Post: #1
Title: صـــورة خــلال الدفــــن !
Author: omar ali
Date: 07-01-2007, 02:30 AM
Parent: #0
هذه الصورة من صحيفة " الرأي العام " عدد الجمعة 29 يونيو
خلال دفن مجذوب الخليفة ..الملاحظ ان نافع علي نافع قد تحكر
علي يسار البشير بينما النائب الثاني لرئيس الجمهورية
علي عثمان محمد طه...ياربي مش يا هوداك الملطوع وراءهم ولا
داك واحد ثاني؟؟
|
Post: #2
Title: Re: صـــورة خــلال الدفــــن !
Author: Salwa Seyam
Date: 07-01-2007, 02:47 AM
Parent: #1
Quote: علي عثمان محمد طه...ياربي مش يا هوداك الملطوع وراءهم ولا
داك واحد ثاني؟؟ |
آى والله ياهو ....
دنيا... المسكين بقى فى الصفوف الخلفية ..
|
Post: #3
Title: Re: صـــورة خــلال الدفــــن !
Author: elameen
Date: 07-01-2007, 05:22 AM
Parent: #1
يا ريت اتعظوا لهذا اليوم وانه لغريب اتي انشاء الله
|
Post: #4
Title: Re: صـــورة خــلال الدفــــن !
Author: Tragie Mustafa
Date: 07-01-2007, 05:33 AM
Parent: #3
العزيز عمر علي
باقي انت عندك قدرات ومصادر بتنكت حاجات غريبه
فتش لينا يا اخوي لو لقيت صوره ولا حديث لمنصور خالد
باقي قالوا قال العجب في المرحوم في تلفزيون السودان!!
|
Post: #5
Title: Re: صـــورة خــلال الدفــــن !
Author: Ro3ah
Date: 07-01-2007, 05:53 AM
Parent: #4
بيقولوا عليهوا (وراء الكواليس).
|
Post: #6
Title: Re: صـــورة خــلال الدفــــن !
Author: jini
Date: 07-01-2007, 06:08 AM
Parent: #1
الرجل يطيل السفر اشعث اغبر يمد يده الى السماء يارب يارب ومطعمه حرام ومشربه حرام وملبسه حرام وغذى بالحرام فأنى
يستجاب لذلك ؟ )) رواه مسلم
البشير والنافع يفترون على الله بطلب الرحمة والمغفرة للمجذوب!!
جنى
|
Post: #7
Title: Re: صـــورة خــلال الدفــــن !
Author: عمر الفاروق
Date: 07-01-2007, 06:49 AM
Parent: #1
طيب مادام ملاحظتك قوية كده كدي لاحظ كمان في زول واقف قدام البشير زااااااااااتو ..
يا ربي يكون ده منو البقا رئيس جمهورية ؟
الرجل الخفي؟
يا جماعة صورة عادية في يوم دافنة يعني لا ترتيب ولا يحزنون ناس إترصت كده وخلاص ..
تخريمة :
عبد الرحيم محمد حسين والذي يعد الشخص الأقرب للبشير (للذين لا يعرفون هذه المعلومة) هاهو يقف في أخر الصفوف تماماً ..
|
Post: #8
Title: Re: صـــورة خــلال الدفــــن !
Author: jini
Date: 07-01-2007, 07:09 AM
Parent: #7
| Quote: عبد الرحيم محمد حسين والذي يعد الشخص الأقرب للبشير (للذين لا يعرفون هذه المعلومة) هاهو يقف في أخر الصفوف تماماً .. |
عشان ما حافظ الفاتحة!
جنى
|
Post: #9
Title: Re: صـــورة خــلال الدفــــن !
Author: Hussein Mallasi
Date: 07-01-2007, 07:24 AM
Parent: #8
أوعك تكون من النوع البيشيل الفاتحة جهراً !!
|
Post: #10
Title: Re: صـــورة خــلال الدفــــن !
Author: omar ali
Date: 07-01-2007, 01:22 PM
Parent: #1
Quote: Quote: Quote: علي عثمان محمد طه...ياربي مش يا هوداك
الملطوع وراءهم ولا داك واحد ثاني؟؟ |
آى والله ياهو ....
