سودانيات يدخلن امريكيا مهربات عن طريق المكسيك الوعر

بالامس اتصلت على صديقى الذى يسكن تلك المدينة الامريكية البادرة بعد ان سمعت فى الاخبار بان مدينتهم تعرضت الى عاصفة جليدية استمرت يومان لاطمئن عليه و اخبرته بالخبر الثانى من نشرة الاخبار المحلية والذى كان غريب بعض الشى و هو ان السكان المحليين فى بعض مدن اريزونا و التى تبعد من المكسيك سويعات بدوا فى تكوين مليشيات و فرق لدعم حرس الحدود فى حراسة الحدود من المتسللين و عصابات التهريب و الراغبيين فى الدخول لبلاد العم السام بحجة ان المهاجرين الجدد اخذوا منهم الوظائف واصبح فرص حصولهم على عمل ضئيلة بسبب قبول المهاجرين الجدد لاى مرتب .
فاذا به يخبرنى بان واحد سودانى من مدينتهم جاب عروسه عن طريق المكسيك بعد ان ضاقت به كل السبل لدخولها بالطرق العادية بالاضافة الى صديقتها التى قدمت للاستقرار مع اسرتها الذين هاجروا الى امريكيا بعد فوزهم باللوترى ...و وبما اننى اسكن اريزونا و اعرف وعورة الطريق و خطورة الرحلة و موت المغامرين فى الطريق,فقد سالت نفسى هل السنوات الماضية غيرت مفاهيم اهلنا لدرجة انو يخلوا بناتهم يغامروا مغامرة ذى دى .....غايتو فى زمنا لو البنت قالت ماشه تقرا فى مصر اهلها عندهم فيه كلام!!!!يا اخوانا ممكن واحد يورنى الحصل شنو لاهلنا الطيبين؟

أبوبكر
يبد و
أنك
طولت
جدا
من
السودان
ياحبيب

أصلو الحصل يا بكري اسكت سيبو
(والصقر ان وقع كترة البتابت عيبو)
وكبيرنا الكان زمان بنهيبو
في ناصية دارو شاف تعذيبو
والشيخ انحبس واتحزمت كتاتيبو

رياح الخماسين الهبت علينا هبوبة
قلعت ساسنا وجات العروش مقلوبة
والمعيط الدودر يابومروة ساعة الحوبة
كتح للتراب نده لي جميع عروبة
كان الشوف تشوف كم من ديار مخروبة

أصلوا الحصل يا بكري أسكت خله
(والصقر إن وقع في كترة البتابت قله)
وكبيرنا الكان زمان بنجله
في ناصية دارو اليوم يلاقيه ذله
والشيخ اتربط وحيرانه قعدو محله

رياح الخماسين الهبت علينا قوية
قلعت ساسنا وفكت المربوطة والمحوية
المعيط الدودر والنويس ملهية
كتح للتراب يابومروة يابوروية
في لجة الفزعة السادة باب الجية

يابكري ماتخاف اهلك بخير...طالما احنا وانتم ومثلنا ومثلكم كثيرون...

زى ماقال محمد الامين انك طولت من السودان يابكرى واتمنى لما نحتفل بالعيد الرابع للمنتدى لاتلجمك الدهشه والاحباط، حكايات وقصص كثيرة يشيب لها الرأس، الموضة الجديدة الواحد يلز زوجته قدامه، تأخد اللجوء وبعد فترة المعاناة الاول تمر يجى الزوج
حكايات يا زمن

ام واصل

في القصه بتاعتك دي يابكري الرجال البرضو انه زوجاتهم ديل يجوا بالطريقه دي تفتكر ماهم سبب زاتهم في الحصل ده
يعني الموضوع ما الناس القاعده في السودان براهم ...لالالا
بصراحه كميه من الاحباط من القصص الواحد بعيشها ولا البيسمع بيها عن البلد والدنيا ما اتغريت ولا حاجه السودانين هم الاتغيروا .
ولسه ياما نشـــــوف ... ربنا يتولانا برحمته غايتو

