هذا الحاقد الحاسد ....انتقد طريقة أكلنا للعصيدة وقال عليها: ( Disgusting )!!

وهو صديق لصديق سوداني من دولة افريقية مجاورة لا داعى لذكر اسمها وقد صادف ان تناول معنا نحن مجموعة من السودانيين قبل ايام وجبة افطار ( متاخر يعنى ود عم غدا عديل) في بيت صديقي وكانت بها( عصيدة تقلية كاربة) في قـــــــدح مشترك فقد اكتفى الصديق الضيف الافريقي باكل صحن الفول والشواء والسلاطة وبقية بنات المائدة الدسمات حيث اخذ نصيبه منها في صحن منفرد( اشبه بتكويشة سفنجة في خور ابو حبل) وقد تناولها بطريقته (المتقرضمة) على النحو (الخواجاتي) على عكس طريقتنا المعتادة اي اخذ صحنا منفردا!!
وقد اصرينا عليه ان يتناول معنا طبقنا الشعبي المحبب الينا ( العصيدة بالتقلية وذات ويكة جديدة تكتف السوسيو) و قد حاول على استحياء ولكنه رفض تناولها على طريقتناالمعتادة اي طريقة( الغميس الجماعي المتلازمة مع رفع اللقمة في الهواء ثلاث لفات او اكثر على حسب لزوجة الويكة وانتهاء بلحس الاصابع بعد القضاء على الطبق المحبب) فقد اصر صديقنا ان ياخذ نصيبه منها على شاكلة ما اخذه من اصناف اخرى ولكنه لم يبح برايه حول عدم تناوله ذلكم الصحن المحبب الينا اي العصيدة الا بالامس حين هاتفني صديقي وهو صديقه وقد اخبرني بان صديقه الافريقي معجب جدابالطعام السوداني ولكن عندما ساله حول امتناعه عن اكل (العصيدة بالتقلية) فكان رده على استحياء ولكن عندماالح عليه صديقي كي يعطيه السبب فخرجت منه عبارة ( مقززة) بالانجليزية وهو يرفض طريقة اكلنا للعصيدة وليس العصيدة في حد ذاتها اذ ان مذاقها طيب جدا وقد تناول منها في طبقه ولكنه لم يعجب بطريقة تناولنا لها وهو يقول بانها مقززة وغير صحية وذلك لانها طريقة جالبة للجراثيم والامراض المعدية وذلك بسبب انه عندما ندخل اصابعنا جميعهاعلى الطبق الواحد وتذهب الى افواهنا بالطعام وتعود الى الطبق مرة اخرى من افواهنا فارغة لالتهام لقمة اخرى وهكذا دواليك وهي طريقة في رايه غير صحية حيث لا تضمن فيها صحة ايادى وافواه الاخرين من يشاطرونك ذات الصحن فربما فيهم المصاب بمرض جلدى في يده او مرض عضوى معد في فمه وعبر هذا التواصل الغذائي قد تنتقل العدوى بين المشاركين من المصاب الذي يشاركهم ذات الصحن مباشرة!!

( بصراحة انا من حيث المنطق قبلت راي هذا الافريقي المتقرضم والمتقندف ولكنه برغم قسوته ووقاحته لن يمنعنى من اكل العصيدة وعلى طريقتنا الشعبية المحببة الينا والزارعة الله في الحجر بتقوم)!

انها وجهةنظر ناقدة احترمتها ولانها تخص وجبة شعبية نحبها جميعا اكثر من (سيئة الذكرالانقاذ) و( احزابنا المخستكة) ولذلك رايت ان انقلها اليكم لاشرككم الحوار حول هذا الامر الحيوى الذي يستهدف مائدتنا السودانية العظيمة حتى نسمع منكم المفيد كرد لهذا الصديق الافريقي (الحاقد والحاسد الراصد)!!

كلامو صاح 100%

لكن برضو ما بنخلى اكل العصيدة و بالطريقة
الشينة دى

عادل حمزة شكلك كده طابور خامس...حدد معانا ولا مع الخيانة!!

