ليلة سمر صيفية

تحياتي
بعض البوستات تولد (جميل المواضيع)
صيف الخليج (مولع) ولكننا نستطيع أن (نبرده) من خلال إقامة ليالي صيفية يشارك فيها مبدعونا ، ومن خلال بوست كتبه الأخ الحبيب يسري صلاح وشارك فيه العديد من الأحباب منهم (أ . هرون دياب - أ . خالد محمد سليمان - أ . يسري صلاح - أ . لقمان همام - أ . عمر سعد - أ . شادية الطيب - د . محمد المشرف - أ . أبو ساندرا - أ . راوية) تناول بعض الجهود التي يطلع بها مركز اصدقاء البيئة في الدوحة لجعل ليالينا الصيفية (شتوية دافئة) .
يسعدني أن أتوجه لهم ولكم جميعاً للمشاركة في تنظيم ليلة صيفية يشارك فيها أهل الإبداع من بلادي والمقيمين بالدوحة في صالة المركز لا سيما وأن الدوحة حبلى بهم ومنهم على سبيل المثال لا الحصر :
أ . محمد آدم المنصوري
أ. السني دفع الله
أ . ضحية إبراهيم
أ . يسري صلاح
أعضاء الفرقة الموسيقية بالدوحة
وضيف الدوحة د . ياسر مبيوع
أ . حسن الشيخ
أ . لقمان همام
أ . علي عبد الهادي
أ . عبد العزيز كباشي
د . محمد المشرف
المهندس معتصم
والمجموعة الرائعة للفنانين التشكيليين بالدوحة (يلا يا د . معز العجيمي) حرك ناسك
واعتذر لمن لم أذكره فهذه (مثلة لا حصر) . يعني في هذه الليلة يمكن أن نستمع للشعر والنكته والأغنية والقصة القصيرة ونشوف أعمال تشكيلية - وممكن نسمع دوبيت

يا جماعة المسرح موجود - عصير ندى (الإدريسي) موجود - الكراسي موجودة - المايكروفون موجود - الزمن المناسب موجود ويمكن لليلة أن تولد أخرى ونكتسح صيف الخليج بأيام جميله .
وعشان ما يكون كلامي دا كلام جرايد فأنا أوجه الدعوة لكافة المبدعين الذين لديهم استعداد في المشاركة في ليلة السمر الأولى مساء الجمعة 13/7/2007م (والدعوة عامة) وإن شاء الله الليلة قائمة ولو بالعود . على الراغبين الاتصال بي في الهاتف 4874725 ولا أستثني أحد من المبدعين كما قال صديقنا أبو ساندرا ، وعلى استعداد لسماع آرائكم . وتذكروا دائماً أن منبرنا منبر (ثقافي .. ثقافي .. ثقافي .. لا سياسي) ونقبل كل الألوان والقبائل الفنية .
عادل التجاني
الدوحة

فوق من اجل هذه الليلة الصيفيه ،،،،

سلام يا ولد حلتنا ،،،

ود العباسية يا بن خالتي
تحياتي
ونحن حاضرين للطيبين - بس إنت حرك صاحبك البدس الفنانين دا (بتاع المختبرات)
عادل التجاني
الدوحة

يا سلام عليك يا عادل ..

أحلى مبادرة .. وبالإبداع نهزم شمس الصيف

نحن حاضرين

تحياتي أستاذ عادل ..

فكرة رائعة وجميلة .. بس ما في إمكانية تكون متزامنة مع حضور ناسنا بتاعين الأزرق الدفاق ؟

محبتي ..

أخي لقمان
تحياتي لك
أشكرك للتنبيه .. ناس الأزرق على العين والراس .. وحا نشوف جدولهم ونعطيه أولوية لأن ناس الدوحة موجودين ومنورين الدوحة بوجودهم .. أرحب بك وبزملاء الأزرق .. وفي انتظارهم .. وقد تصب الفكرة ضمن جدولهم والكرة في ملعبكم .. المهم نحن عايزين صوتك المتميز يزين ليالي سمرنا الصيفية لأنها ستستمر
أخوك / عادل التجاني

عادل ..

