عنصرية اعلانات (" خرج ولم يعد ..اوصافه كالاتى..)!!!!

فى نشرة داخلية (فى كندا) جاءنا الاتى
خرج المواطن فلان الفلانى من منزله(او مستشفى او مدرسة الخ)
ولم يعد
اوصافه كالاتى:-

قوقازى (يعنى رجل ابيض)
عمرة كذا وطوله كذا ووزنه كذا
مرتديا ملابس كذا وكذا وكذا

وفى نشرة اخرى
المواطن (او المواطنه)
اسيوى

او افريقى كندى (يعنى اسود)

او Aboriginal or Native (يعنى هنود الحمر كما نسميهم فى بلادنا)


بحثت فى قوقل ووجدت ان القوقازيين هم سكان اوربا واسيا وشمال افريقيا
ما عارف كيف اللقب اتوقف على البيض فقط !!

الحاجه التانيه

من زمان كنت بشك ان الاعلانات فى السودان بتاعت خرج ولم
يعد.. ما منها فائدة كبيرة لانو الوصف يفقد صفة اساسيه وهى العرق


فمثلا لو خرج ادروب ولم يعد
يقولون عليه اسمر اللون
مثله مثل الشمالى او الغرباوى او الجنوبى..

اذا خرج الزومة مثلا من منزله ولم يعد اظن
من مصلحة اسرته ان تساعد فى عملية العثور عليه
وتقديم معلومات وتفاصيل مفيده لعملية البحث

بدلا من الحساسية الغير مبررة فى عملية البحث
يجب على الاعلان ان يكون اكثر دقة
ويقول
المفقود ملامحه من شمال السودان
او غربه او شرقه او جنوبه
واذا وافقت الاسرة يمكن اضافة القبيلة او العرق
نوباوى
دنكاوى
بجاوى
حلفاوى
الخ


عندما ياتى الامر للعثور على انسان مفقود
يجب علينا الترفع على الحساسيات العرقيه
والسعى لرفع الالم على اسرته الحزينة
















والله اعلم

يعني يا النصري انتا هسه مع عنصرية الاعلان ولا ضدها؟
لانو العنوان و الموضوع ما راكبات مع بعض؟

يا القردابى
عشان انا ما متاكد تماما من وجهة نظرى دى
ختيت اربع علامات تعجب فى العنوان (!!!!)
وانتهيت بجملة الله اعلم لاننى
حقيقة فكرت فى الموضوع ده كتير
وماعرفت بالظبط الصاح شنو والغلط شنو

فى الاخر كنت ميال لوجهة النظر البتقول انو الجهات الرسمية فى السودانية
لانها تتجنب الاتهام بالعنصرية تخرج اعلاناتها ناقصة من اهم
عامل مساعد ومفيد فى عملية البحث على المفقود ..

الحساسية ضد العنصريه عالية جدا هنا كندا خاصة بين
الاجهزة الاعلامية .. ولكن رغم ذلك لا يترددو فى تقديم
عرق الزول كصفه مساعده فى عملية البحث

تعرف يا النصري
نحنا اكتر حساسية من اي دولة في العالم لما المسألة تصل حتة العرق و اللون
ومن حساسيتنا لا نسمي الاشياء باسمائها
فالاسود عندنا أخدر

وكمان نغني ليهو :
زولي اللخدر
كان شفتو بخدر



واخدر الليموني
المشنق الطاقية



وخدرتك ليمونة
وتينة بي زيتونة
وساحرات عيناك


مرة وانا طالب في الجامعة (بره السودان)الدكتور بنادي طالب يجلس بجواري قال ليهو انتا اللي جنب الطالب الاسود
اسبوع مانمتا
شفتها اساءة مع انها الحقيقة
حساسية وكده

أقول ليك حل
حقو نريح حالنا و الزول ده ما نفتشو
خليهو يهج
والقشة ما تعتر ليهو

اتمنى صادقا اسمع وجهة نظر الناس حول
الموضوع ..بالذات الناس العندهم اراء
حادة حول العنصرية فى السودان ..














بس لو جا زول نهرنى اوشاكلنى او استفذانى
ما حااشتغل بيهو ولا بطعمو ليهو ...

