لقاء مع المبدعة تماضر فى جريدة الخرطوم عيدية من الاستاذ فيصل محمد صالح

لفتة بارعة منك يا بكرى وتسلم إيدك

لى قدام

ودسلفاب

شكراً بكري شكراً فيصل محمد صالح
شكرا تماضر
ومازلنا في انتظار الكلام السمح في خشم سيدو

شكرا يا بكرى
والله البورد دى من غير تماضر
زى الواحد رايحا ليهو حاجة والجميع اتفقوا على تماضر فاكهة للبورد
يعنى لو اترشحت فى دايرة البورد حتجيب اكتر من نسبة سىء الذكر صدام حسين 999999999
نقول ليها لما ترجع بالسلامة

شكرا يا بكري والتحية للمبدعة تماضر وأرجو لها إقامة سعيدة في السودان

شكرا لانكم اتحتو لى فرصة قراءة اللقاء وقد نشر بعد سفرى من السودان

السودان؟

قلت ليه
ما صادفتك ولا اتعاقبنا؟

جيتك بى شهمة وبى نهمة
داير اعرف حالك واحوالك
جاياك من شبى وربى
ودايرة سماحتك ووصالك
مالك يابا نعلك طيب؟
نجومك ما بتعكس فالك
وسماك ماواعدة محالك
اطفالك مطفية عيونهم
وشبابك شائخ واتهالك
مالك يابوى علك طيب
كاسر خاترك ما يتبارك
والداير يفنيك يتشارك
ماكنت بتفتح لى احضانك
ومفروشة اراضيك بالمهلة
وسماك معروشة باشجانك
مالك يابوى علك طيب؟
مالك محزون اشعث واغبر؟
ما صادفتك ولا اتعاقبنا؟


ياوطنى اهدينى احضانك

عشان زى ده ! طول الوقت بنكتب ونقول فى شنو !؟

شكراً تماضر ومرحبا بعودتك

شكرا يا مارد

حمد لله الف على السلا مه يا استاذه تما ضر
وانشا ء الله السودان يرحب بيك

اخي بكري التحية لك ولتماضر

اخي بكري التحية لك ولتماضر

شكرا يا تماضر فقد كنت كما كنت دائما رائعة
وشكرا يا بكرى على شيئين
الأول أنك نقلت هذا الحوار الرائع للبورد
وثانيا لأنك سترت جهلى
فأنا تلقيت الصفحة التى عليها الحوار، ولأننى أعانى من أمية إنترنتية لم أعرف كيف أوصلها للبورد فتوكلت على الحى الذى لايموت وبعثت بها لكبيرنا الذى يضرب على الطبل واثقا أنه سيتصرف

حاشاك الجهل ياسيد العارفين وشكرا’ اتمنى اكون عندحسن الظن

شكراً فيصل وشكراً بكرى
اللقاء جميل والقصيدة أجمل يا تماضر
يديك العافية ويخليك للسودان وشعبة

