Post: #1
Title: كراع الاسفير دي جيابة خلاص...!!!
Author: عبدالكريم الامين احمد
Date: 08-22-2007, 07:13 PM
والله ياجماعة الاسفير ده جياب ياخ.....!!!
شتينا في بلاد الغربة وناس سحمة وقحمة شالت وجدانها المرهف والشفاف وطلعت جوازسفر
وبقت زي الطيور الما بتعرف ليها خرطة وسافرت في بلاد الله الواسعة ديك .ناس مشت شرق
وتانين مشت غرب وسافروا .شالو من النيل غيم ومن كل تراب البلد رهط وخلوا خشم البلد ملح ملح
واحنا كمان خشمنا بقي ملح ملح وقعدنا وكشفنا يمين يسار والبلد نشف الطمبور براهو عزف لحن
حزين وغني ياقماري حلتنا قودن يا البريدكم ياحليلو.......
وفجاءة صحينا من الصباح وقررنا احنا ذاتتنا نطلع (جواز) وندق ختم ونسافر نلحق
نعانق نسلم علي الناس الملانننننة من جوه محنة ودهشة .ومشينا شرق وسالنا غرب
واتلفتنا يمنين ويسار وما عرفنا سكة للوجع الطفش بين المواني والمطارات الوجع الركب
السفن والطيارة ام هديرا بخلع......واخترنا حتة واتحكرنا تحت نكورك علي الجمال الهبر وشتة بين
الدول...
وفجاءة قالوا الخواجة العينو خضر عمل مصيبة زي العنكبوت بتلم الناس ( دبل دبلين) للكلك
تلم في الناس الشالت روحنا وسافرت وكمان تلم في اجناس اشكال والوان....الخواجة (جون) جاهز
وحلولو دائما في طرف كيبوردو ..ياخواجة فطومة السمحة شالتها الطيارة ووما عرفنا ليها بكان...
يعوج لسانو ويوصي بدبل كلك تغمض وتفتح وتلقي فطومة قدامك والوندو حمارو في السماء...
ياخواجة ابكر ضايقو الكيزان وسلوا روحوا وطفش من الحلة وغاب من الدافوري وعشاء الفول
والكوارع بقت (مسيخة)... ابكر يا خوووواجة.كلك كلين ويجيك ابكرونة وكمان تلقاهو نفسوا
قايم من الفتيش والكواسة فس بيت العنكبوت وكمان تفتيحة وشايل للقصة مفاتيحها... ود كلو كوم والكوم التاني
الناس البتجيك زي مطر الرشاش الرشة لا احم ولا دستور ناس تخش القش الاسفيري ده
وما تقول كش وفجاءة تلقهم قددددددامك في صندوق بريد الاسفير المفاتحو باص ويرد احرف حرامي ما يقدر عليهو..تووش كده تلقي قدامك انهار من الالحان ورنات من صدي الزولة لمن تتوشح بحروف كما العطر..
وهاك يا دبل كليك وهاك يا كلك واحد وسين وجيم وحق الله وبق الله وكل مرة تتكشف لك دنيا من رحيق الزول
وكل مرة يتكشف لك لحنا من الجراري لم يعزف بعد..وضربة من التمتم لم تمر عبر الاذن السودانية ابدا...ونواصل
ولكن بعد الفواصل
|
Post: #2
Title: Re: كراع الاسفير دي جيابة خلاص...!!!
Author: رقم صفر
Date: 08-22-2007, 07:22 PM
Parent: #1
كريم
اولا ، قبل ما ترد علي امشي اعمل تعديل ، وادخل اسمك داخل النص ، اكثر من مرة ، وياحبذا لو وضعتوا بطريقة فنية ليصبح جزء من هذا الحكي ....
هذا البوست من النوع البتسرق ، اي والله ,,,,,,,,,,,,,
اوكي
عارف الامريكان او الغربيين الكفرة النصارة (القردة) والله ما قصروا ، بس نحنا سااااي مكابرين ، شكرا لك علي الانصاف ، بس انا عندي ملاحظة ، (حتي الآن ما اطلقوا سراحك) ؟
وبرضو شكرا للامريكان الذين جعلوا التواصل ممكنا رغم عن انف سجانيك ؟
نلتقي
|
Post: #3
Title: Re: كراع الاسفير دي جيابة خلاص...!!!
Author: عبدالكريم الامين احمد
Date: 08-22-2007, 07:27 PM
Parent: #2
هلا معتصم
ومشرف والله
وابكر دي هي كلمة التامين وسر المهنة
واي سرقة اسفيرية ممكن (نقوقل ابكر دي) وح نعرف الحرامي وين
وفعلا يا صديقي
الامريكان ما قصروا معانا كلو كلو واتاحو لينا التواصل مع بعض ومعرفة الكثيرين من الاخوان والاخوات
وتنامت الاواصر لدرجة لا توصف...
..
الجماعة انا ماهلهم حتي نهاية الشهر ولقد وعدوا بالاعتذار وتصليح الامر
وان لم يفعلوا لذهبنا لهم في عقر دارهم (وح اسوقك معاي المرة دي)
|
|