Post: #1
Title: 15% من الخليجيات يضربن أزواجهن أثناء الدورة الشهرية !!!!
Author: ابوحراز
Date: 09-09-2007, 12:18 PM
قرأت يوم أمس خبرين
الأول أصابني بالغثيان
والثاني أزال عني الغثيان وأفرحني كثيراً
الخبر الأول موريتاني يطالب بورثة { عبد } توفى يقول أنه يملكه منذ فترة
تركت هذا المعتوه الذي لا اعرف من اي كوكب أتى
وبدأت بقراءة الخبر الثاني والمتعلق بضرب الزوجات الخليجيات لأزواجهن
لكن ياجماعة الا توافقوني بان اربعة أيام في الشهر ضرب للزوج شيء عادي وطبيعي ؟؟
يعني شنو لو { الخليجية دقت } زوجها اربعة ايام من 30 يوم ؟؟
الآن عرفت لما يتنرفز بعض الكفلاء ويصبون جام غضبهم على الأجانب الذين يعملون معهم
اعرف واحد لايتشاكل مع عماله الا في آخر الشهر
وكنت أعتقد أن العملية خاصة بالمرتبات { الماهية }
لكن الظاهر الحكاية دورة شهرية
طيب 00 نساؤنا الا ياتيهن الطمث ؟؟؟
ورغم هذا فإنهن لايتغيرن طوال الشهر
اللهم الا في حالة { شراء الملايات والعدة ودق الدهب }
والله اعجبت كثيراً بالخليجيات
ياليت لو ياتيهن الطمث في العام كله !!!
|
Post: #2
Title: Re: 15% من الخليجيات يضربن أزواجهن أثناء الدورة الشهرية !!!!
Author: doma
Date: 09-09-2007, 01:06 PM
Parent: #1
Quote: طيب 00 نساؤنا الا ياتيهن الطمث ؟؟؟
ورغم هذا فإنهن لايتغيرن طوال الشهر |
بلى
يا اخوي والله الايام الثلاثه القبل البدايه ما يفضل لينا الا اللبع .
الا تكون ست النفر دي انت هارشها هرشه شديده . غايتو الواحده فينا بتفشوا في الوليدات . وابوهم نهره نهرتين .
|
Post: #3
Title: Re: 15% من الخليجيات يضربن أزواجهن أثناء الدورة الشهرية !!!!
Author: soma
Date: 09-09-2007, 01:12 PM
Parent: #2
دوما الحبيبة 
***
اب حراز تتجازا انت تنكت البلاوى
|
Post: #4
Title: Re: 15% من الخليجيات يضربن أزواجهن أثناء الدورة الشهرية !!!!
Author: فيصل نوبي
Date: 09-09-2007, 01:28 PM
Parent: #3
loooool@doma
مشتاقين يا خالة
هسي اذا الواحد قاعد ياكل في سندويتش و يقراء يعمل شنو ؟؟
_
سلامات اب حراز
|
Post: #8
Title: Re: 15% من الخليجيات يضربن أزواجهن أثناء الدورة الشهرية !!!!
Author: ابوحراز
Date: 09-09-2007, 05:26 PM
Parent: #4
اخوي فيصل
| Quote: هسي اذا الواحد قاعد ياكل في سندويتش و يقراء يعمل شنو ؟؟ |
قال أعمل شنو قال
والله تلقاك يومياً بتغسل في العدة
وكان المدام امها { حيّة } أمانة ما وقع زووووووووول
|
Post: #6
Title: Re: 15% من الخليجيات يضربن أزواجهن أثناء الدورة الشهرية !!!!