سلام عليك وعلى مبادراتك الجميلة ..
الكرة الآن في ملعب الجميع ، والله ما قصرت تب..
تاني أكتر من كده شنو يعني؟
يلا يا شباب ، طلعونا من الروتين ، وحركوا سكون الدوحة ..
عايزين ، نسمع ، نطرب ، نضحك ، نبتهج ، نتونس ، نتثقف ، ونعمل أي حاجة ..

صلاح عبد الله يا رائع
تحياتي
شكراً
وشد حيلك والناس حا تسمعك .. نحن حا نطلع أي فنان داسي نفسو .. وكلم أخوك الشاعر / عماد عبد الله يجهز ..

ومن الحين يا جماعة

صلاح عبد الله عندو فاصل .. الغناء شي والمحاماه شي تاني

عادل التجاني

------------------------------------------------------------------------
تاني أكتر من كده شنو يعني؟
يلا يا شباب ، طلعونا من الروتين ، وحركوا سكون الدوحة ..
عايزين ، نسمع ، نطرب ، نضحك ، نبتهج ، نتونس ، نتثقف ، ونعمل أي حاجة ..
-----------------------------------------------------------------------


صلاح عبدالله الكلام الفوق داء مش كلامك ( اسمع كلامك اصدقك اشوف عمايلك استعجب )
عموما فاتتك ليلة جميلة وكان الحضور فيها انيق ومميز انتا مما يدخلوك في
موضوع الغنا تعمل ابوالنوم لاكين نحنا وراك والزمن طويل

عادل التجاني
ازيك يازول يا خلاق

عجبتي الفكره جدا وخاصة وانها معنيه
بالمدسوسين من المبدعين..
وعشان كده بطلنا الاجازه
وح نأشر علي ناديكم لحين
الانتهاء من اسمارك الصيفيه..
ويلا يا شباب اياديكم مع عادل..

العزيز فيصل عباس
تحياتي
وأنا موجود معك في هذا الصيف ، واشكر مرورك ، وأرحب بك وبجميع اصدقائكم في ليالي سمرنا الصيفية
عادل التجاني

الاستاذ / عادل
صباحك خير
يارائع بروعة بلادي الحبيبة وخاصة في هذه الايام ( خريفنا بدر ...... ) لك التحايا العطرات وانت تحاول دوما ان تثري ليالينا السودانية بكل جميل وتفتح صدرك واسعا لكل مبدع سوداني في الدوحة من خلال هذا المركز الجميل , كل كل الشكر والتقدير , وجاهزييييييييييين ياماااااان .
هارون دياب

هرون يا دياب
كيف حالك
مراحب بيك وشكراً على المرور وأكيد بنحتاج لي فنياتك التنظيمية معنا
عادل التجاني

فوق من اجل ليلة الجمعة المنتظرة .
هارون دياب

استاذ عادل التجاني

نحي الثقافة والابداع اينما وجدا...


ونحي المبادرات الجميلة واحياء الاشعاع الجمالي السوداني في المهجر..


معكم روحاً وقلباً


مودتي

محمد خليل

كاليفورنيا

أ . محمد خليل
تحياتي وشكراً على المرور
وكسبناك أخاً ورفيق غربة ولو كانت بعيدة ، كن على اتصال دائم - وتحياتي عبرك لكل (جلابية وعمه) في كاليفورنيا
أخوكم / عادل التجاني
الدوحة

