أخذلني يا مهند الطــاهر .. سامحني يا استاد الهــلال ..

Post: #1
Title: أخذلني يا مهند الطــاهر .. سامحني يا استاد الهــلال ..
Author: tmbis
Date: 08-19-2007, 02:35 PM
Parent: #0

جاء في التراث : على الفرسان لبس ( الخوسه ) قبل دق النحاس .. مع مراعاة عدم ( معافرتها ) عبسا بنية خلعها من الراس بعد دق النحاس فحتما هذا ضرب من الخيال والفشل .. ومحاولة قتل عمد .. لان عندها سينقطع راس الفارس ..
فنحن قوم ( نتمدد ) .. ( ونستطيل ) .. ( وتلامس ) قاماتنا السماء وقت ( الحوبة ) وعند النزال وفارسنا الصغير براهو يجبه ليهو مليون ..

أحدى المنتخبات الوطنية الأفريقية .. ( لا استحضرها ) لعبت خارج أرضها وتجرعت هزيمة قاسية .. فما كان من وزير شبابها ورياضتها إلا وعدل خط سير الطائرة لتهبط في قاعدة عسكرية .. وتم حلق رؤوس اللعيبة والإداريين حسب التعليمات ( صلعة على الزيرو ) وتم معاملة اللعيبة والإداريين كمجرمي حرب .. ووجهة لهم تهمت الخيانة .. خيانة الدولة والشعب ..

مليون ميل مربع .. فيهو كم فارس .؟ كم أم .. كم أبو .. كم شيخ .. وكم حبوبه .. فيهو كم قبه .. وكم بنيه .. وكم مسجد وكم كنيسة .. وكم روضة وكم مدرسة ..؟
كل هؤلاء القوم .. في انتظار أن يخرجوا اليوم .. تضرب أرجلهم الأرض .. وتلامس رؤوسهم السماء .. وتعلوا اصواتهم متناغمة .. زغاريد .. ( وحمحمه ) ( وكرير وجراري ) .. تتمازج صيحاتهم .. مع صيحات الحرب .. نعم الحرب .. اليوم حرب يا أولاد الهلال ..
( يا النصــر .. يا الحــلاقة ).
الحداشر الجوه ديل ما يفتكروا المسالة هظــار .. ويقعدوا يلمسوا لينا فيها ..

مهند الطاهــر:
كان بقيت لاعب .. دي فرصتك تصالحنا كلنا .. فيها شنو لو خذلتني وسويته مع قودويين وكلاتشي .. زي المرة الفاتت .. وجريت على القائم .. ( واتبهلوته ) زي ستة سبعة مرات كدا في الجــو ..؟؟
غايتو انا راجيك ..

يا استاد الهــلال:
سامحني أنا الليلة مافي هناك .. لكن برضو في ...

ملحوظة:
خليكم شاهدين .. الليلة كان الهلال ده خذلني .. تاني ما عايز كوره .. عديل كدا

Post: #2
Title: Re: أخذلني يا مهند الطــاهر .. سامحني يا استاد الهــلال ..
Author: ناصر جبريل
Date: 08-19-2007, 02:41 PM
Parent: #1

Quote:
خليكم شاهدين .. الليلة كان الهلال ده خذلني .. تاني ما عايز كوره .. عديل كدا

معاك برضو............. رغم اني مريخابي موت

انشاء الله النصر لنا

Post: #3
Title: Re: أخذلني يا مهند الطــاهر .. سامحني يا استاد الهــلال ..
Author: فيصل نوبي
Date: 08-19-2007, 02:42 PM
Parent: #1

Quote: ملحوظة:
خليكم شاهدين .. الليلة كان الهلال ده خذلني .. تاني ما عايز كوره .. عديل كدا

و أخوكــ كمان.

Post: #4
Title: Re: أخذلني يا مهند الطــاهر .. سامحني يا استاد الهــلال ..
Author: الواثق الصادق
Date: 08-19-2007, 02:44 PM
Parent: #1