Author: ابوحراز
Date: 09-09-2007, 05:23 PM
Parent: #3
سوما
مبروك العمرة
الطائف قبل الرياض لكن ماعبرتونا
أها النشوفك انتي وللا ابوكم الفاتح بس واحد فيكم يقدر يجي بكبري الحصاحيصا
بس أنا حا اشيل عكاز مضبب لي ناس الجنيد
أمشوا بالبنطون بتاعكم المهتري دا تقول مصنوع من الحرب العالمية الأولى
| Quote: اب حراز تتجازا انت تنكت البلاوى |
والله زي ماقالت دوما بتتفشى في الوليدات
لكن الخليجيين بيتفشوا في العمال المعاهم
يعني الواحد تجلدو مراتو في البيت
ويجيك يقول ليك انت زول كسلان ومابتعرف تشتغل
عندنا واحد قبل فترة عاوز ينقل كفالة
لكن والله الكفيل عكليت عكلته
وحلف بالتقطعو ماينقل للسوداني
أها واحد من أصحابي قال تمشوا لمرتو
وفعلاً مشينا ليها وحكينا ليها الموضوع
قالت تعالوا بكرة لأنو اليوم ماموجود
جينا بكرة لقينا الكفالة منقولة
ماقلتو نوبة !!!!!
|
Post: #5
Title: Re: 15% من الخليجيات يضربن أزواجهن أثناء الدورة الشهرية !!!!
Author: ابوحراز
Date: 09-09-2007, 05:11 PM
Parent: #2
كيف حالك ياخالة دوما
ومرة تانية مبروك ليكم
طبعاً انفقعت من الضحك
| Quote: غايتو الواحده فينا بتفشوا في الوليدات . وابوهم نهره نهرتين |
والله فعلاً كلام الوليدات دا صحيح
ست النفر مرات شايف طوالي بتلم فيهم لبع
ولكن مشكلتها معي دائماص هي العض في بعض الأيام
انا طبعاً ماقاعد اهرشها
لكن زي ما قلت ليكم زولتي بتخاف من الدودة
اها لو قالت اي كلام أنا طوالي بمشي على الزير
عندنا اربعة ديدان من النوع الصعب جداً
كان { كنكشت } فيك والله تاني الا يحلك الحل بله !!!
قال لبع قال
|
Post: #7
Title: Re: 15% من الخليجيات يضربن أزواجهن أثناء الدورة الشهرية !!!!
Author: doma
Date: 09-09-2007, 05:23 PM
Parent: #5
حبابكم يا السمحين سوما نوبي واب حراز
والله اانا غايتو اولادي وابوهم قطعوا لي اسم خاص في الايام اياها مسميني الهرمون مونستر . اها اي زول بيكون عامل حسابه في الفتره اياها سمعتهم باضاني ابوهم قال ليهم اوعكم الايام دي الهرمونات قايمه عليها اها سموني Hormonemonster
|
Post: #9
Title: Re: 15% من الخليجيات يضربن أزواجهن أثناء الدورة الشهرية !!!!
Author: ابوحراز
Date: 09-09-2007, 05:31 PM
Parent: #7
الهرمون مونستر
غايتو أنا أكثر شيء بيغيظني في الدنيا دي
الراجل يكون { طويل } ومرتو تدقو !!!
والله معانا واحد هنا أطول واحد في الجالية السودانية
لكن مهروش هرشة بطالة جداً
اقسم بالله قلت ليهو أنا القى زي طولك دا الا { ابرك } فيها كل يوم
وتاني مايحلوني منها الا ناس المطافي
والله مش كان هرموناتا قايمة
كان طايرة في السماء برضو حا { ابرك } فيها
|
Post: #10
Title: Re: 15% من الخليجيات يضربن أزواجهن أثناء الدورة الشهرية !!!!
Author: doma
Date: 09-09-2007, 05:32 PM
Parent: #7
اها انا كمان شئ بخوفني غير الشبشه ما في لكين لو الزول اومي لي بيده فاضيه و قال شبشه بناوله الضربه القاضيه
|
Post: #11
Title: Re: 15% من الخليجيات يضربن أزواجهن أثناء الدورة الشهرية !!!!
Author: doma
Date: 09-09-2007, 05:35 PM
Parent: #10
Quote: غايتو أنا أكثر شيء بيغيظني في الدنيا دي
الراجل يكون { طويل } ومرتو تدقو !!!
|
لووووول اب حراز ادق شنو هو داب طول ؟؟؟ طول وعرض عامله حسابي بفشوا في الوليدات عاد الوليدات ما بدقوا امهم
|
Post: #12
Title: Re: 15% من الخليجيات يضربن أزواجهن أثناء الدورة الشهرية !!!!
