ماذنبي إذا كان القراء يتصلون ويضحكون بعمق !!!! ؟

تأتيني اتصالات كثيرة من مختلف أنحاء العالم من قراء سودانيز
الأعضاء وغير الأعضاء
وهذا ليس بسبب مواضيعي البسيطة
بل بسبب دعمكم وتوجيهاتكم
عبركم اوجه هذه الرسالة لأحد القراء الذي يتصل علي من أمريكا
وهو قاريء نهم لهذا الموقع
وانسان مثقف
لا اريد أن أظلمه
ولكن 000
وصلني اتصال يوم أمس من أمريكا
وبالتحديد من صاحب المحل الذي يعمل به أخي القاريء السوداني الشهم
وكان الرجل مستاءاً كثيراً وقال لي مكالمة واحدة لك انت باكثر من 300 دولار
فعلاً اتصل علي القاريء الكريم وهو يناقشني في بوست
{ نسوان يخلوهن يسلمن عليك ونسواهن مايخلوهن يسلمن عليك
المكالمة كانت طويلة وتعرفنا فيها على بعضنا وناقشنا بعض مواضيع سودانيز أون لاين
الرجل يشتكي ويقول لي بيتي اتخرب من هذه المكالمات
فقد وصلت لأكثر من 1800 دولار
ويقول لي ايه انت يعني حتى تصلك كل هذه المكالمات ؟؟
فقلت له أنا شقيقه !!!!
الرجل الآن يطالب بهذا المبلغ لأن القاريء استخدم هاتف المحل
وعبركم أناشده بان ينقل لنا الحقيقة في رسالة
حفاظاً على سمعتنا كسودانيين

ذكرني هذا الموضوع بسوداني معنا هنا
سافر والده للسودان
ومن ثم بدأ يتصل على حبيبته بجامعة الأحفاد
وخلال شهرين فقط وصلت الاتصالات الى 25 الف ريال !!!
كان يحادثها قبل أن تذهب للجامعة وبعد أن تأتي
أما في الليل فإن الحديث يكون ذو شجون
قلت له : والله لو كنت مكانك لاستدنت 5 الف ريال للذهاب اليها ورؤيتها على الطبيعة

أخي أب حراز
يا أخي ملعون أبو الشهرة ذاتها ، قلت لي بقوا يشدوا ليك سلك عديل كده ومن أمريكا ، لا أشك في ذلك لكين المهووس المعجب بيك ده في النهاية هو حرامي ، يعني شابكننا في التراث أنا المامون على بنوت فريقو وأنا المش عارف إيه تقوموا تلحسوا كمان في أمريكا. أنا آخر تلفون جاني كان غلط والغلط كان مزدوج حيث أن سوداتيل قد تكرمت مشكورة بفصل الخدمة عن هاتفي الثابت بالمنزل وجريت جري لي ناس أريبا وديك يا التسهيلات وعملت ليك خط التيمان عديل كده وبعت الخط التاني لي جيرانا أها يقوم تلفون سوداتيل يرن بلا سبب أرفع السماعة أسمع ليك "عزيزي المشترك ، حاولت أقاطعو وأقول ليهو إنت داير منو يا اللخو ، وحاتك ما إشتغل بي شغله شبكني ليك ، لقد تم إعادة خدمة استقبال المكالمات إلى هاتفك نرجو المسارعة في السداد حتى لا تقطع عنك الخدمة نهائياً ، هذه رسالة مسجلة" أها بعد ما قفلت التلفون تاني يرن وتجيني المرة دي رسالة من تحت الماء عديل كده واحده عكليته وما عندها موضوع وقالت ده بيت ناس بشري وأشيل وأحلف وأقول ليها يا بت الناس ده ما بيت بشري ولا بيت جيرانهم حتى وهي ورأسها وألف سيف إنو ده بيت ناس بشري وقالت لي في النهاية وبي مساخه إنت ذاتك بشري. أها جريت جري على الراكوبة ولقيت ليك أم أحمد بتورق في خدره قلت ليها إنت دايره تسوي لينا ملاح شنو قالت لي بي زهج قشرة ، قلت ليها أنا إسمي منو ، قالت لي جنيت يا راجل ما إسمك القشرا ، أها وحاتكم قشرا تقشير الملا بقت لي قريبه من قشرا تقشير بشري ، رجعت ركيت ليك جمب التلفون لو مره جرسو يرن وإلى كتابة هذه السطور ما في أى حرارة في التلفون بل إنتقلت الحرارة إلى لساني من كترة عضعيض ليهو أنا جني وجن الإنتظار
أها يا أب حراز يا أخوي زولك بتاع امريكا ده ما تخليهو يشوف لي طريقة في اللوتري يمكن أقدر أسافر ، بس بشرط يوديني لي شيكاغو ونا زمان أيام الصبا الذي لن يعود رسلت ليك رساله لي لاعب السله الشهير مايكل جوردان وطوالي كان هو كان مدير أعماله رد لي والله يا أب حراز وصوره موقعه منو لي هسع محتفظ بيها أها قلت لمن أصل هناك أقول ليهم أنا صاحب مايكل جوردان ويمكن يشوفو لي طريقة شغل.
وإنت صحيح بي ضراعك وموضوعاتك بقيت مشهور لكين مسرح الشهرة كان هذا المنتدى لذلك وجب عليك أن تدفع بي كلام ناس الإقتصاد والقروش ثمن الشهرة كاش. بعدين نصيحتك لي صاحبك فشنك يا أخي الخمسة آلاف ريال دي تجيب الجكساية عمره وأخوها محرم كمان ويفك أخوها عسك الهوا ولا يجيب ليهو الجوازات ويعرس البت ويكون ضرب عصفورين بي خمسة ألف ريال.

