.. جديد الهلال ..

تعادل الهلال مع الترجى فى ستاد المنزه بتونس وصعد الى المربع الذهبى
فشل الترجى فى الثار من الهلال
وفشل كذلك فى مصالحة جماهيره بعد سلسلة الهزائم التى لحقت به مؤخرا
فشل الترجى فى تحقيق الفوزعلى الهلال رغم انه استبدل ثلاثة مدربين فى البطولة
والرابع البرزيلى كابرال يتابع المباراة من المدرجات والعربى الزواوى من المنطقة الفنية
كسر الهلال حاجز الارض وكسب نقطة معنوية وهو يواجه خامس افضل فريق
افريقى فى القرن الماضى والثانى فى القرن الحالى
نجح الهلال فى تقاسم نقاط المباراة رغم الظروف الصعبة التى مرت به قبل المباراة
بغياب عمر بخيت لاعب المحور وركازة الهلال وخلال المباراة باصابة ريتشارد
ونجح الهلال فى ان يضع الكرة السودانية بين اقوى اربعة اندية افريقية وترك خلفه
فرقا مثل الترجى التونسى واسيك وفى المجموعة الثانية الجيش المغربى وشبيبة
القبائل الجزائرى
اكد الهلال بتعادله امام الترجى رغم ان الاخير ليست لديه امال فى البطولة ولكن دوافع
الفوز موجودة انه فريق كبير قادر على التعامل مع الفرق الكبيرة خارج ارضه ومعروف
ان مباريات الارض فى معظم الاحوال تكون للمضيف وقد شاهدنا كيف ان الهلال كان
مؤهلا للفوز واضاع فرصا حقيقية للتهديف
ولكن وقبل مواجهة النجم الساحلى التونسى يجب الالتفات الى بعض الخلل فى اداء الهلال
امام الترجى وفى المقدمة المستوى المهزوز والخروج الخاطىء الذى تكرر من المعز
محجوب فيما تكفل حمودة مرة وعلاء الدين يوسف فى الاخرى بابعاد الكرة على
خط المرمى
ولابد ايضا من معالجة حالة التوهان التى كان عليها خط وسط الهلال اليوم حيث لو كان
فى حالته الطبيعية لناءت شباك حمدى الكسراوى بالاهداف
وربما نجد العذر فى هذا الامر لان الاهداف المرسومة من قبل المدرب ربما تكون مختلفة
عما نشاهده نحن على الكراسى الوثيرة بعيدا عن اجواء المباراة
اعتقد ان الهلال وعلى العكس من الكثيرين اللذين لم يظهروا فرحتهم بسبب التعادل اضاف
اليوم نجاحا جديدا واضاف رصيدا من خلال هذه المباراة وقد انتهت اخر مباراة للهلال
امام الترجى فى تونس 5-1 للترجى بعد ان تقدم الهلال بهدف فى الدقيقة 59 ثم انهمرت
الاهداف فى شباك الهلال الذى كان قد تقدم فى الذهاب 2- صفر بهدفى الهيثمين
فالهلال نجح فى مجاراة فريق يلعب بدون ضغوط ويهدف فقط لمصالحة جماهيره وقد هزم
الاهلى المصرى بذات الملعب
ومن وجهة نظرى ان مواجهة الهلال للنجم التونسى او الاتحاد الليبى لاتخلق الفرق الكبير
فمن يملك ارادة الفوز يستوى عنده الخصوم خاصة اذا علمنا ان الاتحاد الليبى الوافد الجديد
لمربع الذهب الافريقى يتساوى مع الهلال فى قوة الاداء على ملعبه ويمتلك جمهور شرس
يملا المدرجات ويخلق حصارا نفسيا قاسيا على الخصم وكما يقال فان الجديد شديد
والجانب المعنوى لدى الاتحاد الليبى اقوى منه لدى النجم التونسى المتخم بالبطولات
واتوقع ان يعانى الاهلى فى مواجهة هذا الفريق وان بدت الكفة اكثر رجحانا للاهلى المصرى
وهذا طبعا لا يقلل من صعوبة مواجهة النجم التونسى فهو فريق قوى وعنيد ولكن هذا هو
قدر الهلال ويتذكر الاهلة يوم ان اوقعت الهلال القرعة فى مجموعة الموت الكل راهن
على ان الهلال ميت وسط العمالقة ولكنه خرج كالمارد بل انه كان اول فريق يضمن التاهل
من خمسة جولات تاركا السادسة للبرتوكولات فقط
اذن فالهلال لا يخشى احدا
واجب الكلمة يحتم على توجيه الاشادة الى
علاء الدين يوسف الذى ملا الفراغ فى غياب ريشادر المفاجىء
وحكم المباراة الذى جعلنى اشك انه من قارتنا الموبوءة بالظلم التحكيمى
لقد كان عادلا جدا .. وهذا فى حد ذاته جديدا اخر

