رابطة اصدقاء قناة الشروق الفضائية

.
.
.
باب التسجيل مفتوح

كما هناك فرصة للنقد البناء الذي سيصل حتما للادارة العليا للقناة
ومديري الادارات ومعدي البرامج حتى لو واحد عندوا راي في الاخبار
ممكن يقولوا مش في رغبتها الاولى رضاء المشاهد السوداني عموما

اتمنى حقاً ان تستطيع ان تسوق لكل ماهو جميل
في بلادي يستحق ان تراه عيون العالم الخارجي











مدخل للخروج :
مرتضى جعفر
ناسف تم قفل باب العضوية

اسجل اسمى لانها قناة سودانية

وارجو ان لا تخذلنا كما فعلت قناة هارمونى سابقا

اخي قسما كلنا نرجو ذلك

لان جمال قناة النيل الازرق
حجبه عن اهلنا السودانيين ذلك التشفير الذي
لاينال خدماته الا القله بالداخل وبعض اهل الخارج





مدخل للخروج :
نحن قوم قد خلقنا للجمال






ياناذر خليفه

عليييك الله جيب لينا

اربط هذه الاغنية لزيدان ابراهيم

الى محبي الجمال

مازال باب التسجيل مفتوحاً

والكلام ده بعد المشاهده

والي مدة اسبوع كامل



يا تمبس جيب لينا الترددات بتاعت القناه

على كل الاقمار المتاحة فيها عشان خاطر حبايبنا

أسجل حضور .. وأتشرف بالإنضمام لهذه الرابطة

وأي حاجة تخلي سودانا نحنا معاها ...

يا بصاص سجلنا خلااااص ...

.
.
.
مشاهدات اليوم الاول

اتى في الاخبار
اسم الرئيس عمر البشير مقرون باسمه الرئيس السوداني
مش هي قناة سودانية - نقطة تستحق الوقوف عندها



ملاحظه بعيدة :

لايهتم المصورون بضبط الصوره داخل
الصوره داخل الكادر مما يؤدي الى ازعاج عين المشاهد

وواحده تانية :

الاستطلاعات القبلية دي على نظام تتوقع كورة الهلال والمريخ
حاتكون كم فانها تؤسس الى صوره ذهنية متوقعه قد لاتتماشى مع السياسة
البرامجية للقناة بالصورة التي تؤدي الى صدمة نفسية تعمل على احجام المشاهد من متابعة القناة



وواحده تالته للمخرجين


لايستقيم ان يوجه المُستطلع عينيه للمحاور المحجوب اصلاً
من مسرح الصوره حيث ان ذلك لايستقيم مع تقنيات المقابلات
في مثل تلك الاستطلاعات

عفواً لحظه :
يجب ان لاننسى انها فترة بث تجريبي


مدخل للخروج :
اتمنى ان تنعكس هذه الحميمه
التي لمسناها لطاقم القناة في الخرطوم
على شكل البرامج المقدمه




البصاص

الاداره التى لا تحترم عاملها اداره غير جديره بتقديم ما يسعد الناس!! صح؟
ولكن.... سندع الاشجار تنمو......

رساله لكل مدراء المحطات الاذاعيه فى السودان(اذاعه وتلفزيون) الذين يمنعون الشرفاء المبدعين من العمل ويفصلونهم ويشردونهم.
نص الرساله:
بالدارجى:
اى مدير بقدر يفصل بس ما اى مدير بقدر يحافظ على عمالوا.
عارفين ليه؟ لانو الرفد ما بحتاج ابداع.
الشروق قناه سودانيه نتمنى لها النجاح. ولكنها لا تحفظ الود ولا الحق الادبى (تجربه شخصيه) وباقى الكلام والتفاصيل لى قدام.
بعدين شنو الناس ديل كيزان وما كيزان !!!!!! حمتعكم بالتفاصيل والحقائق... وحتجيب ليها ارقام.

بالأمس شاهدة جزء من البث التجريبي والذي كان متعثرا
وهو يعكس إنطباع غير جيد ، ومنه خرجت إن القناة محتاجة
لفترة تخمير أطول وبما إنها قد خرجت (خدّج) يجب وضعها في
حضانة حتى يمكن تفادي بعض من أمراض الطفولة.

كان من الأجدر ان يكتب بث تجريبي للعلم.

نرجو لها التوفق والتسويق المهني

.
.
.

Quote: كان من الأجدر ان يكتب بث تجريبي للعلم.

الاخ ايمو
هو الفطير المبغس كان كتير

لكن بيني وبينك قلنا نمد حبل الصبر لحدي اسبوع
عشان تعرف الخبراء العرب الكتار ديل لزومهم شنو؟
خصوصاً ان هذه االبلد بها وفرة من القامات الابداعية في مختلف ضروب
الاعلام المرئي ونحن هنا مازلنا نتلمس الفرق الذي احدثوه

وبعدها لكل حادثة حديث

البصاص

.
.
.

