ود الياس يصرح : لن يخسر الهلال أو المريخ ... اها ورونا الحل كيف ؟؟

صرح قطب المريخ المعروف ورئيس ناديه السابق " محمد الياس" أن الهلال أو المريخ لن يخسرا اى مباراة ضد اى ناد آخر فى الدورى العام الممتاز السودانى بسب عدم التكافوء، وسوف يخسر احدهما من ألاخر فقط أو أن يتعادلا !!
اها وكيف ناوى تعمل لو "البدون" سمح الله وخسروا أو تعادلوا مع أحد الأندية قبل لقائهم بالزعيم سيد البلد يعنى طوالى يسلموا الزعيم الكاس؟؟
ومن الطريف فى الأمر أن السيد/ محمد الياس مازح شباب المريخ خلال جلسة عامه قائلا:-
"والله لو الهلال شال الكاس للمرة الخامسه الا تتفرتقوا!!
واضاف ضاحكا:-
غايتو ما عندنا حل الا الهلال يتخلص من "الشواطين" .. الأتنين "كلاتشى وقودوين"!!
تخريمه:-
نطمئن ودالياس اذا تخلص الهلال من "الشواطين" فسوف يظهر له "دحيش" نيجيرى .. اها احسن ياتو؟؟

Quote: ود الياس يصرح : لن يخسر الهلال أو المريخ ... اها ورونا الحل كيف ؟؟

لو تخمين ود الياس طلع صاح معناها الكاس للمريخ
نغليكم ونتساوى ونلعب مباراة فاصلة ونغلبكم تاااااااني

ولو كلامو ماطلع صاح معناها الهلال ح يخسر أو يتعادل
أما المريخ ما أظن يخسر أو يتعادل

آخر مباراتين في أستادكم بتتعادلو بطلوع الروح
والجاية في القلعة
عرفت الحل ؟؟

يا ثابت
ود الياس حالتو مريخابى وكان رئيس نادى المريخ قال كده، طيب لو كان رشاشه كان ح ييقول شنو ؟؟
بعدين حقو تأخد بالك من ملاحظتو الذكيه " مافى طريقه الا الهلال يبيع الشواطين كلاتشى وقودوين"!!!
يعنى بالعربى ما فى طريقه معاهم .. ولا كيف ؟

Quote: بعدين حقو تأخد بالك من ملاحظتو الذكيه " مافى طريقه الا الهلال يبيع الشواطين كلاتشى وقودوين"!!!

تاج السر
سلاااام
والله ملاحظ قبل تقول لي
بس ودالياس قاصد يبيعهم عشان يتغلب من السوكرتا ولا الأمل عطبرة
المريخ ما هاميهو شواطين الهلال
المريخ عندو ملايكة لما تحضر بتغيب الشواطين
لما اتغلبتو في كاس السودان مش الشواطين قاعدين ؟؟
لما عادلتو مرتين مش الشواطين قاعدين ؟؟

وقع ليك ؟؟

قلت لى لما تغلبوا الهلال تكونوا متعادلين معاهو ... طيب لو غلبكم الهلال البحصل شنو ؟؟

Quote: قلت لى لما تغلبوا الهلال تكونوا متعادلين معاهو ... طيب لو غلبكم الهلال البحصل شنو ؟؟

تاج السر
إنت سألت من الحل وأنا وريتك الحل .. الحل بنغلبكم
لو غلبتو إنتو أكيد ح تشيلو الكاس .. دي عاوزة تفكير
وكونكم تغلبو دي شيلها من حساباتك
الهلال هش .. يضربكم أسك خمسة بتجو مفرتقين

بتتذكر آخر مرة غلبتو فيها المريخ متين ؟؟
غايتو آخر تلات مرات هي فوز المريخ وتعادلين
والبتعادل الهلال وفي إستادو وفي أواخر المباريات والشواطين لاعبين


والمباراة في القلعة الحمراء

الأهلى المصرى انهزم من برشلون 4/ صفر، وحينما شارك فى بطولة الأندية الأفريقه لم ينهزم حتى اللحظه حتى خارج ملعيه، تفتكر فريق بحتك مع اندية زى دى لمن يلاقى بسكويت هش وكوامر معمره ح يعمل فيها شنو ؟؟

لا تنسى انكم قلتو حصلت استفادة من الأحتكاك مع الأشانتى وهو لا يشارك فى البطولة الأولى ولا الحمام الميت .. ولو ما كان الأحتكاك مع الأهلى والترجى مفيد ليه حاولتو تلعبوا معاهم وقالوا ليكم NO ؟؟

