أخي بكري .. خالتك حنانة حيموره تقف منتظرة أنضمامها لعضوية المنبر ...

الاخ الفاضل بكري ابو بكر

الف تحية وانت تقود دفة هذا المنبر ..

فالوالده حنانة حيمورة متشوقة لاثراء هذا المنبر بأدبها المميز ..

فهي مربية فاضلة والكلام عن ذلك يطول ولكن ما قد يفيد في وجودها هو استنطاق ادبها المميز من الشعر وادب القصة القصيرة وبلاغة الوصف ..

فعلا نتوقع وجودها بيننا مكسب للمنبر فهلا أستجبت أخي بكري


ولك مودتي

أمي ... شاعرة


وتركنا المتبقى من مخزون الجمال حتى نرى عضويتها في النبر


شكرا لكل الذين ثنوا ...

يسلم الجميل الاستاذ القرضابي

Quote: بس خالتو ما بناباها يعني مهند أحسن منها؟؟

نثني و بشـدة ..

أثني الخالة حنانة الشاعرة الكبيرة والآم العطوفة

شاعرالجمال الراقي

هاشم خلف الله

عارفك يا هاشم بتحب الشعر جدا وهذا ما فقدته في علاء الدين ..

تخريمة

بس الحاجة حا تكون منافس قوي جدا ليك ولتماضر الخنساء

استعدوا من الان وأعملو حسابكم وذاكرو كويس ..

مودتي .

أخوي الصحافة 30

تسلم يا وجيه

مؤكد دعمك للوالدة زاد من سرورنا ..

الف شكر ليك

الاستاذة والشاعرة والاديبة / تماضر الخنساء


مرحبا بيك في حوش حيموره وحال لساننا يلهج بشكرك والثناء عليك وانتي تزكي الوالده حنانة حيموره لعضوية المنبر ..

Quote: الشعر ده فيهو روح البطانة أثني

الاستاذ الموسيقار / يوسف الموصلي


انحناءة لك وأنت من ساهمت في أثراء أمسيات الحيموراب بجميل ما عندك ..


أتذكر أمسية جمعية شباب حيموره وانت بجانب البروفسر جعفر ميرغني وموضع المنتدى

( كلمات حقيبة الفن وتعدد الالحان ) ..

لن تبعد من الذاكرة فكانت هي الندوة المنعشة من الحديث في السياسة والاجتماع ..

فقد كان الاسبوع الثقافي لاسرة حيموره وتحت شعار نحو غد أفضل ..

ثلاثة ندوات :
الشباب ودوره في التغيير الاجتماعي
الصحافة ودورها في التغيير الاجتماعي
المرأة ودورها في التغيير الاجتماعي

لقد كانت مساهمة الجيل السابق من أباء وأمهات في تلك الندوة لها ابلغ الاثر في تنوير جيلنا بفلسفة شعراء الحقيبة ومناولتك لمدارس الالحان المتعددة منذ نشأة الحقيبة ومرورا بجيل عبد الحميد يوسف والكاشف وعثمان حسين وأنتهاءا بجيل تاور والسقيد وعادل الصديق ..


من هنا نحن نريد ان نوصل أننا حافظين لك كل الجميل ومقدرين لك الاسهام في رفع الوعي وما قدمته للوطن ..

شكرا أخي يوسف الموصلي ..

الاخ الشفيف الظريف جدا / أحمد موسى

Quote: صدقاً آل حيمورة كما قال الموصلي يستحقون كل التقديروالإحترام

ما كنت أود ان ادخل في بوست الصحفي والناقد الرياض والمفكر السياسي والخبير الاقتصادي
والمصلح الديني
وذلك احتراما لرغبة الانسان المهذب الاخ القرضابي الذى أحترمت فيه الكثير والتزم له بما وعدت ..

الا ان أحد الاخوة قد نبهني لحديثك المقدر والذى نتمنى ان نكون عند حسن ظن الجميع ..

فلا ادري كيف اشكرك اخي وما لي الا ان اقول لك سلمك الله من كل بلاء ..

سوف تكون هديتي لك هي اول قصيدة بعد وجود الحاجة حنانة حيموره بيننا

لك كل الود اخي ..

ودمت

الزعيم حيدر قاسم

بعد كلامك ده ياتو كلمات ممكن نشكرك بيها ..

تسلم يا زعيم

Quote: تفرع قامة هذه الأم ... وتطول , ... تغطي الجبال ... فتوردنا من صدر السحاب قطرا ناعما وتعيرنا خيالا دفوق الأنصاب فما أسعدكم ... بأم من قطف الروح الباذخة ... ومن تربها الميمون . تسلمي ... إنعام ... وفيك إمتداد هذا الخصب ... والجمال . ربنا يحفظكم ويغطيكم من كل مكروه , عيني ... باردة مع مودتي

Quote: بلغي سلامي للشاعرة المجيدة أمنا حنانة

تحياتي لك أخي أشرف وسلامك وصل تب ..


