(مُلاح شرموط + لُـقمّة) داخل جهاز شؤون المغتربين!!!!

الخرطوم- صيف 2004
خرجت من المنزل صوب جهاز شؤون المغتربين – وكانت إجازتى السنوية قد اوشكت على الانتهاء- بغرض إنهاء إجراءاتي حتى يتسنى لى العودة كما هو الحال لكل المغتربين.
كان الجهاز على مرمى حجر من منزلنا وربما كان ذلك هو السبب الذى جعلنى أتكاسل فى الذهاب كثيراً (ياخ انسى خليها بكرة ..او اقول ليك الأسبوع الجاى) حتى داهمني الوقت فكان لابد من الزيارة المحتمة
وكان ذلك

على بوابة (الجهاز) وفور عبورى الباب الداخلى إعترضتنى (طربيزة) يجلس عليها 4 شبان -ماشاء الله تبارك الله – 4 شبان تضيق بهم (الطربيزة الحديدية) فقط ليسألك أحدهم بحس بوليسى ( أيوه وين يا ابو الشباب؟) فعليك هنا ان تبرز ما يبرر دخولك جواز، دفتر ضرائب....الخ
عبرت والحمد لله الى الداخل وكما هو الحال توجهت مباشرة الى شباك المساهمة الوطنية بغرض إستخراج (برنت) المساهمة الوطنية حتى أعرف ما على دفعه وتأجيله . إستلمت (البرنت) ولفت نظرى وجود مبالغ كنت قد دفعتها فى السفارة بالرياض غير انها لا تزال موجودة (بالبرنت) فوراً وجهت سؤالى الى الموظف – والذى كان يبدو لطيفاً – بلاى لو سمحت يا أستاذ ..
-أيوه عايز شنو؟
-انا الحقيقة دفعت المبالغ الموضحة تحت دى فى السفارة ..لكن شايفها لسه موجودة!!!!
-وينا الإيصالات ؟
-ياها دى معاى (وقمت بإستخراجها حتى يراها)
-أيواا

هنا خطر ببالى تساؤل وفوراً وجهته للموظف :
-طيب هسّة لو الإيصالات دى ضاعت يعنى أدفع تانى ولاّ أعمل شنو؟
-ببعض الضيق :لو ضاعت يا شيخنا تتصل بالسفارة فى الرياض وتخليهم يرسلو ليك نسخة بالفاكس
فوراً تخيلت نفسى- مع هذا الرد الغريب والمحيِّر- وانا رافع سماعة التلفون ومتصل على سفارتنا المؤقرة
ترررررررن ...ترررررررن
صوت : أيوا مرحب
-سفارة السودان؟
-أيوه معاك يا شيخنا.
-الحقيقة انا ضيعت إيصالات ال.....
-إيصالات؟ ...إيصلات شنو يا شيخنا ؟
-انا هسه فى جهاز شؤون المغتربين و عايز الإيصالات دى
-ما سامعك..
-قلت ليك عايز الإيصالات
-يا أخوى ده شغلهم هم نحن هنا بنستلم ونديك الإيصالات
ولكم ان تتخيلو بقية الحوار

المهم نرجع للموظف والذى كان لا يزال واقفاً
خطر ببالى ان أسأله سؤال كان يبدو منطقى ويـــــــــــــــــــــــااا ليتـــــنى لم أسأله
-هسه مافى شبكة بينكم وبين السفارة فى الرياض؟
وكأن سؤالى صاعقة نزلت عليه فنظر الى والشرر يتطاير من عينيه -وأزاح نظارته جانباً- قبل ان يقول :

-شنو...شنو قلت شنو؟ شبكة؟
-أيوه شبكة (وكنت بالطبع أعنى ان وحود شبكة مرتبطة بالسفارة تسهل كثيرا الحصول على اى بيانات تخص المغترب وتختصر كثير من الزمن والجهد.)
وكان لا يزال ينظر الى شذراً
-قلت لى شبكة ..ااااا
-وواصل ..إنتو السودان ده ما مشيتو خليتو نحن ما لسه متخلفين زى ما مشيتو خليتونا جاى تتفلسف على وتقول لى شبكة
مواصلاً حديثه و(بنفس واحد) وعلى الملأ
شوف ده بلاى نحن ما لسّة متخلفين ..لسّة فى مُــــــــــلاح الشرموط واللـــقـــمّـة

وقفت لا أقوى على الرد ولم اكن أرى ثمة علاقة ما بين سؤالى (البرئ جداًَ) وملاح الشرموط واللقمة!!!!!!!!!!!!!!

وكان الموظف على أهبة الإستعداد لترك عمله والإشتغال بسؤالى الإستفزازى (على حد إعتقاده)

كان لابد (للبرنت) ان يُطوى ويسكن جيبى حتى أخرج من هذا الموقف الذى حشرت نفسى فيه .وكان خيار شباك آخر وموظف آخر هو المخرج .

