Post: #1
Title: اتفه ((بنيتين)) في حياتي بالتفاصيل!!
Author: سامى عبد الوهاب مكى
Date: 07-19-2007, 07:56 AM
بنيتين في حياتي!!
طبعاً في ناس تخش تتشمشر وتعرف اسأمي البتين ديل!!
قصدي (بلنجتين) يعني هوكين!!
يعني ما جكسويتين!!
طبعاً التوضيح مهم لأنه في ناس شغالة خدمات توصيل سريع وما بعيد ارجع البيت ألقى ( بنيه) تالتة راجياني من خشم الباب!!
الخواف من أم عياله((أنا))
في مرحلة المراهقة وفترة الخيال الخصب ومحاولاتنا الجادة لاكتساب قوة تجعلنا في مصاف الأساطير!!
كنت مولعاً أيضا برياضة خلاف كرة القدم وهي (رفع الأثقال)
كان لي صديق عزيز توفاه الله غرقاً لاحقا وفي نفس العام الذي حدثت لي فيه هذه القصة هو وأربعة آخرين رحمهم الله جميعأ..كان اسمه (حيدر) في نفس عمري تقريباً!
كان صديقي حيدر مشترك في نادي ومواظب في منشط الملاكمة..
وحديثنا كان دائماً حول جدوى رياضة الملاكمة فانحاز أنا (للكرة ورفع الأثقال) ويحاول مستميتاً أن يثنيني عن رأيي..ويثبت لي أن الملاكمة أفضل!!
المهم بعد أن يئس من إقناعي بحجته تكرم غير مشكوراً بدعوتي لممارسة لعبة الملاكمة معه وليوم واحد فقط!!
طبعاً أخوكم فصاحة شديدة((والله أنا اركبهم ليك بلنجات)) أفضي ليك نادي المريخ ودار الرياضة زاتا!!
والله أنا ما معترف بي (كلاي) زاتو يا وهم!!
المهم اليوم المحدد مشينا!
قعدت أتفرج والناس شغالة زي المجانين واحد يضرب في كيس رمل واحد شغال نط حبل وواحد شغال (بُنج) في أخوه يعني الشغلانة شكلها تمثيل في تمثيل!!
خلاص تبسمت وأقنعت روحي انه كلامي صاح 100%.
جاني حيدر اها عليك الله شفت الناس دي كيف؟؟
ناس شنو يازول على الإيمان اتخت تخين ما ياخد معاي دقيقة!!
قال لي خلاص كويس نشوف!!
يا كوتش ياااا كوتش!!
يا زول كوتش شنو مالك!!
لا دقيقة!!
الكوتش بتاعهم جأ...حكاية غريبة الزول وشو زاااتو عبارة عن ((بنيه كبيرة)) معقولة يا حيدر أقول ليك كلام هظار تجيب لي (ود امبعلو) شخصياً!!
يا كوتش الزول دا كرهني وعامل فيها قوي وقال كدا وكدا وكدا...الكوتش طلع ليه صوت زي الحشرجة
((بيضحك)) وقال ليه خلاص البيان بالعمل نادي((كميس))
يازول خميس شنو البتناديه!!
ولي شنو؟؟؟
المهم كميس جا وفعلاً ((كميس)) وكبيس كمان!!
كتلة من العضلات ووش مفجخ بس كوم ((فاجخة))
افو يابو السيم قالو الصقر إن وقع كترت البتابت عيب((الكاتل الله والحي الله))
حيدر صاحبي يعاين بخبث!!
مدوا لي جوز الجزم البيلبسوهم في يدينهم قلت ليهم ما في داعي...
قالو لي لا يا كابتن دي لي سلامة وش الخصم((احييي انا ما قلتو نوبة))
جماعتك خايفين مني اشوه ليهم ((كوم الخافجة دا!!)) ((قال كميس قال)) علي الايمان الليلة لو بقى كديس ما بخليه!!
لا حلبة لا يحزنون ((فسحة كبيرة)) وقالو الحشاش يملأ شبكته!!