Quote: اى مدير بقدر يفصل بس ما اى مدير بقدر يحافظ على عمالوا. عارفين ليه؟ لانو الرفد ما بحتاج ابداع. الشروق قناه سودانيه نتمنى لها النجاح. ولكنها لا تحفظ الود ولا الحق الادبى (تجربه شخصيه) وباقى الكلام والتفاصيل لى قدام. بعدين شنو الناس ديل كيزان وما كيزان !!!!!! حمتعكم بالتفاصيل والحقائق... وحتجيب ليها ارقام.

اخي السميح

حقاً ان الفصل لايحتاج الى ابداع

اما بخصوص التجربة الشخصية مع الادارة
فكلنا فلي انتظار افاداتك

البصاص
مساء الخير

الظاهر عليك قاعد تبص كويس في القناة .... وملاحظاتك عن اليوم الاول كانت دقيقة جدا.
سجل عضو .....
ولان نضئ شمعة خيرا من ان نلعن الظلام .
عسي ان تكون خيرا من سابقاتها .
تحياتي
هارون دياب

سابدي اول ملاحظة ومهمة في رأي

هل هناك شرط ان يكون هناك مذيعين ومذيعات غير سودانيين

هل ارض المليون ميل مربع لا يوجد فيها نساء جميلات وذوي حضور وموهبة تقديم البرامج

يعني معقول اشكالنا ما سياحية عشان نتقدم مع الغير ( عندي تجربة شخصية مع زول سوداني ومعروف للناس في السودان حاول يقدم برنامج هام جدا في احد القنوات الفضائيةالعربية الجماعة قالوا ليهو في الآخر ( شكلك ما سياحي جابو ليهو مذيعة سورية ما عندها شي في راسها غير شعرها ولونها اها زولي ده طوالي اتقدم باستقالة واوقف تسجيل البرنامج كما استقال المخرج - وهو عربي الجنسية - تضامنا معه

سؤال :

طيب لو نحن ما قبلنا اشكا مذيعاتنا ومذيعننا في قنواتنا الفضائية حيمشوا وين


بصراحة مافي داعي لللبننة والسورنة والبشتنة الا نكون عندنا عقدة لون


خلونا سودانيين 100%


جمال السنوسي
عضو مشاغب

السنوسي
والله ضحكت وأخرجتني من حالة دبرسة عابرة

Quote: لللبننة والسورنة والبشتنة

أبدعت

جمال السنوسي
صباح الخير

سؤال :

طيب لو نحن ما قبلنا اشكا مذيعاتنا ومذيعننا في قنواتنا الفضائية حيمشوا وين


بصراحة مافي داعي لللبننة والسورنة والبشتنة الا نكون عندنا عقدة لون


خلونا سودانيين 100%


جمال السنوسي
عضو مشاغب

والله دي مامشاغبة..... وسؤال في محله .... وبعدين نحنا الجماعة ديل مابنقدر عليهم بكره يقول ليك القناة دي قاعده تخسر ولازم نحركه شوية ..... وطبعا نحركه لعناية السيد / جمال الوالي
تحياتي
هارون دياب

Quote: طيب لو نحن ما قبلنا اشكا مذيعاتنا ومذيعننا في قنواتنا الفضائية حيمشوا وين

الفضائية السودانية قفلت ولا شنو!!!!!!!!!!!!!!!




ست البنيـــــــــــات

.
.
.
والله شبكتنا اليله جابت سمكاً كبار بالحيل

مرحباً بالمخضرمين
دياب والسنوسي

ونواصل ملاحظات اليوم الاول

ونقول :

انه يمكن يكون في سبب منطقي في انه الناس تستعين
بفنيين مهره في مجالات الجرافيك والمونتاج وغيرها
من الضروب التقنية المكملة للعمل في الاعلام المرئي
نسبة للتطور الكبير في اجهزتها والتي بالتالي تحتاج
الى تقنيين اصحاب خبرات عالية ورؤى ابداعية خلاقه
تساعد في تاسيس ما يسمى بالصورة الذكية كتقنية اعلامية


لكن حقاً الذي لم اجد له مبرراً هو هذه الوجوه العربية
لانهم وان طبقت شهرتهم الافاق فهم لدينا غريبي الوجه واليد واللسان
وبما ان الاعلامي هو جرس الانذار المبكر لكل هموم وطنه وشعب بلده
فأظن انه اذا كانت هذه القناة ( سودانية الهوى والهوية )

فان هذه الوجوه العربية وان اجادت فهي سقطة اعلامية غير موفقه

وكل ذلك ينعكس على ادارة العملية الاخراجية والتي يلزم ان يكون على راسها
( سوداني الهوى والهوية) حتى يستطيع ان يتلمس حاجيات ورغبات المشاهد السوداني
ويعمل على عكسها عبر شاشة التلفزيون مستفيداً من ذلك الطاقم التقني المسلح بتلك التقنيات الحديثة


عفواً لحظه :
مشاهدات اليوم الثاني نسينا نقدمه
يمكن ان نجملها في شخصية الطيب عبد الماجد
الذي يقدم نفسه في كراكتر المذيع الاخباري
ذلك الكراكتر الذي اظنه فرض عليه من قبل تلك القنوات العربية التي
كان يعمل بها في مضمار سعيها للتشبه القشري بالقنوات العالمية امثال (cnn)
وهي تضم ضمن في طاقم مذيعيها مختلف الاثنيات وهي تسعى لايجاد ذلك المذيع صاحب البشرة السمراء بين طاقم مذيعيها

وكلنا يعلم كما يعلم الاخ الطيب انه بجلوسه خلف ديسك الاخبار فقد كل ذلك
الالق والكاريزما لشخصية الطيب عبد الماجد المذيع الحواري الذي فتن المشاهد السوداني
ولفت القنوات العربية بتلك الامكانات الحوارية العالية وتلك القدرة على السبر في اغوار الصيف
والقدرة التامة على امتاع المشاهد السوداني




بالمناسبة برنامج بيت الهنا ده كمان حاجه تانية بنجيها بي رواقه ..

