الهلال يشكو المريخ لهيئة علماء السودان السلفية!!

تلقت هيئة علماء السودان السلفية اغرب شكوى من ادارة نادي الهلال العاصمي طاعنة في النصر الذي حققه المريخ العاصمي علي الهلال!!
و حيثيات الشكوى تضمنت الطعن في اهلية المريخ الاسلامية في ظل دولة الاسلام السودانيةحيث هو النادي الوحيد من بين اندية السودان الذي يحمل العلم الاحمر والنجمة الصفراء وهي شبهة الحاد ويسارية وتشبه باعلام بعض الانظمة الشيوعية السابقة والتي تتعارض جذريا مع توجهات دولة الاسلام والمشروع الحضاري الاسلامي بالسودان!! وعليه يطالب ( الاهلة) المتشددون هيئة علماء السودان السلفية بشطب فريق المريخ العظيم من سجل الاتحاد العام للكرة في السودان وذلك لتعارض شعاره المشبوه مع توجهات دولة المشروع الحضاري حيث وحدهم فرقة الهلال هم الفريق الذي يحمل راية الاسلام الزرقاء وشعارها الهلال!!
وقد تضمنت حيثيات الشكوى ايضا التشكيك في صحة هدف اللاعب وكابتن المريخ( فيصل عجب سيدو) حيث كان الهدف من تسديدة يسارية علي يمين الحارس الهلالابي ..اي هدفا يساريا شيوعيا!! وهو هدف مستفز لمشاعر مسلمي الهلال والسودان قاطبة حيث تمنع الشعيرة الدينية التسديد بالقدم اليسرى وهي بالتاكيد تسديدة وراءها شيطان رجيم!!
وايضا في ذات السياق كانت التسديدة من مسلم ناقص الاهلية اي مسلم غير حر!!
ودليلهم قد كان من اسم اللاعب وكابتن المريخ ( فيصل عجب سيدو)!!
ـــــــــــــــــــــــــــــــــــــــ
من هنا ادلف لموضوعي الاساسي بعد هذه المقدمة الترطيبية وهو موضوع استفزني كثيرا وانا مريخابي متعصب جدا منذ طفولتي ..فعندما كنت اشاهد مباراة كأس السودان الاخيرة بين العملاقين الهلال والمريخ واثناء تعليق مذيع البث المرئي وهو يذكر فجأة اسم لاعب وكابتن المريخ المبدع فيصل العجب كاملا ( فيصل عجب سيدو)!! حينها طافت بي الذاكرة في لحظات وهي تعيدني الى قريتي في ذلك الريف النائي من موطني البعيد القريب حيث هذا الاسم محتكر من قبل اهل لنا نعزهم ونقدرهم فهم اباؤنا واخوالنا وخالاتنا وجداتنا واخواننا واخواتنا وكنت منذ صغرى امقت هذا الاسم الشائع بين اهل قريتي وهم يتعاملون معه امرا واقعا من غير تلكم النظرة الاستعلائية العنصرية ولكن للمتمعن فيه هو اسم مفعم بالعنصرية والاستعلائية ومهين لاولئك الذين تسموا به وهم اناس نحبهم ونقدرهم وهو يشكل ادانة واضحة لثقافتنا المحلية وتداولها مثل هذه الاسماء المهدرة لكرامة وادمية الانسان وهي من اثار ازمنة الرق القبيحة والتي ينبغي ان نمحو اثارها من ذاكرتنا لا ان نمررها امرا واقعا وهي نقيصة في وعينا بل ينبغي محاربتها وحتى ولو رسميا بقانون يحرم التسمي بهكذا اسماء!!
فالمبدع فيصل العجب احيانايمثل الوطن وعزته في مباريات دولية هو قائد لفرقة المريخ واحيانا لفرقتنا القومية حاملا شعار الوطن وعلمه وشموخه وتاريخه وهو وطن ذاخر بالبطولات
والماثر و بالطبع جدود واسلاف هذااللاعب المبدع كابتن فيصل بالتاكيد هم ابطال شامخون اقوياءساهموا في تحرير هذا الوطن..فكيف لمثل هذا الرائع وهو يرفع راية الوطن يمثلنا في الساحات العالمية وفي ذات الوقت يحمل اسمايرمز للاستعباد والاضطهاد والاسترقاق واهدار ادمية الانسان وهو ما يدين وعينا واخلاقنا وانسانيتنا وهو امر بغيض ومؤسف ولكني مضطر لتناوله بهذه الصراحة كواجب اخلاقي وانساني يمليه علينا ضمير وطني سليم
هو البوصلة التي تقودنا لسودان الحريةوالمحبة والتاخي و العدالة المساواة والسلام!!
وعليه اطالب كل الوطنيين ان نسعي سعيا جادا كي نمحو اثار ذلكم الزمن البغيض..من خلال التوعية الثقافية واصدار القوانين المحرمة للتسمي بمثل تلكم الاسماء!!
وليكن اسمك يا كابتن فيصل (فيصل عجب الوطن) لا( فيصل عجب سيدو) حيث لا سيد الا الله لانك تعجبنا وتمتعنا و تشرفنا وترفع رؤوسنا عاليةلا نرضي لك التسمي بهذا الاسم المهين لانك فيصل( عجـــــــــــــــــــب الوطن)!!

