتصم دفع الله كل سنة وانت بالف خير وعافية
وربنا يجمع كل الأحباب علي خير وعبرك اعيد علي اخونا طلال حلفا صوت جميل
وإختيار جميل والتحية عبرك للفنان النوبي حسين بشير وقد إستمعت لهذه
الأغنية بصوته أيام دراستي في جمهورية مصر العربية .

وانت طيب يا هاشم وبألف خير ..
يعيده عليك ومن تحب بالصحة والأماني الطيبة ..
ويرد غربتك وغربة الجميع لوطن آمن يعمه السلام والمحبة ..
وتحية عبرك للفنان حسن بشير ونعيد عليه من على البعد ..

محبتي ..

عزيزي الأخ هاشم

كل سنة وانت طيب واشكرك علي المعايدة ، وأحب أؤكد معلومة مهمة انت ذكرتها انا كنت داير اقولها في ردي علي الحبيب معتصم ولكن خفت من الأتهام بالتجني علي الصديق الفنان الهادي حامد.
فعلا" هذه الأغنية للفنان النوبي المصري حسين بشير وانا قبل ما اقوم بترديدها زرته في القاهرة لأخذ الاذن بذلك ووجدته ترك المجال الفني لألتحاقه بالعمل الدبلوماسي في جامعة الدول العربية ووجدت منه كل الترحاب وهو شخص ودود وطيب جدا" وقام دلاني علي شاعر الأغنية وملحنها وهو أيضا" نوبي (رطاني من عندينا) اسمه عبدالعزيز زين العابدين ، تعرفت عليه بل تعدي الأمر أكتر من ذلك وقمت بشراء هذه الأغنية منه نصا" ولحنا" وقام بكتابة تناذل بذلك وهي من ضمن أغنيات الألبوم الجديد والذي سوف يطرح في الأسواق قريبا" ان شاء الله.
الهادي حامد سمع الأغنية في فترة اغترابه في ليبيا وجاء الي السودان وكان بيغنيها في الحفلات العامة والخاصة والشهادة لله أنا سمعت بهذه الأغنية بصوت الفنان حسين بشير قبل أن أسمعها عند الهادي هي وأغنيات كتيرة تانية اذكر منها "أسمر سمار اللون جمال وعسل ... شغل بالي آه وعني رحل"
أنا سعيد بالتواصل معكم وسعيد بسماع آراءكم والعمل علي الأستفادة منها بقدر الامكان.

تحياتي لكم جميعا" والأخ حسام كذلك بقول ليهو عيد سعيد.
اشكر برضو معتصم الاداني الفرصة عشان اتواصل معاكمز

شكراً طلال على هذه المعلومات وهذا ما نحتاجه للإلمام بمثل هذه الأعمال من شعراء وملحنين وكويس انك زودتنا بشاعر هذه الأغنية الرائعة ومغنيها وبنرسل ليهم تحياتنا عبرك ..
الكثير من الإخوة النوبيين في شمال الوادي يتغنون بأغنيات سودانية كثيرة حتى إختلطت علينا أغنياتنا مع اغنياتهم وبعضهم يقول ليك دا تراث نوبي وأعتقد حقوق المؤلف دي ضرورية جداً ليحفظ الشاعر حقه في ذلك ..
لقد سمعت الأغنية عند الفنان الهادي الجبل ومن بعده عصام محمد نور لذلك جاء ذكر الهادي وتهنيتي له بالعيد ظاناً بأن الأغنية له ..
شكراً مره أخرى طلال والشكر أيضاً للأخ هاشم أن نبهنا لذلك ..
مع أمنياتنا أن نرى لك دائماً الجديد الجميل ..

العزيز معتصم .. كل عام وانت بالف خير وصحة وسعادة ..

ربنا يحقق كل امنياتك ..

أشكرك على العيدية الجميلة ..والأغنية أكتر من رائعة ..

جمل الله أيامك أختي هند ..
العيد مبارك عليك وكل سنة وأنتِ بألف خير ..
وكل أمنياتك مجابه يا رب ..

شكراً جميلاً ..

العزيز / مو
الفنان الرائع / طلال حلفا

لكم مني كُل الرؤى وأحلام الزمن القادم ...

وكل عام وأنتم أكثر صحة وعافية ...


