Post: #1 Title: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-02-2009, 04:07 AM
نعم ان القانون لا يحمي المغفلين وبخاصة نحن القادمين من قعاقير افريقيا الي بلاد العم سام حيث كل يوم هناك قضية مستجدة مع تعقيدات الحياة وهنالك حزم من قوانين تتناسل كل يوم لتنظيم هذه التعقيدات الحياتية ولكل داء دواء وبجهلي وتخلفي كدت ان ادخل وراء القضبان الامريكية لاول مرة عندما حاولت بشهامة سودانية حمقاء حملتها معي الى ما وراء البحار لانصر بهاامراة بيضاء تستجير بى من قوانين بلادهاالعجيبة وانا بجهلى لا اعلم القصة وقد كانت السيدة زبونتي التي اوصلتها الى مكان ما حيث كانت سيارتها في موقف عام وعندما همت بالنزول من التاكسي ترجتني بتوسل ( جهجه) نياط قلبي وهي تطلب منى المساعدة وبسودانيتي تحمست للفزعة ونصرة هذه السيدة المحترمة وقد سبقتني الى سيارتهاو فتحت باب سيارتها الامامي حيث مقود السيارة وطلبت منى المساعدة وقد حسبت ان الامر يتعلق بخلل الكتروني او ميكانيكي الم بالسيارة وهي تطلب منى المساعدة وهذا مما حمسنى للمساعدة رغم اني لا املك الخبرة الفنية الكافية للتصدى لاي خلل في السيارة ولكنها (سودانيتي) دفعتنى ان اقبل التحدى وازعم انى( مقددها) ولكن طلبهاللمساعدة كان غريبابالنسبة لي اذ اخرجت السيدة من تحت المقود ( خرطوشا) بلاستيكيا ملحقا بجهاز اشبه بالهاتف الجوال عليه شاشة والجهاز مثبت بوصلة كهربائية على المقود في مكان المفتاح وطلبت منى السيدة بتوسل ان اساعدها وقد حددت لي شكل المساعدة وهي ان انفخ على الخرطوش نفختين قويتين فقط وهي كل المساعدة.. وارتبت جدا لهذا الطلب السهل والذي في امكانها ان تفعله لانه لا يحتاج جهدا عضليا ولا جهدا ذهنيا وقد احست بارتياب نظراتي الغبية ولكنها زادت في التوسل وحاولت بنفسها مرات ومرات ان تنفخ ولكن لم افهم بالظبط ماذا تريد السيدة واخيرا لعنت ابليسى السوداني الذي كاد ان يجردنى من نخوتى وشهامتى المتخلفة وانا ارفض لهذه الفاتنة طلبا بسيطا جدا وهو مجرد نفخة لن تضيرني شيئامن مجموع نفخاتي وانا من امة ( النفاخين) نحن ونحن ونحن ونحن فمن غيرنا يفوقنا في النفخ والنفاخ فتقدمت اليها منفوخا لامنحها ما تطلبه وهو كل ما نملكه اي هذا النفخ السوداني العجيب وبالفعل بنفختين سودانيتين قويتين سمعت بعدهما اصواتا تصدر من الجهاز الملحق بالخرطوش وبعدها بدا محرك السيارة في العمل كانما ادرت المفتاح وهنا هللت السيدة لحضرة النفاخ الاعظم وكادت ان تقبلني لولا انها ادركت ان الامر لا يحتاج كل هذا الانبهال امام هذا العبد الغبي ( النفاخ) وبلحظات تشعبطت سيارتها ورسمت ابتسامة نصر على ثغرها الكرزي ورمقتنى بنظرة احسست بعدها اني مجرد غبي اهبل وفي ثوان اختفت