محبتي واحترامي

هشام هباني

سيدي الناظر

سلام

يا اخي عليك الله هي دي كانت كورة , والله تأسفت علي الوقت الذي قضيته الي جانب التلفاز تلك الامسية

ود عوج الدرب

سلامات

والله الكورة..مع العوج الفي اسم (العجب) حبيبنا مسخت علينا تب!!
ونحن ما جايبين خبر للمصايب دي.. ولا رايك شنو يا زول يا حقاني!؟
شنو رايك في انو البلد اثار الاستعباد والاسترقاق لا زالت فيها قايمة!؟

العمدة هباني:

كيف بالله يا ود هباني تشجع فريق المؤتمر الوطني؟؟؟؟




بعدين أنا خايف يغيروا أسم فيصل العجب من عجب سيدو الي عجب المؤتمر الوطني


( وجه هلالي وطني)

الناظر هباني

عجب سيدو والله فعلا فعلا اسم قبيح قباحة زمن حكايات

ابوي فلان ويا عب قوم لسيدك وخادمي دي دايرة اهديها

لناظر القبيلة الفلانية وانشاءالله الهبانية انعتقوا

تماما من هذه الترهات التي تستعبد الانسان ومعلوم

نظارة الهبانية في النيل الابيض الضاربة في جزور التاريخ

ود هبانى
مبروك النصر المجانى
الجاكم من الارباب الجانى
على الازرق القانى..

ياخى مبروك للمريخ...لكن بصراحة لو الهلال غلب فى المباراة دى..انا كنت ما بشجع هلال مريخ للابد ...وانت نفسك قلت العملاقين هلال مريخ...اذن ما ممكن عملاق تانى يكون مقلبوب اربعة سنوات وراء بعض فى كاس الدورى لابد من التنافس..ومن المفترض ان نستغل هذا التنافس الشريف. فى حكم البلد ديمقراطيا بطريقة جديدة..من غير انتخابات..يعنى البشير..يتنازل لسلفا..يبقى رئيس..عشان اخوتنا فى الجنوب يتنعمون مثل الكيزان...ثم سلفا يتنازل لياسر عرمان..عشان الشيوعين ينققنو شوية..تعبو خلاص ونقد ما خلى ليه بيت ما اندسى فية وزل كايس ليه مافى..حتى ناس الامن مشغولون بكنز ما تبقى من رماد ولسان حالهم بقول بكرة ممكن تنقلب...وبعد داك يدوها ل ابو هاشم الزول دا تعب خلاص وقلبى عليه..كم سنة قاعد برة..واسى قالو جائى برا..عبر كسلا..على قول البونى لو وصل مع اوائل العيد سوف يرتفع سوق الخراف..لان المريدين سوف يقلبون الارض حمراء من الذبائح...وبعد داك يمسكها الامام ونقول للسودان الى الامام..حتى نصبح مثل الهنود دمقراطيا
تصور ياهشام لو قالو لوحد ياهندى بزعل وهم الوحيدون المتطورون ديمقراطيا وتكنلوجيا..
ثم نجى لموضوع الكابتن فيصل العجب سيدو ونصر المريخ المستحق عندى المزورعندالارباب.
.فعمك العجب سيدو..قد تفنن فى الخلاص من اسمه بتسمية ابنه فيصل..واظنه مشى السعودية سنتين وجد كل الجعليين والكواهلة والنوبة سودانين لذا اختار اسم فيصل...وسوف يكون ابن الكابتن مازن ..سوف تكون حفيدته مزنة..شفت كيف..الاسم تسعود..تصور نضال احمد هشام.زاملت فى الجامعة مزنة مازن فيصل..الم يتغير التاريخ كلية لذا نقول مبروك للمريخ ومبروك ل الكابتن فيصل العجب...وسيدو دى ياهشام لو ما كلام المعلق المنشى بحلاوة النصر لم يكن احدا يدرى اسمه كاملا..التحية للهلال فى هزيمته وللمريخ فى نصره..والايام دول...والسنين قادمة
ولك حبى