لا حول و لا قوة الا بالله و إنا لله و إنا اليه راجعون
أنا برضي الظاهر طولت من البلد .. و قبل كم يوم كده دخلت على غرفة من غرف البال توك قلت اسمع لي شوية دردشة سودانية .. و كان الموضوع عن هذا الذي تتعجب منه يا اخي بكري .. تهريب و هروب و اوراق مضروبة و اشياء لا علم لي بها كاد يشيب لها راسي لو لا انه اصلو شايب من المتوسطة .. و لم استطع المواصلة

الزعيم بكرى

صرحت هنا قبلا باننى داخل امريكا داخلها عن طريق المكسيك عن طريق كندا او حتى عن طريق كونتينر فى باخرة.. لكن لم اتصور ان تجازف بنت وعروس كمان والله انا قايل كلامى خارم بارم والناس حاتقول خليه يحلم والحلم مجانا... عروس تدخل عن طريق المكسيك تهريباً ..
لقد شاهدت فيلما عن اولئك الذين يحاولون الدخول تهريبا وكيف يعانون من الوسطاء اولا واللصوص والشرطةالامريكة التى يجدونها داخل كل شجيرة او خلف كل حجر ..

حقا المسألة خرجت عن نطاق المعقول وحديث الاحباب عن السودان بصراحة يصيب الانسان بالاحباط ونحن الذين نعد العدة للعودة النهائية الطوعية والاستقرار هنالك كما كانت تدعو الاخت الاستاذة تماضر فماذا اصاب البلد يا ناس ؟؟؟
حتى اهلك يقولوا ليك ياخى ما تجى احسن ليك ؟؟؟
فى عجالة تغضب من قول اهلك وانت الذى تحمل لهم شوق العمر كله ولكن حديثكم يؤكد ان شىء ما يحدث هنالك ونحن فى الخارج نشاهد سهرات التلفزيون وحسنوات احنا وانتو ونظن انه السودان الحديث ..

لك الله يا وطنى
ارجو من ناس الداخل المزيد من التوضيح عما يجرى

مع تحياتى للجميع

A Sudanese wife wants to join her husband in America and a girl wants to join her family there.

Obviously they have tried the official channels but they didn't succeed. And probably they have thought about less dangerous ways to join their families. Mexico is the only country from which you could enter USA by land. Canada is far difficult. From Cuba it is the sea and the dangerous boat journey.

The wife and the girl are desperate to join their families. they have waited for months or even years to do so. And Sudan is forcing people to leave.

It was a dangerous journey to be had by 2 Sudanese young women. May be it was their first time to travel abroad, let alone in this way.

I praise their courage. and their strong will to join their families despite the risk of the journey.

We hope that the circumstances which force people to leave their country and risk their lives, would change.

Some time in the future we will read that 2 American or Mexican women risked their lives to join their immigrant families in Sudan, by walking through the desert and swimming in the nile among crocodiles and eating kisra and waika!!!!!!!!!!!