ملحوظة:
معلومة معروفة للجميع ان (الشبكة ) ما هى إلاً جهاز كمبيوتر وخط تلفون.

وأرقدو عافية،،،،

وليد طه

ابننا الوليد محمد طه....جهاز المغتربين لا يختلف كثيرا عن بقية مواقع الجبايه التي تتكاثر بصوره جرثوميه والقاعده عندهم تدفع وانت ساكت ...للحصول على تاشيرة الخروج ....ياخي برضه تقول Net work بالمناسبة لي تجربه حقيقيه وليست افتراضيه معهم خلال يوليو السابق....لكن يا اخوى الوليدلاحظت ان بعض ذوى اللحي من مغتربي السعودية( يتفنون ) في تمجيد هذا الجهاز من خلال ألأعلام الحكومى في موسم محدد كل عام


مع سلامي لك .....عباس محمود

abaas mahmoud
walahi al7i billagi
i will get back to you soon

Quote: وانا رافع سماعة التلفون ومتصل على سفارتنا المؤقرة ترررررررن ...ترررررررن صوت : أيوا مرحب -سفارة السودان؟ -أيوه معاك يا شيخنا.

لكن ما بالغت يا وليد!!!

يستحيل أن تجد من يرد عليك في السفارة

مش الرد الآلي ، كده دخل التحويلة ، يستحيل ، يستحيل .

حاجتين في الرياض يجب أن تنساهم

1- الاتصال بالسفارة .
2- الاتصال بمكتب الخطوط السودانية قبل وأثناء الموسم .

ولياب إزى الحال

Quote: لكن ما بالغت يا وليد!!! يستحيل أن تجد من يرد عليك في السفارة

أهـو ردوا
لكن شفت الرد كيف؟

ارقد عافية

عزيزي جدا وليد

تحياتي

تعرف يا وليد الزول دة بإجابتو دي إتخيل لي مغبون و زعلان لعدم وجود شبك .. و وجد في سؤالك حاجة تفش غبينتو .. لأنو عدم وجود شبكة باإضافة لسؤالك خلاهو يتكهرب و يرد عليك :

..إنتو السودان ده ما مشيتو خليتو نحن ما لسه متخلفين زى ما مشيتو خليتونا جاى تتفلسف على وتقول لى شبكة
مواصلاً حديثه و(بنفس واحد) وعلى الملأ
شوف ده بلاى نحن ما لسّة متخلفين ..لسّة فى مُــــــــــلاح الشرموط واللـــقـــمّـة

أنا حصل لي نفس موقفك دة بالظبط .. إتصلت بواحد قريبي بالرياض مشى السفارة و طلع البرنت آوت و رسلو بالفاكس للجهاز و الصورة الأصلية جاتني مع واحد جاي الخرطوم.

و كل ملاح شرموط و لقمة و إنت بخير

استاذنا الريس أبوجهينة نهارك سعيد

Quote: و الصورة الأصلية جاتني مع واحد جاي الخرطوم.

تعرف يا استاذ لو كان وريتهم الأصلية كان قالوا ليك :

ما خلاس ياشيخنا شفنا الفاكس ..! مالك عايز تتفلسف علينا؟!

وعشان امورك تمشى لاااااازم تسكت

سكتنا

أرقد عافية،،،

وليد طه

ازيك ورمضان كريم

هسه في داعي لملاح الشرموط واللقمة ونحنا رمضان مداهمنا كدا

وعشان امورك تمشى لاااااازم تسكت


اها دي بقت في أي مكان

ما بتقدر تقول حاجة لى زول او تحتج على وضع او حاجة ما في مكانها

الا وبعد داك اتوقع منو ردة الفعل أي شئ

وأول شئ تتوقعوا انو موضوعك العندو يتأخر

إنعام إزيك
رمضان كريم وكل سنة وانتى طيبة

Quote: هسه في داعي لملاح الشرموط واللقمة ونحنا رمضان مداهمنا كدا

لا ولسّــه البوست الجاى فيهو قراصة

Quote: اها دي بقت في أي مكان

بس طبعا التميز عندنا



تصومى وتفطرى على خير،،

خليني من مغصة جهاز المغتربين
أنا أنبهربت من مباني الخطوط الجوية كثرة وسماحة، وقلت القبه تحته فكي. ضيعت التذكرة وبقوا يرسلوني من قسم لقسم، قمت سألت ببراءة أنتو ما عندكم شبكة تتناقلوا بيها المعلومات؟؟ ما لقيت نفس الرد لكن بتهذيب قالوا ما عندهم. قلت ليهم المشكلة شنو الكومبيوترات موجودة والأنترنت موجود، والشركة فيها 4 ألف موظف قصاد 3 طيارات، قلت للمسؤول كدي زحي لي كدا هسي أعمل ليك الشبكة دي إنت قايلها شنو؟ عاين لي بإستغراب كدا.
المهم: ما زلت محتار في عشرات كليات الكومبيوتر في كل أنحاء السودان، وألاف خريجي الكومبيوتر لدرجة الدكتوارة ورغم التطور الهائل في البرامج والتدني المريع لأسعار الأجهزه وما زالت سودانير بدون شبكة.
السودان دا مالو؟؟؟؟؟؟؟؟

