ليه الكيزان بستفيدو من الفرص دائما بينما تفشل المعارضة ؟؟؟؟؟؟؟ خطاب دوت مجاك مثالا

قبل شوية كنت بقرأ فى بوست للأخت هنادي يوسف بتهاجم فيهو الكيزان كالعادة
. ومن قبلها بوست لدينق وتراجي ومداخلات لبشاشا طبعا لا اذكر له بوست
نشره قريبا وهشام هباني وبقية الشكل المعارض فى المنبر.
بوستات تعكس نفسيات خاصة و مزاجية ضد النظام بشكل واضح خاصةمن قبل
هشام هباني كونه انسان على سجيته لذلك مشاعره واضحة فى كتاباته
وكذلك مزاجيته. بعكس بقية المجموعة بتحرفنو فى مشاعرهم و مزاجيتهم
ضد النظام وضد القمع. اقصد بالمزاجية والنفسية هنا انها مسألة شخصية
بالنسبة اليهم يعني زي معادلة الخير والشر فى الحياة. الخير بكون مستمر
من خلال استمرارية الشر. بتساءل الناس دي خايفه يوم تصحى وتجد شر الانقاذ
ذهب واصبحوا بلاعمل؟؟؟؟؟؟؟؟؟؟؟



المقدمة دي بس عشان اقول مشكلتنا مع الكيزان و نظام الانقاذ بتكمن فى شكل معارضتنا
معارضتنا بتمد فى عمر النظام لانها مزاجية قائمة على مشاعر الفرد تجاه كل ما هو كوز
وليست قضية شعب بعاني من نظام قمعي يجيد التحور بتخطيط وليس عشوائي نظام
بعمل بحساب وبحافظ على استمرار يته بشكل مدروس الاستمرارية عنده غاية وليس
مزاجية او شوفونية.

ما حامشي بعيد

خطاب دوت مجاك الآخير:-

كشف الكتير والمؤسف

ما فاضي ارجع للارشيف لانو كان بنفع كان عدل الحال المائل دا من زماان ويبدو انه لايعدو
كونه شكل جمالي على البوست.


عشان كده حاخش توووش
دينق لمن اتحرج من شكل خطاب دوت مجاك المستنير بحق قال (فى استحياء
وبراحة يكاد 99% من قراء المنبر ما وقفوا عندها بسبب الجو المصاحب) اهلا وسهلا
ونحن ما عندنا مانع فى خطاب مثل هذا بس الشماليين يخاطبونا بشفافية !!!!!!!
وتيييب خطاب دوت مجاك دا ما زي خطابك ولا خطاب باقي المجموعة
خطاب غير بحمل شفافية تجاوب معه عدد ليس بالقليل ومن ضمنهم كيزان
ودي عادة الكيزان ما بتركوا فرصة زي دي تعدي من قدامهم من غير
ما يتلصقوا فيها. عشان كده نقوم نخليها ونهاجم صحة الخطاب ؟؟؟؟؟
الخطاب دا ذاتوو ما كان الخلاص لاكثر من دولة وعلى يد ابطال
حقيقيين مارتن لوثر كينغ مانديلا امبت كر والكثيرين وانتو نفسكم بتدعوا
لخطاب مثله دائما وفي اكثر من بوست.

تراجي انشط عضو بالمنبر مدافع عن حقوق الانسان رمت بكل شئ فى اول
لفة لمجرد انو لنا مهدى وبت الاحفاد وعدد من الكيزان سجلوا صوت اعجاب وتأيد لخطاب
دوت مجاك موقف عجيب جدا ؟؟؟؟
بتديك احساس كده انو المجموعة دي بتخاف انو مشاكل السودان تتحل !!!!!!!!!!!!!!!!!!!!!!!!!

يا رب لانو اصبح العداء فى حد ذاته غاية لشكل المعارضة والثورة لبني وطني؟؟؟؟؟؟

الكيزان عايزين يسرقوا خطاب دوت مجاك اوكي نضرب صحة الخطاب ولا نضرب الكيزان؟؟؟؟؟؟
الجري والتعب والسفر من مكان لمكان دا ، والكتابة والمشاركات فى السايبر
دا كله مش من أجل شعب السودان مش من أجل الحق ومن اجل دولة الحقوق والمواطنة
من اجل خطاب يلم الشمل ويصحح الوضع التعيس دا؟؟؟؟
دينق بنفسك انت وتراجي وبقية المجموعة وكل من يأتي هنا صباحا ومساءا مهاجم
ورافض لنظام الانقاذ و بتأكدوا انو هدفكم واحد فارجوكم
قبل ما تحترموا عقول الشعب السوداني احترموا ضمائركم.

