تمرين ديمقراطي خفيف : الانتخابات في دائرة البورد

الاعزاء والعزيزات

هذا البوست مستوحي من بوست للاخ ودقاسم

وهنا اقتراح بتمرين ديمقراطي خفيف ؛
وهو قيام انتخابات في دائرة البورد بين الاحزاب السياسية
يكون فيها المرشحون والناخبون من اعضاءالمنبر الحر

الفكرة كالتالي :
1- ان يقوم عضو او اعضاء الحزب المعين؛ بترشيح مرشحهم/تهم او مرشحيهم - من بين اعضاء المنبر- ؛ للانتحابات في دائرة البورد .
2- ان يقوم المرشحون بتقديم برامجهم الانتخابية ؛ من وحي برامج حزبهم في مختلف قضايا البورد والوطن
3- يمكن لجميع اعضاء البورد ان يمارسوا الدعاية والدعاية المضادة للمرشحين
4- يمكن ان يتقدم مرشحين مستقلين للمنافسة
5- يعتبر جميع اعضاء البورد بمثابة الناخبين المسجلين؛ ويحق لهم التصويت ؛ بمعدل صوت واحد للفرد -المسجلين باكثر من اسم نعتمد علي امانتهم وضميرهم -
6- يتم التصويت من اليوم ؛ وحتي يوم السبت القادم
7- يحق تكوين التحالفات؛ او ان تدعم احزاب او تنظيمات مرشحي احزاب اخري ؛ الخ الخ
8- يحق ترشيح مرشحين من احزاب قرتوال؛ كحزب شيري مثلا او حركتها المتمردة


وفي انتظار مساهماتكم

عادل

والاحزاب والتيارات التي لها ممثلون بالبورد حسب متابعتي
- الترتيب حسب ظهور ممثليها او اعلانها عن نفسها هنا -

- الحزب الشيوعي السوداني
- الحركة الشعبية لتحرير السودان
- مؤتمر البجة
- الجمهوريون
- حزب الامة
- الحزب الليبرالي السوداني
- الحزب الاتحادي الديمقراطي
- الانقاذ - المؤتمر الوطني -
- حركة تحرير السودان
- التحالف الفيدرالي الديمقراطي
- حركة القوي الديمقراطية الجديدة
- حزب البعث العربي الاشتراكي - محمد علي جادين -
- حزب المؤتمر الوطني السوداني - المعارض -
- حركة العدالة والمساواة
- حركة القوي الحديثة السودانية - الحاج وراق -
- التحالف الوطني - قوات التحالف السودانية
-حزب الامة - الاصلاح والتجديد ( مبارك الفاضل )
- الاتحادي الديمقراطي - القوي الحديثة
- تنظيم القوي المستقلة الحرة
- الحزب الديمقراطي الناصري
- حزب شيري
- التحالف الفيدرالي الديمقراطي السوداني
- الاخوان المسلمون
-حركة المستضعفون في الارض - تمرد شيري -
- الحزب القومي السوداني

الاخ عادل
تحياتي
والله فكرة جميلة وخصوصا لاخرجنا من جو الاستقطاب الحاد بالبورد.
نحن قوي المستضعفين في الارض نبارك هذه الخطوة الديمقراطية وتاكد ان دة هو حزب الاغلبية
بس لاننا مستضعفين عشان كدة صوتنا خافت ولاحقا انشاء الله بعد التشاور مع الاخوة والاخوات المستضعفين حنقرر التريشحات
مع الشكر

الاخ اسعد

اذن انت منتمي لتمرد شيري
- نسيت انك المسؤول المالي -
طبعا اقوي مرشح ايكم ممكن يكون شيري نفسها ؛
بشرط ان يدعمكم حزب شيري وما ينزل مرشح تاني
- نائب رئيس الحرب مثلا -
واهو عندكم تنظيمين شايف؛
زي الاتحاديين في انتخابات 1986 والتي توزعت فيها اصواتهم بين المرشحين
وادت الي فوز الكيزان في اكثر من دائرة

لك التحية

عادل

الأخ العـزيــز عادل،
أولا أسـمــح لى أقول أن الصـورة التى تحت إسمك تنـم عن كوزنـة لا مثيل لهـا، وأكـد ليك لو مشيت الســودان هسـى حيكــون ســوقك حـار. ما تسـألنى كيف لأنو أنا زاتى ما عارف..
الفكــرة جيـدة جـدا وجـادة..
بعـدين زى ما عارف الجمهـوريين لم ينزلوا فى إنتخابات منـذ نشـأتهـم فى منتصف الأربعينـات. فهـم تفرغــوا للتوعيـة الفكـريـة والسياسيـة و ليسـوا طلاب سلطــة.

فكرة ممتازة يا عادل .... بس في الاول عاوزين نشوف كشوف الناخبين

و بعدين كيف لو الواحد عايز يترشح مستقل كيف ... يعني كدا زي ناس صلاح احمد ابراهيم في الانتخابات الاخيرة و كدا

تحياتي و تقديري

ملاسى

ملاسي سلام

كشوف الناخبين هم كل اعضاء البورد؛
وهم حوالي 2300 عضو في اللحظة الحالية

بعدين ما في مشكلة الواحد يرشح نفسو مستقل؛
او يرشح غيرو من الناس المستقلين
حيث لا فضل لحزبي علي مستقل؛
ولا لمستقل علي حزبي؛
الا بتاييد البورداب ..

عادل

العزيو محمد عثمان

والله الصورة دي حكايتها حكاية ؛ اكتر من نفر قالوا كلامك دا؛ فتكون اذن صورة عضيرة يجب تغييرا ..
المشكلة ما في الصورة ؛ المشكلو في الشكل عموما
عندي اخت وصديقة عزيزة ؛ كانت دائما ما تقول لي :
يا عادل والله انت شكلك كوز كوز ؛ ولو طول الزمن او قصر حتبقي كوز ..

حتي الان لم تتحقق نبؤتها؛
رغم مرور قرابة ال كم طاشر سنة علي قولها ...

عن الفكرة فاعتقد انها رغم انها خفيفة ؛
الا انها ستقدم لنا تمرينا ديمقراطيا جيدا؛
وخصوصا ان آخر انتحابات ديمقراطية حقيقية في بلادنا
قد تمت قبل حوالي عشرين سنة -1986-
وستكون هذه فرصة للاحزاب لكيما تتمرن ؛
وللناخبين - وخصوصا الشباب - ان يدلوا بقولهم

اما الجمهوريين فاعتقد انهم في نهاية السبعينات ؛
قد ساهموا في انتخابات بعض الاتحادات الطلابية الجامعية؛
واعتقد ان الكثيرين يريد عودتهم من باب السياسة ؛
والامر راجع لهم

عادل

انا ارشح الاستاذ علاء الدين نصار ؛
ممثل تنظيم القوي المستقلة الحرة
ليكون مرشح القوي الديمقراطية والوسطية والليبرالية بالبورد ؛
واعلن دعمي له ؛
اذا وافق علي الترشيح ....

عادل

استاذ عادل
ازيك انا اول مره ادخل ليك
المهم
انا ما عاوزه ارشح روحي مع انه القراءت لواقع البورد
بتقول ممكن افوز بعد البوست الاخير بتاع الحادث
ربنا يديم المحبه والمعروف
لكن انا عاوزه اكون مديره حمله اعلاميه لي مرشح مستقل غني او حزب عنده قروش
اسمح لي اعمل اعلاني هنا
وحا احكى ليك حااعمل شنو

الاستاذة راوية

تحياتي ومرحب بمساهماتك ؛
وانا من المتابعين الدقيقين لما تكتبين
ولروحك الاجتماعية العالية ؛ وروح الدعابة عندك
- قرأت ايضا نقدك لي في ايام الاسبوع اياه -

اعتقد انك لو اترشحتي فالامل كبير بالفوز
ولكن يبدو انك تعرفي من اين تؤكل الكتف ؛
وعايزة تضربي القروش كمديرة علاقات عامة ؛
من دون ما تورطي نفسك في انتهابات؛
يمكن تكسبيها او تخسريها ...

مرحب بيك علي كل الاحوال؛
ونريد ان نري نشاطك؛
فربما يرمي عينه عليك احد الاحزاب؛
ويعينك في الانتخابات "الحقيقية "

عادل

احتاج لمديرة قديرة للحملة الانتخابية و ما عندي قروش ....

ملاسى

الاخ عادل
فكرة رايعة و حقية من شأنها كسر حواجز الحدة و ترسخ المفاهيم الديموقراطية عندما يساير الجد الهزل و بذا نكسب قطاعات كبيرة سئمت من تجهم الساسة و روغانهم و ..
و اشكر لك ثقتك و توحيد لقوى الوسط و فى انتظار التزكية من اطراف التحالف اعلن موافقتى على التكليف و اعود مفصلا فى الحملة الاتخابية..

اثني ترشيح نصار

عادل.
غايتو انا عايزة تستحدثوا لي منصب زي البيفصلوا فيهو هسع لي علي عثمان محمد طه.. بلا انتخابات بلا وجع قلب.
في مشكلة..؟
بسيطة اسمي الرباعي المفروض احوم بيهو والناس تحاول تتذكرني وهي بتقول فيهو: رجا عبدالحميد محمد الأمين العباسي.
داير زيادة؟
الخير موجود وما كتر الله شئ في الدنيا غير الأسامي...