Quote: عندما ياتى الامر للعثور على انسان مفقود يجب علينا الترفع على الحساسيات العرقيه والسعى لرفع الالم على اسرته الحزين

ة


يا النصري نحن كل شئ عندنا معكوس

يقولوا محاربةالقبليه !!!

ولو ما سالوك من قبيلتك فلا وظيفة لك

اتفق معك تماما

القردابى
معليش ردك جاء اثناء كتابة مداخلتى الاخيرة


نفس الجهات الرسمية التى تنشر اوتذيع الاعلان فى السودان
تزكر ""لون"" المفقود كاحد الصفات ليهو..

والعنصرية واللون متلازمات زى ملازمتنا للبورد ده ..

طيب طالما السلطات "اتبلبلت" باللون

احسن ""تعوم"" بالعرق



او اصلا ما كان تزكر حكاية لونه دى اساسا

لاننا كلنا """اسمر البشرة"""

الاخ المسلمى
العنصرية والقبلية موجوده فى السودان..

وتاخد صور متعدده..
مثلا
كلمة غرباوى اخدت طابع سلبى لحد ما
واقترح الاستيعاض عنها بكلمة غربى..

عندنا هنا فى كندا ولاية فقيرة(الى حد ما) اسمها
نيوفاوندلاند .. ناس اونتاريو والبرتا باقى المقاطعاتا
الغربية الغنية يسمون القادمون من تلك الولاية بال نوووفى ..
هى اختصار لنيوفاوندلاند ولكن الاستخدام جعل منها كلمة
سلبية لايرضاها اهل تلك المقاطعة ...

هناك عنصرية
علينا الاعتراف بها ومعالجتها بطريقة سليمة..
وليس الزوقان منها كما حدث لزولنا الخرج ولم يعد
ده

قبل فترة وصلنا منشور استوقفنى كثيرا وفكرت ان
استفسر الادارة عنه

يقول الاعلان(طبعا بالانجليزى)

انو جارى البحث عن عن شخص مواصفاته كما يلى:-

سودانى
يبلغ من العمر كذا الخ الخ الخ

لم اسمع ان السود يوصفون بدولهم
فلم نسمع ب البحث جارى على كينى او
نيجيرى او او اوغندى

ايضا الاسيويون
لا يقولون انه كورى او صينى او فليبينى

اذا لماذا تم تحديد الشخص المفقود بانه سودانى؟

الاجابة بسيطة

المدينة بها اعداد كبيرة جدا من السودانيين من جنوب
السودان وهم يختلفون عن بقية السود فى المدينة من حيث
اللون والقوام والسحنة بصورة عامة ..


اضافة كلمة سودانى فى الاعلان رغم شتارتها الا انها زادت من
فرص العثور على المفقود

ا

زول أخْدر شديييييد
شعرو قُرقُدي
قِصَيِر
لابِلس شِشِب

علشان ما نبقى عُنصُرِيون نسويهو مِتِل صورة يسوع المسيح في كنسية ماري جِرجِس
ولا كيف يعني؟

أنا ولدي أكان راح والله مِش أوصِفو حرم أوصِف أُمو زاتا ...

الوجيه عزام

Quote: زول أخْدر شديييييد

كانو ممكن يقولو شديد السمارة
اذا حكاية اسود بتعقدهم..
وتخليهم يلفو فى الالوان ,,,



من الممكن الوصول لاتفاق غير مكتوب بين السلطات
والجمهور حول معانى الوصف المقدم ..
وهذه تتم عن طريقة تقديم نماذج لفترات زمنية محسوبة حتى يفهم
الجمهور تماما ماذا تقصد السلطات باوصاف الشخص
المفقود

الموضوع داير ليهو دراسة من جهات متخصصة فى علم النفس والاجناس
والمجتمع

شكرا يا وجيه على المرور

عينة من اعلان جاء فى صحيفة السودانى
العدد رقم: 1430
2009-04-28



خرج ولم يعد
خرج المواطن *********من منزل ذويه بجبرة مربع (****) وذلك منذ خمسة
عشر يوماً ولم يعد حتى الآن، أوصافه كالآتي: طويل القامة، أسمر اللون يعاني من
اضطرابات نفسية نرجو ممن يعثر عليه الاتصال بأقرب مركز شرطة أو تلفون (**********)
أو (***********) والله لا يضيع أجر من أحسن عملاً



ما هى احتمالات العثور على هذا الشخص من جراء هذا الاعلان !!

