كــــلام خـاص شـديد بتـــــــــاع كبار بس ؟؟

كــــلام خـاص شـديد بتـــــــــاع كبار بس ؟؟


10-31-2005, 11:40 AM


  » http://sudaneseonline.com/cgi-bin/sdb/2bb.cgi?seq=msg&board=138&msg=1200203253&rn=3


Post: #1
Title: كــــلام خـاص شـديد بتـــــــــاع كبار بس ؟؟
Author: هشام هباني
Date: 10-31-2005, 11:40 AM
Parent: #0

بالامس اضحكني صديقي جدا ونحن كالعادة نتهاتف في نهاية عطلةالاسبوع بالاتصالات
( الملح) من خلال الهاتف الموبايل وامتدت الونســــة ونحن ابتدأناها بحال البلد والسياسة وقرف الانقاذ وامير مفسديها عمر البشير وبطانته الفاسدة وزيارات الشيطان الترابي الي اريتريا وخنوع وخضوع التجمع الوطني الفشوش وازدياد حالات الغلاء وقطع التيار الكهربائي في العاصمة الرسالية الخرطوم عاصمة السخافة العربية الخرطوم ومرورا بارزاق المهنة وانتهاء بالجو والذي كان بصراحة ( جـــــو فــول) غائما وماطرا وهذه البلدان ( الكافرة) وهي مقدمة على فصل الشتاء وهو فصل متواطيء مع جماعات الامر بالمعروف والنهي عن المنكر حيث تستتر النساء حد التنقب والحجاب القسري تواطؤا مع هذا الموسم الكـــــــــوز وهي تودع موسم العورات ذلكم الصيف العلماني الليبرالي الخليع وهو موسم عـــورة يهابه اصحاب الذقون والمشاريع الرسالية ولكنه محبب لديهم حيث لا امكانية غض الطرف هنالك وغير عملي ذلك وانت تعيش محاطا بكل العورات عطرا وجسدا وصوتا غنجا ولذلك ( كسروا ركب) هنالك حيث لا رقيب ولا عتيد منذ ايام السيد قطب واخرين....
(المهم خلونا في الكلام الجد وصاحبي راجل صريح جدا جدا قال لي عارف يا هباني اخوي انا والله المحيرني من ما انا شافع صغير عندي سؤال عامل لي حساسة بل كمان حسكنة وكنت خجلان من زمان ومالاقي زول اسالو ليهو ولكن الحمد لله خلينا نحن كبارفي بلاد الخواجات دي نفضفض واصارحك و نتناقش فيهو بعد ما الحمد لله عرسنا وكملنا نص دينا وجبنا الوليدات والبنيات وعايشين في البيوت السمحة وكل زول هسع في الزمن ده الولد باوضتو والبت
باوضتها والراجل والمرة باوضتهم يعني الامور تمام التمام..
لكن يا هباني اخوي دحين نحن لمن كنا شفع صغار فوق بيوتنا في ناس العايلة كلها تعيش مندفسة في قطية الام والابو والوليدات والبنيات صغار وكبار اندفسوا كلهم في القطية وانوموا للصباح .. وكمان هناك في بيوت اوضة وديوان دايما الام ووليداتهاالصغار وبناتها بنومو في العوضة الواحدة والابو والوليدات الكبار بنومو في الديوان ومرات معاهم ولد قريبهم ساكن معاهم جاي للقراية وقاعد في الديوان يعني الامور واضحة وبعدين الام دي اصلو ما بتاكل مع ابوك ابدا وماحصل امي وابوي قعدوا فوق صينية واحدة اكلوا وما حصل سمعت بي امي نادت ابوي باسمو دايماتناديهو بابو فلان وابوي اجي صاري وشو تقول كاتل ليهو زول واتنحنح وما بناديها باسمها بس بام فلان ودايما تلقاهو نايم وقاعد في الديوان واياكل في الديوان مع الضيوف ..... يعني ما عندو حاجة اسمها اوضة نوم خاصة بيهو وبي الحاجة الوالدة..