هو صحي الوحده في وادي النيل تمت خلاص


مدخل للخروج :

لكن هي جنس بشتنه

قال كًتم قال

بينما الصحيح كٌتم

في داعي

.
.
.
كمال محجوب ما نسيناك

والف مرحباً بك في رابطة اصدقاء قناة الشروق




مدخل للخروج :
من القائل انا اتحدث اذن انا موجود


البصاص

يا ابوعبيدة

يا ريت تكون شفت الــ make up للضيوف

والله الشاعر داك ( ابيت ما بقول اسمه) زول حنين وقصايده حنينة) عملوا ليهو مكياج خلو وشوا ابيض انا لمن قلت الزول ده عيان ولا شنو خاصة لانو هو زول صاحبي وبعرف لون وشو كويس والفرق كان واضح ما بين لون الوجه ولون الرقبة

هسه في داعي لي زي ده

ما يعملو التلميعة دي بالالوان المناسبة مع لون بشرتنا

وبعدين الديجيتال ده بيفضح اي لون مركب في الوجه

خلونا سودانيين 100%

جمال السنوسي
عضومشاغب

Quote: لكن حقاً الذي لم اجد له مبرراً هو هذه الوجوه العربية فان هذه الوجوه العربية وان اجادت فهي سقطة اعلامية غير موفقه

Quote: عفواً لحظه : في مضمار سعيها للتشبه القشري بالقنوات العالمية امثال (cnn) وهي تضم ضمن في طاقم مذيعيها مختلف الاثنيات وهي تسعى لايجاد ذلك المذيع صاحب البشرة السمراء بين طاقم مذيعيها

حاجة عجيبة ياخى ؟؟؟

أحرام على بلابله الدوح *** حلال للطير من كل جنس

يعنى القنوات الاخرى حلال عليها تشكيلة المذيعين والمذيعات
وحينما يأتى ذلك فى قناة سودانية يصبح حراماً ؟؟؟

لماذا يا أحباب
اليس من حق هذه القناة اختيار الطاقم المهنى الذى يشرفها من اى أشكال البشر ؟؟
من يريد عملا محترما لابد ان يجلب له الكوادر المؤهلة والتى تبشر بأنها ستقدم عملا اعلاميا ناجحاً ..

لا ارى فى ذلك غضاضة البته ..

قرشو مالك جيتنا بي طريقة

لاتقربوا الصلاة ووقفت لحدي هنا

هاك جزء من كلامي بمناسبة وم عيد الضحية
والحنجره هي (الذبح الغير صحيح لحدى العامية السودانية)

نمش لي قدام

اها نعيد كلامي الموجه للطيب :

Quote: مشاهدات اليوم الثاني نسينا نقدمه يمكن ان نجملها في شخصية الطيب عبد الماجد الذي يقدم نفسه في كراكتر المذيع الاخباري ذلك الكراكتر الذي اظنه فرض عليه من قبل تلك القنوات العربية التي كان يعمل بها في مضمار سعيها للتشبه القشري بالقنوات العالمية امثال (cnn) وهي تضم ضمن في طاقم مذيعيها مختلف الاثنيات وهي تسعى لايجاد ذلك المذيع صاحب البشرة السمراء بين طاقم مذيعيها وكلنا يعلم كما يعلم الاخ الطيب انه بجلوسه خلف ديسك الاخبار فقد كل ذلك الالق والكاريزما لشخصية الطيب عبد الماجد المذيع الحواري الذي فتن المشاهد السوداني ولفت القنوات العربية بتلك الامكانات الحوارية العالية وتلك القدرة على السبر في اغوار الصيف والقدرة التامة على امتاع المشاهد السوداني

وهذا فيما يخص جزئية الطيب عبد الماجد


امافيما يخص جزئية الوجوه العربية

فيا سيدي الكريم اننا هنا لا نوجه نقدنا الا من خلال الشعار الذي يلخص رسالة
القناة التي هي كما جاء في رسالتها وتعريفها