اين الاحزاب الاسلاميه فلا اري حزب اسلامي في (اللسته) التي اتيت بها اخي عادل والفوز لنا انشاء الله ( الاسلام في المنبر الحر وكم انا فخور بديني السمح ) . وشكرا محب .

اقترح قبام حزب بحمل اسم (حزب الاسلام الفائز ) والسلام .

عادل،
أسـف أنا كنت أمزح فقـط.. يعنا الكيـزان ديل بعـد ما شـالوا البلـد كلو، وشــالو أرواح الناس وموتـوا الشيـوخ والأطفال، كمان نخللى ليهـم الصـور؟!!
بس تعديل بسيــط: رجع ضهـرك ورا شــويـة، وأرفـع رأسـك حبـة، وواجـه الكمـرا، وطوالى تلقى أعـراض الكوزنــة راحت. بعـدين أى واحـد يقول ليك محمـد دا قاعـد يتغـول على حقوقك الدستـوريـة فى اللبس قول ليهـم ما يهم دا صـديقى.

البورد كبير مساحه جغرافيه......
اجتماعــــــــــــــيه واسعه ....
2300 عضو في كشوفات الناخبين......
حــــقو يكون في دائـــــــــرتين........
واحـــــــــــــده خريجيـــــــــــــــــن

Quote: الحزب الشيوعي السوداني - الحركة الشعبية لتحرير السودان - مؤتمر البجة - الجمهوريون - حزب الامة - الحزب الليبرالي السوداني - الحزب الاتحادي الديمقراطي - الانقاذ - المؤتمر الوطني - - حركة تحرير السودان - التحالف الفيدرالي الديمقراطي - حركة القوي الديمقراطية الجديدة - حزب البعث العربي الاشتراكي - محمد علي جادين - - حزب المؤتمر الوطني السوداني - المعارض - - حركة العدالة والمساواة - حركة القوي الحديثة السودانية - الحاج وراق - - التحالف الوطني - قوات التحالف السودانية -حزب الامة - الاصلاح والتجديد ( مبارك الفاضل ) - الاتحادي الديمقراطي - القوي الحديثة - تنظيم القوي المستقلة الحرة - الحزب الديمقراطي الناصري - حزب شيري - التحالف الفيدرالي الديمقراطي السوداني - الاخوان المسلمون -حركة المستضعفون في الارض - تمرد شيري - - الحزب القومي السوداني

استاذ عادل
الفكرة جميلة جدا لكن و الله عملت لى نفسيات
هسى ديل هم اللى طلعوا من زمة الشعب السودانى كلللووووووووووووووووووو؟
و اكتشفت انى ما ح انتخب اى زول لو رجعت الديمقراطية
الجماعة اعلاه اما (نكرات ) او المصائب العملوها معروفة جدا

الاخ نصار

كاحد مؤيدي الحزب الليبرالي السوداني بالبورد؛
اؤكد علي ترشيحك؛ واتمني من الاخوات والاخوة اعضاء الحزب ومؤيديه بالبورد؛
دعم ترشيحك

الاستاذة رجاء
لماذا لا تنزلي الانتخابات ؛
وتخلي حركات ناس علي عثمان وشركائه لاصحابها؛
واهو راوية ممكن تعمل ليك الحملة - من دون فلوس -

ملاسي
بتبالغ يعني؛
لا حزب لا قروش؛ وعايز مديرة قديرة
صورتك يا عزيزي ليست "قاتلة" الي هذه الدرجة

الاخ محب
ذكرت الانقاذ"المؤتمر الوطني"
والاخوان المسلمين ..
نضم حزبك الجديد ايضا للستة
هل عندك مرشح محدد ل"حزب الاسلام الفائز" ؟

ابو ريش
يا اخي ما تكون حساس للدرجة دي؛
انا عندي شعار تاني: صورة عويرة يجب تغييرا؛
وسناخذ بنصائحك في اول صورة قادمة

محمد عثمان بكري ..
ابعدنا من خريجين دي؛
دي دائرة جغرافية واحدة؛
وخلينا نؤسسس ثقافة الصوت الواحد للرجل الواحد - والمراة الواحدة- ؟

هل من ترشيحات اخري؛
ام سيفوز نصار بالتزكية ؟

عادل

متي يقفل باب الترشيحات؟؟؟

..
.
سلام يا استاذنا
بالله ديل كلهم احزاب .. اعتقد لهذه الاسباب
سنظل نختلف الى ما لا نهاية وسيظل الوطن بؤرة الخلاف الازلى ..
والله لو كنت قسمتهم قسمين بس يكون كويس
ديمقراطيين وجمهوريين ..مش الجمهوريين ناس قريبى د.ياسر الشريف
ديل يجوا مع الديمقراطيين .

على العموم انا فى قائمة المستضعفين فى الارض
مع اسعد وتحت لواء شيرى ..

وقائمتنا للان بها ثلاثة ..ممكن تحدد لينا اعضاء المجلس كم ؟؟
يعنى عايز فى كل قائمة كم ؟؟

سلام يا اسعد يا مستضعف ..

..
.
مكرر
اها من حسه بقى فى تلاعب فى التوصويت

بالمناسبة حزب الاب / فليب غبوش اسمو شنو ؟؟

سلام

العزيز عادل
لستتك دى انا ما نافعة معاى
اولا ما فيها ناس الكانون والجخنون
بعدين فى الانتخابات بتاعتك دى
حتفشل ذى استطلاعك داك لنفس الاسباب
وهى ان الكوم حيلعب متواليات
ونحنا ديل حقنا يهضم
وطبعا ذى الجماعة العقائدين
يا فيها يا اطفيها
واذا
ما فوزنا بنأجر هاكر
يظبط لينا النتيجة ويمنع بعض الناس من الدخول البتة البتة
وعليه انا برشح صنمى
ابو جهينة
رمز السفينة

اما عن صورتك والله لا عضيرة ولا حاجة
صورة سمممممممممممممممحة
لزول ظريف
ود الخالة صورتو برضو وجيهة
وفتااااكة
اسه بيلقى مديرة اعمل تأجرو مرشح اصبر حبة بس
وشكرا ليك عايز تضوقنا الديمقراطية
ومن هنا نهيب بكومنا ان يجتمع فى الماسنجر
لتدبير المؤامرات والكعبيرات
للاكوام الاخرى
وعاشت الديمقراطية ولا نامت اعين الجبناء من الاكوام المعادية

عادل،

ما قلت ليك؟.. أها صـورتك بدت تجيب دخل من هسـى!!

بيان،

أنا غايتـو مرشـح العيـون الحلوين الخاتاهم تحت إسمك ديل، عشـان عسى ولعل بعـد تلاتين سنـة يجيبو لينا ديمقراطيـة حقيقيــة ما فيهـا إجتهـاد فيما فيـه نص ديمقـراطى.

ابو الريش
الدخل المنى ولدى عادل ما بيدورو
لان شهادتى مجروحة وممكن تتفسر القرد فى عين أمه غزالة
لانى عادل دا بعرفو من كان يرقة ثم شرنقة ثم فراشة جميلة

وشكرا ليك على الامنية الجميلة.. اتمنى ان يعش اطفالنا فى بلادهم فى واقع اجمل..

شكــرا يا بيان على التوضيـح..
لكن عككاللا صـو إنك أتبـراويـة.. ودى مرقت منهـا كيف، ناس أتبرا ما كلهـم (ديمقـراطيين) وتقـدميين..
قـومى خلينا بالله بلا فول بلا عجلات.

ابوالريش
مالو
انا ديمقراطية وتقدمية شوفتنى شايلة سيخة
ولا قاعدة فى كهف؟
عارف اذا يوم لاقيتك حتعرفنى عطبراوية
حاحسن وفادتك احترمك واحترم رايك
لغاية ما تغلط معاى
طوالى العكاز الشايقى العطبرواى يمرق
يا حليل الفول و العجلات وصفارة السكة حديد
خرمة جد ومواجع كوم