نصيحه غاليه:-
الهلال وهو عائد من بطولة الأندية حقو تزوغوا منو !!!!!!!!!
تذكر كلامى ده اتوفسار ما خلى الزمالك الا بعد الهزيمه من الأأهلى 6/1

Quote: نصيحه غاليه:- الهلال وهو عائد من بطولة الأندية حقو تزوغوا منو !!!!!!!!! تذكر كلامى ده اتوفسار ما خلى الزمالك الا بعد الهزيمه من الأأهلى 6/1

نصيحة أغلى
المريخ وهو عائد بكاس الكونفدرالية بكون ناااااار منقد
أوعكم تفلقو القلعة الحمراء مافيها مراتب

ريكاردو الما متعود على الخمسة
قال دي أول مرة أتغلب خمسة من ما إتعلمت التدريب
لطختو تاريخ الراجل يا تاج السر
عيب عليكم

الله يستر بس

المريخ حدو هنا الا اذا حصل بيع شراء !!!!!!!!

Quote: المريخ حدو هنا الا اذا حصل بيع شراء !!!!!!!!

والله يا تاج السر المريخ حدو أبعد مما تتصور
حدو التتويج .. وإتذكر كلامي ده

الهلال الحدو قريب .. وح أذكرك

لو بنقدر نشتري كل العالم دي معناها أقوياء
نشتري الإسماعيلي ونشتري كوارا ونشتري دولفين ؟؟
وبعد كده نشتري أول المجموعة التانية ؟؟
ياتاج السر قووول كلام ينبلع .. معقول إنت قاصد كده ؟؟
إنت قايل ده الدوري الممتاز ؟؟
تخزنو عليوة في الموردة وتشتروا منها صالح عشان تغلبوها
تفاوضوا سولي شريف بتاع حي العرب قبل يومين من المباراة
وواحد تاني في هلال الساحل نسيت إسمو
والحكام يعملو ليكم وقت إضافي ربع ساعة عشان تعادلو مع هلال الساحل
ويحسب خمسة دقائق وقت بدل ضائع ويلعبكم تسع دقائق
عشان تعادلو مع أمبدة وتفوزو بضربات الجزاء ؟؟
يارااااااااجل هلالك معرووووف


شوف الناس البتشتري مين
المريخ بقلع عديييييييييل .. مزيييييكا

Quote: المريخ حدو هنا الا اذا حصل بيع شراء !!!!!!!!

قلت لى المريخ حدو وين ؟

يا راجل !!!!!!!

من يوم تسجيلك ماعندك موضوع ..









الهلال يلعب اجمل مبارياته مع كل فرق العالم .. بس اما الزعيم يظهر وكانه فريق من الدرجة الثالثة ولوماعارف السبب اسال احمد عبدالله ..




قال : العجب مايحرز الاهداف الا في الحمام الميت ..



حليل الهلال البشجعو واحد من امثالك

الاخ تاج السر
سلام
بالله سؤال للاخ ثابت:
متين اخر مره المريخ انتصر علي الهلال دوريا؟؟
اها يمكنك الاستعانه بصديق للاجابه علي السؤال

Quote: بالله سؤال للاخ ثابت: متين اخر مره المريخ انتصر علي الهلال دوريا؟؟ اها يمكنك الاستعانه بصديق للاجابه علي السؤال

عمر بوب
إن تحوّل موضوع البوست لأسئلة على هذه الشاكلة
متى فاز الهلال على المريخ في كاس السودان ؟؟
وبدون تستعين بصديق أنا بعينك برااااااي
أوع تكون إجابتك أقل من عشرة سنوات .. سمح ؟؟
ماعاوز أقول ليك كمان ولا حتى هدف لم يسجله الهلال في المريخ في هذه المنافسة


عمر
المريخ ده كلامو براااااااهو
مودتي

سؤال تاني

متي كانت آآآآآآآآآآآخر مرة فاز فيها المريخ ببطولة الدوري الممتاز؟؟؟؟؟

الجايزة علبة بوهية لبنية

عمر

Quote: متي كانت آآآآآآآآآآآخر مرة فاز فيها المريخ ببطولة الدوري الممتاز؟؟؟؟؟

عمر التوم
تحية حمراااااااااء
أنا لا أعرف لماذا الإنصرافية
موضوع البوست كلام ودالياس .. بقدرة قادر تحول إلى أسئلة
بس برضو أسئلتنا محرجة ليكم
شوف زي ده ؟؟

