Post: #1
Title: غيمك مطر شجر الروح
Author: محمد حيدر المشرف
Date: 07-29-2007, 07:05 PM
بعد الشمس شموسك طلعت
ضوت ليل الغربه الفينا سنين ... ِ
ارخي سدولو العشق النازل ...
بين جنبات القلب يقين ...
صوتك دوزن عصب الدهشه ...
وستف نبض الالفه حنين ..
صوتك جوهر نغم الغنيه ..
مازج فيها الاهه انين ..
مازح صفو ايامنا غناكى ...
رجاكى
الامل الطالى يتاوق
بين شرفات الوجد اليك
جاكى
الريد مسكون بى شوقو
شوق الريد اتلم عليك
عليك اتوكل حس الشعرا ..
ارهف سمعو النيل اتلملم
ومن فيضان العشق عليهو ..
غنى وتمتم
يمم صوبك موج الضفه ..
رسمك الفه
وشجو اصيل ..
وزادك عفه
خمار الليل ..
رفع الكلفه ..
بينو وبين عينيك اصيل
حتى المغرب جاكى يدندن
وترو يحنن
شوقو يجنن
صوتو يحاكى صهيل الخيل
( جميل ... يا جميل )
(وآه .... يا ليل )
وغمز القمره برمش هواك
ضارت منو وسيم محياها
وبسمه رصينه .. وثغر ملاك
وغنت ليك ..
يا مسكونه برزم العافيه
غيمك مطر شجر الروح
فرهد صوتك جوه القافيه
رحم الليل هداهو نشيدك
برق الغيم اتلاصف نورو
وعد الفرح اتسارع نبضو
نواصى الدنيا صلاتا عليك
ونزلتى شروق
شمسا طاعمه كما الاطفال
حسا دافق مطر الفال
عشقا سافر ... فينا مسافر
وحرف مساهر ... ابى يتقال
.
|
Post: #2
Title: Re: غيمك مطر شجر الروح
Author: omar altom
Date: 07-29-2007, 07:24 PM
Parent: #1
محمد حيدر
(عشقا سافر ... فينا مسافر
وحرف مساهر ... ابى يتقال)
والله انه من اجمل ما قرات من شعر مؤخرا...........!
وعل ذكر الحروف المساهرة الابت تتقال يبدو لي بان هناك بقية للقصيدة ابت تتقال ليك....!!
فهل من مذيد؟؟؟؟
احترامي كبير لقلمك وسعدت ايما سعادة بالقرآءة اليك
عمر
|
Post: #3
Title: Re: غيمك مطر شجر الروح
Author: خالد علي محجوب المنسي
Date: 07-29-2007, 09:02 PM
Parent: #2
Quote: شمسا طاعمه كما الاطفال
حسا دافق مطر الفال
عشقا سافر ... فينا مسافر
وحرف مساهر ... ابى يتقال |
محمد حيدر المشرف
تسلم
ولك الاحترام والتقدير
خالد
|
Post: #5
Title: Re: غيمك مطر شجر الروح
Author: محمد حيدر المشرف
Date: 07-30-2007, 04:30 PM
Parent: #3
خالدعلى محجوب المنسى ..
سلامات آ زول
شكري الجزيل لمرورك
ودمت عافية .. وحضور
تحياتى
|
Post: #4
Title: Re: غيمك مطر شجر الروح
Author: محمد حيدر المشرف
Date: 07-30-2007, 04:26 PM
Parent: #2
عمر التوم ..
سلامات وكيفك وكيف كيفك ..
يا ..
كم ..
أسعدتنى
ودمت عافية ... وحضور
|
|