وجــع مُــكلف ..!!

لا تكـون ودران في العِـرفة
في صـمْتك مـعاناتك
سـكوت مُـبهم
أثر مرجع حريق ذاتـكـ
هُباب ضـائع
ما تبـقى فُـرهـيد طَـرفه
في جرف البحر وحـلان
إذا صدقت رؤاك في الطيف
وبُعد الشـوق بنشـوة عُـمرك
الشوف لمحة مـنك وفـيكـ
ضو قمرة تـلوت الليل
لحظة تسـكت الدنيا وتقـيف
ُمتوهطـاك من وين
خـبيب اللقيا جاك فـتران
ركض فََـزع الحُـلم بالحـيل
مراحيل البدو الرُحْـل
شواقـير البَــرم نوار
رقع خُـدرة فراغ الممكن
المشوار مشاك ... كم مـيل ؟
مسافة شوف مـداك
تنْفــح عبير ريحان
مضمْــخه بيك
تلاوين الهموم ترتيل
( إصطياد العصافير في أوكارها ليلاً حراااااام ..
دَعــها .. فهي ينقصها السكون
من هـزة العالم
تطـير مع الهواء ... لكنها أجمـل
دعــها
فهي بريئة مما إقترفنا )
كان الضلوع في صرخة التهويل غـــلط
كان الزمن معتـوه
ومحــترف العناد
متخــفّى من تحت الشرار
مُتغطّـى بيك جمر الرماد
أبداك حـُمرة عين براى
ألقاك إحساس مختلط
يضّـمد جـرِح وجعى وأســاى
أتحـدى بيك الليل
بعد طول الغياب
القمرا وين منك
إذا إتسـافه زمانِك فيني
بتسافه معاك هسـه
وما تهـمى الوجـع ضـدِك
حـكايتك أيـه
وما التهمـــه ؟!
شـكوة حالي عيب جداً
على حـالي
زمن خالي وخواء
في عســجد النوم
إشـتهاك توحُـم الشوق إشـتها
صحيح إني ارتضيت أرجـاك
بشارة رمل خط تالت
صحيح هضربت بيك حلمان
بضـو فالت
يِجـيب طيفــك
فى يوم مشــهود
ومـهما كــنتِ
ما وسوستي في عضل القلب إرهـاق
ولا نشـفتي ريق الريده بى وجدِك
قبل ما تبـقِي سِـبة شـيب
تزيد تنشــط
غـيابك والرماد هـبود
قصدت أجـيكـ
عـافره الخـيل
ضفيرة ضفيرة فـلفلتك
لزوم عِرفة
ووجع مُكـلِفْ
دلف حـُزن الفقِـد غاشـيك
مدثر بيـك
صحيح قـلقان
كما عرفــتك
أحبك منتهى الإشــراق
كما فلق الشموس الضاحكه
فى صدر الســما المرفوع
حكاياتك بتتجــدد على وعــدك
خُطاكِ على مراسـمنا
وِحـناء الحــواري الفارهات
الصبرُ يا ألمـي المـخضب
في جـنائز رغـبتي
الصبر يا ألمـي الذي
يقـتاتُ من دمع البكاءِ على الشتات
أن يحتفــل همى
وحــيح وجعى المعاك
لا تكوني فى سبر الغياب
ودرانه ضيعتى المكان
إخــتارى زاويه من الجــهات
تجـمعنا صدفه وتنـتهى
فــوق كـم ... ؟؟
فوق كم تبايعي النهمه
صرخات النِدا العاجل
وللموت شهـوة ...
في زحمة حضور الأمنــيات
وأنـــــــــــا

عبدالله
سعدت بالتعرف عليك عن طريق هذا الابداع الجميل وعن طريق صديقنا المشترك مأمون محمد حسين

العزيز

بن حســن

سـعادتى تعــدت حيز المعقول بمنحى صداقتك النقاء
مأمون الإنســان





نفتدقكـ
ونبعثك التحايا
مع حبنا الصادق

لاول مرة ابكى حين مطالعة قصيدة لك
بكيت
بكيت كما انى المعنية بهذا الوجع
وان هذا الشعر الداوى الضاوى مكتوب لى
احس كل كلمة تصطدم بجدار الروح
يا لتلك الروح التى سقتها الى حيث الوجع المكلف
احبك ياخ

خلف الضباب
سر غيم بيعتزم الهطول
مطرك رشغ عصب البلل
كان محتمل
القـا إفتراعك للدموع
الدمع ند الضحك
بيمنحنى الفرح
فأكون مخّضــراً
أفتش عن هوية إنتصارى
فى تكاليف الوجع
سيكون ظفرى بالهزيمة حينها إســتمتاع
تخنـقْـنى عـبرات
إئتســارى
مكبلاً بالعشق
مهزومــاً
كما يجب إنتصارى
بالمهادنه والجنوح

أســتاذه ســلمى

العزيزه

لا أحـد يفـرح عـندما تبكى ملائـكة الفرح
ولا أنا حين ذرفـك للدموع وإن كانـت تخـص إنفعـال فريد
كلحـظات الفرح والدهشه ..
أو فرحة العين بالبكــا

بصدق .. سعدتُ جداً لإنفعالك
لأوجاعى المُـكّـلـفه

ولروحك منى
آيات إحترام
لا أعرف مداه

داش..
يا وجع الحـروف !