الحورية ورجعت ادراجي الى التاكسي مزهوا بنفختى ولكني ايضا كنت مليئا بالوساويس من هذا الحدث الغريب وبعد يومين عندما انتفخت كعادتنا نحن السودانيين وانا اسامر صديقي الاثيوبي وقد كنت مزهوا وانا احكى له القصة وبطولتي في نصرة هذه الفاتنة البيضاء.. وكنت اتوقع ان يثنى على صديقي وعلى رجولتي ونخوتي وما احبطني انه ( انفقع) بالضحك الهستيرى حتى كاد ان ( يتفنقل) من مقعد سيارته وهو يقول لي : ايها الغبي لو كان هنالك بوليس وشاهدك تنفخ هذا الخرطوش لكنت اليوم في السجن راء القضبان لانك ترتكب جريمة مساعدة مدمنة كحول لتقود سيارتها وهي مشبعة بالكحول في دمها لدرجة انها لا تستطيع من خلال هذا الجهازالمخصص لضبط المدمنين ان تقود سيارتها الا في حالة ان يكون مستوى الكحول في دمها بنسبة معينة وهي وحدها من خلال زفرة تجعل شفرة هذا الجهاز تسمح لها بالمرور لاشعال محرك السيارة وتقودها وهذا ما كان متاحا لها لانها يبدو كانت ثملة ولذلك استخدمتك انت ايها الغبي الساذج النفاخ ان تؤدي اليها هذه الخدمة بنفخة من زفيرك الخالى من الكحول وهو وحده الذي يسمح بفتح شفرة هذا الجهاز ومن ثم يسمح باشعال محرك السيارة واحمد الله انه لم يكن هنالك بوليس لان القانون لا يحمى المغفلين من امثالك من امة النفاخين السودانيين وقد كان هذا اليوم تاريخيا في حياتي والذي اكتشفت فيه بالفعل اننى من امة النفاخين!
واليكم سادتي هذا الشريط التوضيحي لهذا الجهاز العجيب وايضا حول اهتمام الدولة الامريكية برعاياها(السكرانين) وكيفية ضبطهم والعناية بهم بينما دولتناالرسالية بت الحنوت رئيسها لا يتورع ان يقتل اما ترضع في صغيرها والشعب والام والصغير تحت جزمة الرئيس النفاخ!
Post: #2 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-02-2009, 04:21 AM Parent: #1
واليكم اخواتي و اخوتي القراء انموذجا حيا من امة النفاخين ومن هؤلاء هذا النفــــــــــــــــــاخ العجيب!
Post: #3 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-02-2009, 04:24 AM Parent: #2
Post: #4 Title: Re: التكاسي هباني النفاخ كاد ان يدخل السجن لولا عناية الله ! Author: معاوية المدير Date: 10-02-2009, 04:42 AM Parent: #3
ســــــــــــلام...
هباني يا مُنتفخ الأوداج الله مرقك...
تحياتي ليك، وعيد سعيد...
Post: #9 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-02-2009, 06:35 AM Parent: #4
معاوية
سلامات
والله اخوك يبدو جبارة جدنا (كيوات) قوية شديد لحقتنا في بلاد الخواجات وغتت علينا ويبدو انه كان نفاخا عظيما ومنه استمدينا هذه النفخة!
Post: #21 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-04-2009, 00:47 AM Parent: #2
.