تماضر
كيف وجدتي النيل في اول موجاته امام المسرح القومي؟
هل لازالت الدبابة تحرس بوابة المسرح القومي؟
هل استطعت ان تحرجي الموت و لو لحظة و انت تحاولين ان
تلمي صوت عميري من الاثير و هناك قمر يخبئ دمعة ثكلي
في شعاع يغازل موجة و صوت طرمبات مياه توتي يشاكس
ما تبقي من ذكريات؟
هل لازال مصطفي احمد الخليفة يحاول ان يخلص الكوميديا
من الشوائب ويمنح ضحكته الصافية لاشواق الطريق؟
هل رايتيني هناك اخب بين الاذاعة و التلفزيون وبي من
ظلامات وظلومات الزبدين ما يكفي كي يحاصرني الغبن و
تنهشني تفاصيل من تبدل من اصدقاء؟
هل ضحكتي لنكتة ساخرة لمحمد نعيم سعد او عبد السلام جلود؟
هل لازال جمال حسن سعيد يملا فراغات الظهيرة بثرثرته
المتداعيه؟
تري كيف تحمل اخونا عوض بابكر رحيل صديقه خضر بشير؟
هل تناولتي فتة عدس بالقراقير من يد خالد جاه الرسول
في بوفيه المسرح القومي بينما ابو قبوره يخترع نكتة وليدة اللحظة؟
كيف تبدو شوارع الثورة و بالذات محطة شقلبان؟
هل تحملتي غيابك كل هذي السنين؟
هل عرفت لماذا بدلوا اسم شارع النيل الي شارع الشيخ زايد؟
هل لازال مزارعو توتي يرشون الجرجير بالماء و المعدية تراوح بين توتي و الخرطوم والصباح يسرب نداوته في التفاصيل؟
هل رقصتي في حفلة عرس صاخب يجمله عركي البخيت؟
هل لاحظتي ما فعله السكري بهاشم صديق؟
هل خصك الشبلي او موسي الامير بانس حميم تحت راكوبة ام نوار ست الشاي بادارة الانتاج السينمائي؟
هل لازال قرني يمارس توهجه الدرامي؟
هل قضيتي ليلة كانت قمرية مع الهام بابكر؟
هل سألتي قاسم ابوزيد لماذا صام عن المسرح؟
هل مر بك طيف عو ض صديق في استديو كرومة؟
وهل تخلصت من مغبة فعل النوستولوجيا؟
تماضر
حمد الله علي السلامة و اعلن اني احسدك علي ذلك
مع هميم ودي و كثيف محبتي و تقديري

مليون مرحب بي عودتك يا مبدعة وان شالله السودان لقيتية كما نتمني ، وكمان لي قدام دايرين تفاصيل الرحلة كاملة
وبالمناسبة دي نبدا بي اول سوال
قريت الحوار معاك في الجريدة ولفت نظري كمية من الاشياء واول الاشياء هي صوت الفنان الذي ارجعك لي السودان هل لك انت توصفي ذلك الشعور ؟ وكيف ؟!!!

مع خالص تحياتي

عندما كنا شفع صغار .. نلعب و نجري ... و كلنا ملمومين .. أولاد شيخ الدين .. الجيل التاني .. و عندما كانت تأتي تماضر من الشغل .. في آخر النهار

كنا نقوم بحملة إعلامية لإعلان وصول تماضر .. و كنا نغني (أو ربما كنت أغني لوحدي حسب ماأذكر).. تماضر جات .. أملو الباغات .. حسي بتمرق .. تأسيا بالأغنية الشهيرة التي قيلت في حق الكهرباء

رغم ذلك ..... لم أكن أعرف أنها تملك هذا الحجم من الشعبية و التقدير بين أبناء الوطن .. إلا بعد أن رأيت ما رأيت في هذا البورد

حمدلله على السلامة ... و إن شاء الله الجيتي منهم كلهم بخير ... و أعجبني جدا الحوار الشجاع أعلاه

انا بس محظوظة ياقصقص
ماعملت حاجة استحق عليها دة كلو

Quote: انـا بس محظـوظـة ياقصـقـص مـاعملت حاجـة استحـق عليـها دة كلـو

أنمـا هـو تواضـع
الكبـار يا بت أمـي

وانت عامل شنو ياود الجيلى
اشتقنا ليكم

كبرنا وكبرت أحزانا وأنتوا كبرتوا وزتوا حلا
مرحب بالعودة ياتماضر

الصفحة

رفعتي رأسنا
وهنا يمكنكم قراءة الخبر من موقع الجريدة

Tumadir,

welcome back to your real home
SUDANESEONLINE

يا ابن عوف انا جنى وجن الكبر حتى لو معاهو حلاة، ياهلا
مهيد راسك مرفوع من عزة روحك

