Post: #1
Title: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-22-2007, 09:14 AM
هما من متصوفة العشق في سودانيز أون لاين تناول الثنائي عصام محمد نور وجعفر السقيد شيٌ من إبداعهما ..
والشاعران مترعان بالموسيقى والألحان الداخلية فحريٌ بمثل هذا الشعر أن يطرب كل الوجدان ..
وتفتخر سودانيز أون لاين بأن يكون من ضمن كواكبها هذين النجمين ..
الشاعرة أسماء الجنيد (سوما) في (ليل الأسى) ..
الشاعر يوسف حمدالنيل (أبووجيدة) في (عشان عيونك) ..
|
Post: #2
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-22-2007, 09:16 AM
Parent: #1
|
Post: #3
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-22-2007, 09:18 AM
Parent: #1
|
Post: #4
Title: Re: أسماء الجنيد ويوسف حمد النيل في درب الحبايب ..
Author: حمزاوي
Date: 11-22-2007, 09:28 AM
Parent: #1
معتصم اخوي
مسكاقمي
سوما وابووجيدة
ينثران الدرر
فعلاً أن من البيان لسحرا
صدق الله العظيم
|
Post: #5
Title: Re: أسماء الجنيد ويوسف حمد النيل في درب الحبايب ..
Author: soma
Date: 11-22-2007, 10:48 AM
Parent: #4
معتصم سلام يا جميل
شكرا على المجهود المقدر يا حنين
واليك نص القصيدة (المرثية) كتابة
احبتى القراء ارجومنكم جميعا
الدعاء لوالدى الغالى له بالرحمه والمغفرة
ربنا يرحم جميع موتانا وموتى المسلمين
صدقنى يابا
دمعاتى جارية و لسه كابا..
كاسرة زى سيلاً دفر..
دمر شتول نوارو شابا ..
قطع حشا الفرع الرطب ..
حتحت خضر.. نديانه دابا ..
شرد عصافيراَ بنت ..
اعشاشها من اخرالسرابا ..
صدقنى يابا ..
ليلى مفروش الاسى..
ضلى معروش الكآبا..
فاقدة الحنان الفيك رسى..
تايهه زى شفع ضهابا ..
شارده فى دروب الشقا ..
مقطوعه زى شدرات فى غابا
خايفة من صوتا مشا ..
باكية الامان الكان سحابا ..
صدقنى يابا ..
الكون بلاك كاسى الجفا..
مسكون ضنى وممزوج رتابا ..
والفرح مرسوم صور..
لا روح ترف لا صوت ربابا ..
والبسيمات المحجرة فى الضلوع..
مسجونه فى ضلمة عذابا ..
صدقنى يابا ..
بتشابا لى الذكرى القبيل..
ارويها بى نفسك شرابا ..
القاك فى الحلم الدليل ..
والقاك فى الآهه هضابا ..
تنسج معاى المستحيل ..
ارجاك بى قولة حبابا..
افرد ادياتى االشقن ..
من الوهن خط الكتابا ..
انادى فيك طول الزمن ..
حليلو يابا ..
حليلو يابا ..
|
Post: #6
Title: Re: أسماء الجنيد ويوسف حمد النيل في درب الحبايب ..
Author: معاذ حسن
Date: 11-22-2007, 10:53 AM
Parent: #5
اللهم ارحم والد اسماء واسكنه فسيح جناتك مع الصديقين والشهداء.
والحمد لله رب العالمين.
|
Post: #10
Title: Re: أسماء الجنيد ويوسف حمد النيل في درب الحبايب ..
Author: soma
Date: 11-22-2007, 11:31 AM
Parent: #6
Quote: اللهم ارحم والد اسماء واسكنه فسيح جناتك مع الصديقين والشهداء.
والحمد لله رب العالمين. |
معااااذ الحنين
الشوق غيمة ومطرتين
شكرااا نيلين
على الطلة والدعوات الغالية للوالد اغالى الله يرحمه
ربى يحفظك ويغطيك وما نجاملك فى شين
قول آمين
شكرا معاذ
شكرا بقجة فرح
|
Post: #24
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-23-2007, 03:12 PM
Parent: #6
تحياتي معاذ ..
والرحمة والمغفرة للوالد المربي صديق الطيب الجنيد ..
|
Post: #7
Title: Re: أسماء الجنيد ويوسف حمد النيل في درب الحبايب ..
Author: الفاتح الجنيد
Date: 11-22-2007, 10:54 AM
Parent: #5
فى لحظة الاندهاش تغيب الكلمات ، ويصبح الصمت رفيقى ،،،
التحية للشاعرين سوما وابو وجيدة ولك أخى معتصم ...
أحسنتم ...
|
Post: #12
Title: Re: أسماء الجنيد ويوسف حمد النيل في درب الحبايب ..
Author: soma
Date: 11-22-2007, 11:36 AM
Parent: #7
Quote: فى لحظة الاندهاش تغيب الكلمات ، ويصبح الصمت رفيقى ،،،
التحية للشاعرين سوما وابو وجيدة ولك أخى معتصم ...
أحسنتم |
ود الجنيد حبابك
جميلة طلتك فى كل الاوقات
شكرا مارقة من الجوف
تسلم يا غالى
|
Post: #47
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-24-2007, 08:59 AM
Parent: #7
جميل هو الغناء في حضرة سوما وأبووجيدة ..
سلام يا الفاتح يغشاك وين ما كنت ..
والتحية ليك أضعاف ..
محبتي بلا حدود ..
|
Post: #9
Title: Re: أسماء الجنيد ويوسف حمد النيل في درب الحبايب ..
Author: انعام عبد الحفيظ
Date: 11-22-2007, 11:30 AM
Parent: #5
Quote: فاقدة الحنان الفيك رسى..
تايهه زى شفع ضهابا ..
شارده فى دروب الشقا ..
مقطوعه زى شدرات فى غابا
خايفة من صوتا مشا ..
باكية الامان الكان سحابا ..
صدقنى يابا ..
الكون بلاك كاسى الجفا..
مسكون ضنى وممزوج رتابا ..
والفرح مرسوم صور..
لا روح ترف لا صوت ربابا ..
والبسيمات المحجرة فى الضلوع..
مسجونه فى ضلمة عذابا .. |
إحساس حزين وعميق وحرف طائع يا أسماء
حفظك الله
شكراً يا معتصم
وشكراً ليوسف حمد النيل
|
Post: #19
Title: Re: أسماء الجنيد ويوسف حمد النيل في درب الحبايب ..
Author: soma
Date: 11-23-2007, 08:00 AM
Parent: #9
Quote: إحساس حزين وعميق وحرف طائع يا أسماء
حفظك الله
شكراً يا معتصم
وشكراً ليوسف حمد النيل |
الحبيبة بت بطن الاهل انعام عبد الحفيظ
حفظك الله من كل شر يااااا رب
شكرا يا حبيبة على الطلة
نورتينا يعلم الله
وشكرا على كلماتك النديه
شكرا لمة عصرية
|
Post: #48
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-24-2007, 09:20 AM
Parent: #9
صباحك ود وورد يا انعام ..
وشكراً مارقه من الجوف زي ما بتقول سوما على الشريط الرائع ..
أمنياتنا لسوما وأبووجيدة بمزيد من التألق ..
محبتي ..
|
Post: #8
Title: Re: أسماء الجنيد ويوسف حمد النيل في درب الحبايب ..
Author: soma
Date: 11-22-2007, 11:19 AM
Parent: #4
Quote: معتصم اخوي
مسكاقمي
سوما وابووجيدة
ينثران الدرر
فعلاً أن من البيان لسحرا
صدق الله العظيم |
الخال العزيز حمزاوى
طلتك صباحية عيد ولمة كبار ودعوات قبيلة
شكرا يا الجيتنا باكرية
شكرا قدح العيد صباحية
|
Post: #11
Title: Re: أسماء الجنيد ويوسف حمد النيل في درب الحبايب ..
Author: Ahmed Yousif Abu Harira
Date: 11-22-2007, 11:31 AM
Parent: #8
لوالدكم الرحمة والغفران يا اسماء
وربنا يجبر كسركم..آمين
وشكرا للأخ/العزيز معتصم دفع الله على البوست
ونتلاقى ان شاء الله سيرا على الاقدام (في درب الحبايب)
------------
ياخوي مسعول من الخير: هارموني اختفت وين ؟؟
|
Post: #20
Title: Re: أسماء الجنيد ويوسف حمد النيل في درب الحبايب ..
Author: soma
Date: 11-23-2007, 08:47 AM
Parent: #11
Quote: لوالدكم الرحمة والغفران يا اسماء
وربنا يجبر كسركم..آمين |
ود اهلى الحنان
اهل اللمه والضيفان
احمد ابو حريرة
يعلم الله شرفتنى
سمحة الدعوات منك يابا
وان شاء الله ما تشوف وجعه فى حياتك
وربنا يتقبل منك ومنا صالح الدعاء
تسلم يا المهل دخرى الاهل..
Quote: وشكرا للأخ/العزيز معتصم دفع الله على البوست
ونتلاقى ان شاء الله سيرا على الاقدام (في درب الحبايب) |
وشكرا ليك تانى يا ضل القبائل
بالنيابة عن العزيز معتصم
ويا رب نتلاقى فى دريب الحبايب
وسط اهلنا وفى عز بلدنا
شكرا محنة
|
Post: #49
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-24-2007, 09:35 AM
Parent: #11
أبوحريرة كيفك يا راجل يا زين ..
نتلاقى على درب الحبايب في ساعة خير وإلفة يا رب ..
| Quote: ياخوي مسعول من الخير: هارموني اختفت وين ؟؟ |
سترى هارموني قريباً وبثوب جديد إن شاء الله ..
وفيها من البرامج ما سيعجب المشاهد ويجذبه ..
تحياتي وتقديري ..
|
Post: #23
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-23-2007, 02:59 PM
Parent: #4
تحياتي يا خال حمزاوي ..
والتحية لسوما ويوسف حمدالنيل وهما يمنحانا هذا الإبداع ..
مع أمنياتنا لهم بمزيد من الدرر الغنائية ..
تقديري ..
|
Post: #13
Title: Re: أسماء الجنيد ويوسف حمد النيل في درب الحبايب ..
Author: مصدق مصطفى حسين
Date: 11-22-2007, 11:40 AM
Parent: #1
الحبيب معتصم
عاطر تحياتى لك و للأبداع فى شخص المرهفين سوما و أبو وجيده ،
سعادتى بهما كبيره و تمنياتى لهما بمزيد من الألق الوضىء ... يستحقانه .
|
Post: #14
Title: Re: أسماء الجنيد ويوسف حمد النيل في درب الحبايب ..
Author: جمال السنوسي
Date: 11-22-2007, 11:51 AM
Parent: #13
معتصم دفع الله
الزول الجميل
جميل جدا ان تسمعنا هذا العمل ونفخر بابو وجيدة وسوما زملائنا
ويا حليلنا نحن البقينا ما بنسمع الجديد الا في البورد
لك الود معتصم
والتحية لي سوما وابو وجيدة
جمال
|
Post: #27
Title: Re: أسماء الجنيد ويوسف حمد النيل في درب الحبايب ..