ربنا يديك العافية ويزيدك من فضله


مودتي

ياعلاء الدين امك دى عندها لاب توب زى ماما
والا حاتكتب لينا من صاج وكده،،،

الحبيب صديق الموج

Quote: ياعلاء الدين امك دى عندها لاب توب زى ماما والا حاتكتب لينا من صاج وكده،،،

يا زول اللاب توب وصلها من السنة الفاتت ,,

برفقة صديقي ياسر فضل المولى وبينما نتجول في سوق الكمبيوتر بالعليا سالني الاخ ياسر :

أنت جادي أنو الاب توب ده للحاجة ؟

قلت ليه طبعا انت فاكر كلامها هظار ..

ضحك ضحة طويلة وقال لي والله نحن نسوانا همهم في التوب وأنت أمك همها في اللاب توب !!

أحييها والله ..

كدي عليك الله أتخيل الحاجة متحركة في السرير وقدامها اللاب توب وبتجمع افكارها عشن تكتب لينا عن هلمت !!

باقي هي ثقافتها الرياضية ضعيفة عشان كده ما اتوقع ان تكون ناقدة رياضية ...

الاخ الحبيب علاء الدين حيمورة

تحياتي


أؤيـد وبشدة منح العضوية للخالة الكريمة حنانة

لكم التحية


أحمـد الشايقي

مرحبا بالاستاذه حنانه حيموره.

الله يديك العافية استاذة تراجي

وأن شاء الله الاخ بكري يقبل منك وتجيكم حاجة أنتم أمتداد لجيلها ..


أشكرك كثير وأهمس في أذنك بأن لا ترهقي نفسك مع المهاتر الخاوي ..

مودتي

الحبيب / أحمد الشايقي

كيفك أخوي والله مشتاقين باقي عمتك الحاجة حنانة منتظرة الدخول لحوش بكري ود العز والمهلة .. أبو الكرم .. عشاء الضيفان .


شكرا سليل الحيموراب ..

فوق

أثني الخالة حنانة الشاعرة الكبيرة والآم العطوفة

Quote: أثني الخالة حنانة الشاعرة الكبيرة والآم العطوفة

تسلم يا دكتور ...


ربنا يديك العافية ..

مودتي

قبل أن أثني طلب الأح علاء الدين لا بد أن أعرج على المكون الثقافي والإجتماعي لأسرة الحيموراب العريقة هذه الأسرة التي أظن نفسي قريبا جدا منها بحكم علاقة الجوار والمعرفة التي تجمعني ببعضهم 00 هذه الأسرة المترابطة إجتماعيا وذات إهتمام بتنمية قدرات أفرادها العلمية والثقافية يؤكد ذلك إنشائهم لجمعية آل حيمورة الثقافية التي قامت بعقد عدة ندوات اهتمت بتناول مختلف الآداب والفنون والشئون الثقافية 00
ولو تحدثت عن الخالة حنانة والدة الأخت والزميلة إنعام حيمورة ، والجميع يعلم من هي إنعام 00
ووالدة الأخ علاء الدين حيمورة 00 رئيس القطاع الثقافي لرابطة أبناء الصحافة
ووالدة الدكتور عماد حيمورة 000
وصاحبة انتاج شعري مذهل قرأناه هنا 00
إذن يحتاجها بكري قبل أن تحتاجه 00 لتروي تجربتهاالثرة شعرا ونثرا

أؤيد ضمها وبقوة 000

بإنتظار أمنا حنانة حيمورة ..


تحياتي ،
خالد الأرباب

الاخ الكريم الفاضل ود الارباب

تحية من الاعماق وكتر الله خيرك

بكم نكون ..

تسلم

الحبيب عادل جبارة

الله يديك العافية يخلي ليك أولادك


شكرا أخي على هذه الكلمات ومن المؤكد عشمنا في الاخ بكري كبير ..

أها الحاجة قالت عايزة تياب لجلسات بورداب الخرطوم ..

تاني مافي زول بقدر عليها ..

علاء الدين .. سلام

مالك عايز تجيب لينا العين دي لو ما كانت في الاصل صابتنا .. ( البورداب عينهم باردة بهظر بس .

امبارح جاءني يا علاء تلفون بخبر هذا البوست من زول عزيز يضحك جدا .. ولما كلمت الحاجة اختى سالتها قالت ليها انعام بتقول ليك في شنو قالت ليها .. يعني انا منتظرة عضوية سودانيز ان لاين ..

غايتو كان ادوها العضوية .. تاني تزاحمنا في جلسات البورداب يعني طريقة (خلط) تاني مافي ..

