Post: #1
Title: مساعدة يا ناس المطبخ والطبيخ و الصناعات الغذائية !
Author: النصرى أمين
Date: 03-24-2009, 06:56 AM
Parent: #0
ماهى التركيبة الصحيحة 100% لصناعة سجق سودانى 100%؟
اعرف ان "جوز الطيب" احد البرهارات الاساسية فى الخلطه
لكن لا اعرف بقية البهارات ...
الرجاء المساعدة والشكر مقدم
|
Post: #2
Title: Re: مساعدة يا ناس المطبخ والطبيخ و الصناعات الغذائية !
Author: Hassan Makkawi
Date: 03-24-2009, 07:29 AM
Parent: #1
Quote: اعرف ان "جوز الطيب" احد البرهارات الاساسية فى الخلطه
|
الباقى :
فلفل أسود
ملح
ثوم
ورسلينا شوية عشان نحكم...وكدة
|
Post: #3
Title: Re: مساعدة يا ناس المطبخ والطبيخ و الصناعات الغذائية !
Author: محمد الأمين موسى
Date: 03-24-2009, 07:33 AM
Parent: #2
يا النصري يا أخوي خليك والسجوك والجقاجق... خليك مع وصفة الآبري:
تبلو
وتموصو
وتشرب مويتو!
|
Post: #4
Title: Re: مساعدة يا ناس المطبخ والطبيخ و الصناعات الغذائية !
Author: النصرى أمين
Date: 03-24-2009, 05:53 PM
Parent: #3
الاخ حسن مكاوى
ياريت ياريت (زى ما بقول ترباس)
ياريت لو الشغلانه بالبساطة دى ..
ولتساوى سجقنا القومى بالمصرى واللبنانى والاغريقى
والامريكى ...
هناك سر معين فى تركيبة السجق السودانى لم استطع انا واحد
الاصدقاء كشف كنهه ..
جرب (وانا المستشار بتاعو) لحمة حمراء 100% مانفع
نقص اللحمه الحمراء وزاد كمية الشحم برضو ما نفع
استخدم كل انواع البهارات وبرضو الشغلانه ما ظبطت
ما عارف المشكلة وين!!
امكن المشكلة فى اليد ..
شتراء
على كل ..
ادينا عنوان وحيرسل او انتاج للتصدير
|
Post: #5
Title: Re: مساعدة يا ناس المطبخ والطبيخ و الصناعات الغذائية !
Author: النصرى أمين
Date: 03-24-2009, 05:57 PM
Parent: #4
سلام يا محمد الامين
ياخ وصفة الابرى دى
الببلوه ويموصوه ويشربوه
بقت مكشوفة
العالم كلو سمع بيها
احنا دايرين الوصفات السريه السودانيه البتشبه
وصفة kfc التى لا يعرف احد تفاصيلها وتتم
حراستها بقوات خاصه فى احد الخذانات الامريكيه
كيف الامور ماشة؟
|
Post: #6
Title: Re: مساعدة يا ناس المطبخ والطبيخ و الصناعات الغذائية !
Author: النصرى أمين
Date: 03-24-2009, 06:02 PM
Parent: #5
ولفاعلى الخير الذين يودون مساعدتى فى محنتى
يمكنهم ارسال الوصفه ال recipe على عنوانى
البريدى وساقوم بحذف الرسالة فور استلامها تحوطا
من السرقات الاسفيريه السجقيه
[email protected]
وكتشجيع ساقوم باضافته(ها) فى قائمة الاصدقاء فى الفيس بووك(وجه ماكر)
|
Post: #7
Title: Re: مساعدة يا ناس المطبخ والطبيخ و الصناعات الغذائية !
Author: أحمد الشايقي
Date: 03-24-2009, 06:05 PM
Parent: #5
النصري
مكونات السجوك
لحمة مفرومـة عجالي أفضل حاجة,
من عجول صغيرة,
يحتوي على نسبة شحـم
بهارات قياسية
حلوة قياسية دي , (فلفل , كسبرة والهبهان المطحون والقرفة المطحونة, توم)
يفرم مع بعض,
ثم يضاف للمادة الحاوية (مصارين),
وبالهنا,
أحمـد الشايقي
|
Post: #8
Title: Re: مساعدة يا ناس المطبخ والطبيخ و الصناعات الغذائية !
Author: النصرى أمين
Date: 03-24-2009, 06:13 PM
Parent: #7
سلام يا احمد
كيفك؟
جربنا الحاجات دى كلها
مرة يطلع لينا سجق مصرى
ومرة شامى
ومرة ما معروف اصله
بعدين المشكلة انو مرات كتيرة بطلع فيهو مرارة كده
ومرات يبقى زى طعم "الكفته" البائسه
كدى نمشى خطوة لقدام
نفترض عندنا كيلو لحمة عجالى حمراء
وكيلو شحم ابيض
ومعلقة شاى صغيرة للتعبئه
وكل البهارات
كدى حاول ادينى ارقام
احتمال المشكلة تكون فى النسب
|
Post: #10
Title: Re: مساعدة يا ناس المطبخ والطبيخ و الصناعات الغذائية !
Author: النصرى أمين
Date: 03-24-2009, 06:18 PM
اجمل واطعم سجق سودانى يوجد فى مدينه الدوحة القطريه
تعمله احدى السيدات السودانيات الفاضلات وتبيعه للمعارف
والاصدقاء
جربته بالصدفه اثناء زيارتى لقطر سنة 2005
وتقريبا التهمت كل الكميات الموجودة فى الطربيزة(بدون رغيف)
|
Post: #9
Title: Re: مساعدة يا ناس المطبخ والطبيخ و الصناعات الغذائية !
Author: smart_ana2001
Date: 03-24-2009, 06:16 PM
Parent: #5
اها......اخيرا زول سالنى فى الموضوع ده......
سلامات النصرى امين...
طيب...اهم حاجه انك ما تعمل لحم 100 %...لانه ح يطلع السجك قوى...انا بعمل بلحم 70 % او اقل و بيطلع هش و ذى سجك السودان.
ما تسمع كلام الناس اللى بيقولوا يعملوا معاه بطاطس و ما عرفه شنو ....الحشوه لحم بس.
ما تشترى جوز الطيب من دكاكين العرب (بيكون قديم). اشترى جوز طيب سالم من محلات الاكل العاديه(غالى شويه...لكن كله يهون عشان السجق). و بعدين ابرده بالحاجه دى فى اللحمة طازج...
مع جوز الطيب ممكن تضيف شويه ملح و شويه فلفل و شويه قرفه و هبهان مسحونات.
بس.
و اكيد ح تظبط
_______________________________________________________________
فى السودان فى ناس بيعملوا حته من ضنب الخروف فى اللحمه ..انا شخصيا ما بحب النكه دى
|
Post: #11
Title: Re: مساعدة يا ناس المطبخ والطبيخ و الصناعات الغذائية !
Author: النصرى أمين
Date: 03-24-2009, 06:24 PM
Parent: #9
يا سلام عليك اسمارت انا
فعلا احتمال تكون المشكلة فى جوز الطيب
لانو بصراحة العرب ديل ممكن يبيعو لينا اى شئ ..
حتى لو معتت ..
جوز الطيب اسمو شنو بالانجليزى؟
|
Post: #12
Title: Re: مساعدة يا ناس المطبخ والطبيخ و الصناعات الغذائية !
Author: النصرى أمين
Date: 03-24-2009, 06:28 PM
Parent: #11
| Quote: اها......اخيرا زول سالنى فى الموضوع ده...... |
زكرتينى الحلقة بتاعت ساينفيلد لمن جورج استعمل كلمة غريبه فى
الحوار ..قام جيرى قال ليهو "ليك كم منتظر عشان تدخل الكلمة فى
الحوار"
|
Post: #13
Title: Re: مساعدة يا ناس المطبخ والطبيخ و الصناعات الغذائية !
Author: smart_ana2001
Date: 03-24-2009, 06:30 PM
Parent: #9
Quote: بعدين المشكلة انو مرات كتيرة بطلع فيهو مرارة كده
ومرات يبقى زى طعم "الكفته" البائسه |
المراره غلبا من انك ختيت بهارات كتيره. (خاصة جوز الطيب)
و الكفته البائسه من طريقه النجاض.
