# أهل العوض ،،، (قصيدة رباعية) #

لرواد ومحبى شعر البادية أهديهم هذه الرباعية كأول مشاركة ،،،

أهل العوض
...........
سمـاحةْ اهـلْ الْعوض ،، فى النّـَمَّه والدُوباىْ
سمـاحةْ اهـلْ العوض ،، فى العَرْضَه والْهبباىْ
إن دُرْتَ العـوض ،، فى الحـاره بلْـقَى حِـدَاىْ
وإن راح العـوض ،، زى الفـقـدَّتَ جــناىْ
...........
أهــلى الغُـبـُش ،، ناسـا بِسِـتْرُوا الحـال
قُـولُـهمْ مَـنَـقََّى ،، مصـفَّى بـى غــربال
إن دُرْتَ تعــرف ،، قَــدْرَ المُـرُوَّه رِجــال
فُـوتُـهمْ بتْـعِرِفْ ،، كـيف الـوِلـِف كــتَّال
...........
كـرم النَّشـامه ،، فى السَّـهَلَه تَـلْقَى مَـدَفَّـق
جـوداً مـأصل ،، مـو كَـرْوَه سـاى ومـلفَّـق
أصـحاب نسـب ،، فى تُـربةْ جُـدُودَا معَـتَّـق
مـو جِـبَّةْ دراويش ،، نُصَّـها المرْقُـوعْ ملتَّـق
..........
الجـبنه المجيَّـهَة ،، فـحماتا فـوق المنْـقَـد
بت العـازه جـرَّت ،، بمبرا المحـزوز مـقـدد
والعــباس إنتـكى ،، فـرَّ الرُجُـول واتمــدد
فـى البِـكْرِيه تـلَّتْ ،، فى الـبركه يوت ماعـدد
..........
لـمَّـةْ أولاد العـوض ،، عـلى وعباس وود الزين
يَكُرْبـُو التيوه والطابه ،، وشليل ساكِـنُّو حـفيانين
وديك الرِمَّـه حبَّاسا ،، وعـجاج شدَّتْ عكالتو تبين
ومـويةَ الطمله خَمْجَه ،، يَنيـخْ حِـدَاها جمل الطين
...........
بـنُّــوتْ العـوض ،، أمُّـونه نـاس زينــوبه
شَــرَاِبن القِــرْبَه ،، ومَـصِـيِفنْ الـرَّاكـوبه
مابِعْـرِفَـنْ مكـياج ،، ولا قَصَّـةْ شـعر مقْـلوبه
سمـاحةْ ِفـطْره بس ،، منْ راسـا لـى عرقـوبا
..........
يـوم دقَّـتْ الدلُّـوكه ،، برَمَـتْ نِصـيصا ومدَّت
جــيدا المَـدُوعَجْ ،، مِتْـلَ الغــزالة الهــبَّت
عـامـت بالصِّـدير ،، للسـاحه قَـطَعتْ عــدَّت
رَمَـتْ الشَّـبَال ،، فـوق السَّــباتَه اتـشــتت
.........
شــن القـول بعـد ،، ما الحـله من اعـرافا
سـمـعت بالـخبر ،، الجـاى شـاقى اطــرافا
أمـونه وِلْـدَتْ ،، فـوق حــولا تـمَّ زفــافا
للبِـكْـرِى جـابتْ ،، ياناس دَقُـــر للشــافا
..........
أرض الــبطانه ،، الصافى لونا تَكـنُّو تِبْـرِى
روح البطـانه ،، الشَّـتله فـوقا يغـنى قُـمْرِى
حال الـدنيا ،، ريتك منُّو يُمَّه انشا الله تَـبْـرِى
من فُـتْـنَاِكى يُمَّه ،، وحالنا تبْ مو ماشى دُغْرِى
..........

الفاتح الجنيد ـ مسقط

Quote: أهــلى الغُـبـُش ،، ناسـا بِسِـتْرُوا الحـال قُـولُـهمْ مَـنَـقََّى ،، مصـفَّى بـى غــربال إن دُرْتَ تعــرف ،، قَــدْرَ المُـرُوَّه رِجــال فُـوتُـهمْ بتْـعِرِفْ ،، كـيف الـوِلـِف كــتَّال

تحياتى الرباعيه دى اجمل ما كتب عن اهلى اهل العوض
العبد لله من اصول عوضيه وكلامك ده تب رفع راسنا لفوق

يعطيك العافيه وقلمك سنين بحق وحقيقه وفتا اختى الغبشه بهناك

الاخ الفاتح

اجادعك من الضفة الغربية للبحر من ابوفروع واقول ليك شكرا على لوحة الكلامات الجميلة المجسدة لحال اهلك اهل الكرم والجود والشجاعة والخصال الكريمة واطالع فى الكلمات واستحضر صورة عمنا و خالناالمرحوم محمد البدوى الجنيد (سليم)وشكرا على الرباعية

Quote: الفاتح الجنيد ـ مسقط

الأخ الحبيب الفاتح ساحفظ هذا الأسم جيداَ وقصيدة رباعية مكربة شديد , تسلم علي هذا الألق .