شكرا
الريس
كل عام وانتم بخير

سلامتك وتحياتى لناس البيت

يعني انت كنت

color:yellow">
مافيشة

وانا ما جايب خبر

مشيتي كمان السودان

والله عافي منك

اها
بنِقعِد ولا لا؟

لقاء رائع جداً
ولا شيء عندي أقوله الآن
فلم يترك لنا المبدع المتألق يحيى فضلاً شيئاً لنقوله
وكأنه قد جمع أنفاسنا من كل هذا البورد
وصاغها لحناً وكلمات ليعزفها على اوتار الرائعة تماضر
لقاء عكس ان تماضر قنبلة على هيئة حنين وشوق
الناس في جميع انحاء العالم يكرهون انفجار القنابل
لكنهم بالطبع لايكرهون رائحة الحنين والشوق ان تفوح وأن تفوح وأن تفوح
تماضر عرفناها مبدعة وشاعرة
ولكن هذا اللقاء عرفنا بها أكثر
وجعل المسافات بيننا وبينها
لاتسمح بمرور الضوء والصوت
سؤال ربما في عيون الجميع
كيف وجدتي السودان
وكيف وجدك السودان ؟؟

سؤال ضخم بحجم ضخامة المفارقة
دعنى امتص صدمة لقائى به وارجع ليك

شكرا للاطراء يا تفاحة البورد

الاستاذة تماضر

طبعا كنا فى حالة انتباه تام لاجهزة الاعلام منذ أن رأيناك فى برنامج ليل يا عين او نيل يا عين بالاصح وسعدنا بظهورك رغم ضيق المساحة وسعدت انا شخصيا لانك تطرقت فى ذلك اللقاء الى سودانيزاون لاين واصفة اياه بالمنتدى الثقافى وهذا كبر راسى جدا وقلت يازول نحن والله ما هينين اكان تماضر بتوصفنا بى ده كله ولا غرو ففينا اولئك العمالقة وانتى اولهم فحقيق بنا ان نكون كذلك ولا بد ان لا نخيب املك ونكون كذلك ..
لاسفى لظروف خاصة لم ارك فى سهرة اخرى مع انى كنت اتوق لذلك حتى اتانا الحبيب ود الحبيب بهذا اللقاء الذى اجراه الاستاذ فيصل فكان رائعا بحق وكان جميلا وارجو ان يكون ذلك العدد قد وصل لاكبر عدد من القراء حتى يعرفوا ماذا تفعل تماضر فى الغربة وانها لم تهرب من الساحة جبنا وانما تمددا لاعمال خارج الحدود لم يفكر فيها غيرهم فهى سفير يعرف الناس بالسودان بطريقته الخاصة والمحببة للاخرين..

سعدنا حقا بهذا اللقاء والكلام فى حقك عزيزتى لا ينتهى فانتى شعلة نرجو لها الضياء الابدى وان تبقى فى عمق الوطن متوهجة ابدا..

والبورد نور بعودتك الميمونة عزيزتى

الأخ/ بكري أبوبكر
كل سنة وانت طيب
يسلمك ربي
لقد اسعدتنا بطلة المبدعة تماضر


المحترمة تماضر

الضحكة الصيحة الجارية
الفرحة الشهقة الجات متضارية
الراية العالية السارية

لما حكيتي الحال
الحال في الحال انشال
زي لف العمة ولفح الشال

*******************

نجومك ما بتعكس فالك
وسماك ماواعدة محالك
اطفالك مطفية عيونهم
وشبابك شائخ واتهالك


********************

نجم الفال وين ونى
أرأيت سماء بعدك دنا
وعيون الليل أحلك وجن
عليه شبابه هان وتدنى

ياحليلك ياتماضر
.حمدلله على السلامة وكل سنة وانت طيبة
أسئلة صديقنا يحي فضل الله علي خطى قصيدته
. (أسئلة ليست للاجابة)
أعذرك وانت تلخصين التجربة
بسؤال (هل مااتلاقينا وللا اتعاقبنا)؟
أعرف أن الغربة سكنتنا فأضيف
تساؤلا جديدا:هل نملك أن نخلص منها أرواحنا؟