لما تجى تنجضوا جيب طوه كبيره بغطا. مصمص السجك بسويه مويه و ختو فى نار هادئة مغطى كويس و ما تضيف اى حاجه (لا ماء و لا حتى زيت) ..لما ينجض. ارفع النار و افتح الغطاء عشان يحمر سريع ..لو ختيته زمن طويل فى النار العاليه ح ينشف.النار اللى فى النهايه عشان اللون بس. و من جوه ح يكون طرى.
_____________________________________________________________________________________________________________
اظن انك فى كندا ...صح ؟؟؟عشان كده ساهل جدا تلقى اللحم اللى فيه 30 % شحم ده . من غير ما تشترى لحم براه و شحم براه
|
Post: #14
Title: Re: مساعدة يا ناس المطبخ والطبيخ و الصناعات الغذائية !
Author: النصرى أمين
Date: 03-24-2009, 06:36 PM
Parent: #13
يا اسمارت
انا كنت فاكر انو ممكن نستخدم البابريكا عشان تدى
اللون الاحمر(او الفاقع)
|
Post: #15
Title: Re: مساعدة يا ناس المطبخ والطبيخ و الصناعات الغذائية !
Author: smart_ana2001
Date: 03-24-2009, 06:37 PM
Parent: #13
سلامات النصرى أمين ..تانى
مالك جايب سيره ساينفيلد و عاوز تزعلنى منك ؟؟؟؟*
جوز الطيب اسمه بالانجليزى nutmeg و اللى فى الصوره دى من احسن ماركات البهارت لو عاوز تشتريه مسحون جاهز (انا بعمل كده)
______________________________________________________________
* متزكر البوست اللى فتحته انت عن ساينفيلد و بعد كده ما هبتتنا فيه؟..انا بصراحة زعلت جدا
|
Post: #16
Title: Re: مساعدة يا ناس المطبخ والطبيخ و الصناعات الغذائية !
Author: smart_ana2001
Date: 03-24-2009, 06:43 PM
Parent: #15
Quote: يا اسمارت
انا كنت فاكر انو ممكن نستخدم البابريكا عشان تدى
اللون الاحمر(او الفاقع) |
ما تخت اى شى تانى ..حتى ثوم ما تخته..اهم حاجه الموضوع يكون بسيط.
بعدين انت اللون عاوز بيه شنو ؟؟؟ على قول المصريين (اكل و بحلقة)
_______________________________________________________________
ما نسى لما ترفع النار فى النهايه قلبوا عشان ما يحرق ليك فى الطوة
|
Post: #17
Title: Re: مساعدة يا ناس المطبخ والطبيخ و الصناعات الغذائية !
Author: النصرى أمين
Date: 03-24-2009, 06:45 PM
Parent: #15
كيف ما متزكر؟
نفسيات ساى
احتمال الزول كان مرفود من الشغل الايامات ديك
ولا مفلس
ولا شئ من هذا القبيل
المهم البوست ده فى قمة الخطوره لانو يكشف احد اكبر
اسرار المطبخ السودانى و قلعته المنيعه والذى ظل بعيدا
عن اعين المتربصين والباحثين عن ثرواتنا القومية الاثرية
كاننا اليوم امطنا اللثام عن وجه احد ملوكنا القدماء
بعانخى واخوته الابطال
اليوم اترفعت الستارة عن اخر اسرار وخفايا المطبخ السودانى
ولم يبقى غير كيف توصل السودانيين لمعرفة زراعة الابرى ودسه تحت
السراير والعناقريب
|
Post: #18
Title: Re: مساعدة يا ناس المطبخ والطبيخ و الصناعات الغذائية !
Author: munswor almophtah
Date: 03-24-2009, 06:50 PM
Parent: #17
ياخ جاهز فى محلات شقنابى 17 مع 39 جمب تيم هورتون وبالكيلو
ولو داير بالملوه بدوك بعدين إنت خلاص كملت أكل سلطة الأسود
وقبلت على السجوك يا كافى البلى الله يحفظ السجوك منك
والسلام لكم جميعا ولعلماء سلطة الأسود
منصور
|
Post: #19
Title: Re: مساعدة يا ناس المطبخ والطبيخ و الصناعات الغذائية !
Author: smart_ana2001
Date: 03-24-2009, 06:50 PM
Parent: #17
مبروك عليك السجق..
و انا عافياك من اضافه الفيس بوك...بس اكون طالباك خدمه...و ح اطلبها منك لما احتاجها..بس ما لما يجى الزمن داك تنسى!!!!!
|
Post: #61
Title: Re: مساعدة يا ناس المطبخ والطبيخ و الصناعات الغذائية !
Author: صالح عبده
Date: 04-02-2009, 06:47 AM
Parent: #4
انا من رأيي انك تغير من السجك
للقراصة بالدمعة
|
Post: #20
Title: سجق
Author: lana mahdi
Date: 03-24-2009, 07:06 PM
Parent: #1
أهم شيء البطاطس المسلوقة مع دهن خروف عشان ما يطلع السجق دهين يتم خلطهم مع اللحمة والذرورد وباقي ابهارات طبعاً
|
Post: #21
Title: ..
Author: مريم بنت الحسين
Date: 03-24-2009, 07:53 PM
Parent: #1
عقدوتنا يا اخوانا.. انا عندي بطبخ بشهادة.. لكن عندي كم عنكبه كده، كان ما حليتهم ما بعترف لي روحي بإني بعرف ادخل مطبخ زاتو
سمارت.. ما عرفتك وانت خبيرة سجك
|
Post: #22
Title: Re: ..
Author: النصرى أمين
Date: 03-24-2009, 08:09 PM
Parent: #21
منصور يا صديق
لماذا لا تحدث قراء المنبر عن امكانياتى التذوقيه
وكيف تستعين بى كثير من اخواتى فى المدينة لتقييم
جودة وطعومة ماكولاتهم ...حيث عرف عنى عدم المجاملة
والتقييم بصوره علمية حرفية مهنية صارمة ...
اما سلطة الاسود فهى الاستاندر والمقياس لبداية سلم
التفوق ..
يجب ان تحرز المتقدمة درجه 7 من عشرة للتاهل للمرحلة
الثانية ...
حتى هذه اللحظة لم يتحصل اى متقدم لدرجة 2/1 8 من عشرة...
افضلهم يادوب تمانية من عشرة
اما محل شقنابى فهو منتهى ..راقد رز
لا يستحق دولار للكيلو
|
Post: #23
Title: Re: ..
Author: smart_ana2001
Date: 03-24-2009, 08:17 PM
Parent: #21
الغاليه مريم بنت الحسين..مشتاقون مشتاقون مشتاقون (على راى نزار قبانى فى "بلقيس")
خبيرة سجك عدييل كده؟؟؟ تسلمى يا مريم يا اختى
انا عندى اهتمامات بسيطه جدا جدا (خلاف البيت و الاولاد و كده.....يعنى حجات بعملها لروحى انا..عشان استمتع). و الاكل واحده منها*
قلت الاكل و ما قلت الطبيخ...لانى بحب الاكل ...و بحب اطبخ لانى بحب اكل....و ما بكون مستمتعه بفعل الطبيخ ذاتو ....بكون مستمتعه و انا بعمل فى البحث عن الوصفة و اصلها و ليه بتعملى فيها كده . و تجى مرحلة الطبيخ و بعدها مرحلة الاكل و دى هى الاجمل.
حكايه السجك كانت انو البلد دى ما فيها سجك سودانى....و انا من عشاق السجك.
و لانى ما بعرف (قلة الحيلة)...قررت اعمله براى....و بعد عشرات التلفونات للوالده (ربنا يطرها بالخير)..نجحت الوصفة
__________________________________________________________________________
* باقى الاهتمامات انتى عارفاها:الافلام و المسلسلات & الجرى & العربات
|
Post: #24
Title: Re: ..
Author: smart_ana2001
Date: 03-24-2009, 08:22 PM
Parent: #23
معليش يا سيد البوست على الاحتلال الخاشم
بس عاوزه اقول لمريم انى متاكده انها خطرة جدا فى الطبيخ
و من غير ما اضوق اكلها بقول لمريم :تسلم يدك
|
Post: #70
Title: Re: ..
Author: ASHRAF TAHA
Date: 04-10-2009, 05:02 PM
Parent: #21
بت الحسين
وصفة ملاح الورق عليك دينك
|
Post: #71
Title: Re: ..