غايب زمن ...
قاطع رسايلك يا الحبيب
كملنا دمع الشوق عليك
وعيونا أضناها النحيب
سألنا عنك كل زول
إمكن يكون منك قريب
تاهت مراكبنا ورست
فى شاطئ الذكري الغريب
طولنا منتظرين بريدك
بي لهفة الشوق واللهيب
نرجع بدون أخبار ميعاد
عن عودتك يا أغلى طيب
وفضلنا حارسنا الأسى
تعبت قلوبنا من الفراق
ساعة المساء ...
كل العشم ترجع تعود
تسقينا كأس الأمنيات
وارويك من شهد الكلام
واهديك كل الحب كسا
نوقد شموع الذكريات
فى ليل هوانا ونحرسا.


***
يوسف حمدالنيل عربي

طلال عبدالرحمن

مسكاقنا

معتصم دفع الله

تحياتي

Quote: طلال عبدالرحمن مسكاقنا معتصم دفع الله تحياتي

صلاح واسبه من أندكم

وأنت بألف خير أخي صلاح واسبا ..
أعاده الله عليكم بالخير والبركات ..

تسلم يا الحبيب ..

كل سنة وانت طيب أخي فيصل ..
جمل الله أيامك وأعاده عليك بالخير والبركات ..

شكراً جميلاً ..

فيصل

كوري قون آجا نلا

كل سنة وانت طيب

يوسف يا جميل ..
شكراً على الأبيات المترعات بالحنين والأشواق ..
العيد يمر علينا وبه تمر العديد من الذكريات ..
أذكر جيداً تلك الكلمات الحنينة العفوية التي تخرج من الناس في ذلك اليوم وهي ترن في أذني الآن ..
العيد يتبارك عليكم ..
العفو في العافية ..
لله والرسول ..
إن شاء الله ربنا يعيده عليكم بالخير واليمن والبركات ..
كلمات رنانة تعيد دوزنة القلوب وتطربها في عفوية ومحبة ..
لا زلت أذكر لمة الناس بعد صلاة العيد وهم يتسالمون ويتقالدون ..
أذكر واحدة من الطرف أن هناك قريباً لينا سالام خلاس منتظر الإمام يخلص من الخطبة عشان يمشي عليهو يعيد وهو جالس على أمشاط قدميه تأهباً لهذه اللحظة ..
واحد من ظرفائنا بعد أن أنهى خطبته صاح فيهو يا شيخ اللمين أها قوم (أنفش) في الخلق دي ..
وكل ما دخلت بيت في يوم العيد تجد الفطور جاهز في الصالون ولازماً تمد إيدك تعز أهله والبيوت في ذاك اليوم مفتوحة تستقبل كل الناس في بشاشة وترحاب ..
يا لها من مشاهد ومشاعر جميلة أفقدتنا الغربة طعمها ..
رد الله غربة الجميع ..
وعاش الوطن وأهله في سلام ورخاء ..

شكراً جميلاً لأنك هنا ..

ابووجيدة (:

عيد سعيد يدوم عليك بالخير والبركة.

يا معتصم ما تدخل لي واسطة نشيل الكلمات المدهشة دي ونعمل بيها لحن..

أنا بالجد مبسوط اني بتواصل مع ناس دمهم خفيف بالشكل ده

مرة رديت علي واحد في موضوع هو ما كان فاهم عنه أي شئ!!

تخيلو نبذني نبذ!!!! وبعدها بقيت ما بتصفح الموقع ذاتو وكنت فاكرو كلو مهاترات!!!

والآن انا شايف العكس تماما".

معتصم ، حبايبك أكيد حبايبي وانا سعيد بالمداخلات الدمها خفيف جدا دي

دمتم ودامت لكم محبتي

يارب هذا التواصل الأليكتروني يمتد ويبقي تواصل دائم و حقيقي واشوفكم جميعا" بألف خير.

الرائع أخي الأستاذ معتصم
كل سنة وإنت بألف صحة وهنا
تسلم علي الأغنية الرائعة وربنا يديم عليك الأفراح
مودتي

Quote: تمر بنا الأيام ونحن بعيدين عن الوطن وعن ترابه .. كيف نعزي أنفسنا في لطول هذا الغياب .. أتكفينا ذكرياتنا أن تحمل كل هذا عنا .. أم نصبرّها على وعد اللقاء ..

