الهضربة البخارية والقناة الاريترية

اصابني التهاب لوزتين حاد يوم الاربعاء مما جعلني طريح الفراش طيلة الايام الماضية ، مع ارتفاع لدرجة الغليان لحرارة الجسم وعندها عرفت لماذا تعرف الحمى في اللغة الاردوية ( لفة باكستان) بالبخار يعني لما الواحد يكون محممو يقول ليك عنده بخار ، والريض يقال عليه مريز ( وهذه عرفتها صدفة وكان لي كم يوم في باكستان وكنت نازل مع صديقي في غرفتهفي فيصل اباد وكان بتاع الكنتين مزانقه وصديقي شيكه لسه ما وصل ، يوم بتاع الكنتين جا وصاحبي ملفلف ومدي وشه الحيطة ، فبدون ما اشعر عشان اخارجه قلت لبتاع الكنتين مريز فاذا بالباكستني يهوزز راسه باسى ويتخارج، بعد ما غادر صاحبي رفع راسه وعاين لي وقال لي والله لغتك اتصلحت)
المهم وانا اعاني البخار ما عندي قدامي الا التلفزيون ( رحم الله حبوبتي ماكانت بتعرف تنطق كلمة التلفزيون والى ان توفاها الله كانت تقول سفنجون) اها في السفنجون ده وانا اتنقل بين القنوات اشاهد اعلان لجمعية محاربة التدخين وعلى الرغم من اني غير مدخن لكني رايت فيما يرى المحموم انني اقف اما شخص نجدي الملامح ملتح ومشخص
وقلت له باستحياء

- طال عمرك انا مدمن
- بنغالي انت
- لا طال عمرك سوداني وفي السوداني جلابي وفي ناس معانا في الاون لو عرفوني ما حيخلوا لي صفحة ارقد عليها
- وش بتقول ؟!!
- بقول ليك انا جعلي وعندنا طقاقة بتغني لينا وبتقول الجعلي المأصل ورغم كدة لا الجامعة العربية لا الاتحاد الافريقي معترف بينا
- وش فيك يا سداني وش هادي الخرابيط ؟، علمنى وش السالفة ؟
- السالفة يا طويل العمر زي ما قلت ليك انا مدمن
- حشيش؟
- لا
- هيروين؟
- لا
- والله ادري انكم تحبون السكر
-ولا هادي طال عمرك، انا مدمن القنوات الاثيوبية والاريترية والموريتانية
- واللبنانية؟
لا طال عمرك ما لي فيها
- خبل انت لا تطالع اللبنانية وتشوف لي هدول الحبوش والافارقة ؟
مو بصاحي ؟
- انا صاحي لكن وحات النعمة بت وراق يا طويل العمر لو شفت واحدة من المورتانيات الريانات ديل تاني ما تقبل على اللبنانية البتة ( حلوة البتة دي من لغة جدودي الفطاحل)
استعدل النجدي عقاله واصلح من وضع التشخيصة ودنا نحوي
- وش اللي بيعجبك فيهم
- تعرف عندنا فنان مرة بوصف في واحدة قال اسمر الجبهة كلخمرة في النور المذاب) اها شفت الخمرة في النور المذاب دي هي ذاتها الجننت عبد القادر
- مين عبدا ىالقادر ده
- خليك منه بحكي ليك قصته بعدين
- تكفى يا زول وكم تردد هادول القنوات
في هذه اللحظة يوقظني صوت ام صبا
- محمد عليك الله هسة الحبش ديل فاهم ليهم شنو ما تجيب لينا السودانية
- الكلوروكين ........ لا عليك الله اعفيني منها ان كان ولا بد هاك الريموت وجيبي هارموني وركزي على المذيعة اللابسة توب احمر وبتعمل بي يدها قريب من العين وقريب من القلب ، وقرطي لي على حجر الزلط
وقبل ان تصيح فيني في هيجة مضرية انقذت صبا الموقف وطلبت اسبيس تون

ومازال بي بعض من بخار لكن اصريت ان تشاركوني الهضربة

د. محمد حسن


بالجد مباااااااااااااااالغه والله اضحكتنى حتى ازعجت الجيران انت متاكد انو كان عندك حمى ولا كنت مركب ليك مكنه تانية ابداع ابداع ابداع..