ودهباني المريخابي الاصيل

التحية ليك وانا مريخابي متعصب وسياسي متمرس ومرحبا بمواضيعك الشيقة لمجابهة الاخوة في الفرع (أو المريخاب الزعلانين) وكتر لينا من مواضيعك المثيرة خلي الجماعة ديل يهدوء شوية بعد اللوعة العجبية الشمالية ويديك العافية

ابومصطفى

الهلال والمريخ قصة عجيبة بكرهو بعض وبيريدو بعض في ذات الوقت ، الهلال والمريخ جابو لينا المحترفين وأنصاف المحترفين وحالنا يا هو نفس الحال ، الهلال والمريخ سبب تأخر الكرة السودانية ، الهلال والمريخ أهم من السياسة الخارجية ومشاكل السودان الداخلية ، الهلال والمريخ فيهما المتنفس الوحيد لكافة مشاكل الغبش والبسطاء الذين يزحفون إلى المعلب منذ الظهيرة متزودين بتسالي وشئ من قصب سكر وبعض التمباك لزوم الكيف .
الهلال والمريخ وجاهة إجتماعيه لرئيس النادي وسكرتير النادي ومدرب النادي. المريخ يتغلب من أم الطيور ما عندو مانع بشرط ما ينغلب من الهلال ، والهلال يتعادل مع ناس شلعوها الخوالدة بشرط يفوز على المريخ أو يتعادل معاهو في اسوأ الأحوال ، التحكيم فاشل في نظر جماهير الفريق المهزوم كان هلالاب وكان مريخاب.
الكورة الأخيرة فاز المريخ على الهلال وبجدارة وشال كأس السودان وقبلها فاز الهلال ببطولة الدوري وبجدارة أها الحمبكة والبكا في شنو . وزمان أب عاج زاتو لمن حمبك قالو قلبها جماهيرية ، وجماعتنا الحاكمين الآن يمكن يقلبوها شعبية دفاعية يعني لو جبت قون واحد تكون هداف الدوري والكاس.
الغريبة لو ما في هلال ما حا يكون في منافس للمريخ وبرضو لو ما في مريخ ما حا يكون في منافس للهلال والفريق القومي أغلب لاعبيه من الهلال والمريخ وناس البيت تلقي نصهم هلالاب والنص التاني مريخاب وحتي لعيبة الأندية الأخرى بتلقي عندوهم ميول للهلال والمريخ وحتى ناس الأقاليم سموا أنديتهم بأسماء الهلال والمريخ فأصبح هلال البيض ومريخ كوستي وهلال رفاعة ومريخ بورتسودان وهلال نيالا ومريخ جوبا إلي آخر القائمة ، ولمن قلت لي واحد عامل بيفهم في الكورة ليه ما يكون في أسماء تانيه قال لي يا أخي الإنجليز العملو الكورة هم بعملوا كده ، ما شفت مانشستر يونايتد ومانشستر سيتي مثلا ، قلت ليهو يعني هسع ليدز يونايتد ممكن يكون بشبه مانشستر يونايتد ، قال لي لا يا وهم يونايتد دي ما الموضوع الموضوع في مانشستر ، قلت ليهو طيب ناس مانشستر كورتهم بتشبه كورتنا قال لي إشتراك في الإيه آر تي وإتفرج .
المهم يا عالم لازم تكون عندكم روح رياضيه ولازم تقولو مبروك للمريخاب ومن حقهم أن يحتفلوا ويفرحوا بفوزهم عليكم أيها الهلالاب فقد ملأتم سماوات أمدرمان في أسابيع قد خلت أنوارا وألعاباً نارية وأحتفلتم على طريقتكم الخاصة بفوزكم ببطولة الدوري وحق على المريخاب أن يحتفلوا ويملؤ سماوات العرضة وما جاورها صخباً وضجيجاً وألعاباً نارية حمراء وصفراء
لا مريخ بلا هلال ولا هلال بلا مريخ
مبروك أخي ودهباني وقبيلة المريخاب قاطبة فوز فريقكم المستحق وهاردلك أو قل حظ أوفر – حتى لا أرمي بالفسوق والكفر لتشدقي ونطقي كلمة غير عربية كافرة – لناس الهلال والهلالاب.
بالمناسبة حكاية الأهلة المرفوعة في مآذن المساجد ما هي إلا وهمه كبيرة وليست من الدين في شئ حسب رأي حبوبتنا بت حاج علي عليها رحمة الله حيث تري في هذه الأهلة ضرب من ضروب الإستعمار التركي والدولة العثمانية وقياساً على هذه الفتوى لم يزين الهلال مسجد نادي المريخ بأمدرمان والصلاة في الجامع أب هلال والجامع أب نجمه واحد.
من أطرف ما تفعله العصبية والحمية أن أحد أبناء الموردة الأصيلين وفي يوم زفافه وضع في منديل الجرتق في جبينه هلب بدلا عن هلال فحل بعض من المشكلة وبقي النصف الآخر بلا حل ، حيث أن الأغنية تقول وفي جبينه أو جبينها هلال فما هو رأيكم دام فضلكم.