Author: soma
Date: 11-23-2007, 09:04 PM
Parent: #14
Quote: معتصم دفع الله
الزول الجميل
جميل جدا ان تسمعنا هذا العمل ونفخر بابو وجيدة وسوما زملائنا
ويا حليلنا نحن البقينا ما بنسمع الجديد الا في البورد
لك الود معتصم
والتحية لي سوما وابو وجيدة
جمال |
الاخ الشاعر المرهف جمال
سلام بحجم روعتك يا شفيف
لك التحية والتقدير على الطلة الجميلة
ويا ريت نسمع جديدك قريب اخى جمال
وانت ماشاء الله بالاضافة لموهبة الكتابة
ربنا متعك بموهبة التلحين.
واعتقد انه دى موهبة صعبة المراس الا من حباه الله بها
ما شاء الله وعينا باردة
شكرا اخى جمال شكرا لحن منك
|
Post: #63
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-25-2007, 09:49 AM
Parent: #14
الحبيب جمال السنوسي ..
تسلم وتسلم حروفك الأنيقة ..
المنبر مكان جميل نصبح عليه ونمسي ..
لذلك هو متجدد وبتلقى فيه حاجات حلوة شديد قد لا تكون متوفره لدينا ..
شكراً جميلاً ..
|
Post: #26
Title: Re: أسماء الجنيد ويوسف حمد النيل في درب الحبايب ..
Author: soma
Date: 11-23-2007, 08:57 PM
Parent: #13
Quote: الحبيب معتصم
عاطر تحياتى لك و للأبداع فى شخص المرهفين سوما و أبو وجيده ،
سعادتى بهما كبيره و تمنياتى لهما بمزيد من الألق الوضىء ... يستحقانه . |
الاخ العزيز مصدق سلام بعد غيبه
حبابك يا ضى شبابيكنا
يستاهلك الخير انت يا صافى النيه وابيض السريرة
ربى يدك الفى مرادك
يعز مقدارك ويخدر دربك
يسهل امرك
شكرا على الجميل الجانا منك
شكرا قيف بحر نديان
|
Post: #62
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-25-2007, 09:41 AM
Parent: #13
مصدق يا فنان ..
كيفك والشوق نيلين ..
حلوة الكتابة وأنيقة عند سوما وأبووجيدة ..
حروفهم مترعة بالحنان ومشبعة بريحة طين البلد وأهلها ..
لك ولهم كل المحبة ..
|
Post: #15
Title: Re: أسماء الجنيد ويوسف حمد النيل في درب الحبايب ..
Author: DKEEN
Date: 11-22-2007, 12:13 PM
Parent: #1
سلامات يامووووووو
إتشرف البوم الاستاذ عصام والسقيد بكلمات بت الجنيد وكلمات ابو وجيدة...
جميلان يتدفقان حباًً والقاً وزينة..
ما اسعدنا بكلماتهم مغناة وملحنة وعبر المزيكة..
وافر تشكراتي يا موو على الخبر الجميل
|
Post: #31
Title: Re: أسماء الجنيد ويوسف حمد النيل في درب الحبايب ..
Author: soma
Date: 11-24-2007, 05:22 AM
Parent: #15
Quote: سلامات يامووووووو
إتشرف البوم الاستاذ عصام والسقيد
بكلمات بت الجنيد وكلمات ابو وجيدة...
جميلان يتدفقان حباًً والقاً وزينة..
ما اسعدنا بكلماتهم مغناة وملحنة وعبر المزيكة..
وافر تشكراتي يا موو على الخبر الجميل |
دكيــــــــــــــــن الحنين
يعلم الله الشوق قمر دوريــــــن
اتشرفنا نحن يابا بى طلتك النورت وفرهدت جوانا نغم طروب
واسعدتنا حقيقى بالمتاوقة بعد غيبه طالت
وين الحى بيك ياخ
بقيت تغيب اكتر من هلال رمضان
البظهر فى السنة مره
انت بتظهر فى السنه ونص مرة واحدة 
شكرا ليك كتير العزيز دكين
شكرا مارقة من الجوف
|
Post: #64
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-25-2007, 10:34 AM
Parent: #15
سلام يا دكين ..
وينك يا حبيب مختفي ..
القول كما جاء في ردك ..
جميلان يتدفقان حباًً والقاً وزينة..
نتمنى أن نرى لهما الجديد الرائع دائماً ..
محبتي وتقديري ..
|
Post: #16
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-22-2007, 12:16 PM
Parent: #1
الأحباب جميعاً ..
جميل أنكم هنا تعطرون هذا البوست وتزيدونه ألقاً ..
سوما وأبووجيدة يستحقان كل الخير ويستحقان أن نفرح بهما ..
سأعود لكم وما يكتبانه من روائع الشعر والكلم الجميل ..
أبقوا طيبين ..
|
Post: #17
Title: Re: أسماء الجنيد ويوسف حمد النيل في درب الحبايب ..
Author: عبدالأله زمراوي
Date: 11-22-2007, 12:36 PM
Parent: #16
Quote:
صدقنى يابا
دمعاتى جارية و لسه كابا..
كاسرة زى سيلاً دفر..
دمر شتول نوارو شابا ..
قطع حشا الفرع الرطب ..
حتحت خضر.. نديانه دابا ..
شرد عصافيراَ بنت ..
اعشاشها من اخرالسرابا ..
صدقنى يابا ..
ليلى مفروش الاسى..
ضلى معروش الكآبا..
فاقدة الحنان الفيك رسى..
تايهه زى شفع ضهابا ..
شارده فى دروب الشقا ..
مقطوعه زى شدرات فى غابا
خايفة من صوتا مشا ..
باكية الامان الكان سحابا ..
صدقنى يابا ..
الكون بلاك كاسى الجفا..
مسكون ضنى وممزوج رتابا ..
والفرح مرسوم صور..
لا روح ترف لا صوت ربابا ..
والبسيمات المحجرة فى الضلوع..
مسجونه فى ضلمة عذابا ..
صدقنى يابا ..
بتشابا لى الذكرى القبيل..
ارويها بى نفسك شرابا ..
القاك فى الحلم الدليل ..
والقاك فى الآهه هضابا ..
تنسج معاى المستحيل ..
ارجاك بى قولة حبابا..
افرد ادياتى االشقن ..
من الوهن خط الكتابا ..
انادى فيك طول الزمن ..
حليلو يابا ..
حليلو يابا .. |
|
Post: #18
Title: Re: أسماء الجنيد ويوسف حمد النيل في درب الحبايب ..
Author: ترهاقا
Date: 11-23-2007, 06:51 AM
Parent: #17
صديق الزمن الجميل معتصم
كيفك وكيف المجموعة الظريفة
Quote: دمعاتى جارية و لسه كابا..
كاسرة زى سيلاً دفر..
دمر شتول نوارو شابا ..
قطع حشا الفرع الرطب ..
حتحت خضر.. نديانه دابا ..
شرد عصافيراَ بنت ..
اعشاشها من اخرالسرابا |
الكلام عميق وفيها نهكة الشوايقة الوصافين
ولى فوووووووووووق
|
Post: #21
Title: Re: أسماء الجنيد ويوسف حمد النيل في درب الحبايب ..
Author: salma subhi
Date: 11-23-2007, 09:56 AM
Parent: #18
التحية لكل هؤلاء المبدعين...أسماء الجنيد....
الأخ يوسف حمد النيل....
عصام محمد نور...
ومدام عنوان البوست يحتضن مثل هذه الأسماء المبدعة...فبالتأكيد محتواه سيكون جميل.
تقديري معتصم
|
Post: #53
Title: Re: أسماء الجنيد ويوسف حمد النيل في درب الحبايب ..
Author: soma
Date: 11-24-2007, 11:06 AM
Parent: #21
Quote: التحية لكل هؤلاء المبدعين...أسماء الجنيد....
الأخ يوسف حمد النيل....
عصام محمد نور...
ومدام عنوان البوست يحتضن مثل هذه الأسماء المبدعة...فبالتأكيد محتواه سيكون جميل.
تقديري معتصم |
الحبيبة سلمى
لك التحيه قدر مكانتك يا غالية من عز الاهل
تسلمى وتسلم دواخلك النقيه يا صافية النية
وصفتنيى بالمبدعه .. اخجلتنى عبارتك يعلم الله
اعلم تماما اخى يوسف حمد النيل مبدع حدالنهاية
ربنا يحفظه ويزيده من نعمه يا رب
شكرا سلمى على الطلة
شكرا ندى الحقول
|
Post: #74
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-08-2007, 06:18 PM
Parent: #21
تحياتي سلمى ..
حضورك يعطي للمكان نكهة مميزة ..
والتحية عبرك لكل صاحب كلمة مميزة ونغم جميل ..
محبتي ..
|
Post: #52
Title: Re: أسماء الجنيد ويوسف حمد النيل في درب الحبايب ..
Author: soma
Date: 11-24-2007, 10:46 AM
Parent: #18
Quote: الكلام عميق وفيها نهكة الشوايقة الوصافين
ولى فوووووووووووق |
ترهاقا الزول الحنين سلام بى محنة اهلنا الشوايقة وطيبتهم
طلتك زاتها حنينه والله
شكرا ليك ياود القبائل
شكرا محنة
|
Post: #73
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-08-2007, 06:09 PM
Parent: #18
ليك وحشة شديدة يا أبوعلاء ..
والله دائماً في سيرتك ..
أمس كنا مع أزهري عبدالقادر وكان في كمال ميرغني وإتذكرناك بالخير ..
وأيامك الجميلة التي قضيتها معنا ..
رأيك هنا مهم جداً من ناحية الموسيقى والأيقاع والكلام الجميل المنظوم ..
يديك العافية يا حبيب ..
|
Post: #50
Title: Re: أسماء الجنيد ويوسف حمد النيل في درب الحبايب ..
Author: soma
Date: 11-24-2007, 09:45 AM
Parent: #17
شاعرنا الجميل عبد الاله زمراوى
طلتك روعة موعد
احساسنا بوجودك معانا معطر ساحاتنا طيب
يديك العافيه ايها الرجل النبيل
شكرا محنة حبوبات
|
Post: #72
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-08-2007, 05:58 PM
Parent: #17
شكراً لأنك هنا يا عبدالله ..
عاطر التحايا ..
|
Post: #22
Title: Re: أسماء الجنيد ويوسف حمد النيل في درب الحبايب ..
Author: ALGARADABI
Date: 11-23-2007, 01:38 PM
Parent: #1
اسماء الجنيد
بحر المحنة وكت يفيض
لها التحية
والتحية للمبدع ابو وجيده
وللرقيق معتصم
|
Post: #55
Title: Re: أسماء الجنيد ويوسف حمد النيل في درب الحبايب ..
Author: soma
Date: 11-24-2007, 11:34 AM
Parent: #22
Quote: اسماء الجنيد
بحر المحنة وكت يفيض
لها التحية
والتحية للمبدع ابو وجيده
وللرقيق معتصم |
اخوى القرادابى الرزين
سلام بعدغياب يا دخرى الزينين
يعلم الله مشتاقين
انت زاتك بحر محنة يا ود اهلنا
شكرا لى طلتك النورت الفريق
شكرا دعوات امات بالفال السمح
|
Post: #75
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-08-2007, 06:26 PM
Parent: #22
القردابي الحبيب ..
ووجودك فيض من المشاعر الجميلة ..