When money talks truths are silent

Money talks and sometimes walks
ديل حيكونو في المدخل بتاع مكتبي انا ودا معناه حااعملهم امضاء واحوم بيهم البوستات
الاتفاق حول اداره الحمله الشعار بتاعه الاولو شرط اخره نور
وعشان كدا نجي للشروط اولا عاوزه كارت بلانش للتصرف, وغير الاتفاق على الاتعاب, لازم يندفع لي ولمده سنه اشتركي في النادي الصحي في فندق( رامادا للاجنحه)
حساب مفتوح لي محلات الشارع الخامس(Fifth Avenue) لزوم القيافه
بعد الفوز باذن الله يكون الصيف جا دايره رحله لي الباهاماس
(لشخص واحد يا حسره)
ومافي مجاملات وما عنديش يمه ارحميني في ما عدا
النسوان(الجندريات) و الجعليين ليهم تخفيض 30%
ملحوظه الجعلي المنطقته بتقع بين المحميه و الزيداب قد ترفع النسبه لي 35%
اي واحد زميل لي بهاء الدين العباسي( الكلام لي شنتير وجاد) التخفيض ممكن يصل 45%
ناس امريكا بنقبل ماستر كارد فقط
اليات العمل
سوف نتبع سياسه الكر والفر بالنسبه للمنافسين
وانا عندي هوايه نكت البوستات من الارشيف لذلك
سوف نتبع سياسه (لو كنتوا نسيتو اللي جري هاتو الدفاتر تنأرا(تنقرا))
وحنستعمل البوستات القديمه كاداه تهديد
الا مع مراويد (انا بخاف منو ومن لسانه ) عشان كدا حنتبع معاه سياسه التي هي احسن وعفا الله( عنما)سلف وهنيالك يا فاعل الخير ومن قدم بيداه التقاه والطيب احسن
العلاقات الاجتماعيه مهمه جدا وحنبتدي بي ناس الرياض في اجتماعهم بتاع يوم الخميس
حنرسل ليهم جردل لقيمات كبيره ومقرمشه ومرشوشه بي سكر دراش عشان المشاركه في الاحتفاء ووداع الاخ خالد عويس
ولي خالد عويس (بستله) ملاح نعيميه(قصرنا معاك يا خالد) دا عشان ممكن نستفيد من الخبره في مجال الاعلام منو بالرغم من انه هو (مسيس) لكن نحنا برضو من ضمن شعاراتنا الصميمه الشغل شغل ولازم تكون بروفيشينال
لي ناس الخرطوم عدد 3 حلل كبار كمونيه عشان تماضر ما تزعل
ناس المنطقه الشرقيه عدد اتنين شريط بتاع ماهر الجديد الواعدنا بيهو بكري(دي استراتيجيتها انه عمك تنقو ينزل لينا منو كل خميس حاجه)
انا حاعتمد كتير على ندا امين (هي) دي قريبتنا وما في زول يقرب منها ودارسه اعلام عامله فيهو ماجستيرين وساكنه في واشنطن يعني فركه كعب مني ساعه بس اكون معاها(انا خلاص حجزتها)
بالاضافه لي رجاء اختي طبعا رجاء ما بس بي خبرتها في الصحافه الاستراتيجيه هنا تكمن في النزعه المكابرابيه شديده التاصل فيها بي العربي كدا محتاجينها في (الشكلات)
ناس امريكا من ضمن الوعود حنقدم ليكم (ميديكال انشورنس ) ببلاش ونوريكم الدروب والدهاليز بتاعه (الببلك اسيستانس)
وكيف تعيش( سنكحه) في امريكا
ناس هولندا حنقدم ليهم بوكيه ورد كبييييييييييييير(عشان ما حيكلفنا كتير وكدا)
حنطالب ناس المانيا والنمسا والسويد والنرويج يوحدوا جهودهم مع بعض عشان نحنا ما نتعب
ناس لندن ديل بعد الانجيرا الشفناها ديك حنقوم نعزمهم تاني في نفس المطعم ولما الحكايه تنتهي حنرسل ليهم فواتير على بيوتهم بالتكلفه(هم قايلين الحكايه ساهله)
الباقين بجيكم راجعه
لكن لازم ارد على ملاسي
ملاسي انت ما سمعت بي مجروس لما قالت المفلسين بري بري منهم
لكن عشان العشره ممكن نقصد ليك تقصيد طويل الاجل
وندخل ثيرد بارتي(Third Party)
كوليكشن كمبني(collection company)
لغايه ما تقول حقي برقبتي وتخلي البورد وبرضو اولاد اولادك يفضلوا يدفعوا في الدين
عجبك الاتفاق دا
و يا عادل الصوره ما شينه لكن القبلها كانت رهيبه وشاعريه وانا قلت لي صاحبتي الزول دا لو بخلي البعمل فيهو دا سمح خلاص
ولو خليتني مديره حملتك اول حاجه بعملها برجع الصوره القديمه وبعمل بربوقندا كبيره خالس بيها
و يوم الليله السياسيه بتاعتنا حنقول لي الجماعه جايبين شيري تتكلم (بغض النظر هي نازله وين ومع منو) عشان الاعمى يشيل المكسر ويجوا والقايلها راجل على القايلها شخصيه وهميه يامن
(الاتفاق مع شيري سر من الاسرار)

بيان،

أشــوفك شـايلـة سيخــة؟
هـو أنا شــايفك إنت زاتك عشـان أشــوف سيخك؟ ما لابســة ليكى..... واللا بلاش!!
بعـدين بالمناسبـة، أنا إذا قررت أزوركم، أول حاجـة حأرسل فرقـة تفتيش على الأسـلحـة، وإتأكــد إنو حلتكم كلهـا خاليـة من أسلحــة الفليق الشــامل.. وإنو العكاكيــز ما فيهـا عناصـر شـايقيــة، حتان بعـد داك بتحـرك.
كويس؟.
أنا أحب أتبـرا جـداً، وزمان كلما الأستـاذ محمــود زارها، كان بيزور المقابــر، ويقول ديل شهــداء لأنهـم أتوا إلى المدينـة بقصـد العمل من أجل اللقمــة الحلال. فأتبـرا هى المدينـة الوحيـدة اللى طعام أهلهـا ما فيـه شبهـة حـرام.

بختكـم..

ابو الريش
والله عطبرة كل الناس تعمل بجد وكلام الاستاذ صاح..

يازول ما تخاف ليك الامان
الا اذا جى تشتر انت
انا دحين ما قلتا ليك
انى الا تغلط فوقى حتى الاسلحة تمرق
انا ما رباطية شديد بس على خفيف
شوف الدعاية الانتخابية دى كيف

الاخ عادل
فكره كويسه بس عاوزين نعرف المزيد ومرشحنا جاهز وهو الاخ خالد عويس

طيب بوست سريع لزوم المتابعة :

حزب الاب غبوش هو الحزب القومي السوداني المتحد
كل قائمة لها مرشح واحد فقط؛ واذا لم يعجبنا يمكن ان نكون قائمة جديدة
قفل باب الترشيحات الجمعة الساعة 11.59 دقيقة بتوقيت قرينتش
اقفال باب التصويت السبت 11.59 دقيقة بتوقيت قرينتش

المرشحين المعلنين حتي الان :
1- الاستاذ علاء الدين نصار
مرشح القوي الديمقراطية والوسطية والمستقلة
عضو تنظيم القوي المستقلة الديمقراطية
مثني وقد وافق علي الترشيح
مدعوم من بعض مؤيدي الحزب اليبرالي السوداني

2- الاستاذ ابو جهينة
مرشح ناس الكانون والجكنون
لم يثني ولم يخطرنا بالموافقة بعد

3- الاستاذ خالد عويس
مرشح حزب الامة وكيان الانصار
لم يثني ولم يخطرنا بالموافقة بعد

لا تزال حركة شيري تتشاور في ظل صمت مطلق من قائدة الحركة

اعلن ممثلي "حزب الاسلام الفائز" انه سيفوز ولم يقدموا مرشحهم بعد

ما زال حسين ملاسي يبحث عن مديرة للحملة ولم يعلن ترشيح نفسه بعد

ما زالت راوية العباسي تبحث عن مرشح غني او حزب غني ؛
يحقق ليها شراء ما تشتهيه المفس والغني لي جني الجني
- مع انها عاملة حملة تخفيضات كبيرة -

ما تقلق شديد نبؤة الاخت والصديقه ح تتحق بس دايره شوية زمن.
اهم حاجه فى الانتخابات انك ما تمسك الصندوق او تفرز

عادل
معاااااااااااااك
بس عندي طلب انه الانتخابات تتأجل شوية
لحدي ما نخلص اسبوع الاحتفال بالذكرى السنوية لاستشهاد الاستاذ محمود عشان نتفرغ للحملات والدعاية وكدي

Quote: -الحزب الشيوعي السوداني - الحركة الشعبية لتحرير السودان - مؤتمر البجة - الجمهوريون - حزب الامة - الحزب الليبرالي السوداني - الحزب الاتحادي الديمقراطي - الانقاذ - المؤتمر الوطني - - حركة تحرير السودان - التحالف الفيدرالي الديمقراطي - حركة القوي الديمقراطية الجديدة - حزب البعث العربي الاشتراكي - محمد علي جادين - - حزب المؤتمر الوطني السوداني - المعارض - - حركة العدالة والمساواة - حركة القوي الحديثة السودانية - الحاج وراق - - التحالف الوطني - قوات التحالف السودانية -حزب الامة - الاصلاح والتجديد ( مبارك الفاضل ) - الاتحادي الديمقراطي - القوي الحديثة - تنظيم القوي المستقلة الحرة - الحزب الديمقراطي الناصري - حزب شيري - التحالف الفيدرالي الديمقراطي السوداني - الاخوان المسلمون -حركة المستضعفون في الارض - تمرد شيري - - الحزب القومي السوداني

أول حاجة مافي واحد من الناس الفوق ديل بيملاً عينا كلهم شمار في مرقة ساي فالحين في الكلام بس حتى الأسامي بتاعتهم بقت مسيخة.
عايزين الجديد .. وقالو الجديد شديد .. ولا شنو؟


وأنا بالمناسبة دي عايز أرشح نفسي وشعاري صورتي دي وكل ما تحمله من تعابير وأحاسيس على شرط تكون مديرة الحملة الجميلة راوية وأنا موافق على كل شروطها.

تعرف يا عادل الحكاية ما حكاية قروش و كدا ... الحكاية حكاية مبادئ ... فنحن نسكن الجالوص و نموت علي المبادئ .... صاح غلط مش مهم ... المهم نموت عليها ..... عشان كدا اخوك ضامن ليهو اصوات لاباس بها ...

و بعدين في ياخي سؤال تاني هل البورد دائرة انتخابيةكلية واحدة جامعة و جميع المرشحين يتنافسون علي الفوز بمقعد واحد ام هي عدة دوائر جغرافية بتنوع المناطق و هل هي اقرب لانتخاب رئاسة الجمهورية ام للانتخابات البرلمانية ام لانتخابات الاتحادات الطلابية حيث لكل اسلوب سواء في خوضها ترشيحا او مشاركة فاعلة او حتي مقاطعة ...

