النفـط نفـط بحر ابيض ....وعنـدنا العكاز ....وما اشوفك بغادي يا عوض الجاز!!!

الاخبار الواردة من السودان تتحدث عن اكتشاف بحيرة من النفط في منطقة نعيمة بشمال النيل الابيض ( مسقط راسي) وهي قرية تقع علي بعد اميال من ضفة النيل الابيض الشرقية اي تقع جنوب مدينة القطينة وشمال مدينة الدويم علي الطريق الرئيسية شارع كوستي الخرطوم..
وظلت هذه القرية رغم انها معقل الادارة الاهلية لنظارة الحسانية والحسنات لكنها لا تتمتع بالموقع المميز الجميل واهلها يمتلكون جل اراضي النيل الابيض شرقا وغربا وللاسف تعيش بين الكثبان الرملية( القيزان) في منطقة جافة لبعدها عن النيل اميال حيث الماء والخضرة.. وقد سالت نفسي كثيرا لماذا اختار الاهل لقريتنا هذاالموقع الجاف وهو سؤال دوما يؤرقني وكثيرا ما سالت عليه الاهل..ولم احصل له علي اجابة..وهو لماذا بعد كل هذ النفوذ الاجتماعي القبلي والاملاك الواسعة من الاراضي علي ضفاف الابيض الجميل لم تختاروا موقعا عبقريا علي ضفة الابيض الجميل مثل بقية اهلنا في القرى المجاورة والتي تستمتع بمجاورة النهر البحر .. ولكن بعد ورودالاخبار القادمة من الوطن تتحدث عن هذا الكشف العظيم تعطيني الان الاجابة النهائية والسعيدة ويبدو انها كانت سرا مقدسا يحتفظ به الاجداد وهاهي الاقدار تذيع هذا النبأ السعيد.. ليفرح الاحفاد باعمار منطقتهم الفقيرة بعد ضنك وجفاف وخراب عندما يستخرج النفط في هذه المنطقة الامر الذي سيؤدي الي الاهتمام بالمنطقة...وهو بالتاكيد خير سيعم كل الوطن الجميل لانه كنز لكل الوطن الجميل اذا نبذنا هذه العنصريات والقبليات والجهويات البغيضة وهذه الروح الشريرة التي ايقظها هذا النظام المجرم...

((اها اسمعني يا عمر البشكير ويا عوض الجاز يا رب الجاز ...السودان بعد ما خربتوه وقسمتوهو و عملتوهو مهمشين وقبايل وعنصريات وجهويات وبيوتات وعشائر وكل زول شال البندقية وزرزركم قعدتو معاهو امسك لي واقطع لي توزعوا عليهو من ثروة البلد زي ما عايزين تقول ثروة ابوكم...اذا استمر ذات الحال وذات المنوال ما في زول احسن من زول وقريبا حتسمعوا (الحركة الوطنية لتحرير عموم بحر ابيض) .... وحنقول ليكم ده بترول بحر ابيض لسكان بحر ابيض...وبحر ابيض ده قامت منو المهدية ظاااااااطها...والناس المتفلفسين وناس العلم والسياسة والفكر الفيهو اعبوا الدنيا كلها من القطينة والكوة بس بنكفيكم...ده غير الدويم وكوستي والشوال وربك والمرابيع وودنمر والصوفي وشبشة ونعيمة والشيخ الصديق وود جار النبي والهشابة وود الزاكي والقراصات والدرادر والجمالاب وود شلعي والدمبو وود النجومي وغريقانة وحريدانة والكنوز والجزيرة ابا والمرابيع وقوز البيض والترعة الخضراء والعرشكول وام جر والكريدة واللعوتة والكتير بله والقردود والشور والطلحة والعلقة وام رمته والقليعة وحتات كتيرة مليانة دعت...........اعملوا حسابكم؟؟

ظااااااااااطو

ود هبانى اخوى ...
ابشر بالخير ... يعنى القطن قطنا و كمان النفط نفطنا ؟؟؟؟ بعد دا الداير انفصل اللينفصل !!! كل شاه معلقا من عصبتا !!!
كسره :
زمان استغفلونا و استهبلونا و شالو قطن أهلنا و وزعوا ريعه لكل أهل السودان !!! فقوبل ذلك بالجحود من البعض !!! أها يا ود هبانى القطن قطنا و البطرول بطرولنا و البلد بلدنا ...
و لا نقطة بطرول تانى بتمشى لناسا تانيين ... البركه فى القطن ... عفينا ليم !!!! لكن البترول ؟؟؟ أها !!!!!!
تخريمه :
الزيت كان ما كفى البيت حرم على الجيران ... اتحدوا يا أهل الجزيرة و الأوسط ... و لنا عودة ...
عبدالماجد

هشام نعيمة

سلامات

بسأل من الأخ / جمال محمد إدريس هبانى


بغدين إنت قصدك نفط ولا نبق

سعادة الدكتور عبد الماجد( القائد العام لتحرير الجزيرة)

لكم التحايا والود
نود اخطاركم باننا من ذات الاسباب وذات الهم الوطني ايضا قررنا تكوين الحركة الثورية لتحرير بحر ابيض... وهي حركة وطنية جديدة تسعي لرفع المظالم عن هذا الاقليم المهمش وتضم في عضويتها خيرة الكوادر المثقفة في الوطن ذات الخبرات الممتازة في كل مناحي الحياة وقد اقسمت هذه الكوادر علي تحرير هذا الاقليم من سطوة عصابات الشمال ومحاسيبها...وان هذا النفط الذي تم اكتشافه اخيرا في اقليمنا هو ملكية خاصة باهالي هذا الاقليم ولا مانع من عضوية هذا التنظيم في التنسيق معكم للتشاور حول امكانية التحالف لتكوين حركة سياسية عامة تنتظم كل الاقليم الاوسط... وسنخطركم لاحقا بكل التطورات والمستجدات بشأن هذا التنظيم الوطني الثائر...والمجد والخلود لجماهير بحر ابيض.

الشيخ هباني الرئيس العام والاوحد لحركة تحرير بحر ابيض