لك وللغاليين ديل كل الحب والتقدير ..
أبقى طيب ..
|
Post: #25
Title: Re: أسماء الجنيد ويوسف حمد النيل في درب الحبايب ..
Author: خالدة البدوي
Date: 11-23-2007, 08:56 PM
Parent: #1
يا سلام عليك يا معتصم يا غالي
روعة ما بعدها الوريفة سوما
والمرهف يوسف حمد النيل
والآداء عصام محمد نور
وجعفر السقيد ..
في إبداع أكثر من كدة ،،
شكرررررررررررررا موو
على هذا الجمال ،،
ومليون رحمة لوالد سوما
مودتي ،،
|
Post: #56
Title: Re: أسماء الجنيد ويوسف حمد النيل في درب الحبايب ..
Author: soma
Date: 11-24-2007, 11:41 AM
Parent: #25
Quote: يا سلام عليك يا معتصم يا غالي
روعة ما بعدها الوريفة سوما
والمرهف يوسف حمد النيل
والآداء عصام محمد نور
وجعفر السقيد ..
في إبداع أكثر من كدة ،،
شكرررررررررررررا موو
على هذا الجمال ،،
ومليون رحمة لوالد سوما
مودتي ،، |
خالدة الحبيبة سلام يمه
يا سلام عليك انتى والله
شفتى جيتى شايله الفرح فى كفتيك كيف ؟
طاويه المحنه وجاريه علينا
حاضنة الريد شتول
تسلمى يا بت الاصول
شكرا قدر فرحك المشتت وعب كل اللامكنة
شكرا يا ندية
تسلمى
|
Post: #78
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-09-2007, 08:55 AM
Parent: #25
خالدة ازيك ..
نسعد كثيراً حين نرى مثل هذه الأعمال لأناس نعزهم ونقدرهم ..
لذلك نشاركهم الفرح ونشجعهم وفي الحالتين تسعد دواخلنا من كل هذا الإبداع ..
لك ولهم كل الحب والتقدير ..
|
Post: #28
Title: Re: أسماء الجنيد ويوسف حمد النيل في درب الحبايب ..
Author: تماضر الخنساء حمزه
Date: 11-23-2007, 09:11 PM
Parent: #1
بت الجنيد وابووجيدة كلمات حنينة ومليانة سماحة
والصوت ندي وجميل
شكراً معتصم
|
Post: #29
Title: Re: أسماء الجنيد ويوسف حمد النيل في درب الحبايب ..
Author: هاشم أحمد خلف الله
Date: 11-23-2007, 10:14 PM
Parent: #28
الشكر كل الشكر للشاب الوجيه معتصم دفع الله وهو يقدم لنا هذا العمل الرائع , سوما كعادتها مفردة لغوية حنينة جداً , رحم الله والدك يا سوما واسكنه فسيح جناته مع الصديقين والشهداء وحسن اولئك رفيقا
وقد جاءت كلماتك في رثاء الوالد عطر الله ثراءه مؤثرة وعميقة المعاني وشاءت الأقدار ان يتغني بها الفنان الخلوق والعاطفي جداً عصام محمد نور واجزم صادقاً انها ( الأغنية ) صادفت صداً في دواخله وإلا ما اتي هذا اللحن الحنين الرؤيان محبة وطيبة .
التحية موصولة للشاعر ابو وجيدة والذي ابدع في نظم هذا النص الرائع الجميل والذي آثر فنانا المبدع عصام محمد نور , ابو وجيدة شاعر رقيق ويملك خيال فنان بديع , شكراً جميلاً لكم جميعاً فقد اسعدني هذا البوست واتمني ان يتكرر هذا المشهد ولكن بدون رثاء .
|
Post: #58
Title: Re: أسماء الجنيد ويوسف حمد النيل في درب الحبايب ..
Author: soma
Date: 11-24-2007, 12:42 PM
Parent: #29
Quote: الشكر كل الشكر للشاب الوجيه معتصم دفع
الله وهو يقدم لنا هذا العمل الرائع ,
سوما كعادتها مفردة لغوية حنينة جداً ,
رحم الله والدك يا سوما واسكنه فسيح جناته مع الصديقين والشهداء وحسن اولئك رفيقا
وقد جاءت كلماتك في رثاء الوالد عطر الله ثراءه مؤثرة وعميقة المعاني وشاءت الأقدار ان يتغني بها الفنان الخلوق والعاطفي جداً عصام محمد نور واجزم صادقاً انها ( الأغنية ) صادفت صداً في دواخله وإلا ما اتي هذا اللحن الحنين الرؤيان محبة وطيبة .
التحية موصولة للشاعر ابو وجيدة والذي ابدع في نظم هذا النص الرائع الجميل والذي آثر فنانا المبدع عصام محمد نور , ابو وجيدة شاعر رقيق ويملك خيال فنان بديع , شكراً جميلاً لكم جميعاً فقد اسعدني هذا البوست واتمني ان يتكرر هذا المشهد ولكن بدون رثاء |
اخوى هاشم الشفيف
حبابك يا ود القبائل
الحنين اب طبعا مو مايل
يديك العافيه اخى العزيز هاشم
طلتك لها اثر عميق فى نفسى يعلم الله
ودعواتك للوالد له بالرحمه اثرت فى نفسى كثيرا
اسال الله ان يتقبلهامنك
ويسكنه فسيح جناته مع الصديقين والشهداء وحسن اولائك رفيقا
حقيقى اخى هاشم صدقت فى كلامك عن لحن عصام للمرثيه
اثرت فيه لحد كبير جدا ..
ولحن مرثيه اخرى كنت كتبتها فى والدى عليه رحمة الله
عصام زول شفيف جدا وعميق الوجدان
وحنيـــــــــــــن لابعد حد
دمعته فى طرف عينه
اذكر يومها كان هنا بمسقط
كالعاده الصباح جيت الشغل وكنت اعطيته
مجموعة قصائد
رجعت الضهر .. وجدته منزوى فى ركن قصى
فى الصالون وهو يدندن بمحنة ودمعته يعلم الله فى عينه
ابكانى بمراره يومها .. وما قدرت اكمل باقى النص
الا بعدما اكتمل العمل وارسل لى الشريط من السودان
له التحيه والتقدير
ولك اخى هاشم كل الود
وشكرا محنة
|
Post: #89
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-11-2007, 08:01 AM
Parent: #29
كيفك يا هاشم ..
سلام طيبة ومحنة ..
كلامك جميل وهذا ما نريده التشجيع والتحفيز لدفع الكاتب والفنان لتخرج كلماته للجميع وهذا حقنا عليهم ونحن من تعجبه الكلمة ويطربه اللحن ..
التحية عبرك لسوما وأبووجيدة وعصام وجعفر السقيد ولكل فناني بلادي ..
تقديري ..
|
Post: #57
Title: Re: أسماء الجنيد ويوسف حمد النيل في درب الحبايب ..
Author: soma
Date: 11-24-2007, 11:51 AM
Parent: #28
Quote: بت الجنيد وابووجيدة كلمات حنينة ومليانة سماحة
والصوت ندي وجميل
شكراً معتصم |
الحبيبه الغاليه شاعرتنا الرقيقة تماضر
فى سماحة اكتر من طلتك دى ؟
يعلم الله طلتك بتزين البوست
تسلمى يا ست الكل
شكرا ليك باقة فل
تحياتى ومودتى
|
Post: #79
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-09-2007, 09:38 AM
Parent: #28
الخنساء تماضر ..
ازيك يا بنت الأهل ..
المحنة والطيبة في وجودك معنا ..
نتمنى كمان نشوف كلماتك تمشي على شفاه فنانينا بالنغم الجميل ..
أبقي بخير ..
|
Post: #30
Title: Re: أسماء الجنيد ويوسف حمد النيل في درب الحبايب ..
Author: نصار
Date: 11-24-2007, 01:27 AM
Parent: #1
العزيز معتصم
شكرا قدر البسحقه و هذا يعجز الله,,
العزيزة سوما
والدا خلاك وراه ما مت و اجره جاري كلما اتبست انسان بالغرسو فيك من سمات رفيعة و غالية و نادرة..
عصام محمد نور دفعتي و من شهدنا صعوده لاول درجات المجد عبرك احي القامة الاستاذ الفاضل السنوسي اول من دعمك و قدمك للناس عبر الدورة المدرسية و اتمني ان يكون عايش و للان بعايش فيك و تدخل قلوب الكل بخلقك و خلقك و ابداعك السامق.. نحنا اساسا ما مقصرين في حبنا ليك وكت جتنا في رنة السلك البنسمعه زي الكأنه عزف علي عصبنا المركزي ابقي شيل شيلتك معاناlool
ابو وجيدة سعدت بمعرفة كون بهذا القدر من مواتات القصيد لك و كفي..
جعفر السقيد كلما استمع لك اطمئن علي مستقبل غنانا و انبسط..
شكرا و محبة و شوق..
|
Post: #32
Title: Re: أسماء الجنيد ويوسف حمد النيل في درب الحبايب ..
Author: إسماعيل وراق
Date: 11-24-2007, 06:16 AM
Parent: #30
سوما
يوسف
لكما التحية والتقدير
.
.
شكراً معتصم
|
Post: #68
Title: Re: أسماء الجنيد ويوسف حمد النيل في درب الحبايب ..
Author: soma
Date: 11-26-2007, 06:07 AM
Parent: #32
Quote: سوما
يوسف
لكما التحية والتقدير
.
.
شكراً معتصم |
اخوى اسماعيل وراق
الزول الضرا فى الزمن الرقراق
طلتك مسحت دمع الفراق
شكرا بعمق النيل
ايها الرجل النبيل
معزتى
|
Post: #92
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-11-2007, 05:27 PM
Parent: #32
سلام يا أبومحمد ..
جميل أنك هنا ..
تحياتي وتقديري ..
|
Post: #61
Title: Re: أسماء الجنيد ويوسف حمد النيل في درب الحبايب ..
Author: soma
Date: 11-24-2007, 08:11 PM
Parent: #30
Quote: العزيز معتصم
شكرا قدر البسحقه و هذا يعجز الله,,
العزيزة سوما
والدا خلاك وراه ما مت و اجره جاري كلما اتبست انسان بالغرسو فيك
من سمات رفيعة و غالية و نادرة..
عصام محمد نور دفعتي و من شهدنا صعوده لاول درجات المجد
عبرك احي القامة الاستاذ الفاضل السنوسي
اول من دعمك و قدمك للناس عبر الدورة المدرسية
و اتمني ان يكون عايش و للان بعايش فيك
و تدخل قلوب الكل بخلقك و خلقك و ابداعك السامق..
نحنا اساسا ما مقصرين في حبنا ليك
وكت جتنا في رنة السلك البنسمعه زي الكأنه
عزف علي عصبنا المركزي ابقي شيل شيلتك معاناlool
ابو وجيدة سعدت بمعرفة كون بهذا القدر من مواتات القصيد لك و كفي..
جعفر السقيد كلما استمع لك اطمئن علي مستقبل غنانا و انبسط..
شكرا و محبة و شوق.. |
الانسان الجميل نصار
جميل الدواخل رقيق المشاعر
كتر الف خيرك على كلامك البشرح الصدر فى حق والدى الغالى
عليه رحمة الله الواسعه..