Author: فيصل نوبي
Date: 09-09-2007, 05:37 PM
Parent: #11
Quote: والله تلقاك يومياً بتغسل في العدة
وكان المدام امها { حيّة } أمانة ما وقع زووووووووول |
خالتو دوما ما تديو راسو الزول ده
|
Post: #17
Title: Re: 15% من الخليجيات يضربن أزواجهن أثناء الدورة الشهرية !!!!
Author: ابوحراز
Date: 09-09-2007, 05:58 PM
Parent: #12
40% من المصريات يضربن ازواجهن
هكذا تقول الدراسه التي قام بها (المركز القومي للبحوث الاجتماعيه والجنائيه)
على 50 امراه وحسب الدراسه فان ثلث هؤلاء النساء يشعرن بالارتياح واللذه بعد ضرب الازواج!!
شريحه الاميات كانت الاكبر حيث وصلت نسبتهن 78% من جمله اللائي يضربن ازواجهن
وقالت الدراسه ان وسائل النساء تراوحت بين
الضرب والخنق والتسميم واستخدام الالات الحاده والاقراص المنومه كي تسهل عمليه الضرب
وقالت الدراسه ان عنف النساء ضد الرجال يزداد في ثلاث فترات
1 نهايه كل شهر
2 بعد العوده من العمل
3 في فصل الصيف
وجغرافيا تزداد في الوجه البحري مقارنه بالوجه القبلي
وفي المدن الحضريه الكبرى مقارنه بالمدن الصغرى
واختتمت الدراسه بالاشاره الى تزايد حالات عنف النساء ضد الرجال في مصر
وان الضرب وحده يشكل 84% من حالات العنف الاسري
كذلك ذكرت الدراسه ان 23% من الزوجات المسجونات في مصر ضربن ازواجهن
لاسباب تعود لضعف الزوج
و65% لاسباب تتعلق ((بغيرة ازواجهن)) التي تحول حياتهن الى جحيم لايطاق
يعني المصريين ديل تاريهم فصيحين في الفاضي
|
Post: #13
Title: Re: 15% من الخليجيات يضربن أزواجهن أثناء الدورة الشهرية !!!!
Author: ابوحراز
Date: 09-09-2007, 05:39 PM
Parent: #11
دوما
والله انا عافي من صاحبنا الطول وعرض
ان شاء الله ربنا يحفظه
طبعاً أنا بتكيف جداً لمن واحدة تكون جندرية وزوجها يهرشها
|
Post: #14
Title: Re: 15% من الخليجيات يضربن أزواجهن أثناء الدورة الشهرية !!!!
Author: عمر صالح عمر
Date: 09-09-2007, 05:51 PM
Parent: #13
أبو حراز
انا بقول كفيلي بتجنن علينا آخر الشهر مالوه
اتاري مضروب ..............................
|
Post: #16
Title: Re: 15% من الخليجيات يضربن أزواجهن أثناء الدورة الشهرية !!!!
Author: رأفت ميلاد
Date: 09-09-2007, 05:57 PM
Parent: #14
والله يا أبو حراز العنوان موتنى بالضحك دخلت دومة قطعت مصارينى
المصيبة تعمل لينا رخصة لللبع
الله يستر
|
Post: #19
Title: Re: 15% من الخليجيات يضربن أزواجهن أثناء الدورة الشهرية !!!!
Author: doma
Date: 09-09-2007, 06:14 PM
Parent: #16
, اهلا بيك يا رافت تحياتنا للجميع . لول شفت محن اب حراز دائما بوستاتوا لذيذه ودمها خفيف
|
Post: #24
Title: Re: 15% من الخليجيات يضربن أزواجهن أثناء الدورة الشهرية !!!!
Author: ابوحراز
Date: 09-10-2007, 06:09 AM
Parent: #16
أخوي رأفت
Quote: المصيبة تعمل لينا رخصة لللبع
الله يستر |
اللبع قبل العشاء وللا بعد العشاء بفتح العين
ترا الحكاية تفرق كتير !!!!
قال لبع قال !!!
|
Post: #23
Title: Re: 15% من الخليجيات يضربن أزواجهن أثناء الدورة الشهرية !!!!