ووقف((كميس)) ينطط زي العبلانج قدامي وانا اعاين للوش واقرأ في المعوزتين!!
بس ((الخو)) هوك واحد.. واسكت الشماته ديل!!
يلا ابدو..
عليكم امان الله حسيت بي طوبة ((خدرا)) في وشي والدنيا ضلام!!
بعدها لقيت الناس تهبب!!
يا جماعة انا كويس!!
يازول ماتحرك رقبتك خلينا نشوف الحاصل!!!
وحيدر يقول((لا حول ولا قوة إلا بالله)) انا كنت عارف دا بيحصل!!
وكميس يضحك!!
الله يرحمك يا حيدر!!
دي البنية الاولى!
|
Post: #2
Title: Re: اتفه ((بنيتين)) في حياتي بالتفاصيل!!
Author: Ashraf El Bagir
Date: 07-19-2007, 08:02 AM
Parent: #1
شلاقتك شلاقه بعد ده فى بونيه تانيه؟ والله حقو اديك بنيه
|
Post: #3
Title: Re: اتفه ((بنيتين)) في حياتي بالتفاصيل!!
Author: سامى عبد الوهاب مكى
Date: 07-19-2007, 08:27 AM
Parent: #2
| Quote: شلاقتك شلاقه بعد ده فى بونيه تانيه؟ والله حقو اديك بنيه |
ما تستعجل شوف البنية التانية وحا تعفيني من بنيتك!!
بصراحة احنن!!
|
Post: #4
Title: Re: اتفه ((بنيتين)) في حياتي بالتفاصيل!!
Author: علاء الدين يوسف علي محمد
Date: 07-19-2007, 08:47 AM
Parent: #3
تستاهل 
و مفروض تاخد التالتة كمان
ياخ أرسل ليك تلفون عمر في المسنجر و في النهاية و بحياء و خجل كدة أشخت ليك نمرتي و أقول في سري أكيد الولد دة بعد ما يتلفن لي عمر حيقوم هوبببببببببببببا يضرب لي و قعدت اليوم داك أنضِّف في سماعة التلفون و أي زول يتصل علي أقول ليهو :
- إختصر .. إختصر ياخ ما عندنا ليك زمن .. في تلفون مهم جايينا
أتاريك بقيت ظالم (بتاعت زيدان)
و جافيتنا (بتاعت البلابل)
و كتير عليك الرد دة ذاتو
يلّة أمشي خلي عمر الفاروق دة ينفعك
والله دة مغترب قيحة شُرّاب ما بجيبو ليك
و تلف بيهو الخرطوم كلها بعربيتك يقضي في مشاويرو ما بين أهلو و إتحاد الفنانيين
(أصلو بقي ملحن و ناقد علي آخر عمرو) و تجو جمب الطرمبة يقبِّل منها غادي ولا يكشكر بي جالون بنزين أو حتي خط ساااااااااااي
أمشي ليهو ينفعك و تنفعو
|
Post: #5
Title: Re: اتفه ((بنيتين)) في حياتي بالتفاصيل!!
Author: سامى عبد الوهاب مكى
Date: 07-19-2007, 08:56 AM
Parent: #4
Quote: تستاهل
و مفروض تاخد التالتة كمان
ياخ أرسل ليك تلفوني و في النهاية و بحياء و خجل كدة أشخت ليك نمرتي و أقول في سري أكيد الولد دة بعد ما يتلفن لي عمر حيقوم هوبببببببببببببا يضرب لي و قعدت اليوم داك أنضِّف في سماعة التلفون و أي زول يتصل علي أقول ليهو :
- إختصر .. إختصر ياخ ما عندنا ليك زمن .. في تلفون مهم جايينا
أتاريك بقيت ظالم (بتاعت زيدان)
و جافيتنا (بتاعت البلابل)
و كتير عليط الرد دة ذاتو
يلّة أمشي خلي عمر الفاروق دة ينفعك
والله دة مغترب قيحة شُرّاب ما بجيبو ليك
و تلف بيهو الخرطوم كلها بعربيتك يقضي في مشاويرو ما بين أهلو و إتحاد الفنانيين
(أصلو بقي ملحن و ناقد علي آخر عمرو) و تجو جمب الطرمبة يبِّل منها غادي ولا يكشكر بي جالون بنزين أو حتي خط ساااااااااااي
أمشي ليهو ينفعك و تنفعو |
يشهد الله ضربت ليك في الرقم الكتبته لي اكتر من خمس مرات جرس للنهاية ويقطع!!