وعشان يبقى هدف عام مش شخصي من أجل السودان جديد حقيقي.

السنجك سلامات وايه اخبار الساحر ؟؟

يا زول الكلام الكتير في شنو ؟؟
خطاب دينق وبشاشا ومن لف لفهم خطاب عسشوائي اقصائي مشبوه
لا علاقة له بالمعارضة من قريب او بعيد ..

السنجك.

بلاش نفاق معاك.

أنت لو أصلا عندك خطاب معارض أفضل فعليك طرحه هنا بالبورد أو ألتزم الصمت.

أما عادل عبد العاطي .


صاحب الحزب ومفكر الحزب وعضوا الحزب والناطق الرسمي بالحزب الليبرالي, هسع عليك الله في مسخرة وضحك على العقول أكتر من عمايلك المهببى دي؟


دينق.

دينق

بطل افلاس ومافي داعي لمنافق ما تحاول تهرب وتحول
البوست لشتائم.


خطابي واضح وبتعرفو كويس ما قاعد الف وادور مع
أي زول فى المنبر دا وموقفي من النظام واضح وشغل
الجنس التالت دا ما بعرفو نهائي.

خليك موضوعي وناقش البوست اعترف انو دوت مجاك
فضح خطابك ياخ خايف من شنو وليه بتصفق لتراجي
لمن اتعمدت تقلل من شخص وذات الاخ دوت مجاك وترفع
من شأنك ليه يا دينق؟؟؟؟؟؟؟؟؟؟؟؟؟؟؟؟؟

عارفك حتخاف تجاوب حاساعدك

الإجابة هي الأنا يا دينق

تراجي نفختك على حساب شخص وذات
انسان آخر الشئ المؤسف انك فرحت ورميت
بكل جميل بحملو دوت مجاك فى مزبلة الأنا

يا دينق القضية اكبر من شخصنة فاضية
دي قضية شعب عايز يعيش بكرامة.

بموضوعية رد على الكلام دا. رد من خلال ضميرك
رد من خلال الملاين البتتحدث بأسمائهم كل يوم
عبر صفحات المنبر رد بأسم العنصرية البترفضها يا دينق
رد من أجل انسان الجنوب ودارفور واترك الأنا
فهو اكرم لك يا رجل!!!!!!!!!!

السنجك سلامات
والله ما عارف البوست دة اتكتب متين
بس فى حاجات بوضحهها ما دام اتكتب وانتهى

عند حضورى للمنبر كنت احمل فى فكرى شئ واحد
ان اتحدث عن امور المهمشين عموما وارد بقدر ما املك من حقائق ومعلومات متوفرة لدى وحجج قوية وكل موضوع اتكتب ودخلته ولم ارد عليه فلا يعنى انى لم اراه ولكن اجد ان ردى فيها لا يدعم الامر وقد يضرها لذلك اتركها على حالها الى حين امتلاكى المعلومات الكافية لان حرب (المناقشة) من اصعب الحروب

بالنسبة الى ان (الكيزان) قد يستفيدون من اعتدال خطابى فهذا امر لا(اظنه) البته لاسباب اعرفها جيدا ويعرفها (الكيزان) الذين يعرفوننى منذ المرحلة المتوسطة (زمن) الكديت واصبحوا الان فى مراكز متقدمة فى المؤسسات المختلفة

الاخوة الذين يكتبون باسم اهلنا المهمشين واصحاب القضايا المختلفة فى السودان لا يجب ان يتاثروا من خطابى فى شئ لان المولى عز وجل خلقنا باختلاف فى كل شئ (طبع , لغة , لون..... الخ) لذلك انا لا اشكل خطرا عليهم ابدا او كانى امسك (بالعصاء) من الوسط ولكنى لى نظرة شاملة لمشكلة السودان واراها من جانب عام (من شماله وجنوبه غربه وشرقه) لذلك اجد نفسى ابتعد عن بعض الامور فانا اطبق او على طريق السودان الجديد ولا يهمنى كثيرا هل الذين يؤمنون بها كثر او اقلية او ان كان مطبق من قبل الحزب الذى ينادى به ام لا ولكن كل ما اعرفه انى على قناعة به انه معشعش فى فكرى وعلى اقتناع به وحتى ان كنت الوحيد الذى تبقى ساظل على هذا المنوال لان واكيد ساجد يوما من يعمل معى على نفس النهج