عضوية شرف بس عشان الاحتجاجا الحاصل ..

حبيبنا/ علاء

الفكرة رائعة

والاضافة اكيدة سوف تكون جميلة ومفيدة

نرحب مقدما بالوالدة / حنانة حيمورة

وبذلك نكون موعودين بالكثير المثير


أحمد العمار

الأخ - علاء - تحياتي،

نثني عشان نقرأ شعر الحكمة
من الزمن الجميل ..

انت عارف يا علوية انا لقيت بوستيك ده وضحكت لامن وقعت تاااااااااااااح من الكرسي
والله بسحروكم حتى خالاتكم بيعرفن الحاسوب والنت .

يا اخي انا من ولاية كاملة ما فيها عضو هنا غيري .

المهم يا بكري الزول البنقل في اهله هنا ده زى ضكر الحمام اقبل طلبه لانو ضو قبيلة .

الله يجازي محنك يا ود شيقوق ..

Quote: يا اخي انا من ولاية كاملة ما فيها عضو هنا غيري

اها انت اهلك ديل اصلو مافي زول قال ليهم أمشو البندر كان حبيت في الموكيت ولبست التي شيرت ..

وناس ولايتك دين فاضين عشان يتعاملو بالالياف الضوئية تكون كل اجازة بتلمهم وتحكي ليهم وهم فاتحين خشومهم ..

تسلم والف شكر ليك

الصديق الوفي / محمد عبد الجليل

شكرا ليك يا شفيف

وبرضو بنتمنى من الاخ بكري منحها ولو العضوية الشرفية ..

تسلم

الاخ الظريف / أحمد العمار

عاطر التحايا وألف شكر على كلامك

Quote: الفكرة رائعة

مؤكد اننا متوقعين أثراء البوست بجميل الشعر

شكرا أخي أحمد

وفقكم الله لما فيه الخير

اثني
بالله يا بكري ادي الوالده حنانة حيمورة باسوورد
خلي البورد ده يحمر لينا ونحمر ليه
بس ما يسحروكم آل حيمورة
انا غايتو عيني
بااااااارده
مش يا اشراقة؟

عليك الله يا ود العبيد مش محاولة من الخروج من كآبة المنبر وأثراءه بالمفيد ..

شكرا ليك يا خالد

ربنا يديك الصحة والعافية ..


أها بكرة بورداب الخرطوم حا يقولا عندنا منتدى ثقافي والمتحدثة هي حنانة حيمورة ..

طاقة واتفتحت ليهم ..

تسلم أخوي خالد

علوية وحياتك ده احلى بوست يمر على المنبر العام .

يا بكري اوعاك تحرمنا من متعة مشاهدة هذا البوست في الصفحة الاولي .

فالتظل خالتنا حنانة على الابواب يا علوية وما فارقه معاها لانها زى دى بتكون على ابواب مكيفة .

ولو بكري قبل الطلب حتكون نهاية هذا الفلم الجميل .

نناشد بكري بالتاني بذريعة التمسك بالتوزيع العادل للسلطة والثروة .

فعلا ناس بتمشى سنين طويلة وناس حيمورة بدون ما يمشوا بحصلوا محطاتهم المقصودة .

مثنى و ثلاث و ُرباع ... أٌرحب بقدوم الوالـدة حنان حيمورة ... و إن شاء الله نراها قريباً هنا ... و حفظها الله لكــم جميعاً يا علاء ....

نؤيد بشدة منح الأديبة الأريبةالخالة حنانة عضوية المنبر

ياعلاء مشتاقين

بالمناسبة إنت نسيت تعد(مزمل حيمورة)!!!!!!!!!!!!!!
كده عدد الحيموراب بقى كم؟؟؟؟؟؟؟؟؟؟؟

وصية بالمهلة إنت زول متربي وود قبايل ومن أسرة عريقة
ما ترد إلا على البستاهل الرد

مزمل أبو القاسم

وحاتك مشتاقييييييييييييين شوق مطر

يا سلام .. وكيف ما حسبتك ؟

أنت وأحمد الشايقي ود الدويم ما هو حبوبتو برضو بت حيمورة ..

اصلا كنا عايزين نصنفر المنبر عشان الحاجة ونخلي الجهلول يشتت ..

لكن وحاتك بعد كلامك ده تاني الا اصلو في القاهرة لكن ما برد ليه..


الزول ما كان عندو شغلة غير مزمل وأظن وصلو ليه انو صحيفة الصدى انهارت .. قام عايز يمس الحيموراب ..


لكن وحاتك وعشان خاطرك يا غالي حتى المداخلات بمسحها..

بس يقرأ الاخيرة دي ..