الحبيب

لا يغير الله ما بقوم حتى يغيروا ما بأنفسهم

لقد تغيرنا نحن إلى الأسواء لذلك جرت علينا سنة الله

نعيب زماننا والعيب فينا وما لزمان عيب سوانا

اللهم رحماك

EXORCIST

تعرفوا الموضوع طبعا مثير والطرح قوي وجديد علي بعض الاخوان بس حاجه لازم الناس تعرفه .... اولا المتطلبات اصبحت ملحه وما بقصد الضروريات اقصد الكماليات الاصبحت من الضروريات بالاضافه للقصور والعربات والشركات والوكالات والدولارات طموح جامح اخطبوطي ويمكن فينا الكتير البعرف مجتمع المدينه ومدي التنافس والبوبار الفاضي وناس فلان وعلان والموضه من بداية الثمانينات امريكا وبذكر كل الجيل البعدي لم يفكروا في دول الخليج وفكروا طاخ طوخ في امريكا وسمعنا العجب العجاب عامل في محظه بنزين وعامل ما عارف وين علي وزن عامل تربية مواشي والهجره المعاكسه ورواسبه والله الناس اصابه نوع من الهلع وذاك الطموح الجامح المتوحش وكمان ما ننسي الخوف من الخدمه للشباب الاصبحت طارده لفئة الشباب وهناك ايضا الصوره التانيه للعمله في الناس الناجحه شديد في حياته العمليه في دول الاغتراب وانعكاسات ذاك النجاح حتي في قرانا البسيطه ... ؟ معليش ياشباب يمكن اكون طلعته من حكاية العروس الدخلت اميركا تهريب معرضه نفسه للمجهوله بمصادقة العريس ويمكن الاهل كمان انابحاول افكر بصوت عالي وابحث عن اجابه مع اخونا قرشوا .... وردي المتواضع عليك يا اخوي قرشوا والله البلد فيها خير ما تتصوره وتنميه مطرده وزي ما فيها ناس مرتاحه تقول لامريكا ودول الخيلج شنو اكيد فيها ناس تعبانه واقصد بالناس التعبانه الناس العايشه بطريقه تقليديه زي ما عشناها في السنوات السمحه اقصد حياة البساطه والتكافل........ وهولاء ما قادرين يواكبه الحاصل في الناحيه الاقتصاديه واكيد هم ضحايا النقله الحصلت في البلد بقدر التطور بقدر المتطلبات الجديده والبلد بقت زيها وزي اي مدينه محررة الاقتصاد يعني لازم تكون قادر علي دفع فاتورة الخدمات ويمكن ناس امريكا يكلمونا عن فواتير الخدمات البتجي من تحت باب الشقه وذاك الثقل الشهري الحاصل والمرهق للدخل وبتذكر في بداية الثمانيات وانا قاعد علي بار في فندق شيرتون في سان لويس وبتكلم مع الاميركيه السوداء وعرفه منها بتعمل في ثلاث وظائف مدرسة موسيقه وشنو ومنها الاخيره يعني فوق 18 ساعه في اليوم وبفهمي في ذاك الوقت للامور هي محاوله مستميته للم الفكه الخ .... تصورا كان ردها يادوب انها قادره علي دفع الفواتير الشهريه وحياة عاديه وسط .... يعني شغل متواصل علشان حياة وسط ياريت برضو نشتغل بنفس الصوره والقدر في البلد واكيد حيكون الحال مقبول والا حنكون عايشين في الهامش وين ما كنا واكيد في ناس كتيره بتفكر في كل شي علشان يعشون المدينة وحياة المدينه الي اقصي حد وهنا تاتي التكلفه العاليه والمافي طريقه نغطيها براتب عادي وكده يعني يااخوي الاستاذ قرشوا علشان ترجع نهائي وما تعيش مزلة الحوجه وفارق المستوي المعيشي ما بين دول البترول وبلدنا الحبيب وخاصتا حياة (البذوره) الخ لازم الواحد يرتب الامور كويس ويقبل ببعض التنازلات اما عن الاخوان العايشين في شتاتا الارض يمكن يكون قادرين علي تلبية متطلبات الحياة المدنيه باحلي صوره بس ياررررررررربي مقابل شنو .... اكيد مقابل نواقص اخري ومنها التنزلات البنقدمها بغير خاطر ..... اها المعادلة اصبحت صعبه بان تعيش حياة معتدله وسط اهلك واحبابك وعزوتك والا .... تكون مواطن من الدرجه الماعرف شنو............. في بلد الشتات وهنا انا بلوم ذاك الزوج واهل البت لانقيادهم وراء الحلم لدرجة القفزه الانتحاريه تلك والا رايكم شنو ولكم مني كل الحب والتقدير وربنا ييسر الامور واتمني من كل قلبي للكل بالعوده لارض الوطن واذا ما عشانا .... عشان الاجيال التانيه والثالثه والا الضياع ..... الضياع في العالم الواسع ..... اخ يا بلد

نقول شنو يا بكري غير الله يجازي الكان السبب
وبس

Adil Osman
salam

Quote: Some time in the future we will read that 2 American or Mexican women risked their lives to join their immigrant families in Sudan, by walking through the desert and swimming in the nile among crocodiles and eating kisra and waika!!!!!!!!!!!

