Post: #1
Title: يا والى الخرطوم الجديد : ورينا من حسى بتمتلك شنو وشركاتك كم!
Author: النصرى أمين
Date: 05-08-2009, 02:14 AM
Parent: #0
عشان ما نبقى بعدين فى يا اخوانا انا غنيان من زمان..
ويا اخوانا دى قروش السعودية..
ودى قروش ورثة ...
وما اعرفش ايه
ونغلط نفس الغلط مع الزول القبلك ..
ورينا من حسى عندك كم عمارة
وشركة
ومصنع
ومزرعة
وكاش
عشان الحساب حيبدا من بعد بكره السبت
انا جادى يا سعادة الفريق
|
Post: #2
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: النصرى أمين
Date: 05-08-2009, 02:17 AM
Parent: #1
الاول شرط
اخر نور
|
Post: #3
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: النصرى أمين
Date: 05-08-2009, 02:23 AM
Parent: #2
ولو انت اساسا جاى وقافل بجوكرين
انسى
الله فى
|
Post: #4
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: Amin Mohamed Suliman
Date: 05-08-2009, 02:34 AM
Parent: #3
| Quote: انا جادى يا سعادة الفريق |
و الله يا النصرى يا أخوي كان إنت جادي معناتك ما جادي !!
العالم دي ما عندها شفافيه ، يعني الراجل ده ممكن يكون أمين و كل شي ، لكن قصه شفافيه دي مافي خالص !!
|
Post: #5
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: النصرى أمين
Date: 05-08-2009, 03:09 AM
Parent: #4
الاخ امين
الزول طلع دكتور موش فريق
ما فارقا...
عملت بحث فى قوقل حوله
قريت كلام طيب عنه...
و اتضح لى انو كان والى القضارف..
كدى النشوف اتلوم مع اهلنا هناك ولا لا ..
|
Post: #6
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: النصرى أمين
Date: 05-08-2009, 03:19 AM
Parent: #5
وبرضو لو امكن
تورينا ثروة اهلك
واولاد اهلك
واصحابك
واولاد حلتك
وجيرانك
واولاد دفعتك
وزملاء العمل بعد التخرج
وقبله..
ونسايبك
وناس الميز
وفريق الكورة
وشلة العشاء ايام الدراسة
وكل من يمت لك بصلة
معليش
الزول الفات ده دخل فينا زلعة
|
Post: #7
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: Anwar Ahmed
Date: 05-08-2009, 04:05 AM
Parent: #6
طبعا دي ما أول وزارة او عمل حكومي ليه
بكون لهط وتشبع باموال الشعب
بس ما يعمل بمقولة المتعافي البحر بشيل الدميرة
|
Post: #8
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: Amin Mohamed Suliman
Date: 05-08-2009, 06:30 AM
Parent: #7
يا أنور يا أخونا خاف ربنا في الزول ده ، يعني الراجل عشان عينوه والي ، طوالي بكون لهط وتشبع باموال الشعب لما كان شغال في حته تانيه ؟
|
Post: #9
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: علاء الدين يوسف علي محمد
Date: 05-08-2009, 07:02 AM
Parent: #8
د. عبد الرحمن الخضر
والي القضارف السابق و صاحب فكرة مدينة القضارف الرقمية
التجربة الناجحة التي وجدت الإحتفاء العالمي و التكريم بجوائز عالمية في مجال تقانة الملعومات
الرجل مهموم بالتطوير قبل شيء
أعرفه معرفة شخصية
رجلٌ نقي السيرة و السريرة
|
Post: #11
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: علاء الدين يوسف علي محمد
Date: 05-08-2009, 07:11 AM
Parent: #10
Quote: قرارات جمهورية بتعيين وزراء وولاة ووزراء دولة
الخرطوم 7/5 (سونا) أصدر المشير عمر حسن احمد البشير رئيس الجمهورية قرارات جمهورية بتعيين وزراء اتحاديين وولاة ولايات ووزراء دولة على النحو التالي: د.عبدالحليم إسماعيل المتعافي وزيراً للزراعة، د.فيصل حسن ابراهيم وزيراً للثروة الحيوانية، د.عبد الرحمن الخضر والياً لولاية الخرطوم، بروفسور الزبير بشير طه والياً للجزيرة، الأستاذ محمد احمد الطاهر ابوكلابيش والياً لشمال كردفان، مولانا احمد محمد هارون والياً لجنوب كردفان، الأستاذة حليمة حسب الله وزير دولة بوزارة التربية والتعليم الاتحادية، د.عبد الباقي الجيلاني وزير دولة بوزارة الشئون الإنسانية. |