تعرف يا أخي الملا عمر أن سودانيز اون لاين صنعنا
وأنا لم أصنع سودانيز اون لاين

Quote: واحده عكليته وما عندها موضوع وقالت ده بيت ناس بشري وأشيل وأحلف وأقول ليها يا بت الناس ده ما بيت بشري ولا بيت جيرانهم حتى وهي ورأسها وألف سيف إنو ده بيت ناس بشري وقالت لي في النهاية وبي مساخه إنت ذاتك بشري. أها جريت جري على الراكوبة ولقيت ليك أم أحمد بتورق في خدره قلت ليها إنت دايره تسوي لينا ملاح شنو قالت لي بي زهج قشرة ، قلت ليها أنا إسمي منو ، قالت لي جنيت يا راجل ما إسمك القشرا ، أها وحاتكم قشرا تقشير الملا بقت لي قريبه من قشرا تقشير بشري ، رجعت ركيت ليك جمب التلفون لو مره جرسو يرن وإلى كتابة هذه السطور ما في أى حرارة في التلفون بل إنتقلت الحرارة إلى لساني من كترة عضعيض ليهو أنا جني وجن الإنتظار

وبعيداً عن الكتابة والشهرة الزائفة جداً فقد حملني هذا القاريء في لحظة حلم جميلة 00 تنقلت معه بين مدن أمريكا الجميلة 00 وسألته عن البقر الفريزيان البشري فحكى لي ليلتها الكثير والكثير جداً 00 وقال لي أنت وأمثالك لو أتيتم الى هنا فستبدعون حقاً لأنكم سترون أشياء عجيبة من نيكول كيدمان مروراً ببروك شيلدز حتى نعومي كامبل !!! بالطبع لم أساله عن مايكل جوردان ولا مايك تايسون العضاض الذي رأيت معه ذات مرة إمراة جميلة بصحبته فتذكرت على الفور فيلم { بيوتي آند ذا بيست } الجميلة والوحش 0
ومن بيفرلي هيلز سانقلك مباشرة الى الحصاحيصا حيث وردتنا يوماً ما رسالة بالخطأ وكنت حينها أصلي في صلاة العصر فذهبت ست النفر مباشرة وبفضول المراة السودانية التي تريد أن تعرف عنك كل شيء حتى حينما تكون نائماً 00 المهم فتحت الرسالة وكانت الطامة الكبرى { خلاص أبوي وافق ولازم تجي تقابله عشان الموضوع يتم } !!!! وأنا في الركعة الرابعة سمعتها تتنفس بعمق وتتشهد بطريقة عجيبة جداً ونسيت السلام والتشهد الأخير وقمت بركعة خامسة ولولا لطف الله لأردفتها بواحدة أخرى 00 السلام عليكم
أها اتت ست النفر بالرسالة والشرر يتطاير من عينيها والحمد لله أن النسيبة في ذلك اليوم كانت في مشوار بكاء 00 قدر صاحبك ماحلف بان الرسالة لاتخصه ولاتعنيه ولكن لاحياة لمن تنادي 00 بدا التكرفس والحردان وبالطبع المنع من أشياء كثيرة في تلك الليلة بداية من كباية الحليب الى صحن الشوربة واشياء أخرى أكثر اهمية
وفي الصباح حاولنا الاتصال بصاحبة الرقم والتي لحسن حظ الشيخ ابوحراز كانت من نفس المدينة بل وتعرفنا جيداً وأتت مشكورة للمنزل واعتذرت بشدة ووجدنا الحبيب يحمل نفس الاسم 00 لكن 00 قد تسال كيف وصلها رقمي ؟؟ تصدق أحد ابنائي كان يدرس عندها وهو من أعطاها الرقم وللأسف الشديد نال عقابه الرادع من ست النفر وحذروه في ذلك اليوم ان لايعطي رقم الشيخ ابوحراز لأي إمراة مهما كانت 0
يعني لو أنا كنت الشيخ اسامة بن لادن او الشيخ صلاح إدريس أو الشيخ مصطفى الأمين كان أظنها ضربت الكواريك نص الليل
وياليت لو وقف الموضوع عند هذا الحد بل طال العقاب شركة سوداتيل التي كنا تحت لوائها وغيرت لنا ست النفر الشريحة منذ ذلك اليوم قائلة بحماس شديد أن موباتيل خدماتها أحسن 0 وفارقنا السوداني فراق الطريفي لي جملو !!!
قال خليك سوداني قال !!!
وبرضو تقول لي قشرا !!!!