.
مرحبا أخي تيتاوي ..
صراحة مستاء أنا من الهلال اليوم ..
ليس بسبب النتيجة ..
ولكن بسبب الأداء الباهت .. و ( البارد )
لم أشعر بأن فرساننا كانوا يلعبون من أجل الفوز
ولو فعلوا .. اعتقد كانوا سينالون نقاط المباراة .
...
أتمنى أن تبدأ الاستعدادات الجادة منذ اليوم لمواجهة النجم الساحلي
وأن يكون هاجس الجميع ضرورة حسم اللقاء في أم درمان
فمباريات الهلال الأخيرة خارج قلعة طلعت فريد كلها غير مطمئنة ..

قلوبنا مع المارد الأزرق ..
.

تيتاوى
ســـــــــــــــلام
اتفق معاك تماما .
ولا خوف على الهلال امام النجم الساحلى او اى فريق اخر
الهلال اثبت للجميع بما لا يدع مجال للشك انه الفريق الاقوى.
افتكر الهلال مهيئ اكتر من قبل للوصول للمباره النهائيه
واحراز كاس البطوله اذا تعامل الجهاز الفنى واللاعبين
مع هذه المرحله بى كل جديه ومسئوليه ليصبح الحلم واقع معاش .


احمــد خضــر

النجم الساحلي أرحم من الاتحاد الليبي..

بالله أدونا أخبار زيادة ..

ما حجم إصابة ريتشارد؟؟؟

أخبار الإنذارات شنو؟

ابوالتيت
سلامات
غايتو الحكم ما قصر معاكم خالص خالص والمعز مالص مالص

راكـــوبة ... السلام عليكم ..
قلتلى كيف ؟؟
مـــريخاب ضد الأرهاب ؟؟؟
الصحفى التنزانى المات داك .. كان ياربى مات من الفرحة ؟؟!!
نحن الحمدلله ما كتلنا لينا زول !!

اخى حاتم
سلامات

Quote: صراحة مستاء أنا من الهلال اليوم .. ليس بسبب النتيجة .. ولكن بسبب الأداء الباهت .. و ( البارد ) لم أشعر بأن فرساننا كانوا يلعبون من أجل الفوز ولو فعلوا .. اعتقد كانوا سينالون نقاط المباراة

كلام سليم ياحاتم الهلال لم يقدم فى المباراة مستواه المعهود
فى الفترة الاخيرة وقد كان الشوط الثانى باهت جدا ولكن من غير
الممكن ان نلغى الخصم تماما ونعتبر الترجى وكانه ليس موجودا
وربما ان المدرب له حساباته الخاصة فى ظل الظروف التى مر بها
الهلال خلال المباراة
كما انها المرة الاولى التى يخرج الهلال فيها بنقطة من تونس
وهذا فى حد ذاته ايجابية تحسب للهلال الذى صعد الى النهائى
بفارق خمس نقاط من الترجى وثلاثة من اسيك

احمد خضر
سلامات

Quote: ولا خوف على الهلال امام النجم الساحلى او اى فريق اخر الهلال اثبت للجميع بما لا يدع مجال للشك انه الفريق الاقوى. افتكر الهلال مهيئ اكتر من قبل للوصول للمباره النهائيه واحراز كاس البطوله اذا تعامل الجهاز الفنى واللاعبين مع هذه المرحله بى كل جديه ومسئوليه ليصبح الحلم واقع معاش

الشق التانى ده هو الاهم خاصة ان الميدان اثبت قوة جميع الفرق
المتنافسة فى كبرى البطولات الافريقية ولابد من التعامل مع المرحلة
المقبلة بالاسلوب الامثل
سلمت يااحمودى ويارب ابو الهل دايما منتصر

Quote: فشل الترجى فى الثار من الهلال

تيتاوى

كمان انتا ما تبالغ ياخ
اسع عليك الله وامانه فى زمتك العندو ثأر مع التانى منو ؟
الهلال والا الترجى
ياخ الترجى دا غلبكم فى تلاته مباريات 16 هدف
وتقول لى الترجى فشل فى الثأر