Post: #5 Title: Re: التكاسي هباني النفاخ كاد ان يدخل السجن لولا عناية الله ! Author: فضل الصادق Date: 10-02-2009, 04:58 AM Parent: #1
الاخ هبانى تحياتى الطيبة لك الإباء والنجدة السودانية والشهامة ربما توردنا موارد الهلاك لى تجربة شخصية بسيطة كنت فى عمان العاصمة الاردنية فدخلت إلى مول لبعض الحاجيات البائعة لما عرفت أننى سودانى طلبت منى أن أمنحها الهاتف الخاص بى للاتصال لأنها ليس لديها رصيد وقد كان لكنها إتصلت مع شخص ما واسمعته كمية من الإساءة تشيب لها الولدان وكنت أهم أن أخذ منها التلفون لكننى اتريث فى كل مرة واتركها لتخلص عباطة منى طبعا ، ولما إنتهت لومتها لماذا تستعلمى هاتفى للاساءة لاحدهم فقالت لى انه خطيبى ولا يرد على من تلفونى الخاص ، المهم لما رجعت إلى السكن فإذا بالشخص يتصل على مين انت فأرد انا فلان السودانى وبتعرف فلانة من فين وما شكل علاقتك بها ليس لدى بها علاقة هى طلبت منى طلبا وانا اجبت طلبها المهم فى الامر هددنى الرجل وقال لى بالحرف انه ضابط فى احد الاجهزة الامنية وانه سوف يفعل لى كذا وكذا ولا يترك هذا الامر وان هذا شرف وماادراك مع العلم ان الاردن تقوم على العشائرية ولديهم حتى الان مسائل الشرف وكذا خلاصة الامر اننى ندمت ايما ندم على طيبتنا السودانية التى تسبب لنا كثير من المشاكل لكننا لا نستطيع أن نتخلص منهاونمارسها فى كل البقاع حتى لو كانت النتيجة ما يضرنا .
Post: #6 Title: Re: التكاسي هباني النفاخ كاد ان يدخل السجن لولا عناية الله ! Author: نيازي مصطفى Date: 10-02-2009, 05:07 AM Parent: #5
Post: #7 Title: Re: التكاسي هباني النفاخ كاد ان يدخل السجن لولا عناية الله ! Author: Wasil Ali Date: 10-02-2009, 05:11 AM Parent: #6
والله اضحكتنا ياهشام
Post: #8 Title: Re: التكاسي هباني النفاخ كاد ان يدخل السجن لولا عناية الله ! Author: MOHAMMED ELSHEIKH Date: 10-02-2009, 06:24 AM Parent: #7
Quote: امراة بيضاء
العمر كم يا هباني
بعدين
الأمريكان الهبل ديل لمان عملوا الجهاز دا للسكارى ما عارفين انو بلدهم دي مليانة نفاخين؟ يعني انا سكران بكل بساطة انادي اي نفاخ. و بالمناسبةدي والله شغلانة كويسة الواحديحوم حول "علب الليل" و النفخة ب 15 دولار و ما تقول اخوك عازف ساكسفون ممكن ينفع في الشغلانة دي.
Post: #15 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-02-2009, 02:51 PM Parent: #8
ود الشيخ اخوي
سلامات
Quote: الأمريكان الهبل ديل لمان عملوا الجهاز دا للسكارى ما عارفين انو بلدهم دي مليانة نفاخين؟ يعني انا سكران بكل بساطة انادي اي نفاخ. و بالمناسبةدي والله شغلانة كويسة الواحديحوم حول "علب الليل" و النفخة ب 15 دولار و ما تقول اخوك عازف ساكسفون ممكن ينفع في الشغلانة دي.
والله حظك ما دام عازف ساكسفون قطع شك بتنفخ قطــــــــــــر عديل الحق يا اخوي المولد ده قبل ما اجوا اولاد بمبة النفاخين بالجد بالجد ديل نفخوا العالم كلو وورموه كمان!
Post: #13 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-02-2009, 02:32 PM Parent: #7
العزيزان نيازي وواصل
سلامات
وزادكم الله ضحكا من السرور حد الانفقاع وشر البلية ما يضحك!
Post: #10 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-02-2009, 06:40 AM Parent: #5
فضل اخوى
سلامات
Quote: اننى ندمت ايما ندم على طيبتنا السودانية التى تسبب لنا كثير من المشاكل لكننا لا نستطيع أن نتخلص منهاونمارسها فى كل البقاع حتى لو كانت النتيجة ما يضرنا .
يا زول امسك في قيمك السودانية وطيبتك دي شديد دي عملة صعبة في الزمن العفن ده بس اعمل حسابك والحذر كل الحذر من الملاعين!