نقلاً عن سونا للأنباء
|
Post: #12
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: العوض المسلمي
Date: 05-08-2009, 07:50 AM
Parent: #11
يا عزيزي لاتتعب نفسك فالرجل اصلا كان والي وتحول الي والي ,,,
يعني كشف تنقلات داخلي ,,,
والاقرار بيكون مكتوب منذ قيام الانقاذ ,,,
رغم ان الدكتور لاغبار عليه ومشهود له بالنظافه اليد واللسان الا انني كنت اتمني واليا جديدا ,,,
|
Post: #13
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: وجدي الكردي
Date: 05-08-2009, 12:57 PM
Parent: #12
|
Post: #14
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: علاء الدين يوسف علي محمد
Date: 05-08-2009, 02:55 PM
Parent: #13
| Quote: عبدالرحمن الخضر زول عينو مليانة وراسو مليان وقلبو فاضي من احقاد الجربندية الجعانين |
كفيت و أوفيت
|
Post: #15
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: حامد محمد حامد
Date: 05-08-2009, 03:39 PM
Parent: #14
لا اعرفه واحسبه من قول الاخرين رجل عفيف
ولكن التعاطى هنا كوالى للخرطوم قد يختلف وما من الضرورى انه الواحد يكون ما حرامى معناته انه كف فى عمله
ولا بالدكتوراة تسير الامور ولكنها مهارات اخرى وقد يمتلكها الوالى الدكتور
عن نفسى اتمنى له التوفيق فى خدمة وطنه وعاصمة بلده بقوة وبجدارة
وقديما قالوا
المية تكدب الغطاس
|
Post: #16
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: عبدالكريم أحمد الامين
Date: 05-08-2009, 03:55 PM
Parent: #15
الوالى بسمتيار الى وزارة الزراعه:-
** من بكره الوزاره دى إعتبروها بقت شركه وحقتو ..
** يُعلن السيد وزير الزراعه عن فتح شركات الوالى للمنتجات الزراعيه بكل أقاليم السودان وسوف يكون بيع المُدخلات الزراعيه والبذور والاسمده والجرارات حصرياً على شركات الوالى..
** إى شركه تعمل بالمجال الزراعى عليها تعديل أوضاعها خلال أسبوع من تاريخ اليوم 08/05/2009 وذلك بأن يكون نصيب الوزير 51% من رأس مال الشركه وعلى محاسبي الشركات تقديم تقرير شهرى لحركة البيع..
** إى شركه لاتستجيب لهذا الامر تُصادر لصالح الوزاره ويُلغى ترخيصها..
## وفى تصريح للوزير بسمتيار لوسائل الاعلام العالميه :-
** من الليله مافى ورده ولا زهره ناهيك عن الخضروات والذره والقمح بتتزرع ,, إذا نسبتى ماطلعت وسبق أن صرحت من قبل وأعيد ففى الإعاده إفاده أنـــــــــــا تــــــــــاجـــــــــر...
## الله يكون فى عون سلة غذاء العالم !!!!!!##
|
Post: #17
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: Tabaldina
Date: 05-08-2009, 04:22 PM
Parent: #16
..
.
Quote: يا عزيزي لاتتعب نفسك فالرجل اصلا كان والي وتحول الي والي ,,,
يعني كشف تنقلات داخلي ,,, |
كلام صاح
عفيف شنو .؟؟ وسريرة شنو بلا سراير معاكم
20 سنة مع الانقاذ دا شبع لمن دفق بس حركة
احتمال مرحلة اسمها اضمن مستقبل احفادك
بعد تجاوز نفسه واولاده
_______
ما شابكننا الحضيرى عفيف لمن طلع عندو
خرطمية بيت وفيلا
|
Post: #20
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: Amin Mohamed Suliman
Date: 05-08-2009, 04:33 PM
Parent: #17
يا تبلدينا ، ياخي أنا بعتبرك من الناس المنطقيه في البورد ده !! كان عارف حاجه عن الزول ده ، بالله جيبها مثبتة .