Quote: نبذة عن القناة: تنطلق قناة الشروق من فهم عميق للعمل الإعلامي القائم على الاتصال الناجح بين المرسل والمستقبل، لتكون مشروعاً إعلامياً متكامل الجوانب، واضح الرؤية محدد الرسالة والأهداف، يسعى بإيمان عميق لتأسيس تجربة إعلامية متميزة على المستوى التحريري والفني والإداري والمالي، تجربة تتطلع لأن تكون علامة فارقة في مسيرة الإعلام السوداني على وجه الخصوص والعربي بوجه عام، تؤسس لمرحلة إعلامية جديدة تدرك أهدافها الذاتية بالقدر الذي تدرك فيه مسؤولياتها تجاه الجمهور المخاطب واحتياجاته التنموية: السياسية والاقتصادية والاجتماعية والثقافية والترفيهية، مؤمنة بإمكانيات الإعلامي السوداني وطاقاته الإبداعية وقدرته على العطاء والتميز. ومن هنا انطلقت القناة في خطابها ورسالتها من أهداف الجمهور وتطلعاته للسلام والوحدة والاستقرار والتنمية والتواصل الإيجابي النهضوي مع محيطه العربي والأفريقي والإسلامي والدولي، المكون لهويته الوطنية والمحدد لمسيرة التحرك الحضاري في الحاضر والمستقبل، فجعلت القناة أهدافها الاستراتيجية هي أهداف الجمهور السوداني بوجه خاص، وخطت لنفسها سياسة مستقلة لا تقف فيها مع جهة دون أخرى أو ضد أخرى، وإنما تقف مع الجميع للعمل من أجل مصالح الجمهور وأهدافه الاستراتيجية في المرحلة الراهنة وما يليها. تعريف القناة: قناة فضائية سودانية منوعة تملكها مؤسسة الشروق الإعلامية، تعنى بالشأن السوداني خاصة والشأن العربي والأفريقي والدولي بشكل عام، وتبث باللغة العربية على مدار 24 ساعة من مدينة دبي للإعلام، وهي قناة مستقلة لا تمثل حزباً سياسياً ولا فصيلاً عرقياً ولا مذهباً دينياً، وإنما تمثل عموم الجمهور السوداني وتنطلق من أهدافه ومصالحه الفردية والمجتمعية والوطنية. رسالة القناة: المساهمة في نهضة السودان وترسيخ وحدته واستقراره، انطلاقاً من مكوناته الحضارية وتنوعه الثقافي والاجتماعي، ومن موقعه كمعبر للتواصل والتفاعل العربي والإسلامي والأفريقي، ضمن سياسية إعلامية راسخة تلتزم بمبادئ المهنة وأخلاقها وتحترم حق الجمهور في المعرفة وحرية الرأي والتعبير. رؤية القناة: أن تكون قناة الشروق مؤسسة إعلامية متكاملة في مجالاتها ووسائلها ووظائفها وتنوع إنتاجها، يتحقق لها الريادية الإعلامية على المستوى السوداني والتميز على المستويين العربي والأفريقي، كما يتحقق لها الاستقرار المالي والربحية التجارية. الأهداف الإستراتيجية للقناة: * المساهمة في نهضة السودان دولة وشعباً وترسيخ وحدته ونشر السلام في ربوعه * المساهمة في تعزيز الاستقرار والبناء * العمل على تنمية هوية الجمهور الحضارية والاجتماعية والثقافية * المساهمة في تعميق التفاعل العربي السوداني والعربي الأفريقي * احتلال مرتبة الصدارة لدى الجمهور السوداني واكتساب تقدير المشاهد العربي * تغطية النفقات التشغيلية وتحقيق معدلات ربحية متنامية

هو مادفعنا الى فتح هذا
البوست المتجدد
وحتى يعلم الاخرون الفرق بين النقد والنقد



مدخل للخروج :

وطني لو شغلت بالخلد عنه
لنازعتني اليه في الخلد نفسي

..
.
رغم العضوية الاساسية فلا مانع من الاضافة
دعماً للشروق ..
شمس السودان التى لا تغيب ..

طبعاً ما اعتقد رسوم القمر الفضائي تبقي مشكلة
كما فعلت مع هارمونى .. قمر السودان الذى غاب


_____________________

انا متأكد من ان كسب العضوية ليس لاجل جمال الوالى
ولكن نسرين سوركتى تلعب دورا كبيراً فى التسجيل ..
كما انبرش المنبرشون مع الهكر

يا قرشو


ليس لدي اي مانع ان يتعين ويعمل مذيعين ومذيعات من اي دولة زي قناة سي ان ان او الجزيرة او ما شابهها

ولكن هذه القنوات قنوات دولية ولا تبدأ نشرات اخبارها بأخبار البلد التي تبث منها ولا باخبار الرئيس او الامير لهذا البلد

بل قد تبث عدد من البرامج طوال او الشهر وليس للاخبار او البرامج المقدمة علاقة ببلد البث

ولكن ان تكون هناك فضائية مثل الشروق سودانية واخبارها الرئيسية سودانية وبرامجها كلها عن السودان فيجب توطين المذيعين والمذيعات ليس لشيء الا للاساس السوداني في الموضوع واللهجة والمجتمع والبيئة .