مودتي
Post: #11 Title: Re: التكاسي هباني النفاخ كاد ان يدخل السجن لولا عناية الله ! Author: Sudany Agouz Date: 10-02-2009, 07:09 AM Parent: #10
أخوى هشام ،
الله يجازى شيطانك .. ضحكتنى جنس ضحك .. بالليل ده .. حسى دى .. الساعة قاربت على الواحده صباحاً .. ما جانى نوم .. لسبب أقولو بعدين عشان ما تقول أنا كضاب ..
المهم قلت .. لمن كباية النعناع المغلية دى تبرد شوية .. أقوم أفتح الكمبيوتر شوية .. اشوف آخر الأخبار .. واول ما فتحته .. وقع نظرى على .. أخوى هبانى .. كان حيروح فى شوربة موية .. وكمان يروح فى كزيرمة الامريكان .. كده أخش وأقرا الموضوع ..
و بشيش .. بشيش .. أها .. وليي قدام .. ألقى ليك النفخ والنفيخ .. طوالى اتذكرت .. موضوع النفخ الحاصل على .. أتارى .. عمك .. بعد ما خت راسو على المخده .. شعر ليك بطنوا زى الطار .. قلت ما فى فايده .. أحسن شيي .. ناس أهلنا فى السودان .. قالوا فافى شيتاً يضيع النفاخ ده .. غير النعناع المغلى .. وما كضبت خبر .. وهاك الكركبه فى عدة المطبخ .. كركبه فى العتمة .. لحدى ما لقيت ليك حلة مطرفة .. وياها والنعناع اشتغل .. جبت كبايتى ويانى طلعت فوق .. للكمبيوتر .. وقريت حكايتك .. مع النفخ والنفاخ والنفاخين .. وأنا حسى قاعد أشرب فى النعناع .. حق النفاخ .. نفاخ البطن .. ما حق نفاخك داك ..
لكن أقوليك شيى يا هشام أخوى .. صدقنى .. سيبك من حكاية التكاسى ولا التكسى .. اللى انت خامى بيها الناس .. انت فنان .. وأنا أقترح عليك .. تلملم وريقاتك دى .. اللى قاعد تكتب فيها هنا .. وكل مواضيعك السمحة دى .. وتعمل ليك كتاب .. صدقنى أنا بتكلم جد .. ويا زول .. سيبك .. وسمى الكتاب .. يوميات تكاسى تكساسى .. ومين عارف .. وان شا الله يترجم للانجليزية .. ويكون عن قريب .. من أكثر الكتب المباعة بأمريكا .. وعشان أهلك اللى بالى بالك .. يبغروا .. ويقولوا معقول .. هبانى .. يا هو هبانى .. عمليهو كتاب .. هز بيهو أمريكا .. طبعاً أخير من أكل الويكا ..
أظنو .. كفايه كده يا هبانى .. الحمد لله كباية النعناع خلصت .. والنفاخ راح .. وأنا قايم ماشى أرتاح .. وتصبح على خير .. عمك العجوز .. أرنست
Post: #12 Title: Re: التكاسي هباني النفاخ كاد ان يدخل السجن لولا عناية الله ! Author: عبدالكريم الامين احمد Date: 10-02-2009, 07:33 AM Parent: #11
سلام يا العمدة وياخي نفتخك القربت تجيب السجن ضحكتني شديد.. والموضوع ده حقو يتقفل هنا لانو شرامتنا المرازيهم الحكومة ومطلعة عينهم وحلتهم عطالة يتسكعون في فرندات الاسواق لو سمعو وقرو كلامك ده.. اللوتري الجاي العميان بشيل المكرسح وبجوكم دافريين كنفاخيين رويانين من هواء الربوع الافريقية وما فارقة معاهم حكاية سجن وغرامة دي.. والمهم هو الدولار.. والشغلة مادايرة معاهم تعب شديد سوي لبدة في زقاق ضيق من زقاقات الاندايات في امريكا دي وهااااااك يا نفخ لعربات الخواجات والخواجيات السكرانين مع جهازهم الابن لذينة ده.. 1-عربية صالون صغير... النفخ والتدويرة 20 دولار 2- عربية بيكب ومتوسطة النفخ 30 دولار 3- فور ويل درايف 50 دولار...