داش العزيز

قول يا لطيف ..

بشيشك بينا ما تودرنا يا المبروك..

احييك والله ..احي .. احساسك ..النقلتو لينا بالجملة..وورّطنا في شجن عميق ..نبيل وساحر

تسلم

مودتي

هاهى المفردات الأحــاجى
يا ســلام يااخ
مرقتها من وين
كأنها ضاعت منى فى عتمة زحام الليل
مرقتها كيف
كتمثال الإغريق


( بشــيش )



بدأ مهرجان الطلب
محجــوزه من طـرفى حتى قفل المزاد
وفقاً لأعلى ســعر من تكاليف البيع للأوجاع


الخليل..

مرحب بيك معاى
اهلاً حبابك يوت

الصحافــه

يا ســاكن العصب إنبهار







سعيد بيك جداً
وخليك قريب

كامل الود

Quote: ركض فََـزع الحُـلم بالحـيل مراحيل البدو الرُحْـل شواقـير البَــرم نوار رقع خُـدرة فراغ الممكن المشوار مشاك ... كم مـيل ؟ مسافة شوف مـداك تنْفــح عبير ريحان مضمْــخه بيك تلاوين الهموم ترتيل

حقيقى ابداع .. تسلم الآنامل ..

لا أدرى
إذا ما البحــر صالحنى أخيراً
أو تمرس حين يبتدأ التمرد بالريــاح
الموج لا يعرف هدوء الليل
يلفحنى يميناً يشتهى غرقى
ليحتل الضفاف

هند
العزيزه

كونى كما أود

عبد الله

ده نضميك ولا السما؟

سما لابسه توب ازرق، مكحله بى ضحك الملائكة

ومعطرة بى ريحة الشمس

يا زول إنت الله ما ليك؟

الله إن شاء الله تنطرب دنيا وآخرة

زى أطربتنى

يا زول يا سمح

ابوذر

يا ااخ

انت زول مريح زى المويه
بترطب حواس الزول رواء

ونضميك مطًــعم ( بـ شــنو )
اقول ليك
الوصف ماقادر يكمّــل
رحلة الإمتاع معاك

إذا الكلام إنشرق زى الكبريت البلتو المطره

عذراً مــيدوزا
حين ضـقت بــرمز المدينه
فتطهرت بعاهرةٍ
وزجاجة خمر
ولم تجد
غير جمع من الناس
قالوا تقدمنا للصلاه
ففعلت *



* ود الغالى

سْـــلم على كل الحواس

الشفيف عبد الله...

شكرا لهذه الحروف التى تمشى فى الدوااخل
و تثير الاحاسيس فيناااا...

تسلم...و سلمت الاناامل..

بوحمـيد

بن عثمان


تعرف ياصاحب
من يوم الغنيه ديك
وأنا


هوايتى أحبك جداً
حد شريانى الســرى
شايلك فيا وماشى
لازمكـ زى ما ضُلى




ويجمعنا الحساس الزّيكـ

كامل الإحترام

ياوجعك وكت يتمدَّ في كل المسام
بعرف صحيح إنك هويت
وبعرف معاك معنى العشق

إمْــــتدى زى شوف الحلم
أقــرى الكلام
الباقى بين وهم الهلم
ياحيل مســام الدهشه ليك
ياشوق يتاوق
ويندهـك عبر إرتباك
حاقك حلم
قبل الســلام
ألقاك أشواقى المعاك



تعالى نقدمك قربان





برجاك

Quote: صحيح إني ارتضيت أرجـاك بشارة رمل خط تالت صحيح هضربت بيك حلمان بضـو فالت يِجـيب طيفــك فى يوم مشــهود ومـهما كــنتِ ما وسوستي في عضل القلب إرهـاق ولا نشـفتي ريق الريده بى وجدِك قبل ما تبـقِي سِـبة شـيب

من اراد ان يتخذ من الحرف مدد فليقول له انا صديق داش وكفي .

هاشــــــــــم

إزيكـ يا صاحب

أعتز بك يا أبيض




وليك منى الموده
وصــدق الأخــاء



جاي مهرجان
الصحافه الجمعه
نتلاقى

Quote: غـيابك والرماد هـبود

في زولا يقول كلاما يدوش زي دة غير "داش"
هبود دي زمان قايلا رطانة بعدي عون الشريف الله يرحمو قال انها من الدارجي السوداني

Quote: في زولا يقول كلاما يدوش زي دة غير "داش" هبود دي زمان قايلا رطانة بعدي عون الشريف الله يرحمو قال انها من الدارجي السوداني

مهندس ابوبكر

العزيز




والله فِــرحت بك جداً


وأنت تفلفل الوجع
ضفيره
ضفيره




مودتى
مع كامل
الإحــترام المؤكد