يا نجــوان: طبعا نهى عجــاج دي .. حاجة تانية وكويس إنك فتحت ليها بوست كامل علشان بهمني معاك رأي الناس دي .. وعشان اجيب ليك الهواء الصيفي الجد جد .. أنا بفضله عن نانسي أختها من حيث الأداء والصوت والحضور .. والرهيفة التنقد .. ود البوست بتاعك وشيلي شيلتك
Quote: وعشان اجيب ليك الهواء الصيفي الجد جد .. أنا بفضله عن نانسي أختها من حيث الأداء والصوت والحضور .. والرهيفة التنقد .. ود البوست بتاعك وشيلي شيلتك
شكرا يا تمبس.. رغم رهبة الكاميرا في البداية أعتقد الاغنية إستعدلت.. شوية تمارين صوت وخبرة في الأداء قدام الجمهور والكاميرا نهى دربها ح يسلك وموهبتها ح تظهر أكتر.. أتمنّى ألا تستعجل.. وأن يبتعد عنها تجّار الفن إياهم..
نجوان، والله ما سمعناها لكن عندنا حب سابق وثقة في الأستاذ عجاج وكل درره المصونات. قمة الإبداع والأداء الصادق الذي يتسرب للقلب دون إستئذان فيمتلك الحواس ويرتقى بالإحساس.
Quote: وعشان اجيب ليك الهواء الصيفي الجد جد .. أنا بفضله عن نانسي أختها من حيث الأداء والصوت والحضور ..
دي باااالغت فيها يا تمبس اذا كان تذوق شخصي لا مانع لدينا أما اذا كان تذوق فني فلا علاقة بين الاثنتين نانسي بعيدة عن نهى كتيييييييييير وأيضا هذا رايي والرهيفة التنقد
Quote: اذا كان تذوق شخصي لا مانع لدينا أما اذا كان تذوق فني فلا علاقة بين الاثنتين
يا معتز: طبعا ما عارف لا علاقة بين الاتنين دي قاصد بيها شنــو ..؟ يعني قصدك نانسي أعمق من نهى .. وبي كدا نهى بره المسالة بتاعت الغناء دي ..؟ أول مرة سمعت نانسي عجاج .. كان في شغل عازه في هواك بمصاحبة البيانو وهو أول شغل نزل ليها على ما اعتقد عن طريق خالد الحاج .. بعديها بقيت اسمع لي نانسي أو سمعت ليها كتير واكتشفت اختلاف كتير جدا بين الزوله السمعتها أول بتغني مع البيانو وصوته كان اشبه بي أنو ( تيوننق ) مع البيانو .. ومع صوت الزوله السمعتها في أعمال تانية ... أرتحت ليها في يمكن أغنيتين أو تلاتة .. وكتير من الأعمال صدقني ما بطيق حتى اسمع مجرد بدايته .. ده الخلل الحاصل لي هنــا .. بعدين اصعب حاجة يا معتز تقدم عمل هو ما حقك تقوم تعدل فيهو بي طريقة تخل بيهو .. الحاجة التانية .. عندي اعتقاد أنو نهى ممكن ( اوركستراليا) مؤهله أنها تجيد الغناء .. بالعكس من نانسي .. يا معتز لما تقول يل ( تذوق فني لا علاقة بين الاتنين ) هنا جردتني من الشخصي ذاتو .. وجردت معاي نهى ... كدي وضح لي استندت لي شنو إنت بي كلمة ( لاعلاقة دي ) يعني من ناحية اكاديمية والا تذوق شخصي برضو .. عشان نكون في الصورة ..؟ بالنسبة لي الشخصي والذوق .. انا طبعا زي ( عمو ملاسي ) .. ونجوان.. اليوم الكتبت فيهو نجوان محمد عبدو شنو كدا ما عارف .. كنت بقرا بي مزاج لما وصلت الحتة بتاعت محمد عبدو دي .. قلت ليها الله يسامحك يا نجوان أنا بسمع ابوبكر سالم .. والرويشد .. وعبد الرب إدريس .. وفيصل العلوي .. وطلال مداح .. ورباب .. وانغام .. وبسمع هاجر كباشي .. وعادل مسلم ومحمد الأمين وترباس. لكن كل زول في حتتو البغني فيها .. والا رايك شنــو ..؟
يا نجوان
صدقيني ما قادر اتعامل مع محمد عبده ده خالص .. عديل كدا ما عرفت ليهو ..