تحياتي مجدداً
وصلتني قائمة بعدد طيب من الإخوة والأخوات الذين يرغبون في المشاركة في ليلة سمر صيفية مساء الجمعة 13/7/2007م ، اشكرهم على تشجيعهم ، وأحيطكم علماً بأن بمركز أصدقاء البيئة عدد من الصالات الكبيرة والمتوسطة .
وعشان نكون على صدق فإننا سنجهز بمركز اصدقاء البيئة - الدوحة قاعتين إحداهما كبيرة في حال حضور عدد كبير ، والثانية متوسطة لاستيعاب الأعداد المحدودة وصدقوني البجينا ما بنردو ولو شخص واحد صاحب اهتمام ، وسنقدم برنامجنا له وكأنه مجموعة من المهتمين .. يعني باختصار برنامجنا قائم ومرحب بيكم جميعاً. وبالمناسبة سنخصص إحدى ليالي السمر (للأطفال) لأهميتهم .
عليه نرجو الالتزام باحضار الأطفال في الليلة المخصصة لهم (فقط) لأننا سنعد لهم برنامجاً يتناسب معهم
عادل التجاني

العزيز الكبير عادل
تحياتي لك ولجميع من ولج في هذا البوست .
نحن مستعدين لتلك الليلة التي نحسب أنها ستكون ليلاء طالما كانت المبادرة منك يا رائع.
سأحضر ومعاي ( فرداتي ) قاسم وكنينة وخواجة ( المنتشي هذه الأيام ).

إنت وحبايبك
مرحب بيكم (محمد ميرغني) وليلتنا الجمعة القادم 13/7/2007م وحوشنا كبير ، وزي ما ‘نت عارف الإدريسي خارج الدوحة ولكن عصير ندى موجود.
في انتظاركم
عادل التجاني

الفنان المبدع عادل التيجاني

شكرآ على المبادرة التي نحتاجها جدآ
وشكرآ على قيامك بتهيئة المكان وتذليل الصعاب
والناس ماعندها عذر

حانشارك وبحضور متميز

أما بشأن :

Quote: صلاح عبد الله عندو فاصل .. الغناء شي والمحاماه شي تاني

أنت بتحلم يا صاحبي
وكثيرآ مانرى المسحيلات ، ممكنة ومتاحة في الأحلام
فأحلم ماوسعك الحلم
ومن الواقع ما تغتم

غيرك كان أشطر

فالزول ده ماعارف انه مبدع ، وهنا مصيبة
أما لو كان عارف وبتمنع فذلك بخل وبتكون المصيبة أكبر

صلاح فنان رايح عن نفسو

قايل الفن ده زي الكورة فيه إعتزال
وماعارف الفنانين الحقيقين لايمكن أن يبخلوا أو يعتزلوا
ينذرون حياتهم للفن ويبدعون حتى الرمق الأخير

يا أبو ساندرا

تحية كبيرة

أنا ما عارف دا تحفيز لصلاح أم (استفزاز روح الفنان فيه) ليقدم روائعه ، والله أنا بتفق معك أن الراجل فنان وصوته جميل واضيف لك بأنه (حافظ حقيبة كتير) هذا بجانب حفظه وأدائه لجميل الأغاني السودانية ، والله يا أبو ساندرا لو الزول ده قعد لي بمزاج لملأته (اغاني خاصة) .

عموماً هو أمام تحديك بالحضور أم لا ، وحسب معلوماتي عنه أن الرجل يحب التحدي وسيحضر بس إن شاء الله ما يضيعنا .


شكراً

عادل التجانى

ود التجاني وأبو ساندرا

غايتو إنتو إستفزوا العالم .. وغيظوهم ... وكاووهم

وفي النهاية نحن الكسبانين

ميعادنا بكرة ... والله يبعد العوارض

أبو الررررررررريش
تحياتي

وإنت كان جيت حا نطلع الفنان الجواك ، وحيث أن الناس في قطر عرفوك بعد حفل أ . محجوب شريف بأنك عازف أروج ، فغداً سيكون يوم آخر للتعارف في آلتك الرئيسية (الساكسفون) .
وين حا نهرب منو وين

