ياخي إنت بتنكت الحاجات دي من ويين ؟ أنا في إعتقادي الفرقة الاجنبية دي قدمت شغل أجمل بالرغم من إزعاج عازفي الاكورديون والعود واللي ما كانوا ملتزمين بالنوتة الموسيقية يعني بدون الاتنين دييل الشغل حميل مية مية ، الشيء التاني ، الاوركسترا بالرغم من ضخامتها ما كان في توزيع موسيقي ، بمعنى ، كل الآلات نفذت عمل واحد ، بالرغم من ده كلو ، أنا مقدر إنهم إختاروا أغنية سودانية ونفذوها بالطريقة الجميلة دي مقارنة بما قدم من فناني البلد ، ما في شك شغل مقدر من ناس نفذوا عمل مختلف من أعمالهم ، وده يعني إنو غنانا بقى محل إعجاب ، والف رحمة لأبو الفن السوداني الكاشف
كنكوج عمر الفاروق الليلة إرتاح راحة لمن غلبني النوم خايفة أنوم تقوم تقل عدد المرات البسمعها فيها
هو أنا ماكلمتك يالنصري؟
الاغنية دي ماخدة جائزة أجمل أغنية في الوجود ____________ ونجي للبنية بتقول سواد الليل بطريقة تسحر وروحها جميلة وهزة كتفيها أدت الاغنية سحر على السحر العليها دا غير الاوركسترا العزفت كما قال الكتاب .......ولحنها عبقريها
لقد ابدعت واجادت وادتها كما اداها صاحبها الفنان العبقري ابراهيم الكاشف واضافت اليها رونقا جديد بالحركات الموزونة مع الايقاع وهي وان لم تفهم مدلول بعض العبارات السودانيةالا ان التلويح بالوداع مع كلمة من العيون يا الله السلامة شكل مسك الختام للاغنية كما ارادت هي
سلام ترهاقا الفرقة الموسيقية دى فيها على الاقل نفر او نفرين برة الشبكة نهائئ سمعت الاغنية زى 200 مرة كدى وكل مرة تضرسنى واحدة من الالات الموسيقية لكن ما عرفتها ياتا فيهم ... لكن الشغل جيد بصورة العامة والبت عسل منقط ...بس دخلتها الاولى فى الاغنية كان فارقة شوية زمن ..اظنها تاخرت ثانية ونص كده
سلام الشامى الكاشف عبقرى بمعنى الكلمة عليك الله اسمع اغنية جننتنى العيون.. ياخ دى والله اجمل اغنية فى العيون على الاطلاق
اتخيل معاى لو كانت الاغنية مختفية طوال هذه السنين وظهرت لينا فجاة فى زمنا الناشف ده زمن توقف فيه الابداع تماما
Post: #10 Title: Re: اسمر جميل ♫ Author: هاشم أحمد خلف الله Date: 10-15-2010, 08:45 PM Parent: #9
الله يديك العافية يا النصري وجمعتك مباركة ان شاء الله ياخي والله ريحتني راحة ما بعدها راحة جميل إنك تسمع غناء بلدك من بلد عير بلدك وبالطريقة الساحرة دي على فكرة البت دي سمحة شديد وروحها احلى شكرا يا حبيب
Post: #11 Title: Re: اسمر جميل ♫ Author: النصرى أمين Date: 10-16-2010, 04:12 AM Parent: #10
سلام هاشم ياخ انا قعدت فى الانترنت ساعة كاملة بحاول اعرف الناس ديل من ياتو بلد... بعد صعوبة عرفت انو القناة الناقلة للحفل اسمها "الدنيا" وهى قناة سورية لكن ما اتاكدت من الفرقة الموسيقية..هل هم برضو سوريين ولا لا !! احتمال يكون مهرجان عربى نقلته القناة السورية....
فى البدء ظننت ان المغنية وفرقتها الموسيقية من المغرب العربى او ليبيا.... لكن برضو احتمال يكونو من المشرق العربى ... او حتى الخليج ...
ما مهم .:..
المهم البنت عسل واجادت الاداء فى سلم موسيقى صعب عليها .....
أسمر جميل عاجبني لونو كحّل سواد الليل عيونو *** عالي النخيل ما ضقنا تمرو أسمر جميل ما حنّا عمرو جسمي العليل إستحلى جبرو شرْع الغرام حاير لأمرو *** أسمر جميل فتّان بريدو كل الخلود تتمنى ريدو عقد الجلال يا ناس يزيدو عقد القلوب منصوب بجيدو *** أسمر جميل فوق في سماهو كل الخلود ترغب ضياهو سهم اللحاف ساعة رماهو صاب القليب سالت دماهو *** أسمر جميل فاق في الوسامه صفوة جمال وجهو إبتسامه فوق الخديد عا########ي شامه ومن العيون ياالله السلامه *** أسمر جميل عاجبني لونو كحّل سواد الليل عيونو
Quote: بالله ما لاحظت صرة الوش بتاعت فناناتنا ..... الواحدة بعد كل كوبليه تحدر ليك فى الكاميرا وكانها بتقول ليك "مالك ؟بتعاين لشنو؟ داير شنو؟"
لمن تضطر تكسر عينك...
هى لكن يا النصرى ناس الطيب مصطفى ديل
ما بقلعوا الوش زاتو خلى البسمه...
انت عارف لغة الجسد دى ابلغ لغة
ولو مغالطنى اقفل صوت البنيه دى وعاين ليها
وحاتك تلقاك بقيت درويش فى حلقة ذكر...
احب حلب الشهباء زاتا،،،
Post: #25 Title: Re: اسمر جميل ♫ Author: إبراهيم عبد الحليم Date: 10-17-2010, 07:12 PM Parent: #24
يا سلام حاجة جميلة ومفرحة حقا
بتاع الاكورديون عذبنى عذاب ابوقبورة بره الخط تماما وعامل هرمنة ما جاية مع النوتة. بتاع العود مجلط برضو وفى بتاعين كمنجات بجلطوا فى نهاية الجملة الموسيقية وما عارف ليه مع انو النوتة قدام عيونهم. البنت غنت بصورة مرحة وكانت متكيفة كيفتنى انا ذاتو حلووووووة سعيد ان يجد ابراهيم الكاشف هذا التكريم من خارج الحدود
Post: #26 Title: Re: اسمر جميل ♫ Author: احمد العربي Date: 10-17-2010, 07:24 PM Parent: #25
النصري تحياتي على هذا الجمال وانا اسف جدا افترعت بوست بعد ما عملت جولة ولم اجد اي بوست بهذا الاسمر لكن عموما هيا لنشر الجمال وتقبل اعتزاري