كم سودانى طويل القامة ؟ (وماهو طول القامة اصلا؟ عند الدينكا مثلا طول القامة قد يكون
سبعة قدم وعند قبائل النوبة وسط السودان فطول القامة قد لايزيد من خمسه قدم وخمسة بوصه
هى عملية نسبية ..
المشكلة معظم السودانيين ما عارفين اطوالهم كم !!
انا شخصيا عرفت طولى من زمن قريب جدا 5 قدم و 9 بوصة
وعندما تاتى نشرة جديده اقارن طول الشخص المفقود بنفسى
فلو قالو انه 6 بوصة اعرف انه اطول منى بقليل او(الكتف فى الكتف)
ولو قالو انه 5 قدم و 3 بوصة اعرف انه فى طول جمال صاحبى القصير ..

الاعلان ايضا يفتقد عنصر الوزن ..
ولانو صعبة شوية يقولو الزول سمين مدغلب او ضعيف رهيفونى
فمن الافضل ان يتفق الجميع على نظام رقمى بسيط

اما حكاية اسمر اللون دى فهى موصضوع البوست
ولسه ما وصلنا لحل بخصوصها

وده بقودنى للسؤال المجننى ومطلع زيتى

هل نحن شعب رقمى؟

مرات اتكلم مع احد الاخوان واساله
المسافة بينك وبين العربية التانية كانت كم ؟

يقول لى

"من هنا لغاية العمود الاحمر داك""


دى حالة دى !!!

اعتقد (والله اعلم) اننا كنا شعب رقمى حتى عهد
قريب .فقد كنت اسمع جدى رحمة الله عليه يكثر فى
حديثه مكاييل واوزان وابعاد وارقام ..
كنت اسمع الوقيه والوقه والكيلة والعبار..

عندما يتحدث كان لكى شئ عنده وزن وطول
وبعد.....

اظننى ومعى كل ابناء جيلى كنا خارج شبكته وقتها..
لم نكن نفهم ماذا يقول هذا الرجل العجوز..
وماذا يقصد بكل هذه الارقام ...

بعدها سلمنا راية الجهل الرقمى بجدارة للجيل الذى تلانا وهكذا دواليك (معجب جدا بالمصطلح ده)



كنا شعب رقمى لكننا انسختنا بالزهول
والهلول والدوده والخستكه واخيرا
عدم الاهتمام ..

والدليل عينة الاعلان الفوق داك

من جهات رسمية لا تهتم...
وجمهور لا يكترث

الصباح رباح

النصري أخوي إزيك ...
تحياتي لك وللأخت سهير ..
تحضرني في الواقع طرفتان أو ثلاث .. كان عندنا زمان أستاذ حلفاوي .. أصر في إحدى إستمارات وزارة التربية أن يكتب في خانة القبيلة (نوبي) بدل حلفاوي إمعاناً منه في الاعتداد بأصله النوبي .. الجماعة في الوزارة ما صدقوا ، قاموا طوالي في الملفات عدلوها ليك لـ (نوباوي) صاحبنا داير ينتحر ...
الطرفة الأخرى يحكيها الراحل الدكتور جون قرنق .. عن زميله في بعثة الدكتوراه في أمريكا .. وكان سودانياً شمالياً ..وكان أحد المشرفين على الرسالة فيما أذكر آفرو أمريكان .. زنجي يعني .. ويظهر أنه كان هناك سوء فهم بينه وبين السوداني الشمالي .. فقال الشمالي لـ د. قرنق : كلم أخوك ده خليه يتعامل معاي كويس .. فرد عليه د. قرنق ببساطة : ده ما أخوي .. أخوي إنت الجاي معاي من السودان ..
يكفي العنصرية ما قاله عنها المصطفى صلوات الله وسلامه عليه وعلى آله (أبدعوى الجاهلية وأنا بين ظهرانيكم ؟ دعوها فإنها منتنة) أو كما قال .. بيد أن تحديد القبيلة يساهم في التواصل وصلة الأرحام ولا غنى لنا عنها في السودان ، وبعض الدول العربية الخليجية على وجه التحديد .. وما يعيبها الاستخدام الاجتماعي والسياسي السئ ..
نحن مجتمع ما زال في طور التكوين ، وكلما ظننا أننا تقدمنا شبراً ، عاد بنا دعاة الفتنة والطائفية وتجار الحروب فراسخ للوراء .. فالأمر يحتاج لزمن وتضحيات ، لكن لا بد من المضي فيه ، والتدرج مطلوب .
وفيما يخص إعلانات المفقودين ، فالصور قاعدة تسوي شنو آ النصري أخوي ؟ زمان كان بكتبوا في الجواز مواصفات الشخص ، لون العيون عسلية ومش عارف إيه .. دلوقت يكتبوا ليك : أنظر الصورة ... فبدل التفاصيل وزغاوي وجعلي وهلم جرا .. فانظر الصورة ياخي وكفى الله المؤمنين وسواهم القتال ؟؟؟