صحي يا علاء؟؟؟؟؟

الصدى انهارت؟؟؟

متين؟؟؟؟

ما كلمونا!!!!!!!!!!!

هذا ما وصل الى الناقد والصحفي والمفكر الرياضي ..


بكون أحد أعداد الصحيفة وقع من راس الدولاب ..


أعتقد أنه الانهيار بعيته ..

وعشانك والله بمسح في كل المداخلات ..

أخوي الطيب شيقوق

تعرف لما تنادينا الحاجة ويكون عندها موضوع مهم وتبدأ في الطرح وطبعا طريقة الطرح بتكون ظريفة جدا وما بتنس المقدمة وغالبا ما تبداها ببيت شعر ..


نستمر في الآراء وفجأة يدخل موضوع عرضي ويأخذ مننا زمن تحس الحاجة بأن أفكارها ممكن تتشتت تقاطع بنقطة نظام وتقول كدي يا أولادي نرجع لموضوعنا الاساسي ...


دحين مزمل حيمورة ده مشتاق ليه شديد وخرمنا من موضوعنا الاساسي ..


فكدي نرجع لموضوعنا الاساسي وأنت عايز تطول لينا القصة والحاجة قالت عايزة شخصيتها الاعتبارية في المنبر والا كانت شحدت ليها باسسوورد من اولادها ودخلت بيه فدحين هي حضرت شعورها لتكون اصيلة في بورداب الخرطوم وجهزت البنات للذغاريد يوم كرامة قبول العضوية ...

أها أخونا بكري ده والاخوة المشرفين كلام الحاجة ما عجبهم ولا شنو ؟؟؟

أكيد بكونو بفتشو ليها في باسوررد ساهل الحفظ ورقم مميز ..

Quote: تعرف لما تنادينا الحاجة ويكون عندها موضوع مهم وتبدأ في الطرح وطبعا طريقة الطرح بتكون ظريفة جدا وما بتنس المقدمة وغالبا ما تبداها ببيت شعر ..

اها انا حالف اعمل بوست بعنوان ( صراع الحضارات بين ام علاء الدين حيمورة البندرية وام ود شيقوق البدوية)

صدقني يا شيقوق ملك الحاجة المعطيات وبتتقاسم معاك الطرح ..

أتمنى أن تتاح لك جلسة في حوش حيمورة ويكون الطرح جادي جدا وتشوف مداخلات الحاجة ..



تخريمة :

تعرف لما تكون مع جارتها الشايقية وعجبها موضوع في الونسة تجي البيت وتحكي لينا وكأنها جاية من بلد الشايقية الان وبالمثل للدنقلاوية وكل الاجناس ..

فعندها زخيرة من طريقة كلام كل القبائل السودانية وبتتعامل مع كل زول بفهموا ..

الله يديها العافية ونشوفها هنا في المنبر

يا علاء كدي ما تخمنا ساي ..
انت جهزت اللاب توب للخالة ولا لسه ؟..


وأبشرك لا زلت مصر على البوست ( سودانيز أون لاين حيمورة )..
ترقبوا قريباً ..

الحبيب معتصم دفع الله

يا زول الحاجة الايام دي بتنزل في برامج في اللاب توب ..

يديك العافية ولم نكن بدونكم ..


هبوية بتسلم عليك

نرحب مقدما بالوالدة / حنانة حيمورة

ومنتظرين الروائع والجواهر .......


وكيه في المابيهم .....

قال حيموراب وتراجيين قال ...


تسلم يا علاء ويسلم كل آل حيمورة ...

وآآآآآي عينا باردة يا إنعام ....

اهلا بيك يا دكتور

المكسب في هذا البوست هو لمتنا الجميلة دي

حتى الاستاذ الطيب شيقوق قال ما يدوها حسي عشان ما يقيف البوست ده وينتهي الفلم ..

شكرا ليك يا دكتنور

وتسلم

مرحب بماما حنانة حيموره
والدة لكل البورداب ما عدا صديق الموج

انا غايتو ما بعرف حنانه حيموره
لكن من مشاركات اولادها هنا

اؤيد وبشده انها تستلم الباسووورد اليوم قبل بكره

Quote: صحي يا علاء؟؟؟؟؟ الصدى انهارت؟؟؟ متين؟؟؟؟ ما كلمونا!!!!!!!!!!!

انتوا مزمل ابو القاسم دا جن والا شنو ؟؟
احنا فرشنا هنا على الصدى واخدنا فيها الفاتحه ورفعنا الفراش قبل شهور
وانتا يا دوب سمعت الخبر

حاجه غريبه ياخ

المهم

مرحب بيك يا مزمل
وعليك الله مره مره تعال تاوق بى هنا وشتت
اصلا عارفين المشغوليات .. لكن كمان جاملنا شويه

وانشاء الله كمان تتزكرنى رغم السنين الطويله
والا ابو القاسم واخوانه لطشوا الفيوزات خلاص

Quote: تعرف لما تكون مع جارتها الشايقية وعجبها موضوع في الونسة تجي البيت وتحكي لينا وكأنها جاية من بلد الشايقية الان وبالمثل للدنقلاوية وكل الاجناس .. فعندها زخيرة من طريقة كلام كل القبائل السودانية وبتتعامل مع كل زول بفهموا ..