طريقة الاكل الرسالي او اكل (ذات الخجة) وهي طريقة سودانية جديدة في الاكل تاكل الطعام وايضا تاكل الاصوات!

Quote: عادل حمزة شكلك كده طابور خامس...حدد معانا ولا مع الخيانة!!

سلام يا هشام
اى زول ما سودانى لو شافنا بناكل عصيدة
حا يقول نفس كلام الافريقى ده..يعنى رايهم ده هو
الشى الطبيعى
نحن طريقة اكلنا دى عاجبانا و ما بنخليها

هسع يا عادل الزول ده حيقول فينا خير لو كمان شاف طريقة شرابنا الموية من الازيار بالكيزان نقوم نغمس الكوز بوسخو في الزير والايد الشايلة الكوز ممكن تكون ملوثة وحتلمس موية الزير وبعد داك اجى اي واحد من طرف عابر سبيل اشرب بذات الكوز الوسخان... وهاااك يا جراثيم اقدلي اقدلى....

وعلى الحلال ده الزول المتقندف والمتقرضم ده لو شاف طريقة سواة المرارة بفشفاشها وحلقومها وضنبها وكرشتها وكبدتها وابو الدمامها و( ببولها)عند (التومة بن جبرين)وكضم المرارة فوق خشيم (العبيد ود الفالحة) وكتين امدغ فيها زي مدغ اللبانة وكمان معاها منظر زبالة بيوتنا ببعر الحمير ولمن افتحوا حوض الزبالة ناس (سليمان ود اب دومات) وتقوم ريحةالزبالة تطق الحلة... واتكرفها (على ود اب راس) واقول : (هيييع( وهو مبسوط تب من حاج النور التاجر الجلل بيتو ببعر الحمير الحرة الدنقلاوية المو مكادية غايتو تاني ما اظن زولك ده اقعد ليهو مع سوداني تب!!

هباني سلام

شكلك انت ذاتك ما مقتنع باكل العصيده بالطريقه دي؟؟؟!!
والا لما ذكرت موضع شرب المويه من الزير بهذه الطريقه؟؟
(ههههههه)



يا حبيب انتو صاحبكم ود الهرمه الافريقي ده جيب لنا اسم بلده
ونحن نوريك بخمجوا في شنو؟؟؟

ثلاث ارباع شعوب العالم عندها اكله بتكون فيلم هندي زي عصيدتنا دي.

وبتفع مع اخونا عادل حمزه
انه الزول ده كلامه صاح وانها مقززه للآخرين خاصه غير المتعودين عليها
وعموما كل الملاحات اللايوق مقززه للآخرين.ولكن بنحبها ولن نتخلى عنها.
لكن اولادنا...اكيد هم جيل ثاني!

انا شخصيا بصر عليهم رغم الاقامه في كندا انهم ياكلوا من صحن واحد معاي
وما يجبوا لي كلام مدرساتهم الكنديات ديل للبيت(جراثيم ومكروبات)(ههههه)


وبقول لهم لما واحد فينا يكون عيان ولا عنده نزله مثلا او لوز( يعني مرض معدي)
فعلا وقتها بنأكله براهو.

كل ده تخيل يا هباني عشان ما يطلعوا لي عوافنين
لاني بكره الناس البتعمل عوافه وبتتفلسف على خلق الله.
وكذلك عشان ما يندهشوا لما يرجعوا السودان ويسمعوا الناس كلام فاضي.
ويعلموا فيها مقرضيمن ومصرين ياكلوا في صحونهم الخاصه وكمان
بالشوكه و السكينه!