العزيز عبدالباقى
شكرا على المداخلة الدسمة.

ضحكت رغما عنى من الطرفة الاولى رغم ما
عليها من بؤس ...


هذه الجملة

Quote: نحن مجتمع ما زال في طور التكوين

صحيحة دشليون فى المائة رغم ادعاءات المدعين انو السودان حضارة
ضاربة فى عمق التاريخ ..
نعم لدينا حضارة قديمة...
ولكنها تاريخ فقط...
واحداث مرت وانتهت..
لم يستفد منها احد..
ونحن الان كما كنا ايام عهد الخليفة التعايشى
نفس الازمات والحروب والاقصائيات والعنتريات ولاننسى
امهم كلهم ...الكراهيات ..


تعرف يا عبدالباقى

انا غرضى من البوست ده انو الناس تواجه الامور المعقده الشائكة
وما تتجنبها ....
وموضوع اعلانات المفقودين مثال فقط ..
النظام الشغال دلوقت للبحث عن المفقودين غير مجدى اطلاقا ومانافع
وما شغال والدليل عينة الاعلان الموجود فى البوست ده..
معقول بس الوصف المقدمنو للمفقود انو زول طويل واسمر..
معقولة بس؟
لو ارفقو صورته لاختلف الامر تماما ..
وما احتاجنا ان نضرب على الكيبورد كل هذه الضربات ..


السؤال يا عبدالباقى البرضو محيرنى

انو فى السودان ما قاعدين نسمع نهائئ عن اختفاء الاطفال(او اختطافهم)
هل فعلا السودان خالى تماما من الظاهرة الفظيعة دى
ولا الشغلانه برضو الناس تتعامل معاها بالغتغتة والدسيس

I really don't know

هذا الاعلان جاء فى احدى الصحف السعودية


السوداني فلان الفلانى خرج ولم يعد

قال ******سوداني الجنسية من أبناء *****- الولاية الشمالية - ان ابنه **** المرفقة صورته خرج يوم */*/1426ه من منزله ب******* والذي كان يعمل في فرع *******وهو يعاني من صدمة نفسية ولم يرجع وكان يرتدي ثوباً وشالاً سودانيين أبيضين ويرتدي نظارة طبية لون فضي.. وطالب من يعرف عنه شيئاً الاتصال على أحد الأرقام التالية على مدار الساعة مشكوراً: *********** ************

انتهى الاعلان ...

لاحظ الدقة فى الاعلان..
صورة مصاحبة له
تحديد المنطقة التى ينتمى اليها المفقود..
ملابسه
ولون النظارة و نوعها...

مش زى اعلاننا الفوق داك
اسمر وطويل القامة

Quote: اذا خرج الزومة مثلا من منزله ولم يعد اظن من مصلحة اسرته ان تساعد فى عملية العثور عليه وتقديم معلومات وتفاصيل مفيده لعملية البحث

دا الا يجيبوهو بى جهاز كشف الكضب!
والريالة السايلة!
جنى

يا جنى زولك داك لو راح اهله يقولو فى الاعلان

توجد علامة فى راسه من اثر العضة

فوق عشان الصورة الجديدة