ربنا يسمع منكم جميعا ويسكنه فسيح الجنان
احساسك واصل اخى نصار
رجعتنى سنوات لذكريات عميقة عمق الخوة الجمعتنا
وجلساتنا مع الاعزاء حسن 6 دبيب ملامح
بى شقر بشار ملامح ود الشيخ وغيرهم
والاخوات منى روز وسراج القلوب وبقية الاحبة
حقيقى كانت ايام لن تنسى
سلامك وتحيتك للاخ عصام وصلت وببلغك خالص الود والتحايا
قال ليك شكرا يا دفعة
|
Post: #91
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-11-2007, 04:30 PM
Parent: #30
نصار يا غالي ..
أسعد الله أوقاتك بكل الخير ..
كتابتك دائماً تسعدنا وتجبر بخاطرنا ..
عصام محمد نور فنان يتميز بحس وذوق عالي وجميل أن جمع سوما وأبووجيدة في شريط رائع زي دا ومعه الفنان جعفر السقيد ..
نسعد كثيراً حين نرى من نحب في مكان يستحقه ونتنمى ليهو المزيد من الإبداع ..
يوسف وسوما أهل الإبداع كلماتهم دائماً تطربنا ..
لك من المحبة الكثير الكثير ..
|
Post: #33
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-24-2007, 07:30 AM
Parent: #1
أنــا صدقتك .. يوسف حمدالنيل أبووجيدة ..
أنــا بتساءل يــوماتي وأردد
كيف خبيتي ملامـح صورتك
في جــواي بطعم الشهد ...
وكيف علمتي عيوني تشوفك
فرح أجـيال لي فجر الغد ...
كُـنت بغالط نفسي عليك ..
لما ملامح صــورتك بانت
كانت الدهشة وألم الحسرة
وكُل السحب الغاطه سماكِ
صبت فيني نشـــازك ....
يا مخلوقة من طينه وزايله
أنا بتسـاءل كيف خــدرتي
مداخل السكة البيك لمتني
وأنا صدقتك بي كلماتـــك ...
إنك معنى وسامي مكانـــك ..
إلاّ نشـــازك بي خطواتـــك ..
ولد فيني جـــراح من تــاني
وكانت غلطه إنــي لقيــتك ..
وما متأسف روحـــي في دربك
يا الضيــعتي جمــال معـــناكِ.
***
|
Post: #34
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-24-2007, 07:33 AM
Parent: #1
رقراق الشمس .. يوسف حمدالنيل أبووجيدة ..
أفتح قلبك لي ...
يا وطني الصاحي وحي ..
أمسح صاح الغلط العندك
وأشتل رقراق الشمس الضي
لي الأطفال التحت الممشى
وزاده الكي ...
بدل توب التيه الكان غاطيها
وأكسيها سماح الزي ..
خضر ليها مساحة العرفة
بكره بتكبر ...
وتنسى أوجاع الصوت والصي
وتعرف إنك وأحد عند جنياتك
وما بتفرق بين أطفال الممشى
وبين الساكنة قصور الدوله ..
وشايله عرق الغير في الضي
يا وطني الصاحي وحي ...
أفتح قلبك لي ...
وهاك نصيحة ...
رمم كُل بيوت المدن الضايعة
وما تنسى مداخل الحي ..
أجمع كُل شتات الكلمة الواحدة
وأنقص الولد الشاذ الني ..
الفوق القسمة بزيده شوي
وإضرب بيها الراحة يا خي ...
لا تعبان في شمس هجيرة ..
لا قام في ليل لي الري
أفتح قلبك لي ..
يا وطني الغالي علي ..
أمسح صاح الغلط العندك
وأشتل رقراق الشمس الضي
لي الأطفال التحت الممشى
وزاده الكي .
|
Post: #35
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-24-2007, 07:39 AM
Parent: #1
إمـــرأة الأزمانِ .. يوسف حمدالنيل أبووجيدة ..
إني أهـوى إمـــرأةً ...
تجتاح مداخل شطآني ..
تتوهط فيـــني عشــقاً ...
ترهقني شجــناً وأغــــاني
تملأني دفئاً وحنيناً ومعاني
أنا لا أقــــبل أن تغمـــض
ذاكـــــرتي عنها لحـــظة ...
إمرأة الأزمـــــــــانِ ....
تتنفس في رئـتي شــوقاً
وتفيض وعــــوداً وأمــاني
أنا لا أعـــرف كيف أساومها
لو بعـــــتُ منابــع تحــناني..
لن أجــزي بضع منــــها ...
أو كُل العشق الإنســــــاني
هذي إمـــــرأة ً عُظــــمى ..
تتسلق في تــيـــــــهٍ ...
سور جدار مدينتــــــها ...
لتُــــضيء دياجــر أحـزاني
وتشعلُ فيني حروفاً ســكرى
تُـزين كل دواخل وجداني
تتشرب حســاً في بــدنـــــي ...
وتؤكــــد أمراً ربـــــــــاني ...
وتجي كما الحلم الوردي ..
لتُـــعيث الشــــوق بأركاني
لو مرَ الطيف بـــذاكرتــي
أو خطر الخــاطر أبكاني
أسكنتُ حــروفي عينيهـا
ونثرتُ عطــوراً وأغـــــاني
أرهقتُ الكون بسيـــــــرتها
وملأت دروب الـرُكبانِ ...
وذرعت التـــوق بـــأوردتي
فاضـت أحـــــلاماً وأماني
يا أُنثى تسكن شغف القلب
تتمـــدد حتى تملأني ...
لا أدري كيف أُنـــاجيكِ ..
يا روح الروح الوجــــداني
يا معنى الشوق وأصل العشق
ومنـــبع حسي الإنســـــــاني
أهـــواك وشيئاً في قلـــــبي
يتشكلُ مــــثل الإيمـــــانِ
يا أمـــــرأةً تمـــــلأ أنفاســي
إجتاحـــي كُـل الشُـــــطأنِِ .
***
|
Post: #36
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-24-2007, 07:42 AM
Parent: #1
حلــم جمــيل .. يوسف حمدالنيل أبووجيدة
قال حميد : ( لمت لمت ) ...
( كان ما لمت أنا جايــــــيكم وما ندمان ) ...
قنب فوق قوز رمله هناك ...
دنقر .. صنقع .. حمر .. وصنقر
شخت فوق الرمله خطــوط ..
واحدة طويلة وواحدة قصيرة ...
وواحدات تاني ما معــــروفة ...
غايتو أخــينا حكايتو حكاية ..
لتق من سلكين نعلاتو ...
خيط بي لونين سروالو ...
ورقع الجــبه ...
كان الخيط التالت أحمر ..
ما هماهو .. أحمر ... أخضر ..
أياً كان اللون العندو
همو الأول .. يستر حالو ...
وهمو التاني .. راحة بالو ..
وهمو الدايم .. هُمّ عيالو ...
سارح شيخنا ...
بحلم بالغيمات المرن
بحلم بغنيماتو الفرن
وبحلم بوليداتو الكبرو ...
وبي حاجات ما ليهن حد ..
أضغط هنا لتكملة القصيدة حلــم جمــيل ،،،
|
Post: #37
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-24-2007, 07:44 AM
Parent: #1
قـــــدري أنــــا .. يوسف حمدالنيل أبووجيدة ..
قدري أنا ...
يا فتاة تحمل الأشياء طائعة..
تبعثرها على دربي الطويل
تقلقني في حلّيِ وأوقات الرحيل
وتجعلني كمن قد ضاع خاتمه الجميل
إني عشقتُك ...
بعدما كادت ينابيع المحبة أن تجف بقريتي
هذى القرى .. أو تلكمُ المدن الحزينة قد تنادي
أعتقيني ..
أمنحيني مهلة أختارُ فيها وجهتي ..
لكن وجهتي التي يممتُ أنتِ ...
لكن خارطتي وبحري وحدودي فيك أنتِ
وينبوع المحبة منك أنتِ ..
إني عشقتُكِ ...
يا فتاة تمنح القدر اليقين
تجعل الأنوار تبرق كُل حين
تحرق الأشواق والآهات لحناً عسجدياً
وتذوبني حنيناً وأنيناً وإشتهاءً ...
قدري أنا ...
إني سجين ...
ولكم أحبُ السجن عندك يا فتاة
وكم أحبُ القيد والأغلال
هذى يداي .. فكبليني ..
وطوقي بسلاسل الياقوت خاصرتي وعنقي
ثُم أحمليني على كفيك مقتولاً شهيداً
ها قد وهبتك كُل عمري ...
فأوهبيني بعض عمرك .. بعض سرك
أو تعالي .. وأفسحي لي بين عينيك مكاناً
أحتويني قطرةٌ في حقلك الريان
أقطفيني زهرةٌ نديانة كالفل والريحان
وأنثري في خاطري الفرح المسافر والحنين
قدري أنا .. أني أبيت الليل وحدي حائراً
أشتاقُ طلتك البهية ...
أحتاجُ حرفاً دافئاً كي أستريح
قدري أنا .. أني أناديك تعالي .. تعالي .. تعالي
فهل تسمعين ؟.
|
Post: #38
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-24-2007, 07:51 AM
Parent: #1
الزمن الفقرى .. اسماء صديق الطيب الجنيد سومـا ..
يا دريبا مطوى بى آهات الزمن الفقرى ..
قايدنى معاك غصبا عنى مو بى خاطرى ..
سايقه الخطوه ووراها التانيه ..
وحر الرمض البهرى ..
حارق جوفى وزايد خوفى ...
ودمعى الحارالنازل يجرى ..
ودمى البغلى وقلبى البنزف
طاير من صدرى..
اعد ايامك يوم واسبوع ..
شهراً عربى وعامًا هجرى ..
اعاين فوق واتلفت جاى...
واتلفت جاى ..
لا شجيره تضللنى .....
ولا سحابة المطر الضهرى ..
لاجريفاً اخضر يبرد لى ....
ولا طين البحر البروى ...
يبلل ريقى ويودر عطشى ....
ويسند ضهرى ..
واشم ريحة النسمه البارده ....
من البستان الزهرى..
تلملم شملى ..تودر همى ....
وتمسح غبار العهد الحجرى ..
واعود من تانى واقول لى رويحتى ...
ده ما قدرى ..ده ما قدرى ....
|
Post: #39
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-24-2007, 07:53 AM
Parent: #1
لحن الخاطر .. أسماء صديق الطيب الجنيد سوما ..
مدفون جواك..
فى عمق الخاطر ..
لامى معاك ..
الريد الدافر..
بتهجاك..
واجمع فيك ..
بقدرة قادر ..
واستناك ..
افكر فيك..
لى يوم باكر
واترجاك ..
تشيلنى معاك .
غيما ماطر.
اتوه فى سماك ..
وليك اسافر ..
اعيش جواك..
الملم فيك
ونبضك طاهر..
اتمناك
اغنى معاك
لحنا عاطر
حروف منثوره..
درر وجواهر ..
وبيك اتحدى
قيس الشاعر ..
واحلم ديمة
باجمل حاضر ..
يحلق يرفرف ..
بى جناح طائر ..
يناجى الماضى..
ويفضل فاكر ..
كلمة رواها ..
البدر الدائر ..
عم شذاها ..
النسم الحائر..
يا يوم باكر .....