[rRED]صـديقـي النبيـل ود هباني ..
تحية حمـراء من الوريـد إلى الوريد ..
تيحـية حمـراء بلـون الدم المريخـي ..

هـو فعـلا عجـب السـودان والشـعب ..
وأهـم حـاجـة هـي اسـم (سـيدو) ..
فأهل زريبة العيش يقولون للاعبهم هيثم الصادق (سيدا)
وأهل الزعيم أطلقوا علي العجب اسـم (سـيدو) ..

وعلمني لون الجـرح النازف
أن الأحمر أسمى من كل الألوان..

GOOOOOL

فوق فوق مريخنا فوق ...
من غيرنا يعطى لهذا الشعب معنى أن يعيش و ينتصر ....
قد تغرقنا السياسة ( بت الكلب !! ) ليجمعنا حب المريخ العظيم ...
و لهذا فهو عظيم أنت يا مريخ مرفوع الهمم ...

عبدالماجد

الفـردة عبد الماجـد..
تحية حمراء من الوريد إلى الوريد ..
ومن الدم إلى الدم ..

Quote: من غيرنا يعطى لهذا الشعب معنى أن يعيش و ينتصر .... قد تغرقنا السياسة ( بت الكلب !! ) ليجمعنا حب المريخ العظيم ...

لـذلـك صـدق مـن أسـماه :
سـودان المـريـخ ..

هسـع عليك الله لو الكيزان كلهم زي الوالي دا مالهم !!؟؟

علمنـي لـون الجـرح النـازف
إن الأحمر أسمى من كل الألوان

الاعزاء

خالد, اسامة, كيغا,ابوقوتة, الملا عمر,حسين وعبد الماجد

سلامات

يبدو عليكم ما شاء الله كلكم( رشاشات)!!

انتو دحين رشاشات دي بقولوها للهلالاب ولا المريخاب!؟
وبرجع ليكم بعد مشوار....لزوم التسخين.


هشام

Quote: الفـردة عبد الماجـد.. تحية حمراء من الوريد إلى الوريد .. ومن الدم إلى الدم ..

فرده و بس ؟ يا حسين اخوى !!!!
و صدقت و الله فهى فعلا من الوريد للوريد ومن الدم للدم
ناس الربوه و البرياب ديل ما اهلنا عديل ...
الوالد رحمه الله امو ( حبوبتنا يعنى ) كانت من البرياب ...
ناس شرف الدين و بشير و المرحوم عبالمحمود عبدالله محمد برى ديل اولاد عمتنا لزم ( غناوه بت عبدالماجد ) ....
فالتحية لسودان المريخ العظيم ...



عبدالماجد

Quote: انتو دحين رشاشات دي بقولوها للهلالاب ولا المريخاب!؟

ود هبانى اخوى ...
كدى بطل ( الاستهبال !!! ) ...
قال الرشاشات منو قال ؟؟؟؟
بس اعمل حسابك ما ( اطقوك !!! ) بحجر بتاعين ( ثورة الحجارة اياها !!! )
اصلو صاروخ ( ارض \ جو !!! ) بتاع ود العجب ده ركب فيهم جنا ( احمر !!! )
عبدالماجد

يلا

قالوا الغلابه فرحوا

بنقوول ليهم مبروك عليكم فرحكم

بس ما دوامه بترجعوا لبيت الطاعه تاني