ووعندما تكون الشروق قناة دولية تتعامل مع السودان واخباره كغيره من الدول تستطيع حينها ان تقدم من تقدم من المذيعين والمذيعات


وبعدين راي خاص ( انا في راي لو اصلا الموضوع مذيعات غير سودانيات بشوف انه موريتانيا اقرب لينا وخاصة ذلك التوب الذي يشابه زي المراة السودانية وملامح الموريتانية وحتى لونها لا تختلف كثيرا عن بعض السودانيات)


اها قلت شنو يا قرشو

.
.
.
تبلدينا السمح بره وجوه
من يوم معتز تروتكسي داك ماحظينا بالطلة

Quote: ولكن نسر ين سوركتى تلعب دورا كبيراً فى التسجيل .. كما انبرش المنبرشون مع الهكر

والله في حضرة الوطن الكبير
تتقزم كل الاسماء والكيانات وقناة الشروق
تقول عن نفسها بانها (شمس السودان التي لاتغيب (
لذلك سنكون لها اصدقاء النصح والحب
ولانه كما هو دابكم وانتم تسعون لابعاد شبح السرطان
عن اجساد ابناء السودان عبر مستشفى سرطان الاطفال
فاننا نامل ان تساهم هذه القناة وصويحباتها في محاربة عوامل تعرية
لكثير من موروثات ومكتسبات الانسان السوداني
في مجمل الكل الكبير لجماع الاخلاقيات والفضائل
السودانية ....


اما فيما يخص نسرين المذيعه
فلا احسبنا سنقفل التطرق اليها بنظره مهنية مطلقه
وسنعمد الى تسليط الضوء تماماً عن مجمل أدائها
اما الشق الثاني فله اهله


مدخل للخروج :
من هذا الطين بدأنا الرحله
وسوف تعود لنفس الطين

ابوعبيدة سجل عدد واحد صديق الموج ،لكن كان صلاح غريبة سجل معاكم اشطبنى طوالى
صديق الموج عضو نصير،،،

في نشرة السودان هذا المساء تم إجراء مكالمة هاتفية مع السفير علي الصادق المتحدث باسم الخارجية السودانية للتعليق على خبر، والمذيع مأمون يردد السفير على الصادق ليأتي صوت المتحدث على الهواء " لا والله ما علي الصادق" !

Quote: ابوعبيدة سجل عدد واحد صديق الموج ،لكن كان صلاح غريبة سجل معاكم اشطبنى طوالى صديق الموج عضو نصير،،،

الاعز صديق الموج :
في هيبة جلالك يطيب الجلوس امامك يكون الكلام
الف مرحب بيك حبابك

وشكراً لهذه الاطلاله المفرحه بحق

البصاص

.
.
.
الليلي نحاول نتم ملاحظات اليوم التاني

اخبار الرياضة اليوم

في السودان هذا الصباح

خبر السودان : المريخ ينتصر على الموردة ( المبارة كانت يوم الاحد وخبرها بث اليوم الثلاثاء يعني بعد 48 ساعة)

الاخبار العالمية : كب المباريات حدثت منذ اكثر من 48 ساعة وبثت من قبل في اغلب القنوات


مساحة خبر رياضة السودان هذا الصباح عن السودان لا تساوي 10% من الاخبار العالمية


احسن يعملو برنامجين مختلفين في الصباح


الاول - السودان هذا الصباح خاص بالسودان

الثاني - العالم صباح اليوم ( يختص باخبار العالم )


ويا ريت تكون الاخبار طازجة وليست بعد 48 ساعة من حدوثها

هناك باب يظهر في خلفية أستديو الأخبار ملفت للإنتباه
كلما دخل منه أحد إنشد إليه متحسساً صوت الباب الزجاج
ربما يظهر صوتاً.

بخصوص أشكالنا الغير سياحية ، اليوم وفي المؤتمر المشترك لرئيس الوزراء وزير الخارجية القطري
ورئيس مجلس التعاون الخليجي ، أعطيت الفرصة لصحفي سوداني يعمل في قناة ألبسي اللبنانية LBC
تعثر مورزع الفرص في إسمه .

العزيز ود السنوسي

سلامات بقدر طيبة كل الطيبين في فيافي وربوع بلادي


واسمح لي ان اواصل مشاهدات اليوم الثاني

اتى في سياق المجله الثقافية
لمقدمتها المذيعه العربية حقاً مايوجع

وقد كان عبارة عن تقرير مضمونه
القاهرة تكتب وبيروت تطبع والخرطوم تقراء
وليس تلك هي المشكله انما المشكلة انهم خلصوا في ذلك التقرير
الي ان الخرطوم اضحت لاتقراء وحتى الاستطلاع الذي دُعم به مادتهم التسجيليه
لم يكن بتلك المقدره المعرفية التي تعين في تقديم تفسير منطقي عن اسباب احجام المواطن عن شراء الكتاب
عليه وجب علينا ان تقول لهم اذا كان تقييم اقبال السوداني للقراة من خلال معدلات المبيعات فحقاً الخرطوم لاتقراء
اما اذا كانو يريدون تقييماً حقيقاً فتقول لهم يكفي الصحيفة اليومية ذات النص جنيه ثمناً يشتريها واحد
لكن الذي يقرأونها لاينقصون عن اربعه افراد في افضل الاحوال

بل ان السوداني كثيراً اذا لم يجد مايقراء يعيد قرأة كتب قرأها مرات ومرات وليس كما ذلك زعم التقرير
نعم هناك اقبال على الوسائط الالكترونية الاخري لكن ليعلم معدوا التقرير الفطير ذاك
ان الشعب السوداني من اكثر الشعوب العربية ادماناً لرائحة حبر المطابع الطازج على صدر الصفحات
وان الشعب السوداني من اكثر الشعوب العربية والافريقية عشقاً لفض بكارة الكتب والتمتع بمافيها من علوم
ومعارف واداب