تعرف ناسي ديل لو قعدوا معاكم وضربو الجكن والبيرقر كمنجة ده وضربهم هبوب امريكا العجيب داك حرم مستعدين لو سواق قطر سكرجي ينفخو يدورو ليهو القطر زي الما حصلت حاجة
وتحياتي وشكر علي الحكي العجيب
Post: #14 Title: Re: التكاسي هباني النفاخ كاد ان يدخل السجن لولا عناية الله ! Author: عمر عبد الله فضل المولى Date: 10-02-2009, 02:37 PM Parent: #12
Quote: طلبا بسيطا جدا وهو مجرد نفخة لن تضيرني شيئامن مجموع نفخاتي وانا من امة ( النفاخين) نحن ونحن ونحن ونحن فمن غيرنا يفوقنا في النفخ والنفاخ فتقدمت اليها منفوخا لامنحها ما تطلبه وهو كل ما نملكه اي هذا النفخ السوداني العجيب وبالفعل بنفختين سودانيتين قويتين
Post: #17 Title: Re: التكاسي هباني النفاخ كاد ان يدخل السجن لولا عناية الله ! Author: عزيز عيسى Date: 10-02-2009, 03:02 PM Parent: #14
هههههه يا هباني يا نفاخ والله حكايتك حكاية.. عيد الأضحى فضل ليه شهرين ينجهز ليك (العتي) عايزنك تجي تنفخ لينا الفشفاش بتاع خروف الضحية.
Post: #23 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-04-2009, 04:30 AM Parent: #17
انت خروفكم ده يا كافي لبلا بشلع ولا شنو كمان عشانكم النفخة بخمسةدولارات مع كضمين مرارة!
تحياتي للاسرة
Post: #19 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-03-2009, 08:01 AM Parent: #12
كيكي يا منعول
كل عام وانت بخير
Quote: والشغلة مادايرة معاهم تعب شديد سوي لبدة في زقاق ضيق من زقاقات الاندايات في امريكا دي وهااااااك يا نفخ لعربات الخواجات والخواجيات السكرانين مع جهازهم الابن لذينة ده..
شكلك كده نويت الجيه علينا مع الرزق بتاع النفخي ده وانت من اعز بطون قبيلة النفاخين! ومن هو انفخ من شعب السودان النفاخ الذي نفخ الكرة الارضية بعد ان انقدت حتى صارت كرة نحن النفخ نفخنا ونحن الساس ونحن الراس ونحن الكاس مدور في حلوق الناس ونحن العشانا خدرة وفطورنا انناس!
Post: #16 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-02-2009, 03:01 PM Parent: #11
الحبيب ارنست العجوز
سلامات
ايه رايك نحتكر البزنس بتاع النفخي السري ده في كل عموم تكساس نفخة القطر بالف دولار والجرارات ب100 دولار والسيارات العائلية 50 دولار والمواتر وما شابهها 20 دولار بس ولو عاوزين منفاخ عجلات برضو بنشتغل...خليك يا حبيب فكر لي في البزنس الجابو لينا الله بالصدفة ساكت ده.....من غيرنا ومن غيرنا ومن غيرنا ومن غيرنا ونحن ونحن الشرف الباذخ يا دراج المحن وسير سير يا بشير والبشير النفاخ بتاعنا بقى زي الركشة في ام درمان الماقادرة تقطع الكبرى للخرطوم وهو ما قادر اقطع بحر المحيط زي بقية الرؤساء بس فالح لي اتلب زي العتود من ارتريا واثيوبيا وليبيا ومصر وبالعكس وعند اللزوم السعودية..يعنى رئيس ركشة بس!