هيهيات هيهات لا اميركان لا مكسيكان براغبين ان يدخلوا وكرا
لا باس الحلم مشروع لكن ما قدر دا
لك الود

الاخ الفاضل بكرى
والله طرحت موضوع جزء وأردت به الكل لانو التغيير فى كل شى ْ
بداية لااريد ان اظلم بعض من الرجال والنساء ولكن بكل اسف التغيير ليس تغييراً شكليا بل جوهريا فى اخلاقنا السودانيةالسمحة والله سألت نفسى مليون مرة لماذا تغير كل جميل فى نفوسنا الكرم ... الأخلاق ... الانسانية ... الطيبة ... المحنة .. والمحزن حتىكراتنا خدشة. والله انا بخجل مش عشان انا سودانية ولكن من التصرفات التى لاتشبه رجالنا ولانسائنا كسودانيين واريد ان اقول
نعيب زماننا والعيب فينا..........وما لزماننا عيب سوانا
والوضع مؤلم لو كنت جعلية او غيرها واقول مهما تكون الظروف شنو فى خطوط لانريد ان نتجاوزها ليس خوفًًا ولاتخلفاً بل حفاظا على ً عاداتنا وتقاليد نا التى اتمنى ان تظل سمحة فى نفوسنا على الاقل نحن السودانيين
مناشدة لكل ود بلد وبت بلد بحب وبتحب البلد يحافظوا على السودان بخيره بشره مالينا غيره جوه الجوه فى عيونكم وانتو فى عيون امدر
الأمدرمانية

والله يا بكري انت فتحت باب يقلب المواجع ويفتج في جراحات ماليها حد ولاني واحد ممن يطلق عليهم لاجئ بلدان الشتات ولاني من المهتمين بالمسائل المتعلقه بحقوق الانسان فانني اختزن في ذاكرتي الكثير من الوقائع تصبح امامها القصة التي ذكرتها مجرد كسرة في لحن جنائزي
وان كان تلخيص اختنا عشه بت فاطنه للموضوع بعبارة الله يجازي الكان السبب يشفي بعض الغليل فان ماحفزني للكتابه هو ما ورد في تعليق اخونا وليم اندريه والذي يحتاج الي رد تفصيلي طويل ولكن ساحاول تلخيصه في بضع نقاط
1ماذا تقصد يااخي بالضروريات التي اصبحت كماليات هل تعتقد ان تسعون بالمئة من ابناء شعبنا يمتلكون الحد الادتي من الضروريات المتمثله في المسكن الصحي الغذاء الكساء العلاج التعليم ثم رغم ذلك تجدهم كما تصفهم يلهثون خلف الكماليات من قصور وعربات وشركات الخ واذا افترضنا جدلا بصحة ذلك فهل هذا الهلع والتكالب علي ملاذ الحياه ونعيمها نتيجه لخلل جيني في التركيبه الوراثيه لجيل الثمانينات وما بعدها ام انه محصله لظروف موضوعيه متعلقه في اغلبها بانعدام الفرص المتكافئه لسوء توزيع السلطه والثروه ان من تتحدث عنهم يااخي هم نسبة العشرة بالمئه اولئك الذين استباحوا كل شئ بما في ذلك السودان الوطن الواحد
2 لست من المبهورين بكل قيم ومثل المجتمعات الغربيه واعتقد ان هذا راي الغالبيه العظمي من المنفيين والمشردين ولكن علي اية حال هذه قيمهم ومثلهم واختياراتهم ولكن ما لانستطيع ان ننكره انهم وفروا لنا ملاذات امنه عندما عز علينا ذلك من ذوي القربي وهو ظلم اشد مراره كما اظنك تعرف
3 اما بخصوص كلامك عن ان الاقتصاد قد اصبح محررا مع تحفظي علي مفهوم هذا النوع من التحرير فلماذا لايتوفر الشق الاخر من الحريه واعني بذلك الحريه السياسيه وهي من الركائز الاساسيه لوجود نظام ديمقراطي تتوفر فيه كل الحريات المدنيه والسياسيه حرية الفكر والتعبير والمعتقد وحرية الصحافه والاجتماع والمشاركه في الانشطه المختلفه وحرية التنقل داخل السودان وحرية السفر الي الخارج وحق الهجره ولكي تتوفر ضمانات قانونيه لنمارس الحريات اعلاه يجب ان يكون ذلك تحت مظلة قضاء مستقل كذلك لابد من احترام انسانية الانسان وحرمة مسكنه وعدم تعرضه لاي نوع من انواع التعذيب والمعامله غير الانسانيه وضمان حقه في محاكمه عادله وعلنيه
اذا توفرت هذه الاسس يااخي فلا اعتقد انك بحاجه لدعوتنا للعوده لبلادنا فهذا حلم اي انسان سوي ان يعيش بين اهله واحبابه