السؤال:
كيف وجدتي النيل في اول موجاته امام المسرح القومي؟

النيل كان صائما، والدبابة حجبتنى من رؤيته ، وعنكبوتك القديم شاخ واولد بنينا وبنات
هل لازالت الدبابة تحرس بوابة المسرح القومي؟
هل استطعت ان تحرجي الموت و لو لحظة و انت تحاولين ان
تلمي صوت عميري من الاثير و هناك قمر يخبئ دمعة ثكلي
في شعاع يغازل موجة و صوت طرمبات مياه توتي يشاكس
ما تبقي من ذكريات؟
اتحفتنى ايمان محمد الحسن وعبد الرحمن الشيخ ابن اخت عميرى بملف عميرى، وتسجيلات اغانيه وعمل دؤوب لطبع ديوانه ولم تراثه.... المرة الوحيدة السمعت صوت عميرى من الراديو كنت فى حافلة متجهة للخرطوم واقام موظف امن الهدف(!!!) حجة ليس لها آخر اخذونا بعدها لنقطة البوليس وعلا صوت الشجار واغلق صوت الراديو وبقية صداه يتردد فى جوانحى... ياقمر انا مابطولك
ادينى من نورك وميض
عشان انور وابقى طولك.

هل لازال مصطفي احمد الخليفة يحاول ان يخلص الكوميديا
من الشوائب ويمنح ضحكته الصافية لاشواق الطريق؟

مصطفى والاصدقاء اول من احتفل بى فى معسكرهم القائم فى الملازمين
يقومون بانتاج فيلم وعمل درامى كبير ومسرحية
سحنتاتهم يبدو عليها الاعياء الشديد يقال ان احد الاثرياء برهم بالمكان والمال حتى يعاودوا انشطتهم وهم الآن يعملون كالنحل لآنتاج اعمال مسئولة وجديدة ومستقلة من تسلط التلفزيون... دعونى لاظهر كضيفة شرف فى الفيلم المزعوم... كان تحقيق ذلك مستحيلا لضيق الزمن.
وفى اليوم الكنت بتصل بمصطفى عشان علاقة محمد عوض بالخطوط الجوية قلت ليه مصطفى انا عندى مشكلة طيارة، قالى طيارة تشتريها ولا الطيارة البرسلوها للسكر ولا طيارةالله والرسول دى، وكان ذلك داب مصطفى يقطع مصارينك بالضحك( ويفكك عكس الهوا.)

عقد الجلاد وبلاحرى عثمان النو عزمنى فطور رمضان وبعدها حفلة فى دار المحامين وكانت دى اول حفلة احضرها فى السودان ، رحب بى عثمان وقدمنى للحضور واجهشت بالبكاء ...من عوارتى البتعرفها.

هل رايتيني هناك اخب بين الاذاعة و التلفزيون وبي من
ظلامات وظلومات الزبدين ما يكفي كي يحاصرني الغبن و
تنهشني تفاصيل من تبدل من اصدقاء؟

كان رجال امن الاذاعة والتلفزيون ينظرون الى تجمع اصدقائنا يايحى وهم يحتضنوننى ويجعرون فى ضل الشاتى القدام الاستديوهات القديمة بالاذاعة وكنا نخلط الدموع بالتعليقات الساخرة ونضحك ، رايتك يا يحيح معنا لم يتبدل معدن الاصدقاء ومع انو سلام الرجال والنساء فى الحيشان محدود بالمصافحة الا انهم جميعا عاملونى كشقيقة .
ولم اسكت كنت اسالهم بصوت عال: البقى فيكم كوز يكلمنى
ويؤشرون على السر السيد الذى يرفع يديه للسماء والله يا تماضر انا سبت الكوزنة من المعهد وينادونه السر الكوز، ويضحكون
محجوب هو الوحيد الكوز وصار مديرا كبيرا تحفه حاشية وسلم على بطرف اصابعه ولم يدع عيونه تقع فى عيونى..، صلاحالالفاضل قابلتو وهو ضيف فى نفس الحلقة الانا فيها ضيفة كان يريد ان يقول الكثير عن الظلم الذى جرى له لم تسمح ظروفنا باللقاء ثانية ولكنى عرفت انهم (بهدلوه)
وجوه جديدة ما لها حد والا بدر الدين حسنى فى التلفزيون القومى يقول مايريد ويفعل مايريد وتحيط به المحبة من كل صوبز

