Post: #1
Title: آه يـــــــــــــا بــــلد
Author: مجدي مسعد حنفي
Date: 08-01-2007, 12:39 PM
Parent: #0
آه يـابلـد
000000000000
آه يابلد.. آه لو تعرفي الشوق وحسرات الكمد
آه لو تعرفي رنين غناي كيف بتخنق ساعة يتولد
آه لو تعرفي حنيني ليك واشواقي ليك انا يا بلد
..................................
آه يابلد.. آه لو تعرفي اللوعه والنار في الضلوع
وكيف الحنين بيكوي الفؤاد ساعة العيون تغرق دموع
وكيف الامل يصبح وهم والليل يلف ضي الشموع
وكيف حالي لما يمر نسيم حامل اريج زهر الربوع
يرحل يفوت كل الجلد...من شوقي ليك انا يابلد
.................................
آه يابلد.. حتّى الأهل نسوا اني عايش في البعيد
نسوا يرسلوا الزاد والحنين في كلمه في بطاقة بريد
نسوا اني بشتاق للخطاب زي شوقي لي زولي البريد
مع انو عارفين العلي وحنيني لي ارض البلد
................................
آه يابلد.. حتّى الحبيب ما راضي يبقى علي قريب
قايلني بنسى بعيد هواه وفي الغربه بختار لي حبيب
قايلني من غير ابتسامه ونظره من عينيه بطيب
قايلني بنسى وعودي ليه وهواهو يصبح لي غريب
ياريتو لو يعرف شقاي واشواقي لي سيد البلد
................................
آه يابلد.. لمتين خطاي تسرح تتوه وسط الرمال
لمتين اسافر للنجوم والشوق يبدّل حالي حال
لمتين حنيني اليك يطول والدمعه يشقيها السؤال
ومتين ميعادي معاك يطل ولقانا يصبح ماخيال
فاقد حنانك ياهواي وفاقد حنان اهل البلد
مجدي مسعد حنفي
|
Post: #2
Title: Re: آه يـــــــــــــا بــــلد
Author: مجدي مسعد حنفي
Date: 08-02-2007, 10:12 AM
Parent: #1
من المفارقات العجيبه ان اغنية آه يابلد كنت قد كتبتها في اولى سنين الاغتراب وعند زيارتي للسودان في اول اجازه طبعتها وقدمتها الى سكرتير لجنة النصوص وكان في ذلك الوقت يدعى عبدالوهاب حمد ارباب فاستلمها مني وطلب ان امر عليه بعد اسبوع وفعلاً عدت بعد اسبوع لأجد النص وقد ختم بعبارة غير مجازه ولكن المفارقه اتت حين قام الاستاذ الشاعر المعروف محمد يوسف موسى بنشر القصيده في الصفحه الفنيه في جريدة الصحافه والتي كان يشرف عليها وكان في نفس الوقت عضو في لجنة النصوص التي رفضت اجازة القصيده .
|
|