أبو حراز...

بقت على 1888 دولار؟

أنا خايف الجماعة هنا يرسلوا ليك فاتورة غصلاح سيارات ..

كلما أكون سايق أشوف لي سيارة ليها كضيمات أقول دي تشبه أبوحراز.. وأقعد أضحك وأقهقه وأشلق .. وأنسى إني سايق في طريق سريع من سبعة بحور

يازول أعمل حسابك كان تجيك فاتورة إصلاح طيارة.. أي واكس!!

المسافر

Quote: كلما أكون سايق أشوف لي سيارة ليها كضيمات أقول دي تشبه أبوحراز.. وأقعد أضحك وأقهقه وأشلق .. وأنسى إني سايق في طريق سريع من سبعة بحور

يازول أعمل حسابك كان تجيك فاتورة إصلاح طيارة.. أي واكس!!

انت من زمن الجضووووووووووووووووووووووم
والله امرك غريب جداً
تعرف عدس العزابة دا ماخلى فينا اي لحم
الغداء فاصوليا
تجي في العشاء تلقاهم قلبوا الفاصوليا عدس
نفس باقي الفاصوليا يزيدوه عدس ويجيبوه ليك في العشاء
والطامة الكبرى وين
غداء بكرة يعملوا قراصة ونفس الحلة بتاعت أمس يقلبوها ويكة
صراحة الويكة دي الواحد لمن ياكلها كتير بتخلي خشمو كبير جداً

عندي بت عمي ماجاها عريس لسه
كلو عشان الخشم الكبير وأكل الويكة
لكن الحمد لله خشمها دا نفعنا في طراش الملاريا
عووووووووووووووووع مرة واحدة وتقضي على كل شيء
مازي ناس ست النفر
كان جاها طراش والله بالتقسيمة تشحتف روحك

أخي أبو حراز

أقترح تنشر تلفون الملا عمر في بروفايلك شوية علو ينال نصيبو من الإتصالات الدولية. لكن خوفي تجيهو كلها من (أفغانستان والباكستان و xستان)..

أنا كنت خاتي تلفوني في البروفايل وكل تفاصيل معلوماتي الشخصية لمن جاني تلفون من السفارة.. أنقر ما خليت ليك بروفايلي أبيض... ولو لاقي طريقة أمسح إسمي ظاطو كان مسحتو. كلو شيء ولا السفارة .. يحميكم الله منها.

أخي Elawad Eltayeb

Quote: أقترح تنشر تلفون الملا عمر في بروفايلك شوية علو ينال نصيبو من الإتصالات الدولية. لكن خوفي تجيهو كلها من (أفغانستان والباكستان و xستان).. أنا كنت خاتي تلفوني في البروفايل وكل تفاصيل معلوماتي الشخصية لمن جاني تلفون من السفارة.. أنقر ما خليت ليك بروفايلي أبيض... ولو لاقي طريقة أمسح إسمي ظاطو كان مسحتو. كلو شيء ولا السفارة .. يحميكم الله منها

مرة واحد عسكري قال لي مرتو انا عاوز انوم
وكان شفتي اتصل مدير عام الشرطة ماعاوز أصحى ليهو
بالله صاحبك مانام ليهو خمس دقائق
بس قوم يا التلفون { رن رن رن }
المدام رفعت التلفون وردت على المتصل
بالله قامت جارية بسرعة صحت ليك الراجل
وقالت ليهو قوم ياحيوان النايم ليها شنو
المتصل دا { صلاح إدريس }
بالله زولك قام يتعتر لحد ماوقع ورفع السماعة
لقاهو صاحبو جاهو في المحكمة وبيسأل عنه

قال صلاح إدريس قال