معظم المتداخلين شهدوا ليه بالامانه و العفه ، كلام دا شبع لمن دفق المطلوق ساي ده ، بختك مع الكيزان ديل في سرج واحد ......
|
Post: #18
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: يوسف محمد يوسف
Date: 05-08-2009, 04:24 PM
Parent: #16
الوالى الجديد للخرطوم:
هل هو من ابناء الخرطوم ام من عيال كلتوم " ست اللبن " ؟؟
لانها تفرق كتير !!
|
Post: #19
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: النصرى أمين
Date: 05-08-2009, 04:27 PM
Parent: #16
الاخ انور احمد
ما داير نظلم الرجل من قولة تيت..
نشوف فايلاتو فى الاول ونشوف "امانته"
وبعد داك نحكم
اعتقد كلمة """بكون""""
فى جملتك
| Quote: بكون لهط وتشبع باموال الشعب |
معناها احتمالى حسب معطيات معينة لديك
شكرا على المرور
الاخ علاءالدين
شكرا على المعلومات عن الرجل وزى ماقالو اخوانا
المية تكذب الغطاس
الاخ العوض
| Quote: الا انني كنت اتمني واليا جديدا ,,, |
شيوعى ملحد او جمهورى مرتد او مسيحى لكن زول نضيف وكفء كيف؟
شكرا على المرور والتعليق
الاخ وجدى
الحمدلله الوالى الفاتى مافى اى زول كتب لينا شيك ضمان
كان فلس وبيتو انخرب
شكرا على المرور الكريم
الاخ حامد
الوالى جديد عندو خيارات قليلة
منها يكش الفات كلو بمكشاشة سعف
او يغوص مع الغائصين
الاخ عبدالكريم
النفرة الزراعية حتكون خضراء
بلون الدولار
شكرا ليك
|
Post: #21
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: النصرى أمين
Date: 05-08-2009, 04:36 PM
Parent: #19
الاخ تبلدينا
كدى نديها صنة
ونسمع شكاوى (لو فى) اهلنا فى القضارف
نعم ما عندنا الصلاحية فى التعيين والفصل
ولكن عندنا المقدرة على الحكم على اداء
الموظف الحكومى ..
لو الوالى الجديد مارس الفساد والمحسوبية فى
مزرعة صغيرونة بتاعت سمسم فى القضارف فلن
يتورع فى بلع الملايين من خير الخرطوم الماعنده
نهاية
كدى ننتظر نتيجة التمحيص فى ال references
بتاعنو
يا محمد نور رائك شنو؟
|
Post: #22
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: النصرى أمين
Date: 05-08-2009, 04:41 PM
Parent: #21
الاخ يوسف
قلت اهم جملة فى البوست ده
انا شخصيا ترددت فى كتابتها
هل الوالى الجديد من ابناء الولاية؟
هل لديه محنة ورحمة بيها..
الوالى الفات كتير من الناس بيظنوا
انو جاء غزوة وحيرجع بعدها بالغنائم
من الافضل لعمداء المدن ان يكونو من ابنائها
مثال
مزمل غندور
مهدى ابراهيم الهادى
وغيرهم من ابناء الخرطوم
|
Post: #23
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: النصرى أمين
Date: 05-08-2009, 04:46 PM
Parent: #22
ما فطينا زول؟
اوكى
نرجع لتسلسل الخيط
ونتكلم مع روحنا
|
Post: #24
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: الحاج حمد الحاج
Date: 05-08-2009, 06:36 PM
Parent: #23
الخرطوم تحتاج لوالي ذو أفق واسع يعمل بأمانة و يحدد أولوياته و يركز على تحسين عاجل للبنية التحتية خاصة في مجال الصرف الصحي ، أحبذه من ابناء الخرطوم ليكون مدرك تماما لمشاكل الخرطوم…..تمنياتي للوالي الجديد التوفيق في مهمته.
|
Post: #25
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: النصرى أمين
Date: 05-08-2009, 07:39 PM
Parent: #24
فيا دكتور
انا وكثير من مواطنى ولاية الخرطوم
نظن(وبعضه اثم) ان كل الانقاذييين حرامية ولصوص..