Author: ASHRAF TAHA
Date: 04-10-2009, 05:09 PM
Parent: #70
يا حليك يا المحشي
وجه مستفيض
|
Post: #25
Title: الله يطيب خاطرك يا سمارت
Author: مريم بنت الحسين
Date: 03-24-2009, 08:49 PM
Parent: #1
معليش يا سيد البوست.. اصله سمارت دي مما ألم فيها وتلم فيني الونسه بتحلى....
انا زيك برضه... لما ما القى فليم حلو ولا مسلسل حلو.. على طول قنوات الاكل.. بحب أطبخ.. وبحب أجرّب.. فاااالحه في الاكلات الفيها فلهمه .. ويمكن لاني بطبخها بثقة.. لكن الاكلات التقليدية، بخاف من تأثير الطعم المعروف ليها... بحب دايما اضيف لمستي الخاصة.. لكن الاكلات السودانية مافيها تصرّف زي كده... الويطه لازم تكون ليها طعم وقوام معيّن... غايته معاك في كله اهتمامتك دي.. لكن الجري ده ما عارفه احنّس نفسي عليه كيف...
عايزه احيي زوجك يا سمارت ... الواحده ما ممكن تقدر تمارس حاجاتها البتحبها، ما لم يكون وراها راجل يساعدها ولو شويه.. ولا انا غلطانه؟
بنت الحسين
|
Post: #26
Title: Re: الله يطيب خاطرك يا سمارت
Author: smart_ana2001
Date: 03-24-2009, 09:41 PM
Parent: #25
| Quote: عايزه احيي زوجك يا سمارت ... الواحده ما ممكن تقدر تمارس حاجاتها البتحبها، ما لم يكون وراها راجل يساعدها ولو شويه.. ولا انا غلطانه؟ |
ابدا ما غلطانه....عداك الغلط...زوجى( و الحمد لله ) قلائل جدا الرجال اللى ذيه (سودانيين و غير سودانيين). و ما عاوزه اشكره شديد..خاصة انو (مرات ..مرات) بيتاوق على سودانيزاونلاين.
لكن من ناحيه بيساعد ..ما بقدر انكر انه بيساعد
لكن كل اهتماماتى دى على قلبو ذى العسل. هو برضو بيحب الافلام(التلفزيون عموما). و بيحب الاكل و العوازيم....و بيجرى مرثونات (ما قاعد يفوز ...لكن بيعمل ارقام كويسه)و بيرتاح منى كل يوم ساعة كامله لما امشى الجم(خاصة انى لما ارجع البيت بكون زوجه سودانيه درجه اولى ...بحب الدهب و الملايات و العده و بتشاكل فى الرموت كنترول)
اما العربات ما فارقه معاه ..خاصة انى ما بشترى عربات ....بتثقف عن العربات بس....
________________________________________________________________________________
انا ناويه احج السنه الجايه...ان شاء الله العلى القدير اقدر الاقيك
++++++++++++++++++++++++++++++++++++++++++++++++++++++++++++++++++++++++++++++++++++++=
دى وصفة شوربه لذيذه خالص...المشكله الوحيده انها لازم تتقدم من الحله للصحون على طول. ذيدى و نقصى ذى ما عاوزه..انا كل مره بعملها بطريقه مختلفة
GREEK LEMON-RICE SOUP
3 c. chicken broth
2 to 3 oz. uncooked regular rice
2 eggs
3 tbsp. lemon juice
Dash of salt
Dash of white pepper
In 2-quart saucepan, bring broth to a boil. Reduce heat, add rice, cover and simmer until rice is tender, about 20 minutes. In small bowl, beat eggs and lemon juice. Stirring constantly, add 1 cup of hot soup, a little at a time. Stir mixture into soup in pan and heat. Do not boil! Season with salt and pepper. Serve immediately. Serves 4.
NOTE: 2 oz. rice makes thinner soup; 3 oz. rice makes thick soup. Weight instead of measurement gives the option of using medium grain rice.
|
Post: #27
Title: Re: الله يطيب خاطرك يا سمارت
Author: النصرى أمين
Date: 03-25-2009, 04:28 PM
Parent: #26
الشقيقات "الصغيرات"
سمارت
ومريم
ولنا
سعيد جدا بطلتكم الكريمه
والبوست حقكم
والفوره الف
سؤال للنا
| Quote: أهم شيء البطاطس المسلوقة مع دهن خروف |
الحاجات دى تتخلط مع اللحمة المفرومة للسجق؟
لانو يفترض انو اللحمة عجالى ولمن نخلطها مع ضان
شوية كده ما طبيعية(على الاقل بالنسبة لى)
واذا كانت الخلطة اساسا مع الضان فتبقى غير اقتصاديه
لانو الضان غالى .. وبلدنا دى اكبر منتج للعجالى فى العالم
برضو ما عرفت ال الذرورد ده شنو!!
غايتو اسمو كده مجوهرات مجوهرات ..وشكلو غالى من اسمو ده ..لول
|
Post: #28
Title: Re: الله يطيب خاطرك يا سمارت
Author: النصرى أمين
Date: 03-25-2009, 04:30 PM
Parent: #27
الزول شوية يرتاح من السياسة
القشير سافر
والقشير رجع
تطير عيشته القشير
|
Post: #29
Title: Re: الله يطيب خاطرك يا سمارت
Author: smart_ana2001
Date: 03-25-2009, 06:57 PM
Parent: #28
| Quote: برضو ما عرفت ال الذرورد ده شنو!! |
سلامات تانى...
انا ما متاكده من الاسم ..لكن اظنه "ذو الورد" ..و ده بهار بيستعمل فى الخبيز ..تحديدا الكعك. احتمال يكون عندو استعملات اخرى... ..لكن باين انها خارج نطاق معرفتى المتواضعه (الابرى ..احتمال).
لكن ابدا ما سمعت بزول بيختو فى شجك...لكن لنا دى شكلها خبيره ..عشان كده انا ما بغالط.
____________________________________________________________
و ما تسالنى اسمو شنو بالنجليزى ...اصلا انااسمه بالعربى ما ما متاكده منه
|
Post: #30
Title: Re: الله يطيب خاطرك يا سمارت
Author: صديق الموج
Date: 03-25-2009, 07:01 PM
Parent: #29
النصرى يا اخوى المشكله فى نوع اللحم..
باقى المرعى حقنا طيب ومافى علف صناعى
فهمت؟؟؟
انت البيض ده مالو لومو لى
اسلقو وقشرو واشرب مويتو،،،
|
Post: #31
Title: ...
Author: مريم بنت الحسين
Date: 03-26-2009, 08:38 AM
Parent: #1
سمارت يا رهيبه..
شكلها شوريه "مشبعه".. وفي نفس الوقت ما كعبه زي شورباتي اللزيزه الcreamy..
لكن انا عايزاك توريني كيف بتقضي ساعه يومياً في الجيم... انا مشتريه كل شي هنا في البيت... الجيم موجود جنبي.. لكن البحركني انا عشان اتريض شنو.. ما عندك tips .. أو ideas... احنا ما شفنا اهلنا بتريضوا.. رغم انا في طفولتي كنت رياضية... ولياقتي ممتازه.. لكن محتاج اعمل رياضة cardio يومياً عشان عندنا تاريخ بتاع امراض قلب وضغط في العائلة.. عايزه اتفادى الموضوع قبل ما يبقى...
النصري معليش خربته ليك السجق.. لو عايز نقول لسمارت تتفتح لينا بوست عن موضوعي الجديد ده، ونرحل من هنا...
بنت الحسين
|
Post: #32
Title: Re: ...
Author: النصرى أمين
Date: 03-26-2009, 04:48 PM
Parent: #31
سلام يا موج
هل تصدق انو انا محارب الضان لى اكثر من 15 سنه
ورجعت ليهو من كم شهر كده
وسبب الحرابة ..الزفارة وريحة غريبة (فى الخروف الكندى)
سالت الناس عن سر هذه الرائحة
قالو لى بسبب العلف والنظام الغذائئ وان البهائم فى كندا
تاكل بعضها البعض (كر) ..بمعنى انو بقايا السلخانات يتم فرمها
واضافتها للعلف لزيادة البروتين ...
من سمعت الكلام ده نطتت عيونى ..