لا عزاء لنا ياصديقى ...خصوصا لمن الغربة تدخل العضم

معتصم امنياتى لك بدوام الصحة والعافية....

وتحياتى لطلال حلفا والف مرحب بيهو...


مع محبتى....

يا معتصم

طلال حلفا خليهو
انتا مالك .. ما بتعرف معنى الاشواق ؟

عموما
كل عام وانت بالف خير
والسنه الجايه انت وهناى داك عرسان

الجميل معتصم

شكرا

وكل عام وانت بخير

و حقيقه ( لو تعرف معني الآشواق) عيديه جميله

الحبيب دكتور عبدالله صديق ..
كل سنة وانت طيب العيد يتبارك عليك ..
وجميع أمنياتك مجابه يا رب ..

كويس انو الأغنية صادفت حنين وأشواق في هذه الأيام ..
وهو عيد الأضحي المبارك والناس بتكون ملمومه مع بعض ومبسوطه ..
رد الله غربة الجميع وأعادهم سالمين غانمين يا رب ..

محبتي ..

وبعرف كيف ليها أشتاق ..
علي محمد علي كيفك يا زول يا أمير ..
كل سنة انت والحوليك كلهم بخير ..

Quote: والسنه الجايه انت وهناى داك عرسان

ما هو هناي دا الواقف لينا في وشنا زاتو ..
بيني وبينك أنا عايز أعمل زغبير وأبيع ليك الشغلانة دي في عقاب السنة الجاية دي ..
لكن يحلني الله من العصابة ديل

أبقى طيب يا زول يا زين ..

Quote: لا عزاء لنا ياصديقى ...خصوصا لمن الغربة تدخل العضم

لكن يا أميرة لقيت دميعاتك قريييبه والشوق حارق الجوف ..
الغربة بتعمل هشاشة الحنين وتزيد آلامه وأوجاعه ..
ما أحوجنا لتلك الديار وريحة الأرض والناس الحنان ..
إن شاء الله دائماً طيبة يا صديقة ..
ويعيده عليك بالخير وأنت بين أهلك وأحبابك ..
محبتي بلا حدود ..

اختي أميرة

والتحايا موصولة ايضا" ليك

وشكرا لترحابك

كل سنة وانتي بألف خير

الرائع الأخ طلال حلفا
كل سنة وإنت طيب وإنشاءالله تنعم بالحب والفرح والجمال دايما يارب ...وربنا يزيدك من إبداع وروعة....
مودتي












تخريمة:
بالله طلعت من أندينا

ويديم الأفراح عليك يا نهى ..
جمل الله أيامك وكل سنة وأنتِ بألف خير ..
العيد يتبارك عليك وشكراً لكلامك الطيب ولأنك هنا ..

Quote: تخريمة: بالله طلعت من أندينا

لا لا يا نهى ..
هسي الزول دا عايزين نديهو الجنسية خلاس

أخ معتصم
سلاماتي
لكن أهم حاجة يمتحن إمتحان التوفل النوبي عشان نديهو الجنسية بجدارة
يعني يدينا عدد واحد أغنية نوبية ونترك التقييم للجنة التحكيم...
واللا إنت رأيك شنو؟

Quote: لكن أهم حاجة يمتحن إمتحان التوفل النوبي عشان نديهو الجنسية بجدارة

خلاس دا يكون تحت اشرافك يا نهى ..

Quote: يعني يدينا عدد واحد أغنية نوبية ونترك التقييم للجنة التحكيم...

اللجنة دي برعاية الخال حمزاوي ..

Quote: واللا إنت رأيك شنو؟

على قولك بس بعدين ما يقوم يطلب لجوء ..

تحياتي نهى ..