وحتى لانذهب بعيداً في ذات المجله الثقافية يؤكدون ضمناً على ان السودان يعيش في عهود الظلمة والجهل المطبق
اذ تجدهم يعرضون ويقدمون لأصدارات عربية واجنبية بينما يغفلون تماماً اي اسهام للكاتب السوداني ولدور النشر السودانية
التي تقاوم كل العوامل الطارده لصناعة الوراقين في السودان اذ تجد دار نشر سودانية واحده تقدم اكثر من اربعمائة عنوان ولاياتي عنوان
واحد يستحق ان يضمن في تلك النشرة الثقافية لما صدر حديثاً

وبالتالي هذا يلقي حجراً في بركة التساؤل عن احدى الشعارات التسعه التي تلخص رسالة القناة
وهو (المنافسة والريادة ) في وطن يسع الجميع والسؤال يكون هل شعار (المنافسة والريادة)
مُثِل ضمن ماقدم في المجلة الثقافية ضمن برامج اليوم الثاني وكيف تكون المنافسة ونحن نسوق
الانسان السوداني بانه عاطل الموهبة والابداع وكيف تكون الرياده والتقرير في ذات الحلقه يخلص الى
ان الخرطوم لاتكتب .. ان الخرطوم لاتطبع .. ان الخرطوم لاتقراء
ان الخرطوم تطير عيشته


عفواً لحظه :
مازال برنامج بين الهنا الذي تقدمه ..... بركية
يستفزني لابعد الحدود


مدخل للخروج :
وقال سيدنا عمر : رحم الله امرء اهدى الي عيوبي


البصاص

الاخ ابو عبيدة
شكرا لهذه المعلومات انني ابحث
عن تلقون لهذه القناة ارجو افادتي
[email protected]

الاستاذ صالح عبده

انت تأمر ولك ما تريد ان شاء الله
لكن حتى تلك اللحظه : اليك رابط القناة

http://ashrooqtv.com/index.html

البصاص

الاخ ابو عبيدة ، كنت اتمنى ان يكون فى اسم القناة للباحث العربى فى الفضاء عند العبور او المرور على الاسم ، ان يتبين من الوهلة الاولى ومن خلال الاسم ان القناة سودانية، فاسم القناة ليس فيه ما يوحى بانها سودانية، هذا مهم وفى غاية الاهمية . وسجل لينا ، شاهدت بعض البرامج صراحة فى غاية الذوق و الروعة .

برنامج عن الصحة

البرنامج مفيد جدا

شاهدت منه مقطعا صغيرا


المذيعة ليست سودانية

الدكتور متخصص اعشاب (على ما اعتقد مصري)

لم يكن هناك اي شيء في الصورة او المذيعة او الضيف او الشاشة بما يوحي ان هذه القناة سودانية

ليس هناك ما يدل على السودان في هذا البرنامج

ولو أنني كنت لا اعرف مسبقا ان قناة الشروق هي قناة سودانية لاعتقدت بما لا يدع مجال للشك انها قناة لبنانية عندما كنت أتنقل بين القنوات وتوقفت للحظات عند هذا البرنامج




جمال السنوسي

عضو مشاغب

المك ود المك هجو الاقرع
سلامات يازول ياطيب

حقيقه ان القناة تعتبر نقله عالية بحق
حتى اضحت تمثل استفزازاً حقيقياً
للفضائية السودانية

Quote: شاهدت بعض البرامج صراحة فى غاية الذوق و الروعة .

ونحن حقاً شاهدناها واستمتعنا بها
لكن سياط نقدنا هذه لانريد بها حقا
الا قناة تمحنا المنافسة والريادة
في وطن يستطيع ينافس الشمس في توهجها

وابقى قريب

البصاص

اخى البصاص
طبعامجرد وجود القناة كتجربه او حتى كفكره اعتبره شى عظيم ولا بد ان نصفق له. وبالنسبه للمذيعين العرب هذا شى مطلوب ولا حرج فيه... هذا اذا كان وجودهم من باب تبادل الخبرات او حتى من باب التعلم، ولكن من مجرد الدقائق الاولى لاحظت ان امكانات هؤلاء موجوده بين كوادرنا الوطنيه، عموما ارى ايضا من حق القناة لطالما انها خاصه ان تحدد طاقمها كما ترى، ولكن القصه يا سيدى_ ونحن من الحقل الاعلامى_ ليست فى هذا ولكن اى مؤسسه عامله داخل الوطن تاخذ التصديق بموجب شروط تضعها الدوله متمثله فى الهيئه السودانيه للاذاعه والتلفزيون ، وهذا يضع مسؤلية كل تلك النواقص _ برمتها_ على عاتق الدوله.
كده كييييييييف؟!

ولكن المهم جدا وما لاحظته ان الاعداد حتى على مستوى التجريبى ضعيف جدا
مثال برنامج صباح السودان .. جاد جدا .. يعنى شوية ابتسامه.
وبقية النقد الذى اتمنى ان يكون بناءا ومفيدا بعد (الاربعين)
ويتربى فى عز الجميع.
ما( عضو) ولا اى حاجه.

