أيأم حلوة زارتنا يوم، نتمنى لو تعود أو حتى تجي ذيها...ممكن تكون أيام جمعتنا بالأحباب والحب الأول و زملاء الدراسة والأهل و بالأصدقاء واللمة في أي مكان أو حتى في منبرسودانيز أونلاين وكانت سبب سعادة للنفس وما أنسى كمان أولاد وبنات الحلال وحتى زوج أو زوجة المستقبل والناس الشفناها صدفة.... ذكرياتها في النفس متأصلة...ممكن تتخللها شوية لحظات لم تنم فيها العين... أو كان فيها روحة في مكان... أو حتى المواصلات فاتت ....الطيارة قامت وما لحقنا الناس ...وكده يعني ....لكن نرجع ونقول برضه أيام حلوة ما بننساها.
ذكريات وثّقنا الكثير منها بالصور...بالرسائل....بالكلام الما بتنسي و مازال وقع أجراسه في الآذان موجودا...أو حتى حفظناها في الذاكرة وممكن نسترجعها في وقت ما وقد يكتفي البعض بالوصف فيقول كما غنى محمد ميرغني... وبعدت عنك ، ولما طال بى النوى ،
بقى لى أسيبك مستحيل ،
تبقى سيرتك هى الكلام
وتبقى صورتك هى الرؤى الحلوة البعيشها
فى صحوتى ، او حتى فى عز المنام
ويبقى اسمك هو الغنا
ياريت نسترجع أيامنا الحلوة وين ومع مين ما كانت بموقف ...بقصة...بصورة... والما بحب ذكر الأسماء ممكن يكتفي بالتلميح فقط .( يعني كل الخيارات موجودة ) مع كل أمنياتي لكم بأن تكن أيامكم جميلة وممتعة ..
وانوا يكون اليوم أحلي من بكره وبكره أحلى من البعده...
أحلى ما في الأيام الحلوة انها ما بتتكرر واذا اتجددت ممكن تكون بنكهة تانية...خلينا نقول نعيش اللحظة بحلوها ونتشبث بصور الذاكرة وننسى انها ممكن تاني ما ترجع.
ما أظن فينا زول ما بيتذكر يوم العيد كيف وهو من أحلى الأيام ، بالذات في السودان لانه في الغربة قلت نكهته قليلاً ونشتاق فيه لعاداتنا السودانية الجميلة.....
يوم العيد والناس متلمة ...رضا الأم ورضا الأب...الناس الجو من السفر...وزيارة الأهل والأحباب لابسين الجديد والأعمام والأهل والجيران بالجلاليب البيضاء...وصينية الفطور والأكل حاااااااار. ..ولوالضحية يبقى الشية بالجمر...والكعك والخبيز...الزعلانين يتصافحوا ...وتصفو النفوس....وصلاة العيد....والمناسبات ( العرس ...العقد..الخ )
وكل سنة وانتوا طيبين
Post: #19 Title: Re: ........... **** أيامـنـــــا الحلـــــــــوة *** ........... Author: معتصم دفع الله Date: 07-04-2007, 10:26 AM
أيامنا في الفؤاد ذكراها أيامنا ..
دا كلام جميل يا سلمى .. هناك الكثير من الذكريات التي تمر بنا ونمر على أيامها بحلوها ومرها تبقى خالدة ونتداولها في ما بيننا .. أحياناً تكون في فترة الدراسة أو في الغربة أو في أمكنه كثيرة ويظل الأشخاص المرتبطين بهذه الأيام هم فاكهتها وقد يمر وقت طويل لم نلتقيهم ولكن يبقون في الدواخل .. أحتاج لتلك الأيام وتلك اللحظات التي جمعتنا بهم وشكلت الكثير في وجداننا ..
أيام حلوة ..... والله كتييييييييييير أيم ما كان الناس قلوبهم بيضاء,أيام ما كان الزول فينا ينوم و ما شايل هموم,أيام الصحبة الما لاقي ليها مكان في الغربة,أيام الحلوة و المرة,أيام الخوة وشيلة التقيلة,أيام المحنة و المعزة,أيام الفردنة والشفتنة,أيام الدراسة و البهدلة, أيام الملح وقدرة الفول و صحن الفتة في الدكان ,أيام الأفراح الما خمج,أيام الضحك و الفرفشة,و أيام و أيام و أيام. كتيييييييييييييييييييييير كتييييييييييييييييير كتيييييييييييير كتيييييييير كتييييير كتييير كتيير كتير كتي كت ك و ابتدأت أيام الغربة و البشتنة
لك أختي الغالية كل الإحترام و التقدير في عصرنا,عصر الإنترنت و العولمة.