أستاذناالفاضل معتصم
تحيات طيبات
أنا لي عظيم الشرف إني أكون ضمن اللجنة خصوصا إذا كنت تحت إمرة الأستاذ حمزاوي...
وبعدين الزول ده طلع من عندينا فعلا يعني بجنسيتو وما محتاج للجوء لكن ده ما بعفيهو من تقجيم أغنية نوبية أصيلة خالية من تدخلات أو تداخلات أجنبية وقصدي كلمات من لغاة تانية...يعني نوبية مية مية...وإنت ركز معانا في النقطة دي
مودتي

أختي نهي

كل سنة وانتي بصحة جيدة وخير وعافية

انا صحيح حلفاوي

بس ماتقليد (رطاني عدييييييل)

اول كاسيت لي كان سنة 99 بعنوان "بحلم بيك"

واحدة من أغنيات الكاسيت ده كانت "اسمر اللونا" وهي طبعا من التراث النوبي القديم

يعني امتحانك ده أنا باصيتو قبل 8 سنوات

انا خايفك تكوني من حلفاويات العاصمة (ديل لا بعرفوالجرجار لا بعرفوالسلابية!!)

انتي عارفاهم؟ (شكلك كده حتستعيني بصديق)!!

شكرا لتهنئتك وعيدك دائما سعيد يارب (آآمين)

أخي الكريم طلال
أولا شكرا ليك علي الأغنية الإنت قدمتها من ثمانية سنين وأنا علي فكرة سمعتها وعجبني أداءك فيها جدا...لكن الحاجة دي زعلتني..إنو مواطن رطاني مية مية وأداءو يفوق الخيال في الأغاني النوبية ويكون مقل فيها بالطريقة دي واخر أغنية قدمها كانت قبل سنين يازول نحن ممكن نسحب منك الجنسية عدييييل لو ما أثبت حسن النية ولحقت نفسك وقدمت لينا عمل نوبي متكامل لأنك من غير مجاملة بتحمل كل المواصفات الفنان النوبي الأصيل...
أنا حلفاوية ويمكن فعلا مقلة في سفري لحلفا وده لظروف دراستي وعملي في العاصمة لكن ده مابمنع إني بستنشق عبير النوبة وبفتخر بأصولي ودائما ببحث عن تقاليدنا وحاجاتنا المتوارثة الأنا بفخر بيها جدا وخصوصا الجرجار"اليونيفورم الرسمي للحلفاويات يا جماعة"..ولو إنت محتاج لكورسات عن حلفا أنا ممكن أساعدك
مودتي الصادقة وشكرا ليك كتير

معتصم اخوي
مسكاقمي
انصر دينك ودين دينك
انت بقيت من اندنا ولا ايه
اني احس تحت الكلام أحي احي
حلفا دغيم ولا القلقالة
انا مستعد اعلمك الرطانة
واخليك سيبويه الرطانة

امبارح بالليل عملتو زغبير بدري ليه
كبشور عمل هجيج شديد

Quote: انت بقيت من اندنا ولا ايه اني احس تحت الكلام أحي احي حلفا دغيم ولا القلقالة انا مستعد اعلمك الرطانة واخليك سيبويه الرطانة

مع العرس يا خال ..
بس على شرط تكون بتعمل شعيرية مظبوط

Quote: امبارح بالليل عملتو زغبير بدري ليه كبشور عمل هجيج شديد

بيني وبينك التعب حاصل واليوم دوام ..
إكتفينا بين الحبان في جبل مره ونور العين انت وينك وين ..
جمل الله أيامك يا خال ..
وكل سنة وأنت بألف خير ..

عيـــــــــــــــــدية بشوق أبو الدفااااع

بصوت عذب وشجي يسلم الزوق السليم معتصم

العيد في طلتك يا أبوقصي ..
كل سنة وأنت طيب يا حبيب ..
ربنا يحقق أمنياتك ويعيده عليك بالخير والبركات ..
شكراً لأنك هنا ..
شكراً جميلاً ..

الأخ العزيز معتصم،،
كل عام وأنت بخير،،
مع الأمنيات لك بدوام الصحة والعافية،،،

يا سلام يا مكاشفي يا فنان ..
البركة في العيد الجابك لينا ..
ليك وحشة شديدة يعلم الله ..
كل سنة أنت والأسرة بألف خير يا رب ..

أبقى طيب ..

لا حولا لا قولا ..........





شوفالسـؤال دا قدر كيف ....!


لو تعـرف معنـــــي الأشواق


طلال ...

عيدك يشبه إجابات السؤال

معتصم يا جميل

( ما بعرف معني الأشواق )

أها شنو ليك ....!