قلت صاحبي دا يا ربي زايغ من عمر وقايل دا تلفونو شفت جنس الفتن دي!!
المهم ضربت لي عمر قال لي الزول دا عمل رقم تاني!!
وبقيت محتار!!
المهم تلفونك لو ياهو الرسلتو بضرب ليك تاني واغرب نمرة تجيك ياها حقتي!
اما عمر الفاروق ((الثقيل)) ما فاضي من النوم وقد ناس الحلة قال ليك بالله من يطلع الشارع الجماعة يقولو اماااااك خلاص جانا يوصلنا الاستيكة تاني!!
ولا البشكير الجابو معاه..دا قصتو تانية..
قال معطو قال..وهو يمعطو من وين!!
اي عيوني صغار!!
|
Post: #6
Title: Re: اتفه ((بنيتين)) في حياتي بالتفاصيل!!
Author: سامى عبد الوهاب مكى
Date: 07-19-2007, 09:13 AM
Parent: #5
البنية دي من مداخلة دكتور مرتضى نجم الدين في نفس الموضوع في http://hemamtec.com/phpbb/viewtopic.php?p=104332#104332
يعني قلت اخلي بنيتو بي جلاجل!!
Quote: اما انا
القدر يضربني بنية في حياتي زول واحد
فلاتي ستة في ستة !!
ايام دروس العصر
كنا بنمشي معهد في العصاري
دروس تقوية في السبعينات ...
ايام ارجل راجل ما بيدخل عشش فلاتة
المعهد بيت اربعة اوض
يا كافي البلا الاوضة اربعة في اربعة
بس كانت بتشيل 70 طالب !!!
الناس قاعدة زي الساردين جنب بعض !!
في كتير طلبة فلاتة كانو معانا
في واحد كل الطلبة كانو بيتنازلوا ليهو عن الفي الجيب
و بيدفعوا الاقلام و المساطر جزية
لزوم راحة البال ..
الفلاتي الزول الوحيد الما كان بيلتزم ليهو بي فروض الطاعة كان اخوكم
و يمين الله كنت ضعيف جنس ضعفة !!!
و اسالوا العرفوني زمان
الركبة زي عصاية بص الديوم الغربية الاحمر و السقفو كان اخدر داك
البيقطع كبري الحرية في ساعة
و يوم ينزل الا السواق ينزل رجلو و يحك فرملة بيها في ا########## ....
البص الكان سواقو يمد يدو بيكوس للعصاية وسط رجلين الركاب لمن يوم واحد كبّ ليهو تسالي...
ما علينا
الفلاتي كل ما نجي مارقين لازم تحصل احتكاكات بينا ...
اخوكم طبعا كان فارس شديد بالحيل
و اسالوا وليد اخوي
يشهد الله عشش فلاتة دي كنا بنقطعها من فوق لي تحت و زول بقول لينا عينا في راسنا مافي !!
يوم ملحق جريدة الصحافة الرياضي يوم الجمعة يخلص بدري
كنا بنمشي للمكاتب في العشش عشان نلحق صفحة احمد محمد الحسن بتاعة الجمعة و الصورة الكبيرة للمريخ و فضايح ناس نويدي الشهدا ....ايام دوري الخرتوم ....
و ايام التوتو كورة .....
تصدقوا بيت جيرانا في الامتداد كان جائزة في توتو كورة
و فاز بيها اصعب مريخابي في الدنيا - عمنا محمد الحسن !
نرجع للفلاتي
و انا شكلي قاعد افحّط بيكم يمن و شمال
بس تاني ما بقيف الا اكمل حكاية البُنية !