دنيا... المسكين بقى فى الصفوف الخلفية .. |
الاخت سلوي
الصورة بتقول انو فعلآ في عزلة
وكيف ما يكون في عزلة اذا ناس البشير بيعتبروا
المشاكل الهسع هم فيها: ..قوات دولية ما قوات
دولة... والقسم المغلظ...ثم مأزق القبول..وعدم الوفاء
بالقسم....دا كلو بسبب وعد طه للاوربيين في بروكسل
ببلجيكا في مارس 2006 بامكانية قبول قوات دولية بعد
توقيع الاتفاقية مع حركات دارفور.
والمثل بقول: "النفوس كان طابت الاماكن ما ضاقت"
|
Post: #11
Title: Re: صـــورة خــلال الدفــــن !
Author: الطاهر عثمان
Date: 07-01-2007, 01:44 PM
Parent: #1
الصورة اكتر من طبيعية والناس في جنازة امام رهبة الموت حيث لاحاكم الا الله
|
Post: #12
Title: Re: صـــورة خــلال الدفــــن !
Author: عبد الواحد أبراهيم
Date: 07-01-2007, 01:56 PM
Parent: #11
omar ali
نحياتى بعلم الله اننى وقفت طويلا عند هذه اللقطة المعبرة
الذول الاسمو نافع دى بيدافر مدافرة اشان يزيح ود الترابى
(سابقا)على عثمان .
الصورة معبرة عن واقع الحال وهناك احتمال كبير ان يقوم على اسماعيل
العتبانى بفصل هذه المصور لان ( شيخ على ) له ايادى بيضاء على الرآى
العام ( قصة الصراع الشهير بين آل العتبانى ومحجوب عروة, وتدخل بعض
النافذين فى السلطة ... الخ القصة.
|
Post: #13
Title: Re: صـــورة خــلال الدفــــن !
Author: Adil Osman
Date: 07-01-2007, 02:26 PM
Parent: #1
الاخ عمر على
تحية طيبة
الصورة للوهلة الاولى عندها دلالة اسرية وقبلية. بمعنى ان اهل الميت يتقدمون الصفوف فى الدافنة، عند تسجية الجثمان فى الحفرة التى تنتظرهم.
وفيما نعلم ليس هناك قرابة عائلية بين البشير والنافع والمجذوب. ولكنهم يشتركون فى القرابة القبلية (جعليين). وفى نفس الوقت هم قيادات الحكومة من هذه القبيلة.
هل لهذا الكلام دلالات سياسية؟ بمعنى هل هناك صراع قبلى بين افراد الطغمة الاسلاموية الحاكمة؟
هل هناك صراع بين الجعليين والشايقية داخل المؤسسة الحاكمة؟
|
Post: #14
Title: Re: صـــورة خــلال الدفــــن !
Author: عبد الواحد أبراهيم
Date: 07-01-2007, 02:42 PM
Parent: #13
Quote: الصورة للوهلة الاولى عندها دلالة اسرية وقبلية. بمعنى ان اهل الميت يتقدمون الصفوف فى الدافنة، عند تسجية الجثمان فى الحفرة التى تنتظرهم.
وفيما نعلم ليس هناك قرابة عائلية بين البشير والنافع والمجذوب. ولكنهم يشتركون فى القرابة القبلية (جعليين). وفى نفس الوقت هم قيادات الحكومة من هذه القبيلة.
هل لهذا الكلام دلالات سياسية؟ بمعنى هل هناك صراع قبلى بين افراد الطغمة الاسلاموية الحاكمة؟
هل هناك صراع بين الجعليين والشايقية داخل المؤسسة الحاكمة؟ |
Adil Osman
عادل عثمان تحياتى ايضا
ما اعرفه ان البشير لا ينتمى الى الجعليين بل هو من البدرية ان صحة
ما نقلته احدى الصحف الخليجية من حوار مع شقيقه(الذى توفى ).