Quote: يا عبد الله وداعه تحياتي لا مقارنه بين صوت نناسي وواهتها نهى هذه وصدقني يا تمبس ما موضوع خالف تعرف لكن اداء نانسي مختلف من اغلب الفنانان السودانيات
تحياتي ترجي
اهو انحنا متفقين حول نانسي
واضانك نصيحة وما عندك عوجة
والله اتفق معاك تراجي وفعلا انو نانسي ما صوت مكرر ومرات جمال الصوت ما بكون في حلاوته وانما في تفرده ودا البميز نانسي عن نهى وحتى طبقات صوت نهى اكثر من عادية
Quote: لا مقارنه بين صوت نناسي وواختها نهى هذه وصدقني يا تمبس ما موضوع خالف تعرف لكن اداء نانسي مختلف من اغلب الفنانان السودانيات
يا تراجي: أول حاجة بتفق معاك المسالة ما خالف تذكر .. دي حاجة كويسه ولا كمان مقارنة ما بين نانسي ونهى كاخوات .. وبرررضو نانسي مختلفة وليها لونيته الخاصة بيها .. وده ديدن كل فنان .. أي واحد عندو بصمة صوت واحده خاصه بيهو وبتميزو عن التاني .. حتى ولو طلعو من رحم واحد .. أو فوله واتقسمت نصين .. ربما اسلوب نانسي أو الطريقة البتمارس بيها الغناء .. ( سحــر ) العديدين وهي ما صاحبة مدرسة متفرده .. أنا تحديدا حسب فهمي .. بصنف طريقة الغناء المتبعاه زي طريقة ( عابده الشيخ ) .. وبي صراحة كدا ( عابده الشيخ ) عندي .. زي محمد عبده عند ( عمو ملاسي ) .. إلا أحيانا بلقى نفسي محتاج لي إني اسمع ( نانسي ) في عمل محدد مثلا .. وبنفس المقدار ما بحب خاااالص السمعه في العمل الفلاني .. واقع ليك الحاجة دي ..؟
Quote: هنالك رؤى فكريه واضحه تميز ادائها
الرؤي الفكرية دي شنو يا تراجي ..؟ ما كنتي ماشه كويسه مالك عايزه تخرمجيها ..؟ وضحي لي مسالة فكرية دي قاصده بيها شنـو ..؟ نانسي لحدي الآن ما سمعناهو منها هو عبارة عن .. اغاني مكرورة لي فنانين سبقوها نجحت في بعضها وفشلت في بعضها .. حسب ( اضاني ) .. أما إذا كانت ليها نشاطات تانية أو اي رؤى فكرية .. فدي حاجة تانية .. ما ( تكوجني ) لينا الغناء يا تراجي مع السيول والأمطار ..
Quote: فيا تمبس كفايه عليك نصر الهلال لكن اعمل حسابك نانسي مش الاهلي
... الهلال ده زاتو مزيكــا والدنيا دي كلها مبنيه على المزيكا .. إنت قايله شنــو ..؟ نغلب الأهلي .. ونشجع نهى عجاج ولا باس من أنو أسمع نانسي وهي بتغني مسامحك يا حبيبي .. مهما قسيت علي .. أنا قلبك عارفو ابيض .. وكلك حسن نيه..
Quote: انا اختلف كليا مع تمبس واتفق مع ودالقلايش كليا وصوت نهي سمعته من قبل وافتكر اكتر من عادي وغير مميز وبرضو الرهيفة تنقد
يا عبد الله .. إنتو شنو القدقده الحايمة في البلد الايامات دي ..؟ غايتو يا عبد الله كان مصر إنو نانسي ( ستة تلاتة ) .. سوق معاك معتز ده وراجعو ( اللوز ) مسالة ( الاضان ) دي محلولة .. وتحت الوسط دي برضو راجعه .. لو قعدت استمعت اكتر من مرة لي نهى بتغير رايك صدقني .. تسليط الضوء الفترة الفاتت على نانسي .. رفع من الأسهم خاصته .. نهى شكلها ما مهتمه بالمسالة دي شديد .. وانا مصر إنها لو لقت شوية بس بتاعت تركيز وبطلت تخاف .. بعداك بتكون ( تمنية صفر ) .. اسمع كلامي يا عبد الله .. والله معتز دا يطلعك من الجنة وسقطه ..
لا أعتقد أن المقارنة بين الأختين هي الهدف.. (لكنها متوقعة بحكم إنهم من أسرة واحدة)..
في البداية أعتقد أن هناك تشابه كبير في صوتهم.. (برضو بحكم الجينات..) دون شك.. نانسي الآن لديها خبرة أدائية أكبر من شقيقتها.. وجرأة أكثر أمام الكاميرا تضعها في مصاف المحترفين..
لكن.. مسالة القبول والconnection مع فنان دون الآخر شئ يصعب شرحه.. أجد في نهى ما يمكن أن يسمّى باصالة.. واتوقع أن تكون grounded اكثر.. (قد اغيّر رأيي بكرة.. وقد أكون مخطئة تماما.. لكن ده إنطباع اليوم..)..
غير الموهبة الفنية...هناك عوامل كثيرة أخرى ترتبط بصعود النجوم إستمراريتهم.. أو هبوطهم.. وفي السير الذاتية لنجوم الفن العالميين.. كثير من الأمثلة.. أرى نهى متمهّلة أكثر... قد يكون هذا لصالحها..