والله يا ودهبانى مع انو الشوك والمعالق بتاعت الخواجات والافارقة المتقندفين بتدخل فى افواه وخشوم كتيرة ممكن تنقل جراثيم اكتر
لكن ايادينا بتكون اسلم كتير من شوكاتهم ومعلاقهم
وبالرغم من ذلك انا واحد من الناس بكره العصيدة زى كرهى للجنجويد
القراصة والتركين ياخى قالوا عفنت شوارع الكلاكلات كلها زى ما فى واحد ناغم على جعفر عباس (ابو الجعافر) كتب فى رد ليه على مقال كتبو عن ناس الخرطوم قبل عدة سنوات..طبعا فى المقال اياه ابو الجعافر انتقد ناس الخرطوم كلهم بلا فرز بانهم ناس خمجانين لوووووووول هههههههه ما عارفين قلبتم من عدلتم على حد زعمه..طبعا كتب المقال فقط من باب الكتابة الصحفية الساخرة..ولكن احد مواطنى الخرطوم(الناغم) جن جنونه عندما قرأ المقال المعنى ههههههههههه


والله نفسى فى تركييج اوتركيين :)

تحياتى

حبيبنا قرشي عبدون


رايك شنو في ( الشرموط بالكول)!!؟
ده غايتو ملاح ممكن بعد غزوة ذات الخجة ان تفتي هيئة علماء السودان بفتوى
ستعتبر اكله قد شرع في الزنا بشبهة الاسم المتعارض مع مقاصد الشريعة والخلق الرسالي القويم!

اختنا العزيزة ام حازم وسند


عارفة اخوك هباني بموت في العصيدة بالتقلية بس المشكلة حكاية الصحن الواحد دي عندي فيهاراي مخالف لفهم الناس(العوافين) وانا مو عواف لان حكاية القدح الواحد دي فيها ظلم شديد بقع على ناس مساكين مو اكالين يعنى فيها مهمشين وناس مركز ناس المركز ديل هم العندهم ما شاء الله ايادى عريضة الاكف اي الكف في حجم اضان الفيل والواحد فيهم لقمتو بخمسة لقمات واحد مسيكين ومضبلن ومنحشر في نص الجماعة في ظااات القدح الواحد وكمان المصيبة لو كان اخونا بخاف من العصيدة الحارة ده حقو راااح لانو ناس (على ود ابزرد) في حلتنا عندو ما شاء الله كـــف تتحدى جميع انواع الحرارة اضرب العصيدة بوخها الوى زي الترتيب لا رجفي ولا اااااح فما اظن الحناكيش يستطيعون مجاراته في التهام العصايد الحارة وكمان المشططة بالقبانيت!
فالقضية وما فيها فيها مظالم كبيرة وبائنة وفي قضية القدح الواحد حيث لا تستوى فيه ايادى الصغار بايادى الكبار واكل النساء باكل الرجال و لا يستوى الاكالون والمضبلنون... يعنى واحد من حناكيش الخرطوم لو الله رماهو عندنا في بيت مناسبة في حلالنا في بحر ابيض وفي صحن عصيدة بوخها الوى.... غايتو المسيكين بموت من الجوع ما اظن الحق لقمة مع ناس (الجقر)!
ولذلك احبذ توزيع الطعام من مائدةالكل ياخذ منها نصيبه وبشكل عادل من غير تركيز على صنف بعينه حتى لا يظلم الاخرين وهو بعد ذلك حرفي طبقه وحر في تقرير مصيره وعاوز انفصل انفصل وهو حر في صحنو!!
اما حكاية قـــــــــــدح واحد ارفضها لانها دي اشبه بديموقراطية السودان المخستكة حيث لا مكان فيها للاحزاب الصغيرة مهما طرحت من افكار وخطط وهي التي تحاحي عضويتها محاحاة طويلة الى ان يتم استقطاب العضو المحترم بعد لاي وملاواة شديدة حيث في السنة ربما يستقطب الحزب شخصا او شخصين واما الاحزاب الكبرى والتقليديةفلا تحاحي ولا تحاحي بل تكسب عضويتها بالتناسل البيولوجي من بطون امهات الاعضاء سواء كانوا ختمية او انصارا بالالاف سنوياولا استقطاب ولا بطيخ ولا ايديولوجيا ولا افكار عشان كده الصغار دايما بعملوا الانقلابات لانهم ما قادرين اياكلوا في قدح واحد مع الجلاكين الكبار ولذلك ادعو ايضا من هنا الى تفتيت السلطة الديموقراطية وتوزيعهابالتساوى الى اعرض قاعدة من المشاركين حتى تكون الديموقراطية حقيقية تعبر عن اوسع قاعدة من المشاركين بدلا من احتكارها لكبار وما هم بكبار......وهم وحدهم المستفيدون من هذا القدح الواحد الكبير والظالم!!