عادل التجانى

أقعد إنت لي جنس ده

مارق مداعي؟

أبو الررررررريش

ما في شي بحلك إلا تقول (الروب) ولا (اللووووب) باللجنه

عادل التجاني

والله يا عم عادل التيجاني أنا خايف ما أكون أول الحاضرين
وإمكن ما أكون طيش الحاضرين ذاتو
فالبنات العسل أقنعني بمشاركتهن في رحلة في سي لاين
وحشدن عسل الدنيا كلو
مهاد ومنى وريهام وهبة وعسجد
ومعاهن قرض الدنيا كلو
طارق المكي ومحمد الطيب حسن وإسماعيل

إضافة لبعض المعتقين

أنا ماشي البحر

يا أبو ساندرا

أها الأمور ظهرت جلية

بي عافيتك يا أخوي إنت والعسل والأهل وإن شاء الله ما تغرق والقرض ما يقدر ينقذك وبعدين يقولوا العسل والقرض غرقوا أبو ساندرا

مع السلامة

عادل التجاني

أستاذنا الكبير عادل ..

ما شفت اسمى الا هسع ، وما عرفت البرنامج الا الآن ..
وما نسقتوا عشان نفهم حاجة.
على العموم ، أنا شاكر جداً لعشمك ، وان الله مدّ في الأيام ح أغير رأي أبوساندرا صديقي القديم.
آسف جداً لعدم تمكني من الحضور ، والسبب عدم معرفتي المسبقة بالبرنامج ، وكذلك أكل العيش (اجتماع من تمنية ونص وحتى الساعة حداشر ليلاً) ولاحظ اليوم الجمعة!!
اتمنى انو لو في حاجة زي دي واتحددت على الاقل تكلمونا تليفونياً ، وح تلقونا أول الحاضرين..

Quote: والله يا عم عادل التيجاني أنا خايف ما أكون أول الحاضرين وإمكن ما أكون طيش الحاضرين ذاتو فالبنات العسل أقنعني بمشاركتهن في رحلة في سي لاين وحشدن عسل الدنيا كلو مهاد ومنى وريهام وهبة وعسجد ومعاهن قرض الدنيا كلو طارق المكي ومحمد الطيب حسن وإسماعيل إضافة لبعض المعتقين أنا ماشي البحر

بالله شوف الراجل العجوز ده

الرائع / محمد الطيب
صباح الخير

Quote: بالله شوف الراجل العجوز ده

كدي سيبك من صلاح انت زاتك ماجيت ليه ...؟
هارون دياب

أ . صلاح عبد الله
تحياتي
يا سيدي أنا مقدر ظروف عملك وشاكر لك هذه المداخلة والجايات أكتر من الرايحات
عادل التجاني

بالنسبة للمداخلة أعلاه لصاحبنا صلاح عبدالله
هاهي مداخلة له سابقة في نفس البوست في بداياته

Quote: عادل .. سلام عليك وعلى مبادراتك الجميلة .. الكرة الآن في ملعب الجميع ، والله ما قصرت تب.. تاني أكتر من كده شنو يعني؟ يلا يا شباب ، طلعونا من الروتين ، وحركوا سكون الدوحة .. عايزين ، نسمع ، نطرب ، نضحك ، نبتهج ، نتونس ، نتثقف ، ونعمل أي حاجة

يا معلم دقسة

يا بركة .. صديقي القديم

وين الدقسة في الكلام ده ؟؟
أنا فعلاً متحمس للفكرة وما زلت ، لكن المشكلة ما في زول بلغني بأي شئ
وما شفت الكلام المكتوب الا أمس في الليل..
كنت ح أعرف كيف ؟؟

المهم البحر كان كيف ؟؟

ياجماعة الخير اقترح انو تعملو بوست جديد وتناقشوا فيه كل الفقرات التى قدمت امس مع الصور ومع الاقتراحات لليله القادمه متى ستكون وماهى الفقرات التى ستقدم فيها ولماذا تخلف البعض من ليلة امس. وايضا تنزلو فيه الصور كامله..