انت الامل
الاخضر ناضر
وانت الريد
الفيه بذاكر
وانت القلب
الكلو ازاهر
يا يوم باكر....
انت النيل
البجرى مشاعر..
وانت الحلم
الليه بخاطر
ادمر بيه
قيود وعساكر ..
اكسر تحته
الحظ العاثر..
وابدأ معاك
العمر الزاخر
بالافراح الليها بداية
ومن دون آخر ..
بالافراح الليها بداية
ومن دون آخر ..
***
|
Post: #40
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-24-2007, 07:57 AM
Parent: #1
أم الزين .. أسماء صديق الطيب الجنيد سوما ..
ضلاله بي طرقه
مشروره في حيطة
متكوله بي مرقه
رقراقا بيتاوق
بيناغم ألفرقه
حداها أم الزين
لابساها نص فتقه
بلامه في وجيها
ملتوقه بي لفقه
شايلالا خماره
في حليلة متحرقة
وقودا في اليدين
حازماه بي بتقه
جهالا بي غادي
تشابا في شفقه
تغنى وتهاتي
لصغيره بي رقه
تحجي يوماتى
خايفالو من شرقه
مقسومة في العينين
ما بتعرف ألمرقه
معيشة زى همين
تبداها بي طرقه
وحليلة في منقد
بصلاتها متفرقة
قفيفه مقدوده
مرقوعه بي ورقه
تتناول الفندك
تنادى للرفقة
كريمه أم الزين
بتقسم ألنبقه
حنينه للمسكين
تسقيه بالبقة
دمعاتها جوه العين
فرحانة مى حرقه
تلولى في الكرعين
ما بتعرف النقه
تحجي بالوالدين
لا صرخة لادقه
السمحة نواره
مرسومة ألخلقه
تتفقد ألجاره
بالنية مي زرقة
|
Post: #41
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-24-2007, 08:00 AM
Parent: #1
الزمن الفلانى .. أسماء صديق الطيب الجنيد سوما ..
****
قبضة الزمن الفلانى..
وكم تاشرات منو تانى
سافرت خترت بعيد..
بالاحاجى و بالاغانى
دمدمت غيم البلد . .
كومت فرحتنا
فى آخر ثوانى
لملمت بسمات
تأمل بى شروقا الاولا نى ..
هاجرت .. واتهجرت
مدفوره بى شوق الامانى
لى ضل نهاراتا شتر
ممزوجه لونا .. برتكانى..
فرفرت خايفه فى قلب
المطارات والموانى
معصورة بى خاطر الامل
لى رجعة فى عتمة زمانى
تضارا منو . .
وتانى ترجع ليه تانى
مسكونه بى فتر المسافات
والدريب الكان بعانى
ركنت مشاعرا المحبوسه . .
بالوجع المكانى
وانتكت تنفض
غبارا الكان مكندك بالمعانى .
سكتت تعدد فى سنين . .
مشلوله بالصمت المحجر زى اوانى
مضروسه بى هم السكات
نضما كتر كيفن ضنانى
والآهه فى نص الهجير
والخوف ضرير المنو دانى
ختم الحروف االناخره فى
عضم الشديرات بالتهانى
يا زمانى الكان فلانى
ضرضر عريسا ..
كان مجرتق..
بالتراب الاسمرانى ..
|
Post: #42
Title: Re: أسماء الجنيد ويوسف حمد النيل في درب الحبايب ..
Author: محمد سنى دفع الله
Date: 11-24-2007, 08:03 AM
Parent: #1
الجميل أخوي
دايما متأمل في حرم الجمال
ونحن معاك فراجه
ياجميل
خليك كده
ما يعدي عليك الا كل جميل
احبك
|
Post: #71
Title: Re: أسماء الجنيد ويوسف حمد النيل في درب الحبايب ..
Author: soma
Date: 11-26-2007, 09:42 PM
Parent: #42
Quote: الجميل أخوي
دايما متأمل في حرم الجمال
ونحن معاك فراجه
ياجميل
خليك كده
ما يعدي عليك الا كل جميل
احبك |
ود السنى يا جميل من البداية ومكمل للنهاية
مشتاقين لى طلتك السمحة
تسلم على الطلة يا ود الفريق والحلة
وشكرا حواشات وجروف
شكرا مارقة من الجوف
|
Post: #95
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-12-2007, 10:23 AM
Parent: #42
ازيك ودي أبوي ..
ياخي الشوق كميات ..
نسعد كثيراً لما نشوف أساميكم ترن وفيها صدى أعمالكم الجميلة ..
يا ريت من مساحة صغيرونه للإبداع ودعم من المهتمين لهذا الشأن ..
بلدنا فيها فنانين ومبدعين حقيقيين لكن فرصة ظهورهم ضيقة ومافي رأس مال يقتحم هذا المجال ويقوم بنشره ..
نتمنى نشوف في كل حتة مسرح ونادي وفن راقي ..
أبقى طيب محمد أخوي ..
|
Post: #43
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-24-2007, 08:03 AM
Parent: #1
غبشه .. أسماء صديق الطيب الجنيد سوما ..
السمحه وارده على البحر
شايله الصفيحه على الصفيحه
وتوبا بالواطه بيجر..
تتناطا من بين الغنيمات المبطحه فى الدريب
وتناحى فى الديك المجفلا غادى كر..
تزازى جاى .. ومره جاى
وتنهر الكلب البهوهو خايفه وتقول ليه جر..
*****
رفيقاتا القبيل سبقنها فاتنها
ما لاقيه واحده تآنسا وتبقالا فى الحالتين وزر..
فطومه مره تمد .. ومره تجك ..
وتتعتر تقشقش فى العرق والدنيا حر..
قديمات الحمام اتغبرن .. والشبشب المهرود
يبرطش فى التراب جاراه فوق كرعيها جر..
****
احى انا .. نفسى انقطع..
تنهيده تمرق من رويحة السمحه
زى فصين درر ..
****
لمن لفت نص الطريق ..لاقت رفيقاتا القبيل
رجعن خلاص من البحر..
يتهامسن .. و يتضاحكن ..
نظراتن الشمتانه تكوى السمحه..
زى كى الجمر..
وقفت ... وبى نظرة عتااااااااب ..
انا ما رفيقتكن .. نسيتن اللمه فى ضل الشدر ؟
اتلملمت لفحت طرف توبا وجرت..
ما عاينت قداما.. فجأة اتعترت فوق الحجر..
****
السمحه مى شبه التعب والبهدله ..
لكن ظروفا القاسيه اقوى من الدهر..
فطومه ديمه شايله شغل البيت..
لا يوم شكت لا اتململت .. واياما فى الدنيا بتمر..
*****
وكتين دنت سمحتنا من طرف البحر..
رمت الصفيحه وكوعت ايدينا فى نص الضهر..
ملت الصفيحه .. اتنهدت ..
لوت الوقايه بى ضجر ..
وهطت الصفيحه.. ورجعت تجرر فى الخطى..
والمويه من خرمين تسيل فوقا وتخر..
***
وصلت خلاااااااص آخر المطاف.. والفيها كملت
من مشيوير الورود ساعة العصر...
تكت الصفيحة تكبها فوق الزوير..
البالى من زمن الجدود مال واتنخر...
فلتت ادياتا الصغار من الوهن ..والمويه سالت..
تحت كرعيها زى جدول عبر..
اتزحلقت .. اتمايلت .. وقعت تراااااااااااح ..
فى لحظه كانت سابحه فى بركة مطر..
اتاوهت .. اتوجعت .. اتندمت 00 اتحسرت
والدمع من عينيها طفر..
اتحكرت فوق طينا داك .. تندب الحظ
المعتر ليها دوم طول العمر..
تندب الحظ المعتر ليها دوم طول العمر..
|
Post: #44
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-24-2007, 08:07 AM
Parent: #1
نهارات الفريق .. أسماء صديق الطيب الجنيد سوما ..
*******
يا دروب شاقه الخلق ...
والخلق ما بتتلحق ..
دايشه فى دريب الرزق ..
والرزق لى خالق الخلق ..
فى نهارات الفريق ...
والعرق وصل الحلق ...
ناس جهالا بتتشرق ...
وناس تجر ..ما بتتلحق ..
مرات تقوم .. مرات تقع ..
فى مطامير الورق ..
تجمع تعد .. تشرط تشق ..
تصرخ تهيج .. تزعل تطق ..
همها الدنيا ام قدود ..
ناسيه يوم.. بتمر برق ...
وناسيه يوم جمعاً كبير ..
كل زولا ليه حق ...
الدروايش الكتار ..
لا بتنوم .. لا بتتفرق ..
سبح لالوب تجر ...
فى سواد الليل تطق ..
تذكر المولى الكريم ..
والايادى بتتسبق...
نوبه ترزح من بعيد...
تشرح القلب البرق...
والعيون تعطف ..ترق..
والدميعات تنهمر ..
زى مطيرًة فى الشرق...
زى مطيرةً فى الشرق...
|
Post: #45
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 11-24-2007, 08:13 AM
Parent: #1
رحــيل .. أسماء صديق الطيب الجنيد سوما ..
مشيت بعيد من جنبنا ..
رحلت وراك
كل الدروب والامكنه
بارياك تفتش للحنان..
الكان معاك ساكن هنا
وللبسيمات المفرهده فى الديار..
اريجها عبق سوسنه
بى ضل كلامك يا ملك ..
يا زول مجرتق مننا
شلناك وديع متل الرضيع
ضلل بهاك يا ضلنا .
منانا نلقاك من زمان
قبال ميعاد بى كم سنه
شلناك وشاح فى كل صباح
شفناك عريس بى قلبنا..
لميت معاك كل الفرح
حتى الحرف رفرف دنا
رتل غناك المن صفاك
كل المشاعر المحزنه
عب النغم جدول طرب
شتل الحنين ساحات منا
لون بساط الكون خدار
فرهد جوار النيل سنا
ذكراك صبحت تنتظر
غنوات نشيلا ندندنا
نشوفا صورتك تبتسم
نرسم خطوط بى دمنا
لوحة وفا تفضل تعيد
ايامنا قربك يا جنا
ايامنا قربك يا جنا
|
Post: #46
Title: Re: أسماء الجنيد ويوسف حمد النيل في درب الحبايب ..
Author: د.محمد حسن
Date: 11-24-2007, 08:58 AM
Parent: #1
يوسف حمد النيل
يا زول منساب
زي نيلنا وشايل
كل جميل
يا حرفك الفك وشايل في جوته حنين مبلول
لي قدام
|
Post: #96
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-12-2007, 10:49 AM
Parent: #46
دكتور محمد حسن ..
هنا وهناك ..
عقبال ما نشوف كل أشعارك في كتاب أنيق ..
ودي خطوة جايه قولوا إن شاء الله ..
أبقى طيب يا زول يا زين ..
|
Post: #51
Title: Re: أسماء الجنيد ويوسف حمد النيل في درب الحبايب ..
Author: معتصم الطاهر
Date: 11-24-2007, 10:36 AM
Parent: #1
جميل منك يا معتصم
و دائما تأتى بالجميل
من الناس السمحين ..
|
Post: #54
Title: Re: أسماء الجنيد ويوسف حمد النيل في درب الحبايب ..