Post: #18 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-02-2009, 03:26 PM Parent: #16
و هذا السيد المنفــاخ قديم ومعتــــــــق ولا يختشي احد هتيفته الكبار بوصفه اسدا وهو يظلم سعادة الاسد وايضا حبيب الكادحين...بينما السيد النفاخ وهو (مطلع دين) الكادحين وناهب زرعهم وضرعهم ومضيع وطنهم حين اعلن عن وجه خائن عتيق لم ينس صنعته التاريخية وهو بلا استحياء يتحالف مع الخونة والفاسدين من اعداء ذات الكادحين الذين زعم الهتيف انه حبيبهم واملهم!
Post: #20 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-03-2009, 02:39 PM Parent: #18
السودانيون هم شعب الله النفـــــــــاخ..على بالحرام نحن احسن العرب ونحن اشطر الافارقة ونحن الذين انجزنا اعظم ثورات ونحن اعظم من فرط في الثورات ونحن الذين عشنا الديموقراطيات ونحن اعظم من اهان الديموقراطيات ونحن اعظم من انجب القيادات ونحن اعظم من يخضع لتلكم القيادات...... ونحن ونحن...
Post: #22 Title: Re: التكاسي هباني النفاخ كاد ان يدخل السجن لولا عناية الله ! Author: Ammir Mohamed Date: 10-04-2009, 03:55 AM Parent: #20
والله نفختنا بالضحك!!
تعرف مرة أنا في فيرجينا برضو في الفندق طلبت المصعد عشان يجي الطابق الثاني ولمن وصل كان في واحدة بيضا في السبعين من عمرها تقريبا واقعة واستفراق وريحة اللطة مالية المصعد والكاس بتاعها مكسور.. أخوك بعد ما خلاص عايز يمد يدو يرفعها اتذكر شغل السلبطة وانت الدخلك شنو ... طوالي جريت واطي خليتها ليك مرمية زي الشبط ومشيت بلغت الاستقبال بتاع الفندق وكانت واحدة مننا (افريقية الأصل) وتصدق أول سؤال كان شنو! Did you tocuh her! قلت ليها لا قالت لي أحسن لأنو ديل ممكن يقولو انت الرميتها... واتصلت بي 911 وجو اتولوا الأمر...
سلامتك يا كبير ووقعة الشاطر بي 1000
أمير
Post: #24 Title: Re: التكاسي هباني النفاخ كاد ان يدخل السجن لولا عناية الله ! Author: Rashid Elhag Date: 10-04-2009, 07:07 AM Parent: #22
الحبيب الناظر هشام.....سلامات......يا زول أنفخ ولا يهمك.....حرم ما بتجيك عوجة...إنت ما محروس ببركة جدك الكبير ....تحياتي..
راشد
Post: #28 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-05-2009, 09:37 AM Parent: #24
العزيز دكتور راشد
سلامات
وهو نحن عندنا شي مما قمنا غير النفخي الرئيس نفاخ والوزبر نفاخ والمدير نفاخ والعسكري نفاخ والسياسي نفاخ والشاعر نفاخ والورل بتاعنا قالوا ( انفخ) ورل في الدنيا! وانا قررت ان اتقدم باقتراح بتغيير اسم السودان الى جمهورية النفاخين الله انفخنا ان شاء الله اوقفنا قرب عديل!
Post: #25 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-05-2009, 03:10 AM Parent: #22
امير
سلامات
Quote: طوالي جريت واطي خليتها ليك مرمية زي الشبط
افو افو كيفن يا زول تخلي الحرمة بالحال ده وتمشي وتخليها! بينى وبينك عملت خير الكلمت ناس الفندق اصلو المتسلبطين كتيرين ويوم سودانيتنا دي بتجيب خبرنا!
مودتي واهلا بيك
Post: #26 Title: Re: التكاسي هباني النفاخ كاد ان يدخل السجن لولا عناية الله ! Author: محمد عبدالله مختار Date: 10-05-2009, 06:39 AM Parent: #25
هشام كيف الحال .. والله ضحكتنا بي موضوع النفخ ده ..