مع تحياتي ومودتي

الحبيب عكاشه ... بتعلقي ذاك اتفق معاك باني اندفعت في اتجاه معين ... اي العمل العمل والاخلاص فيه حتي نجني ثمار ذاك الجهد حتي في قرانا الصغيره ....التحرر الاقتصادي بصرف النظر عن سياسة الاوطان اعتقد انها موجه عاتيه تاخذ كل شي امامها شئنا ام ابينا وانظر الدول من حولك .... اما السياسيه .... وحقوق الانسان وتلك الشماعات التي نعلق عليها فشلنا في الحياة العمليه اقول لك انا ليس لي اي لون سياسي ولا علاقه لي من قريب او بعيد بالسياسيه وهذا منهج وقناعه انتهجتها وانا في سنين حياتي الاولي ... تجدني اقف في الصف مهما طال في انتظار دوري في تقضيت حاجتي احب وطني وابناء وطني واغار عليهم واتمني ان اري جهد جميع ابناء الوطن الغالي في تلك الارض السمراء بدل من اللهث وراء قشور الحضاره وتلك الكلمات الرنانه التي لا توجد حتي في تلك البلدان المتقدمه .... حقوق الانسان اي انسان.... انسان العالم الاول والا العالم الاخر هناك الكثير .. ومع ذاك لا الوم من اتخذ الهجره ملاذ امن او وسيلة رزق لكل منا ظروفه والذي اتمني ان اراه في ابناء بلدي الحبيب خطه محددة المسار تصطحب الهجره والعوده في سنين معدودات وان لا نسمع اني لي 40 سنه او عشرين سنه وما عارف لمتين العوده اقول ذلك والالم يعتصرني وانااعرف الكثير من حالات الضياع في بلاد الغربه الواسعه والله المستعان

Ya Bakri---Khaf allah ya ragoul.

Are we crying here because (a Sudanese woman has done some act that was reserved only for a man to do)....or are we crying because "al3aza" can do even what "a man CAN NOT DO"?

Kostawi

والله ياريس بكرى
ذكرتنى ايام بنقدم لللوترى بنات واولاد فى ديار الغربة ولما يجى شهر 10 تلقانا نتسابق على صندوق البريد مش عشان يطلع لينا نحن لكن لو طلع لواحدة من زميلاتنا تلقى الناس وقفو ليها صف عشان يطمنو السفر معاها بعقد كمان شنو ليك
وتسلم ياريس

Kostawi
i did not get your point!

الأستاذ بكري تحية طيبة
صدقني ياعزيزي السنوات العجاف الأخيرة أحدثت تغيرات كثيرة مؤلمة في السودان والمسكوت عنه ليس باليسير نسأل الله السترة الم تسمع بقصة القط السوداني الذي فاز بسباق المارثون بفارق زمني كبير رغم هوانه وهزالته مقارنة ببقية القطط وحينها عرض احد الأثرياء شرائه بمبلغ ضخم متسائلآ عن سر هذا التفوق فأجابه صاحبه السوداني وبراءة الأطفال في عينيه (في الحقيقة ده نمر لكن من ما جو الجماعة ديل كشة وبقي كدة) وأسوأ ماتقلص فينا إحساسنا بالعيب وحقيقي إنت طولت كتير من السودان رد الله غربتنا جميعا وغربة من في الداخل وهي الأمر