Author: مجدي عبدالرحيم فضل
Date: 11-24-2007, 11:29 AM
Parent: #51
أخي معتصم هو أحد فروع الجمال بالمنبر والرائع يوسف حمد النيل هو الوجدان وأسماء كوثر
عذب يجري بالمشاعر ويترقي بنا الي عوالم من السمؤ النفسي والوجداني الأصيل لهم منا كل
الحب .
؛؛؛أبوقصى؛؛؛
|
Post: #59
Title: Re: أسماء الجنيد ويوسف حمد النيل في درب الحبايب ..
Author: الزاكى عبد الحميد
Date: 11-24-2007, 01:25 PM
Parent: #54
معتصم:
الشكر لك من قبل ومن بعد على ايراد هذه
التحفة من الحميمية التي تمشي على قدمين
:وتسالم" الناس وكأن حروفها نابعة من حناجرهم..
الفاتح الجنيد:
الدهشة تورث الإبداع يا صديقي ..
وأنت الأقدر على ترجمة ذلك شعراً يستنطق الصمت..
فلا تصمت أمام الدهشة وتحرمنا من جميل كلمك..
سوما:
القصيدة تكتسب بعداً خاصاً من قربها
من كل ما هو سوداني..
السوداني الذي يرى في أبيه المثال الواجب حذوه..
القصيدة وجدت ضالتها في اللحن فسافر بنا عصام مع كلمات
القصيدة في فضاءات من الحزن النبيل..
لكم جميعاً السلام والتقدير..
الزاكي
|
Post: #85
Title: Re: أسماء الجنيد ويوسف حمد النيل في درب الحبايب ..
Author: soma
Date: 12-10-2007, 09:01 PM
Parent: #59
Quote: الفاتح الجنيد:
الدهشة تورث الإبداع يا صديقي ..
وأنت الأقدر على ترجمة ذلك شعراً يستنطق الصمت..
فلا تصمت أمام الدهشة وتحرمنا من جميل كلمك..
سوما:
القصيدة تكتسب بعداً خاصاً من قربها
من كل ما هو سوداني..
السوداني الذي يرى في أبيه المثال الواجب حذوه..
القصيدة وجدت ضالتها في اللحن فسافر بنا عصام مع كلمات
القصيدة في فضاءات من الحزن النبيل..
لكم جميعاً السلام والتقدير..
الزاكي
|
الاديب الاريب الزاكى عبد الحميد
المفردة عندك لا تقارن مع كل المفردات
كانك تستعمل قاموس خاص بك لوحدك
انت الذى تطوعه حسب الاحساس الكامن بدواخلك
احساس الانسان الشفيف الذى لا يخلط بين الخيال والحقيقة
ينسج لوحده حيثما يشاء .. ينسج ابداع لا يعرفه الا ماهو مبدع
تصويرك للاشياء الحولك ولمدى اعجابك بالجميل
نابع من الانسان الجميل المحكر جواك باريحية المتصوف فى محرابة
لا اقوى على مجاراتك اخى الاستاذ الزاكى
فقط انحنى لك شاكرة روعة احساسك وجمال مداخلتك
التى اسعدتنى ايما سعادة
شكرا لا تكفى
كل سنه وانت والاسرة الكريمة بالف خير
وتعود الايام ان شاء الله
والعفو والعافية
|
Post: #111
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-15-2007, 09:42 AM
Parent: #59
تحياتي أخي الزاكي ..
وشكراً لكلامك الزين وحضورك الأنيق ..
أعجبتني عبارة أن شعر سوما ويوسف يمشي على قدمين ويسالم الناس ..
وأضاف لهما عصام وجعفر بعد آخر ولحن مميز يسري في الوجدان ..
شكراً لا تكفي ..
وأبقى في أمان الله ..
|
Post: #83
Title: Re: أسماء الجنيد ويوسف حمد النيل في درب الحبايب ..
Author: soma
Date: 12-10-2007, 08:47 PM
Parent: #54
Quote: أخي معتصم هو أحد فروع الجمال بالمنبر
والرائع يوسف حمد النيل هو الوجدان وأسماء كوثر
عذب يجري بالمشاعر ويترقي بنا الي عوالم
من السمؤ النفسي والوجداني الأصيل لهم منا كل
الحب .
؛؛؛أبوقصى؛؛؛ |
الشفيف ابو قصى
ما اروع ما تسطره اناملك
ويعبر عنه احساسك النبيل
من رقة معانى تفوق حد الوصف
اسمح لى انا اتطاول قليلا
واعبر عن ما يجيش به الخاطر
عند قرآتى لاى مداخلة لك
حقيقة لا اجد امامى سواء الدهشة والاعجاب
اهديك كل مفرداتك البليغه
وشكرا واحة
وكل سنةانت والاسرة بالف خير يا رب
|
Post: #110
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-15-2007, 08:57 AM
Parent: #54
أخي أبوقصي ..
جمل الله أيامك ..
وشكراً لرقيق كلماتك وحضورك الزاهي فينا ..
يوسف وأسماء يستحقان كل الخير وكل جميل ..
لك ولهم كل الحب والتقدير ..
|
Post: #81
Title: Re: أسماء الجنيد ويوسف حمد النيل في درب الحبايب ..
Author: soma
Date: 12-09-2007, 10:35 AM
Parent: #51
Quote: جميل منك يا معتصم
و دائما تأتى بالجميل
من الناس السمحين .. |
العزيز معتصم الطاهر سلامات
شكرا على الطلة يا رجل يا جميل
كتر خيرك كتير ..
لك التحية انت والضيف القاعد جمبك
|
Post: #109
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-15-2007, 08:20 AM
Parent: #51
ازيك يا سمي ..
ليك وحشة شديدة يعلم الله ..
طلتك تنعش الروح ..
وجميل إنك هنا ..
أبقى طيب والمعاك ..
|
Post: #60
Title: Re: أسماء الجنيد ويوسف حمد النيل في درب الحبايب ..
Author: د.محمد حسن
Date: 11-24-2007, 07:34 PM
Parent: #1
الانيقة سوما
نفسك دعاش جايينا
من جوف البطانة
حرفك نغم
خلى القلوب طربانة
تقرض في الشعر
والعقول صبحت عديل ودرانة
|
Post: #86
Title: Re: أسماء الجنيد ويوسف حمد النيل في درب الحبايب ..
Author: soma
Date: 12-10-2007, 09:15 PM
Parent: #60
Quote: الانيقة سوما
نفسك دعاش جايينا
من جوف البطانة
حرفك نغم
خلى القلوب طربانة
تقرض في الشعر
والعقول صبحت عديل ودرانة |
د/ محمد حسن الشاعر الاسطورة
احساسك طبعا بشبهك براااااااك
اوع تجى تغالطنى وتتواضع كعادتك البتخجلنى بيها طوالى
وحات الله كان مفرده ما بقدر اجاريك
وكان شعر بقعد اتفرج فى جنس نضميك
وكان غنا كمان من حلاوته عندك خلينا ليك
اها شنو ليك
تسلم يا ود القبائل اب طبعا مو مايل
وكل سنة وانت طيب
وشكرا روعة كلامك يا رائع
|
Post: #65
Title: Re: أسماء الجنيد ويوسف حمد النيل في درب الحبايب ..
Author: ismeil abbas
Date: 11-25-2007, 12:30 PM
Parent: #1
ألأخ/معتصم
شكرآ لكل هذا الجمال.........
ألأخت/أسماء الجنيد رائعة دائمآ.......نسأل الله لوالدها الرحمة والمغفرة وأن يمتعها وأولادها بالصحة والعافية.......
ألأخ/يوسف حمدالنيل إطلالة جديدة وجميلة فى مجال الشعر....مزيدى من التقدم...............
إسماعيل محمد احمد عباس...........
|
Post: #66
Title: Re: أسماء الجنيد ويوسف حمد النيل في درب الحبايب ..
Author: soma
Date: 11-25-2007, 09:13 PM
Parent: #65
التحية للجميع ولنا عودة ان شاء الله
شكرا لكل الاخوة والاخوات المتداخلين
|
Post: #87
Title: Re: أسماء الجنيد ويوسف حمد النيل في درب الحبايب ..
Author: soma
Date: 12-11-2007, 04:27 AM
Parent: #65
Quote: ألأخ/معتصم
شكرآ لكل هذا الجمال.........
ألأخت/أسماء الجنيد رائعة دائمآ.......نسأل الله لوالدها الرحمة والمغفرة وأن يمتعها وأولادها بالصحة والعافية.......
ألأخ/يوسف حمدالنيل إطلالة جديدة وجميلة فى مجال الشعر....مزيدى من التقدم...............
إسماعيل محمد احمد عباس........... |
اخوى اسماعيل ود عباس
حبابو ود البكرموا الناس
حبابك واليوم السعيد اللينا جابك
طولت منك بالحيل .. اريتك طيب وحالك زين
كتر الف خيرك على مداخلتك اخوى
وعلى دعواتك للوالد بالرحمه.. ربنا يتقبل منك ان شاء الله
ونسال الرحمه لجميع موتانا
شكرا اخوى اسماعيل اردب محنة
والعيد مبارك عليك مقدما
العفو لله والرسول
|
Post: #112
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-15-2007, 10:48 AM
Parent: #65
الحبيب إسماعيل عباس ..
كيفك يا زول يا زين ..
مشكور على الطلة الحلوة ..
جمل الله ايامك ..
أبقى طيب ..
|
Post: #67
Title: Re: أسماء الجنيد ويوسف حمد النيل في درب الحبايب ..
Author: Alsa7afa_30
Date: 11-25-2007, 09:36 PM
Parent: #1
معتصم سلام الله عليك ..
كلمات دافئة و حنينة , زادها المبدعان عصام و جعفر رونقاً على رونق ..
لك ألف تحية و للأساتذة سوما و يوسف حمد النيل ..
|
Post: #90
Title: Re: أسماء الجنيد ويوسف حمد النيل في درب الحبايب ..
Author: soma
Date: 12-11-2007, 09:55 AM
Parent: #67
Quote: معتصم سلام الله عليك ..
كلمات دافئة و حنينة , زادها المبدعان عصام و جعفر رونقاً على رونق ..
لك ألف تحية و للأساتذة سوما و يوسف حمد النيل |
الصحافة سلام
لك انت التحية والله والتقدير
ونطلب منك العذر على التأخير
شكرا ملونه بالوان الطيف
على الاطلالة الجميلة
وكل سنة وانت طيب ان شاء الله
ربنا يحقق كل امانيك يا رب
شكرا الصحافة نغم عيد
|
Post: #114
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-15-2007, 05:04 PM
Parent: #67
الصحافة يا جميل ..
طلتك علينا بتسعدنا يا حبيب ..
شكراً لكلامك الزين وأمنياتنا لسوما وأبووجيدة بكل الخير ..
جمل الله أيامك ..
|
Post: #69
Title: Re: أسماء الجنيد ويوسف حمد النيل في درب الحبايب ..
Author: maia
Date: 11-26-2007, 07:40 AM
Parent: #1
سوما الحنينة
ما اجمل كلماتك وروعته طالع من جوه بكل صدق
واصلوا هذه الروعة
|
Post: #99
Title: Re: أسماء الجنيد ويوسف حمد النيل في درب الحبايب ..