تحياتي هشام

Quote: ولكن عندماالح عليه صديقي كي يعطيه السبب فخرجت منه عبارة ( مقززة) بالانجليزية

طيب الراجل احتفظ برأيه ولكن صديقك ألح عليه إذن مافي داعي للكلام التحت ده

Quote: هذا الحاقد الحاسد ....انتقد طريقة أكلنا للعصيدة وقال عليها

العصيدة بتقليه وتكالب الأيادي عليها كان بتمرض كان 3/4 السودان في خبر
كان
ما تعملوا لينا ملاوزات ياخوانا
لكن الكول يا هشام وترتر ليهو حبة شطة قبانيت
عجيبة ياخ

(يا ولد كلم الضباح ما اجدع البول ) وهي اهم عبارة كان يرددها عمى رحمه الله وهو من مدمنى اكل المرارة حيث كان حريصا جدا على هذا(البول) وهي عبارة كانت تشعرني بالقرف عند ذكرها كمادة تضاف الى المرارة وانا طفل وما ادركت معناها الحقيقي الا عندما كبرت وبعدها عرفت ان المقصود ليس ذلكم البول بل (المرارة او الصفراء او العتي او الاتى)وبعدها صرت من مدمنى ( البول بالمرارة)!!

(يا لد ما تنسى جيب معاك طايووق!!)


وايضاالعبارة اعلاه كانت جدتى تحرص على تذكيرى بهاعندما ترسلني الى ( الجزر) وانااحمل ذلكم السبت البلاستيكى وفي جيبي (طرادة) الزمن الجميل والى الان لم ادرك سر ارتباط النخاع الشوكى للخروف المسمى ( طايووق) بصاج العواسة
لعمل خبز الكسرة السودانية وهل هو كشف سودانى بحت اكتشفه جدودنا القدماء وهل هو امر يمكن ان نفاخر به العالمين.... ولا زال في اعتقاد امهاتنا الطيبات ان ( الصاج ما بقوم من غير طايوق والسيدة المعراكة بكل قاذوراتها لا تعترف باي نوع من الزيوت او الشحوم غير الطايوق لعمل الكسرة) ومنذ ذلكم الزمن ادركت ان الشعب السوداني هو الشعب المثقف والمتعلم الاول في العالم لانه الشعب الوحيد الذي يتناول خبزا له ( طايووق) يعنى كسرة فهمانة عندها طايوق وايضا يحب اللايوووق ولكن للاسف خرجنا ( لواييق) من غير ( طواييق) والمشهد السياسي الراهن يحكى عن هذه الحقيقة المحزنة حول شعب السودان(اللايوق من غير طايوووق)!!

يا ولد جيبوا لينا خمسة شوالات بعـــــــــــر لقطوهن من خلا الله داك مليان بحمير الله!