.
هل ضحكتي لنكتة ساخرة لمحمد نعيم سعد او عبد السلام جلود؟
محمد نعيم كان يؤكد اننى مازلت ابدو( جكسا)من كثرة اكل التفاح، وانا اصر على انهم عجاز لانهم ما سعيدين.
هل لازال جمال حسن سعيد يملا فراغات الظهيرة بثرثرته
المتداعيه؟
عندما استجوبت مكى سنادة عمن يحمل عبء المسرح على كتفيه الان قال، جمال حسن سعيد الفاضل سعيد والمسرح القومى، يضحك من فرط جرأتى ويقول لى والله ما كوز انا مؤتمر وطنى قلت له لو ما اصلحت حال المسرح القومى ما عافية ليك وياكا كوز ومؤتمر وطنى دة هو مش ياهو الكوز التابع للحكومة؟ يعنى ما الحردان؟

تري كيف تحمل اخونا عوض بابكر رحيل صديقه خضر بشير؟
اتعاقبنا انا وعوض بابكر العربة تزاحم المركبات لتدخل الشارع وينزل عوض بابكر وقد زاد سنه عن اقرانه عشرون سنة شفتو من بعيد وانا الوح لطيفه وابكى لم نتقابل، للاسف.

هل تناولتي فتة عدس بالقراقير من يد خالد جاه الرسول
في بوفيه المسرح القومي بينما ابو قبوره يخترع نكتة وليدة اللحظة؟
لا
كيف تبدو شوارع الثورة و بالذات محطة شقلبان؟
كالدبيت الاغبر، الركشات اكتر من الرايحات اصطف الشارع بالبوتيكات والبقالات ومحلات الكاسيت والنت كافيهات ومراكز الاتصالات والاجزخانات والدكاترة والغبرة ، وهو شارع الحركة فيه عشوائية والقوى ياكل الضعيف ولاعبور للمشاة الا للحريف وتكثر فيه الحوادث وتنقلب الامجادات فى كل خور عميق، شارع خرافى

هل تحملتي غيابك كل هذي السنين؟
هل عرفت لماذا بدلوا اسم شارع النيل الي شارع الشيخ زايد؟
نحن لانملك شارع نيل هناك احد الشيوخ يملكه
باعوه وباعوا كل غنماية حائمة بالقطر لشيخ آخر ويبيعون الاشلاقات هذه الايام والبيه مزاد مفتوح فى العاصمة والاقاليم ، لو عندكم قروش امشوا اشتروا الباقى


هل لازال مزارعو توتي يرشون الجرجير بالماء و المعدية تراوح بين توتي و الخرطوم والصباح يسرب نداوته في التفاصيل؟
ما شفتهم، شفت البنطون من بعيد وانا بسلم على النيل لحظة الوصول

هل رقصتي في حفلة عرس صاخب يجمله عركي البخيت؟
ابوعركى عزمنى عرس فى نادى الفنانين وقالى حاغنى فى العرس دة عشانك وجاب اولادو وجونى لحظة الميعاد ووجدوا بيتى معبأً بالضيوف واعتذرت ولم يذهب عركى ولم يغنى، لكنه سجل لى شريط كامل مع ولدو محمد واهدانى ليهو ولى رشا وللوافر

هل لاحظتي ما فعله السكري بهاشم صديق؟
التقيت هاشم صدبق بدعوة منه وبترتيب من احلام من هذا االمنتدى وبامسيكا وحبيب الكل كانوا هناك، هاشم صار وحيدا فى هضبة النضال، ابرقه عوض احمد خليفة برقية جافة وجارحة ليتوقف عن كتابة قصائده فى الحرية وبالتحديد لايقاف حاج مشاتر اتنشرت هنا فى المنتدى، قابلت لينة بنته وبنت نعمات هارون، نعمات هرون مكرر.