من ناحية اخرى فان على عثمان شايقى من ناحية الاب ووالدته من البدرية
الذين تزوج منهم والده وسكن فى منطقتهم لفترة من الزمن هذه المعلومة من ابن
خالته ( تاج السر) عضو المجلس التشريعى بولاية البحر الاحمر الذى
اجريت معه حوارا صحفيا عقب عودته من اريتريا حيث آسر من قبل
حركة العدل والمساواة وقوات جبهة الشرق .
يعنى اذا قى قرابة بتكون بين البشير وعلى طه من ناحية البدرية
اما بخصوص لن هناك خلافا بين المجموعات الحاكمة فهذا ما لا يخفى على
من هم بفطنتك.
|
Post: #15
Title: Re: صـــورة خــلال الدفــــن !
Author: إسحاق بله الأمين
Date: 07-01-2007, 02:52 PM
Parent: #13
الموقف موقف عظة واعتبار.
في مثل هذه اللحظات يجب أن ينصب تفكير الإنسان في هذه الحفرة التي هي مصير كل حي ولو طالت سلامته، وأن يستغفر ويترحم على الميت وأن يحاسب نفسه ويكثر من الإستغفار ويتوب إلى الله . هداني الله وإياكم سبيل الرشاد
|
Post: #16
Title: Re: صـــورة خــلال الدفــــن !
Author: omar ali
Date: 07-01-2007, 04:14 PM
Parent: #1
الاخ alameen
| Quote: يا ريت اتعظوا لهذا اليوم وانه لغريب اتي انشاء الله |
ديل ما حيتعظوا حتي يحصدهم الموت او يحصدهم
الشعب....لو بتعظوا لادركوا معني المثل القائل:
" الايام دول"..ولآمنوا بالتدوال السلمي للسلطة
..ولكن الطغاة علي ملة واحدة رغم اختلاف
اممهم وبلدانهم واديانهم..
وهاهو ابن الرندي يبكي سقوط دولة العرب في
الاندلس:
لـكل شـيءٍ إذا مـا تـم نقصانُ --- فـلا يُـغرُّ بـطيب العيش إنسانُ
هـي الأمـورُ كـما شاهدتها دُولٌ --- مَـن سَـرَّهُ زَمـنٌ ساءَتهُ أزمانُ
وهـذه الـدار لا تُـبقي على أحد --- ولا يـدوم عـلى حـالٍ لها شان
يُـمزق الـدهر حـتمًا كل سابغةٍ --- إذا نـبت مـشْرفيّاتٌ وخُـرصانُ
ويـنتضي كـلّ سيف للفناء ولوْ --- كـان ابنَ ذي يزَن والغمدَ غُمدان
أيـن الملوك ذَوو التيجان من يمنٍ --- وأيـن مـنهم أكـاليلٌ وتيجانُ ؟
وأيـن مـا شـاده شـدَّادُ في إرمٍ --- وأين ما ساسه في الفرس ساسانُ؟
وأيـن مـا حازه قارون من ذهب --- وأيـن عـادٌ وشـدادٌ وقحطانُ ؟
أتـى عـلى الـكُل أمر لا مَرد له --- حـتى قَـضَوا فكأن القوم ما كانوا
|
Post: #17
Title: Re: صـــورة خــلال الدفــــن !
Author: omar ali
Date: 07-01-2007, 05:44 PM
Parent: #1
Quote: العزيز عمر علي
باقي انت عندك قدرات ومصادر بتنكت حاجات غريبه
فتش لينا يا اخوي لو لقيت صوره ولا حديث لمنصور خالد
باقي قالوا قال العجب في المرحوم في تلفزيون السودان!! |
العزيزة تراجي
كلهم قاموا بالعزاء
الحركة الشعبية
حزب الامة
الاتحادي الديمقراطي
السفارة الامريكية
حركة مناوي
.....الخ
ولكني اسمي هذا عزاء بروتوكلي..والدبلوماسية
تنطوي علي كثير من النفاق..مثلآ لا اعتقد ان
عزاء حزب الامة يعني ان هذا الحزب عنده
رؤية ايجابية تجاه ممارسات مجذوب الخليفة
لتثبيت اركان دولة عصابة الجبهة الاسلامية
بالبطش والتشريد..
