Post: #1
Title: المطرة صبـت وحكـومتك انقــــــــــدت!!
Author: هشام هباني
Date: 07-03-2007, 03:39 AM
Parent: #0
هذه الايام نعيش في تكساس الامريكية رحمة وبركة وخيرا وفيرا من مطر الخيرمن مستوى الشكشاكات والرشاشات ومرورا بالنقناقات حتي مستوى (حدها النخرة) والتي هي من فصيلة( المطرة صبت وحكومتك انضبت) والتي تهد البيوت وتجرف الصرايف والقطاطي وتليها اصوات استغاثات ( ابو مروة) ويهرع اهل القري في نفير يعاونون ويساعدون وينجدون بعضهم البعض!
فقد لقنت هذه الايام الصغير الشقي احمد ان يخرج عند ساعة هطول المطر تعبيرا عن الفرح بمقدم المطر كما كنا نفعل ذلك صغارا ان يصيح باعلي صوته في خارج البيت عند الفناء المقابل له فقط بسرواله عاري الظهر والبطن وان يصيح باعلي صوته موليا وجهه شطر السماء صائحا( كنيش كنيش تجيب المطر والعيش والمطرة صبت وحكومتك انقدت)!
فسالني بفضول وبلسان اعجمي مبين: داد ...سنو ياني هكومتك انقدت!؟
فقلت له...الله ورسوله والبشير اعلم وفي داخلي نداء عال يصيح: الحكومة انقدت وــــــــنيطتها انقدت!
|
Post: #2
Title: Re: المطرة صبـت وحكـومتك انقــــــــــدت!!
Author: هشام هباني
Date: 07-03-2007, 03:43 AM
Parent: #1
|
Post: #3
Title: Re: المطرة صبـت وحكـومتك انقــــــــــدت!!
Author: ABDELMAGID ABDELMAGID
Date: 07-03-2007, 04:40 AM
Parent: #2
| Quote: المطرة صبـت وحكـومتك انقــــــــــدت!! |
الناظر ...
الله إجازى محنك ...
قطعت مصارينى بالضحك !!!
دى نكتها من وين ؟؟؟
و ( الطراك !!! ) ليا هسع شنو فى أنصاص الليالى دى ؟؟؟
با زول داير ترمى فينا ( صاقعه  ! ) و لاشنو ؟؟؟
و كمان ما تقول نحن مطرنا و سحابنا و رعدنا هنا فى جنوب فلوريدا بجى زاحف ( بالواطا ! ) الأيام دى !
و الله طريتنا ايام زمان يا الناظر و يا حليل البراءة :
( عيه ... عيه ... بلاد ا أبوى القداميه .. )
( العيش فى السراب ... و المطر فى السحاب ... ترحمنا يا الوهاب ... )
( المطره صبت .... إنضبت ! )
كسرة :
إظهر عليكم يا ناس تكساس السنه دى صليتو صلاة الإستسقا ...
تحياتى للإبن احمد ....
عبدالماجد
|
Post: #4
Title: Re: المطرة صبـت وحكـومتك انقــــــــــدت!!
Author: هشام هباني
Date: 07-03-2007, 05:40 AM
Parent: #3
عارف يا عمدة مرات المخ بكون سلوكو ملخبتة... وفجاة الواحد مرات مع
صوت مطرة امريكية فجاة اقوم واحد من السلوك العريانة دي اقابض ليهو سلك جنبو
وطوالي تولع الذاكرة العجيبة تجيب صور من طنيقة الراس وترجعنا جعزمية سنة لوراء
وتتخيل بعد داااك انك شافع تساكك في ابو الضليل...ابو الضليل ضلل لي بديك قرشين
تخيل شوف قيمة عملتنا زماااان قدر شنو يعني ممكن تدي غمامة الفريني اي ام قرشين شان تضلل ليك..... والله هسع تديها مليونين تجيب ليك كتاحتين!!
|
Post: #5
Title: Re: المطرة صبـت وحكـومتك انقــــــــــدت!!
Author: هشام هباني
Date: 07-03-2007, 04:58 PM
....
|
Post: #6
Title: Re: المطرة صبـت وحكـومتك انقــــــــــدت!!
Author: Alshafea Ibrahim
Date: 07-03-2007, 05:50 PM
Parent: #1
يا عمدة سلام
تعرف أخبار صحف الخرطوم تتحدث عن هطول كميات أمطار خيالية في كوستي وربك وكمان الشمال والأوسط ، للأسف تسببت في إلحاق خسائر مادية كبيرة في ممتلكات الغلابة، وحكومة النيل الأبيض وواليها ومعتمدها حاصرهم الأهالي المتضررين وتم تفريقهم بالغاز المسيل للدموع ؟ أصبحوا بدون مأوى والبوليس مدور فيهم غازات مسيلة للدموع عشان موكب الوالي يتخارج؟؟؟؟؟ يعني مطر وووووووب وجفاف ووووووبين - أها انقدت ولا ما انقدت ؟
مودتي
الشفيع
|
Post: #7
Title: Re: المطرة صبـت وحكـومتك انقــــــــــدت!!
Author: هشام هباني
Date: 07-03-2007, 11:41 PM
Parent: #6
اخوووي االشفيع
سلامات
| Quote: تعرف أخبار صحف الخرطوم تتحدث عن هطول كميات أمطار خيالية في كوستي وربك وكمان الشمال والأوسط ، للأسف تسببت في إلحاق خسائر مادية كبيرة في ممتلكات الغلابة، وحكومة النيل الأبيض وواليها ومعتمدها حاصرهم الأهالي المتضررين وتم تفريقهم بالغاز المسيل للدموع ؟ أصبحوا بدون مأوى والبوليس مدور فيهم غازات مسيلة للدموع عشان موكب الوالي يتخارج؟؟؟؟؟ يعني مطر وووووووب وجفاف ووووووبين - أها انقدت ولا ما انقدت ؟ |
لا اله الا الله اهلنا محصورين بين ميكائيل في السماء وكوزائيل في الارض!
|
Post: #8
Title: Re: المطرة صبـت وحكـومتك انقــــــــــدت!!
Author: هشام هباني
Date: 07-04-2007, 02:27 PM
Parent: #7
..
|
Post: #9
Title: Re: المطرة صبـت وحكـومتك انقــــــــــدت!!
Author: Mustafa Mahmoud
Date: 07-08-2007, 08:21 AM
Parent: #8
***************
|
|