Author: soma
Date: 12-12-2007, 02:00 PM
Parent: #69
Quote: سوما الحنينة
ما اجمل كلماتك وروعته طالع من جوه بكل صدق
واصلوا هذه الروعة |
الحبيبه مايا سلامات يا غالية
من ذوقك وحسك الراقى والله
شكرا على طلتك الجميلة يا ستهن
شكرا محنة
|
Post: #113
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-15-2007, 03:56 PM
Parent: #69
مايا ..
شكراً لمرورك ..
|
Post: #70
Title: Re: أسماء الجنيد ويوسف حمد النيل في درب الحبايب ..
Author: عبدالله داش
Date: 11-26-2007, 09:34 AM
Parent: #1
شكراً للعصابه الخماسية الأبعاد
معتصم
جعفر
عصام
أبو وجيده
ســوما
وابل من النضم الجميل
لكم الحب جميعاً
|
Post: #76
Title: Re: أسماء الجنيد ويوسف حمد النيل في درب الحبايب ..
Author: Khalid Saeed
Date: 12-08-2007, 06:41 PM
Parent: #70
درب الحبايب ..
لوحة فائقة الإبداع مجملة بألوان سومــا الزاهــية رغم حزن الفقد إلا أنها تشع بقيم الآباء التي تستحق هذا النظم الشفيف .. له الرحمة والدك .. فمثلهم يستحقون المناحة ومثلنا يجب أن يزرف الدمع عليهم ..
صاحب الريشة الجميلة يوسف .. أخرج أرواحنا من الجب بهذا النظم الفريد وجعلها تعبر عن الرؤيا بطرب حنين .. له ولآبداعه ألف تحية من كل الحواس .
أما صاحب اللمسات السحرية المبدع عصام محمد نور .. فألوانه تداعب كل أوتار الروح .. فهو رسول إبداع ... أتانا في هذا الزمن الحزين .. ليذكرنا بالحبيبة .. وبالوطن .. وبالقيم .. أعلم ياعصام إنني اتابع كل أعمالك بترصد وإلحاح روحي عجيب ..
تحياتي المدوزنة لكم جميعاً وللشفيف مـــو كميات من المحبة..
أخوكم/ خالد الأرباب
|
Post: #77
Title: Re: أسماء الجنيد ويوسف حمد النيل في درب الحبايب ..
Author: عواطف ادريس اسماعيل
Date: 12-08-2007, 08:27 PM
Parent: #76
التحية لشعراء الوجدان !!!
القومة ليك يا أسماء العظيمة ,,,
تعظيم سلام ليوسف ,,,
شكرا معتصم ,,,
لأنك جميل ترى كل شئي في الوجود جميلا !!!
|
Post: #108
Title: Re: أسماء الجنيد ويوسف حمد النيل في درب الحبايب ..
Author: soma
Date: 12-12-2007, 09:10 PM
Parent: #77
Quote: التحية لشعراء الوجدان !!!
القومة ليك يا أسماء العظيمة ,,,
تعظيم سلام ليوسف ,,,
شكرا معتصم ,,,
لأنك جميل ترى كل شئي في الوجود جميلا !!! |
عطووووووفة
السمحة و ولوووفة
تسلمى يا الحنيه على الطلة السمحة زيك
والاحساس الموكر حنية
من زولة شفيفة ونقية
شرفتينى يعلم الله
يشرف قدرك ان شاء الله
القومه ليك انتى يمه
وكل سنة انتى وكل الاهل طيبين
شكرا قمر دورين
|
Post: #117
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-17-2007, 10:03 AM
Parent: #77
كيفك يا عواطف ..
جمل الله أيامك ..
شكراً لكلماتك الطيبات ..
والتحية لكل صاحب حرف دوزن به دواخلنا ..
ولك أختي عواطف ..
محبتي وتقديري ..
|
Post: #101
Title: Re: أسماء الجنيد ويوسف حمد النيل في درب الحبايب ..
Author: soma
Date: 12-12-2007, 02:49 PM
Parent: #76
Quote: درب الحبايب ..
لوحة فائقة الإبداع مجملة بألوان سومــا الزاهــية رغم حزن الفقد إلا أنها تشع بقيم الآباء التي تستحق هذا النظم الشفيف .. له الرحمة والدك .. فمثلهم يستحقون المناحة ومثلنا يجب أن يزرف الدمع عليهم ..
صاحب الريشة الجميلة يوسف .. أخرج أرواحنا من الجب بهذا النظم الفريد وجعلها تعبر عن الرؤيا بطرب حنين .. له ولآبداعه ألف تحية من كل الحواس .
أما صاحب اللمسات السحرية المبدع عصام محمد نور .. فألوانه تداعب كل أوتار الروح .. فهو رسول إبداع ... أتانا في هذا الزمن الحزين .. ليذكرنا بالحبيبة .. وبالوطن .. وبالقيم .. أعلم ياعصام إنني اتابع كل أعمالك بترصد وإلحاح روحي عجيب ..
تحياتي المدوزنة لكم جميعاً وللشفيف مـــو كميات من المحبة..
أخوكم/ خالد الأرباب |
اخوى الارباب ركازة الاحباب
حبابك يا الزين
يا قبلة العارفين
اخجلتنى بكلامك الموزون واحساسك الشفيف
شكرا معمعمة بالمحنة للدعوات الكريمة للوالد عليه رحمة الله
وشكرا ملونه بالاوان الطيف لاحساسك تجاه القصيدة
وشكرا بالانابة على احساسك الدافى لقصيدة الاخ ابو وجيدة
الله يطراه بالخير ..
ومن هنا نناشده ان يعاود الكتابة كلنا فى لهفة وشوق لقصائده الرائعه جدا
صدقت فى كل حرف كتبته فى حقه .. وهو فعلا يستحق كل ما سطر عنه
العيد مبارك عليك اخى خالد وربنا يعيد عليك المناسبة العظيمة
بالخير الوفير والصحة والعافية
وتحياتى عبرك لاسرتك الكريمه
شكرا عيديه
|
Post: #116
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-16-2007, 05:27 PM
Parent: #76
كيفك يا أرباب ..
شكراً لكلماتك الرائعة وهم يستحقونها ..
والتحية عبرك لكل صاحب كلمة حلوة جملت دواخلنا ..
ولكل صاحب نغم جميل أطربنا وأسعدنا ..
محبتي وتحياتي ..
|
Post: #100
Title: Re: أسماء الجنيد ويوسف حمد النيل في درب الحبايب ..
Author: soma
Date: 12-12-2007, 02:34 PM
Parent: #70
Quote: شكراً للعصابه الخماسية الأبعاد
معتصم
جعفر
عصام
أبو وجيده
ســوما
وابل من النضم الجميل
لكم الحب جميعاً |
داش الزول الشفيف
وريف العبارة غزير المعانى
طلتك بساتين فرح
وجداول محنة
شكرا بعمق النيل للكلام الجانا منك
وكل سنة وانت طيب يا رب
تعود الايام
|
Post: #115
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-16-2007, 05:00 PM
Parent: #70
ولك من الشكر أضعاف يا داش ..
نضمك في الشعر بطمنا إنو سودانا لسه بخير ..
وإنو ظلال دوحته ممتده إلى ما لا نهاية ..
أبقى طيب يا صديق ..
|
Post: #80
Title: Re: أسماء الجنيد ويوسف حمد النيل في درب الحبايب ..
Author: امير عوض الجمري
Date: 12-09-2007, 09:46 AM
Parent: #1
معتصم دفع الله
سلامات يا ممكون بالروعة ومسكون بالجمال
اسماء الجنيد وابو وجيدة
شاعران رقمان يكملان لوحة العطاء الجميل
والفن الراقي في ردهات هذا المنبر الوطن
لك ولهما كل الود والشكر لما يمتعانا به من روائع الكلم وعذب الحديث
|
Post: #82
Title: Re: أسماء الجنيد ويوسف حمد النيل في درب الحبايب ..
Author: soma
Date: 12-10-2007, 08:35 PM
Parent: #80
Quote: معتصم دفع الله
سلامات يا ممكون بالروعة ومسكون بالجمال
اسماء الجنيد وابو وجيدة
شاعران رقمان يكملان لوحة العطاء الجميل
والفن الراقي في ردهات هذا المنبر الوطن
لك ولهما كل الود والشكر لما يمتعانا به من روائع الكلم وعذب الحديث |
العزيز امير عوض الجمرى
شكرا على الطلة يا ود الفريق والحلة
كتر خيرك على الاحساس النبيل النابع منك بصدق
المنبر منور بى الزيكم والله
و لو لا وجودكم لما انطلق الاحساس ولما سرح القلم
فى ممرات الوجود
لك التحية مكنونة
وكل سنة وانت بالف خير
عيد سعيد وعمر مديد
لك واسرتك الكريمة
شكرا مارقة من الجوف
|
Post: #84
Title: Re: أسماء الجنيد ويوسف حمد النيل في درب الحبايب ..
Author: خالد علي محجوب المنسي
Date: 12-10-2007, 08:58 PM
Parent: #82
Quote: دمعاتى جارية و لسه كابا..
كاسرة زى سيلاً دفر..
دمر شتول نوارو شابا ..
قطع حشا الفرع الرطب ..
حتحت خضر.. نديانه دابا ..
شرد عصافيراَ بنت ..
اعشاشها من اخرالسرابا ..
صدقنى يابا ..
ليلى مفروش الاسى..
ضلى معروش الكآبا..
فاقدة الحنان الفيك رسى..
تايهه زى شفع ضهابا ..
شارده فى دروب الشقا ..
مقطوعه زى شدرات فى غابا
خايفة من صوتا مشا ..
باكية الامان الكان سحابا ..
صدقنى يابا ..
الكون بلاك كاسى الجفا..
مسكون ضنى وممزوج رتابا ..
والفرح مرسوم صور..
لا روح ترف لا صوت ربابا ..
والبسيمات المحجرة فى الضلوع..
مسجونه فى ضلمة عذابا ..
صدقنى يابا ..
بتشابا لى الذكرى القبيل..
ارويها بى نفسك شرابا ..
القاك فى الحلم الدليل ..
والقاك فى الآهه هضابا ..
تنسج معاى المستحيل ..
ارجاك بى قولة حبابا..
افرد ادياتى االشقن ..
من الوهن خط الكتابا ..
انادى فيك طول الزمن ..
حليلو يابا ..
حليلو يابا .. |
الفاضل / معتصم دفع الله
سلااااااااام يا طيب وتبقى طيب وعافية
عبرك نطبع أحلى إنطباع إعجابنا بشعر
الشاعرة أسماء الجنيد والشاعر أبوجيدة
ولك تحياتي عاشق الكلم الطيب معتصم دفع الله
خالد
|
Post: #88
Title: Re: أسماء الجنيد ويوسف حمد النيل في درب الحبايب ..
Author: الصادق خليفة
Date: 12-11-2007, 08:00 AM
Parent: #84
عجبني نضم العيال
يوسف و سوما شكراًعلى الكلام المرصوص و المموثق .
معتصم سلامات
|
Post: #93
Title: Re: أسماء الجنيد ويوسف حمد النيل في درب الحبايب ..
Author: مدثر محمد ادم
Date: 12-11-2007, 05:34 PM
Parent: #88
Quote: اللهم ارحم والد اسماء واسكنه فسيح جناتك مع الصديقين والشهداء.