القصيدة الرائعة اهل العوض
كلمات الشاعر الكبير الاستاذ الفاتح الجنيد
لحن وغناء ورقيص المطرب صديق الموج
يا للروعة

Quote: تحياتى الرباعيه دى اجمل ما كتب عن اهلى اهل العوض العبد لله من اصول عوضيه وكلامك ده تب رفع راسنا لفوق

الحبيب وليد500

أرض الــبطانه ،، الصافى لونا تَكـنُّو تِبْـرِى
روح البطـانه ،، الشَّـتله فـوقا يغـنى قُـمْرِى
حال الـدنيا ،، ريتك منُّو يُمَّه انشا الله تَـبْـرِى
من فُـتْـنَاِكى يُمَّه ،، وحالنا تبْ مو ماشى دُغْرِى

هذه تربة أهل العوض ،،،
ومن فات قديمو تاه ،،،

تسلم ود العوض ، وراسك مرفوع مرجله وهيبة ...

Quote: ]أرض الــبطانه ،، الصافى لونا تَكـنُّو تِبْـرِى روح البطـانه ،، الشَّـتله فـوقا يغـنى قُـمْرِى حال الـدنيا ،، ريتك منُّو يُمَّه انشا الله تَـبْـرِى من فُـتْـنَاِكى يُمَّه ،، وحالنا تبْ مو ماشى دُغْرِى ..........

حباب اهل البطانة الصافي لونهم

حباب اهل الحديث الزاهي هيلهم

حباب ناسا بكرمو الضيف بالفيههم

حباب الفاتح المنضوم عقيد جيدهم

تخريمة

انفع اسوي مرابيع يا الفاتح؟

Quote: الاخ الفاتح اجادعك من الضفة الغربية للبحر من ابوفروع واقول ليك شكرا على لوحة الكلامات الجميلة المجسدة لحال اهلك اهل الكرم والجود والشجاعة والخصال الكريمة واطالع فى الكلمات واستحضر صورة عمنا و خالناالمرحوم محمد البدوى الجنيد (سليم)وشكرا على الرباعية

ود أهلى : محمد أحمد سعيد

الله عليك ،، رجعتنى لى ذكريات لن يأكل الدهر منها ولن يشرب ،،،
أبو فروع دى كانت بالنسبة لينا جدعه ،، رفسة رفستين عوم ونلقى روحنا
جو بيت عمنا سليم ،،
عشنا فيها كل الفصول ،، بافراحها واتراحها،،،
كنالما تحصل مناسبة فرح فى ابوفروع ، نتجمع نحن شباب قرية الجنيد ،
نضع غياراتنا فوق الطوف ، ونركَب فيهو الاخوان المابعرفو يعوموا ،،،
ونقطع البحر عوم ،،،
نقعد فى القيفة نلبس ملابسنا، وندخل الحلة وكأننا جينا بى تاكسى مشوار ،،،
أهلنا يجو بعد ساعتين او تلاته لافين بى بنطون رفاعة ( متين جيتو إنتو ، سبحان الله ،،
هسه ما خليناكم فى الحلة)
نرب ليك الحفلات لى الصباح كان يومين كان تلاته لمن العريس يقول كفاى ،،،
ثم نعود ادراجنا كما جئنا ، ويادار ما دخلك شر ،،،

تسلم كتير على كلماتك النقية ،،،
يا أبو روحا رضية ...

Quote: الأخ الحبيب الفاتح ساحفظ هذا الأسم جيداَ وقصيدة رباعية مكربة شديد , تسلم علي هذا الألق .

أخى وصديقى هاشم احمد خلف الله

حفظك الله واهلك من كل سوء ،،،
ومرحب بيك أخ صدوق ،،،
ومكانك فى القلب دائما ،،،

أشكرك بعمق على هذا الثناء ...

شكراً



العوض

Quote: القصيدة الرائعة اهل العوض كلمات الشاعر الكبير الاستاذ الفاتح الجنيد لحن وغناء ورقيص المطرب صديق الموج يا للروعة

الرجل الفلته حمزاوى

الروعة فى مداخلتك الدهشة ،،،

وقول للموج ،،،
دى دايره ليها عرضة ،،،
عمه وعراقى وسروال تكتو جاره بالواطا وتوب وعكاز ،،،
وتبه لمن المركوب ينشرط بى جمبه ،،،
والا شنو ؟؟؟

Quote: حباب اهل البطانة الصافي لونهم حباب اهل الحديث الزاهي هيلهم حباب ناسا بكرمو الضيف بالفيههم حباب الفاتح المنضوم عقيد جيدهم تخريمة انفع اسوي مرابيع يا الفاتح؟

حباب الدكتور محمد ود حسن

إنت مرابيعك حواشه ، ينبت فيها كل ما يزرع ،،،
تنفع ونص ،،،
أسعدنى مرورك كتير ،،،
ونضمك زين ورزين ،،،