لكن والحمدلله النظام اتغير بعد كوارث مرض جنون البقر واصبحت
البهائم تاكل اعلاف خالية من "الدموم والكوارع والجلافيط"
اعترف لك ...بالرغم محاربتى ليهو سنين طويلة الا اننى كنت بضربه لو انا
جعان مهوى... ولا بتوقفنى ريحه ولا زفارة
الصديق وعضو المنبر دكتور بيطرى طلعت الطيب قام بتفسير
الظاهرة من ناحية علمية وقال لى ان سبب الرائحة يعود الى
انزيمات داخل جسم البهيمة وانها العامل الرئيسى وراء الرائحه
فهمت من كلامى انو الخروف لو اكل ايسكريم بالشكولاته والنعناع برضو
حيكون زفر
كان طار
كان وقع
زفر زفر
لكن برضو بناكلو لو مهووووووووووييييين شديد
|
Post: #33
Title: Re: ...
Author: النصرى أمين
Date: 03-26-2009, 04:55 PM
Parent: #32
يا مريم يا بت الدكتور احمد الحسين
عليك الله اخدتى راحتك..
وكلها يومين البوست يتارشف
لكن لو لقيت تشجيع بطلب من بكرى يخليهو للدوره الجديده
بالنسبة للجيم
انا زاتى عندك قصص معاهو...
بس اقول السر الاكبر الذى يجهل معظم الناس ...
وهو .....
لازم يكون معاك iPod ولا mp3 به مواد صوتيه تخلى الزول
يسرح اثناء الرياضه ...
لانو السرحان بخلى الزول ينسى الارهاق والملل ومراقبة الساعة
التى تتحرك ببطء غياظ
بدون ذلك
انسى ..
حدى معاهو خمس دقائق لاتزيد
بزهق وافتر
واتخارج
|
Post: #34
Title: Re: ...
Author: Muna Khugali
Date: 03-26-2009, 07:01 PM
Parent: #33
سلام يالنصري..
أهم حاجه في البهارات تضيف الهبهان..
وبعدين ممكن لو تحب تضيف للخلطه صنوبر..
|
Post: #35
Title: Re: ...
Author: smart_ana2001
Date: 03-26-2009, 09:25 PM
Parent: #34
عارفه يا مريم كلام النصرى صحيح100%....لازماك موسيقى (صاخبة).
انا برضوا بديت بانى جبت elliptical trainer و فرى ويت فى البيت....و (ما شاء الله) لموا كميه من التراب...واحده صحبتى نصحتنى بالجرى فى الشارع....و بديت بالمشى و بعد كده شويه شويه بديت اجرى( شويه شويه دى اختصار لشهور من التدريب المنتظم...عندى تمارين تنقلك من المشى للجرى...ممكن ارسله ليك لو عاوزه ).
الجرى فى الشارع ...و طبعا بمسيقى ....جميل جدا. بتحسى انك حرة.
المهم الحاصل انو الشتاء عندنا فيه مطر و الشمس بتطلع متاخر وشويه فقررت امشى الجم. و الجميل فى الجم انو الناس الحولك بيشجعوك...كل الناس مجتهده....عشان كده بيدونى دفعه...بعدين بعد 9 ساعات فى الشغل و ساعتين او تلاته فى البيت من عمل عشاء و للتجهيز لليوم التانى....الخروج من البيت من غير ما تقشرى....بتلبسى الهدوم البتريحك و تشيلى الموسيقى اللى بتحبيها و تمرقى و تسيبى كل تعب اليوم وراك....وتاخدى ساعه خارج المعمعة (البيت).
فى الجم ح تملى سريع لو ما عندك موسيقى سريعه. انا عموما بسمع ابو الامين , ام كلثوم, احمد المصظفى, عقد الجلاد.....اغلب موسيقتى كلاسك. لكن للجم عندى اغانى راب, حامد كترينا, سامى المغربى , والست نانسى عجرم و كده....
المختصر المفيد....ما عندى نصائح لرياضه فى البيت...لانى فشلت فشل زريع و الان بفتش لبيعه للعده بتاعتى
|
Post: #36
Title: Re: ...
Author: النصرى أمين
Date: 03-27-2009, 05:24 PM
Parent: #35
الاخت منى خوجلى
تحية طيبة
الهبهان عرفناهو..
لكن الصنوبر ده ما عرفتو "كبهار"
عملت بحث فى قوقل وعرفت انه شجرة ال pine هى الصنوبر..
وهى شجرة "دائمة الخضرة" معمرة يصل عمر الواحدة منها
الى الاف السنين ...
احدى الشجرة اتضح ان عمرها فى عام 2008 حوالى 4840 سنة
وتعتبر اقدم المخلوقات الحية عمرها ...
ايضا توصلت فى البحث القوقلى السريع
ان الصنوبر من اهم الاشجار فى صناعة الخشب وانها تستطيع
النمو بسرعه بعد عملية القطع(مش القطع العشوائئ بتاع السودان)
كماانها تاخذ حيز صغير جدا مقارنة بباقى الاشجار (يعنى عشرة
شجرات فى مترين لانها عمودية وليست مثل النيم التى تحتاج لتلتماية
تمر للشجرة الواحدة)
وجدت الكثير المثير عن هذه الشجرة الاسطورة
لكن لم اجد البهار بتاعها مما دعانى للظن انها ربما تكون فى شكل
اعواد خشبيه مثل Cinnamon
|
Post: #37
Title: Re: ...
Author: smart_ana2001
Date: 03-27-2009, 09:53 PM
Parent: #36
سلامات النصرى...(اظن) ان الصنوبر اللى قاصداه منى هو مكسرات و ليس بهارات.. و اسمها بالانجليزى Pine nut.
بتتلقى فى دكاكين العرب....بيعملوه فى الرز...ما لاحظت ليه فى دكاكين الاكل العادية
|
Post: #38
Title: Re: ...
Author: Muna Khugali
Date: 03-27-2009, 10:13 PM
Parent: #37
سلامات يالنصري ..
فعلا زي ماقالت ليك سمارت أنا عن الصنوبر..والصوره حقته شارحاه تماما وبرضه فيه شبه من لسان العصفور البنعمله مع الشوربه
بس هو أكبر شويه..
ويستخدم في حشوات كثيره من المملحات والحلويات,,وممكن مع خلطة السجق او الحمام المحشي او الخروف المحشي وغيره..
أنا عن نفسي ما بحبه في السجق لكن ناس كتيره بتحبه وتستخدمه..
تحياتي..
|
Post: #39
Title: Re: ...
Author: إسماعيل حميم
Date: 03-27-2009, 11:41 PM
Parent: #38
عم النصري
سلامات يا حبيب
والله الشوق بحر أبوروف (البقى ما عندو رصيف دا)
لي قرابة أربعة شهور من المنبر بعد كل اسبوعين تلاتة بتاوق على عجل
تعرف بي سبب شنو ؟؟
في شان السجك دا!!!
باقي أخوك عمل ليه معمل صغير كدا لإنتاج السجك
بعد 17 سنة عمل في مجال اللحوم
أوعى بكري يجي يدفعني حق الدعاية والإعلان !!!!!!!!!!
أكيد ما في طريقة اديك الوصفة حقتي لكن بحوم ليك حول مشكلتك
مشكلة اللون:
ممكن تحل في حالة عدم التخزين الطويل عن طريق فرم اللحمه وهي شبه جامدة.
طبعاً هناك مادة كيميائية (ليست لون) تضاف في حالة التصنيع للمحافظة علي
لون اللحمه.حتي بعد التجميد لفترات طويله.
البهارات:
جوز الطيب واحد من البهارات المهمة في تصنيع السجوك والفرانكفورتر
والمورتدلات بأنواعها
وكذلك الفلفل الأسود للسجوك وأيضاً يوجد الأبيض والاخضر والأحمر من الفلفل
وكل يستخدم في تصنيع الأنواع المختلفة من اللحوم.