يا داش دي بقولوها ..
لا حولااااااااااااا ..
ومعاهة شهقة الأشواق (المدسي) جوه الضلوع ..
عارف يا صاحب وكت الحنين يتاور والجو حزين ..
تقوم تشوف أقرب زول ليك يطبطب عليك ..
وانت عارف انو الحال من بعض لكن شوق الجماعة عيد ..
والدنيا عيد وأيه الفايده غير لمة ناس في زي الحاله دي ..
وبرضو تقول لي ما بتعرف معنى الأشواق ؟

عبدالله أبقى كما أنت جميل الدواخل ..

أخي عبدالله ، أنا حأدلعك واقول ليك يا (دشدش)

سؤال صعب مش؟!!

حقيقة هو ما سؤال بقدر ماهي أشواق بحد الدهشة والاستغراب!

اكيد الاجابات بطرفكم (-:

لك مودتي وكل سنة وانت طيب.

مو يا صاحب
جينا نرمي معاك لكن لقينا زولك دا صعب خلاص
برستو حراق
وانت عارف انحنا بتاعين فيليه بدون اشواك







كل سنة وانت بالف خير

اللمينز يا صاحب ..
عارف الواحد كل ما يتذكر ونسة يوم العيد ديك يموت من الضحك ..
خايف السيردباك بتاعك لسه يكون ساكي الزول ..

أبقى طيب ..
وكل سنة وأنت بألف خير ..

Quote: عارف الواحد كل ما يتذكر ونسة يوم العيد ديك يموت من الضحك .. خايف السيردباك بتاعك لسه يكون ساكي الزول ..

الونسة كانت رهيبة
يكون من الشربوت
ربنا يجعل دائما ايامنا اعياد


بالله طلال حلفا عضو في المنبر !!
والله ما لاحظت لي الا هسه دي


يا استاذ طلال
كل سنة وانت طيب
انا لمن اشوف بوستات اصحابي ديل بدخل مغمض
والاغنية اجمل عيدية منك ومن مو الجميل دا

يا هلا بشيخ العرب

قلت لي بتدخل شايت ضفاري!!

كل سنة وانت طيب

لكن حكاية الجمل ده شنو؟

في أغنية تانية ياريت معتصم ينزلها لينا ويارب تعجبكم

انا جد سعيد للونسة معاكم

الجميل معتصم


كل عام وانت بالف خير وان شاء الله من العايدين ..

تسلم على الاغنية وطلال فنان جميل ورائع ..




وياطلال دايرين اغاني بالرطانة..


كريقون اجا نيليه ..


تحياتي يازول يارائع

ودالمايقوما يا صاحب ..
يعني لا يجيبك قون أيداهور
ولا يجيبك العيد ..
كيفك يا حبيب وكل سنة وأنت طيب ..

Quote: وياطلال دايرين اغاني بالرطانة..

طلبك دا نحولو لطلال ..

أبقى طيب وبألف خير ..

طلال يا جارنا
كل سنة وانت طيب
كيف ناس البيت
هوووووووووووي وافيني على الماسنجر
دا ايمييلي

ود المايقوما

اكون آجا نيليه

عيد سعيد

معتصم ود دفع الله

مسكاقنا كوريقون آنجا نلي (وهذا لسان حمزاوي رطين)

التحية لكم وللجميع ولا سيما المحتفى به طلال حلفا

ويا ريت لو تتحفنا بغناك الجميل (بس بشوية رطانة)

كل عام وأنتم بخير ونفسي أعيد في حلفاالجديدة

الحبيب ولياب ..
كيفك يا زول يا زين ..
وكل سنة أنت والأسرة بألف خير ..
الطلبات دي كلها محوله لطلال ويا ريت ألقى لي عمل ليهو سريع عشان أجيبه هنا ..
تلبية لرغباتكم ..

يديك العافية ..
وربنا يرد غربة الجميع ..

الأخت نهى ..
ازيك وكيفنك ..

Quote: وبعدين الزول ده طلع من عندينا فعلا يعني بجنسيتو وما محتاج للجوء

الجنسية دي كنت قاصد بيها من عندينا نحن أهل الجزيرة وقد أشار لها الخال حمزاوي بالشعيرية
وبعد ما عمل لي ترشيح للحاجة دي يبقى أنا المحتاج تدوني جنسية

أبقي طيبة وبألف خير ..