Quote: ولكن المهم جدا وما لاحظته ان الاعداد حتى على مستوى التجريبى ضعيف جدا مثال برنامج صباح السودان .. جاد جدا .. يعنى شوية ابتسامه. وبقية النقد الذى اتمنى ان يكون بناءا ومفيدا بعد (الاربعين) ويتربى فى عز الجميع. ما( عضو) ولا اى حاجه.

اخي السميح حقاً اننا لانريد
ان نحرس الشمعة بانفاس المسدس
فقط نريد قناة تستطيع ان تسوق اجمل مافينا ومالدينا
لان قبحنا يملاء ارشيف كل القنوات الفضائية
نريد قناة تخبرهم بان في السودان كل الجمال والالق والابداع


بالمناسبة كلنا راجين الاربعين ان شاء الله يكون فيهو مديدة بلح


مدخل للخروج :
السميح لو انت ابيت العضوية ده طرفي منها
عشان خاطرنا ترجع

.
.
.
الاستاذ صالح عبده

تحياتي

لان الوعد دين رجعنالك

تلفونين للاستقبال وواحد للبرامج المباشره


للاستقبال
00249183246880

00249183216945

لبرامج البث المباشر

002491835227700


مدخل للخروج :

قال تعالى :

(افمن يمشي مكبا على وجهه اهدى
امن يمشي سويا على صراط مستقيم)

صدق الله العظيم


سورة الملك - سورة 67 - آية 22

اب

البصاص سلامات
سجل حضور
مجاهد الأصلي
أولاً عشان مرتضى جعفر والشيوعيين قالوا قناة المؤتمر الوطني يعني كيزان
عشان كدا بالله سجلني في أول القائمة
ثانياً عشان هي وجه من وجوه بلادي الحبيبة
ثالثاً عشان فيها أجمل من سمعت وطربت لأصواتهم وآدائهم ممن تربوا في حضن أمنا كلناوحضرة مايكروفونها الشامخ الفتي ( هنا ودمدني ) أو ( هذه إذاعة ودمدني ) ... كم طربنا لهم ونحن مستمعيهم وطربنا لهم ونحن نزاملهم ... الطيب عبد الماجد ... عماد همام ... لقمان همام ... إحسان عبد الماجد ... إبتهاج قوي ... منال مهدي ... صلاح أبو القاسم ... طارق كبلو ... محمد نور الساري ... عبد الماجد زين العابدين ... والقائمة تطول ... وذلك كله في ظلال صلاح طه إسماعيل وعبود سيف الدين ... كانت ودمدني وستظل متكأً لكل السامعين والباحثين عن الجمال ... ولعلي اذكر بكل الإحترام وأذكر عماد همام بحلقته التي سجلها مع عبود سيف الدين في ذكرى رحيل الكاشف عن حياة الكاشف وفنه ... وكيف كان التجلي والتوهج منهم ... وإحسان عبد الماجد عندما تنثر الطرب لأرجأ الدنيا عندما تقرأ الشعر على مسامع الناس ... وحروف الراحل المقيم فينا فناً كتابياً رفيع وعطاءً متميز عندما كان ينسج الحروف بمغازل السحر ليقدمهاً برامج من إعداد الأستاذ السر حقار ...
تحياتي وحبي لهم

Quote: البصاص سلامات سجل حضور مجاهد الأصلي أولاً عشان مرتضى جعفر والشيوعيين قالوا قناة المؤتمر الوطني يعني كيزان عشان كدا بالله سجلني في أول القائمة ثانياً عشان هي وجه من وجوه بلادي الحبيبة ثالثاً عشان فيها أجمل من سمعت وطربت لأصواتهم وآدائهم ممن تربوا في حضن أمنا كلناوحضرة مايكروفونها الشامخ الفتي ( هنا ودمدني ) أو ( هذه إذاعة ودمدني ) ... كم طربنا لهم ونحن مستمعيهم وطربنا لهم ونحن نزاملهم ... الطيب عبد الماجد ... عماد همام ... لقمان همام ... إحسان عبد الماجد ... إبتهاج قوي ... منال مهدي ... صلاح أبو القاسم ... طارق كبلو ... محمد نور الساري ... عبد الماجد زين العابدين ... والقائمة تطول ... وذلك كله في ظلال صلاح طه إسماعيل وعبود سيف الدين ... كانت ودمدني وستظل متكأً لكل السامعين والباحثين عن الجمال ... ولعلي اذكر بكل الإحترام وأذكر عماد همام بحلقته التي سجلها مع عبود سيف الدين في ذكرى رحيل الكاشف عن حياة الكاشف وفنه ... وكيف كان التجلي والتوهج منهم ... وإحسان عبد الماجد عندما تنثر الطرب لأرجأ الدنيا عندما تقرأ الشعر على مسامع الناس ... وحروف الراحل المقيم فينا فناً كتابياً رفيع وعطاءً متميز عندما كان ينسج الحروف بمغازل السحر ليقدمهاً برامج من إعداد الأستاذ السر حقار ... تحياتي وحبي لهم