اقسم بالله يا علاء امشى الاجازة اصلها ليك في البيت .

خالتي حنانة دى يا علوية تشبه لى حاجة جارة بس الاخيرة دى كبيرة جدا في العمر يعنى زى 70 سنة وكانت معانا في السوكى وبتجينا في البيت شايله كتاب انجليزى تخيل وقتها عمرها 60 سنة ووالده ما شاء الله 17 من بت لولد وكلهم جامعيين .
انا فارقتها قبل 15 سنة .

يا زول قبل اسبوعين اشوف ليك قناة الجزيرة جايبة الحاجة جارة المعجزة التى دخلت كلية الهندسة جامعة الخرطوم .

سبحان الله

Quote: أكيد بكونو بفتشو ليها في باسوررد ساهل الحفظ ورقم مميز ..

انت يا علوية زول في اثناء النقاش بيطالب بالعودة للموضوع الاساسي ده خايف ينسى باسويردو ؟

انا مش خايف دى انا خايف يدوها الباسويرد وانت عارف الخالة مجاملة في الافراح والاتراح تقوم تدمن النت زينا كده تقلل الزيارات وحتى اهتمامهاالزمان بالضيوف يروح خالص تبقى زينا كده اى ضيف من غير البورداب تديهو عرض اكتافها .

سلامات

انا علي لاب توب كمان

شكرا ليك يا سودانية على المرور

يديك العافية

لو غلبتك حاجة في الجهاز ارجعي للحاجة


مودتي

سلام علاء
انت عارف الايام دي مكراهني اجي راجع من الشغل القاها فاتحه جهازي وقاعده بتبظ في الجهاز وانا اقول يالله الحاجه دي مالا
اتاريها بتستعد للدخول
غايتو بكره بعد بكره كده تعمل ليها ندوه مع بورداب الخرطوم
تسلم هي انشاء الله وربنا يخليها لينا وليكم
مهند حيموره

مرحبا حنانه

Quote: انت عارف الايام دي مكراهني اجي راجع من الشغل القاها فاتحه جهازي وقاعده بتبظ في الجهاز وانا اقول يالله الحاجه دي مالا اتاريها بتستعد للدخول

يا مهند يا ود خليك منضبط الخالة دى صارت ملكة المنبر كلو وحتشوف براك خليها تفتح ليها بوست لو ما تجاوز سقف العشرة الف في يوم واحد مش زيكم بوستاتكم الا ترقعوها بفوق فوق فوق . بوست الخالة حيكون مدور زى ابولو عدييييييل .

فوق عشان ود شيقوق

Quote: فوق عشان ود شيقوق

تسلم علوية السكر

Quote: يا اخي انا من ولاية كاملة ما فيها عضو هنا غيري .

والله يا الطيب بالغت زي مبالغة علاء في قصة التوب واللاب توب. إنتو الكلام ده بتجيبوه من وين؟
شوف يا علاء ، بكري عندو خيارين يا يوافق يا يوافق وعضوية الأستاذه حنانه هنا سيبقى شعار المرحله ، ولو بكري إتأخر أنا متبرع بالباسوورد للأستاذه على الأقل تفيد الناس.
يا شيقوق الموقع ده نسميهو حيموره أونلاين ، أها شن قولك.
قلت لي ولايه كامله؟

Quote: شوف يا علاء ، بكري عندو خيارين يا يوافق يا يوافق وعضوية الأستاذه حنانه هنا سيبقى شعار المرحله ، ولو بكري إتأخر أنا متبرع بالباسوورد للأستاذه على الأقل تفيد الناس. يا شيقوق الموقع ده نسميهو حيموره أونلاين ، أها شن قولك. قلت لي ولايه كامله؟

أها يا علوية شوف معزة الخالة حنانة جابت ليك هوامير عديل كده . وحياتك راجع المنبر ده كلو شوف المرتضى بيتداخل كتير ؟
اها وكمان تحدى بكري عديل كده قال ليهو لو ما اديت خالتو باسويرد انا بتنازل عن حقي ليها . اها يا المرتضى انا معاك برضى بسلمها الباسويرد بتاعي بس مؤقت لانو المنبر ده لو انا ما شميتو كل صباحية وعصرية ومغربية وليلية بتجيني ام هلة هلة .