غايتو ياتيتاوى انتوا الايام دى مابراكم

و يواصل الهلال هذا الموسم تصدره للدورى الممتاز
والفوز باللقب للمرة الخامسة على التوالى
ولاعزاء للوصيف نمرة اربعة
يبدوا نك نسيت هذه الفقرة المهمة
الله يرحم الزميل التنزانى دى عايزة موسوعة جينيس
راكوبة
بس عندى طلب بسيط ياخى صغر العرضحال ده شوية عشان
البوست يمشى فى مساره

Quote: صغر العرضحال ده شوي

المشكلة الإنجازات كتيرة وما بتتصغر

ياعلوة انتا قاعد وين ياخوى
لو كده تسعة سان جورج دى بتسدوها متين
ديل سيدا وكليتشى وجودوين

Quote: المشكلة الإنجازات كتيرة وما بتتصغر

خلاص ياسيدى خليهن بعيوات

الاخ الواثق

Quote: النجم الساحلي أرحم من الاتحاد الليبي..

طبعا النجم ده نحن عارفين نضربوا كيف والهلال
لا يخشى احدا ولا فريق القرن ولا غيروا

ما بنفع ،، عشان الفائدة تعم !

Quote: عشان الفائدة تعم !

طيب ما تجيب
لينا زيكو لمن تابط الكورة وقال تانى
ما بتدقا هنا
برضوا عشان تعم الفائدة

الترجى اكتر فريق سجل فى شباكه اكبر
عدد من لاعبى الهلال
والى الدين رحمه الله هدفان
صلاح عبد الله ( دوشكا ) هدف
هيثم طمبل قبل ان يتدهور مع ايداهور 3 اهداف
هيثم مصطفى سييييييييدا هدف
جودوين 3 اهداف
ريتشارد هدف
ما باقى الا شبشة
ياعلى بشير
قلت لى اسمو منو
ااا نصر حسين داى
داى كمان الجن

Quote: لينا زيكو لمن تابط الكورة وقال تانى ما بتدقا هنا

بجيب ليك خبرها اصلوا المنشور اعلاه هو الجزء الأول، وبرضو أول فرتقة لي كورة كانت هلالية وبي عكاز كمان

Quote: وبرضو أول فرتقة لي كورة كانت هلالية وبي عكاز كمان

وياخى ما تنسى تجيب لينا كورة الاهلى والمريخ
وسبب السلك الشائك فى ستاد الخرطوم

اقول ليك انتو من زمن المباريات في سوق القش تقول لي استاد الخرطوم، قلنا ليكم أبوالهل رائد الظواهر السالبة في شرق ووسط أفريقيا ما صدقتوا

راكوبة :

Quote: رائد الظواهر السالبة

دى اسال منها مصطفى توفيق بصمة ودكتور محمد جلال اقرار

حبيبنا عامر اولا تحية و سلام: تعرف احسن حاجة في البوست بتاعك ده انه جاب لينا العزيز احمد خضر بعد غيبة طويلة و عبرك تحياتي له:
عندما تم اعلان المجموعات خاف كل الهلالاب علي فريقهم بل حبيبهم من المعارك الضارية التي في انتظاره لكن الفتي الازرق الانيق المدعوم بحب اهله و رضي والديه كان لها و اكثر حتي ادهش كل محبي المستديرة و صار علي كل لسان عربي و اعجمي .. ولم يكن اكثر المتفائلين يتوقع مثل هذا المردود ,,الا ربان السفينة ريكاردو و كتيبته الميامين كانوا علي ثقة بانفسهم : و بنفس المنطق لا خوف علي الهلال من النجم لان النجم ليس افضل من اسيك او الاهلي و لكن الخوف من الطموح المشروع للاتحاد اليبي و الذي اتوقع ان يتغلب علي الاهلي و يصعد للنهائي و بكل الاحوال ماقدمه ابناء الهلال حتي الان يكفي جدا بان نشكرهم و نرفع لهم القبعات تحية و احتراما

الهلالابى الجميل
صديقى عبد الغفار
كلام سليم وما اشبه الليلة بالبارحة كل ما نتخطى عقبة كبيرة
ياتى الخمير الحمر ليبشرونا بعقبة جديدة وطبعا كل هذا استباق
للاحداث وباطنه الخوف من نجاح جديد للهلال المرعب والذى اصبح
على كل لسان وبفضله ارتفع تصنيف الدورى السودانى وبات الهلال واحدا
من افضل ستة اندية افريقية وقد فاز على ثلاثة من اافضل الاندية
الافريقية الاهلى فريق القرن والترجى ثانى افضل فريق منذ سنة
1992 والوحيد الفائز بجل البطولات الافريقية واسيك الرابع افريقيا