اعلاه كانت عبارة عفوية كنت اسمعها في قريتنا عندما يقترب منا موسم الامطار اي الخريف حيث لا بد ان نستعد له بكامل العدة والعتادمن تسليك للسباليق وترميم لاسقف البيوت ب(الرقيطاء) وهي نوع من التربة الطينية اللزجة السوداء الجيدة في ردم اسقف منازل الجالوص.. وايضا كان ولا زال بعر الحمير مادة قيمة لعمل الزبالة لكساء حيطاننا واسقف منازلنا بها وهي خليط من البعر مع قش القصب وبعض طين الرقيطاء والخليط يصلح مادة تقى حيطاننا من شر زخات المطر حتى لا تنخرها وتهددها بالسقوط وقد كان عملا سنويا روتينيا يؤديه اهلنا استعدادا لاستقبال الخريف!
ولكن حتى اليوم لا ادرى ما سر بعر الحمير وحده من دون بعر حيوانات الله وهو يصلح لعمل هذه الزبالة العجيبة حيث لم ار اهلى يستعملون بعر البقر او بعر الغنم او كور الابل...فقط يستعملون بعر الحمير...اتمنى من علماء الكيمياء السودانيين ان يبحثوا لنا عن الشفرة الكيميائية والتي كانت وراء اهمية هذا الكشف الخطير حول استعمال (الطايوق وبعر الحمير) في صناعة الكسرة والزبالة وايضا ما علاقة كيزان الازيار بكيزان السياسة والبشير والبشكير!!؟

السلام عليكم ورحمة الله
العنصرية عندكم حتى في بعر الحمير :
http://www.sudaneseonline.com/cgi-bin/sdb/2bb.cgi?seq=m...d=290&msg=1272867023

انت عارف يا محمد اي سليمان حتى الحمير عندنا فيها الحر وغير الحر!
والمصيبة اهلنا يعتقدون في غلاء الحمير البيضاء الطويلة والتي يقولون عليها حمير دنقلا الحرة
والتي يتودد البعض من الاهالي لاصحابها علهم يحصلون على (عشار) من نسلها الاصيل والكريم!
هذه عنصرية السودان حتى حيواناتنا فيها الحر وغير الحر والكريم وغير الكريم!
وده المجنني لحدى الليلة يا محمدانا في امريكا بلقى الوزين السمح الكندى الكبار التريان ده عايش في امن وامان جنب الامريكان لا بخاف منهم ولا حاجة قادل ومعشش جنبهم في امان الله وماشي اقدل قدام بيوتنا....لكن في السودان مستحيل نشوفوا في قرانا او في مدننا على طول تلقاهو ازازي خايف وراكي في الخلا وحذر جدا جدا من شعب السودان الزعلان لا بعشش في بيوتنا ولا في شدرنا حاجة عجيبة الى هذا القدر نحن شعب متوحش....لانو بس لو ظهرت بالغلط وزيزينة مسيكينة واحدة يا محمد اخوى في ميعة من ميعنا تلقى الحلال كلها مرقت الاعمى شايل المكسر والعندو بندقية ام روح ولا ام روحين ولا ابو عتلة كلهم مارقين شان اصطادوا الوزيزينة المسيكينة....عشان كده عندى اعتقادانو الطيور بتعرف البشر كويس وبتعرف سلوكهم..... وده السبب الخلا السمبر الشين ده قاعد مصاقرنا في ريسين قطاطينا وكشاشاتنا وشدر نيمنا وما حصل بالغلط رفعنا ليهو بندقية... ولا فكرنا ناكلو لا في دين حرموا ولا حاجة بس ما عارف سر العلاقة الطيبة شنو بين السودانيين والسمبرية ام قدوم وسر الحرابة والعداوة شنو بين الوزينة السمحة والسودانيين البحبوها وبشبهوا عليها جميلاتن....قدلة جنى الوزين اتاتوا.... واسفاااااي!؟

وسؤالى المحدد الى اطبائنا: هل بالفعل طريقة تناولناالطعام على صحن واحد مثل العصيدة والتي تشترك فيها عدة ايادى هل هو امر قد يضر بالصحة العامة وقد يجلب العدوى ام هو وضع عادى غير ضار ولا يؤثر على الصحة!؟

؟؟؟؟؟؟؟؟؟
؟؟؟؟؟؟؟؟؟؟؟؟؟
(((( وهو مبسوط تب من حاج النور التاجر الجلل بيتو ببعر الحمير الحرة الدنقلاوية المو مكادية)))
؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟

(((((( وهو مبسوط تب من حاج النور التاجر الجلل بيتو ببعر الحمير الحرة الدنقلاوية المو مكادية)))
؟؟؟؟؟؟؟؟؟؟؟؟؟