و قبل كل هذا لابد من تسجيل الاحزاب و قيام مؤتمراتها التاسيسة و الدعوة لبرامجها و تجنيد الهتيفة ثم ياتي بعد ذلك الترويج للمرشحين

ملاسى

عزيزي الصديق عادل

راقت لي فكرة المران الديمقراطي تماما ، وأتمنى أن تكون سانحة حقيقية لنتعلم معنى واحدا أو معنيين من معاني الديمقراطية .
لن أعلن قبولي الترشيح أبدا الا اذا تأكدت على نحو قاطع مباركة كل أعضاء حزب الأمة بالبورد لهذا الأمر ، هذا في حال أنهم لم يستجيبوا لندائي الحار والصادق بأن أعفى من هذه المهمة . أنا تخيفني المسئولية حتى اذا كانت مسئولية شكلية كانتخابات البورد . بمقدوري طرح ما أتمناه كبرنامج لحزب الأمة . لكن بصفتي مثقف من مثقفي الحزب ، لا بصفتي مرشح . تلك مسئولية خشى منها من هم أعظم مني وأرفع قدرا ملايين المرات . يكفي أن سيدي عمر رضي الله عنه قال (والله لو عثرت بغلة بالعراق لسئل عمر عنها ) . وسأمنح صوتي لمن يتعهد بالحرية والتسامح والبناء غض النظر أنه مرشح من قبل حزبي أو من قبل حزب آخر .
وأميل بدوري لترشيح أختي من (رضاعة البورد) تماضر شيخ الدين كمرشح مستقل أو بأية صفة تختارها هي

يا عادل
ابو جهينة
حزب من لا كوم له
الجخنون والكانون دا حزب جندرى
ولذا وجب التنويه

عادل عطا
ممكن اضيف حزب البوستات(طبعا مستقلين )وفكرة سديدة محتاجين للتمرين الدبمقراطى
تحياتى

انا موافق ياراوية علي كل الشروط .... و لو الحكاية بقت جد و وزعوا رموز للمرشحين فانا افضل رمز الفار و لتكن الدعاية : انتخبوا الرجل الفار الذي يقرض الشعر و اشياءا اخري .... حتي ينقرض دونها ....

ملاسى

ملاســـــــــي
عنـــدي ليــك رمـــز تمــام
حـيـجـذب مـجـمـوعــــة كبيــرة من الناخبيـن
رمـــز الحجــــــــــــــــــــــاب
ودعايتك الانتخابيـه تكون.....
الحجاب ولا بخـور أم التيمــان

شنو يا ود الخالة نشيل ونشكر فيك
وفتاااااااااااااااك وكدا
تقول لينا رمز الفار
الفار بيخاف من الكديسة والكديسة بتخاف من الكلب والكلب بيخاف منو الحرامى الحرامى بيخاف من كمال وكمال بيخاف من.... البتخاف من الفأر البخاف من الكديسة الخ.. الخ

الناس بالبقولوا انهم ما لقوا البمثلهم فى قائمة الاحزاب المنشورة اعلاه بقول ليهم ارجو ان لا تشملون للاحزاب المجربة و الحاكمين عليها بالفشل نحنا اساسا ما قمنا الا لمشاركتنا ليكم فى الراى دا و انتوا قواعدنا و قياداتنا الما التقينا بيها لسع الاغلبية الصامته يجب ان تنازعنا الامر اذا رأت فينا اعوجاج فنحنا ندعى بأننا نعبر عنكم ليس بالنيابه عنكم لكن رأينا انه من الاوجب ان ينهض بالامر نفرا من الناس و لا يقمط الاخرين حقوقهم و لا لا يقرر بأسمهم بل يملكهم ما توصل اليه و يدعوهم للتنقيح فيه و بيان سداده و نقصانه حتى تتكامل الجهود و تكتمل المفاهيم و الطروحات...اجمل ما فى هذا البوست اتاحته لنا جميعا الحديث بلا حساسيات و نخت الكورة فى الواطة و تهذيب العمل الساسى و ترسيخ المفاهيم الجديدة التى نؤمن بها و نسعى الى ابدال السائد الفاسد بها حتى يعود العمل الوطنى جاذبا و تنهض العزائم الصادقة لاعادة بناء الوطن الذى خربته المناهج الفاسدة و النفوس المريضة التى اخلينا لها الساحة لعهود طويلة فتصدر الامر
فاثرت و افقرت البلاد و العباد..و من هنا ادعو فصائل القوى الصامته و القوى الصاخطة لنرتص فى اطار سياسى واحد حتى لا يذهب ريحن..و الدعوة كذلك لكل قوى التغيير و احاب المواهب و المعارف للتشاور و نقل الصراع السياسى من خانة الاسترزاق الى مواقع الفعل و من الفوضى للنظام و بدل الاستقطاب الحاد الى المنافحة بالفكر و تعويض الشخصانية بالموضوعية.
طرحنا لكل السودان و كل اهله يتساوى فيه الجميع فى الحقوق و الواجبات الزعامة فيه ليست لفرد بل يخضع الجميع للمؤسسة و يحتكمون باحامها و يلتزمون بتطبيق مقرراتها لا قداسة لفرد او مجموعة و لا انفراد بالرأى او الخروج على الحدود المرسومة من الهياكل و من يفعل يحاسب ايا كان موقعة التنظيمى .... لا تغيب ارادة فرد و لا يضيق عليه فى التعبر عن ما يراه صائبا و الهياكل التنظيمية و المنتخبون لها ملزمون بالاستماع له و مناقشته فى حدود ما تتيحه لهم اللوائح و القوانين المجازة من القواعد العريضة حسب الاليات المعمول بها و رفع ما يتخطى حدوده اللائحية الى المستوى الذى يليه و ان تطلب الامر الدعوة الى اجتماع او تضمين رأيه فى وثائق اجتماع او مؤتمر دورى.

لا يجمل بأحد ان يكتفى بالنظر الى بيته يحترق و يكتب على وجه الماء تقريرا بذلك
فهذه دعوة لاطفاء الحرائق و الابقاء بالقدر الكافى للطهى و اطعام الجوعى صناعة الحياة

يا عادل
انا مازلت عند موقفي..
استحداث منصب بلا انتخابات..

ناسف

اســــعد
عكــــــــــــاز عديــــــــــــــــــــــــــل
نسـعـل اللـه السـلامـــــــه

ههاهاهاهاها
الفكرة ظريفة قالوا المراة لما تحبل في شهورها الاولي بتقعد تتشهي في حاجات غريبة شئ طين بحر وشئ كبدة ابل وحاجات زي دي .. طبعا قايلة الحاجات دي بتحلها من الهي فيهو
الله يحلكم من الانتو فيهو دا ساي يا عادل
غايتو انا معاكم في الانتخابات دي وحقوا تستعجلوا تعملوها لانه اشتقنا لحكومة شمولية جديدة تقلبها ليكم لانه انا بفترض في نفسي كل المؤهلات لحكم ديكتاتوري شمولي بقوة العسكر يستولي علي ديموقراطية احلامك ولا تنقصني اي من الموهلات اللازمة للاستيلاء علي السلطة واساليب القهر والكبت

رمــز الســـيخــه
كويــس معـــاكـــم يا أسـاســــي
ده الوحــــــــم زاتـــــو

حذب الاسلام هو الحل, من يود التسجيل فيه فليكتب اسمه فى العضويه

ارشح الخاله بيان لشغل قياده الحز ب

واسجل اسمى كعضوه او مساعده

وشكرا للأخ عادل للفكره الجميله




وفى امان الله

لا اله الا الله

بت الخالة بيان

ترشيحك لاخونا ابو جهينة مرفوض مرفوض مرفوض و ذلك للاسباب الموضوعية ادناه:

اولا : لا يجيد اللعب بالبيضة و الحجر

ثانيا: يظهر ما يبطن

تالتا: لا يجديد لعبة التلات ورقات

و بما اننا نريد ان نفوز في هذه الانتخابات و لا نريد ان نكون ديكورا مكملا للعملية الانتخابية لذا لابد ان يكون لنا مرشحا يتميز بالاتي:

اولا: تهلل يمينة و تكبر بما فعلت و ما لم تفعل يساره

تانيا: ان يكون متمرسا و متمترسا خلف اقنعة زائفة و ينادي ما لا يفعل و يفعل عكس ما يدعو

تالتا: ان يتمكن من تعبئة الهوا في قزايز

لكل الاسباب الموضوعية اعلاة ادعوكم لترشيح فأركم ... فالفار خير من يمثلكم ... مع صادق الوعد بان نجد لابو جهينة منصبا يناسبه بعد فوزنا المامول بالانتخابات

و بعدين يا بيان الفوتوشوب بيعمل عجايب يعني لا شيب يظهر و لا تجاعيد تتشاف ....

اخونا محمد عثمان بكري تعرف الحجاب ما اظن يجيب دخل نحن نعمل فيها تقدميين و عصريين و متطورين
و بعدين لمن تؤول لنا السلطة حتشوف ... زي ما كانت جبهة الانقاذ الجزائرية حتعمل بالضبط !!!!