الاستاذ بكرى

لك التحايا

ياخى فى داعى تخلينا نعلن شكنا فى ما نسميه القيم والاخلاق السودانيه,وهل صحيح
هى موجوده والله اصلا بسيطه وضاعت بسبب الكبت, والظلم و الطغيان والحاجه,والفقر؟
فى مدينتنا واحد وقع ليه لوترى جاب معاه بالتزوير عروس قريبه والتلاته مبسوطيين انهم دقسو الخواجه وهاك ياعوازيم وزيطه, وزمبريطه
اخر ارسل300$ السودان جاتو شهاده جامعيه مزوره كما تفعل مجموعه مقدره من الشباب بس طلعت بكلاريوس فى الطب ولم تخدم اغراضه
وقصص وحكاوى تدى ربك العجب اهونها
التهريب الذى ذكرته
الموضوع كبير يا ريس

لا يجبرك على المر إلا ألمر منو
في مرة كنت أغادر الخرطوم ، وأتجه نحو إكمال إجراءات الجوازات ، فجاءني أحد أقربائي المودعين وقال لي أن أمك تبكي بحرقة ولا بد من أن ترجع إليها ، رجعت دون تردد ، وجلست إلى جانبها وقلت لها إذا كان هذا حالك فسأترك السفر وأهجر الغربة، فما كان من أمي إلا أن توقفت فجأة عن البكاء وقالت لي ( أمشي يا ولدي ربنا يعدل عليك وين ما تقبل ، انت كان قعدت هنا ديل كلهم منو البعيشهم )فودعتها وانطلقت تحفني دعواتها
وبعد سنوات من هذا الحادث تم الاستغناء عن خدماتي لصالح أحد مواطني البلاد التي أعمل فيها ، وبدأت أفكر في البديل ولم أجد وفي هذه الفترة توفي والدي يرحمه الله ، فعدت للسودان لتقبل العزاء وترتيب حال البيت بعد غياب الوالد، وقد شرحت الوضع لأهلي واقترحت عليهم أن أعود نهائيا وأظل بينهم ، وتوقعت ترحابهم بذلك ، لكني فوجئت بأن لا أحد يؤيد هذا الاتجاه ، فعدت إلى غربتي وما أزال

يعرف الاخوة المقيمين في السعودية أن تهريب القادمين للعمرة والحج أمر عادي ، ويتم ذلك عن طريق سائقي الشاحنات وعن طريف البدو الذين يسلكون طرقا صحراوية وعرة ، وهناك سجن يسمى الترحيل وهو يكتظ بالسودانيين
ونحن لا نعيب زماننا لأننا نعي السبب والزمان ليس له يد في ذلك ، كما أن العيب ليس فينا إنما هو فيهم
جاءونا بكل أدوات القهر والظلم والنهب والسرقة وحما أنفسهم نظريا بالدين وعمليا بالسجن والتعذيب والنفي والتشريد لكل من قال قولة حق
إن عاد هؤلاء إلى محلهم الطبيعي فسنعود إلى وطننا وسنسترد كرامتنا ولن نسعىأبدا للعيش في المنافي

الاخ بكرى والاخوة الاعزاء تحياتي

طبعا الموضوع مهم جدا

حقيقة تردي الاوضاع فى السودان بسبب حكومة البشير الفاشلة لا يكون مبرر لمثل هذه التصرفات باي حال من الاحوال. لا اتخيل وجود رجل سوداني تسمح له نفسه بان يترك زوجته او اخته بان تغادر ارض السودان بهذه الطريقة المهينه وغير المحتشمه فى شي. والشي الذي يدهشني اكثرمن خروج النساء بهذا الشكل غير المحترم، هو محاولة بعض الاقلام لتبرير مثل هذه التصرفات بترديد عبارات مثل ايه الجابرك على المر غير الامر منو، دا كلام شنو يا جماعه اها الوضع زي الزفت فى السودان وحكومة البشير ضيقتها علينا جدا جدا والمعيشه اصبحت جحيم عديل كدا. اها دا مبرر يخليني اقول لبنتي او زوجتي او اختى يلا يا بنت اتفهلوي كدا وجازفى كدا وخشي لينا امريكا او كندا
او يجيك واحد يقول ليك الكلام دا مزعلكم عشان قدروا عليه البنات!!!!
والله منطق زي دا لو تم اعتماده وترديده فى ظل الظروف التى يمر بها السودان فى الوقت الراهن نقول على بناتنا عليهم العوض وعلى الرجولة السلام.
يا هؤلاء اتقوا الله فى بناتكم وزوجاتكم وبطلوا الفلسفة الفاضيه دي، بنت تطلع من السودان بهذه الطريقة اقل ما يمكن وصفها به انها غير محترمه نهائي وكذلك ولى امرها ليس
فيه شي من الرجولة. وبعدين الناس البتنظر دي هنا فى البورد معظمهم مقيم فى الخارج
وشايفين البحصل من البنات المقيمات بمفردهم فى الخارج، فهل يرتضي احدكم لاخته او زوجته ان تعيش بمفردها فى دول الشتات هذه بالرغم من تردي الاوضاع بسبب حكومة البشير الفاشله ؟؟؟