Author: ابوحراز
Date: 09-10-2007, 06:06 AM
Parent: #14
أخي عمر
Quote: أبو حراز
انا بقول كفيلي بتجنن علينا آخر الشهر مالوه
اتاري مضروب .............................. |
ياخي مشكلتك بسيطة جداً
تحاول تعرف مواعيد { الدورة } متين
وتتجنب صاحبك في هذه الأيام
وكفى الله المؤمنين شر القتال !!!
|
Post: #15
Title: Re: 15% من الخليجيات يضربن أزواجهن أثناء الدورة الشهرية !!!!
Author: doma
Date: 09-09-2007, 05:53 PM
Parent: #13
| Quote: طبعاً أنا بتكيف جداً لمن واحدة تكون جندرية وزوجها يهرشها |
لووووووووووووول لوول غايتو حسادتك عينه يا اب حراز بيهرشني لكين لكين بنظموا ليك بالراحه اولا لمده يومين بكتل النار اعمل فيها عيانه وبعرف اتمرضن والله تحلف تقول عيانه السنيين . يمرق الشغل اقنبر لبورد بكري اولادي بجوا البيت قبالو اعمل ليهم سلطه ولحمه بالطوه ناكل ونغسل عدتنا .
|
Post: #31
Title: Re: 15% من الخليجيات يضربن أزواجهن أثناء الدورة الشهرية !!!!
Author: ابوحراز
Date: 09-10-2007, 09:11 AM
Parent: #15
دوما
| Quote: اعمل ليهم سلطه ولحمه بالطوه ناكل ونغسل عدتنا . |
غايتو مرات عليكن جنس غتاته ماعادية
وزولنا المحروقة أعصابو في الشغل بالله ياكل شنو؟؟؟
مرة بعد مولودنا الأول ست النفر قالت لازم يجيبوا بيض
والبيض الوقت داك في أهل العوض كان حاجة صعبة جداً
يعني الا تعرف مواعيد جدادة الجيران بتبيض متين
عشان تشتري منهم البيض
أها اشترينا البيض
قالت الدكتور قال ليها انتي تاكل البياض
والمولود الصغير ياكل { الصفار }
قلت ليها طيب يعني ابو القدح ياكل { القشرة } وللا شنو ؟؟؟
قال بياض قال !!!!!
|
Post: #18
Title: Re: 15% من الخليجيات يضربن أزواجهن أثناء الدورة الشهرية !!!!
Author: doma
Date: 09-09-2007, 06:06 PM
Parent: #13
Quote: نهايه كل شهر
2 بعد العوده من العمل
3 في فصل الصيف |
لوول غايتونهايه كل شهر دي عرفناها يكون ما بجيب المرتب كامل
بعد العوده من العمل يمكن يكون بيصل متاخر
اها في فصل الصيف دا السبب شنو ؟؟
غايتو في احتمال انه بيبصبص للمصيفيات
|
Post: #20
Title: Re: 15% من الخليجيات يضربن أزواجهن أثناء الدورة الشهرية !!!!
Author: Kamal Karrar
Date: 09-09-2007, 06:17 PM
Parent: #1
دوما العزيزة تحية هارمونية (من Harmony
أسمك دي كان ينفع شخصية من شخصيات هاري بوتر.. أقصد (هرمون مونيستر)
أنت يا دوما ليه حدك نهرتين؟؟؟.. أنت ما عارفة لغاية 3 نهرات مسموح بيها permissable
وده أسمو اللعب بره الميس.. لكن النهرة الرابع... بتجيب الهواء...لووووول
وبعدين يا دوما اللبع ساهل كعب الحردان...
فتكم بعافية....
|
Post: #21
Title: Re: 15% من الخليجيات يضربن أزواجهن أثناء الدورة الشهرية !!!!
Author: doma
Date: 09-09-2007, 06:30 PM
Parent: #20
لووووووووول حباب حفيد الزينيين اهلا بيك يا كمال مشتاقين والله
من اليوم نرفع عدد النهرات لثلاث لكين لو الثالثه جابت الهواء يكون كله من اب حراز
|
Post: #22
Title: Re: 15% من الخليجيات يضربن أزواجهن أثناء الدورة الشهرية !!!!