ولكن نحن يهمنا هنا رأي الناس الماشة جنب
الحيطة
مع خالص تقديري
|
Post: #18
Title: Re: صـــورة خــلال الدفــــن !
Author: omar ali
Date: 07-01-2007, 10:25 PM
Parent: #1
| Quote: بيقولوا عليهوا (وراء الكواليس). |
الاخ Ro3ah
المشكلة في انو كواليسهم بقت مكشوفه لبعضعم
كويس..وعشان ابو القدح بعرف يعضي رفيقه من
وين.. تلقي التاني عامل حسابو شديد..عشان كدة
مساحة الكولسة ضاقت امام " رجل الكواليس "
|
Post: #19
Title: Re: صـــورة خــلال الدفــــن !
Author: omar ali
Date: 07-01-2007, 11:32 PM
Parent: #1
Quote: الرجل يطيل السفر اشعث اغبر يمد يده الى السماء يارب يارب
ومطعمه حرام ومشربه حرام وملبسه حرام وغذى بالحرام فأنى
يستجاب لذلك ؟ )) رواه مسلم
البشير والنافع يفترون على الله بطلب الرحمة والمغفرة للمجذوب!!
جنى |
كانت كل صلاة استسقاء يدعو اليها النميري
تنتهي بكتاحة عظيمة تجتاح العاصمة المثلثة
من اطرافها الي اطرافها.
|
Post: #20
Title: Re: صـــورة خــلال الدفــــن !
Author: omar ali
Date: 07-02-2007, 02:41 AM
Parent: #1
Quote: طيب مادام ملاحظتك قوية كده كدي لاحظ كمان في زول واقف قدام البشير زااااااااااتو ..
يا ربي يكون ده منو البقا رئيس جمهورية ؟
الرجل الخفي؟
يا جماعة صورة عادية في يوم دافنة يعني لا ترتيب ولا يحزنون ناس إترصت كده وخلاص ..
تخريمة :
عبد الرحيم محمد حسين والذي يعد الشخص الأقرب للبشير (للذين لا يعرفون هذه المعلومة) هاهو يقف في أخر الصفوف تماماً .. |
Quote: طيب مادام ملاحظتك قوية كده كدي لاحظ كمان في زول
واقف قدام البشير زااااااااااتو ..
يا ربي يكون ده منو البقا رئيس جمهورية ؟
الرجل الخفي؟ |
من البديهي انو الزول الواقف قدام البشير دا الحرس..انت
فاكر لانو الحكاية جنازة ما في حراسة..ديل منتشرين حول
البشير والشخصيات التانية ..تلقاه ربع الجنازة امن.
Quote: يا جماعة صورة عادية في يوم دافنة يعني لا ترتيب ولا يحزنون
ناس إترصت كده وخلاص .. |
طيب... ما دام ليس هناك من ترتيب والناس اترصت كدة زي ما
تجي..ما يكون جنب البشير الا نافع المنافس الاساسي لـ علي
عثمان محمد طه بينما عليوة واقف وراءهم زي اليتيم..معقولة
دي رصة شختك بختك!!!
Quote: عبد الرحيم محمد حسين والذي يعد الشخص الأقرب للبشير (للذين
لا يعرفون هذه المعلومة) هاهو يقف في أخر الصفوف تماماً .. |
تقول النكتة انو في واحد قال للبشير يا سيادة الرئيس
انا شفتك امبارح في الحلم..
البشير قال ليه : شفتني براي وللا معاي عبد الرحيم
محمد حسين؟؟
دا قال ليه..كت براك
فالبشير قال ليه: اكان كدي الشفته داك ما انا
البشير صاح طالع نازل مع عبد الرحيم وما بيرتاح
الا ليه علي المستوي الشخصي لانو امخاخهم فاضية
زي بعض..ولكن علي مستوي الثقل النوعي داخل
السلطة وداخل الحزب الحاكم عبد الرحيم ليس
محورآ...عبد الرحيم من الممكن ان يكون سنيدآ
للبشير باعتباره عسكريآ ووزيرآ للدفاع ولكن
النظام مرتكز اساسآ علي تنظيم سياسي
وعلي العكس .....كلامك دا بيأكد انو الرصة علي
حسب الثقل النوعي لكل شخصية في الصراع الخفي / العلني
الدائر .ولو كانت الرصة زي ما تجي لكان جنب البشير
حبيب قلبه عبد الرحيم
|
Post: #21
Title: Re: صـــورة خــلال الدفــــن !