اها يا ود هباني اخـوي الحاجة الله اديها العافية كل سنة حامل وتزيد البيت بجاهل لمن البيت ده انسرف بالجهال وشي داية وشي وجــــــع ( الله لي الله لي) ونسوان ماليات البيت اصبرن فيها مع كل ولدة وكمان سماية يعني حكاية تمخول الراس والجهال الحمدلله بعيشوا وبكبروا كلهم في العوضة الواحدة دي والبيت تلاتين سنة ما بزيد ياهو ذاتو والحاج ياهو ذاتو مع الوليدات نايم فوق الديوان..

والسؤال يا ود هباني اخوي المحيرني وعامل لي حسكنةليوم الليلة وانا هسع راجل كبير( انا لحد هسع ما عارف الحاج الوالده ده كان بلاقي الحاجة الوالدة وين عشان يجيبوا العيال الكتار ديل.....؟؟؟
وبعدين يا ود هباني اخوي الحاجة لمن تولع ليها حفــــــرة دخان وتتحنن والوالدجاي من سفرا بعيد لمن ازرزروها العيال الكبار في حكاية الدخان دي تقول ليهم : (حاسة برطوبة) مع انو جو السودان حار جاف صيفا وحار جاف شتاء يعني ما في اي رطوبة.. والوالد لمن اجي من السفر ولا بسلم عليها حتى في ايدها بس اجي مصرصر وشو العن قفاهو..

بعد السؤال استغرقتني نوبة من الضحك المتواصل انقذني منها زبون كان يخبط على باب التاكسي ويود مشوارا وهنا اجبت على صديقي بانني ساحيل هذا السؤال لرجال ونساء المنبر
علهم يعطوننا اجابة مفيدة وقلت له علمي وعلمك ياالجماعة ديل عشوائيين بندفسوا ساكت في نص العيال وهذا بعيد واما اكونو احرف ابو واحرف ام بتلاقوا من خلال تقنية حديثة لم تكتشفها اجيال السودان الرسالي بعد ولي قدام.....





Post: #2
Title: Re: كــــلام خـاص شـديد بتـــــــــاع كبار بس ؟؟
Author: هشام هباني
Date: 10-31-2005, 04:52 PM
Parent: #1

نواصل اخوتي في نبش حالة هذاالسؤال المسكوت عنه وهو سؤال صديقي( الحسكنة) وهو سؤال عالق بلا ادنى شك في ذاكرة معظم ابناء ذاك الجيل الذي نشأ في جو ابوي مشحون بعواطف مبتورة فيها شيء كثير من التمثيل لا يعبر حقيقة بالضرورة عن حالة التوافق الزوجي بين من عدمها حيث بيت الاسرة بتلكم الشاكلة التي سردتها وهو بيت من حيث الحيز المكاني لا يصلح ابداان يسع اسرة بحجم تلكم الاسر الكبيرة وغير مؤهل ان تتم فيه التنشةبالشكل السوي والسليم والمطلوب لتخريج نشء سوي نفسياحيث التعبير عن العواطف بين الاب والام ليس طبيعيا في الظاهر وهو بالتالي يؤثر على نفسية الابناء ولا نعرف اسباب تلكم الظاهرة ولكن حالةالتناسل تنفي هذا الزعم اذان التناسل يعبر ماديا ومعنويابالضرورة عن حالة التوافق والاشباع العاطفي المتبادل بين طرفي العلاقة وهما الاب والام وهو التوافق المثمر من خلال عملية بيولوجية ادت للانجاب وتوسع الاسرة..
فالخصوصية مطلوبة في العلاقة بين طرفي الاسرة الاب والام داخل البيت ولها قداستها واحترامها ولابد من حيز مكاني في البيت له قدسيته يعبر عن هذه الخصوصية وهي حجرة النوم اي حجرة الزوجية وهي مكان مقدس يحترمه الجميع ولا يمكن للعيال باية حال من الاحوال دخوله الا باذن ..... ونواصل..