Author: ابوحراز
Date: 09-10-2007, 06:03 AM
Parent: #21
سلالالالالالالالالام
Quote: وقالت الدراسه ان وسائل النساء تراوحت بين
الضرب
والخنق
والتسميم
واستخدام الالات الحاده
والاقراص المنومه كي تسهل عمليه الضرب !!!!!!!!!!!!! |
غايتو نحمد الله نحن ناسنا { ناس عض } سااااااااااااي
يعني بصراحة { العضة } ممكن تتورم شوية
لكن لمن تصحو من النوم تلقى آثارها انتهت
قال تسميم قال !!!!
|
Post: #25
Title: Re: 15% من الخليجيات يضربن أزواجهن أثناء الدورة الشهرية !!!!
Author: ابوحراز
Date: 09-10-2007, 06:13 AM
Parent: #21
دوما
| Quote: اها انا كمان شئ بخوفني غير الشبشه ما في |
والله خلعتينا
أنا قريتا { الشبشب }
قال ضربة قاضية قال !!!
|
Post: #26
Title: Re: 15% من الخليجيات يضربن أزواجهن أثناء الدورة الشهرية !!!!
Author: Kamal Karrar
Date: 09-10-2007, 06:13 AM
Parent: #1
يازول.. أبو حراز
لكن العض درجات..
ممكن يقطع أضانك أو نخرتك.. تخيل نخرتك مقطوعة ثاني
أسم محلبية ولا خمرة (بضم الخاء) ما بتشمها...
أعمل حسابك.. السم أخير.. موت بشرف ولا حياة مجهجهة
|
Post: #27
Title: Re: 15% من الخليجيات يضربن أزواجهن أثناء الدورة الشهرية !!!!
Author: ابوحراز
Date: 09-10-2007, 06:18 AM
Parent: #26
فضل كرار
| Quote: أعمل حسابك.. السم أخير.. موت بشرف ولا حياة مجهجهة |
تعرف الشيء المحيرني في الدنيا دي شنو ؟؟
من يوم ما قمت وعشت في السودان
ما سمعت بي راجل { سمم } مرتو
لكن دائماً أسمع بي { مرة } سممت راجلها
ما عارف السر في الحكاية دي شنو ؟؟
السؤال مطروح للنسوان !!!
والشيء البغيظ الواحد شنو
الرجال الواحد عارف انو { المرة } دي سممت راجلها
تاني يمشي الواحد منهم يعرسها
يعني حا تكون ياراجل ياغبيان إنت أحسن من الأول وللا أحسن من الأول ؟؟
قال { موته } بي شرف قال !!
|
Post: #28
Title: Re: 15% من الخليجيات يضربن أزواجهن أثناء الدورة الشهرية !!!!
Author: Kamal Karrar
Date: 09-10-2007, 06:30 AM
Parent: #1
لوووووووووووول يا أبو حراز
أنا غبيان لكن أنا اسمي كمال كرار..
ما فضل كرار..لوووووووووول.. يا زول
باقي لي أنت معضوض من الصباح عضة في نص نافخوك
خلتك تقلب بقدرة قادر كمال فضل..ودوما التومة
تحياتي
|
Post: #29
Title: Re: 15% من الخليجيات يضربن أزواجهن أثناء الدورة الشهرية !!!!
Author: ابوحراز
Date: 09-10-2007, 06:59 AM
Parent: #28
ياخي بتتشابهوا زي الأرانب
اعمل ليكم شنو
العفو ياكمال كرار
تصدق ست النفر كانت عاوزة تسمي المولود الأول { كمال }
لكن احتكمنا طبعاً للديمقراطية
وتم وضع اسم كمال
وكذلك اسم هشام ليتم الاختيار منهم
وارسلتها للعصير
وبعدها أخرجت كمال والشلة بتاعتو من المزهرية
وكتبت على جميع الأوراق بالداخل { هشام ، هشام ، هشام }
وطلبت منها هي التي تختار
وبالطبع اختارت هشام وسط ذهولها واستغرابها الكثير جداً
هذه أغبى ديمقراطية أمارسها في حياتي !!!
قال أتاتورك قال !!!!
|
Post: #30
Title: Re: 15% من الخليجيات يضربن أزواجهن أثناء الدورة الشهرية !!!!