يا ابو السعود يا الله نفسي ...... ممكن بيان تترشح لعضوية المكتب السياسى و بعدين ممكن نشوف ليها لجنة كدا و لا حاجة ..... بس لرئاسة الحزب لا تصلح سوي الفئران

ملاسى

الاخ الزعيم المناضل الامام القائد المجاهد الشيخ حبيب الامه ومنقذها المفكر الملهم البطل الثورى خادم الحرمين الشريفين ومحرر المسجد الاقصي (ان شاء الله) مؤسس حزبنا وامل الشعب
ملاسي
(لقيتنى كيف بالله مش احسن من كل المطبلاتيه والهتيفه , لو لقيت فى لقب ناقص كلمنى)
اولا:انا متنازل ليك من الترشيح و رئاسة الحزب وكل شئ بس مسكنى الماليه او وزارة التجاره (نسبتك محفوظه يا زعيم)
ثانيآ:انا موافق 100% على موضوع خدر كويس انو الراجل مشغول بالعرس (اللهم اشغل اعدائ بانفسهم) واضيف معاهو عادل عبد العاطى تانى فى كم نفر كده فى القائمه السوداء,ناس مبدئيه وديمقراطيه وكمونيه ديل ما يقربونا نهائي .
شايف فى كم نجم لامع فى البورد من نوع عصايه قايمه وعصايه نايمه وعصايه حايمه ديل ممكن نستقطبم للحزب اهم شئ الواحد فيهم يكون عندو رأى واضح ومحدد ومبدئي لكن مافى زول يفهمو.
نحتاج لعدد من الهتيفه والبلطجيه والحمدلله البورد لا يخلو منهم
اختلف معاك فى نقطه ذكرتها وهى اخونا محمد عثمان بكري تعرف الحجاب ما اظن يجيب دخل نحن نعمل فيها تقدميين و عصريين و متطورين
والدليل الحصل لى تماضر,انت داير يرجمونا ولا يتهمونا بالرده والخلاعه,يا زول القصه دى انا جربتها سنوات طويله واخرتا فقر وشقا و وجع راس. بعدين عمرك سمعت بالبنك التقدمى او او توظيف المال التقدمى.. ولا ادعموا اخواننا التقدميين فى تقدمستان ؟؟؟
غايتو كان كان مصر على الحكايه دى الله بينى و بينك..
انا غايتو كفاى
عاش الزعيم و لانامت اعين الجبناء
ثوره حتى النصر

الابنة بت الاحفاد شكرا ليك على الثقة خلاص انا موافقة
اسمع يا عادل فى زول رشحنى فاهم؟
خلاص نبدأ الدعاية

عادل صورتك دى انا زمان علقت ليك عليها لكن هرشتنى اهو كلامى مشا وجا....الكلام على الاخلاق
ملاسي عندى ليك اقتراح (بيعه) ايه رأيك نعمل حزب سوا؟؟ انا شايف افكارك ممتازه جدآ وتتفق مع مشاريعى الفأريه المستقبليه,كفايه الفات
اذا موافق الباقى نتموا تحت التربيزه

موافق يا عصام علي شرط انو خدر يكون بعييييييييييييييييد........
ملاسى

ملاسى ازيك
امسك قوي في عصام جبرالله دا واحد لانه عنده التخفيض بتاع بهاء العباسى وعندو تخفيض تاني عشان هو ود جيرانا
وتخفيض تالت بتاع زماله كنا فرد
لكن انا عندي سوال البفوز المفروض يعمل شنو ......يعني منصبه, ومهامه, والغرض من الانتخابات زاته انا ما عارفاه
بالنسبه لي الرمز انا قلت ليك خلي المساله دي على انا

Quote: وتخفيض تالت بتاع زماله كنا فرد

وين الكلام دا حصل .... !!!!

و بعدين يا اخوانا لو الجميع حيترشح لمنصب واحد .... مافي داعى للتعب فالنتيجة معروفة سلفا ...

ملاسى

الاخ عبد العاطى لك التحيه


اين حزب البهجه يارجل؟

وعدت بانشاء الجسور
ومحاربة غلا المهور
محجبات او ذات سفور
صوتكن يقطع للسيور

خلعت علينا دهب جمان
مقبول حرير الاصفهان
صوتك عديل ان الاوان
رمز( الغراب) البت بيان


مرشحتكم نجاح الغراب
لحزب الجخنون والكانون

دعاية انتخابية بحالة جيدة للبيع
زورونا فى محلاتنا الجديدة
((حروب الخنفشارية ضد الحداسة ومابعدها))
[2 ]
Re: حروب الخنفشاربة ضد الحداسة وما بعدها

يا اخونا و ين مولانا عبد العاطي - سالم - مسجل الاحزاب ...

حصلت الانشقاقات قبال انشاء الاحزاب ....

نطالب بلائحة منظمة في الحال ...

ملاسى

دعاية للجزولى الابيات
الفى دعايتى من كتاباتو

الجزولى امشى لم الجوارى السلطان قال حرمان ما يجن راجعات

خاله بيان

سلامه نظرك عاينى فوق




وفى امان الله

لا اله الا الله

انا ارشح تماضر الصغيرة
علي وزن امين الصغير!!

العزيز عادل..
أنا نازل الإنتخابات برؤية جديدة..والتفاصيل لاحقا..
وكضربة بداية أعلن تغير إسمي ليصير (يعيش خالد الحاج) وأرجو منك مناداتي به
وطبعا ده حق ديموقراطي..
تحياتي ونؤيد الفكرة..
مرشح الدائرة الخارجية..

يعيش خالد الحاج

ولك الود

أخوك
يعيش خالد الحاج

أنا أرشــح الدكتــورة بيــان..
سـجن سـجن، غـرامـة غـرامـة.

انقلاب عسكري بقيادة الفريق اركان بورد جمال عبدالرحمن .. والقبض علي جميع المرشحين وايداعهم بوست مغلق عدمان الحرف...

صدر تحت كيبوردي

الاخ عادل.....التحيات الطيبات
والله الفكرة فى حد ذاتها جميلة و تمرين افتراضى محمود
لكن انا ما لقيت التنظيم بتاعى عشان اصوت لمرشحينه لكن لقيت اسم قريب ليهو ها ها ها

Quote: حركة القوي الحديثة السودانية - الحاج وراق -

غايتو انا الحركة بتاعتى اسمها حركة القوى الحديثة الديمقراطية (حق) و امينها العام اسمه الحاج وراق لكن ما قاعدين نكتب اسمه مع اسم الحركة

عذرا عادل كنت امزح معك ......نحتاج لقليل من الهزل احيانا فى حياتنا

لكن ما تدينا فرصة نعمل لينا برنامج انتخابى بوردى كارب بالاول و بعد داك ننزل عليكم

رجوية اللذيذة انا باقترح ليك منصب مسجل التنظيمات السياسية افتكر منصب زى الورد و اخر وجاهة و مافيهو اى مسئوليات و لا التزامات....اهه رأيك شنو؟؟
سؤال برئ هل يحق لمرشح ان ينزل باسم جهتين مختلفتين؟؟؟؟ عندى رغبة انزل مع ناس شيرى بس خايفة ناس حق فى الحالة دى يرفدونى

سلام للجميع

متابعة لانتخابات البورد:

بناءا علي الطلب بتمديد فترتي الترشيح والتصويت؛
اقترح ان تمتد فترة الترشيح حتي الجمعة القادمة 23 يناير 2003 لمنتصف الليل بتوقيت قرئنتش؛
وان يكون التصويت طوال يوم السبت 24 يناير 2003 حتي منتصف الليل بتوقيت قرئنتش

كبسيبة يريد ان يرشح نفسه؛ وشعاره صورته

ابو جهينة اتضح انه حزب من لا كوم له
وليس من الجخنون والكانون والذي هو حزب جندري

اضاف يا ولدي يا حبوب حزب البوستات - مستقلين -
وان كان لم يقدم مرشحا له

حسين ملاسي يوافق علي شروط راوية ويعلن ترشيحه ويختار رمزه الفار وشعاره :
انتخبوا الرجل الفار الذي يقرض الشعر و اشياءا اخري .... حتي ينقرض دونها ....

علاء الدين نصار يخاطب الناخبين ممن لا يجدوا من يمثلهم؛
ويختم مخاطبته الاولي بالقول:
"لا يجمل بأحد ان يكتفى بالنظر الى بيته يحترق و يكتب على وجه الماء تقريرا بذلك
فهذه دعوة لاطفاء الحرائق و الابقاء بالقدر الكافى للطهى و اطعام الجوعى صناعة الحياة"

رجاء العباسي لا تزال مصرة علي ضرورة استحداث منصب لها دون انتخابات

اساسي يوعد الناخبين بالاستيلاء علي الحكم واقامة حكم دكتاتوري شمولي

بنت الاحزاب تدعو لحزب الاسلام هو الحل ؛
وترشح دكتورة بيان لقيادة الحزب ؛
دكتورة بيان تقبل الترشيح وتنزل الانتخابات

المرشح حسين ملاسي يشن هجوما عنيفا علي المرشح ابو جهينة
- في صورة المدح الذي يشبه الذم -
ويشرح استراتيجيته الانتخابية

عصام جبر الله يدعم المرشح حسين ملاسي بشده ؛
ويدعو الي تنصيبه في وزارة تجارة او مالية
ويستبعدان خدر

محمد الشيخ يسأل عن حزب البهجة

المرشحة بيان تنشر برنامحها الانتخابي في شكل شعري مموسق
وتختار شعار الغراب

عبد المنعم الجزولي يطرح دعاية انتخابية بحالة جيدة للبيع
ويدعو لزيارة محلاتهم الجديدة

ملاسي يطالب بلائحة منظمة ويعترض علي الانشقاقات قبل تكوين الاحزاب

بنت الاحفاد تلفت دكتورة بيان للنظر فوق؛
وتدعو لها بسلامة النظر

امين السيد - من عتاولة حزب البعث -
يرشح تماضر الصغيرة؛ علي وزن امين الصغير

خالد الحاج ينزل الانتخابات برؤية جديدة؛ ويعلن تغيير اسمه الي
"يعيش خالد الحاج "
وينزل مرشحا للدائرة الخارجية

ابو ريش يدعم دكتورة بيان ويرشحها؛
ويعلن عدم خوفه من السجن او الغرامة

الفريق جمال عبدالرحمن يعلن عن انقلاب عسكري؛
وعن القبض علي جميع المرشحين وايداعهم بوست مغلق خالي من الكلام

يمني قوته تبحث عن اسم تنظيمها ولا تجده وتجد تنظيما مقاربا له؛
له نفس الامين العام لحركتها؛
ومع ذلك هي مترددة الولاء ما بين حركتها وحزب شيري - التي تواصل الصمت المطلق-

ولا تزال الانتخابات البوردية ؛
حافلة بالمفآجات ...