والحمد لله رب العالمين. |
|
Post: #121
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-17-2007, 04:35 PM
Parent: #93
ويرحم جميع موتى المسلمين ..
شكراًَ مدثر ..
|
Post: #107
Title: Re: أسماء الجنيد ويوسف حمد النيل في درب الحبايب ..
Author: soma
Date: 12-12-2007, 08:37 PM
Parent: #88
Quote: عجبني نضم العيال
يوسف و سوما شكراًعلى الكلام المرصوص و المموثق .
معتصم سلامات |
اخوى الصادق ود الخليفة
حباب المهل عشا الاهل
وعجبتنا طلتك انت يعلم الله
وشكرا على الاحساس الجميل ونبيل وملان حنية
شكرا حجوات حبوبات
والعيد مبارك عليك .. العفو لله والرسول
|
Post: #120
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-17-2007, 04:07 PM
Parent: #88
الصادق خليفة كيفك يا حبيب ..
طولت الغيبة والشوق كميات ..
شكراً لطلتك علينا ..
يديك العافية ..
|
Post: #105
Title: Re: أسماء الجنيد ويوسف حمد النيل في درب الحبايب ..
Author: soma
Date: 12-12-2007, 08:20 PM
Parent: #84
Quote: الفاضل / معتصم دفع الله
سلااااااااام يا طيب وتبقى طيب وعافية
عبرك نطبع أحلى إنطباع إعجابنا بشعر
الشاعرة أسماء الجنيد والشاعر أبوجيدة
ولك تحياتي عاشق الكلم الطيب معتصم دفع الله
خالد |
حباب اخوى خالد
عز القبيلة والاهل جملة
الفنجرى سمح الطلة
ودالفريق والحلة
يعجبوك وليداتك يا يابا قول آمين
كتر الف خيرك ود القبائل المى خمج
تسلم وتسلم ايامك
شكرا محنة
|
Post: #119
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-17-2007, 03:41 PM
Parent: #84
الحبيب خالد المنسي ..
سلمت يا طيب القلب ..
وجودك دوماً يسعدنا وكلماتك لها صدىً عندنا ..
محبتي وتقديري ..
|
Post: #118
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-17-2007, 10:15 AM
Parent: #80
الجمري يا صديقي ..
كيفك يا زول يا زين ..
معك نستمتع بما يكتبه أبووجيدة وسوما ويغنيه عصام وجعفر ..
شكراً لأنك هنا يا حبيب ..
محبتي ..
|
Post: #94
Title: Re: أسماء الجنيد ويوسف حمد النيل في درب الحبايب ..
Author: عمر سعد
Date: 12-11-2007, 08:27 PM
Parent: #1
اللهم تقبل والد سوما بواسع رحمتك
واجعل مثواة الجنة مع الصديقين
واجعل البركة فى اهلة
والزمهم الصبر
واجعلة اخر احزانهم يا كريم
|
Post: #97
Title: Re: أسماء الجنيد ويوسف حمد النيل في درب الحبايب ..
Author: julia shawqi hamza
Date: 12-12-2007, 11:23 AM
Parent: #94
سوما (الكنداكة)
كيف نعزيك في هذا المصاب وقد مضى شهر عليه؟؟؟؟؟؟؟ و لا يفصلنا سوى بضع كيلومترات ، كيف؟؟؟
اللهم ان كان محسنا فزد في احسانه و ان كان مسيئا فتجاوز عن سيئاته و تقبله قبولا حسنافأنت أرحم الراحمين..
و اسمحي لي تأجيل التعبير عن احساسي بالنشوة الناتجة عن قراءة كلماتك المموثقة و انسياب اللحن الدافئ من خلالها في طريقها الى ما وراء قناتي السمعية الى حين آخر.
مع تحياتي...
شوقي حمزة //
|
Post: #98
Title: Re: أسماء الجنيد ويوسف حمد النيل في درب الحبايب ..
Author: soma
Date: 12-12-2007, 01:34 PM
Parent: #97
Quote: سوما (الكنداكة)
كيف نعزيك في هذا المصاب وقد مضى شهر عليه؟؟؟؟؟؟؟ و لا يفصلنا سوى بضع كيلومترات ، كيف؟؟؟ |
عمو شوقى سلامات يا رمز الوطن الشامخ والحضارة النوبية العريقة
تسلم يا استاذ الاجيال
يكفينى فخرا تسميتك لى بالكنداكة ..
هذا فضل لن انساه ما حييت
الشريط له شهر يا عمو بس انت جاطت عليك الاحداث
والدى له الرحمة فارقنا قبل الخمس اعوام تاركا ورائه ذكرى لن يمحوها الزمن
رحمه الله بقدر عدد الحروف الغرسها بتفانى واخلاص
فى آلاف التلاميذ فى جميع انحاء البلاد وبقدر الكلام الفى الكتب
لو كان ممكن ان نفديهم بارواحنا لفديته ليبقى ولو قليلا
ليستمر فى تربية جيل اليوم ويزرع البسمه فى شفاة ألاخرين مثل ما علمنا
له الرحمه والمغفرة ولجميع موتانا
واستغفر الله العظيم
Quote: اسمحي لي تأجيل التعبير عن احساسي بالنشوة الناتجة عن قراءة كلماتك المموثقة و انسياب اللحن الدافئ من خلالها في طريقها الى ما وراء قناتي السمعية الى حين آخر.
مع تحياتي...
شوقي حمزة // |
شهادة مثل هذة من استاذ مثلك
ضليع فى الفن والموسيقى ستظل وشاح على صدرى مر الزمان
لك التحية مثنى وثلاث ورباع والى ما لانهاية
شكرا عمو شوقى بحجم الوطن
|
Post: #123
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-18-2007, 08:05 AM
Parent: #97
شكراً لهذه المشاعر الطيبة أستاذ شوقي ..
تحياتي ..
|
Post: #106
Title: Re: أسماء الجنيد ويوسف حمد النيل في درب الحبايب ..
Author: soma
Date: 12-12-2007, 08:26 PM
Parent: #94
Quote: اللهم تقبل والد سوما بواسع رحمتك
واجعل مثواة الجنة مع الصديقين
واجعل البركة فى اهلة
والزمهم الصبر
واجعلة اخر احزانهم يا كريم |
اللهم آمين يا عمر
الله يديك العافيه
دعواتك الحنينه دى يا عمر ياخوى
اثرت فينى جدا واديتنى احساس بخوتكم العميقة
ربنا يسمع منك ويديك قدر نيتك يا صافى النية
ويجعل البركة فيك ان شاء الله
ويديك الفى مرادك ..
نجازيك فى السمح مو شين
يا عمر الحنين
بركة رب العرش العظيم
والعيد مبارك عليك
والعفو لله والرسول
شكرا عمر مطامير محنة
|
Post: #122
Title: Re: أسماء الجنيد ويوسف حمد النيل في درب الحبايب ..
Author: معتصم دفع الله
Date: 12-18-2007, 07:54 AM
Parent: #94
يا رب يا كريم ..
لوالد أسماء الرحمة ولكل موتانا ..
شكراً عمر سعد ..
|
Post: #102
Title: Re: أسماء الجنيد ويوسف حمد النيل في درب الحبايب ..
Author: أبووجيدة
Date: 12-12-2007, 04:58 PM
Parent: #1
الإخــوة والاخوات الأعزاء /
تحياتي لكم بلا حدود وكل عام وأنتم أكثر ترابطاً ..
عذراً لعدم تواصلي معكم عبر هذا البوست وذلك لظروف خارجة عن الإرداة فلكم العتبة ...
وشكراً كثيراً على مروركم الجميل ...
ولي عودة .
|
Post: #103
Title: Re: أسماء الجنيد ويوسف حمد النيل في درب الحبايب ..
Author: أبووجيدة
Date: 12-12-2007, 05:10 PM
Parent: #1
زوله حنينـــه ....
وماليه الحته سماحة وضيء
أنـا بسأل نفسي عـــليكِ ...
كيف شقيـتي مـداخل الروح
التعــبت غـربة وزاده أنــين ؟.
وكيف خصبتي مكانك فيني ؟
شتلتِ حــروفك لي حـقول ...
فال الغنوه الجـمل صــــوتك ...
حسك وإطــار صورتك ...
بتق كُــــل حنـــــين الرجعة
ولون المطرة وطعم النــــيل
ما إنتِ حنينه وزلـــه أصيـــله ...
وخــاته ضفايرك لي قـــنديــل ...
بيها تضــوي دروبي وذاتي
وهجعــة زول في عــز الليل
يـــازولـــه حنيــــــــنه ....
وماليه الحته سماحـــه وضيء
أنـــا إشتقت لي ملاقــتك ...
وبيك بستف جــواي الفرحة
خـريف الحرف المنك هاطــل
ومالي مسامي بي غــــنواتك ...
ألحان طمبور موال وحــــنين
وأنــا أدمنت حــــروفك لي ...
عطشت عليك وريـــد الشوق
مستني دخـــــــولك والمطرة
سكنتك بين أحـــــداقي ...
وفي جــــــواي شايلك قنديل
ما إنتِ الفايضــه حنان ومعاني
أنـــا خبيتك فيني عــــديل .
|
Post: #104
Title: Re: أسماء الجنيد ويوسف حمد النيل في درب الحبايب ..
Author: أبووجيدة
Date: 12-12-2007, 05:14 PM
Parent: #1
دعـــوه
إني دعـــوتك ...
رغم همس الصمت
في زمن البُكاء ...
أن نستعــــــــيد ....
صياغة الأشــــواقِ ..
والعشقِ الــــبري ...
ونعايش الحب الذي
ملأ الفؤاد أنيـــــــنه ...
لكنكِ خوفاً تخبئ حسنه
خلفَ سورِ الإدعــــاء ...
مهلاً علــيك ...
ستدقُ أجراسُ الحنينِ بداخلك
وتشعُ أنـــوارُ المساء ...
فــرحاً بمقدمِ فـــارسٍ ...
متوشحاً إسمي ...
يطُل عليك من باب السماء
مستبشراً وعداً يُعانقُ ...
في دواخلكِ البريئة ...
كُـل طهرِ الأنبــــــياء ...
أنا لستُ بالصّديقِ يوسف
لكنني بدواخلي تتجملُ الأشياءُ عفواً
كلما أمعنتُ فيك بلا حــــيا ...
يا هذه لمَ هذا العـــناءُ
أتـرُكي مـــا قد مضى
وتشبثي فـرحاً بإشـــراقِ الحياهِ ...
فغـــداً سيُفتقد الضــــياء ...
ونعود نــركضُ دون همسٍ ...
أو إيحــاء ...
فــــــأنا دعــــوتك ...
أن نعيشَ الحب َفي زمن البُكاء
ونستعيدُ صياغة الأشــــواقِ ...
والتفاصـــيلَ الجميلة والبهاء ...
يا هـــذه أمنحيني بعضُ كُلك
أو كُل بعضك واسأليني ...
كيف كان الإنــــتماء ؟...
قد أجــيبُ بـــــلا تردد ...
بأنك ألقاً يشع ...
أو كزهــــرةِ كستناء ...
فهلا تجيبي دعـــــــوتي ...
أن نعيشَ الحب َفي زمن البُكاء؟؟؟؟.
***
|
|