ولتحليل عمليات السرقةوتطمين الضمير واشباع الوازع الدينى يردد هؤلاء
اللصوص "المؤمن القوى خير من المؤمن الضعيف"
ونوع اخر من هؤلاء اللصوص لا عنده ضمير ولا دين ولا وازع اخلاقى
مع انهم يتقدمون صفوف الصلاة
ونوع ثالث
يطمن روحه ويقول ليها :البلد كلها بتسرق
بقت على انا
ونوع رابع
داير المليون دولار الاول وناوى يتوب
ونوع خامس
يقول لروحه السرقة حرام ولكن التصاديق مافيها حاجة
ونوع سادس وسابع وعاشر والف و ..و...
|
Post: #26
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: ابو عثمان
Date: 05-08-2009, 07:48 PM
Parent: #25
اذا كان نظيفا"
فليقم بمراجعة المفاسد التي ارتكبها الوالي السابق !!
أي يصحح الماضي لينصلح حاضر الولاية ومستقبلها!
|
Post: #27
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: النصرى أمين
Date: 05-08-2009, 07:51 PM
Parent: #25
قد تكون نضيف يا دكتور
وما بتسرق
وما بتنهب
وما بتعين اولاد اهلك واصحابك على راس المشاريع
وما بتعرف المحسوبية والواسطة
قد تكون كذلك واكتر
ولكن لتغيير مفاهيم ثابتة وراسخة فى عقولنا(انا وبعض المواطنين)
مثل "ان كل الانقاذيين لصوص"
تحتاج لشفافية وصدق و تجرد يعايشها ويشعر بها كل سكان الولاية
ستات الشاى
واصحاب الدكاكين والمحلات التجارية
وسكان الاحياء الفقيرة والغنيه
والمشردين
واصحاب الاحتياجات الخاصة
تحتاج ان يشعر كل سكان الولاية ان للوالى الجديده
بطانة واحدة يسعى لرضائها و قبولها
هذه البطانه
هم سكان هذه الولاية انفسهم
|
Post: #28
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: النصرى أمين
Date: 05-08-2009, 09:48 PM
Parent: #27
الاخ الحاج حمد
كلو بتلحق وبتصلح..
بس يكون مافى فساد و وسخ...
يكفينا (فى ظروف الانهيار الاخلاقى الحاصل ده) يكفينا
فقط زول ما بسرق وما بساعد على السرقة ولا يحمى السارقين
وكده على الاقل بنضمن الامور ما حتمشى الى اسوأ
ممكن الحالة تقيف فى محلها..مافى مانع ..
بس اوع من الرجوع للخلف
زى ما هو حاصل فى سلوكيات الجمهور السودانى..
الاخ ابوعثمان
لو جابو عباقرة الامم المتحدة مابقدرو يصلحو فساد الوالى السابق...
يازول انسى ...
خليهو يمشى ,,,
ان شاء الله تنفعو القروش دى فى حياته واخرته
|
Post: #29
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: النصرى أمين
Date: 05-09-2009, 02:16 AM
Parent: #28
اها..
يا سعادة الوالى الجديد ... فى حاجة مهمة جدا..
الوالى السبقك بالرغم من الشهادات الجامعية
المشرفة والسيرة الذاتية المدنكلة الا انو وللاسف الشديد
لم يسمع بحاجة اسمها Conflict of interest
احتمال يكون ما درسوها ليهو فى الجامعة
واحتمال بعرفها لكن ما مقتنع بيها..
واحتمال يكون بيظن انها من عمل الصهاينة وتوابعهم
من الملحدين وعبده الاوثان ..
المهم فى الاخر ..انو ما شغال بيها .....
يعنى معقول يا دكتور..... الواحد يكون مسئول
من قسم ادارة اللقيمات والزلابية فى الولاية وفى
نفس الوقت يكون بيملك اكبر صاج لبيع اللقيمات والزلابية
فى المدينة..
معقولة بس !!!؟؟؟
فمن حسى كلمنا ..