وعلاقتى بمن يكتبون هنا او بالاصح دينق وتراجى فان لى علاقة جيدة معهم ونطمئن على بعضنا اذا غاب الاخر بالهواتف وان يختلف خطابنا هنا فلا يعنى شئ اطلاقا

الوطنية هى التى تحكم خطابى
كل شخص موجوع من الحكم الحالى يكون واضحا فى خطابه ويكون الاسلوب فيها شد شديد ولكنى ايضا صاحب وجعة منها ووجعة كبيرة جدا ربما يكون المرة الاولى الذى احكى فيها

فقد اخذو اخى وقتلوه بعد ان تم خداعه باسم السلام او كما كانوا يطلقون عليه (خديعة الخرطوم للسلام)
تم ايقاف ابى لمدة ثلاثة سنوات من العمل لاسباب غير معروفة وبدون ان يتم تسوية حقوقه او حتى ارجاعه للعمل الى ان اتت الحركة الشعبية بعد التوقيع وارجعته الى العمل بنفس رتبته السابقة وفى نفس وحدته

رغم كل ذلك اؤمن تماما بان وعينا وتكاتفنا كابناء وطن واحد هو المخرج لهذا الوطن وان ننسى كل جراحات الماضى وان نعطى للاخرين الفرصة من اجل خاطر عيون الوطن
فان ابن ادم مهما كان يوما سيعى شئ واحد
وان الشعب لابد ان يعرف ان من مصلحته ان يسلك درب الوعى والوعى الجماعى

والكيزان ليس كلهم كما معتقد فان من بينهم من امن فى ايام الحكومة الاولى بالقضية والشعار ولكنهم بعد ان وجدوا انها شعارات فقط تركوها واعرف الكثيرين منهم ومثل هؤلاء لابد لنا ان نرحب بهم وان نفتح صفحات جديدة معهم وان لا نعيرهم بسابقهم (فكلنا باخطائنا) ولسنا ملائكة بالنسبة لهم

ومن مازالوا على الطريق ان نفتح معهم قنوات اتصال جديدة بالمنطق والعقل وان لا نحاسبهم على ماضيهم بل ان نعمل فى الحاضر المستقبل لان تقليب الماضى تجعل القلوب قاسية وتتحكم المشاعر فى العقول وجينها سنظل فى محطتنا هذا الى الابد


اخوتى بكل التنظيمات
ان كان همكم اصلاح السودان فهذا ليس مستحيل والثورات ليس بحمل الاسلحة فقط
ارجاع الحقوق ليست عن طريق العنف فقط ولكن بالكلمة احيانا نغير مفاهيم كثيرة

من كان منكم (بقلب سودانى) ليبتعد عن افكار الماضى ويعمل من اجل الغد (وهو قريب جدا)
ساهم فى وعى اقرب الاقربين اليك وابداء من اخوتك جيرانك ولا تدعوهم لتنظيمك لان هذا يجعلهم يضعونك فى خانك انك تريد تجنيدهم بل ادعوهم الى الهم الوطنى
اشرح لهم المفاهيم المغلوطة ويكف يستغلهم الاخرين
اشرح لهم كيف يضعون حد لمعاناتهم
واكيد (السودان) هو الفائز

والسلام اخر الكلام

Quote: من كان منكم (بقلب سودانى) ليبتعد عن افكار الماضى ويعمل من اجل الغد (وهو قريب جدا) ساهم فى وعى اقرب الاقربين اليك وابداء من اخوتك جيرانك ولا تدعوهم لتنظيمك لان هذا يجعلهم يضعونك فى خانك انك تريد تجنيدهم بل ادعوهم الى الهم الوطنى اشرح لهم المفاهيم المغلوطة ويكف يستغلهم الاخرين اشرح لهم كيف يضعون حد لمعاناتهم واكيد (السودان) هو الفائز

لله درك .. يافتى