السنجك السلام قدر عدد شلوخك
يا أخوي كدي روق المنقة ما ينطقي ليك عرق بعدين أنا لمن قريت ردك قلت قطع شك السنجك ده لسة قاعد في البركل أنت يا شقي مدفون وين طبعآ ما حا أقول ليك تعال هنا أخدلك معانا أيام عشان ما تقولي دي بلد خواجات دحين آخوي أمرق علي الخرطوم ونصيحتي ليك شيل معاك ترمستك الت الشاي الشقلاني دايراله قعدي00

والله يا جماعه انا ماعارف الناس مستغربه في شنو في الموضوع دا ؟ ..الله يجيبكم البلد دي وتشوفو المراء بتسوي شنو ؟؟؟؟؟

وتاني بقول للسنجك دا امشي اعمل ليك عملية تجميل وزح الشلوخ بتاعتك دي لانو شكلك انت بقيت ما سوداني ..لانو ما جايب خبر للبحصل في البلد دي

والله يا جماعه انا ماعارف الناس مستغربه في شنو في الموضوع دا ؟ ..الله يجيبكم البلد دي وتشوفو المراء بتسوي شنو ؟؟؟؟؟

وتاني بقول للسنجك دا امشي اعمل ليك عملية تجميل وزح الشلوخ بتاعتك دي لانو شكلك انت بقيت ما سوداني ..لانو ما جايب خبر للبحصل في البلد دي

الأخ السنجك
لك التحية
يا أخي انت بتفترض أنو أي بنت في السودان لها عائل وولي أمر ؟ وأنا أقول لك أعد التفكير في هذا الموضوع ، ثم أن عادات السودانيين ليست كلها واحدة وأن النظرة إلى المرأة ليست متساوية عند كل السودانيين . كما ان هناك من البنات ممن يتمردن على كل القوانين والتقاليد ويفعلن ما يرينه مناسبا لهن ، وإلا لما كان هناك شخص في هذه الحياة يقوم بفعل شي لا يتماشى مع العادات والتقاليد ، وهناك من يجد أنه عاجز عن توفير لقمة العيش لنفسه وأولاده وتتصدى ابنته لهذا الأمر ، وسع نظرتك ووسع صدرك
أم أنك أيضا ترى أن هذا شغل خم؟

يا اخي موقف لا استطيع وصفه، عندما تقرأ هذا البوست الحزين بينما تستمع للصوت المشبع بالحزن الدفين لحنان النيل...
أعتقد جازما اننا جيل سيدفن معه جبال أحزانه، فمنذ الميلاد، لم نهنأ بوطن نسجنا له المستحيل فى خيالاتنا. وشب جيلنا عن الطوق وهو يرى الوطن يتساقط حجرا حجرا والنخاسة يلتهبون كل فرصة ليغرزوا فيه أبر الشقاء والمرض والبوءس...
وطن لم يعد يسع احلامنا، فتشرد ابناوءه فى اركان الدنيا وخلق جيل جديد لا يعرف عن الوطن حتى اسم رئيسه سارق السلطة...
انه واقع لا يتحمله من كان يحمل ضميرا حيا...