هل فاز الهلال بالدوري الممتاز بدون هزيمة ولا تعادل ؟؟ كما فعل المريخ
هل فاز الهلال بالدوري بدون هزيمة وتعادل واحد مع التحرير ؟؟ كما فعل المريخ
هل فاز الهلال على المريخ ثمان مرات متتالية ؟؟ كما فعل المريخ ؟؟

والطامة الكبرى
هل فاز الهلال أو أي فريق سوداني ببطولة خارجية ؟؟
ودي بالذات إنتو عارفين الإجابة عليها .. دي عقدتكم
ناااااس سبعين سنة بدون بطولة ؟؟
ياااخ إختشو .. المشجعين ليها شنو ؟؟

والمودة حمراااااااء ملتهبة

Quote: هل فاز الهلال بالدوري الممتاز بدون هزيمة ولا تعادل ؟؟ كما فعل المريخ هل فاز الهلال بالدوري بدون هزيمة وتعادل واحد مع التحرير ؟؟ كما فعل المريخ هل فاز الهلال على المريخ ثمان مرات متتالية ؟؟ كما فعل المريخ ؟؟ والطامة الكبرى هل فاز الهلال أو أي فريق سوداني ببطولة خارجية ؟؟ ودي بالذات إنتو عارفين الإجابة عليها .. دي عقدتكم ناااااس سبعين سنة بدون بطولة ؟؟ ياااخ إختشو .. المشجعين ليها شنو ؟؟ والمودة حمراااااااء ملتهبة

أنا اعترض وبشدة...دي اسئلة تعجيزية أديــــــــــــــل كده اخير منها زي دا

Quote: هل فاز الهلال بالدوري الممتاز بدون هزيمة ولا تعادل ؟؟ كما فعل المريخ

بالله ؟؟!!!
دى المريخ فعلها متين ؟؟!!
اوعك تقولى الدورى المحلى بتاع الخرطوم .. وتحاول تقارنو لينا مع الممتاز .!!
سبحان الله !!
طرينا الحديد الابرة نطت !!
اقوليك حاجة ؟!!
اخرســوا ايها الوصفـاء

سلامات يا ثابت

لا والله اسئلتنا ما انصرافيه
ود الياس كلامو انو في الدوري مافي زول بغلب الهلال والمريخ
لضعف الفرق المنافسه
والا واحد من الفريقين يغلب التاني ويفوز بالبطوله
انت قلت الحل انو المريخ حيغلب الهلال ويشيل الدوري
عشان كده انا سالت سؤالي واظن السؤال ليه علاقه قويه بكلام ود الياس واجابتك او اكون انا فاهم غلط
لانو المنطق يقول اذا واحد من الفريقين ديل طوالي بغلب التاني دوريابتبقي اجابتك لكلام ود الياس لا مكان لها من الاعراب

أغنانى محمد البيلى عن الرد
وللأسف الأخ/سامى ، مشى الموضوع زى الما حصلت حاجه .. يا عالم انجالاز المريخ كان فى الدورى المحلى لمديرية الخرطوم لا الدورى الممتاز المسجل باسم الهلال مرتين دون هزيمه!!!
الدورى الممتاز فيهو ركوب طيارات وهروب علاء الدين طياره وسفر باللوارى والبصات وموت مثلما حدث للمرحوم صديق العمده تغمده اله بواسع رحمته، وفيهو غلب شديد وشديد خالص من فريق زى هلال بورتسودان ب 9 لاعبين !!
قلنا أن تريعة البجا فى جبل اولياء او وطن أم الطيور فى الدامر لو فاز ببطولة الدورى المحلى بدون هزيمه بكون زى المريخ تماما، فالمقياس هو الدورى العام!!

ناتى بعد ذلك الى قصة كاس السودان وقلنا فى أكثر من مرة مثل تلك البطولة عادة تفوز بها الأنديه المغموره والضعيفه وحدث ان فاز بها فى مرة من المرات فريق درجة ثالثه فى انجلترا وفاز بها عجمان الأمراتى وهو فى الدرجة الثانيه وسطيف الجزائرى والمقاولين العرب والمريخ السودانى!!
لأنها بطولة تقام على طريقة "النوك أوت" والفرق الضعيفة ليس لديها ما تخسره فى كثير من الأوقات تتخندق وتطلع درون وتفوز بضربات الجزاء وهكذا حتى تحصل على الكاس لهذا فهى بطوله وصيفه والفريق الذى يفوز بها يشارك فى البطوله الوصيفه كذلك!!
للعلم الهلال العام قبل الماضى فاز بها وببطولة الدورى العام يعنى شارك بكرم من الزعيم!!
أحسن نرجع لى موضوع ود الياس ولا كيف ؟؟