Nasr رمضان كريم

المشكلة ليست فى عدم إمكانية تأسيس شبكة ..المشكلة يا سيدى ان موظف جهاز شؤون المغتربين يكره اى تطور يطيب تعامله مع المغترب ، فدائماً هو فى حالة تأهب لخلق مشكلة مع هذا المغلوب على أمره.
وجود شبكةربما يلغى حالة التأهب هذه
يعنى بكلام أهلنا (تكتُل ليهو الدش فى إيدو)

يا ربي لو كان القروش المدفوعة دى ماشة جيبو كان برضو حيتعامل كده؟؟

عجبى

من هو اول وغدٍ اشار بتنظيم شؤننا ؟؟
ومن قال لهم اني احتاج لمن يننظم شؤني؟؟

اصلا اين هذه الشؤن ؟؟


ليس في استطاعتي أن ادعوهم فاقول لهم :
تعالوا نظمو شؤننا في مكاتب العمل في عواصم العالم؟؟
او تعالوا نظمو شؤن ابنائنا في جامعاتكم؟؟
او تعالوا نظمو شؤننا عند الخروج من مطارتكم وفي مطارات الدنيا ؟؟
ليس في استطاعتي لاني اعلم انه لم تعد لدينا شؤن منذ سنين خلت ..

الآن تغير كل شي..
فلا عمل لدينا لينظمه مكتب العمل ..
ولا ابناء للجامعات لاننا توقفنا عن التناسل ...ولا مطارات نمر عبرها فنحن لا نمر أصلا وقد كفينا شركم بالخروج إلى أن يفتح الله علينا بزلزال يجعل اعلى الجهاز سافله ...



انتم تنظمون شؤنكم لو تعلمون ...
تملاوون جهازكم بالحريم المكبرتات البفطروا في ستين دقيقة كاملة ..
ومحلات تصوير باسعار غريبة جدا جدا ومبالغة جدا جدا ومقاولات لشركات مريبة وموظفين مستفزين بطبعهم (بفتح الفاء) اخلاقم زبالة و حديثهم اعوج ...

يتناسلون كل عام ..

يتناسلون فيذيدون كل عام ..

هكذا وهم يعلمون ..

يتنسالون منا دون أن يدروا انهم منا يتناسلون .

تجي تتفاهم مع اوضعهم مكانة مايعجبو تبريرك فتنفعل ..يقوم يقول ليك :
يا زول امشي خلاص شيل جوازك ما بشتغلو ليك ذاتو....

ويرميهو ليك فوق الصبة بتاعة الكاونتر..

كيف يتجرا على أن يعيد لي جوازي بهذ الطريقة؟؟
كيف يتجرا أن يقول لي ما بخلص ليك جوازك؟؟
ارميه بالجواز في وشو غاضبا ُمستفزا قائلا :
ياخي أنحنا الجبناك هنا؟؟
انحنا قنا ليك تعال هاك ده جوازنا سوي لينا فيهو إجراءات تأشيرة الخروج؟؟

ما انتو القلتو المغترب ما عندو خيار تاشيرة السفر إلا من خلال قنصليتكم جنوب الخرطوم دي!!
منكم الخطيئة ومنكم الغفران..
منكم القتل ومنكم الرحمة ..
منكم الجواز واليكم الجواز ..

من اولاد وين انتا يا معفن عشان تقول لي ما بشتغل ليك جوازك ؟؟

الم ُيخبره من اتى به إلى مكانه البارد هذا ان جلوسه في هذا المكان من اجلي؟؟

الم يخبره الذي اتى به أن اصل هذا المكان لخدمتي لا لبقائه باردا ؟

من يخبره عني أن ما يدخله في بطن زوجته هو من عرقي انا في شتات الارض ؟؟

ومن يخبرها عني بان ثمن هذه الحناء التي تظهر بها على زوجها ليلا من عرقِ راع ٍ في سهوبِ نجد..

منو البتجلى لي في الصالة دي ويشرح لي ياتو كيمياء في الدنيا بتحول ريحة عرق الرعاة في الخليج لى ريحة حنة في غرفة نوم باردة ???

ـــــــ

وليد..