الأخ العزيز بكري
لك التحية والتقدير ، الحصل كثير .. وقالوا الجمل كان وقع بتكتر سكاكينوا .. وهاو الجمل وقع .. لكن يا أخوي با بكري الزمن قادر يرجع الانكسر .. طاما يوجد وطن فيه ناس لسه بتعيش على زمن لا بتريد تغيرو .. اصلوا طبعك يا زمن لا بتريد تغيروا ..
وأه وأنا كلي آهات .. دا زمن غريب بتطر فيه زوجة أخونا ياسر من الطائرة وما فيش واحد أو اي راجل - زي ما سبقني أحد الأخوان أو الأخوات في ذلك - في الطيارة بيفتح خشمه ولا يقول ياجماعة الكلام دا عيب أو غلط .. دا زمن إن شاء الله يا بكري ربنا يورينا ليه مرة تانية وإن شاء الله نعود لأيامنا الحلوة والنخوة والشهامة السودانية والكرم السوداني الأصيل .. ديل ما دخلوا الناس في نفق ضيق وخلوا تفكيرهم في شئ واحد التشريد من السودان .. والتحية للأخواننا وأخواتنا الصامدين بداخل السودان ، فلهم كل التحية والتقدير ،،،

الاح ود قاسم

ياخ ارجوك ما فى داعي لاستخدام الفاظ رنانه وتطلق فى غير موضعها هكذا. اي تمرد عن العادات هذا التى تتحدث عنه هنا، وهل اي عادات وتقاليد بتمردو عليها ياخ التمرد دا ما خشم بيوت فى عادات بها من السؤ ودي يجب التمرد عليها وبل القضاء عليها كمان. والان هل ترى خروج بنت والخروج بهذه الطريقة ولبلاد الشتات مهما كانت الدوافع نوع من التمرد المطلوب؟؟؟
يا ود قاسم ارجوك عندما تستخدم عبارات ضعها فى موضعها ولك الشكر

الغريب كل الناس تتكلم عن الاخلاق
ليه مافى زول شاف ان فى الدخول الى امريكا بهذه الطريقة خرق للقانون و ايضا اذا تم القاء القبض عليهن بعد هذه المجازفة
سوف ترمى فى السجن
وتعانى الامرين
وكمان لو بقت حامل وعايزة تلد
كيف حتمشى المستشفى لو هى قاعدة بصورة غير قانونية؟
امريكا هذه لا ارى سببا لان يتهافت الناس عليها
لدرجة خرق القوانين والخروج عن الاعراف
لاننا لمان نمشى هناك بنسكن فى شقق الرصاص يخش بى جاى ويمرق بيجاى
ولمان تطلب الاسعاف ما بيجيك واذا طلبتا تكسى ما بيجيك
وتجى ماشى فى الشارح باليل يتحوطنك بنات الليل
لانك كلاجئ لازم تكون تحت حزام الفقر
تسعى من صبحك لمسائك دون جدوى ولا تستيطع الخروج من انشوطة الفقر هذه
عدد من الرجال بعد كسروا زجاجة السمن مشو لزجاجة الخمر وانا بعرف نسوان عاملين حماية من البوليس ضد ازواجهم
السكورجية
غير الاذى الجسيم
وقضايا الطلاق الفاقت العدد
مافى سبب بيخلى اسرة ترسل بنتها بالطريقة دى
تعرضها لخطر استغلال الاخرين لضعفها
والله عجائب يا زمن

الاستاذه بيان
و الله ضحكتينى الرصاص بيخش بيجاى و يطلع بهناك
يا اختى انتى عايشه ( او كنتى عايشه ) و ين بالضبط فى امريكا ؟؟؟؟؟

فى جيرمانتاون
فيلادلفيا
منطقة التماس بين السود والبورتريكان

أخوي السنجك
لك التحية
وهل كلمة تمرد كلمة رنانة ؟
وهل التمرد هو رفض الأشياء البطالة فقط ؟
هناك من ليس له أو لها ولي أمر
وهناك من لا يعرف له أبا
وهناك من يكافح لأجل لقمة العيش له ولذويه
وهناك من تمرد على كل ما تعتبره انت أدبا وشق عصا الطاعة
وهناك أناس عاداتهم وأديانهم لا تمنعهم من شئ مما تراه أنت عيبا

المـــــشكلة ما فى العروس

المشــــكلة فى ســـــبع البرمـــبة اللى قال ليـــها تعالى

عـــــن طـــريق المـــكسيك.