يستخدم كثير من السودانين الكباب الصيني في السجوك وهو حار ونكهته قوية زاكية
( مأخذي عليه به شئ من المرار في الطعم)
وتكون الإستعاضة عنه بخلط جوز الطيب مع الفلفل حيث اللذعة الحاره والنكهة
القوية الزاكية
وهناك بهارات أخرى ( كسبرة – قرفه – حبهان/ هيل)
لابد من إضافة النشا للحمه عند تصنيع السجوك وأهميته يجعل السجوك:
ناعم
عصيري عند المضغ
يحفظ شكل عند التحمير ربط اللحمه مع بعضها
الأنواع المستخدمة:
البطاطس
القرقوش
الفول المصري (دراسة مركز الابحاث كوكو)
الكبكبية (دراسة في مركز الابحاث كوكو)
اما الافضل فهو:
فول الصويا الطبيعي حبيبات والافضلية لإرتفاع نسبة البروتين النباتي
فيه حيث تتراوح بين 60 – 70%
كدا ما كفاك في الحلقة دي
مرفق:
كل الود
إسماعيل حميم
.
|
Post: #40
Title: Re: ...
Author: النصرى أمين
Date: 03-29-2009, 03:39 PM
Parent: #39
يا ســــلام
حميم شخصيأ
وكمان بكامل عدته وعتادو
عندما قمت باختيار البوست وضعت كلمتى "الصناعات الغذائية" فى العنوان
بغرض ان اسمع النصح و الشورة من اصحاب الصنعة الذين يسترزقون من صناعة
السجك ....
طبعا ده لا يتناقض مع الناس اليدها طاعمة وتهوى وتجيد عمل السجق فى البيت
زى الاخوات اسمارت ولنا ومريم ومنى ..
ولكن دائما يطل السؤال الابدى
اكل البيت؟
ولا
ولا اكل برة؟
اكل البيت فيهو "اللمسة" او ال touch والمزاج والابداع
واكل برة تحكمه نظرية البقاء وضرورة الجوده للمنافسة والمنهجية
والتجارب المتعددة للوصول للمنتج المثالى ...
انا شخصيا مع الخيار الثانى ..
فبين البيتزا المعمولة فى البيت والمعمولة فى الخارج
اقف مع الخارجيه ...
وغدوة فى البيت او فى "الشارع"!!
الاجابة ...
فى الشارع وبمزاج ..
لماذا نسمى تناول الطعام خارج المنزل ب "اكل الشوارع؟
وكانه نبز !
احد الاصدقاء لا ياكل ابدا "اكل الشوارع"
ويردد دائما
"""جنى وجن اكل الشوارع"
بالنسبة لى ..
ما عارف السر وراء الهيام ب "اكل الشوارع" ده شنو !!
كنت وابن اختى طارق..ولم نكن نتجاوز طاشر سنة... نستمتع بالذهاب الى فوال المدينة
بسوق امدرمان و"ضرب" الفول بالزيت" وبدون ملح "ربما كان هذا سبب عدم
اضافتى للملح فى الفول حتى صباح هذا اليوم ..
نفس الفول لو تم صنعه فى البيت لما استمتعت به بنفس الدرجه
يا حميم جاييييييك بمزاج وبمداخلة منفصلة لان فى حديثك
المثير الخطر
|
Post: #41
Title: Re: ...
Author: إسماعيل حميم
Date: 03-29-2009, 11:05 PM
Parent: #40
Quote: يا ســــلام
حميم شخصيأ
وكمان بكامل عدته وعتادو |
سلامات يا دفعة زي ما كنت سبب دخولي زماااااان الليلة رجعني سجوكك دا . . Quote: يا حميم جاييييييك بمزاج وبمداخلة منفصلة لان فى حديثك
المثير الخطر |
في إنتظارك لنواصل ما تعوّق كل الود إسماعيل حميم .
|
Post: #42
Title: Re: ...
Author: النصرى أمين
Date: 03-30-2009, 01:48 AM
Parent: #39
سلام يا اسماعين
اتخيل لى مربط الفرس فى الجملة دى
Quote: لابد من إضافة النشا للحمه عند تصنيع السجوك وأهميته يجعل السجوك:
ناعم
عصيري عند المضغ
يحفظ شكل عند التحمير ربط اللحمه مع بعضها
|
النشا
دى بالضبط العنصر البتميز بيهو السجق السودانى
لان كل بهارات الدنيا لن تجعل السجق السودان فى الملمس والنعومة المميزة دى
السؤال هو
النشا زاتو شنو؟
بمعنى باى شكل يتم بيعه فى المحلات ؟
هل هو كما نسميه هنا bread crumbs ؟ (زى العيش النشف وفتفتوهو فى برطمانية)
السؤال ده ممكن تفتينا فيهو الاخت اسمارت انا (المترجم الرسمى للبوست)
عندى زيارتى للسودان فى العام الماضى نال سجك مكسيم اعجابى الشديد بالرغم انو
ناس البيت لم يبدو عليهو الانبهار والسعاده به مثلى ...
اعتقد ان السبب هو "النشا" المضاف للحمة المفرومة الذى يجعل السجك juicy
وفى نفس الوقت متماسك ....
اها يا اسماعيل فى حاجة لم يتطرق ليها احد
الكيس (او المصران)
حسب علمى انو ناس مكسيم بيستخدمو كيس صناعى من مواد طبيعية
اها دى كيف؟
لانو مصران الخروف مكلف شوية
|
Post: #43
Title: Re: ...
Author: Elsanosi Badr
Date: 03-30-2009, 02:17 AM
Parent: #42
والله يا النصري بوستك ده ... انا ملاوز منو لي كم يوم.... ياخي اختي اسمارت عملت لي ابو شهيق من الوصف ... يا اخوانا رسلو لينا وصفه بالخطوات عشان نقدر نترجم ونتسودن معاكم....
احييييييي انا المغلي اكل ناشف ....لامن بطني اتطوطت ذاتو
________________________________________________________
*التحيه ليكم كلكم... وياني الشايل قلم رصاص وحارس البوست ده ...
|
Post: #44
Title: Re: ...
Author: smart_ana2001
Date: 03-30-2009, 05:49 AM
Parent: #43
ازيكم كلكم....كل ما اقول خلاص ....ارجع تانى للبوست ده !!!!!
ما عندك طريقه يا سيد البوست ....لازم ترحلو للربع الجاى من السنه....
Quote: اكل البيت؟
ولا
ولا اكل برة؟ |
طبعا اكل بره!!!....لكن بشروط....
ما فى اكل فى مطاعم اكل سريع...ناس مكدونالد و بيرقر كنق...و الجماعة ديل.
و برضوا ما فى اكل فى المطاعم اللى عندها سلسله مطاعم ..ناس الف قاردن و ابل بيز (معليش يا مريم...انا متزكره انك بتحبى ابل بيز)
اى فرصة القاها انى اكل بره ..باكل بره...بحب المطاعم اليابانيه ...و اكلتى المفضله السوشى. بمشى اى مدينه بسال اهل المدينه عن المطاعم ال Local ...
الكلام عن اكل المطاعم ده براه بوست تانى.
Quote: الكيس (او المصران)
حسب علمى انو ناس مكسيم بيستخدمو كيس صناعى من مواد طبيعية
اها دى كيف؟
لانو مصران الخروف مكلف شوية |
موضوع المصران كان العقبه التانيه فى طريقى بعد الوصفه...لكن لانى ذى ما قلت ليك ما بعرف قلة الحيله ...الان بشترى المصارين من ebay .الكيس فيه مصارين (خروف) بتعمل حوالى 50 رطل سجك ب 6 دولار بس....لكن عندى اصحابى سودانيين كانوا بيشتروا المصارين باسعار خرافيه...
لو جادى ممكن ارسل ليك اللنك بالضبط فى ايميلك.
Elsanosi Badr
تسلم من ابو الشهيق...
|
Post: #45
Title: Re: ...
Author: smart_ana2001
Date: 03-30-2009, 05:55 AM
Parent: #44
Quote: النشا زاتو شنو؟
بمعنى باى شكل يتم بيعه فى المحلات ؟
هل هو كما نسميه هنا bread crumbs ؟ (زى العيش النشف وفتفتوهو فى برطمانية)
السؤال ده ممكن تفتينا فيهو الاخت اسمارت انا (المترجم الرسمى للبوست) |
اخونا حميم قال
و القرقوش هو ال bread crumbs ..بس اعمل حسابك ما تشترى اتالين ..لما تشتريه لازم يكون Plain
رغم كلام حميم عن ان النشاء مهم ..لكن انا ما بعملوا لان النشاء فيه (نشويات ) و ح يذيدالسعرات حراريه فى السجك....
واحنا ناس بنخاف على وزننا و كده!
