هلا هلا رِوت بطانة أب على

سماك إتحين آ السمحة فوق ليكى فشّ غبينتو
وديانك مواعينو بتقالد فى صبيبو وعينتو
شدرك يتاوق مدا روسينو ومرق بى زينتو
ضهاريك حاكن الطوفان ونوح وسفينتو


جاتنا الأخبار من شرق الله البارد
وقالوا السما انبهلت والواطا اترسفت بالموية

بطر بطر آ الخمجانه

الوديان من شدة الروا، غلبا توهط المويه وخترت ساى فوق عديلا

والمطرا لى هسه نازله سباليق سباليق من كف الكريم، ولا سائلة فى زول

قلوبنا مع أهلنا جميع الدفر عليهن السيل وبشتن حال الفجج كلها

والدعا والمساندة لى اهلنا أم ضواًبان وفى الدبيبة وابو قرون والعيلفون والشيخ الفادنى
وابودليق ولى ناس الحلال الفوق والتحت

ودعواتكم ليهم بالله

الناس ضيقة ضيق شديد هسه

أبو ذر الحبيب
يامطراً هاطل ... ياخي أم هبج والله كبت موية ما سمعنا بمتيلها قريب ، واغرقت كل الوديان وهاج فحل أم صريصر والمنائح بشت
لكن الناس باتوا في السهلة ، وفاقدين الزول اليقيف جنبهم .... ولك في موضوع كسلا أسوةً سئية
حفظ الله البطانة وكافة أنحاء الوطن من هذة الفيضانات والسيول ، وتجار التجهيزات وسارقي أموال الشعب وصناديق تجنب الفيضانات
ألحقنا في النفير الكسلاوي وأمجدنا يا شيخ أبو ذر ، وكان مفلس أنجدنا ببيت بيتين من شعر المناحة والحماسة ومربع المسدار
شكراً يا حبيب

أخونا الصديق

سلام تريان زى هوا بطانتنا

والله نحن قدر قولنا قايلين ناس كسلا براهن
وقلنا يمكن القاش رجع تانى يسوى فى العقوق

لكين اتاريها الواطا كلها مدمدمه بالموية ومغتغته بالدُكن

لكين تعرف على الرغم من البشتنة والخسائر وتلتلة أهلنا فى البطانة الكبسن السيل ساى على حين غفلة وحزننا عليهم وشفقتنا

أنا برضو مبسوط

لأنه المطر ده رضاء من الخالق وكرم إلهى ما بعد تانى

ومهما سوت وفعلت وكسرت وعوبقت برضو بنريدا

المطر حبر الله البكتب بيهو حياتنا كلها

شفت انا هسه من شدة الفرحة من الروا الحصل ده، مع التكسر والفجعة السواها السيل والمطر

سويت للبطانة مربوع الشعر الفوق ده

وقلوبنا والله مع كسلا وناس كسلا، بلد الحبان وأرض الخلان

وان شاء المولى عديلة وبيضا زى نفوس ناس كسلا

والله ما بنسى عبيده تب

ازرقن سماك كالطاجن الممسوح
واتكل سحابك زى سطور اللوح
اتحليتى بطيبة عطور وتفوح
وفيك ريحة دعاشات ترد الروح


الخبر اللكيد قالو البطانة اترشت
وسارية تبقبق للصباح ما انفشت
هاج فحل ام صريصر والموانح بشت
وبت ام ساق على حدب الفريق اتعشت





ربى يجعلها امطار خير وبركة

أبوقوتة
البين الناس ياقوتة

كيفك يا ابو حميد، ابو البنيه

الخبر إتأكد بالحيل، علا المرة دى مو هو رشاش،

ده مطر سوارى
ضهرى وفجراوى

هسه تلقى ناسنا، مع المجابدة والضيق، برضو تلقاهم فرحانين، أنا متأكد

الخير ورد

وسلام لى اهلنا جميع فى الجهات شمال وجنوب البطانة

تمبول والحس والقيزان كلها
شرق رفاعة وشرق الهلالية

وتحايا خاصة للحلال المتوسدة الضفة الشرقية، وديل الموية بتجيهم فتراة ودايخة

ابدا من الشمال وامش جنوب

البشاقرة وحلة محمود والعيدج والسيال وودراوة وود عشيب وحلة بلولة والمتمة والجنيد وود السيد والهلالية ورفاعة والشرفة لامن تصل الكبرى

اهلنا بالبطانة ربنا ياخذ باياديهم انشاءالله
وياابوذز المطر ماخير كتير بلحيل
والبلدات اتلقي خدرت هسي
والعيش السنة دي برقد ا##########
السنة دي شكلو خريف ابوالسعن
قالوا السحاب مشيل تب
والبرق قبلي

والله يا حافظ

على حسب الكلام الجانا منهم
الحالة صعبة جدا، ولسه حتزيد خطورة كمان

السيل من الشرق من أمامهم والبحر من الغرب من خلفهم

ربنا يلطف بيهم

والخريف السنة دى جاى بى رأى جديد