الفلاتي قاعد يجرجر في خرطاية اخوكم
و اخوكم ما قصّر
اصبعين اتنين جوة عيونو !!
و اول مرة اعرف ليك الفلاتة الجعّري بتاعهم عالي بالحيل !!!
و اخوكم طبعا جرى البيت جري شديد !!!
و مشيت
و لحدي الساعة سبعة و نص ما مرقتّ برة البيت !
الساعة سبعة و نص ايام المسلسلات
و الكهربة طبعا مية المية قاطعة
اصدقاء السوء جو دقّو الباب
عاوزين مرتضى
اخوك جا مارق
القى ليك اتنين من الفِرَد واقفين في الضلام
تاوقت يمين و شمال و جيت مارق
و في الضلام ما اشوف ليك الا الدنيا نور !!!
نور شديد بالحيل !
اخوكم تقول دقشو قطر !!!
لمن وقعتَ في ا########## ...
اتاريهو الفلاتي مشى هرَش اصحابي - العصابة بتاعتي - و خوّفهم و جابهم طُعم عشان ياخد حقو !!
بُنية ما بتتنسي !!
لي يوم الليلة عيوني ما ولعّت نور زي اليوم داك ....!!! |
|
Post: #7
Title: Re: اتفه ((بنيتين)) في حياتي بالتفاصيل!!
Author: سامى عبد الوهاب مكى
Date: 07-19-2007, 09:29 AM
Parent: #1
العاوز يعرف البنية التانية يرفع يدو!!
|
Post: #8
Title: Re: اتفه ((بنيتين)) في حياتي بالتفاصيل!!
Author: سامى عبد الوهاب مكى
Date: 07-19-2007, 10:24 AM
Parent: #1
البنية التانية!!
والله معذور لعدم التكافوء تماماً يعني زي ما تقول ((المطابع الصومالي ضد المريخ)) ما الهلال لانه المطابع غلب الهلال((ما علينا))
قاعد في امان الله قدام البيت وخاتي لي كمية من الألغاز تحت الكرسي وعندي كلب(إبن ستين كلب) ومعفن وياكل بالخسارة والليل كلو ساكي (الاناتي) يعني عاطل بالنهار وفحل بالليل والحرامي لو جاء غايتو!!
المهم قاعد فجاءه وعلى غير عادتو يقوم الكلب يهيج ليهو في زول ماشي!!
من غير ما اعاين ناديت الكلب ((لا اقعد ساي تعال هنا)) خش جوة إنعل ابوك لابو الجابك!!
والكلب لسه يتراجل ويهوهيو ويتسوى..عاينت لقيت ليك زول طولو زي عشرة امتار((في الوقت داك كان طولي (-3) ماينص تلاتة...
طوالي شبكتو يا اخي امش ما بسوي ليك حاجة..
امسك الكلب دا يا ......كلام ما بنقال!!
طوالي غيرت موقفي وشبكت الكلب تحريش ...
خلي يعضيك يطلع ((عينكـ)) والكلب طلع اعور مني .
المهم البيت الجنبنا فيه مصطبة بتاعة طوب بي اسمنت...زولك العملاق دا ((لب)) قلع ليهو زي مكنة طوب كدا ولخاني بيها انا واقف قصاد الكرسي..الكرسي جاهو شلل اطفال كرعينو الاربعة رقدن هردبيس وانا زغتا في اخر لحظة .
عرفت ليك الموضوع خطر..
اتلفت شمال يمين مافي زول!!
خلاص استعدلت للجري!!
الكلب فكـ البيرق قبيــــــــــــل ولا يخجل يكورك زي الحرقوه بي نار!!
صاحبك في ثواني كان قصادي انا وانا ما وراي إلا الحيطة!!
و((للللللخ))
مع الحيطة عليكم امان الله حرام!!
والله ضبانة ماتكتلا كدا!!
ما عارف رقدت زي تلتمية سنة كدا وقمت لقيت الحلة كلها واقفة!!
سالتهم في شنو!!