تعرف يامجاهد انه حضورك هنا براهو برسل الف رساله ورساله


الاخ مجاهد والاخوه العقلانيين في سماء القنوات السودانية
واصحاب الحس السليم والمعرفه والدراية بامر الاعلام المرئي
ان اي كلمة نقد بناء في الاصل انها تؤسس لمايعرف بثقافة المشاهد
الوعية لدى العامة من اصحاب الاستحسان والاستهجان العاطفي


ونواصل ان شاء الله


البصاص

اب

البصاص :
عليك الله قول ليهم مافى داعى لى طريقة الاخبار بتاعت تلفزيون السودان داك! ياخى الناس ديل ما يدربو كوادرم ديل!! التدريب ده بعلم ال........... لمواخذه كده!!!
انت عارف فى نشره حضرتها لو عملنا ليها مونتاج كويس حنوفر نص ذمن النشره القرو فيها.
..................
الاعداد الجيد للماده والكادر ليس فى تلقينه اسلوب العمل بل فى تمليكه سبل التفكير والتخطيط الجيد الذى يقود للابداع.
( ابدعوا واعملوا البدع وربنا اسمو البديع)
عشمانيين فيكم كتير
يا الشروق ..... كونى شمس السودان التى لا تغيب. عليك الله. خلاص؟

البرنامج : السودان هذا الصباح
اليوم9 ديسمبر

النشرة : المذيعة ( الغير سودانية) نطقت كلمة القضارف بحرف الغين ( يعني قالت - الغضارف) في خبر عن تسلم 16 منطقة حدودية من اثيوبيا في ترسيم الحدود مع السودان

المذيعة يمكن تكون اتسودنت لسانا

التقرير : قدمت المذيعةالسودانية عنوان التقرير كالتالي ( سوق ليبيا اكبر سوق شعبي في العاصمة الخرطوم)

واذا بنا نتفاجأ بأن التقرير المصور هو عن صياغة وصناعة الذهب وصانعي الذهب ووتخرج صناع الذهب من كوستي

الغريبة بعد كل هذا لم تعتذر المذيعة للمشاهدين عن هذااللبس

( يا ريت الناس تقتبس معالجات مذيعي قناة الجزيرة للأخطاء التي تحدث على الهواء مباشرة وكيف يحسب الخطأ لصالح المذيع اوالمذيعة وليس ضده وخاصة انه غير مسؤول من التقرير المصور المصاحب للخبر)


أجمل برنامج خفيف وظريف ومهضوم (باللبناني) هو افراح النيل - موسيقى مقدمة - مادة - حضور - انا غايتو ما عارف ولكن يمكن يكون عشان ما موجود مذيع او مذيعة لذلك البرنامج بيكون سلس وقريب من النفس بعيدا عن الرسميات ٍ( سين سؤال وجيم جواب)


جمال السنوسي
عضو مشاغب

Quote: النشرة : المذيعة ( الغير سودانية) نطقت كلمة القضارف بحرف الغين ( يعني قالت - الغضارف) في خبر عن تسلم 16 منطقة حدودية من اثيوبيا في ترسيم الحدود مع السودان

تعرف ياجمال السنوسي
ده بؤكد انه ان نحنا ما محتاجين
لى مذيعين بقدر ما محتاجين لي
تقنيين ومهره كمان مش تقنيين وبس


وعذراً لانني هذه الايام بعيد عن
الميديا شويه ابقى عشره على بوستك
ده


البصاص

Quote: في نشرة السودان هذا المساء تم إجراء مكالمة هاتفية مع السفير علي الصادق المتحدث باسم الخارجية السودانية للتعليق على خبر، والمذيع مأمون يردد السفير على الصادق ليأتي صوت المتحدث على الهواء " لا والله ما علي الصادق" !

تصدق ياراكوبة يا اخوي انو الزول دا ضرب لي بالغلط .. واتفاجأت باسم علي الصادق فقلت ليهو ابدا والله ما علي الصادق .. وما كنت قايل انو ديل ناس فضائية الا بعد ما كلمني صديق عزيز تعرف علي نبرة صوتي .. يعني انا بقيت مشهور ياعمدة.

..
.

والله ما شاء الله ..
نضيفه عديل يا بصاص
ما فيها غباش تلفزيونا واخوانا السابقين ..

_______________

شكراً يا امجد ابو العلا
بس ووين سهرة 99199
ما تفتكر نسينا وقفكم معاتا فى حمله التعريف بالجمعية والمشروع

صالح @ 99199

.
.
.

Quote: والله ما شاء الله .. نضيفه عديل يا بصاص ما فيها غباش تلفزيونا واخوانا السابقين ..

تبلدينا
تحياتي
تعرف نضافة العدسات دي بتظهر جنس حفر
الله يستر ساكت وده كلام زول تقني
الله يكون في عون الزوله بتاعت المكياج دييك


مدخل للخروج :

الا تعتقد معي ان مشروع 99199
لم يصل بعد الى قاعدة الجمهور السوداني
اين انتم من الميديا وتكرار الذي حتما يتثمر نتائجه
نصيحة الى الله 75% من الشغل يكون صوب الاعلام
25% فقط هي مساحة العمل الفعلي من اتصالات وتحركات

معليش : قلنا نخت طوبتنا

البصاص

اب