Author: ابوحراز
Date: 09-10-2007, 07:08 AM
Parent: #29
أها شوفوا ضرب السعوديات لأزواجهن
70%من ا لزوجات السعوديات يضربن أزواجهن مساءاً
95%لايشعرن بالندم بعد ضرب ازواجهن
| Quote: ابوعبدالعزيز:ضرب زوجتى موجع ولاينقذني منها إلاالجيران!! |
| Quote: -أشعر بالراحةحينما أفرغ طاقات الضرب في زوجي أم عبدالله |
والله ماشاء الله عليك 00 لكن زوجك يا أم عبد الله بيكون مكره العمال الأجانب عيشتهم
Quote: - أبو عبد العزيز يعمل سائقاً لسيارة أجرة ويكسب عيشه من هذه المهنة يقول :
" اعمل 16 ساعة وارجع الى البيت منهكاً متوتراً ولا أرغب في الحديث مع أحد ، وزوجتي تتحمل أيضاُ أعباء المنزل ورعاية الأولاد وكذلك والدتي واشعر ان عليها ضغوطاً كبيرة هي أيضاً ولهذا عندما تقوم بضربي اتحملها كما هي تتحملني عندما اضربها ، ولكن الغريب الذي يراه الناس أن تقوم الزوجة بضرب زوجها ، وانا اعرف رجالاً كثيرين يتحملون ضرب زوجاتهم من اجل البقاء على البيت و الأولاد ، ولكن زوجتي ضربها موجه في بعض الأحيان وفي احد المرات سكبت علي الشاي المغلي وحرقتني ولم استطع أن انقذ نفسي منها الا بعد تدخل الجيران " . |
وفي أحدث دراسة ثبتت أن 70 % من الزوجات يضربن ازواجهن وبأساليب متعددة ، ومن اسباب الاعتداء أشارت الدراسة الى ان 30 % من المعتديات على ازواجهن نشأت بينهن خلافات من سوء المعاملة وقلة الموارد المالية بينما اشارت الدراسة ان 50 % للعصبية الزائدة و 15 % للغيرة و 5 % للخلاف مع الاسرة وفي المقابل تبين أن عصيان الاوامر كان من اهم اسباب اعتداء الزوجة على الزوج ، فالمرأة تحاول أن تفرض شخصيتها على زوجها الضعيف الشخصية بالضرب
وذكرت الدراسة أن 20 % من المعتديات على ازواجهن يقمن بالاعتداء صباحاً قبل ذهاب الزوج الى عمله مقابل 70 % يقع في المساء أي بعد عودته من عمله فيما لم تتذكر 10 % منهن متى وقع الاعتداء بالضبط
|
Post: #32
Title: Re: 15% من الخليجيات يضربن أزواجهن أثناء الدورة الشهرية !!!!
Author: اساسي
Date: 09-10-2007, 09:17 AM
Parent: #30
بالله
عشان كدا؟؟؟
ياخي مديرنا دا تقول مرته عندها نزيف !!
|
Post: #35
Title: Re: 15% من الخليجيات يضربن أزواجهن أثناء الدورة الشهرية !!!!
Author: ابوحراز
Date: 09-10-2007, 09:36 AM
Parent: #32
أساسي
جايز مديركم عندو خلل في { الدورة الدموية }
قلت لي منجضكم نجاض شديد
عارف ليه ؟؟
عشان جاييكم نجييييييييييييييض
|
Post: #33
Title: Re: 15% من الخليجيات يضربن أزواجهن أثناء الدورة الشهرية !!!!
Author: ابوحراز
Date: 09-10-2007, 09:23 AM
Parent: #30
سبحان الله
Quote: وذكرت الدراسة أن 20 % من المعتديات على ازواجهن
يقمن بالاعتداء صباحاً قبل ذهاب الزوج الى عمله |
يبدو لي أن الضرب في الفترة الصباحية يكون أخف وطأة من الفترة المسائية
ففي الفترة المسائية تكون المدام قد أخذت نومها بالكامل
واستحمت
وأكلت بمزاج
وشربت ماتبقى من العصائر
وشاهدت التلفزيون بمزاج
يعني أكيد نشاطها في الفترة المسائية غير عادي
لهذا ستكون { اللكمات } موجعة جدا
هنيئاً لمن يضربون صباحاً
رغم أنني اعرف أن هذا على حساب العمال المساكين الذين يعملون تحت رحمة هذا المجلود !!!