قالو لي الله مرقك دا ((عيد)) المجنون!!
مرق من المصحة!!
وقبل يوين فكيناهو من ابوه كان تاكيه داير يضبحه!!
اها دي البنية التانية!!
لي يوم الليلة اتذكرا خشمي يتلوي!!
بقيت في العيد ما بقول عيدكم مبارك ولا حاجه..((كل سنة وانتو طيبين بس))
وكرهتي بقت الكلاب!!
|
Post: #9
Title: Re: اتفه ((بنيتين)) في حياتي بالتفاصيل!!
Author: 3bdo
Date: 07-19-2007, 10:36 AM
Parent: #8
سلامات سامي
لكن ما ( بنيتين ) ... غايتو .. حمد لله بالسلامة اللي ما خلوك تركب طقم لغاية حسع
|
Post: #11
Title: Re: اتفه ((بنيتين)) في حياتي بالتفاصيل!!
Author: سامى عبد الوهاب مكى
Date: 07-19-2007, 11:07 AM
Parent: #9
Quote: سلامات سامي
لكن ما ( بنيتين ) ... غايتو .. حمد لله بالسلامة اللي ما خلوك تركب طقم لغاية حسع |
القال ليك منو ؟؟
الله يخلي سنون العضم
|
Post: #10
Title: Re: اتفه ((بنيتين)) في حياتي بالتفاصيل!!
Author: شهاب الفاتح عثمان
Date: 07-19-2007, 10:54 AM
Parent: #8
من قوة البنج دي انا هنا اتعسمتا
لا حولا دي حاجه غريبه لكن
|
Post: #12
Title: Re: اتفه ((بنيتين)) في حياتي بالتفاصيل!!
Author: سامى عبد الوهاب مكى
Date: 07-19-2007, 11:27 AM
Parent: #10
Quote: من قوة البنج دي انا هنا اتعسمتا
لا حولا دي حاجه غريبه لكن |
ظاااااهر من الصورة التعسيم!!
لللللللللخ
|
Post: #13
Title: Re: اتفه ((بنيتين)) في حياتي بالتفاصيل!!
Author: سامى عبد الوهاب مكى
Date: 07-19-2007, 01:32 PM
Parent: #1
كويس رايكم شنو في بنية شفتها ادوها لي زول حيرتني!!
|
Post: #14
Title: Re: اتفه ((بنيتين)) في حياتي بالتفاصيل!!
Author: سامى عبد الوهاب مكى
Date: 07-19-2007, 03:01 PM
Parent: #1
الليلة الكميس!
والللية!!
|
Post: #15
Title: Re: اتفه ((بنيتين)) في حياتي بالتفاصيل!!
Author: الطاهر عثمان
Date: 07-19-2007, 03:23 PM
Parent: #1
ههههههههههههههه
الله يجازي محنك يا سامي
ياخي بني مبالغة
وعيد مبارك عليك
|
Post: #16
Title: Re: اتفه ((بنيتين)) في حياتي بالتفاصيل!!
Author: ALGARADABI
Date: 07-19-2007, 05:05 PM
Parent: #1
| Quote: اتفه ((بنيتين)) في حياتي |
أعمل حسابك
التالتة في الطريق
( المصدر موثوق)
|
Post: #17
Title: Re: اتفه ((بنيتين)) في حياتي بالتفاصيل!!
Author: سامى عبد الوهاب مكى
Date: 07-22-2007, 05:39 AM
Parent: #16
يازول خوفتني
|
Post: #18
Title: Re: اتفه ((بنيتين)) في حياتي بالتفاصيل!!
Author: othman mohmmadien
Date: 07-22-2007, 07:35 AM
Parent: #17
هيع والله عافي منك ،،،،
والله لو ما عملت كده تكون ما سوداني
"العبارة التي جعلتنا نكاد ننتحر أمام دشليون بنية"
بس التانية دي صعبة خلاص
الكويسة ما فكيت البيرق
الثالثة حتكون الأصعب
أدينامنها شوية
ماتحكيها كاملة
|
|