Post: #3
Title: Re: كــــلام خـاص شـديد بتـــــــــاع كبار بس ؟؟
Author: هشام هباني
Date: 11-01-2005, 08:33 AM
Parent: #2

نواصل ...
حتى العيال يفترض ان تكون لهم خصوصية في ذات البيت وبالذات البنات ينبغي ان تخصص لهن حجرة خاصة وذلك مما يناسب هذه الخصوصية.... وايضا الاولاد الكبار ايضا لهم خصوصية الحيز المكاني من دون الاختلاط بالصغار حتى تتم التنشئة في هذا البيت في جو نفسي صحي معافى... والسؤال هو لماذا لا زال الرجل السوداني يتبرم بل يمتنع عن اظهار عواطفه الطبيعيه تجاه زوجته في حضرة الابناء او الاغيار من الاسرة او خارجها وهو امر سلبي يلقي بظلاله على العلاقة بين الاثنين وايضا على الاطفال..

ففي الغرب هنا مهم جدا عندما يتم قبول ابنك او بنتك في المدرسة تسأل اولا عن طبيعة السكن الذي يعيش فيه هذا التلميذ الجديد هل هو سكن ملائم ام لا حيث بالضرورة ان كانت الاسرة تتكون من اربعة افراد ان يكون السكن يحتوي على الاقل حجرتين اي حجرة للوالدين وحجرة للطفلين واذا كانوا اكثر من اربعة ينبغي ان تستأجر شقة بها ثلاثة غرف وهو امر احيانا لا يتلاءم مع دخل الاسرة المعاشي الشهري خاصة اذا كانت اسرة في حجم الاسر السودانية التقليدية التي في المتوسط تتكون من خمسة افراد وبالذات الاسر اللاجئة والمهاجرة القادمة من الوطن للاستقرار في الغرب حيث يرتفع سعر الايجار للشقة كلما زاد عدد الغرف..... وهي معادلة صعبة ونريد مشورة من اهل الشأن من علماء الاجتماع والصحة النفسية ان يثروا معنا هذا الموضوع للفائدة العامة حيث اللاجئون والمهاجرون السودانيون يواجهون واقعا جديدا يحتاج وعيا جديدا للتكيف مع هذه المجتمعات الجديدة وايضا نحتاج هذه االمشورة لصالح الاهل في السودان والذين يعيشون في ذات الواقع الذي كان معاشا لصديقي صاحب السؤال عنوان البوست ولي قدام نواصل

Post: #4
Title: Re: كــــلام خـاص شـديد بتـــــــــاع كبار بس ؟؟
Author: Sudany Agouz
Date: 11-01-2005, 03:19 PM

أخى وصديقى هشام ..

كم يعجبنى تفكيرك وسرعة بديهتك .. وقلمك الواقعى واللاذع أحيانا .. وهو أيضا
يدخل ضمن نطاق الكاتب والشاعر الذى يشعر بكل ما يدور حوله .. وله القدرة والمقدرة فى
أساليب المحسنات البديعية أو الجمالية .. من استعارات وكنايات .. الخ .. الخ ..

ولهذا لم أكذب عندما لقبتك بهشام همباتى .. والهمبتة فى الكتابة لها مدلول خاص ..
تجعل القارىء يتوه بتيه يتنقل بين الكلمات والسطور .. ثم تقفز به من فكرة الى
أخرى .. دون أن يشعر ..

فالموضوع الذى اخترته.. له من الأهمية والتى لم يفكر فيها أحد المنبريين من قبل ..
وهى مسألة خصوصيات الأب والأم .. وكيفية المعايشة داخل المنزل أو الغرف .. وكم هو
جميل تعبيركم عن قدسية غرفة الوالدين ..