هل خصك الشبلي او موسي الامير بانس حميم تحت راكوبة ام نوار ست الشاي بادارة الانتاج السينمائي؟

لا،من زمنى الخاين
هل لازال قرني يمارس توهجه الدرامي؟
لم اره وسالت ولم اقابله ، زمنى الخاين

هل قضيتي ليلة كانت قمرية مع الهام بابكر؟
نهارية رمضانية وكم زيارة بيتية وتلفونات ومعسكر الاصدقاء ، زادت الهام نضجا وعامتلأت عيالا وازددت لها حبا، صديقتى واولاد مصطفى احمد الخليفة عبئا على عاتقها.

هل سألتي قاسم ابوزيد لماذا صام عن المسرح؟
لم اقابله ، كمن زمنى الخاين

هل مر بك طيف عو ض صديق في استديو كرومة؟
كنت اصرح لمحققة صحيفة من جريدة الدائرة بان فقد عوض صديق دخل على، وكنا نتاهب لذلك اللقاء التلفزيونى فى اروقة قناة النيل ا لازرق، حين نادت الصحفية على مجدى، ابن عوض صديق عرفت مؤخرا ان القناة قامت على عاتقه عزينا بعض على مفقودينا وبدانا حوارا جادا للتعاون وسنبدأ قريبا ، ان شا الله.

وهل تخلصت من مغبة فعل النوستولوجيا؟
لا والف لا
تماضر
حمد الله علي السلامة و اعلن اني احسدك علي ذلك
مع هميم ودي و كثيف محبتي و تقديري
يحيح محبتى لك

سمعت قالوا فى تحقيق فى مجلة الخليج اليوم، انا ورشا اختى لما كنا فى السودان.

لو امكن الشافو او عارف طريقة ينزلوا يورينى
ولكم منى الشكر الجزيل

الخليج الامارات

هذا هو موقع جريدة الخليج الأماراتية
http://www.alkhaleej.co.ae/[/B]

shukran ya ustay, bes ma bifta7 ma3ay.

تماضر انتي رائعة .. و أنا بحبك و بحب روعتك ..
أنا أمبارح كنت بتكلم مع صديقي الأعز في السودان و سألته عنك ..كأني بعرفك من زمان أو كأني لقيت فيك أختي اللي كنت بتمناها
يا بت النيل ..
و نتواصل
ملاحظة : ممكن تشوفي الموضوع ده

قصيدة أنتم ثاني قراءها .. وليدة الشهر .. كتبتها لحبيبتي
حاسي انك أكتر واحدة حتفهميني لأن الواحد عادة بيحكي لي أخته .. و بما أنه ما عندي أخت .. حأحكي ليك انتي عنها
محمد قسم الباري

I told u I am a lucky woman!!! because love comes to me effortlessly; and now guess who loves me, a talent like u Mohamed. Wow!!!!

I am sorry the arabic in my computer is not obeying.

I love u too, brother!!!!

The poem is touching and amaizing. Iloved it.

your darling must read it to get the beautiful feeling that u have for her, she is a lucky lady, too. I bet we were second to her. lool

When I fix my PC, I will write u in Arabic, where we both feel comfortable.

Thanks for sharing.

شكرآ لكي أختنا تماضر

محمد
مهيد
اهو العربى جة
العربى الكيشة غيرلو

جميلة القصيدة يا محمد،

افكارك وانفعالاتك وحسك الصادق وتعابيرك تنسرب كجدول عطر فى مسارات النفس

ما انبل حبك

وما اجمل شعرك

انا زى ما قلت ليك بالافرنجى امراة محظوظة وحبك الاخوى هو آخر هبات الحظ لى...
الله يقدرنى على التقدير دة وامسك فى كتفى قوى وارح...للافق المدى والبراحات المخدرة والنجوم

اف حمدى الله علي سلامة الوصول الاخت تماضر وانشاء الله يكون السودان رحب بيك ومعك يتولد الابداع فيها بالجديد

الباقر الطاهر
اسمك بذكرنى غنية محمدميرغنى
لا الطاهر انا ولا الباقر
لا الصابر انا ولا الباكى