اقرأ مع محمد عبد الماجد عشان تطمئن يا تمبس

هوامش
* مساندة الهلال وتشجيعه لا تعني باي حال من الاحوال الخروج عن الروح الرياضية والانفلات عن الخلق القويم·
* قد لا يكمل الحضري اليوم المباراة لانهياره بسبب اهداف الهلال لذلك علي البديل امير عبد الحميد ان يكون جاهز·
* ان كان الحضري نسي فانا نذكره اعتداءه بقارورة المياه علي الزميل الصحفي نميري شلبي عندما خرج الاهلي من امام الهلال في بطولة الاندية الافريقية·
* شكرا للحضري الذي جعل جمهور الهلال بكل هذا الحماس·
* الهدف الاول اليوم قد يكون من راس داريوكان·
* وقولوا يا رب·
* اذا تاخر النصر لا يعني ذلك انه لن ياتي·
* شجعوا الهلال حتي الدقيقة 49 من عمر المباراة فان لم ينتصر الهلال بعد ذلك فاسالوني·
* بالاغاني والاهازيج والانغام الفرايحية يمكن ان لا ندخل لاعبي الهلال في اي حالة من الضغط المكروه·
* شخبط شخابيط لخبط لخابيط كلتشي قونه بجيبوا بعد ما يشرطوا له فانلته·
* قودوين في اليوم دا ولا بتلفت هو جاري وهم جارين وراه·
* مهند الطاهر عندما يخفق صفقوا ليه·
* هذه افضل وسيلة لتصحيح الاخطاء·
* سيف مساوي طلع ليه تصديق لشباله الاكيد·
* الحضري دا عاوزين فيه قون من بره الخط وقون بعد شخبطة ولخبطة وقون بالشبال وقون ضربة جزاء·
* اي مشجع في الهلال اليوم عاوزنه يجيب قون·
* اذا كانت النتيجة تعادل حتي الدقيقة تسعين سوف ياتي الهلال وينتصر ان شاء الله·
* واذا كان الهلال لا قدر الله خاسر حتي الدقيقة 98 سوف ياتي الهلال ويتعادل ويكسب·
* انتوا شجعوا ساكت وما تهتموا بنتيجة المباراة·
* ارموا النتيجة وراء ضهركم وشجعوا بس·
* كلما احرز الهلال هدفا تعالوا نسعي جميعا للهدف التالي·
* عاوزين نعمل نتيجة قياسية في اهلي القرن الافريقي·
* نحترم الاهلي نعم·
* نحب مصر نعم·
* نلتزم بالسلوك الرياضي نعم·
* وكل هذه الاشياء لا تعني ان لا نقف وقفة رجل واحد في مباراة اليوم·
* شجعوهم ساندوهم والباقي علي الله·
* تعالوا نكتل قلوب لاعبي الاهلي المصري·
* نتحدث ليهم عن وحدة وادي النيل·
* وعن الاخوة الصادقة·
* والعلاقات الازلية·
* وعن ام كلثوم·
* وعن زواج ليلي علوي!
* ونغلبهم ليكم 4/صفر·
* اقول ليكم حاجة!
* المريخ عملها شينة!
* اول مرة اشوف لي حمام ميت يغلب ليه حمام عامل ليه ريشات·
* نغشكم يعني!؟
* اكيد عاوزيننا نجاملكم في يوم زي دا!
* نعمل ليكم شنو؟؟ عملتوها ظاهرة!
* هسع لو علاء الدين بابكر سافر دا كله ما كان حصل!
* خبر عاجل: يا هلالاب الله معاكم!!!!!!

Post: #5
Title: Re: أخذلني يا مهند الطــاهر .. سامحني يا استاد الهــلال ..
Author: الواثق الصادق
Date: 08-19-2007, 02:53 PM
Parent: #4

و أهم حاجة تتذكروا المنظر دا كوييييييييييييييييييييييييييس

" target="_blank">[url=http://www.sudaneseonline.com/][/URL]

Post: #6
Title: Re: أخذلني يا مهند الطــاهر .. سامحني يا استاد الهــلال ..
Author: معتصم دفع الله
Date: 08-19-2007, 03:15 PM
Parent: #1

يا تامبا ..
هسي في داعي تلخبط لي باقي يومي دا ؟
بوظت أعصابنا بي كلامك دا ..
أنا عامل لابد وما فاهم أي حاجة تجي انت تكتب لينا بوست زي دا ..
أنا ما معاكم اليوم ..

Post: #7
Title: Re: أخذلني يا مهند الطــاهر .. سامحني يا استاد الهــلال ..
Author: MOHAMED EL-BEELI
Date: 08-19-2007, 03:16 PM
Parent: #1

Quote: خليكم شاهدين .. الليلة كان الهلال ده خذلني .. تاني ما عايز كوره .. عديل كدا

تمبس يا اخوى .. كلماتك الراجفة دى خلتنى ارجف .. ومسكتنى السهراجة وام هلا هلا ..!!
لكن ..!!
ان شاء الله وبأذن الله منتصرين
والحلبة ال ..... الليلة بشوفوا اللى عمرهم ماشافووووه !!