علينا جاى علينا جاى علينا جاى علينا جاى

حزب الحله والفله حزب الحله والفله حزب الحله والفله

راويه ده شنو ده

Quote: الا مع مراويد (انا بخاف منو ومن لسانه ) عشان كدا حنتبع معاه سياسه التي هي احسن وعفا الله

راويه والله عقدتينى عديل كده...انا شفتى منى شنو
هسه لسانى انا و لا ملاسي..و لا دكين
دى بالغتى فيها عددددددديل كده

اها عشان كلامك ده اعلنا مقاطعتنا للانتخابات وحنعمل تفجيرات ضد البشاركو وانتى اول واحده
خموا وصروا لا حله لا فله

issam + mlasy
ﺎﻬﻴﺳﺍﺮﻛ ﺐﻠﻘﻳ ﻭ ﺎﻴﻔﻄﻳ ﺓﺩ ﻱﻮﺧﺍ ﺪﻳﻭﺍﺮﻣ ﻲﻠﺧﺍ ﻻﻭ ﺎﻬﻴﻓ

موافقين0000 بس عاوزين000ميثاق شرف عشان مايحصل
تزوييييييييييير ولاانقلاب

مراويد
الغريبه انا حسه جايه من بوست رادي فيو انت ووووووووووب على وتقول برضو
اما دكين داك اسكت ساكت اصلي ما بدخل البوست الجنب البوست الهو رادي فيهو
وكان داير تطفشنى خت دكين في اخر خيط
مع انو كاتب كلام سمح سماحه بتاع الديك لكن برضوHE IS UNPREDICTABLE

اماملاسي دا انا عارفه دواه وين

لعناية الاستاذ عادل رئيس لجنة الانتخابات المحترم
ارجو التنسيق مع الاخت راويه لتقدير مبلغ محترم يدفعة احد المرشحين نظير انسحابي من المنافسة , وانا اؤكد ان فرص فوزي كبيره جدا , علي ان التزم بالعمل ضمن فريق الدعايه لهذا المرشح الدفيع وكلو بثمنه

لعناية الاستاذ عادل رئيس لجنة الانتخابات المحترم
ارجو التنسيق مع الاخت راويه لتقدير مبلغ محترم يدفعة احد المرشحين نظير انسحابي من المنافسة , وانا اؤكد ان فرص فوزي كبيره جدا , علي ان التزم بالعمل ضمن فريق الدعايه لهذا المرشح الدفيع وكلو بثمنه

Quote: اماملاسي دا انا عارفه دواه وين

بالله اكشفى لينا اسرارو
عشان نستخدمها فىتدمير الشخصية
فى سبيل الكسب نبيع اى زول
الكلام دى سرى ما تكلميه بالله

الأستاذ و الأخ العزيز عادل عبدالعاطي
تحياتي العطبراوية الصادقة
دة إقتراح أحلى منو مافي. و تمرين و في نفس الوقت إمتحان ، و تهيئة للديمقراطية ( الموعودة ).
أها :
دكتورتنا بيان ، أنا أشكرك نيابة عن حزب الكوم لس Koamless Party
و أوافق على الترشيح ، و برنامجي الإنتخابي في غاية الوضوح ، و يلبي كافة مطالب طبقات الشعب الكادحة.
بعد أن أجد التثنية المناسبة ، سوف أطرح برنامجي كاملا.
تشكري دكتورة بيان و إختيارك لرمز السفينة إختيار موفق للغاية.
تسلم عبدالعاطي

عزيزي حسين ملاسي
تحياتي
1. نظرا للمنافع الكثيرات التي يجدها الفائزون و الفائزات في مثل هذه الإنتخابات ، فإن لعابي سال و ملأ المحلات ، و لن أتنازل عن الترشيح إلا في هذه الحالات :
2. ضمان وظيفة في مركز ( يمكن الخم منه دون رقيب أو حسيب ) ، و يمكن منه خدمة المحاسيب.
3. إن تعذر الشرط رقم 2 فيمكن أن أدخل معهد لتعليم الثلاث ورقات و اللعب بالبيضة و الحجر ، حتى و إن طلعت بدلوم متوسط نظرا لضيق الوقت ، المهم أن ( نكون فيها قبال نطفيها ).
4. ترشيحي قائم ، و إلا سأضرب عن الطعام و أعمل إعتصام ( و شيلو شيلتكم ) ، كل ناس عطبرة البيعرفوك قاعدين يقروا كلامنا دة.

سلام

غدا في مثل هذه الساعة - تقريبا-
يقفل باب الترشيحات ؛ ويفتح باب التصويت
علي الاحزاب والتجمعات التي لم تقدم مرشحيها؛
ان تلحق قبل باب الترشيح .....

عادل

الاخ العزيز عادل
الفكرة جيدة ولكن لازم يوضع البوست ده كعنوانارئيسى ثابت ولازم تقوم ادارة البورد بالنواحى التنظيمية..واعتقد كان فى استفتاء حول الشخصيات المؤثرة فى الساحة السودانية فى هذا الموقع واحرز منصور خالد اعلى اصوات
اخى عادل اذا توفر حزب سياسى سودانى يحمل فكر سودانىيعبر عن كل اهل السودان ويحتل فيه ابناء الغرب والجنوب اعلى المناصب ويكون ديموقراطى اشتراكى ساصوت له بدون منازع..لذلك انامقاطع الانتخابات البوردية من الان...الا فى حالة ديموقراطية التمثيل النسبى.ساصوت للحزب اللبرالى..والحديث ذو شجون

سلام يا استاذ عادل

وجهة نظرك سليمة ؛ وللاسف العناصر الحزبية بالبورد لم تتعامل مع هذا الفكرة بجدية - رغم انها تمرين خفيف - ؛ ما عدا الاخ نصار والاخوة من حزب الامة ؛ رغما عن مرشحهم خالد عويس لم يقل حتي الان هل هو مرشح ام لا ...

اتفق معك في ضرورة بناء حزب وطني سوداني يعبر عن كل البلاد وليس عن جهة او عقيدة ما ؛ وان تكون في قيادته عناصر من كل البلاد شرقها وجنوبها وغربها؛ وليس فقط العناصر الامدرمانية فيما يسمي بالاحزاب القومية ؛ والتي هي لا قومية ولا حاجه ..

كونك تعلن تاييدك للحزب الليبرالي حاليا؛ فانا اري ان يصوت اعضاء الحزب ومؤيدوه بالبورد لصالح الاستاذ علاء الدين نصار؛ رغبة في تقوية التيار الديمقراطي والوطني؛ وتقريب الشقة بين الاحزاب والتنظيمات السودانية البرامجية ؛ والتي عليها توحيد الجهود في هذه المرحلة الحرجة من تاريخ البلاد ...

عادل

Quote: ويحتل فيه ابناء الغرب والجنوب اعلى المناصب ويكون ديموقراطى اشتراكى

عزيزي عادل الامين

تحياتي

التحديد سلفا بان يحتل اعلي مناصب الحزب ابناء الغرب و الجنوب - او اي جهة اخري في

السودان - تنفي عن الحزب كونه ديموقراطيا .....