_________________________________________________________________________
لا اصدق يا النصرى انك ما بتاكل ضان ؟؟؟؟نص عمرك ضائع...
الضان دى اهم حاجه طريقه العمل (الطهى)...و ده كمان بوست براه
|
Post: #47
Title: Re: ...
Author: نادر
Date: 03-30-2009, 07:54 AM
Parent: #45
لووووووووووووووول مريم واسمارت كالعادة استلمو البوست واتحكرن قلبوها ونستهم*، أنا الليلة بس شفت البوست ده مع انو أمس مريم كانت بتحكي لي عن موضوعاتو وكنا بنقطع في اسمارت بس ما قالت لي عن البوست، الليلة بالصدفة لقيتو، ياخي فعلاً زي ما قلت نرتاح من القشير سافر والقشير قال، الواحد يجي من الصباح للبورد معمر بندقيتو وساني كيبوردو.
الصديق العزيز النصري سلامات ووين الغيبات يا راجل، بمناسبة السجك السوداني، ذكرني والدتي الحاجة ليلى صابر الله يرحمها رحمة واسعة، كانت ذويقة درجة أولى عندها بتاع سجك في العدني تقريباً أو الشهداء ما متأكد نسيت الزمن طال، المهم بتغيييب وتجي شايلاهو وبمزااااج يكون اليوم داك السجك مدنكل والريحة تجيب الطاشي، أيام يا زمان ويا أمدرمان.
هنا في السعودية بجيبو السجك السوداني جاهز متلج من السودان ، بس الناس البسوهو ديل بختو 30% لحمة + 10% بهارات الـ60% الباقي ملح كافي البلا، والله لو عندك ضغط دللللل تطرشق قبل اللقمة التانية:)
تحياتي اسمارت وكل المتداخلين ويالنصري أطلب نقل البوست، فيهو نكهة سودانيزأونلاين ايام زمان.
* بس وناسات ولو مسكو شغلة بنجضوها تب، هسه موضوع سجكك ده حلتو ليك سمارت.
|
Post: #46
Title: ذرورد و الدهب و الملايات و العدة
Author: lana mahdi
Date: 03-30-2009, 06:31 AM
Parent: #1
الحبيب النصري
ذر الورد ياهو القالت عليهو اسمارت
الدهن مهم عشان السجق ما يخنق و كذلك البطاطس
يتأرشف كيف البوست دة؟؟! دة من أهم البوستات
| Quote: خاصة انى لما ارجع البيت بكون زوجه سودانيه درجه اولى ...بحب الدهب و الملايات و العده و بتشاكل فى الرموت كنترول |
أنا الترتيب حقي معكوس يا اسمارت
العدة و الملايات و الذهب(:
مريوم غايتو لو ما دفعتي لي بحكي ليهم قصتك الزماااااااان مع الأمرقيقة (: الموضوع يا جماعة ما خاص بالمهارة بل خاص بكينونة الملاح نفسها وقوامه و ما ينبثق عنها من فلسفة زي فلسفتي دي
|
Post: #48
Title: Re: ذرورد و الدهب و الملايات و العدة
Author: النصرى أمين
Date: 03-30-2009, 04:17 PM
Parent: #46
لا حولا ..
اللعب سخن ..
فاضل لينا 24 ساعة فقط
نلحق بكرى ما يارشفو
وبجيكم صادى
الكلام كتير
|
Post: #49
Title: اوعيك يا لنا
Author: مريم بنت الحسين
Date: 03-30-2009, 08:52 PM
Parent: #1
| Quote: مريوم غايتو لو ما دفعتي لي بحكي ليهم قصتك الزماااااااان مع الأمرقيقة (: الموضوع يا جماعة ما خاص بالمهارة بل خاص بكينونة الملاح نفسها وقوامه و ما ينبثق عنها من فلسفة زي فلسفتي دي |
لنا اخير ليك.. والله انت بقيتي شكّاله الايام دي.. وطلعت ليك قرون... استري علينا.. انا البت عامله فيها ام الطبيخ.. واليومين ديل قاشره لي بملاح تقليه (طبعا انا ونادر مختلفين في التسميه، ويكه ولا تقليه)... مريم الزمان ديك جار عليها الزمن.. يا حليل ماما علوية
سمارت.. انا يادوب شفته ردّك.. حسي انا في السعودية دي ياختي البجريني في الشارع الله ورقبتي شنو؟! والله هنا لو ما معاك body gard، ما تتحركي ولا cm... انا برضه مشتريه elliptical trainer... وعندي weights.. وعندي ab ttrainer... لكن بقوم عليهم مره مره وبخليهم.. عندي الفترة دي هوس باليوجا... رياضة ممتعه وجميله جداً... (لو عايزين بديكم فيه درس عصر).. لكن عرفته انه اليوجا ما بتعمل اي شي في الweight loss، ولازم الزول يعمل رياضة cardio، حاجه كده تخلي القلب يدق ...
اها يا سمارت... حلّوها لينا...
أخونا النصري.. ضحكتني بت د.أحمد الحسين.. زي الداير تتأكد .. فكرت الموسيقى ما نفعت معاي.. وشفت الدم بتاع ناس الحسين ده هو المشكله.. ناس حارين، بقوم الضغط وامراض القلب بجونا ساهل جدا.. اها عشان الواحد ما يخش في برنامج زي ده.. عايزين نكابس في الرياضة ام دق..
بالمناسبة فكرة الmp4 جربتها... بعد يومين بزهج من الاغاني وبكرهها للأبد.. وبغيرها.. وبكره المزيد من الاغاني للابد... !
نادر.. عاد احنا الونسه دي محل نمشي بعملها.. لو عايزنا "نغزو" ليك بوستات البشير ونقلبها ليهم ونسه حول كيف البشير تمكّن من خسارة وزن كتير كده خلال الكم يوم الفاتو ما عندنا مانع
ما تأرشفوا الموضوع ده عليكم الله...
بنت الحسين
|
Post: #50
Title: Re: اوعيك يا لنا
Author: smart_ana2001
Date: 03-31-2009, 05:26 AM
Parent: #49
سلامات لنا
Quote: أنا الترتيب حقي معكوس يا اسمارت
العدة و الملايات و الذهب(: |
اى ترتيب كويس....لكن بينى و بينك كده ...الدهب ده لازم يكون فى راس القائمة...ولا شنو يا مريم؟؟؟
مريم و نادر ....كنتو بتقطعوا فينى بتقولوا شنو؟؟؟
عارفه يا مريم مش قلت ليك انى عشان الجو بقيت امشى الجم....كنت بمشى جم بتاع نساء بس....تتخيلى انو فى بلاد الفرنجه دى فى جمات بتاعت نساء بس؟
بس بعد فترة رحلت لمحل شويه بعيد و بقيت امشى جم عادى.
انا برضوا اهل ابوى ركابية و ضغطهم مرتفع السنة كلها...عشان كده لازم اعمل حسابى من هسى ...قبل ما الامور تبقى جد....
__________________________________________________________________
يا مريم ...طبعا عاوزين درس عصر بتاع يوقا....طيب ..ح نبدا متين؟؟؟
|
Post: #51
Title: Re: اوعيك يا لنا
Author: smart_ana2001
Date: 03-31-2009, 05:26 AM
Parent: #49
|
Post: #52
Title: الترتيب
Author: مريم بنت الحسين
Date: 03-31-2009, 04:42 PM
Parent: #1
غايته الدهب يختي الايام دي ما بتهبش.. يا كافي البلا.. كان مديتي يدك ساي تاخدي ليك تشّه.. لكن الملايات عاد عندكم انت ولنا يا سمارت... هنا .. الملايات (أخّو)... برضه الامارات فيها عدّه عجيبه.. انا بمشي من هنا لناس أمي... بكون شايله هم الرجعه.. والوزن... وعيوني بتزغلل على طول.. رمضان الفات كنا نمشي "السفير" يا لنا... ونقعد نتحاوم وانا اقعد اتحيّر.. بس محمود جننا جن.. بكون جاري والواحد خايفه يكسر للناس حاجاتهم...
اليوجا يا ستي.. نديكم فيها دروس وعبر .. عندي كمية من الفيديوهات بتاعت اليوجا.. جميله جدا... بس الفترة دي عندنا غبار عندي جيوب انفية باستمرار... واهم حاجه في اليوجا هو التنفّس.. لو الزول ما بقدر يتنفس ما بقدر يعملها.. غايته النصري بعد ده بطردنا.. دحين نشوف آخر الآرشفه دي.. ونفتح سوا بوست تحت عنوان "يوجا 101"...
