في برنامج في إذاعة امدرمان اسمه ناس واحداث!!

في برنامج في إذاعة امدرمان اسمه ناس واحداث!!

يصادف كتير استمع للبرنامج في راديو العربية وانا راجع البيت من الشغل لعدة اسباب..اولها مخرج البرنامج خفاجة لعب في ((النجمة)) وهو اخ الجقر بتاع الموردة وفوق كدة مخرج مميز وإبن إذاعي قدير.

فكرة البرنامج تناول نمازج من القصص التي تحدث على ارض الواقع في قالب درامي (( تمثيلي)) ومن ثم طرح سؤال تنتهي به القصة ..ليتم بعدها أخذ أجوبة المستمعين واختيار الإجابة النموذجية..وطبعاً((هدية في النهاية)) من هدايا الإذاعة((كرتونه بسكويت :lol: )) راديو بـ خمسة جنيه..وكدا.

المهم بعد التمثيلية تنتهي ويبدأ المذيع في الأسئلة ..يضرب واحد:

الو الو الو هلو!!

ايوا منو معانا إتفضل!!

الإذاعة السودانية؟؟

ايوا منو معاي اسمك لو سمحت!!

برنامج ناس وأحداث!!

ايو اسمك منو لو سمحت؟؟

عبدالله حسن عبيد!

اهلاً يا عبدالله ضارب من وين؟؟

من الفاو مربع عشرة شرق الجامع!!

اهلاً مرحب بيك!!

اها الإجابة شنو؟؟

إجابة شنو؟؟؟!!!!

ألإجابة على سؤال الحلقة!!

وهي الحلقة كانت عن شنو انا والله ما سمعتها

تخيل وبعد دا يقول ليك ممكن أهدي!!

تقول لي شنو!!!


في قد اكتر من كده؟؟؟

اتاريك ياسامى قادر على زرع الفرح.
هذا قليل من كثير اذاعة مانجو مثلا لا تسمع خارج نطاق ولاية الخرطوم تجى واحدة واهو بنفس مواصفات اخونا تقول ممكن اهدى؟ ايوة ممكن تهدى اتفضلى ويلا اختك تقوم ترص اللستة احمد ود العمدة بابوظبى وهنادى رحمة الله فى مدنى وو اولاد عمتى فى كسلا ووالسعودية
نجلاء الماحى

Quote: اتاريك ياسامى قادر على زرع الفرح. هذا قليل من كثير اذاعة مانجو مثلا لا تسمع خارج نطاق ولاية الخرطوم تجى واحدة واهو بنفس مواصفات اخونا تقول ممكن اهدى؟ ايوة ممكن تهدى اتفضلى ويلا اختك تقوم ترص اللستة احمد ود العمدة بابوظبى وهنادى رحمة الله فى مدنى وو اولاد عمتى فى كسلا ووالسعودية نجلاء الماحى

والذ حاجه يا نجلاء إنه لازم يكون في زول في السعودية ولا ابو ظبي((إن شاء الله ود الجيران))

والموضة الايام دي لندن!!

شوية كدا نسمع وللخال العزيز بتل ابيب!!

مابعيد.

موش السودانين ديل بيعملوها