ملاسى

اصوت للاستاذ علاء الدين نصار
عضو تنظيم القوي المستقلة الحرة
ومرشح القوي الديمقراطية والوسطية في البورد

الاخ العزيز عادل عبد العاطى
تحية طيبة
اذا ارشح نصار..احتراما للديموقراطية فى البورد والبرنامج الاقرب الىتطلاعاتنا
الاخ ملاسى
هذا الكلام عن ابناء الجنوب الغرب..الذى قلته اعلاه..اذا تحقق ان يكون رئيس الحزب السياسى من الجنوب او الغرب ..يكون انعكاس لتحررالوعى السودانى من ثقافة الشوفينية للهجين المستعرب والاستعلاء الدينى المريض الذى سممت به الجبهةالمجتمع السودانى..والذى يورم(..) كل يوم عندما نرى ضيوف الفضائية السودانية المزمنون ينعقون بعروبة واسلام السودان. ويحدثون عن تاريخ مزور للسودان
..حتى ولو بالتزكية اجعل رئيس الحزب من الغرب او الجنوب اسوة بنبينا محمد فى كسرعنصرية العرب فى الماضى بتعينه اسامةبن زيد قائد للجيوش..وانا شخصيا لا ارى احدكان يصلح رئيس لجمهورية السودان وقامة اخلاقية افضل من الاستاذ ابيل الير..او سياسى ذو بعد اقتصادى ومحترف مثل د.جون قرنق او محمد بشير عمر(وزير مالية حزب الامة السابق)
لابد من ثقافة المجتمع المدنى ان تسود السودان...حتى نحصل على ديموقراطيةحقيقية..والحديث عن الديموقراطيةحقيقية حديث جاد ومهم جدا فى الوقت الراهن..لان فى السودان فى كمية من الكذب والابتزال كافية لتقتل فيل..وان احزاب السودان القديم بشقيها الطائفى والايدولجى اضحت تحف ومكانها الطبيعى متحف التاريخ الطبيعى فى شارع الجامعة ولن تجدى معها عملية الترقيع والتجميل و(شد الجلد) حتى ولو جابت الجنينة جنب بورتسودان ونمولى جنب حلفا
لا مستقبل للدولة الدينية الزائفة فى السودان وفى العالم والمستقبل للدولة المدنية ولازالت احزاب الدولة المدنية لم تتشكل بعد فى السودان ولا الدول العربية الاخرى وان بدات طلائعها فى الظهور
والتحية لك وما برشحك ابدا حتى ولو نزلت فى حزب الله..لكن برشح هشام ملاسى(وحب الناس مذاهب) وبلغو تحياتى
*************
نتعمد الاسراف
كى نستر الفاقة
الزاد خبز حاف
والنفس افاقة

خالص التحايا
العزيز عادل تسلم يارائع وفكره اجمل من جميله ..لكن وين روح الديمقراطيه شنو حزب للناس الجديدين مافى وبعدين انا شايف انو محتاجين لى ايام اضافيه حسب الدستور ولا دستوركم ده زى ده دستور الجماعه لانو النصاب ما تامى..عموما سلام لكل الشباب الرائع هذا البوست وكان بودى ان اذكركم اسما اسم لكن الجايات اكتر من الرايحات واتمنى ليكم الفوز جميعا ومن يفوز بشرط بطريقه ديمقراطيه نحن معاهو وانا زاتى داخل بى تقلى هذه الانتخابات..
يلا يا ستاذ عادل اديك فزوره تقترح لى ياتو حزب او قائمه ممكن اكون فيها؟؟؟؟؟؟
وبعدين شنو حاولت اتصل بيك تلفون حلف مايجى له؟؟؟؟
ويلا شدو حيلك ياشباب..
وسلامات يارائع..

الأخ عادل
سأقبل الترشيح طالما لم يرفض واحد من عضوية الحزب ترشيحي
سأكتب برنامجي الانتخابي مبسطا لاحقا

الأخ عادل
سأقبل الترشيح طالما لم يرفض واحد من عضوية الحزب ترشيحي
سأكتب برنامجي الانتخابي مبسطا لاحقا

الاخ معتز تروتسكي

تحية طيبة ووالله التلفون دا ما عرفت مشكلتو شنو ؛ مرات يوصل ومرات يفصل
- قالوا لي زي تلفونات عطبرة -
هناك احزاب كثيرة ومن بينها احزاب متعددة تسمي نفسها بالجديدة؛
اما اذا اردت راييي فصوت للاخ علاء الدين نصار ممثل الافكار والقوي الجديدة

الاخ خالد عويس
ونعم المرشح ويا ريت لو حزب الامة في الانتخابات الفعلية ينزل ناس زيك
اتمني ان اري برنامجك الانتخابي قريبا

الجميع
لا اعتقد سيكون هناك اعتراض لو مددنا فترة التصويت الي منتصف الليل غدا - الاحد -
يعني 24 ساعة اضافية لزوم الناس ما تصل مركز التصويت

عادل

سلام يا ناس الانخابات خيمة خيمة
نعود ليكم بعد المرور بظروف ضاغطة سمحت لى بالطلة اليوم ...المهم انه اجراءات العملية الديموقراطية مستمرة بفضل مثابرة الاخ عادل عبد العاطى و القوى الدموقراطية....
انتخب قوى الوسط الديموقراطية
و اناشد القوى المستقلة دعم برنامجنا و عدم تشتيت قوى الوسط لنحقق الواقع الافضل الذى نسعى له سويا

آخر يوم للتصويت اليوم
علي المرشحين التذكير بانفسهم وبرنامجهم

تذكروا ..
وللجمهور الذي قام بالإتصال
نعم أنا ضد قوانين سبتمبر..لكن رمضان ده خلوه..
شخصيا أعد بما أقدر عليه..
تعليم..
علاج..
طرق..
مواصلات..
...صوتك..يصنع التغيير..

مرشحكم

يعيش خالد الحاج

الرائع العزيز عادل
تسلم عزيزى..طبعا ياخالد الحاج برنامجك جميل جدا لكن الاستاذ عادل برنامجو اجمل( وقروشو اكتر ههه)..عموما ياخالد شوف قروشك وتعال وبعد داك انا ممكن اوقع ليك ...
كل سنه وانتو طيبيين..
وياعادل ياحليل تلفونات عطبره لكن لازلت اواصل المحاوله وترقبنى قريبا ..

معتز والله قروش مافي
لا عندنا ولا عند مرشح القوي الديمقراطية والوسطية والمستقلة
الاستاذ علاء الدين نصار
وانما برنامج هادف واخلاص وهمة ومبدئية في الطرح والممارسة
لذا صوت لمرشحنا ولن تندم ..

يا جماعة الوقت ضايق ولا اري بقية التصويتات ..

عادل

عزيزى عادل
انت صدقته ولا شنو دى هظار بتاع قوائم مترشحه بس ..طيب قبل ما يقفل باب الترشيح يلا سوى عشان ندعم مرشحنا نصار(القوي الديمقراطية والوسطية والليبرالية)..
يلا استاذ نصار داير ين نعقد معاك اجتماع عشان نتناقش فى امور الحزب وكده وعملية التموين والاصوات ووين اللسته الاعضاءووو.. والكلام كتير نخليهو فى اجتماع اللجنه المركزيه... ابقى اظهر ياالسيد الرئيس(نصار)..

سلام اخى معتز
و نعتز بك ركيزة اضافية فى تيارنا
انا موجود و قاعد اراغب الوضعن عن كثب كما يقال فى البيانات الرسمية لوول...مافى اى عوجة نعقد الاجتماع بالاجندة الذكرتها ..
المشكلة فى احجام من الاحزاب و القواعد فى الحالة دى الظاهر ح يفوز برنامجنا بالتزكية ...كنت ناوى الاستفادة من المساحة دى و نشر اكبر قدر من ملامح برامجنا وفهمنا للعمل الوطن و اهادمنا و مبادئنا و ...لكن فشلنى الكيبورد العربى و خيرها فى غيرها

يتلخص برنامجي لدائرة البورد الانتخابية و اعد يتنفيذ الاتي في حال فوزي بالانتخابات:

1- حصر عضوية البورد في التقدميين و اللبراليين ففط دون الاجناس الاخري

2- منح نيشان و انواط جدارة لكل من يسيئ لاحدي عضوات البورد و يترفع النوط كلما ارتفع مستوي السباب ....و كلما طرق السباب نقاطا اكثر حساسية و تأثيرا كلما اضيفت للنوط جائزة عينية.

3- منح كل عضو الفرصة للكتابة بأسمين الاسم الحقيقي لاظهار الوجه المشرق و اسم مستعار للاستعمال
السفلي ...

4- تجميد العضوية و التشهير و اغتيال شخصية كل من يشك بانتمائة لاحد التنظيمات الاسلامية في أي فترة من حياته او كل من تولي منصبا او استوظف وظيفية في الحكومة منذ 1989 و حتي تاريخه ....

5- الالتزام بان يرفع اتوماتيكيا أي بوست يحتوي علي اكثر من 10 كلمات غير مفهومة للعامة بحيث يكون البوست الاول لمدة 10 ايام علي الاقل حتي و لو كان عدد المشاركين 3


انتخبوا مرشحكم الفار الذي يقرض المبادئ حتي بنقرض


ملاسى

بحسب فكرة الأخ عادل (- ان يقوم المرشحون بتقديم برامجهم الانتخابية ؛ من وحي برامج حزبهم في مختلف قضايا البورد والوطن )، يسعدني أن يكون برنامجي الانتخابي _ معبرا عن جيل جديد ودماء جديدة وأفكار جديدة في حزب الأمة كالتالي :