Quote: يا شيقوق الموقع ده نسميهو حيموره أونلاين

لا يا المرتضى نسميهو كيف انتو غافلين ساى المنبر حصل ليهو Take over من قبل الحموراب . اها قول لهشام هباني خم وصر مش كوزرائيل واسرائيل كمان حمورائيل .

Quote: قلت لي ولايه كامله؟

وكمان ولاية النيل الازرق المجاورة لولايتنا من الجنوب وامشى لالالالالالالا فوق اطلع على الكرمك وقيسان وابرى طوالى الحدود المتاخمة الحدود الاثيوبية لحدى جبال كلمنجارو وتعال خاميها من نمولي لحدى توصلها الرنك تخطى جوبا ومناطق البترول يمكن تلقى فيهن عضو قائم بروس .

الحبيب / محمد المرتضى

التحيات النواضر

تعرف الحاجة قالت كلمة وتخيتا .. وحا تهديك اول قصائدها ..

Quote: شوف يا علاء ، بكري عندو خيارين يا يوافق يا يوافق وعضوية الأستاذه حنانه هنا سيبقى شعار المرحله ، ولو بكري إتأخر أنا متبرع بالباسوورد للأستاذه على الأقل تفيد الناس.

طبعا لما جارتها سمعت بطلب العضوية ده جاتا جارية عشان تشوف الحاجة دي عايزة شنو ..

وبعد التحية الصباحية وبكون الناس طلعو الى العمل ببقى الجو هاديء للجارات في الونسة ..

جارت حنانة الظريفة تغلب عليها اللهجة المصرية وعاشت اكثرمن ثلاثين سنة بجوارنا ولم تندفق بينا موية ( الله يديها العافية أم سامي ) ..

بادرت بالهجوم : أنتي يا حنانة ايه البوبار وكلام الاولاد الصغار ؟؟
طبعا الحاجة طوالي عرفت المقصد وردت أنتو بس خليكم في الونسة الما بتقدمكم دي نحن الان في زمن العولمة وعهد التعامل بالالياف الضوئية ..
وعقبت ام سامي : انتي بس ياحاجة ما عندك موضوع واخير ليك تشوفي تربية أحفادك وتخلينا من كلام واقفة لبكري في بابو ومنتظرة انتي حسي كرعينك شايلنك ولا عيونك بشوفو عشان تقدري تكتبي ؟؟
وردت الحاجة بهدؤ : انتي اصلا ما بتعرفي التعبير المجاز بكري ولدي في امريكا وعشان انتي اصلا ما بتسعي للحضارة وانا طالبة ولو العضوية الشرفية ويكون عندي باسوورد زي ما ادو علاء وعماد واشراقة وانعام ومهند .. وأكون بشخصيتي الاعتبارية ..
وردت أم سامي : مدام الباسوردات دي مجدعة في بيتك زي الهم في القلب ما يدوك اولادك واحد منهم ...
وردت الحاجة : يا أختي قالوا فيه ماسنجر ورسائل خاصة وانتي عارفاني ما بطلع على خصوصيات اولادي ..ولما اكون عضوة بجي بوريك الموقع والقضايا البناقشها ولحدي الوقت داك أمشي وختي حلتك في النار ...

انتهى الحوار وسط دهشة جارتهم الشايقية والغير مشاركة في الحوار لامن ولدها عبد الحفيظ يجي يوقع ليها الكلام برااااحة ...

عشان كدي يا اخوي ود المرتضى الحاجة متطلعة لاثبات شخصيتها الاعتبارية وسط هذا المجتمع الاسفيري ( والله الكلمة دي كمان كان لقتا الحاجة تطلع بيها الجو ) ..

الف شكر ليك وكتر خيرك وكلامك ده بالدنيا ..

مودتي

علوية

Quote: يا أختي قالوا فيه ماسنجر ورسائل خاصة وانتي عارفاني ما بطلع على خصوصيات اولادي ..ولما اكون عضوة بجي بوريك الموقع والقضايا البناقشها ولحدي الوقت داك أمشي وختي حلتك في النار ...

اها هسع دى تاني محتاجة لمعاينة من بكري ؟؟؟؟؟؟

انا مش قلت ليك الفلم ده اكان انتهى انا تاني ما بدخل المنبر العام .

والله انت يا علوية حلو وظريف بشكل ما عادي الواحد يتمنى يرجع اجازة ويلقاكم متلمين بسلامتكم يسمع ويضحك وكمان اخوك خطير في ادارة الحوار مع الحاجة بمشى بيها على القبائل والبيوت الكبيرة في السودان .