انا خلاص "بغرته" يا سمارت.., لما ابقى كويسه حأبدأ استعمل الmachines بتاعتي... بالمناسبة، انت قلت أهلك ركابية؟ من وين؟ انا اهل امي ركابية... والشي البعرفه انه الركابية عددهم قليل وبتعارفوا وبتصاهروا ده لو ما بتباقوا... خاصة انهم فترة طويلة ما بتزوجوا من القبايل التانيه...
النصري ساب لينا البوست يا نادر
|
Post: #53
Title: Re: الترتيب
Author: النصرى أمين
Date: 03-31-2009, 04:57 PM
Parent: #52
Quote: النصري ساب لينا البوست يا نادر
|
اسيبو كيفك يا مريم
انا لسه عندك اسئلة كتيرة
السؤال الاول
موجه لحميم ..لسه ما قلت لى "النشا" دى شنو؟
وبرضو الكيس ما وريتنا رائك فيهو
واقتراحاتك
ويا اسمارت انا عندى حساب مع ebay بدرجة عضو رهيب
لكن عمرى ما فكرت انو ممكن الزول يشترى مصران خروف
منو ....
انا ما عارف ..
انت بتتكلمى عن حاجة مفرزنة ولا شيتن فى صندوق زى ال iPod
لايحتاج لتبريد
السنوسى بدر
خليك قريبى ..قربنا
|
Post: #54
Title: Re: الترتيب
Author: النصرى أمين
Date: 03-31-2009, 05:01 PM
Parent: #53
| Quote: بحب المطاعم اليابانيه ...و اكلتى المفضله السوشى |
لا حولا يا اسمارت
سوشى عديل ...
ده فرقو شنو من الكمونية؟
سمك نى
ده احسن منو الفسيخ لانو دخل النار
ياخى نحن الشريمب بنخاف منو
اما الكراب داك ..اعوذ بالله ..اكل بعاعيت بس
|
Post: #55
Title: Re: الترتيب
Author: smart_ana2001
Date: 03-31-2009, 07:12 PM
Parent: #54
مريم....ايوه...ابغرى جدا....لكن بينى و بينك ....انا ما مشيت الجم لى حوالى شهر كده...و ما ح امشى شهر اربعة كلو....مشغولة لى فى موضوع بايخ كده...
اهلى ركابية من حى الركابية ام درمان....و عندهم اهل فى بارة . بس اهل امى من النيل الابيض . امها تركية و ابوها بديرى دهمشى (لخبته شديده). اما انا ف (من بحرى). بحب بحرى...و لما يسالونى انت من وين . بقول انى من بحرى.
انا ثقافتى فى اليوجا ...زيرو. و لو شجعتينى ممن امشى كورس فى شهر خمسة.
|
Post: #56
Title: Re: الترتيب
Author: smart_ana2001
Date: 03-31-2009, 07:26 PM
Parent: #54
النصرى...المصارين منebay ... نظيفه...و محفوظه فى ملح...مقطعة لاطوال مناسبة (حوالى مترين). و ما بتحتاج تختها فى التلاجه قبل ما تفتح الكيس اول مرة...بعد ما تفتحه مفروض تختها فى مويه ملح فى التلاجه.
يعنى ما سالت عن مكنة السجك يجيبوها من وين فى كندا???
لا اصدق انك ما بتاكل ضان و لا شرم و لا كراب و لا سوشى!!! بتاكل شنو طيب?? تلاته ارباع عمرك رااايح...
انا جايه كندا (فانكوفر) خصوصى عشان اكل سوشى. لكن بينى و بينك هو من الحجات اللى اما بتحبها او لا.
جربوا مره و على مسؤليتى.....هسى ح تخلينى امشى اتعشى سوشى اليلة
|
Post: #57
Title: Re: الترتيب
Author: smart_ana2001
Date: 03-31-2009, 07:32 PM
Parent: #56
|
Post: #58
Title: Re: الترتيب
Author: إسماعيل حميم
Date: 04-01-2009, 04:55 PM
Parent: #57
Quote: لابد من إضافة النشا للحمه عند تصنيع السجوك وأهميته يجعل السجوك:
ناعم
عصيري عند المضغ
يحفظ شكل عند التحمير ربط اللحمه مع بعضها
الأنواع المستخدمة:
البطاطس
القرقوش
الفول المصري (دراسة مركز الابحاث كوكو)
الكبكبية (دراسة في مركز الابحاث كوكو)
اما الافضل فهو:
فول الصويا الطبيعي حبيبات والافضلية لإرتفاع نسبة البروتين النباتي
فيه حيث تتراوح بين 60 – 70% |
يا عم النصري
قلت لي سجك مكسيم مالك دايرني أعلق وتجيب لي مشاكل معاهم!!
بالنسبة للنشا لم أقصد النشا في حد ذاته
المقصود مادة نشوية أرجع للإقتباس الفوق
إسمارت
سلامات يا شيف
Quote: اخونا حميم قال
Quote: البطاطس
القرقوش
و القرقوش هو ال bread crumbs ..بس اعمل حسابك ما تشترى اتالين ..لما تشتريه
لازم يكون Plain
رغم كلام حميم عن ان النشاء مهم ..لكن انا ما بعملوا لان النشاء فيه (نشويات )
و ح يذيدالسعرات حراريه فى السجك....
واحنا ناس بنخاف على وزننا و كده! |
عشان كدا أنا بفضل فول الصويا لإرتفاع نسبة البروتين النباتي فيه
وبالتالي تقل نسبة النشا
وللمعلومة يا النصري فول الصويا متفق عليه في
معظم صناعات اللحوم في العالم
والله أعلم ( عشان المرجفين)
والمصران بجيك راج ليهو
مرفق:
رغبة السكن هنا
إسماعيل حميم
.
|
Post: #59
Title: Re: الترتيب
Author: النصرى أمين
Date: 04-01-2009, 05:22 PM
Parent: #58
يا اسماعيل
عليك الله بلغ تعازى الحارة
للصديق العزيز اسماعيل حامد فى وفاة خاله
الاستاذ احمد سليمان
|
Post: #60
Title: Re: الترتيب
Author: النصرى أمين
Date: 04-01-2009, 05:34 PM
Parent: #59
| Quote: قلت لي سجك مكسيم مالك دايرني أعلق وتجيب لي مشاكل معاهم!! |
احنا دايرين النيران تولع بينكم
لانو المنافسة بينكم فى مصلحة المستهلك
ختو قرض ...
لكن بينى وبينك
سجكهم لذيذ (ولا امكن انا محروم ساكت)
يا اسمارت
السوشى صوره جميلة زى حلويات ماكنتوش البقولو انو
الملك فهد كان بفتحو ليهو العلبة بشيل الخضراء
وبرمو الباقى فى الزبالة
لكن برضو فى الاخر
سمك نى ..مغسل بصابون عدة
|
Post: #62
Title: Re: الترتيب
Author: smart_ana2001
Date: 04-03-2009, 09:30 PM
Parent: #60
ناس السجك......وينكم?
|
Post: #63
Title: Re: الترتيب
Author: النصرى أمين
Date: 04-04-2009, 04:20 AM
Parent: #62
يا اسمارت
حنبدا البث التجريبى فى عطلة نهاية الاسبوع دى
يعنى خلال يومين حنشوف نتيجة شهر من الابحاث والاستشارات
ومشاهدة عشرات الفيديوهات فى اليوتوب لعمل السجك ...
بالنسبة للكيس ..غالبا نبدا بكيس طبيعى مع انو غالى
شوية ..
الرطل يمكن بتلاتين دولار لكن فيهو زى عشرة كيلومترات كده..
حاصور الانتاج الاولى وانزلو هنا ان شاء الله
|
Post: #64
Title: Re: الترتيب
Author: smart_ana2001
Date: 04-04-2009, 12:54 PM
Parent: #63
سلامات إسماعيل حميم
شف عديل كده ؟؟؟؟؟؟ ابدا ....انا هاويه اجرب بس.
انت اللى بروفشنال..