بالنسبة للإختراع -من وجهة نظري الخاصة- بعتبرو فاشل جدا لوجود النفاخين دي واحدة .. التانية ممكن زول يشتري 4 ولا 5 همبوكات يملاها هوا نضيف قبل ما يشرب ويحتفظ بيها في العربية ، لمن يجي يدور يركب بوز الهمبوكة في خشم الجهاز ده ويعصر الهمبوكه وهاك يا نفخ والعربية تدور زي الما حصل حاجة ..
اختراع فاشل وغبي كمان .
Post: #27 Title: Re: التكاسي هباني النفاخ كاد ان يدخل السجن لولا عناية الله ! Author: صبري طه Date: 10-05-2009, 06:48 AM Parent: #26
عمنا هباني ...
يعني لو جيتكم باللوتري ممكن اشتغل نفاخ !!!
دمت بود ،،،
Post: #30 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-06-2009, 02:49 PM Parent: #26
ودمختار
سلامات
Quote: اختراع فاشل وغبي كمان .
والله الاختراع ناجح مية المية ما فيهو كلام لانو الناس ديل صادقين زي حكاية المؤمن صديق عندنا وما عندهم زول بكضب وبنفخ زي نفخينا وبفترضو الصدق عند بعضهم وما بعتقدوا ممكن اكون في بني ادم ( نفاخ) زي هباني اعمل العملية المهببة دي لزولة طيبانة! هسع براك شوف مداخلات السودانيين في الخيط ده...كلهم عاوزين اجوا امريكا وابقوا نفاخين باللف والدوران واكتشفوا ليهم طريقة عيش جديدة فكروا احتكروها لانهم اصلا من شعب نفاخ... وخايف اكون في هسع سودانيين حايمين قدام الاندية والبارات الامريكية شايلين ليهم منافيخ لانهم هم ظااتهم من النوعية المابتقدر تنفخ الجهاز ده...يعنى ديل من النوع النفسو بس اعمل قعدة سكر براحة في السودان..!
Post: #39 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-25-2009, 01:48 PM Parent: #25
.
Post: #29 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-05-2009, 09:36 PM Parent: #1
.
Post: #31 Title: Re: التكاسي هباني النفاخ كاد ان يدخل السجن لولا عناية الله ! Author: غادة عبدالعزيز خالد Date: 10-06-2009, 04:07 PM Parent: #29
Quote: لو كان هنالك بوليس وشاهدك تنفخ هذا الخرطوش لكنت اليوم في السجن راء القضبان لانك ترتكب جريمة مساعدة مدمنة كحول لتقود سيارتها وهي مشبعة بالكحول في دمها لدرجة انها لا تستطيع من خلال هذا الجهازالمخصص لضبط المدمنين ان تقود سيارتها الا في حالة ان يكون مستوى الكحول في دمها بنسبة معينة وهي وحدها من خلال زفرة تجعل شفرة هذا الجهاز تسمح لها بالمرور لاشعال محرك السيارة وتقودها وهذا ما كان متاحا لها لانها يبدو كانت ثملة ولذلك استخدمتك انت
يا حليلك يا هشام الليلة كان نكون شايلين كيس البرتقال وكمان معاهو إثنين كيلو موز وجايين علشان نسلم عليك في السجن.. غايتو، بركة الربنا سلمك وتاني أبعد من النفخ لو سمحت.. تحياتي للأسرة مودتي
Post: #32 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-07-2009, 08:10 AM Parent: #31
الاخت غادة
سلامات
Quote: يا حليلك يا هشام الليلة كان نكون شايلين كيس البرتقال وكمان معاهو إثنين كيلو موز وجايين علشان نسلم عليك في السجن.. غايتو، بركة الربنا سلمك وتاني أبعد من النفخ لو سمحت..
تخيلي كل هذا بسبب نفخة من نفخات شعب السودان النفاخ!