وينك يا المرتضى تاني الواحد مجرد دخل المنبر يراجع قائمة (الحاضرون ) لو وجد الخالة حنانة بيمشى على بوستات ناس ابو جهينة والرطاني يقلبها زى البقلب ليهو في ملفات دعوى اكل اتعابها كلها ، ولو ما موجودة ينسرق طوالى على الحب في المنبر العام يفرغ شحناته العاطفية وينسحب سريع .

الخالة اكان عرفت بوستيها مشى الصفحة التانية بتورينا الويل احسن يكون فووووووووووق

يا علاء سوسن تسلم عليك وقالت لازم يقروا ليها بوست خالتها كلو . وفعلا متابعة شدييييييييد

تعرف يا ود شيقوق اخوي الحاجة لو لقت بوساتا بتغطس بتحر المنبر وتكون عايزة ليها موقع براها ..


تحياتي العميقة للاخت سوسن والاخ بيضاب وأبناءها ..


تسلم يا ود شيقوق

Quote: تعرف يا ود شيقوق اخوي الحاجة لو لقت بوساتا بتغطس بتحر المنبر وتكون عايزة ليها موقع براها ..

انا ما عارف لكن بوست الخالة ده حماني النوم كل مرة امشى اراجعه عشان اشوف كتبوا شنو اجماعة

مرات بجيني احساس يكون ادوها الباسويرد وتمسك ليك الناس الحيّوها كلهم ترد عليهم واحد واحد

لكن يا علاء اتاري كلامك كلو عنها صاح حكت لينا سوسن انا كنت قايلك بتزود ساى

Quote: لكن يا علاء اتاري كلامك كلو عنها صاح حكت لينا سوسن انا كنت قايلك بتزود ساى

اها يا اخوي الطيب سوسن دي بتديك كل النوادر والطرائف وبتقول ليك الما قادر اقولو في البوست ...

تسلموا

الخالة فووووووووووووووق

الله يعلي مقامك ياود شيقوق ..


مزمل ابو القاسم في شوق للقياك ..

راجع بوست الترحيب بمزمل ..

مودتي

تعرف يا ود شيقوق .. الحاجة دائما بتحاول تطبق النظريات على ارض الواقع مهما كان اثر النظرية ..


مرة جائيين بحافلة كلها حيموراب وبتاع الحافلة بنزل كل ناس جنب بيتهم والمسألة طولت والحاجة عايزة اختصار المسافات .. اها سواق الحافة معروف لدى العائلة وزول متعلم ..
فلما جينا في فسحة كبيرة .. الحاجة قالت ليه ياولدي عليك الله اقطع الفسحة دي وتر .. انت ما عارف انو الوتر اقصر من مجموع الضلعين في المثلث ,,بس بتساوو في المربع ..

انفجرو الحيموراب بالضحك وضحك السائق وقال ليها والله عافي منك يا والدة ..


اها ياود شيقوق رايك شنو ؟؟

Quote: انفجرو الحيموراب بالضحك وضحك السائق وقال ليها والله عافي منك يا والدة ..

انت عارف يا علوية انا تجاربي في الحياة اكبر منكم واقولها بكل ثقة ان هذه الحاجة صانعة رجال واجيال . لو قدر لهذه الحاجة ان اكملت تعليمها اكان يكون عندها راي تحكم العالم او على الاقل استحدثت نظريات .

والله قليلون يدركون ان المستقيم هو اقرب خط بين نقطتين . هسع دى اكان امي اكان تقول للسواق اقطع المسافة دى قاطوع او اختى (ابعد من ) الليّة وامشى بووووووووشك.

بعدين نوع سواقكم ده يكون في الاقاليم الطرفية رئيس لجنة شعبية او عضو برلماني .

علوية وحياتك تبلغ الحاجة قول ليها الناس كلهم جوا هنا مناجين بكري لعضويتها الا اشراقة حيمورة .

يعني يا اشراقة الكلام ده مو مالى عينك ولا شنو؟

اشراقة خايفة من العين يا ود شيقوق ..


بنستعد لتوثيق شعر الخال عثمان حيمورة والد اشراقة ..

ده كمان كلامو تاني ..

بس انت خليك متابع .

مودتي

Quote: اشراقة خايفة من العين يا ود شيقوق ..

والله فعلا ليها حق ام سلمى بتحسب كويس .

الحبيب ود شيقوق

تحياتي ووينك يا زول ..

تعرف كنت برتب في الغرفة وعندي مجسم لحصان ذكرني حصان المولد والذى نجنت عليه الوالدة لتكرم ضيفا في هجعة ليل ,, فالقصة لاتخلو من الطرافة ..

زارنا ضيفا وانا في الصغر وهو زوج لاحدي بنات عمتي ..

دخلت الوالدة المطبخ وعندما حس بان الولدة ذاهبة لتقديم وجبة العشاء حلف انو هو متعشي وشبعااااااااااان وحتى لو وضعوا له طعاما لايستطيع ان يأكل ..