((بنزقا حبشي مكادة))
؟؟؟؟؟؟؟؟؟؟؟؟؟؟؟؟؟؟؟؟

ليه ما نعتبره اتكيت بدل قندفه وفلهمه
مع اني ما باكل العصيدة ابدا لكن لو اكلتها اكيد الملعقه اولى
بعدين فعلا ام فتفت والفسيخ والتركين ديل سمعنا عنهم حاجات كتيره ربنا يعافي السامعين
ويحفظ الجميع من كل شر

يا هشام تحياتي وشكرا للرد
((( حتى الحمير عندنا فيها الحر وغير الحر))))
يا زول الحمير شنو ؟
كتباتك دي فيها العنصرية وصلت بعر الحمير ذاتو .
قلت لي :(((( وهو مبسوط تب من حاج النور التاجر الجلل بيتو ببعر الحمير الحرة الدنقلاوية المو مكادية)))
؟؟؟؟؟؟؟؟؟
إنت تعرف يعني شنو المكادة ؟

يا العمدة يا صاحب!

إبني الصغير عندو صاحبو خواجة كندي ساكن جارنا وبمشوا المدرسة الإبتدائية سوا في مدينة
سانت كاثرين. ولدي بعزم صاحبو كل أسبوع وفي مرة من المرات جاني زعلان فقلت ليك مالك يا
ولد زعلان كدة؟ فقال لي بأن صاحبه أشاع في المدرسة بأن والديه (شخصي وزوجتي) ياكلان العظم (his parents eat bones) وطبعا بكون شافني حاضن لي عظم ماكن
بكُد فيه زي عيش الريف، فطيبت خاطر الولد وقلت ليه كويس اللي ما شافنا
بناكل تقلية بالعصيدة أو ويكة بي قراصة أو ملاح ورق بي كسرة...

أعتقد بأن كل الشعوب في الأرض لها أكلات لا يشاركها فيها أحد، فقد شاهدت شعوب غرب
إفريقيا يطبخون أشياء لو شممتها لأُغمي عليك في الحال ولكنها أكلات يحبونها
ولا بد من إحترام ذائقة تلك الشعوب.....

العزيز الكوشي الثائر زمراوي

كيفنك ومشتاقون وما قادرين نتقابل في (عفار وكجار ساس يسس)!

ياااخى انت كويس شافوك الوليدات حاضن ليك عضم حنين ومسالم...انا الولد احمد شافنى في الضحية الفاتت بدردم لي في كضم مرارة مكرب شطوطو نار ونفسي قايم في اعلى حالات التوحش وكضم المرارة(فشفاشو بره ودمو للركب) يا زول الولد انبهم وانخلع وبقى ميرود مهلوس ليهو يومين...شابكنى دادانت متوحش متوحش ده قرب اضرب لى 911 وكان اخوك مطرود هسع من الديار الامريكية بجريمة ارهاب ضد حيوانات الامبريالية المسالمة وقد يكون المصير ( غوانتانامو) بسبب كضم مرارة حنين واستقر اخيرا في معدة تتحدى جميع انواع الاكل....انا كنت متاكد لو صحابة زمان شافوا اكل المرارة عند السودانيين اكان قالوا عليكم بركوب الخيل والسباحة واكل المرارة!

خليناك بعافيةبالمناسبة يا زمراوى انا بالجد بالجد محتاج لي لفيديو يوتيوب فيهو عملية تجهيز المرارة السودانية من بداية اخراجها من بطن الخروف ومرورها بعملية اعدادها بك طقوسها...وانتهاء بعملية اكلها المعهودة.... ونترك هذا الشريط من غير تعليقات حتى نرى تعليق العالم حول هذه الظاهرة الغذائية المتوحشة قبل ان تنقرض!

اخونا محمد اي (الحبشي)!

Quote: إنت تعرف يعني شنو المكادة ؟

المكادة هي الحبشة... وبصل المكادة اي الثوم اي بصل الحبشة
والحمار المكادى هو الحمار من جذور حبشية!