كدى لو فى باقى واصل ماقبل حضور صبا انا عندى احساس فى حاجات تم حذفها؟؟؟؟؟؟؟؟؟؟؟؟؟؟؟؟؟؟؟؟؟؟



مودتى..

الاخ ضحية

اسعد الله صباحك كما اسعدتني يهذه المداخلة

قلت لي عايز تعرف ام صبا قبل اسبيس تون قالت شنو

جيب اضانك

وشوشوشوشوشوشوشوشووش

وخلي سر

************

بالله زول قال لي كفار وسلامتك مافي
هسة لو كنت جكس
كان الورود تطاقش

ما مشكلة بكرة بتعيو وبجيكم باللالوب

يادكتور الناس هنا الوان واشكال وجماعات وشلليات بعدين انت اول ماتكون من الجنس اللطيف حتى اذاكتبت فى موضوع بدون مضوع تلقى (الكلكات) ملوين والردود عشره الف وشى نفاق وشى شكر وشى تملق وشى حب وشى انكشاح وشى انبراش ..

لكن طالما انت د.محمد ده بى شنباتك دى صدقنى زوول بيكفر ليك مافى والغريبه انك كاتب بوست مرضك بى نفسك تعال شوف فى ناس هنا بتبقى مريضة البوستات تطاقش فى وقت واحد ولى نفس الشخص؟ عجبى

الاخ الكريم ضحية

الله يبرد عليك زي ما بردت قلبي

وانا كنت مستغرب الول القيافة ابو بدلة ده ممحن مال؟

اتاريك ممحن فوق راي

تسلم يا غالي
مودتي الصادقة

د. محمد حسن
صباحك ابيض

Quote: بالله زول قال لي كفار وسلامتك مافي هسة لو كنت جكس كان الورود تطاقش ما مشكلة بكرة بتعيو وبجيكم باللالوب

والله اريته هضربت السرور وياريت كل واحد يهضرب ذي هضربتك دي كانت الهضربه بقت مهضربة جنس هضربة لكن يادكتورنا هضربت اليومين دي مابقت خنق .
سلامتك والالم بيزول والكفارة ليك يازول .
الجماعة ديل مادايرين لالوب دايرين دوم عديييييييييييييييل كده .
مودتي
هارون دياب

الاخ هارون

كفر الله سيئاتك

الدوم ده لو كنت قريب عادل دياب اسمه عندنا في ودنوباوي ابكر
والموز اسمه عصام

وخليه يوريك الفرق

شكرا ليك يا ذوق

مودتي

ســــلامتك يا غالي من البخار و الظار...

افرز يا شيخ جزاك الله خيرا ليست الاريتريه والحبشيه

كالموريتانيه.....,,؟؟

افرز وبعدها فزز من مرضك ده لسه انت صغير على هذه الاشياء قوم سريع راجينك...


شكرا لك

Quote: [افرز يا شيخ جزاك الله خيرا ليست الاريتريه والحبشيه كالموريتانيه.....,,؟؟

الحبيب الشهاب الفاتح

ايها النجم الثاقب
من نا حية طبية
كان اسمهم الموريضانيات لانهن يصبنك بالحمى وسهر الليل ولكن للكنة بلسان الفرنكاويين اصبحت موريتانيا

وعليهم جدعة توب مع نضارة الشمس

ولمن يجيبوهم سايقين العربات
تقول الاوتومبيل ده عملوهو ليهم براااااهم
ولا اراكم الله باسا في قلبا لديكم

الاخ د. محمد حسن

لك التحية

سلامتك من اللوز والادمان وكل انواع الهذيان . بس برضو بننتظر هضربات جايه .

الاخ ضحية

Quote: يادكتور الناس هنا الوان واشكال وجماعات وشلليات بعدين انت اول ماتكون من الجنس اللطيف حتى اذاكتبت فى موضوع بدون مضوع تلقى (الكلكات) ملوين والردود عشره الف وشى نفاق وشى شكر وشى تملق وشى حب وشى انكشاح وشى انبراش ..

سلمت يداك ولا فض فوك .

شكري ومودتي

دكتور محمد حسن سلامتك والف عزيز سلامتك بالله انتا جعلي والله كنت قايلك شايقي يعني من عندنا, لكن

ما تقول لي الهضربة ما عندك يادوب هسع عرفتا انتا شاعر ليه ( بتحب الموريتانيات والحبشيات )

حمدو في بطنو !!!!