لوووووول
شكرا
السودان رحب بى وافرحنى وابكانى وضحكنى وحنننى
وفتح لى حضن بركة ودفو عافية وحنان اهل وسيرة ودقة زار ولالوب وودع وشعرا جداد وفنانين والف بهرج ومهرجان

حلوة الاوطان وحلو مغزاها
جيت روحى مغسلة ونفسى مشطفة وقلبى مستحمى، وجواى متماسكة ومليانة عشق

ومثابرة

شكرا للسؤال

تعقيباتك دوما رائعة يا تماضر .. بتمس مركز الروح
بالمناسبة .. لا علاقة للحظ بالأمر .. أنت من يدفع الآخرين لحبك ..بروحك النبيلة و حسك المرهف و فنك ..

و هي فعلا قرأته .. و أنا ركزت علي فكرة المطر في القصيدة لأنها
... مرتبطة بمأساة قديمة في ذاكرتها

Quote: I bet we were second to her

loool ..

و نتــــواصل

محمد

الشكر الجزيل للأخ فيصل علي البحث في مكنونات السودان
والثناء علي الأخ بكري علي عولمة اللقاء للكنز الوافر
وأجزل الشكر والعرفان للأخت تماضر علي الإسهام في خارطة السودان
وقد شعرت بالخجل لجيلي بما حلت بنا من مسافة يصعب ردمها
فقد عرفنا تماضر شيخ الدين عبر السماع في الغالب ولم يتثني لنا الإلمام الكافئ بإسهامها المقدر مع آخرين من بني وطني إلا شذرات عبر وسائل متواضعة ولربما لعب المكان دوراً ولكن الزمان أيضاً كان لة القدح المعلي فتماضر التي غادرت الوطن منذ بداية التسعينات حملت مع حقائبها إبداعاً جم قل ما نتمكمن منة إلا بالإجتهاد المتقطع
ولن أتحدث إلا ممثلاً لنفسي ولكن من جيلي كثيرين لربما لم يقتربوا منك يا تماضر إلا سماعاً ولك أن تقيسي علي ذلك كم هم المبدعين الذين نفتقدهم وضمتهم مسالك الغربة الإجبارية أو الإختيارية
وعزاؤنا في بل غيت وأمثالة من بني حواء السودان من الذين يطوعون التكنلوجيا للتواصل وربط الأجيال جيلاً بعد جيل
وعشمنا كبير في الإسهام للأمام عبر هذة النافذة لأن كلمة حلوة أو دراما تضحك لها حد القهقهه أو خبر جميل يصنعه بني الوطن يطول العمر في خطي الحياة المتسارعة

بحيراوي

عفوا يا تماضر حصل خطأ في العنوان
الصحيح هو
http://www.alkhaleej.co.ae

واسمك به حلاوة شعر الخنساء تماضر وصدقيني هذا الاسم انا معجب به من زمان ومتمني تجيني بنت عشان اسميها تماضر عسي تستقس الابداع من تماضر الخنساء وتماضر القاضي وتعيش تماضر الباقر الطاره

واسمك به حلاوة شعر الخنساء تماضر وصدقيني هذا الاسم انا معجب به من زمان ومتمني تجيني بنت عشان اسميها تماضر عسي تستقس الابداع من تماضر الخنساء وتماضر شيخ الدين وتماضر القاضي وتعيش تماضر الباقر الطاره

بحيراوى معليش ردى جة متاخر لانشغالى الزائد

وجيلك ما بعرفنا لانو مقصود ما يعرفنا، كل الاعمال القدمناها بقت ممنوعة عشان مافيها توب، او لانها بتناقش قضايا هم ما دايرنها تطلع للسطح،
وشوف المفروض يخجل منو؟؟؟انتو ولا المتسببين فى حجبنا عنكم،
لكن ارض الله واسعة واهو دة اتلاقينا فى الاثير، على امل نتلاقى تانى فى ارض اصلب
واقرب للحقيقة

شكرا لمشاركتك