ضحية

المشكلة كل صور الحفلة بحوذة الضحية
معتز القريش والقريش حالف ماينزل اي
صور للبرنامج الابعد ارجاع الباس ورد
بتاعو .

ياريت الاستاذ بكري يرجع للزول دا ممتلكاتو
لانو فعلا حاسس انو مظلوم وفي ناس في المنبر
قاعدة تتجاوز الخطوط الحمراء اكتر منو
بس هو بقي ضحية ياضحية

ننانشد استاذنا الفاصل بكري بان يتجاوز هذه
المشكلة وينظر في امر اخونا المعتز .

هو لميض لاكين برضو انت الكبير يابكري

يا يسري يا فنان
صباحاتك بيض
كانت ليله ما أحلاها (متنوعه واستمرت إلى ما بعد منتصف الليل) وستستمر ليالي السمر الصيفية وأنا أشكر حضورك المميز ومشاركاتك الغنائية الجميلة وأشكر لكل الحضور وتفاعله مع الفقرات ، وما يهمنا أن ليلتنا ناجحه سواء تم طرحها على المنبر أم لا .
عادل التجاني

أ. ضحيه يا فنان
صباح الخير
كلامك صحيح 100% ، يجب أن نناقش ما تم طرحه من خلال لسلة السمر الصيفية والتي كانت ناجحة بكل المقاييس حيث تشرفت جداً بحضور عدد كبير من الأصدقاء والأحباب والسيدات والآنسات وكانت متنوعة
عا\ل التجاني

عادل

أيها الجميل

طبعا اخوك مزنوق وما بتحل الا آخر الشهر
المهم
انت استاذنا و تأمر بس ..

أخي الشاعر / معتصم الطاهر
تحياتي
والله فقدناك ، وستستمر الليالي ، وجهز الأعمال الجديدة المتميزة ، في انتظارك .
عادل التجاني

كتب معتصم الطاهر :

Quote: وما بتحل الا آخر الشهر

إن شاء الله { تنحل } بالسلامة
ومبروك مقدمآ

كتب يسري صلاح :

Quote: ياريت الاستاذ بكري يرجع للزول دا ممتلكاتو لانو فعلا حاسس انو مظلوم وفي ناس في المنبر قاعدة تتجاوز الخطوط الحمراء اكتر منو بس هو بقي ضحية ياضحية

قبل أن تتبنى أي موقف يا يسري
مفروض ترجع للحاجات الماقريتها أبان غيابك
حتى تكون في الصورة
وبعد داك ممكن تجي تكتب رأيك
فماتدرع ليك موضوع أنت ماعارف عنه أبوالنوم

لأنك لمن تقول فلان مظلوم لازم كمان توضح علان الظالم
وأين يكمن الظلم تحديدآ

يايسري أي زول تعتقد إنو { تجاوز الخطوط الحمراء }
لك الحق في المطالبة بحجب العضوية عنه وفقآ للوائح
وعلى من تظن أنه متجاوز دحض كلامك

كتب الفنان الناكر صلاح عبدالله :

Quote: وين الدقسة في الكلام ده ؟؟

في الحقيقة يا صلاح الداقس الأصلي في هذا الموضوع
ودقس الناس معاهو هو صاحب البوست نفسو
العم عادل التيجاني
فتح بوست تاني في نفس الموضوع نزل فيه كل المعلومات
وماكان محتاج لي كده وعمل تشتيت للناس
البوست الأول كان كافي جدآ
لكن الزول برلوم
وليس على البرلوم حرج

الفنان المبدع عادل...

ومركزكم الاكثر جمالا، وعطاء، وتفرد.

لمرض عارض، لم اكن متابع الاحداث، وفوجئت بالامسية الرائعة وقد صارت جزء من نسيج الذاكرة، تومض دوما، كحدث جميل، مع تسارع الايام، ...