Author: زياد جعفر عبدالله
Date: 07-02-2007, 03:37 AM
Parent: #1
الاخ عمر علي
على فكرة كنت و أحد الاعزاء نعلق نفس تعليقك في البوست حين رأينا الصورة اول مرة..
انها صورة قد تلخص ما ال اليه حال المجموعة الحاكمة..اذا صدقت التكهنات..
تحياتي
|
Post: #22
Title: Re: صـــورة خــلال الدفــــن !
Author: omar ali
Date: 07-02-2007, 03:41 AM
Parent: #1
Quote: الصورة اكتر من طبيعية والناس
في جنازة امام رهبة الموت حيث
لاحاكم الا الله |
الاخ الطاهر عثمان
حكاية انهم امام رهبة الموت مسألة فيها نظر.
اولآ البشير دا حارب في الجنوب وكان بيجنبط
فوق الجثث المليانة دم
اما ناس علي عثمان وناس نافع ديل معلقين ليهم
زول في مشنقة في نص الخرطوم في نصة نهار
اسمه محمود محمد طه..وقاتلين 28 ضابط في يوم
واحد غير ناس بورتسودان والعيلفون وكجبار
اما النص مليون بتاع دارفور دا كوم براه خالص..
هو فضل فيها رهبة موت يا اخوي...دا كان زمان
وقت الناس كانت بتتعشي رز باللبن وتنام بدري
|
Post: #23
Title: Re: صـــورة خــلال الدفــــن !
Author: omar ali
Date: 07-02-2007, 05:43 AM
Parent: #1
[Quote: B]omar ali
نحياتى بعلم الله اننى وقفت طويلا عند هذه اللقطة المعبرة
الذول الاسمو نافع دى بيدافر مدافرة اشان يزيح ود الترابى
(سابقا)على عثمان .
الصورة معبرة عن واقع الحال وهناك احتمال كبير ان يقوم على اسماعيل
العتبانى بفصل هذه المصور لان ( شيخ على ) له ايادى بيضاء على الرآى
العام ( قصة الصراع الشهير بين آل العتبانى ومحجوب عروة, وتدخل بعض
النافذين فى السلطة ... الخ القصة. |
الاخ عبد الواحد ابراهيم
تحية طيبة
الصورة اكثر من معبرة ..وفضحت بدون رتوش
واقع الخلاف الذي بدأ بسبب القوات الدولية وزعلة
علي عثمان وسفره الي تركيا في مثل هذه الايام من
العام الماضي بعد اول اصطدام له مع البشير الذي
تم ايغار صدره ضده علي اعتبار انه تصرف كرئيس
في بروكسل عندما اعطي وعدآ للاوربيين دون الرجوع
اليه...علي عثمان حالتو تحنن في هذه الصورة....
في ما يتعلق بصحيفة " الرأي العام " لاتنسي ان رئيس
تحريرها هو كمال حسن بخيت ابن عمة البشير وكان
من اشد المنتقدين لعلي عثمان حين سافر الي تركيا
زعلانآ... وكان ايضآ من اشد المحرضين للبشير كي
يجمع السلطات في يده..
|
Post: #24
Title: Re: صـــورة خــلال الدفــــن !
Author: omar ali
Date: 07-02-2007, 08:40 PM
Parent: #1
Quote: الاخ عمر على
تحية طيبة
الصورة للوهلة الاولى عندها دلالة اسرية وقبلية. بمعنى ان اهل
الميت يتقدمون الصفوف فى الدافنة، عند تسجية الجثمان فى الحفرة
التى تنتظرهم. وفيما نعلم ليس هناك قرابة عائلية بين البشير
والنافع والمجذوب. ولكنهم يشتركون فى القرابة القبلية (جعليين).