رمضان كريم وكل سنة وانتا واسرتك بخير..
ورمضان الجاي فارش صينبتك قدام بيت ناس نارية..

زيد يا دكين أنا لسه ما أتفشيت
شؤون المغتربين مغصتهم خليها ساكت

لاتنسوا في عودتكم أن تبحثوا عن تلك التي لاترجع اليك باقي قروشك..
ذكروها بانها انما تضع حراما في بطنها واهلها وان الحرام في ابنائها سيظهر ..
ولا تنسوا أن تنظروا في نقش الحناء على كفوف النساء المكبرتات ..

اظهروا امتعاطكم حتى وان اعجبتكم الرائحة واثارت فيكم هوس الحناء وهوس ليلة قريبة...

قولوا لهم أن وجود هذه الـهُـلمة وهذا المكان محض خطا تماما كوجودكم ..
ولاتنسوا أن تنظروا في المباني التي اضيفت إلى المساحة ..
والموظفين الذين اُضيفوا في المباني..
والاكاذيب التي تنتشر في المكان ..
انظروا عدد المصاحف في أسنة الرماح..
انظروا جاهزيتهم لتذكيبنا ..
شعورهم المسبق باننا افاقون كاذبون ..
انظروا كيف يجعلون الله بينك وبينهم ..
كيف يجعلون الله شاهدا عليك لهم ..

استنكر واشجب والعن قدر ما تستطيع ..


ولا تصمت ..
وان خفت إلا الصمت فقطب حاجبيك واجعلها معقودة على بعضها في كل ارجاء المكان..
انشر الغضب فيمن تجدهم من معارفك..
وذلك اضعف الايمان

بهذا تقدمون خيرا لغيركم ...
وخيرا لاهلكم..
وخيرا لنا ...

ولكي لاتجعلنا نهب اعصابك المتوترة في هرولتك للحاق بطائرتك او بسفينتك او بما شئت من اباطيل دوما تذكر أن تنجز تاشيرة الخروج فور وصولك إلى السودان ..
او في ايام اسبوعك الاول ...

انجزوها مبكرين أن كنتم من اولئك الذين لايملكون نفسا حارا للمكابرة وانتزاع الحقوق فلا تفسدون بعدها مزاجنا في الجدال حول طبيعة اوضاعنا وما نعتقد انه حق ..
وذلك اضعف الايمان

افعلو ذلك في عامكم القادم والاعوام التي تليه... واجعلوه ديدنكم في في هذا الجهاز..
استجمع قدر ما تستطيع من الغبن فيك ...
و قدر ماتستطيع من ضيق الُخلق ..
وكل تفاصيل ذكرياتك المريرة في غربتك وكل تفاصيل استغاثات اهلك عبر الهاتف واعبر بها عتبات ذلك المكان ..
وذلك اضعف الايمان

لاتلقى السلام على احد فيموت حيلك..
لاتنظر في في عيون المتسولات خارج الجهاز فياتيك احساس بانك احسن حالا..

ذلك حسسٌ كذوبٌ لو تعلمون ...

انظرهم كيف يتحركون وانظُر كيف حالك ...وكيف تتحرك هناك في غربتك..

لاتبطي في خطواتك كي تظل محتفظا بغضبك على سوء حالك اطول مدة ممكنة داخل المكان ..

تهور فيهم علهم يتحسسون فيخاطبون كبيرهم ..

تهور عليهم كي تتجنب أن تتهور على اهلك حين يطالبونك بمزيدٍ من المصاريف

اؤلئك اهــلُــك وهؤلاء ليسوا كذلك..

اؤلئك فزعتك يوم ينفرُ الناسُ عنك وهؤلاء يسعدهم أن يتكلموا عن نسائكم في المجالس ..



تذكر : انت لاهلِك ..
انت ما انت دونهم ..
انت ما انت بلاهم..

اهــلُــك اولى بالزكاةِ يافقير

او تعود فنستريح منك ..
فالغربة الان دواس والبلاد ليست لنا..


دكين عبد العاطي
تموز2004م
ــــــــــــــــــــــــ

منقول من بوست قديم لاغراض خدمة الموضوع

Quote: منقول من بوست قديم لاغراض خدمة الموضوع

والقديم عتيق

والله أكثر حاجة كانت محيراني مسكنة المغتربين في جهاز المغتربين
ظننت (وإن بض الظن إثم) أن المغتربين وناس الجهاز بينهم عقد خوف غير مكتوب: تدفعوا بأدب ولا تقعدوا في السودان.
والمغصة تزيد لمن تشوف الحكومة بتضيع القروش في شنو: كدي أمشي شوف الفيلل الرئاسية واليخت الرئاسي
لعن الله آكلي السحت ومال الحرام
إن شاء الله قروش شقانا وتعبنا دي تدخل عليهم بالساحق والماحق