سلامي لكل الحضور، ولكن من اضاء الامسية بموهبته الجميلة....

والصور وين؟؟؟؟؟ (لكل صورة حدث)... (لكل صورة حكاية)...



دوما، نحو الغد، نحو (افق بعيد)، كما يقول شيخنا في صفحته الأخيرة...

محبتي وتقديري
اخوك
عبدالغني

يا عبد الغني يا فنان
صباح الخير
أنا نفسي كنت متوقع حضورك إنت ومأمون الجميل ود العباسية وصلاح الفنان وأمين أيضاً ، لأننا اعتمدنا فقط على الإعلان من خلال المنبر وبيني وبينك كنت متوجس ومتسائل هل الإعلان من خلال المنبر فقط يستطيع جذب الضيوف ، وفرحت جداً بالنتيجة وشارك في الليلة الأولى عدد كبير من الضيوف وقدمت فقرات متنوعة (مسرح (السني دفع الله) - معلومات عن الطيور (د. الصادق عوض) - فيلم من إخراج نجدي - غناء (يسري صلاح الدين- عزف منفرد على آلة الأكوديون (ود القريش) - مع المداخلات الجميلة من د . جميل الذي قدم قصيدة ومعلومة وكذلك المذيع الاستاذ / طارق المادح شاركنا بقصيدة جميلة . ومداخلات أبو ساندرا .
المهم المره الجاية القصة القصيرة العميقة شد حيلك ، أما عن موضوع الصور فسأترك التعليق عليه للمتداخلين والحاضرين .

تحياتي أبو ساندرا

لم تكن دقسة ، ولكن حسب معلوماتنا المتواضعة أن مثل هذه المناشط تتطلب الإشارة إليها في مواضع عديدة فالبوست الأول تناول (الفكرة) والبوست الثاني تنالو (المشاركين) والتحفيز ولو دخلت على كل بوست لوجدت زيادة واضحة في المتداخلين ، وهو ما أنجح ليلتنا جداً فامتلأت الصالة المتوسطة بالحضور ما جعلنا ننتقل وبسرعة إلى الصالة الكبيرة .

ومعليش يا خوي بكره نكبر ونتعلم من قدامى أعضاء المنبر وبوردابه الأشاوس كيف نطرح مواضيعنا ، وبالمناسبة حضورك وحضور زوجتكم وبناتكم الفاضلات جمّل المكان وأضفى عليه سحراً (هن بزينتهن وجمالهن وأنت بطول لسانك ومهاتراتك )

بالمناسبة ما وريتنا البحر كان كيف في (سي لاين) يا حدق

عادل التجاني

Quote: فتح بوست تاني في نفس الموضوع نزل فيه كل المعلومات وماكان محتاج لي كده وعمل تشتيت للناس

عليه .. ومنعاً لتشتيت الناس .. وتجنباً لهجوم (عمو أبوساندرا) والإتهام بالبرلمة، حقو نبدأ نتكلم في فقرات الحفل (هنا) دون فتح بوست جديد.

حقيقة البداية كانت قوية ... والمشاركة من الجميع .... والجايات أقوى إنشاء الله

أبو الرييييييييش
صباح الخير

أبو سانرا بيمسك العصاية من النص الراجل محامي بفتش للقضايا ولو ما عمل كده حا ياكل من وين بس إنتوا خلوه ياخد راحته .
أما مسألة فتح بوست جديد أو أن تبدأ المناقشة مواصلة لهذا البوست ، فأعتقد أن الفرص متاحة ومواتية وهنالك حرية آراء وأنا معاكم وأحترم آراءكم وانتظر اقتراحاتكم حتى ننفذها في بقية ليالينا .

اشكر حضورك فقد كنت أول المتواجدين وشاركتني أصعب اللحظات (لحظات القلق) والتي أعقبها النجاح

عادل التجاني