الشكر ليك إت آ العوض ،،،
على مرورك الطيب ،،،
يا ابو أصل طيب ،،،

الاخ الفاتحلك التحيه وانت تطل علينا لاول مره بما نحب من شعر الباديه
الجميل فاهلا وسهلا بك فى المنبر ونديك شويه من شعراء البطانه وشيوخها
والتحيه عبرك الى الاولاد وجميع الاخوان بالسلطنه وشكرا
اخوك .. خالد المحرب
















الصادق :
ودشــوراني عيني السهر قبَّـــحَه
ولسنــــات الشمت في يانديم متحَّه
علي عانِس متو اللبى يتلى مني وحجه
سولك منكب جملي أب جريـــداً دحَّه
ودشوراني :
سمح الشوفه روقة الغمده مني منحَّه
وأنا يا أب آمنه ما خلتلي توبه وصحه
ذوقه غريزة الحب في ضميري زرحه
هجَّام دوره تر عجلو وخبيرتو رفحَّه
الصادق :
بعد الشيب عمتني ونفسي مده قرحَّه
عُقب الليله عــادت للأذى البِسرحَّه
درعات القنوب بعد القلب صـارحه
مجبورين علي نـــار دقمه ندرحَّه
ودشوراني :
قلبي الليــــله منطقة القوافي فتحَّه
فــوق الأريل القمَّح كـــلابي شرحَّه
ياعوض الســلاحو الآن كبادي جرحَّه
خدو وسيم وروبتو على الكتـوف لفحَّه
الصادق :
العين ساقده بلحيل وقاسي نصحَّه
لبيع القامه في سهر الليالي دفحَّه
رب العزه في سابع السوامي رفحَّه
روَّق ذهنها وفطنها مـــاصفحَّه
ودشوراني :
وا أسفاي علي صبري الضِعفلو وشحَّه
سببو العارضه فوق شتم النحاس القحَّه
الخـــــــلاَّقه ليَّن طبعها وسمحَّه
زوله فدورة الــنوق في العجيج قمحَّه
الصادق :
تقيلة المجلس المن القبـــيح تسحَّه
من حر شوقه قلبي ينوح ودوفي إتلحَّه
الخلاني القــــايله فيكي ما بسمحَّه
مقطوع النصــيب بيك نفسو مامتحَّه
ودشوراني :
لهجك كُلمة الحنى السبيطه تفحَّه
أندى نداكي يالشتله أُم أدوباً نحَّه
الخلانه خِلَقِك بالشُكُر نمـــدحَّه
أردافك فلو وقدمـك تقيل ما رحَّه
هنا غيَّ الصادق القافيه
وقال :
إنتي فريدة العصر ونخـيل الشبره
شوفتك تذهِب الهم والليالي الغبره
بي فر براطمك وقــامتك المنتبره
أحيتيلي نـــار قُبره البتوقِد كَبره
ودشوراني :
البارح نسيم ريحــاً طلق من جبره
ذكَّر عقلي لي ود العنانــيس هبره
آح من فلانه وجرحها المــا بيبره
قلبي عليها ناح بعد اليقين والصبره
الصادق :
أخُش في مكتب الريِّس وأصُد بالعبره
أنا يا دُقمه طشَّت روحي مي منخبره
الخلاني أتختره النصيـــحه وأبره
ياقوت الحضيري الوازنو مية عبره
ود شوراني :
أرض الله الوسيعه علي بقت منشبره
من لهطي وتِقِربني كل صاحب يبره
عارفك يالظهــورِك مي رديه ودبره
فقدك أحرَّ من سم أب لـــدغةً نبره

الصادق يُغير القافيه مره أُخرى
يقول :
راسيه وأديبه وعندك فوق ندايدك فوت
وضربك للعشوق كليح سيوف مو سوط
ناس دُقمه متلي مهددين بالمــــوت
زي كورة الهلال شــاتت قلوبُن شوت
ودشوراني :
مرجان الجواهر وفاخر الـــياقوت
غير حلاته زينة عينو ليَّ تفـــوت
الحويتو جاه بدوي الزيارتو سـبوت
شيخة كُل عارض ومن شلوخه ستوت
الصادق :
ياعوض الجســوم إتعودَّن لبلاهن
ميدان العصُر وعُقب القلوب قالأَّهن
بدر الكون كُبس الظلام ضــواهن
العال والوسط فاز بالجمـال خلاهن
ودشوراني :
سبيك الخيل ظبي القفَّرن بخــلاهن
راح يخرِّب شروط التوبه من منشاهن
فليج بسمها العُقد القلوب حـــلاَّهن
السما والإرض يادقمه فوقنا كـفاهن

)

الحبيب خالد المحرب

أهلى ناس الصادق والشورانى ديل النم عندهم وقف ،،،
وانا على باب الله اسوق ناقتى جنب الحيط ،،،

تسلم وتسلم ،،، ياطيب ،،،
ولك الود والتحية للاسرة