Post: #1
Title: حكاية الجني ومدرب الهلال ريكاردو القال بيحلم بى بطولة خارجية مع الهلال
Author: sheba
Date: 08-02-2007, 04:45 PM
Parent: #0
حكاية الجني ومدرب الهلال ريكاردو القال بيحلم بى بطولة الخارجية مع الهلال
قالو فى جني طلع لى واحد وقال ليهو انت انقذت حياتي عشان كدة اطلب اى حاجة وانا البيها ليك !!
قاليهو دايرك تعمل كبرى من بورتسودان لى جدة
الجني قاليهو دي صعبة شديد شوف حاجة تانية اسهل شوية ؟؟
الزول قاليهو خلاص خلى الهلال يجب بطولة خارجية ؟؟
الجنيى قاليهو : قلت لي الكبري دايرو من وين لى وين ؟
ريكاردو مدرب الهلال قال انو تلقي عروض تدريب من اندية اخرى .. لكنه والحديث
لريكاردو متمسك بالهلال حتى يحقق معه بطولة خارجية
قال ايه حا يدرب الهلال لحدي ما يحقق معاهو بطولة خارجية
تعرفو دة معناهو شنو ؟؟
معناهو انو حا يقعد فى السودان ويدرب الهلال لحدى ما يعتزل الدنيا كلها
واحد اخونا صاحبي و حاقد شديد اسمو ابو الجوخ قال :
الزول ده لو جادي خلوهو من هسة ياخد الجنسية السودانية ويقدم في الخطة الاسكانية الجاية ويرسل لي الاولاد
يجوا من البرازيل ويأجر فى الصافية ويدخل اولادو مدارس خاصة
|
Post: #2
Title: Re: حكاية الجني ومدرب الهلال ريكاردو القال بيحلم بى بطولة خارجية مع الهلال
Author: sheba
Date: 08-02-2007, 04:52 PM
Parent: #1
الوداعية قالت الهلال بجيب كاس بعد تلتمية وخمسين سنة بس بعد التاسيس !!
لسة فاضل وكت كتير يعني عندو وقت لسه!!
اعمل وصية ورثها احفادك زى دعاية سوداني
عالم حاقدة بس !!
|
Post: #3
Title: Re: حكاية الجني ومدرب الهلال ريكاردو القال بيحلم بى بطولة خارجية مع الهلال
Author: طارق اسماعيل
Date: 08-02-2007, 05:09 PM
Parent: #2
شيبا
يازول يارائع انت كنت غاطس وين لي زمن ماشفتك في حوش بكرى ده
بس راعي لمشاعرنا زمان انا كنت هلالابي
والان قومي
|
Post: #4
Title: Re: حكاية الجني ومدرب الهلال ريكاردو القال بيحلم بى بطولة خارجية مع الهلال
Author: ismeil abbas
Date: 08-02-2007, 08:23 PM
Parent: #1
ألأخ/شيبا
لك التحية
من حقك تعبر..
ومن حقى أعلق
حوش بكرى ده أجمل ما فيهو الصراحة.
طارق قال ليك طولت ما طليت.ولكن والله من ما قريت كلامك تمنيت لو ماجيت.
وبتنطبق عليك المقولة البتقول .صمت دهرآ ونطق كفرآ.
ده الهلال الحب العز .كان جاب ولا ما جاب...
مودتى وما تزعل منى.
إسماعيل محمد أحمد عباس...............
|
Post: #5
Title: Re: حكاية الجني ومدرب الهلال ريكاردو القال بيحلم بى بطولة خارجية مع الهلال
Author: hatim ibrahim
Date: 08-02-2007, 08:52 PM
Parent: #1
.
البعبع .. سيد البلد.. هلال الملايين
عافيت منك والله
خليت الجماعة يكلموا في روحهم ..
حسع يا شيبا: ( الوصيف الدائم ) عندو ماتش بكرة القريبة دي
امش شوف ليك ( سبحة لالوبة ) تجرها عشان تغلبوا زي ما غلبتو أهلي مدني
الهلال ده خليهو ما بتلحقوا .. بعيييييييييد
قاعد فوووق وخالف رجليهو مع الأبطال.
.
|
Post: #6
Title: Re: حكاية الجني ومدرب الهلال ريكاردو القال بيحلم بى بطولة خارجية مع الهلال
Author: sheba
Date: 08-02-2007, 09:13 PM
Parent: #1
اول هام ما اتكلمنا عن الهلال .. .. لسبب بسيط ؟؟؟
لانو ابو الهل ما عندو حاجة كويسة اصلا يتكلموا فيها
ولو اتكلمنا عنو ... ماحا نلقي حاجة غير الفضايح وما اكثرها
والبوست ده من عنوانو ظاهر انو خاص بريكاردو وحلمه وكدة يعني ... وعن الجن اللهم احفظنا
وما عندنا ابدا اعتراض على انو الزول يحلم ... فيها شنو ؟؟
بس سيكون اطول حلم
|
Post: #8
Title: Re: حكاية الجني ومدرب الهلال ريكاردو القال بيحلم بى بطولة خارجية مع الهلال
Author: keiga2000
Date: 08-02-2007, 09:35 PM
Parent: #6
الزول العسل الظريف
حمدلله على السلامة مرة ثانية
ههههههههههههههههههههههههههههههههههه والله ظريفة جدا والله دا جني عاقل جدا
يازول ريكاردو دا بكره بنسمع بتسفيروا مش صلاح ادريس البشاكل في ضلوا دا
الهلالاب هو يحلموا ليهم سنين طوال ونحن نقول ليهم احلام زعوط
طالما هلال 87 ماشال كاس ما اظن تاني في هلال بشيل كاس
زمان اللاعبين منقستو وجلال كادوقلي وتنقا والثعلب وهسع اصبحوا هيثم وزرياب ومعز
زمان الرئيس الطيب عبدالله
هسع الرئيس صلاح ادريس
يازول ديل كاس الممتاز دا لو بشترو مباريات الاقليم ما اظن يشيلوه والدليل على ذلك كاس السودان الذي اصبح حكرا للاحمر الوهاج
كتر لينا من النكت دي ياظريف
وراعي لكبار السن واصحاب الضغط والسكري
ابومصطفى
|
Post: #7
Title: Re: حكاية الجني ومدرب الهلال ريكاردو القال بيحلم بى بطولة خارجية مع الهلال
Author: السمؤال بدرالدين
Date: 08-02-2007, 09:30 PM
Parent: #1
ابو الشيب
شنو الحقد ده
خلي الناس تفرح ويروح منهم الشعور بالدونية من بطل مانديلا
تسلم
كسرة اوعة ترفع من الرشاشات
شايف بقو في التحانيس
تاني تجو
|
Post: #9
Title: Re: حكاية الجني ومدرب الهلال ريكاردو القال بيحلم بى بطولة خارجية مع الهلال
Author: keiga2000
Date: 08-03-2007, 05:24 PM
Parent: #7
شيبا الحق صاحبك بقى يفتح البوست والناس طبعا عارفه الكلام دراب مابردوا عليه
يقوم يرد على نفسوا يعني يكتب وحده ويرد وحده دا فات ابوذر الغفاري
كدي بالمناسبة دي ادينا واحده شديده كدا من نوع الجني دا
ابومصطفى
|
|