جواب

للشارع

لست العرقي و إمام الجامع

أسمنت و خيش

أفندي مسبسب و بتاع ورنيش

أطرش
سامع
عاقل
رافع
ثابت
واقع
صادي
و طالع

للفلس ..الشمس .. السلس

للناس
للناس و خلاص

أما بعد..
...


البارح و روحي تقيلة و أعرج حالي
زي عادة النسيم
فتح الجروح في بالي.
مر علي لطيف.
و جاب طيف بعيدا غالي.
و مكان الفرح في قلبي خلفوا خالي.
...

...
حدايق القلب أصبح موت ورودها وشيك
حشايا من الوجع ماأظن يفكو فكيك.
و نيل أفكاري فكرو من العليهو ركيك.
و ليه يا خوف
محل قبلت ألقى وشيك

....
أعضاي تالفة
بينات الضلوع تقابة
و الأفكار طيور و الروح مشربكة غابة
الذكرى اللئيمة تصيدني بي نشابا
و سمح الذكريات..
العرفة في تتغابى!

...
مرات يختلط الحق علي
و مجاز
و الوجع الحرام
في مرة مرة يجاز
يقعد جمرو جواي
و شوقي يلهبو جاز
...
بين نعسان و نايم
شفت صورة زهرة
و فجأة من العرش طلعت قصادي القمرة.
و زي درويش غرق بين الطبول و الحضرة.
رفعت الكاس
نظرتو بحب
جرعت الخمرة.