بالتوفيق يا النصرى..و برضوا بالهناء و الشفاء
_________________________________________________________
وصيه اخيرة ....ما تملى الكيس شديد و انتى بتحشى فيه
بعدين اكياسك دى غاليه شديد....الاكياس اللى انا قلت ليك عليها من ebay دى اكياس طبيعيه و بتاعة خروف (لما تشترى اعمل حسابك ....لان اكياس الخنزير برضو متوفره فى النت )
|
Post: #65
Title: Re: الترتيب
Author: النصرى أمين
Date: 04-06-2009, 04:28 AM
Parent: #64
التجربة الاولى اكتملت بنسبة نجاح 80%
خزلنا المصران ...حيث تم الاحتيال علينا من صاحب احدى اكبر البقالات العربية فى
المدينة...
باع لينا مصران عجالى على اساس انو خروف.
السجك طلع ضخم الجثة ..شلولخ
برضو اللحمة كانت ناشفة شوية وربما كان السبب اننا اضفنا نص كباية قرقوش فى اللحمة وهى حوالى ثلاثة ارباع الكيلو
الحقينا يا اسمارت بوصلة eBay
|
Post: #66
Title: Re: الترتيب
Author: إسماعيل حميم
Date: 04-06-2009, 10:09 PM
Parent: #65
Quote: سلامات إسماعيل حميم
شف عديل كده ؟؟؟؟؟؟ ابدا ....انا هاويه اجرب بس.
انت اللى بروفشنال..
وصيه اخيرة ....ما تملى الكيس شديد و انتى بتحشى فيه
بعدين اكياسك دى غاليه شديد....الاكياس اللى انا قلت ليك عليها من ebay
دى اكياس طبيعيه و بتاعة خروف (لما تشترى اعمل حسابك ....لان اكياس الخنزير
برضو متوفره فى النت). |
يا إسمارت يا إخيتي
عليك الله كلامك الفوق دا كلام هاوي
دا كلام إستشارين عدييل كدا
زول يتكلم عن ال (Q C) يبقى هاوي كيف !!
لكن تواضعك مقبول . . سمح
نرجع للنصري والمصران
المصران ثلاثة أنواع (على حد معرفتي)
الطبيعي :
ومعظمه من الضأن وتتم نظافته من الفضلات والدهون والقشرة الخارجية وتسمي
محلياً (شمبر المصران)
وتوجد منه مقاسات من 12 حتى 22 ملم وأنسب المقاسات قبولاً 16 و18 ملم ويحفظ
في تركيز من الملح وكل مصران مربوط وحده ويسمى بالشلة وكل 10 شلات تسمى هنقر
(التسميات محلية).
وهناك المُصنع من مواد طبيعية والمُصنع من مواد صناعية!!
ويتميزو بالمتانه عند التصنيع وتحمل ضغط المكابس الآلية والمقاس الثابت وكلها
مصرح بها من الناحية الصحية عندما تطابق المواصفات المعمول بها في هذه الصناعة.
مرفق:
كل الود
إسماعيل حميم
.
|
Post: #67
Title: Re: الترتيب
Author: إسماعيل حميم
Date: 04-09-2009, 05:48 PM
Parent: #66
عم النصري خبرك شنو؟؟
التجربة الثانية كيف؟
كان ما لقيت مصران خروف أدينا خبر
نرسل ليك شلة ولا هنقر من الخرطوم !!
بالهنا . .
خاصة:
جماعة المؤتمر ديل . . ياهم شلة بيت المال؟
والله أخوك نظره بقى كعب . .
ما فرزت زول غير الفوقو دائرة دا
مرفق:
كل الود
إسماعيل حميم
.
|
Post: #68
Title: Re: الترتيب
Author: Raja
Date: 04-09-2009, 06:54 PM
Parent: #67
ممممممممممممممممم
بوست يجرًي الريق.. وجامع كل الحبايب يا النصري العزيز
وبما إني من محبي المطبخ والطبيخ وتجربة اي شئ جديد.. عجبني شدييد..
وبصراحة أنا السجق السوداني ده أصلو ما قدرتا استخلص كل مكوناته. كل مرة يجيني يحاجة جديدة وحلوة..
وأتفق مع إبن العم العزيز حميم في الكباب الصيني.. وممكن تتجنب مشكلة الطعم المر بأن الكمية ما تكون كتيرة..
وبالله يا جماعة ما تنسو حبتين عظم. أنا مرات في حتت عضم "بترقش*" لي.. هههههه
..
سمارتي ومريوم ولنا.. فتحتو نفسي للونسة الحلوة والناس الأحلى..
أنا غايتو بحب العطور والنضارات والساعات.. والدلاقين يا قول أمي.. لوووول
يا مريوم أنا مشتركة في جيم بعمل حاجة إسمها (Body balnce). وهي مزيج من اليوغا والتاي تشي والكلاناتيكس..
بيوزن الجسم بجد. وبتلاقي الـ (fats) بيبقى (muscles). والجسم بيلم بعضه..
الشئ التاني إسمه (Abs - Blaster).. وده خاص بمنطقة البطن أو الكرش في رواية شعبية.. هههههههه
تمريناته (Cardio) وبتستخدمي إما (ball). أو الـ(rubber) أو الـ (free style)..
يا سمارتي المزيكا البنستخدمها ختيييييرة..
خاصة في الـ Abs - Blaster من نوع ناس ريانا وكانيه ويست وليونا لويس وسيئ الذكر كريس براون. أما مزيكة البلانس فهي أورينتال خالص..
* بترقش: معناها بتعتر للساني..
فتكم بعافية
|
Post: #69
Title: Re: الترتيب
Author: النصرى أمين
Date: 04-10-2009, 04:31 PM
Parent: #68
سلام يا رجا
والله السجك ده غلبنا عديل كده ....
ابى يلفق كلو كلو ...
يا اسمارت
الحقينا بالكيس بتاع ال eBay
فتشتو لكن ما لقيتو ..
|
Post: #72
Title: Re: الترتيب
Author: smart_ana2001
Date: 04-10-2009, 11:52 PM
Parent: #69
سلامات يا جوجو...(اسم دلع رجاء عندنا جوجو)
العطور دى معزتها فى قلبى ذى الدهب و الجزم واااحد
الاسبوع الفات جبت دى...
لحدى اليوم....مبسوطه
اما الدلاقين(امى برضو بتقول دلاقين) دى فحبها اظنه عالمى ما فى زول ما بيحبها.
النصرى....خلينى امشى البيت و بعدين بخت ليك الوصله بالضبط. لكن للضمان كده اسمه sheep casing
|
Post: #73
Title: Re: الترتيب
Author: smart_ana2001
Date: 04-11-2009, 04:40 AM
Parent: #72
اسماعيل حميم..شكرا يا اخى ..لكن و الله اوضعتم تخاجلنا
سلامات يا النصرى
النوع اللى انا بشتريه اسمه Home Pack Brand Sheep Sausage Casings
و للاسف اللنك بتاعتهم فى ebay ما شغاله...ما عارفه المشكله شنو
لكن لقيتو بيتباع فى الموقع ده:
http://www.shopwiki.com/detail/d=Home_Pack_Brand_Sheep_Sausage_Casings/
و فى مواقع تانيه كتيره..انا ما بقدر اقول ليك اشترى من اى موقع لانى ما جربتهم..حتى الفوق ده ما عارفاه..بس عملت بحث سريع و لقيت ده
خساره انو ebay ما فيها...غايتو...اعمل حسابك من الشراء من النت الايام دى..مقالب شديده.
____________________________________________________________________________________________
بوستك ده ياالنصرى جمع كل الناس اللذاذ...
|
Post: #74
Title: Re: الترتيب
Author: إسماعيل حميم
Date: 04-21-2009, 00:00 AM
Parent: #73
عم النصري أخبارك
إن شاء الله نجحت أخيراً
ليك علي أشبعك لمن تجينا بس المرة دي اينا خبر
ما زي السابقاات . . سمح
. . . . .
بت عمي أخباركم مقطوعة
بلدكم وين اليوم!!
. . . . .
| Quote: بوستك ده ياالنصرى جمع كل الناس اللذاذ... |
صدقت إسمارت
| Quote: اسماعيل حميم..شكرا يا اخى ..لكن و الله اوضعتم تخاجلنا |
تواضعت إزدياداً
مرفق:
كل الود
إسماعيل حميم
.
|
|