1/ الوطن هو القضية الأولى ، والمحك الحقيقي حوله لا يكون بالتنظير ، وانما بالعمل .
2/ لكي يستنهض الوطن ، لابد من التفكير معمقا في الدوافع التي تجعل من كل مواطن مساهما حقيقيا في البناء ، معتبرا في الوقت ذاته ، أن ما يقوم به في الاطار العام ، هو مسألة شخصية في المقام الأول ، وهذا يتأتى من خلال محورين كبيرين
أ _ اعادة اكتشاف "شخصية السودان" ، وازالة الغبار عما لحق بتاريخه الورائي العظيم ، لأن ايمان الشعب السوداني بعظمة تاريخه الممتد 8000 سنة ، والانجازات الحضارية العظيمة التي تحققت سابقا ، سيكون له فضل رفد الشخصية السودانية المعاصرة بمحفزات لا زالت كامنة .
ب_ أما المحور الثاني ، فهو توليد حلم كبير بالمستقبل السوداني ، وأجدني ميالا للافادة من تجربة ماليزيا التي أشرّ حكيمها "د. مهاتير محمد" في اتجاه ماليزيا 2020 ، أي ما يمكن تحقيقه لماليزيا حتى عام 2020 ، فتحقق لهم قسم كبير من أحلامهم التي صيرها مهاتير جمعية . في هذا السياق ، أطرح فكرة السودان 2018 ، .. اذن ماذا سنفعل من أجل سودان 2018 ؟
3/ الاجابة على السؤال السابق تكمن في الاسترشاد بالكفاءات السودانية كافة في جميع المجالات والتخصصات من الشباب خصوصا في اتجاه تكوين ما يعرف بـ Thinking Tanks لوضع خطط موضوعية وخلاقة لانجاح الاستنهاض .
4/ محاربة الفساد وبكل حزم ، وعدم التهاون مع المفسدين والانتهازيين ، في البورد ، في الوطن ، في الأسرة ، وتقديم الشفافية على ما سواها وجعلها دستورا خفيا في الواقع السوداني .
5/ تحقيق ثورة ثقافية شاملة ، لتجذير قيم الديمقراطية ، والحرية ، وحقوق الانسان ، فضلا عن تعميق قيم الفن والجمال ، في التربة المجتمعية ، ومكافحة التعصب والتشدد والانكفائية والقبلية والجهوية في معمل الثقافة ، حتى لتكون الملمح الأبرز في السودان المعاصر ، وجعلها أداة للتغيير الاجتماعي والمجتمعي .
6/ الاعتراف بالتردي الصحي والتعليمي في السودان ، ووضع خطة طواريء لتغيير الحال الى أفضل في غضون 3 سنوات فقط ، من خلال حشد أكبر قدر من الامكانات لمشروعات تجعل من الصحة والتعليم أمرا الزاميا .
7/ تقليص بنود الصرف المالية بالنسبة للحكومة ليتساوى الرئيس والوزير والمسؤول الحكومي بالموظف العادي ، وادراج محاسبة قاسية قانونيا واعلاميا بشأن كل من يثبت تورطه في الفساد الذي لابد أن يتواضع على تعريفه بشكل صارم ، وبحيث يعتبر _ في حال اثباته قانونا _ من قبيل الخيانة العظمى.
8/ تكريم المعلم ماديا ومعنويا بجعله الفئة الأكثر حظوة في المجتمع ، من خلال تقديم التسهيلات كافة اليه ، شريطة أن يتم تحفيز الطلاب المقدمين الى كليات التربية ، واعادة النظر في المناهج ، لتصبح مناهج خلاقة ومحفزة ضد التلقين واليقينيات .
9/ كسر حلقة المركز والهامش ، لينصب الاهتمام التنموي على الريف والهامش عموما ، بحيث يكون مردود ذلك تنمية حقيقية في السودان كله .
10/ محاسبة القوى السياسية السودانية كافة ، التي فشلت في ارساء قيم الاستقلال الحقيقية ، وأهدرت موارد السودان طيلة 50 عاما في دوائر الحروب والتكسب ، والانقلابات العسكرية ، وارساء قيمة النقد الذاتي الشفاف كقيمة حضارية أساس في مستقبل السودان .
11/ منعا للجدل القانوني والسياسي والفكري ، واضاعة الوقت في سجالات قليلة الفائدة ، تحال الأجندة المتعلقة بدستور البلاد الدائم الى لجنة يتم اختيارها بشكل دقيق وبتراض من المعنيين بالأمر والمختصين فقط ، وعرض الدستور على الشعب السوداني ثلاث مرات للتصويت عليه .
12/ تأسيس دولة ديمقراطية ، تفصل سلطاتها الأربع ، وتسيّر بالقانون ، وتسن قوانين صارمة تفصل فصلا دقيقا بين الحرية والفوضى ، لتحاسب من يتعدى على حقوق الآخرين باسم الحرية .
13/ العمل على مواجهة (آثار الخراب الانقاذي) بتفكيك بنية العقل الانقاذي ومؤسساته التي أنشبت أظفارها في النسيج السياسي والاجتماعي السوداني ، مع الأخذ بالاعتبار أن (الانقاذوية) أضحت سلوكا لا انتسابا ، ومن الواجب تفكيك مثل هذا السلوك الذي استوطن في السودان ، ويتمثل بالانتهازية وحب الذات والاتجار بالدين والوطن ، وتمييع القيم الدينية والاخلاقية باعتبارها سلع قابلة لتلوين معانيها ، وقمع الآخر ، واشاعة ثقافى بعينها ، معرفيا واستهلاكيا .
14/ يتأسس الاقتصاد على مزاوجة بين الرأسمالية باتاحة حرية الفرد الاقتصادية ، وتمكينه من جني فوائد لجهده ، وبين الاشتراكية التي تمثلها الدولة ، بسن ضرائب تتماشى مع المداخيل بحيث تزيد على الأغنياء وتضحي هامشية على الفقراء ، بل وتأخذ من الأغنياء لجهة الفقراء على غرار التجربة السويدية ( في السويد تصل الضرائب على بعض الأثرياء الى 80% ) على مداخيلهم ، وترعى الدولة أنشطة اقتصادية بعينها لكسر الاحتكار والتحكم في السوق بواسطة قلة .تقوم لجنة اقتصادية خاصة بدراسة الأمر ومن ثم اصدار توصيات تعرض على الشعب .
15/ تشجيع العقول المهاجرة على العودة ، ورفع العسف والظلم الواقعين على المغتربين فيما يتعلق بالرسوم الضريبية ، والرسوم المتعلقة بدراسة أبنائهم .
16/ الغاء الرخص كافة التي صدرت في السنوات السابقة بخصوص الخدمات الصحية والتعليمية الخاصة ، وجعل هذين الحقلين ، تحت رعاية الدولة ، واجازة قانون يمنع منعا باتا انشاء مشافي أو مدارس وجامعات خاصة ، وتعويض مالكيها .
17/ انشاء مركز السودان لدراسات المستقبل ... وهو مركز حيوي ومهم لاستشعار المخاطر المستقبلية ، ودراستها ومواجهة الكوارث الاقتصادية والبيئية ، ووضع خطط لمواجهتها ، وتعميق الدراسات المتعلقة بالسودان في اطاره الاقليمي والاطار الدولي . يقوم المركز أيضا باحتضان الـ Thinking Tanks في المجالات المختلفة ويرعى رفدها بالخبرات والموارد.

ولي عودة

نطلب نحن المرشحون مستوفي شروط الترشيح من السيد امين لجنة انتخابات البورد استبعاد أي مرشح

لم تتم تثنيته و كل من لم يتقدم ببرنامجة الانتخابي ...

عزيزي الناخب ... صوتك امانة .... ففرط به .....

انخبوا فأركم فهو لكم و بكم و "عليكم" ...

ملاسى

لووووووووووووول يا ملاسي يا ممسوخ..
البرنامج ما عندك ...
بس كمان برضو اضيف ليهو: اعطاء نيشانات لكل الطفشو "الجكس" من البورد..

عادل..
عملتو شنو في حكاية استحداث المنصب "إيـاه"!!

؟

احى الاخ عادل عبد العاطى على الفكرة و تحفيذ الناس للتفاعل معها بما تحمله من جد و خفة ظل و احى الاخوة الذين استجابوا للنداء و تعاملوا بذكاء واضح فى الافصاح عن اراءهم و كانوا فى جدهم وهزلهم يتعاملون مع لب المبادرة بلا اسفاف و اتمنى على من لم ترق لهم الفكرة ان يأتونا بمبادرات بديلة تسهم فى رفع الشأن الوطن فى تراتيبية اولياتنا و تعيد له قوة جذبة لكافة القطاعات , حتى يجد كل منا الاطار الذى يعبر به عن اماله الوطنية و يقدم عبرة عطاءه و جهده و ابداعه و بذا لا يحرم الوطن من مقدرات ابناءه و لا يحول حائل اما راغب فى العمل .

من يكون الوطن همه يحضره فى جده و هزله

السيد الرئيس نصار
خالص التحايا
الساده اعضاء الحزب(القوي الديمقراطية والوسطية والليبرالية)اننى
ادعكم لاجتماع طارىء لتفعيل الحملة الدعائيه للحزب فى ظل التكتيكات التى يمارسونها بعض الساسه فى التنظيمات الاخرى (من عدم جديه وو كما قال السيد الرئيس)..وادعو السيد عادل الى قفل باب الترشيحات والبدء فى الفرز واعلان النتيجه باسرع فرصه لاننى اعتقد ان الفتره السابقه كانت كافيه من حيث الزمن والفرصه فى طرح البرنامج..

Quote: وادعو السيد عادل الى قفل باب الترشيحات والبدء فى الفرز واعلان النتيجه باسرع فرصه

اعتقد يا أخ تروتسكي انو التصويت يجب ان يسبق بدء الفرز ..... اللهم الا اذا ما كانت هنالك

تكتيكات اخري تجعل البدء بالفرز يأتي تاليا لقفل باب الترشيحات مباشرة .... و في هذه الحالة

اقترح ان يقدم اعلان النتيجة علي قفل باب الترشيح و بدء الفرز ...

و معا لاعلان النتيجة باسرع فرصة .... و فائزون لا محالة

و ما زال الفأر فاركم

ملاسى