استمر أخى .. ولنا لقاء معكم باذن الله ..

وكل عام وانتم بخير ..

عمك الفنجرى .. عشان ماتزعل ..
أرنست

Post: #7
Title: Re: كــــلام خـاص شـديد بتـــــــــاع كبار بس ؟؟
Author: ادريس خليفة علم الهدي
Date: 11-03-2005, 04:52 PM

الخال الحبيب ود هباني
سلام كتييييييير
دي عبقرية حواء السودانية
ومن غير ليه
كل الود

Post: #5
Title: Re: كــــلام خـاص شـديد بتـــــــــاع كبار بس ؟؟
Author: EL fahal Abdelatif
Date: 11-03-2005, 11:30 AM
Parent: #1

العزيز هشام كل سنة وانت طيب
ذكرتنى نكتة عبد الرسول دياب..مع القهوة....امال التنى وين...بتصرف شديد ..
التحية عبر هذه النافذة للاخ عبد الرسول دياب ..وكل سنة والجميع بخير..

عبد اللطيف

Post: #6
Title: Re: كــــلام خـاص شـديد بتـــــــــاع كبار بس ؟؟
Author: محمد عثمان الحاج
Date: 11-03-2005, 12:49 PM
Parent: #5

ود هباني كل سنة وانت طيب. انا قلت تمشيا مع عيد حزين آخر في الغربة أقعد اسمع أغنية النور الجيلاني جانا العيد وانت بعيد، لكن بوستك ضحكني جدا وخلاني افرفش شوية وأقول ليك حسب مصطلحات الكهنوتية الظاهر انو الجيل السابق في السودان تم الحمل به بواسطة:

Immaculate Conception

وربما يكونوا ناس السودان اول من اكتشف التلقيح خارج الرحم وزراعة الاجنة ونحن ما عارفين!

Post: #8
Title: Re: كــــلام خـاص شـديد بتـــــــــاع كبار بس ؟؟
Author: هشام هباني
Date: 11-04-2005, 02:31 PM
Parent: #6

الاحباء/ ادريس والفحل ومحمد عثمان


العيد مبارك عليكم وعلي اهلنا ووطنا

لكني يا ود الفحل انا ذاتي ما لاقي الاجابة حتى حكاية الراكوبة والقهوة الفيها دي ذاتها ما واقعة لي في راسي خاصة ناس القطاطي ما عندهم رواكيب ملحقة وتحياتي للاخ/ عبد الرسول دياب

اما انت اخي الباشمهندس/ محمد عثمان

الناس ديل اديتهم اكبر من واقعهم ما اظنهاالحكاية اكتر من سوق (ام دفسو) اي عشوائيين ولذلك مصدر وسرالعشوائية عندنا نحن السودانيين ناجمة من البداية البيلوجية العشوائية دي ونحن شعب لسه اقول ليك : كلام جميل لكن ما معقول ..

الابن الحبيب/ الناظز

والله عقل حواء السودانية هي ام الامور والله اديها الصحة؟؟

محبتي واحترامي

Post: #9
Title: Re: كــــلام خـاص شـديد بتـــــــــاع كبار بس ؟؟
Author: Ibrahim Adlan
Date: 11-04-2005, 04:08 PM
Parent: #1

الكميتري ودهباني

تسجيل حضور وبطاقة عيديه ملونه ليك و للاسره الكريمهوالقابله ربنا يحقق الاماني

Post: #10
Title: Re: كــــلام خـاص شـديد بتـــــــــاع كبار بس ؟؟
Author: ادريس خليفة علم الهدي
Date: 11-04-2005, 07:02 PM
Parent: #9

الخال ود هباني
كل عام ولنت والعائلة الكريمة بألف خير

يا خال لو بتذكر الموص والنشا ثقيلة علي المعدة وثقيلة علي ..........

دي من عبقرية حواء السودانية لها حبي وتقديري


ولك كل الحب والمودة