فضلت الوالدة انها تعمل ليه عصير لكن قدر ما فتشت في المطبخ لاي شيء ممكن يتعمل عصير ما لقت .. والوقت كان متأخرا فما كان منها الا كسرت حصان المولد واضافت له ماءا باردا وبدت تخلط فيه حتى اصبح عصيرا قدم للضيف ولم اتهنأ انا بهذا المجسم لحصان المولد ..


بس الزمن كان جميل ..

الاستاذة تماضر الخنساء

أهلا بيك في حوش حيموره ونورتي والله وفعلا أفتقدت مثل هذه الجلسات ..

تاني لازم يكون في تنسيق عشان ما تحرمينا من الكلام الجميل ده ..

ده كلام انعام لي يا اخوي الطيب شيقوق

Quote: تعرف يا علاء الدين اخوي .. امبارح عملنا جلسة شعرية مغلقة .. وانا ما بين حنانة وتماضر تعتريني الدهشة .. وكانت مطارحة عديل .. حنانة تقول ليها القصيدة وتغنيها ليها وتماضر تزغرد وبعد شوية تماضر تلقي لينا من الاعماق واحدة تلو الاخرى .. وغايتو تماضر دي (ادروب ولوف )مشينا نخت الغداء جينا لقيناها ناااايمة .. وحقيقة اتذكرناك وحنانة قعدت تحكي ليها الحكاوي اياها وهي فاتحة خشمها .. كان يوم ظريف فقدناك

جلسة بفتكر انها فاقدة الاستاذة سمية ..

مودتي

الطيب شيقوق وكل المتداخلين ..

الوالدة حنانة .. تغريكم السلام وبقول ليكم شكرا كتير على التثنية

ولكم منها كل الود

والله يا اخوانا اخوي الطيب شيقوق ده ما براه

يكون سخن بيه البوست ده وبعمل في أجراءات السفر للخرطوم ؟؟؟

أظهر وبان وعليك الامان ..

الحاجة بتسلم على الجميع والانتظار طال ..

ده كلو منك يا شيقوق ..


مودتي

قولوا للخالة حنانة ولدك شيقوق ابعد الايام دى لانو حزين جدا لمماطلة بكري في قبول عضويتها.
وقد قررت الاتي :

في غضون اسبوع من اليوم الثالث من اغسطس 2007 م ان لم تقبل عضوية الخالة حنانة فسوف اعمل بوست مودعا الاخوة الزملاء في المنبر العام للابد .

اللهم هل بلغت فاشهد

حبيبنا ود شيقوق كدي روق

انا عارف الاستاذ بكري ما ببخل للحاجة لكن لانو عايز يشوف ليها باسوورد خفيف وساهل ..


والمسألة كان طالت بنخلي الحاجة تقطع فيه قصيدة امكن قلبو يحن شوية


تسلموا

Quote: حبيبنا ود شيقوق كدي روق

علوية انا عملت بوست وداع للاخوة في المنبر العام ان لم تقبل عضوية الخالة بعد اسبوع .

الزول الكريم / ودشيقوق

Quote: علوية انا عملت بوست وداع للاخوة في المنبر العام ان لم تقبل عضوية الخالة بعد اسبوع

والله نحن الكلام ده ما بنقبلو وياريت لو سحبت البوست طوالي .. وجودك بيننا اهم من وجود الحاجة حنانة بت حيموره ونحن حا نترك الامر لاشراقة وانعام لتوثيق الجميل من شعر الحاجة ..


تسلم يا راقي وكلك ذوق

.

Quote: وجودك بيننا اهم من وجود الحاجة حنانة بت حيموره

الموضوع يا علوية موضوع ثوابت وبس .

كتر خيرك انت

معزتي

أحبتي قراء سودانيز اون لاين

الاخوة المتداخلين

يطيب لي في هذا المقام ان اتقدم اليكم وباسم الوالدة حنانة حيموره بجزيل الشكر ووافر العرفان لوقفتكم النبيلة في نيلها عضوية هذا المنبر ,,

وارجو ان تكون هذه آخر المداخلات علما بان هذا البوست كان واحة استظلينا بها من هجير المهاترات والجنوح الى تجربة الجيل السابق وكل ما تحمله من جماليات كنا نتمنى ان تستمر والا تنقطع ..

سوف نعدكم بان نوثق للوالدة كل اعمالها الادبية في مجال الشعر وادب الوصف ..

شكرا أخي بكري

شكرا اخي الطيب ود شيقوق

شكرا لكل الذين ساهمو بمداخلاتهم الجميلة في هذا البوست ..


والى ان نلتقي في بوست خاص او امتداد لبوست الاخت انعام حيمورة ( أمي شاعرة )


شكرا لكم جميعا ..