تحياتي للاسرة الصغيرة وتحية خاصة لسعادة العميد ابو خالد
في امان الله
Post: #33 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-07-2009, 01:14 PM Parent: #1
>
Post: #34 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-07-2009, 10:43 PM Parent: #33
.
Post: #35 Title: Re: التكاسي هباني النفاخ كاد ان يدخل السجن لولا عناية الله ! Author: المسافر Date: 10-08-2009, 05:15 AM Parent: #34
Quote: .بنفخة من زفيرك الخالى من الكحول
على هامان يا فرعون
قال خالي من الكحول
صورتك دي حسي خالية من الكحول؟؟؟
ده تكسيك ذاتو مولع ....
نفختنا ياخ....!!!
Post: #36 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-09-2009, 08:25 AM Parent: #35
.
Post: #40 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 11-22-2009, 09:57 AM Parent: #34
.
Post: #37 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 10-09-2009, 03:26 PM Parent: #1
.
Post: #38 Title: Re: التكاسي هباني النفاخ كاد ان يدخل السجن لولا عناية الله ! Author: حسن حماد محمد Date: 10-10-2009, 00:22 AM Parent: #1
هشام تحياتى
أوافق العم أرنست راية
وحقيقةً لدى فكرة مجلة عربية بنيويورك
وفكرت فى اختيار مجموعة للمشاركة فيها
ودوماً اسمك يلوح بخاطرى وممكن نتفاكر أكثر
وكنت قد بدأت فى مشروع كهذا ولكن لم أستمر
وحقيقة يا أخى تمتلك مقدرة على الكتابة والسرد جديرة بالاحترام والتأمل
Quote: لكن أقوليك شيى يا هشام أخوى .. صدقنى .. سيبك من حكاية التكاسى ولا التكسى .. اللى انت خامى بيها الناس .. انت فنان .. وأنا أقترح عليك .. تلملم وريقاتك دى .. اللى قاعد تكتب فيها هنا .. وكل مواضيعك السمحة دى .. وتعمل ليك كتاب .. صدقنى أنا بتكلم جد .. ويا زول .. سيبك .. وسمى الكتاب .. يوميات تكاسى تكساسى .. ومين عارف .. وان شا الله يترجم للانجليزية .. ويكون عن قريب .. من أكثر الكتب المباعة بأمريكا ..
Post: #41 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 11-22-2009, 04:24 PM Parent: #1
>
Post: #42 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 11-25-2009, 08:00 AM Parent: #1
.
Post: #43 Title: Re: التكاسي هباني النفاخ كاد ان يدخل السجن لولا عناية الله ! Author: عبد السميع دفع الله Date: 11-25-2009, 08:13 AM Parent: #42
يا ودهبانى انت فى امريكا وسائق تاكسى يعنى مقددهاوعامل فيها الجمرى وتفوت عليك حاجة زى دى
انا غايتو شايف انك كنت تأكلها فى حنانك وتسكت عليها بدل ما تقول دلاك ونصحك واحد من اولاد
ود عررررتا؟؟؟؟؟؟
تحياتى
Post: #44 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 11-28-2009, 01:45 AM Parent: #43
العزيز عبد السميع
سلامات وكل عام وانت بخير
Quote: انا غايتو شايف انك كنت تأكلها فى حنانك وتسكت عليها بدل ما تقول دلاك ونصحك واحد من اولاد
ود عررررتا؟؟؟؟؟؟
يااااخ كان اكلناها في حنانا امانة ما بقعوا فيها كمان سودانيين زينا وكدى اروحوا كمان شمار في مرقة عشان كده غلنا نخلي الغتاتة ونوضح للناس مطبات التكنلوجيا الامريكية والممكن بجهلك بيها مرات تغتس حجرك لو ما عارفها وصلت وين!
Post: #45 Title: Re: التكاسي هباني النفاخ كاد ان يدخل السجن لولا عناية الله ! Author: هشام هباني Date: 12-01-2009, 03:13 AM Parent: #1