ناوى ترمى لقيمات ولا لا ؟
اذا ناوى ...الله معاك ..وربنا يفتح عليك ولينا العوض
واذا ماناوى وعندك صاج
بيعو
او كلمنا بيهو من حسى
عشان نبدا نحسبو ضمن الحساب
|
Post: #30
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: يوسف الولى
Date: 05-09-2009, 02:30 AM
Quote: ولكن لتغيير مفاهيم ثابتة وراسخة فى عقولنا(انا وبعض المواطنين)
مثل "ان كل الانقاذيين لصوص" |
بعض دى شويه جدا
ارجو استبدالها ب... معظم او الغالبيه العظمى
ولو قلت ( كل ) ما بتكون بالغته
لك الله يا بلد
|
Post: #31
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: الفاتح يسن
Date: 05-09-2009, 05:03 AM
Parent: #30
النصري أخوي يمتلك مزعة جوافه وده زمن التخصص وكمان على جهة السد ومحلات صرافة والمال والبنون زينة الحياة وكمان شركة نظافة في دي حينافسك مافي طريقة ليك هناك والنظافة من الايمان بعدما طلعوا ايمانا
|
Post: #32
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: النصرى أمين
Date: 05-09-2009, 05:08 AM
Parent: #30
الاخ يوسف الولى
هؤلاء الرجال هم المجاهدون
الذين يسعون لاعلاء كلمة لا اله الا الله
هم رجالات الثورة الاسلامية
واعضاء الحركة الاسلامية (المستفة قروش)
وعندما نخاطبهم لا نقول لهم ان كل الشعب يعتبركم لصوص
و لا حتى نقول لهم ان معظم ابناء الوطن مؤقن انكم حرامية..
فقط نقول ان بعض المواطنين( ومنهم انا وانت )
يظن ..(مرة اخرى ..ان بعض الظن اثم)
ان كل رجالات الانقاذ لصوص وحرامية
|
Post: #33
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: النصرى أمين
Date: 05-09-2009, 05:20 AM
Parent: #32
يا الفاتح
الفات كلو حنخلى ورانا
ونبدا من جديد..
الزول استلم الوظيفة وهم مرتاح ماليا
مافى غضاضة فى ذلك...
المشكلة انو بعد 5 سنين
يكون راسمالو بدل ال 5 مليون دولار
500 مليون دولار ..
وليس هناك اى تفسير منطقى لهذه القفزة المليونية...
الخوف كل الخوف انو يلخبط اعماله التجاريه الخاصة
مع وظيفته كوالى للولاية...
يعنى لو عرفنا انو شركة النضافة الزكرتها دى وقع ليها
عطاء يتبع لولاية الخرطوم حنتاكد انو الزول منتهى
وقصته بايظة
ولا يختلف عن الزول القبلو
***
جايينكم يوم الاحد
جهزو شعوركم
|
Post: #34
Title: Re: يا والى الخرطوم الجديد : ورينا من حسى بتمتلك شنو وشركاتك كم!
Author: النصرى أمين
Date: 05-09-2009, 05:54 PM
Parent: #33
طبعا يا سعادة الدكتور ما حنقدر نطلب
منك محاسبة الفاسدين وبطانتهم فى الولاية..
فهم محمييين بنفس الجهات التى تحميك انت ..
ولكن ..يمكننا ان نسالك ...بحياء وخجل..ان
تعمل على خلق جهاز ادارى صحى ..
رشيق
خفيف الحركة..
فعال ومنتج..
والغاء كل الوظائف الصورية غير المنتجة..
لن نطلب منك يا سعادة الدكتور ان تبنى لنا
مصارف صحية مثل تلك التى نراها فى كل عواصم
العالم..فهذا ضرب من المستحيل ..ولكن نطلب
منك ان تكون واقعيا ومنطقيا عندما تخطط وتستعد
لفصل الخريف...
لن نطلب منك يا سعادة الفريق ان تبنى لنا شبكة
مواصلات حديثة من بصات و قطارات المترو ولكن نطلب
منك ..ايضا بخجل وحياء...ان تعمل على وضع خطة منطقية
ممنهجة لمعالجة هذه المشكلة العويصة ...
|
|