Post: #8
Title: Re: أخذلني يا مهند الطــاهر .. سامحني يا استاد الهــلال ..
Author: humida
Date: 08-19-2007, 03:27 PM
Parent: #7

Post: #9
Title: Re: أخذلني يا مهند الطــاهر .. سامحني يا استاد الهــلال ..
Author: هاشم نوريت
Date: 08-19-2007, 03:34 PM
Parent: #8

الالتزام بالخلق الرياضى اهم من النصر لا للاعتداء على اى لاعب ولا للتحريض هزيمة بشرف خير بالف مرة من نصر بشغب.

Post: #10
Title: Re: أخذلني يا مهند الطــاهر .. سامحني يا استاد الهــلال ..
Author: Sudnawi
Date: 08-19-2007, 08:20 PM
Parent: #1

تلاته صفر و أدبوهم ادب المدايح يا تمبس... مبروووووك

Post: #11
Title: Re: أخذلني يا مهند الطــاهر .. سامحني يا استاد الهــلال ..
Author: إيمان صالح
Date: 08-19-2007, 08:34 PM
Parent: #1

الليلة عاد انا اتعلمت العد من اول جديد

واااااااااااحد
اتنيــــــن
تلااااااااااااااااااااتة

Post: #12
Title: Re: أخذلني يا مهند الطــاهر .. سامحني يا استاد الهــلال ..
Author: ماجدة عوض خوجلى
Date: 08-19-2007, 08:47 PM
Parent: #1

وانا ذاتى والله بديت اتعلم لكن فى البوست بتاع اساسى

Post: #13
Title: Re: أخذلني يا مهند الطــاهر .. سامحني يا استاد الهــلال ..
Author: Tragie Mustafa
Date: 08-19-2007, 08:50 PM
Parent: #12

مبروك يا تمبس
لقد رفعتم راسنا عاليا
جماهير وفريق

كلنا....(الهلال) .....اليوم.

Post: #14
Title: Re: أخذلني يا مهند الطــاهر .. سامحني يا استاد الهــلال ..
Author: saif massad ali
Date: 08-19-2007, 08:55 PM
Parent: #13

شيكان اخري في قلب امدرمان

انتصر الهلال اليوم علي الاهلي بثلاثة نظيفة ردا علي كف الحضري

كانت كنانية اليوم تراجي مصطفي ويروي شاهد عيان استغاثة لعيبة الاهلي

بالسيدة زينب خفيرة مصر وهم يقولون الوقت وقتك

Post: #15
Title: Re: أخذلني يا مهند الطــاهر .. سامحني يا استاد الهــلال ..
Author: محمد البشرى الخضر
Date: 08-19-2007, 09:05 PM
Parent: #14

يا الواثق
Quote: اقرأ مع محمد عبد الماجد عشان تطمئن يا تمبس
Quote: * الهدف الاول اليوم قد يكون من راس داريوكان
Quote: * قودوين في اليوم دا ولا بتلفت هو جاري وهم جارين وراه
Quote: * الحضري دا عاوزين فيه قون من بره الخط وقون بعد شخبطة ولخبطة
زولك دا فيه شي لله

مبروك يا تمبس
الهلال كان إنت خليته هو ما بخليك

Post: #16
Title: Re: أخذلني يا مهند الطــاهر .. سامحني يا استاد الهــلال ..
Author: keiga2000
Date: 08-19-2007, 09:29 PM
Parent: #15

مبروك ياتمبس

كان اشركتو مهند الطاهر كان الحال تاني

يلا شدو حليكم جيبوا ليكم كاس لتكونوا مع الزعماء

اوع تخذلونا في دوري الاربعة

وفووووووووووق فوووووووووووق

ابومصطفى

Post: #17
Title: Re: أخذلني يا مهند الطــاهر .. سامحني يا استاد الهــلال ..
Author: tmbis
Date: 08-20-2007, 00:09 AM
Parent: #16

..

..

..

Post: #18
Title: Re: أخذلني يا مهند الطــاهر .. سامحني يا استاد الهــلال ..
Author: الواثق الصادق
Date: 08-20-2007, 08:13 AM
Parent: #15

Quote: يا الواثق
Quote: اقرأ مع محمد عبد الماجد عشان تطمئن يا تمبس

Quote: * الهدف الاول اليوم قد يكون من راس داريوكان

Quote: * قودوين في اليوم دا ولا بتلفت هو جاري وهم جارين وراه

Quote: * الحضري دا عاوزين فيه قون من بره الخط وقون بعد شخبطة ولخبطة

زولك دا فيه شي لله

و الله يا محمد ناس جريدة قوون ديل كلهم بطمنوك خاصة صلاح التوم من الله و محمد عبد الماجد رغم رجفات عبد المولى..

اتخيل الزول الوحيد الاتكلم عن اكتساح الاهلي هو رمضان أحمد السيد..

لكنني لن أضحك حتى نأخذ بثأرنا من الترجي فوزاً عليه و سط جماهيره