وفى نفس الوقت هم قيادات الحكومة من هذه القبيلة. هل لهذا الكلام
دلالات سياسية؟ بمعنى هل هناك صراع قبلى بين افراد الطغمة الاسلاموية
الحاكمة؟ هل هناك صراع بين الجعليين والشايقية داخل المؤسسة الحاكمة؟ |
الاخ عادل عثمان
لا اعتقد ان هناك اية علاقة قرابة اسرية بين البشير ونافع من جهة
ومجذوب الخليفة من جهة اخري حتي يكونا في مقام من يتقبل العزاء
الاسري فيه..وكما قال لك الاخ عبد الواحد ابراهيم في مداخلته فالبشير
نصف جعلي حيث انه بديري من جهة ابيه الذي قدم من منطقة الجزيرة
المروية وقطن ديار الجعليين بينما يقال ان نافع علي نافع اصلآ من
جذور بطحانيـة.
ولكن البشير والطاقم الحاكم يستوجب عليهم تلقي العزاء الرسمي علي
اعتبار ان الميت واحد من رموز السلطة المعروفين..وهذا كان يستوجب
بدوره ان يكون النائب الثاني لرئيس الجمهورية واقفآ بجوار رئيس
الجمهورية وهو المكان الذي يحتله في الصورة نافع علي نافع بدون اي
حق بروتكولي لو لا ظروف الخلاف الحالي الذي باعد بين البشير وعلي عثمان
الذي كان محور صناعة القرارات حتي بروز الخلاف حول مسألة القوات الدولية
وبالرغم من ان عليآ حاول بعد عودته من تركيا ان يساير الموجة الغوغائية
بتحدي القوات الدولية التي دشنها البشير والطيب مصطفي ونافع علي نافع
الا انه وجد نفسه خارج اللعبة مقصوص الاجنحة لان من اهداف تلك الحملة كان
تجريد علي عثمان من الكثير من الصلاحيات التي يظنون انها جمعها بيده.
الحركة الاسلامية لم تكن قبلية الطباع ولكن اغواءات السلطة والصراعات
التي تنشأ عن مراكز القوي في نظام شمولي وفي مجتمع قبلي متخلف قد تدفع
الي الاستقواء بابناء القبيلة والاحتماء بهم وخاصة ان شبكة واسعة وضخمة من
المصالح المالية والاقتصادية عمومآ باتت جزءآ من الحراك الداخلي للتنظيم
الحاكم.
|
Post: #25
Title: Re: صـــورة خــلال الدفــــن !
Author: omar ali
Date: 07-03-2007, 05:32 AM
Parent: #1
Quote: الموقف موقف عظة واعتبار.
في مثل هذه اللحظات يجب أن ينصب تفكير الإنسان في
هذه الحفرة التي هي مصير كل حي ولو طالت سلامته،
وأن يستغفر ويترحم على الميت وأن يحاسب نفسه ويكثر
من الإستغفار ويتوب إلى الله . هداني الله وإياكم سبيل الرشاد |
الاخ اسحق بلة الامين
من يحفل بهذه الحفرة يا صديقي
ماذا يفعل المعزون عادة في مكان " الفراش" بين اهل الميت
ولم تمر ساعات علي دفنه انهم يثرثرون عن احوالهم العامة
واحوال العمل والسوق والسياسية.
وماذا سيفعل البشير وزمرته الحاكمة بعد ان يغادروا مكان تلك
الحفرة..سيذهبون ويمارسون كذبهم ونفاقهم وفسادهم والحنث
بالقسم..وقفوا امام حفرة الزبير هل اتعظوا؟؟وشهدوا رفيقهم
ابراهيم شمس الدين يحترق فهل اتعظوا؟؟ علي العكس سمعنا
عن الكثير من المفاسد وتشييد القصور ونهب البنوك عن طريق
ضمانات مضروبة حتي ان اسم المجذوب وشقيقه خواض الخليفة
قد وردا في تلك الاقاويل وتردد ان الخواض استولي علي
ملايين الدولارات من بنك بمثل تلك الضمانات المضروبة.
ذهب واعظ يعظ ذئبآ بان يراعي في الله اغنام الناس ومواشيهم...