كمان نحمد الله
نحن لمن الجماعة كانوا معانا هنا
كنا بنخليهم نايمين
وفي المساء أول ماتجي داخل
اها كيفك يا امورة
والله مشتاق ليكم بحرارة شديدة
اها 00 الفي راسها كلها تطير
لهذا أنصح جميع الأزواج { الرجال } بالآتي
عندما تدخل مساءا الى منزلك فعليك ان تبتسم اذا كانت المدام قاعدة في البيت
أما اذا لم تكن موجودة فبإمكانك أن تمد بوووووووووووووزك لحد القصر الجمهوري
|
Post: #34
Title: Re: 15% من الخليجيات يضربن أزواجهن أثناء الدورة الشهرية !!!!
Author: ابوحراز
Date: 09-10-2007, 09:30 AM
Parent: #33
خبر عاجل
| Quote: أما اذا لم تكن موجودة فبإمكانك أن تمد بوووووووووووووزك لحد القصر الجمهوري |
اتصل علي أحد القراء قبل قليل وقال لي
والله يا ابوحراز تمد بووووووووووووزك لحد القصر الجمهوري كان يقطعو ليك !!!!
قلت ليهو المشكلة ماتعرف القطع ليك بوزك منو
البشير وللا سلفاكير
أم علي طه
وللا اركو مناوي
وللا آمنة ضرار
أم موسى محمد احمد؟؟
|
Post: #36
Title: Re: 15% من الخليجيات يضربن أزواجهن أثناء الدورة الشهرية !!!!
Author: ابوحراز
Date: 09-11-2007, 06:37 AM
Parent: #34
كمال كرار
| Quote: باقي لي أنت معضوض من الصباح عضة في نص نافخوك |
ياخي والله النسوان ديل ظريفات جداً
خاصة المراة السودانية يعني غضبها قليل بالمقارنة مع الأخريات
كما أنها ترضى بالقليل
صحيح في بعضهن نقمة على الزوج
اعرف الكثير منهن تسببن في سجن الزوج بسبب الديون
لكن برضو كثيرات منهن وقفن مع أزواجهن بشدة
ونقل الأزواج الى السمو
|
Post: #37
Title: Re: 15% من الخليجيات يضربن أزواجهن أثناء الدورة الشهرية !!!!
Author: ابوحراز
Date: 09-15-2007, 11:48 AM
Parent: #36
يوم أمس ذهبت لأداء العمرة
ونحن في الصفا والمروة شاهدت سودانية ماشاء الله طول وعرض
والراجل زي { الفار }
حلفت في السعي الا يركبوها في العجلة
ولحد هنا كل شيء طبيعي
فإدارة الحرم توفر عربات بالايجار لكل من لم يستطع السعي برجليه
بت اللذين دي قالت لزوجها الا يدفرها هي
والزوج المغلوب على أمره كان يريد أن يستأجر أحد العمال ليدفر العربة
ولكن حلفت ان لايقود عربتها المتحركة أي شخص آخر
وصاحبك بقى يدفر 00 وهناك أماكن مرتفعة بجوار الصفا والمروة
وسمعتها كثيراً يقول { يا ابومروة } اي أنه يستنجد بالآخرين ليدفروا العربة معه
طبعاً هذه معناها في البيت هي وزارة الداخلية
ووزارة الدفاع الوطني
بالله أرجو تزويد البوست بدراسة عن ضرب السودانيات لأزواجهن
لأننا عرفنا المصريات
وكذلك نسبة السعوديات
عاد الله يستر ماتكون الدراسة 80% فما فوق !!!
ان شاء الله ربنا يقبل عمرتنا
لأنني في كل مرة أرى هذا المخلوق أقول في نفسي
" بالله دي كلها مرتك "
طبعاً وزنها اقل شيء 130 كيلو وصاحبنا لايتعدى 56 كيلو
|
|