فالحمار المكادى عند اهلنا والذين لا يعرفون حتى اليوم معنى (المكادة) فهو حمار
قصير قوى الارجل وهو يصلح لاعمال النقل والزراعة فقط...اما الحمير الدنقلاوية البيضاء الطويلة فهي حمير
فقط للقيافة والاناقة وللركوب فقط وهي في مقام السيارات الميرسيدس والهامر!

فيا زول خليك من الحساسيات الفاضية والهلاويس البتسوى فيها دي..ده موضوع للدردشة بعيدا عن السياسة


خايفك كمان تقول لي زول دى عارف معناها شنو يا هباني : برضو معناها للاسف في العبرية يمعنى رخيص وربما وردت الى قاموسنا المحلي من العنصريين اليهود في تواريخ عابرة وقد اطلقوهاعلينا كرقيق في زمن تجارة الرقيق لان الجنس الاسود كان اكثر الاجناس استرقاقا بينما الرق ما كان مرتبطا باللون ولكن معظم الحيف وقع على السود بسبب الاستعمار ولذلك يبدو عندهم الجنس الاسود ادنى مرتبة ولذلك غلاة اليهود حتى اليوم لا يعترفون بيهودية (الفلاشا) وهم يهود احباش اقحاح فاليهودى عندهم من كانت امه يهودية اي من نسل ابراهيمى نظــــــيف ولذلك يعيش (الفلاشا) اوضاعا نفسية سيئة في ارض الميعاد بسبب لونهم الذي لا يتسق مع مفاهيم غلاة اليهود!!

اختنا او بنتنا العزيزة ( وجن)

نحن السودانيين شوية حساسين في حكاية الخروج عن المالوف
فالذي ياتي بالجيد الجديد الخارج عن المالوف وخاصة لو كان المالوف
حاجة عليها ماخذ واقوال...على طول الناس تشيل حال الزول بالقندفة والقرضمة
و(عامل فيها مضيقة) واعتقد ان هذه سلبية في حياتنا وهي دوما تقف ما ضد التطور والتجديد
حتى لو كان الجديد هو الاجود والافضل والاجدر بالقبول.

مودتي

.

عاش كفاح العصيدة السودانية

لا عصيدة بلا شرموط ولا سمك من غير قرموط!

.

العمدة كيفك,
مو انت الوحيد العندو مشكلة مع طريقة اكل العصيدة عند اهلنا السودانين. حتى القريب دى, الاكل باليد عند معظم القبائل الجنوبية كان بيعتبر عار إذ ان كانت العادة ان لكل زول فى الاسرة عدتو البياكل بيو و معلقتو بتاع خشب. اما فتفت, فعمرى ما شوفت جنوبى البحبو. كل ماكولات الشمال غزت الجنوب من زمن ابوعاج.
الصحفى الكبير اتيم ياك اتيم دعاه احد تلاميذه السابقين الى احد مطاعم جوبا و استاذنا اتيم خرج بهذه الانطباعات التى تشابه ما كتبته:


http://www.gurtong.net/ECM/Editorial/tabid/124/ID/3187/...udanese-Cuisine.aspx

اخوى زكريا


تحياتي


احسن ليكم والله فرز العيشة كل زول بكورتو وبملعقتو!

ياخي نحن عندنا ناس الواحد لمن نكون في قدح عصيدة كاربة وحارة من نارها لو حاولت تهش ليك ضبانة حايمة ساكت
ولا حكيت راسك من حرورية الشطة...والله تلقاهو ضرب في هذه الفينة سبعة لقمات من النوع الكبير..يعني
تقول بياكل بكوريك ونحن بناكل بملاعق...فالوضع فيه مظلمة كبيرة حيث لن تستوى اليد الكبيرة مع الصغيرة
والخشم الكبير مع الصغير والزول السريع مع المتمهل..والحنكوش مع التربالي....فاحسن حاجة كل زول افرزو ليه عيشتو وبكورتو ان شاء الله اياكلها بعد بكرة!

.

.

.

.