فقال له الذئب اسرع ايها الواعظ وعجل في اكمال حديثك فاني
اري في البعيد قطيعآ من الاغنام
واسرع يا حبيبي وعجل في حديثك عن الحفرة..فانهم يرون امامهم
قطيعآ من الصفقات والمضاربات.
|
Post: #26
Title: Re: صـــورة خــلال الدفــــن !
Author: Al-Shaygi
Date: 07-03-2007, 05:40 AM
Parent: #1
أول مره أعرف أنه المقابر والدفن فيها بروتوكولات.
.
.
باكر تجيبوا لينا فيها مزيكة وغنايات.
.
.
الفاضي يحنن ضنب حمارته العرجا.
الشايقي
|
Post: #27
Title: Re: صـــورة خــلال الدفــــن !
Author: omar ali
Date: 07-03-2007, 01:23 PM
Parent: #1
Quote: الاخ عمر علي
على فكرة كنت و أحد الاعزاء نعلق نفس تعليقك في البوست حين
رأينا الصورة اول مرة.. انها صورة قد تلخص ما ال اليه حال
المجموعة الحاكمة..اذا صدقت التكهنات..
تحياتي |
الاخ العزيز زياد جعفر عبد الله
الصورة تفسر نفسها بقوة ولذا فان وصولنا الي نفس الفكرة
ونحن متباعدين جغرافيآ ما هو الا استجابة لحقائف الصورة
ومنطقها..وقد قيل ان من اكبر المشكلات توضيح الواضحات..
شكرآ زياد..مع خالص الود
|
Post: #28
Title: Re: صـــورة خــلال الدفــــن !
Author: omar ali
Date: 07-03-2007, 09:35 PM
Parent: #1
Quote: أول مره أعرف أنه المقابر والدفن فيها
بروتوكولات.. باكر تجيبوا لينا فيها
مزيكة وغنايات.. الفاضي يحنن ضنب
حمارته العرجا. |
تعيش كتير تشوف كتير تعرف كتير
رغم ان المثل يقول:
"العلم في الكبر كالنقش في الحجر"
|
Post: #29
Title: Re: صـــورة خــلال الدفــــن !
Author: tmbis
Date: 07-31-2007, 08:12 AM
Parent: #28
إنت الظــاهر لي يا  .. اسلوب السحل الخفيف ما بينفع معاك .. عايز اسلوب السحــل .. مع التعبئة في علب ( صلصة ) .. يلالا كدي لحدي ما جعفــر بشير الملغب بي أبو آمنة يجينا .. نقوم نلعب لعبة صغيرة خلينا نسميها لعبــة ( الفوتوشوب )..
تعال كمان يا مرتضى جعفــر اعترض لي في العنــوان دا ... وقول لي بفتكر إنو عنوانك بيخالف المادة طلطاشر من الإعلان العالمي لحقوق الإنسان .. وأعمل لي فيها ( نيتشة )..
يلالا أنــا بديك صورة ومعاها لنكات .. يلالا تجي تشرح لعزيز بشاشا القاري ده الحاصل شنــو بالضبط .. وبالمرة تكلم معاك ( شلة يخس ) عن الحركة ( القردية ) العملتها إنت ( وقشيت خشمك ) ..
لو ما فتحت خشمك ده ونطقته .. إنا متضطر اعمل استدعى رحيم جدا .. لاحظ رحيم دي عامله كيف .. لي كل الناس الكانت بتزغرد ليك في البوست ده .. وإنت عارفهم كويس .. وللاسف الشديد .. والأسف الشديد جدا جدا .. ما جــو قالو ليك الكلام ده عيب .. اسحب الصورة واعتذر عنهــا لانو زي الحركات دي بتضر بالقضية .. وبتخلق فجــوة واسعة جدا .. يختلط فيها حابل الصدق .. بنابل تسلق القضايا والكسب الذاتي ..
قول واحد:
صور من الخرطوم الجديدة
قول إتنين:
لو فى ضمير يحس او يوعى !!
..
من هــو / من هي / من هم .. الذين يكتبون بهذا ( اليوزر نيم )
|
|
